Guðmundur Gíslason vann yfirburðasigur á Hraðskákmóti Reykjavíkur en Dagur Ragnarsson er Hraðskákmeistari Reykjavíkur 2017

Í örstuttu viðtali við fréttaritara eftir níundu og síðustu umferð Skákþings Reykjavíkur á föstudagskvöld sagði Guðmundur Gíslason aðspurður, að hann væri ekki að fara að aka vestur á firði það kvöldið, heldur ætlaði hann að vera í bænum á laugardag og vinna síðan Hraðskákmót Reykjavíkur á sunnudag. Og það gerði hann heldur betur! Guðmundur var búinn að vinna allar tíu skákir sínar og tryggja sigurinn áður en síðasta umferð hófst; vann líka þá síðustu og sigraði þannig með fullu húsi. Sá er þetta ritar, rekur ekki minni til að mótið hafi unnist með þessum hætti áður. Í öðru stuttu viðtali, eftir að mótinu lauk, sagðist hinn hógværi Guðmundur hafa haft heppnina með sér í a.m.k. tveimur skákum. Heppni í tveimur skákum telst þó varla mikið á 11 umferða hraðskákmóti með á fjórða tug þátttakenda, þar sem margir af þeim sem röðuðu sér í efri sætin á Skákþinginu sjálfu voru með. Sigurvegarinn hækkar enda um tæp 50 hraðskákstig fyrir árangurinn.

Guðmundur á þó lögheimili, eins og kunnugt er, fyrir vestan og er ekki skráður meðlimur í taflfélagi í Reykjavík og því er Dagur Ragnarsson, sem varð í öðru sæti með 8 vinninga og barðist á toppborðunum allan tímann, Hraðskákmeistari Reykjavíkur 2017. Jafn honum að vinningum en lægri á stigum varð síðan Bárður Örn Birkisson. Vinningi neðar með sjö vinninga komu síðan einir fimm skákmenn.

• Heimasíða TR (myndir frá mótinu)
• Lokastaðan á Chess-Results

Þrímennt á toppnum á Skákþingi Akureyrar

Í gær var fimmta umferð Skákþings Akureyrar tefld. Á fyrsta borði tefldi forystusveinninn Andri Freyr við Tómas Veigar tefldu báðir snarplega. Andri missti þó þráðinn í miðtaflinu og mátti gefa skiptamun fyrir litlar bætur. Þá var komið að Tómasi að glopra þræðinum niður en þegar Andri virtist vera að snúa taflinu sér í vil gerðist hann veiðibráður og lék því niður í tap. Þeir félagar eru því jafnir á toppnum með fjóra vinninga og í þeirra hóp slóst einnig Jón Kristinn, sem lagði Hrein örugglega að velli.

Dáindiskeppendurnir Sveinbjörn og Ulker sömdu um skiptan hlut og var sú síðarnefnda þó með tögl og hagldir í lokastöðunni, en var tímanaum og treysti sér ekki í harkið gegn svo slægum skákjöfri sem Sveinbjörn er. Alex Cambray fékk snemma yfirburðatafl gegn Karli sem aldrei fékk rönd við reist og náði ekki teljandi mótspili þrátt fyrir viðleitni í þá átt. Haraldur lagði svo Ágúst með kóngsbragð að vopni og hinn yngissveinninn, Fannar Breki, beið og lægri hlut í sinni skák sem var gegn Heiðari.

Þegar tveimur umferðum er ólokið eru áðurnefndir þremenningar efstir og jafnir með fjóra vinninga, Sveinbjörn, Ulker og Alex hafa þrjá; Haraldur og Hreinn tvo og hálfan en aðrir minna.

Í sjöttu og næstsíðustu umferð sem háð verður næsta sunnudag eigast þessi við:

• Andri-Sveinbjörn
• Tómas-Ulker
• Haraldur-Jón Kristinn
• Hreinn-Alex
• Heiðar-Gabríel
• Ágúst-Fannar
• Karl situr hjá

• Heimasíða SA
• Chess-Results

Kappteflið um Friðrikskónginn heldur áfram í kvöld

Eins og undanfarin ár standa KR og  Gallerý Skák saman að GrandPrix mótaröðinni um Taflkóng Friðriks Ólafssonar sem fram fer fjögur mánudagskvöld vestur í Frostaskjóli. Annað mótið fer fram í kvöld og hefst 19.30. Tefldar verða 9 umf./10. mín. skákir. Þrjú bestu mót hvers keppenda telja til stiga og vinnings.

Opið öllum án þátttöku í heildarkeppninni.   

