Pistill Benedikts Þórissonar: Góð ferð til Svíaríkis á Rilton Cup

Um áramótin fór ég á skemmtilegt skákmót sem nefnist Rilton Cup og fer fram árlega í Stokkhólmi. Þetta var mjög skemmtilegt mót og svo er Stokkhólmur falleg borg þar sem margt er hægt að skoða og nýttum við pabbi okkur það en ég leyfði honum að koma með mér í ferðina. 

Ég tefldi í flokki skákmanna með minna en 1800 Elo-stig en síðan voru líka undir og yfir 2200 flokkar. Alls tóku næstum því 400 keppendur þátt í öllu mótinu en í mínum flokki voru þeir 86. Ég var fimmti stigalægsti skákmaðurinn (og svo voru nokkrir stigalausir) en ég hækkaði samt um meira en 90 Elo-stig og fékk 3 vinninga. Það voru tefldar sjö umferðir og tvisvar voru tvær umferðir sama daginn sem mér finnst bara fínt. Ég var líka vanur tímamörkunum sem voru 90+30. Ég byrjaði mjög vel og náði þannig að halda mig frá stigalægstu andstæðingunum en allir sem ég tefldi við voru miklu stigahærri en ég, minnst 300 stigum og mest 600 stigum. 

(Dómararnir voru mjög strangir varðandi allan rafeindabúnað svo það var ekki séns að taka mynd eftir að umferðir voru byrjaðar!) 

Ég ætla aðeins að fara yfir umferðirnar en ég mæli með þessu móti fyrir alla, sérstaklega krakka sem langar að prófa að tefla við nýja andstæðinga og bæta sig ennþá meira. Þetta er líka stutt ferðalag og það kostar ekki mikið að fljúga til Svíþjóðar. Svo er líka gott að á þessum tíma þarf ekki að taka mikið frí úr skóla (auðvitað er samt alltaf gaman að fá frí!). 

1. umferð: Hvítt gegn Svía með 1562 Elo-stig - Jafntefli

Eins og alltaf í fyrstu umferð er erfitt að vita hvern maður fær en ég og pabbi vorum búnir að reikna út að þessi miðaldra Svíi væri líklegur. Það stóðst og ég fann nokkrar skákir með honum og sá að hann var e5 gaur. Ég ákvað því að henda á hann skoska gambítnum sem ég hef soldið notað.

Svíinn lék snemma h6 og var mjög passívur. Ég fékk miklu betri stöðu og eftir 28 leiki var ég eiginlega bara með unnið

Eftir að ég lék Rxd6 lítur svarta staðan alls ekki vel út. Ég tefldi samt ekki nógu vel í framhaldinu og lék af mér manni en var með bætur fyrir hann og á endanum sömdum við jafntefli.

2. umferð: Svart gegn Svía með 1645 Elo-stig – Jafntefli

Annar miðaldra heimamaður var andstæðingurinn í annari umferð. Ég fann engar skákir með honum þannig að ég rifjaði bara upp mínar helstu byrjanir. Skákin byrjaði á d4, d5 og síðan Bf4 en mér finnst þessi biskupsleikur frekar algengur í dag hjá hvítum. Líklega er það útaf London-system sem er vinsælt en hann stillti því einmitt upp gegn mér. Ég stillti bara upp í rólegheitum og eftir 18 leiki var staðan hnífjöfn

Hér lék ég Hc7 en kannski er t.d. Dh6 betri áætlun. Ég lenti síðan í pínu vandræðum sem ég náði að bjarga mér úr og við sömdum jafntefli eftir 43 leiki eftir að hann leyfði mér að þráskáka.

3. umferð: Hvítt gegn Svía með 1494 Elo-stig – Sigur

Enn einn heimamaðurinn en þessi var miklu yngri, fæddur árið 2000. Aftur átti ég erfitt með að finna skákir með andstæðingnum þannig að ég tefldi bara eitthvað í tölvunni og leysti taktík og svona. Aftur fékk ég á mig e5 og aftur beitti ég skoska gambítnum en mér finnast taktískar stöður skemmtilegar. Hann stillti pínu óvenjulega upp og lék m.a. g6 snemma sem ég hef ekki fengið á mig. Staðan var jöfn en í 15. leik lék hann af sér og gaf mér færi á að ná góðri sókn

Hann var að leika Ra5 sem er ekki góður leikur. Ég lék Bg5 og síðan Rf6+. Hann tók riddarann með biskupnum og ég til baka með mínum biskup og þess vegna eru svörtu reitirnir í kringum kónginn orðnir mjög veikir. Hér er ég með unnið en hann gerði mér mjög auðvelt fyrir og leyfði mér að planta drottningunni á h6. Þá var hann óverjandi mát og gafst upp eftir bara 19 leiki.

