Skákþáttur Morgunblaðsins: Hjörvar sigraði á First Saturday-mótinu

Hjörvar Steinn Grétarsson vann góðan sigur í flokki alþjóðlegra meistara á First Saturday-mótinu sem lauk í Búdapest um helgina. Hjörvar hlaut átta vinninga af 11 mögulegum og varð einum fyrir ofan Bandaríkjamanninn Takashi Iwamoto sem hlaut sjö vinninga en í 3. sæti varð Ungverjinn Bela Lengyel með sex og hálfan vinning.

First Saturday-mótið hefst eins og nafnið bendir til fyrsta laugardag í hverjum mánuði og er því einhvers konar skákmóta-hringekja í fjölmörgum flokkum sem stendur yfir allt árið og er hugarfóstur og „eign“ Ungverjans Laszlos Nagys. Íslenskir skákmenn hafa oft gert góða hluti þarna og má nefna ágæta frammistöðu Dags Arngrímssonar, Guðmundar Kjartanssonar og Stefáns Kristjánssonar á liðnum árum. Mótið er upplagt fyrir skákmenn í leit að alþjóðlegum áföngum og margir skákmenn ferðast langan veg til þess að taka þátt í því.

Að þessu sinni var Hjörvar aðeins hálfum vinningi frá áfanga að alþjóðlegum meistaratitli. Hann hóf mótið með því að hljóta 3½ vinning úr fyrstu fjórum skákum sínum, tapaði næstu tveimur en kom sterkur til baka og hlaut 4½ vinning úr síðustu fimm. Hann hefði sennilega átt að vinna allar þessar skákir. Hjörvar hefur nú unnið fjögur mót á innan við á ári og gerir þ.a.l. sterkt tilkall til þess að vera valinn í íslenska ólympíuliðið sem teflir í Khanty Manyisk í haust.

Í lokaumferðinni dugði honum jafntefli til að verða einn efstur en hugleiðingar um slíkt voru víðsfjarri. Skákin er gott dæmi um kraftmikinn stíl Hjörvars.

Búdapest 2010; 11. umferð:

Hjörvar Steinn Grétarsson – Nicolas Tavoularis

Hollensk vörn

1. d4 f5 2. g3 Rf6 3. Bg3 g6 4. Rf3 Bg7 5. 0-0 0-0 6. b3 d6 7. bb2 e5 8. dxe5 Rg4 9. Ra3 Rxe5 10. Rxe5 dxe5 11. Dxd8 Hxd8 12. Rb5 Ra6 13. Had1 He8 14. Bd5+ Kh8 15. Bf7! Hf8 16. Ba3!

Með þessu nær hvítur fram veikingu á hornalínunni h1-a8 og þó einkum d5-reitnum. Þá öðlast riddarinn ákjósanlegan reit á d6, 16.... Hxf7 strandar á 17. Hd8+ Bf8 18. Bxf8! og vinnur.

16.... c5 17. Bc4 Bf6 18. Rd6 Rb4 19. c3 Rxa2 20. Bxc5 b6 21. Ba3 Rxc3 22. Hc1 e4 23. Rb5!

Annar snjall leikur, svartur verður að láta skiptamun af hendi.

23.... Rxb5 24. Bxf8 Bd7 25. Bb4 a5 26. Bd2 Rd4 27. Bc3 Bc6 28. Hfd1 Hd8 29. e3 Rf3+ 30. Kg2 Hf8

31. Hd8!

Laglegur lokahnykkur. Nú er 31.... Hxd8 svarað með 32. Bxf6+ og svartur stendur eftir hrók undir. Hann gafst því upp.

Jóhanna Björg og Lenka efstar á Íslandsmóti kvenna

Jóhanna Björg Jóhannsdóttir og Lenka Ptacnikova urðu jafnar og efstar á Íslandsmóti kvenna sem lauk sl. fimmtudagskvöld. Þær munu tefla tvær aukaskákir um sæmdarheitið Skákmeistari Íslands. Jóhönnu dugði jafntefli í lokaumferðinni en þá mætti hún Lenku og tapaði. Lenka hafði í umferðinni á undan lotið í lægra haldi fyrir Hallgerði Helgu. Lokaniðurstaðan varð þessi:

1.-2. Jóhanna Björg Jóhannsdóttir og Lenka Ptacnikova 4 v. (af 5). 3. Hallgerður Helga Þorsteinsdóttir 3½ v. 4. Sigurlaug Friðþjófsdóttir 2 v. 5. Hrund Hauksdóttir 1 v. 5 Elsa María Þorfinnsdóttir ½ v.

Fjórar efstu hafa ásamt Tinnu Kristínu Finnbogadóttur verið valdar í kvennalið Íslands fyrir næsta ólympíumót.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 20. júní 2010.