Fjórða mót Bikarsyrpunnar ásamt Bikarmóti stúlkna fer fram næstu helgi

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað þriðja árið í röð. Mót syrpunnar í vetur verða fimm talsins og hefur umferðum hvers móts verið fjölgað í sjö.

Fjórða mót Bikarsyrpunnar hefst föstudaginn 10. febrúar og stendur til sunnudagsins 12. febrúar. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Við endurtökum leikinn og höldum að auki meðfram Bikarsyrpunni Bikarmót stúlkna sem mæltist vel fyrir á síðastliðnum mótum. Með því gefst stelpum sem vilja prófa form Bikarsyrpunnar aukið tækifæri á að spreyta sig áður en þær taka þátt í sjálfri Bikarsyrpunni. Tefldar verða fimm umferðir í stúlknamótinu, ein á föstudag og tvær hvorn daginn laugardag og sunnudag, en að öðru leyti verður fyrirkomulag hið sama og í Bikarsyrpunni. Nánari dagskrá má sjá hér að neðan.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2001 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Dagskrá Bikarsyrpu IV:

1. umferð: 10. febrúar kl. 17.30 (fös)
2. umferð: 11. febrúar kl. 10.00 (lau)
3. umferð: 11. febrúar kl. 13.00 (lau)
4. umferð: 11. febrúar kl. 16.00 (lau)
5. umferð: 12. febrúar kl. 10.00 (sun)
6. umferð: 12. febrúar kl. 13.00 (sun)
7. umferð: 12. febrúar kl. 16.00 (sun)

Dagskrá Bikarmóts stúlkna:

1. umferð: 10. febrúar kl. 17.30 (fös)
2. umferð: 11. febrúar kl. 10.00 (lau)
3. umferð: 11. febrúar kl. 13.00 (lau)
4. umferð: 12. febrúar kl. 10.00 (sun)
5. umferð: 12. febrúar kl. 13.00 (sun)

Verðlaunaafhending fer fram strax að lokinni síðustu umferð hvors móts fyrir sig.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu (í stúlknamótinu er ein yfirseta leyfð í umferðum 1-3). Tilkynna þarf skákstjóra um yfirsetu fyrir lok umferðarinnar á undan.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari hvors móts hlýtur að launum bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir samanlagðan árangur í mótunum fimm, þar á meðal er veglegur farandbikar. Þá verða veitt sérstök verðlaun fyrir samanlagðan árangur fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Vinsamlegast skráið þátttakendur sem fyrst, það hjálpar til við undirbúning mótsins. Hlökkum til að sjá ykkur!

Skákstjórn: Þórir Benediktsson (867 3109) og Sigurlaug R. Friðþjófsdóttir (862 6290)

Skráningarform

Skráðir keppendur

Hraðkvöld hjá Hugin í kvöld

Hraðkvöld Hugins í Mjóddinni verður mánudaginn 6. febrúar nk.  og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur á hvern leik eða 5 mínútur + 3 sekúndur á hvern leik eftir fjölda umferða. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Guðmundur Kjartansson er Skákmeistari Reykjavíkur 2017

Guðmundur Kjartansson vann Benedikt Jónasson í lengstu skák umferðarinnar í fyrrakvöld og tryggði sér þar með nokkuð öruggan sigur í mótinu, vinningi fyrir ofan næsta mann. Eftir rólega byrjun vann Guðmundur peð en Benedikt brá þá á það ráð að fórna tveimur til viðbótar fyrir virka menn í endatafli. Guðmundur þurfti að vanda sig við úrvinnsluna og náði að sigla því í höfn rétt undir miðnætti. Þetta er fyrsti Reykjavíkurmeistartitill Guðmundar og óskar stjórn TR honum hjartanlega til hamingju með hann.

Í öðru sæti varð Björn Þorfinnsson sem beitti London kerfinu aftur en í þetta sinn með betri árangri. Sigur vannst gegn Degi Ragnarssyni og Björn endaði með 7 vinninga. Þá komu fjórir skákmenn í 3. – 6. sæti með 6 ½ vinning: Lenka Ptacnikova, Guðmundur Gíslason, Dagur Ragnarsson og Daði Ómarsson.

Nánar verður fjallað um mótið bráðlega.

Verðlaunaafhending verður í dag, sunnudaginn 5.febrúar, strax eftir Hraðskákmót Reykjavíkur sem hefst kl. 13:00.

Önnur úrslit 9. umferðar má sjá á Chess-results.

• Chess-Results
• Skákirnar: 1 2 3 4 5 6 7 8 9

Hraðskákmót Reykjavíkur fer fram í dag

Hraðskákmót Reykjavíkur verður haldið í félagsheimili Taflfélags Reykjavíkur að Faxafeni 12 sunnudaginn 5.febrúar og hefst taflið kl. 13.