4. umferð: Svart gegn Svía með 1720 Elo-stig – Tap

Ég var sem sagt með 2 vinninga eftir 3 umferðir og hafði enn ekki tapað skák. Ég var ánægður með svona góða byrjun og vissi að mótið gæti bara verið gott úr þessu. Aftur fékk ég Svía og var þessi einu ári yngri en pabbi sem skildi mig ekki þegar ég sagði að ég tefldi bara við einhverja gamla karla. Ég fann nokkrar skákir með honum og vissi því að hann tefldi d4. Við tefldum drottningarpeðsbyrjun og ég var ekki í neinum vandræðum í byrjuninni en í 16. leik lék ég af mér þegar ég gerðist of bráður á miðborðinu. Ég lék d-peðinu frá d5 til d4 til að opna línur en gaf honum þá færi á fléttum á kóngsvæng. Ég tapaði í 20 leikjum en lærði mikið af skákinni, aðallega að halda áfram að laga hjá mér tímasetninguna á sóknaraðgerðum, en ég er stundum soldið óþolinmóður og vil bara komast sem fyrst í sóknina.

5. umferð: Hvítt gegn sænska jólasveininum með 1449 Elo-stig – Tap

Okkur fannst mjög fyndið að ég skildi tefla við jólasveininn. Þið getið séð mynd af honum hérna https://chess-db.com/public/pinfo.jsp?id=1709330. Reyndar kom svo í ljós að hann var búinn að raka af sér skeggið enda jólin alveg að verða búin. Enn á ný var það skoski gambíturinn og aftur lék svartur h6 snemma. Aftur tókst mér að fá unna stöðu út úr byrjuninni og í 21. leik átti ég algjöra bombu

Hér er f5 svakalega sterkur leikur. Ég lék í staðinn e6 sem er líka góður leikur en ekki eins sterkur og f5 sem opnar allar leiðir að svarta kónginum. Skömmu seinna missti ég svo aftur af leið sem hefði gefið mér gjörunna stöðu

Ég skil ekki ennþá hvernig ég missti af Hg6 en kannski sá ég líka ekki alveg framhaldið nógu marga leiki á eftir. Í staðinn fór ég með hrókinn til baka á e5 en var samt með mun betra alla skákina, alveg þangað til síðustu leikina þegar ég lék henni klaufalega niður. Svekkjandi tap en lærdómsríkt.

6. umferð: Svart gegn Svía með 1522 Elo-stig – Sigur

Þarna var ég búinn að tapa tveimur í röð en ég var alveg rólegur því ég vissi að ég hafði teflt skákirnar vel þrátt fyrir það. Það þýddi ekkert annað en að mæta ákveðinn til leiks gegn þessum Svía sem var meira en 80 ára gamall en það finnst mér frekar rosalegt. Ég vann hann í 30 leikjum en hann tefldi e4 sem ég mætti með Sikileyjarvörn. Hann tefldi Alapin (c3) afbrigðið gegn henni sem ég hef skoðað soldið og ég átti ekki í neinum vandræðum í byrjuninni. Hann lék svo af sér peði þannig að ég fékk mun betra en lokin á skákinni voru frekar furðuleg

Hér var hvítur að leika Bd3 og þá á svartur hinn lævísa Rc5 sem vinnur allavega skiptamun. Í staðinn lék ég Ha1+ sem gefur hvítum betri stöðu því þá getur hann skákað á b8 með hróknum. Þá lék sá gamli hinsvegar Kg2 (í staðinn fyrir Kh2) sem er hrikalegur afleikur því þá skáka ég biskupinn á d3 af með Re1+. Hann gafst strax upp og mikilvægur sigur hjá mér í höfn eftir tvær tapskákir í röð.