Skákþættir Morgunblaðsins

Björn með jafntefli í lokaumferðinni

Alþjóðlegi meistarinn Björn Þorfinnsson (2390) gerði jafntefli við Ísraelann Moshe Katzir (2252) í 11. og síðustu umferð alþjóðlega mótsins í Eforie í Rúmeníu.  Björn hlaut 6,5 vinning og endaði í 36.-56. sæti.   Frammistaða Björns var mjög góð en hún samsvaraði 2461 skákstigi og hækkar hann um 15 stig.   Björn lagði þrjá stórmeistara á mótinu og þar á meðal einn sigurvegara mótsins.  Björn var hálfum vinningi frá því að ná stórmeistaraáfanga eftir 9 umferðir.   

Birkir Karl Sigurðsson (1422) vann vann skák í lokaumferðinni, Örn Leó Jóhannsson (1820) gerði jafntefli en Mikael Jóhann Karlsson (1726) tapaði.  Mikael hlaut 4,5 vinning, Örn Leó hlaut 4 vinninga en Birkir hlaut 3,5 vinning. 

Sigurvegar mótsins urðu stórmeistararnir Maxim Turov (2624) og Alexei Gavrilov (2494), Rússlandi, og Marius Manolache (2527), Rúmeníu en þeir hlutu 8,5 vinning.

181 skákmaður tekur þátt í þessu skákmóti.  Þar 17 stórmeistarar og 21 alþjóðlegur meistari.  Björn er númer 34 í stigaröð keppenda.  

• Heimasíða mótsins 
• Chess-Results

Ný mótaáætlun SÍ

Ný mótaáætlun SÍ var samþykkt á stjórnarfundi SÍ sl. fimmtudag.   Dagsetningar á Íslandsmóti skákfélaga eru 8.-10. október 2010 og 4.-5. mars 2011 og MP Reykjavíkurskákmótið er fyrirhugað 8.-15. mars 2011.   Mótshaldarar eru hvattir til að senda upplýsingar um fyrirhuguð mót til umsjónarmanns mótaáætlunar.

Mótaáætlun SÍ 

Sigurður sigraði á útiskákmóti Goðans

Það var 18 gráðu hiti og sólskin í Mývatnssveit í dag þegar sumarskákmót Goðans var haldið í Dimmmuborgum. Borgirnar skörtuðu sínu fegursta. Mótið var haldið á veitingastaðnum Kaffi Borgum og var teflt úti þar sem frábært útsýni er yfir Dimmuborgir.  Alls mættu 6 galvaskir skákmenn til leiks og þar af voru tveir frá Akureyri, þeir feðgar Sigurður Eiríksson og Tómas Veigar Sigurðarson.  Pabbinn sigraði á mótinu en sonurinn var annar.

Tefld var tvöföld umferð af hraðskákum (5 mín)

Efstu menn:

1. Sigurður Eiríksson                9 vinn af 10 mögul.
2. Tómas Veigar Sigurðarson   8
3. Jakob Sævar Sigurðssom     5,5
4. Hermann Aðalsteinsson       4

Aðrir fengu minna.

Myndskreytta frásögn má finna á heimasíðu Goðans.

Björn tapaði í tíundu umferð

Alþjóðlegi meistarinn Björn Þorfinnsson (2390) tapaði fyrir þýska alþjóðlega meistarann Matthias Thesing (2425) í tíundu og næstsíðustu umferð alþjóðlega mótsins í Eforie í Rúmeníu.  Björn hefur 6 vinninga og er í 32.-56. sæti.  Í síðustu umferð, sem fram fer á morgun teflir Björn við Ísraelann Moshe Katzir (2252).  Skákin verður sýnd beint á vefsíðu mótsins og hefst kl. 6:30.

Mikael Jóhann Karlsson (1726), Örn Leó Jóhannsson (1820) og Birkir Karl Sigurðsson (1422) töpuðu einnig allir.  Mikael hefur 4,5 vinning, Örn Leó hefur 3,5 vinning og Birkir Karl hefur 2,5 vinning.

Rússnesku stórmeistararnir Maxim Turov (2624) og Alexei Gavrilov (2494) eru efstir með 8 vinninga.

181 skákmaður tekur þátt í þessu skákmóti.  Þar 17 stórmeistarar og 21 alþjóðlegur meistari.  Björn er númer 34 í stigaröð keppenda.  

• Heimasíða mótsins 
• Chess-Results

Útiskákmót í dag í Mývatnssveit

Skákfélagið Goðinn stendur fyrir útiskákmóti nk. laugardag 26 Júní. Mótið verður haldið á veitingastaðnum Kaffi Borgum í Mývatnssveit, sem er við innganginn í Dimmuborgir.