Tefldar verða 11 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga.

Þátttökugjald er 1.000 kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni klukkan 12:50.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Ríkjandi meistari er Róbert Lagerman. Undanfarin 10 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir Fídemeistarar:

2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.

Skákþáttur Morgunblaðsins: Umtöluð yfirsjón heimsmeistarans í Wijk aan Zee

Á Nóa-Síríus mótinu sl. þriðjudagskvöld vakti ein viðureign alveg sérstaka athygli. Friðrik Ólafsson og Jón Hálfdánarson mættust þá aftur í kappskák en þá var liðin næstum hálf öld frá síðustu viðureign þeirra sem fram fór á Skákingi Íslands vorið 1969. Þar varð Friðrik Ólafsson Íslandsmeistari í sjötta sinn eftir harða keppni við Guðmund Sigurjónsson en jafnaldrar hans tveir og skólabræður Jón Hálfdánarson og Haukur Angantýsson voru þá einnig meðal þátttakenda. Friðrik gerði jafntefli við Jón árið 1969 og aftur í Stúkunni á Kópavogsvelli. Þar eru línur aðeins teknar að skýrast þrátt fyrir yfirsetur og frestaða skák Jóhanns Hjartarsonar og Andra Áss Grétarssonar. Staða efstu manna: 1.-6. Guðmundur Kjartansson, Daði Ómarsson, Björn Þorfinnsson, Dagur Ragnarsson, Þröstur Þórhallsson og Magnús Örn Úlfarsson 2½ v. ( af 3 ).

Á Skákþingi Reykjavíkur eru nokkrir sömu „höfuðpaurarnir“ í toppbaráttunni en tefldar hafa verið sex umferðir: 1. Dagur Ragnarsson 5½ v. 2.-3. Guðmundur Kjartansson og Björn Þorfinnsson 5 v. 4.-6. Lenka Ptacnikova, Örn Leó Jóhannsson, Daði Ómarsson og Jóhann Ingvason. 4½ v. Á sunnudaginn mætast Dagur og Guðmundur. 

Wesley So með vinnings forskot í Wijk aan Zee

Wesley So halda engin bönd á stórmótinu í Wijk aan Zee sem lýkur um helgina en sl. miðvikudag vann hann auðveldan sigur á Pólverjanum Wojtaszek og náði við það vinningsforskoti á næstu menn. Umtalaðasta atvik mótsins átti sér stað í 7. umferð þegar þessi staða kom upp: 

Wijk aan Zee 2017: 

Magnús Carlsen – Anish Giri

Magnus átti nægan tíma á klukkunni og gat með sigri komist upp í efsta sætið. Nú sá hvert mannsbarn í salnum rakið mát:

56. Hc8+ Kg7

56.... He8 57. Hxe8+ Dxe8 58. Bxe8 er auðvitað vonlaust.

57. Hf7+ Kh6 58. Hh8 mát!

En í stað þess valdi hann:

56. Bf7+?? Kh8 57. Hh5+ Kg7 58. Bxe6+ Kf6 59. Hh6+ Ke5 60. Bh3 Dd2+ 61. Bg2 Dxh6 62. Hxc6

– og þó að hvítur eigi vinningsmöguleika í þessari stöðu náði Giri jafntefli eftir 128 leiki.

Vinningsleiðin minnir heilmikið á lokaskák einvígisins við Karjakin sl. haust, lykilreitirnir f7 og h8 eru þarna aftur mættir.

Viðureign tók sinn toll; þeir töpuðu báðir daginn eftir en Magnús vann í 9. umferð og er enn með í baráttunni en staða efstu manna eftir tíu umferðir var þessi:

1. Wesley So 7 v. (af 10) 2. – 6. Magnús Carlsen, Aronjan, Eljanov, Karjakin, Wei Yi 6 v. 7. Adhiban 5 ½ v.

Sigurskák Wesley So sem hér fylgir einkennist af óvenjumörgum snjöllum leikjum:

Wijk aan Zee; 10. umferð:

Wesley So – Radoslaw Wojtaszek

Katalónsk byrjun

1. c4 Rf6 2. Rf3 e6 3. g3 d5 4. d4 Be7 5. Bg2 0-0 6. Dc2 c5 7. 0-0 Rc6 8. dxc5 d4 9. a3 a5 10. Hd1 e5 11. Rc3 Bxc5 12. Rd5!

Leikbragð sem byggist á hugmyndinni 12.... Rxd5 13. cxd5 Dxd5 14. Rg5! o.s.frv.