7. umferð: Hvítt gegn Svía með 1492 Elo-stig – Tap

Enn á ný mætti ég heimamanni “á miðjum aldri” eins og pabbi segir. Ég gat lítið undirbúið mig því ég fann engar skákir með honum. Upp kom Sikileyjarvörn og stillti ég upp ensku árásinni sem ég hef verið að skoða og fengið góða leiðsögn í. Strax í 10. leik fannst mér hann leika furðulega þegar hann fórnað skyndilega biskup á g4 peðið mitt. Ég hef aldrei séð þetta og þetta er alls ekki gott fyrir svartan

Hér er ég einfaldlega manni yfir og eiginlega með unna stöðu. Því miður langhrókaði ég eftir uppskiptin á g4 í staðinn fyrir að leika bara Hg1 sem ég reyndar skoðaði en ég var eitthvað smeykur við Bh4+. Eftir að ég tók svo riddarann til baka með drottningu á e3 varð hún leppur eftir Bg5. Mér fannst þetta rosa klaufalegt og ég var svekktur eftir skákina sem ég tefldi í smá tíma í viðbót. Þetta voru stærstu mistökin hjá mér í öllu mótinu en ég get samt verið ánægður því ég held að ég hafi bara staðið mig mjög vel og þetta var skemmtileg ferð. Ég tefldi heilt yfir vel og bætti heilmikilli reynslu við hjá mér.

(Hér er ég að skoða frægt skip sem heitir Vasa-skipið. Það sökk bara strax í höfninni fyrir 350 árum af því að það var kolvitlaust byggt!)

Skrár tengdar þessari bloggfærslu:

• Pistill Benedikts í PDF

Lenka með þriðja jafnteflið í röð í Slóvakíu

Stórmeistari kvenna, Lenka Ptácníková (2198), sótt hart að hinni pólsku Alicja Sliwicka (2329) í fjörlegri skák í þriðju umferð EM kvenna í gær í Slóvakíu. Sá pólska var klók og fórnaði drottningunni fyrir hrók en tókst þess að stað að stilla upp í óvinnandi virki. Þriðja jafntefli Lenku í jafnmörgum gegn mun stigahærri skákkonu. 

Fjórða umferð fer fram í dag og hefst kl. 13:15. Þá teflir Lenka við asersku landsliðskonuna Gulnar Mammadova (2360) sem er þrátt fyrir nafnið mun ekki vera ekki skyld Skakhryar Mamedyarov. 

Nana Dzagnidze (2507), Georgíu, og Demainte Cornettte (2467), Litháen, sem sló í gegn á GAMMA Reykjavíkurskákmótinu eru efstar með fullt hús eftir 3 umferðir. 

Alls taka 144 skákkonur þátt frá 144 löndum. Þar af eru 13 konur sem bera stórmeistaratitil, 29 sem er alþjóðlegir meistarar og 35 sem eru stórmeistarar kvenna. 

• Heimasíða mótsins
• Beinar útsendingar(Chess24)
• Chess-Results

Skólaskákmót Reykjavíkur fer fram 17. apríl

Skólaskákmót Reykjavíkur fer fram þriðjudaginn 17. apríl í Laugalækjarskóla.

Tefldar verða 6-7 umferðir með 10 mínútna umhugsunartíma. 

 

Teflt er í yngri flokki 1.-7. bekkur og eldri flokki 8.-10. bekkur. Sigurvegari hvors flokks fær sæti á Landsmótinu í skólaskák.

 

Mótið hefst klukkan 16:00.

 

Hver skóli má senda til leiks sína skólameistara eða sterkustu skákmenn.

 

Skráning á [e-mail]

Gunnar Erik sigraði á lokamóti Bikarsyrpu TR

Gunnar Erik Guðmundsson (1553) kom, sá og sigraði á fimmta og síðasta móti Bikarsyrpunnar þennan veturinn en teflt var í Skákhöll TR um nýliðna helgi. Gunnar hlaut 6 vinninga í skákunum sjö en í öðru sæti með 5,5 vinning var Benedikt Þórisson (1291) . Fimm keppendur komu jafnir í mark með 5 vinninga; Örn Alexandersson (1481), Árni Ólafsson (1275), Rayan Sharifa (1222), Tómas Möller (1169) og Óttar Örn Bergmann Sigfússon (1142) þar sem Örn hlaut þriðja sætið á mótsstigum (tiebreaks). Efst stúlkna var Anna Katarina Thoroddsen en hún landaði 4 vinningum.