Tefldar verða skákir með 5-10 mín umhugsunartíma, allt eftir þátttöku.

Ekkert þátttökugjald verður og engin sérstök verðlaun verða veitt fyrir sigurvegarann.
Áhugasamir eiga að skrá sig til keppni hjá Hermanni í síma 4643187.

Björn tapaði í níundu umferð

Alþjóðlegi meistarinn Björn Þorfinnsson (2390) tapaði fyrir rúmenska stórmeistaranum Constantin Lupulescu (2593) í níundu umferð alþjóðlega mótsins í Eforie í Rúmeníu.   Björn hefur 6 vinninga og er í 14.-35. sæti.  Í tíundu og næstsíðustu umferð, sem fram fer á morgun, teflir Björn við þýska alþjóðlega meistarann Matthias Thesing (2425).   Skákin verður sýnd beint á vefsíðu mótsins og hefst kl. 13:30.

Mikael Jóhann Karlsson (1726) vann sína skák en Örn Leó Jóhannsson (1820) og Birkir Karl Sigurðsson (1442) gerðu jafntefli.  Mikael hefur 4,5 vinning, Örn Leó hefur 3,5 vinning og Birkir Karl hefur 2,5 vinning.

Rúmenski stórmeistarinn Marius Manolache (2527) er efstur með 7,5 vinning.

181 skákmaður tekur þátt í þessu skákmóti.  Þar 17 stórmeistarar og 21 alþjóðlegur meistari.  Björn er númer 34 í stigaröð keppenda.  

• Heimasíða mótsins 
• Chess-Results

Carlsen með yfirburði í Rúmeníu

Magnus Carlsen (2813) sigraði með yfirburðum á Kings-mótinu sem lauk í Medzina í Rúmeníu í dag.  Magnus sigraði Yang You (2752) og hlaut 7,5 vinning í 10 skákum.   Öll skákum lokaumferðarinnar lauk með sigri svarts.

Lokastaðan:

• 1. Carlsen (2813) 7½ v.
• 2.-3. Gelfand (2741) og Radjabov (2740) 5½ v.
• 4. Ponomariov (2733) 4½
• 5. Nisipeanu (2672) 4 v.
• 6. Wang Yue (2752) 3 v.

Sex skákmenn taka þátt og tefld er tvöföld umferð.  Meðalstig eru 2742 skákstig sem gerir þetta eitt sterkasta skákmót ársins.  

• Heimasíða mótsins 
• Skákirnar í beinni (hefjast kl. 12:30)

Björn sigraði stórmeistara - hálfum vinningi frá stórmeistaraáfanga

Alþjóðlegi meistarinn Björn Þorfinnsson (2390) sigraði rúmenska stórmeistarann Bela Badea (2495) í áttundu og næstsíðustu umferð alþjóðlega mótsins í Eforie í Rúmeníu.  Björn hefur 6 vinninga og er í 7.-13. sæti.  Björn þarf jafntefli í níundu umferð til að tryggja sér sinn fyrsta áfanga af stórmeistaratitli.  Þá teflir hann við rúmenska stórmeistarann Constantin Lupulescu (2593).    Skákin verður sýnd beint á vefsíðu mótsins og hefst kl. 13:30.

Mikael Jóhann Karlsson (1726) gerði jafntefli en Örn Leó Jóhannsson (1820) og Birkir Karl Sigurðsson (1442) töpuðu.    Mikael hefur 3,5 vinning, Örn hefur 3 vinninga og Birkir hefur 2 vinninga.

Ítalski stórmeistarinn Daniele Vocaturo (2493) er efstur með 7 vinninga.

181 skákmaður tekur þátt í þessu skákmóti.  Þar 17 stórmeistarar og 21 alþjóðlegur meistari.  Björn er númer 34 í stigaröð keppenda.  

• Heimasíða mótsins 
• Chess-Results

Jafntefli hjá Carlsen og félögum

Öllum skákum níundu og næstsíðustu umferðar Medias-mótsins í Rúmeníu lauk með jafntefli.  Carlsen hefur eins vinnings forskot á Gelfand fyrir lokaumferðina sem fram fer á morgun.

Staðan:

• 1. Carlsen (2813) 6½ v.
• 2. Gelfand (2741) 5½ v.
• 3. Radjabov (2740) 4½ v.
• 4. Nisipeanu (2672) 4 v.
• 5. Ponomariov (2733) 3½ v.
• 6. Wang Yue (2752) 3 v.

Sex skákmenn taka þátt og tefld er tvöföld umferð.  Meðalstig eru 2742 skákstig sem gerir þetta eitt sterkasta skákmót ársins.  

• Heimasíða mótsins 
• Skákirnar í beinni (hefjast kl. 12:30)