12.... h6 13. Bd2 a4 14. Bb4 Rxb4 15. axb4 Rxd5 16. bxc5 Rb4 17. Dd2 Rc6 18. b4! De7 19. Db2 Bg4 20. He1 Hfd8 21. Rd2 Be6 22. b5 Rb8 23. Db4 f5 24. Rb3! Rd7 25. Bxb7 Hab8 26. Hxa4 Hxb7 27. c6 Dxb4 28. Hxb4 Hc7 29. cxd7 Hxc4 30. Hxc4 Bxc4 31. Hc1! 

31.... Be6

Eða 31.... Bxb3 32. Hc8 og vinnur.

32. Hc8! Hxc8 33. dxc8=D Bxc8 34. b6

– og svartur gafst upp. Hann verður að gefa biskupinn fyrir b-peðið.

 

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 28. janúar 2017

Skákþættir Morgunblaðsins

[Event "Tata Steel"] [Site "0:38:33-0:14:33"] [Date "2017.01.25"] [EventDate "2017.01.14"] [Round "10"] [Result "1-0"] [White "Wesley So"] [Black "Radoslaw Wojtaszek"] [ECO "E06"] [WhiteElo "?"] [BlackElo "?"] [PlyCount "67"] 1.c4 Nf6 2.Nf3 e6 3.g3 d5 4.d4 Be7 5.Bg2 O-O 6.Qc2 c5 7.O-O Nc6 8.dxc5 d4 9.a3 a5 10.Rd1 e5 11.Nc3 Bxc5 12.Nd5 h6 13.Bd2 a4 14.Bb4 Nxb4 15.axb4 Nxd5 16.bxc5 Nb4 17.Qd2 Nc6 18.b4 Qe7 19.Qb2 Bg4 20.Re1 Rfd8 21.Nd2 Be6 22.b5 Nb8 23.Qb4 f5 24.Nb3 Nd7 25.Bxb7 Rab8 26.Rxa4 Rxb7 27.c6 Qxb4 28.Rxb4 Rc7 29.cxd7 Rxc4 30.Rxc4 Bxc4 31.Rc1 Be6 32.Rc8 Rxc8 33.dxc8=Q+ Bxc8 34.b6 1-0

Skákdagurinn í Þjórsárskóla

Fimmtudaginn 26. janúar var skákdagurinn haldinn um land allt. Dagurinn er tileinkaður Friðriki Ólafssyni, fyrsta stórmeistara Íslendinga  í skák. Þjórsárskóli tók þátt í þessum viðburði og héldum við skákmót hér í skólanum. Nemendur í 3.–7. bekk hafa verið í skákkennslu einu sinni í viku í vetur. Þeir hafa verið mjög áhugasamir í tímum og umgangast hvert annað með mikilli virðingu.

Á skákmótinu var teflt á 16 borðum. Alls voru tefldar 4 skákir sem tóku 7 mínútur hver. Nemendur voru mjög einbeittir og ríkti þögn allan tímann. 3 nemendur unnu allar sínar skákir og eru skákmeistarar Þjórsárskóla.  Nemendurnir eru Þrándur Ingvarsson 6. bekk, Rebekka Georgsdóttir 6. bekk og Baldur Már Jónsson 3. bekk.  Við óskum þeim til hamingju með skákmeistaratitlana sína.  

Enn vinnur Nakamura í Gíbraltar

Bandaríski stórmeistarinnn Hikaru Nakamura (2785) sigraði á Gíbraltar-mótinu sem lauk fyrir skemmstu. Nakamura vað efstur ásamt David Anoton Gujarro (2650) og Yu Yangyi (2738). Þeir háðu bráðabana og þar hafði Kaninn sigur. Þriðji sigur Nakamura á mótinu í röð og sá fjórði frá upphafi. Nakamura er sú sigursælastur allra á klettinum - fór upp fyrir Short sem hefur unnið mótið þrisvar.

Sterkasta skákkona heims Hou Yifan tapaði í fimm leikjum fyrir indverska stórmeistaranum Lalith Babu. Yifan tefldi 1. g4 d5 2. f3. Sú kínverska var að mótmætla röðuninni í mótinu en hann hafði fengið sjö skákkonur í níu umferðum. Stóð hún í þeirri meiningu að mótshaldarar hafi átt við pörun. Í ljós hefur komið að svo var ekki heldur hér á ferðinni ótrúleg tilviljun. Hou Yifan hefur beðist afsökunar á hegðun sinni.

Ítarlega umfjöllun um mótið má lesa á Chess.com.

Miklar sviptingar hafa orðið á efstu sætum heimslistans eftir Gíbraltar og Tata Steel-mótið. Carlsen hefur aðeins 16 stiga forystu á Wesley So. Þrír Bandaríkjamenn eru á topp 6.

 

 

Heimasíða mótsins