Mót helgarinnar var fjölmennt og vel skipað og var styrkleikabreidd keppenda góð sem er mikilvægt í mótum Bikarsyrpunnar. Eins og svo oft varð úr æsispennandi barátta og réðust úrslit ekki fyrr en í lokaumferðinni seinnipart sunnudagsins. Fyrir hana voru Örn, Gunnar og Benedikt efstir og jafnir með 5 vinninga en Árni kom í humátt með 4,5 vinning ásamt Kristjáni Degi Jónssyni (1319). Liðsfélagarnir úr Breiðablik, Örn og Gunnar, mættust á efsta borði á meðan að liðsfélagarnir úr TR, Árni og Benedikt, mættust á öðru borði, en á þriðja borði hafði Kristján Dagur svart gegn Tómasi. Svo fór að Gunnar hafði sigur gegn Erni en á sama tíma gerðu Árni og Benedikt jafntefli í viðureign þar sem Benedikt var með vænlega sóknarstöðu en Árni varðist af hörku. Kristján Dagur tapaði manni gegn Tómasi sem landaði sigrinum í kjölfarið.

Þar með var ljóst að Gunnar Erik sigraði í fjórða mótinu í röð og raunar fór hann taplaus í gegnum öll fimm mótin sem er eftirtektarverður árangur. Það þarf því ekki að koma á óvart að hann hlaut að auki verðlaun fyrir að vera með besta samanlagða árangur í mótum syrpunnar í vetur og fær því nafn sitt ritað á hinn eftirsótta farandbikar. Allar líkur eru á að Gunnar sé nú útskrifaður úr Bikarsyrpunni enda ekki langt í að kappinn rjúfi 1600-stiga múrinn.

Verðlaun fyrir samanlagðan árangur félaga í Taflfélagi Reykjavíkur hlutu Adam Omarsson, Benedikt Þórisson og Árni Ólafsson.

Við óskum verðlaunahöfum til hamingju með árangurinn og þökkum öllum þeim sem hafa verið með okkur í Bikarsyrpunni í vetur. Við hefjum aftur leik í haust og hlökkum til að hitta ykkur!

Nánar á heimasíðu TR.

• Úrslitin úr móti helgarinnar
• Skákirnar (Daði Ómarsson sló inn)

Caruana sigurvegari GRENKE-mótsins

Fabiano Caruana (2784) er sjóðheitur þessa dagana. Hann vann Vitiugov (2735) í lokaumferð GRENKE-mótsins í Baden-Baden og vann öruggan sigur á mótinu. Áskorandinn hlaut 6½ vinning eða vinningi meira en heimsmeistarinn Magnus Carlsen (2843) sem varð annar eftir jafntefli við Anand (2776) í lokaumferðinni. Vitiugov varð í 3.-4. sæti ásamt Aronian (2794).

Caruana er nú kominn í annað sæti heimslistans með 2817,5 skákstig. fór upp fyrir Mamedyarov (2814). Ásamt Carlsen (2837,5) er þessir þrír með gott forskot á næstu menn en fjórði er Krmanik (2792) 22 stigum á eftir Aseranum. 

Nánar á Chess.com. 

Lokastaðan

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open

 

Lenka með annað gott jafntefli í Slóvakíu

Stórmeistari kvenna, Lenka Ptácníková (2198), byrjar afar vel á EM kvenna sem nú er í gangi í Vysoke Tatry í Slóvakíu. Í annari umferð, sem fram fór í gær, gerði hún jafntefli við hina georgísku Meri Arabidze (2393). Lenka hefur nú gert jafntefli við tvær skákkonur sem eru mun stigahærri en hún. 

Þriðja umferð fer fram í dag og sem fyrr teflir Lenka við stigahærri skákkonu. Andstæðingur dagsins er hin pólska Alicja Sliwicka (2329).

Þriðja hefst kl. 13:15 og er hægt að fylgjast með Lenku í beinni. 

Alls taka 144 skákkonur þátt frá 144 löndum. Þar af eru 13 konur sem bera stórmeistaratitil og 35 sem eru stórmeistarar kvenna. 

• Heimasíða mótsins
• Beinar útsendingar(Chess24)
• Chess-Results

Patrick vann Páskamót Vinaskákfélagsins

Glæsilegt páskamót Vinaskákfélagsins var haldið mánudaginn 9 apríl 2018, kl: 13, í Vin að Hverfisgötu 47. Alls tóku 17 manns þátt í mótinu. Tefldar voru 6 umferðir með 7 mínútur á skák. Skákstjóri var Hörður Jónasson. Mótið var reiknað til hraðskákstiga.

Eftir smá hökt í byrjun, þá rann mótið í gegn með miklum sóma. Patrick Karcher (1998) kom sá og sigraði með fullu húsi eða 6 vinningum. Í öðru sæti var Guðni Pétursson (2133) með 5 vinninga og í 3 sæti varð Jóhann Valdimarsson (1502) með 4 vinninga ásamt fleirum, en fékk bronsið á stigum.

Gaman að geta þess að ein kona tefldi í mótinu en það var Margrét H. Halldórsdóttir og fékk hún 2 vinninga. Í lokin voru skákmenn og konur boðið upp á kaffi og vöfflur að hætti Inga Hans starfsmann Vinjar.

Öll úrslit er hægt að sjá á chess-results

Kveðja Hörður Jónasson varaforseti.

Íslandsmót grunnskólasveita fer fram á sunnudaginn

Íslandsmót grunnskóla 8.–10. bekkur 2018 fer fram í Taflfélagi Reykjavíkur, Faxafeni 12, sunnudaginn 15. apríl. Tefldar verða 7 umferðir með umhugsunartímanum 10+5. Teflt verður eftir svissneska kerfinu. Taflmennskan hefst kl. 13 og lýkur mótinu um kl. 17.  

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 8.–10. bekk. Ef sérstaklega efnilegir skákmenn finnast í 1.–7. bekk er þeim leyfilegt að tefla með sínum skóla en þá aðeins í a- og b-sveit. Í hverri sveit mega vera allt að þrír varamenn. 

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla. 

Veitt verða verðlaun fyrir efstu b-c sveitir ásamt verðunum fyrir efstu sveitir af landsbyggðinni. 

Veitt verða borðaverðlaun fyrir bestan árangur á 1.-4. borði.  

Íslandsmeistarinn fær  keppnisrétt til þátttöku á Norðurlandamóti grunnskólasveita sem fram fer í Finnlandi í september.  

Skráning fer fram á Skák.is. Skráningu skal lokið í í síðasta lagi á hádegi 13. apríl nk. 

Ath. Áríðandi er að sveitirnar séu skráðar fyrirfram. 

Upplýsingar um þegar skráðar sveitir má finna hér.

Bragi Þorfinnsson formlega orðinn fjórtándi íslenski stórmeistarinn

Bragi Þorfinnsson er fjórtándi íslenski stórmeistarinn. Á heimasíðu FIDE má finna lista yfir nýja titilhafa, sem samþykktir voru á fundi FIDE í Minsk í Hvíta-Rússlandi 7.-8. apríl og á þeim lista má finna nafn Braga Þorfinnssonar. 

Innilega til hamingju Bragi!

GRENKE: Caruana með hálfs vinnings forskot á Carlsen fyrir lokaumferðina

Öllum skákum áttundu og næstsíðustu umferðar lauk með jafntefli í gær. Carlsen (2843) tókst ekki að vinna Vitiugov (2735) og jafntefli samið eftir 63 leiki. Caruana (2784) gerði jafntefli við Aronian (2794). 

Lokaumferðin hefst kl. 13 í dag. Þá teflir Carlsen við Anand (2776) sem hefur ekki átt gott mót og Caruana mætir Vitiugov. Verði tveir keppendur efstur og jafnir verður teflt til þrautar með styttri umhugsunartíma. Carlsen verður að vinna sína skák og treysta á að Caruana vinni ekki. 

Nánar á Chess.com. 

Staðan:

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open