Skák.is

Færsluflokkur: Íþróttir

23.6.2010 | 18:31

Björn tapaði í Rúmeníu

Alþjóðlegi meistarinn Björn Þorfinnsson (2390) tapaði fyrir búlgarska stórmeistarann Boris Chatalbashev (2593) í sjöundu umferð alþjóðlega mótsins í Eforie í Rúmeníu. Björn hefur 5 vinninga og er í 11.-26. sæti. Í áttundu og næstsíðustu umferð, sem fram fer á morgun teflir Björn við rúmenska stórmeistarann Bela Badea (2495). Skákin verður sýnd beint á vefsíðu mótsins og hefst kl. 13:30.

Örn Leó Jóhannsson (1820) vann Birki Karl Sigurðsson (1442) en Mikael Jóhann Karlsson (1726) tapaði. Mikael og Örn hafa 3 vinninga en Birkir hefur 2 vinninga.

Ítalski stórmeistarinn Daniele Vocaturo (2493) er efstur með 6,5 vinning.

181 skákmaður tekur þátt í þessu skákmóti. Þar 17 stórmeistarar og 21 alþjóðlegur meistari. Björn er númer 34 í stigaröð keppenda.

Íþróttir | Breytt s.d. kl. 18:35 | Slóð | Facebook | Athugasemdir (0)

23.6.2010 | 09:55

Annað Sumarskákmót Vinnuskólans fer fram í dag

Í sumar efnir Vinnuskóli Reykjavíkur í samstarfi við Skákakademíu Reykjavíkur til útiskákmóta á útitaflinu við Lækjartorg. Mótin verða haldin miðvikudaganna 16, 23. júní, 30. júní og 7. júlí og hefjast klukkan 12:30 og má búast við að mótin taki um 2 klst. Mótin verða með sama sniði og í fyrra en tefldar verða 5-6 umferðir með 7 mínútna umhugsunartíma. Mótaröðin er opin öllum og er að sjálfsögðu ókeypis að taka þátt. Þátttaka takmarkast við 40 keppendur og er því mikilvægt að keppendur mæti tímanlega.

Sú skemmtilega hefð var sett á í fyrra að úrslitaskák mótsins væri tefld á stóra útitaflinu, enda léttleikinn í fyrirrúmi. Verðlaunin verða afar fjölbreytt allt frá skákbókum, kaffivinningum og gjafakörfum frá Kaffitár auk dýrindis máltíða á Hamborgarabúllunni og The Deli.

Það er óskandi að veðurguðirnir leiki við skákmenn næstu fjóra miðvikudaga en engu að síður eru þátttakendur hvattir til að klæða sig eftir veðri!

Skákstjórar í sumar verða : Davíð Kjartansson, Björn Þorfinnsson, Bragi Þorfinnsson.

Myndaalbúm Sumarskákmótana

Íþróttir | Breytt s.d. kl. 10:01 | Slóð | Facebook | Athugasemdir (0)

23.6.2010 | 09:53

Skákir Stigamóts Hellis

Vigfús Ó. Vigfússon hefur slegið inn skákir Stigamóts Hellis (umferðir 5-7). Þær fylgja með fréttinni.

Veljið skák (36 alls):

Íþróttir | Slóð | Facebook | Athugasemdir (0)

22.6.2010 | 23:31

Lenka Íslandsmeistari kvenna í skák

Í kvöld fór fram verðlaunaafhending Íslandsmóts kvenna í skák. Lenka Ptácníková varð Íslandsmeistari kvenna í skák í þriðja sinn eftir 2-0 sigur á Jóhönnu Björg Jóhannsdóttir í úrslitaeinvígi en þær urðu efstar og jafnar með 4 vinninga í 5 skákum. Hallgerður Helga Þorsteinsdóttir varð í þriðja sæti með 3,5 vinning.

Þær þrjár skipa kvennalandslið Íslands á Ólympíuskákmótinu í Síberíu í haust ásamt Sigurlaugu R. Friðþjófsdóttur og Tinna Kristínu Finnbogadóttur.

Íþróttir | Breytt 23.6.2010 kl. 01:38 | Slóð | Facebook | Athugasemdir (0)

22.6.2010 | 22:21

Björn sigraði stórmeistara - er í 2.-8. sæti

Alþjóðlegi meistarinn Björn Þorfinnsson (2390) sigraði rússneska stórmeistarann Alexei Gavrilov (2494) í sjöttu umferð alþjóðlega mótsins í Eforie í Rúmeníu. Björn er nú 2.-8. sæti með 5 vinninga. Í sjöundu umferð, sem fram fer á morgun, teflir Björn við búlgarska stórmeistarann Boris Chatalbashev (2593).

Mikael Jóhann Karlsson (1726), sigraði í sinni skák, Birkir Karl Sigurðsson (1442) gerði jafntefli en Örn Leó Jóhannsson (2820) tapaði. Mikael hefur 3 vinninga en Örn Leó og Birkir Karl hafa 2 vinninga.

Ítalski stórmeistarinn Daniele Vocaturo (2493) er efstur með 5,5 vinning. 181 skákmaður tekur þátt í þessu skákmóti. Þar 17 stórmeistarar og 21 alþjóðlegur meistari. Björn er númer 34 í stigaröð keppenda.

Íþróttir | Slóð | Facebook | Athugasemdir (0)

22.6.2010 | 22:10

Carlsen sigraði ekki

Magnus Carlsen (2813) þurfti að sætta sig við jafntefli við Gelfand (2741) í áttundu umferð alþjóðlega mótsins í Medzina í Rúmeníu sem fram fór í dag. Heimamaðurinn Nisipeanu (2672) vann Wang Yue (2752) en Radjabov (2740) og Ponomariov (2733) gerðu jafntefli. Carlsen hefur 1 vinnings forskot á Gelfand þegar tveimur umferðum er ólokið. Frídagur er á morgun.

Staðan:

1. Carlsen (2813) 6 v.
2. Gelfand (2741) 5 v.
3. Radjabov (2740) 4 v.
4. Nisipeanu (2672) 3½
5. Ponomariov (2733) 3 v.
6. Wang Yue (2752) 2½ v.

Sex skákmenn taka þátt og tefld er tvöföld umferð. Meðalstig eru 2742 skákstig sem gerir þetta eitt sterkasta skákmót ársins.

Heimasíða mótsins
Skákirnar í beinni (hefjast kl. 12:30)

Íþróttir | Slóð | Facebook | Athugasemdir (0)

22.6.2010 | 17:50

Henrik vann í lokaumferðinni í Osló

Stórmeistarinn Henrik Danielsen (2514) vann danska FIDE-meistarann Nils Ragnar Grotnes(2223) í níundu og síðustu umferð minningarmótsins um Svein Johannessen sem fram fór í Osló í morgun. Henrik hlaut 6 vinninga og endaði í 5.-10. sæti.

Sigurvegar mótsins urðu stórmeistararnir Jon Ludvig Hammer (2610), Noregi, og Mark Hebden (2539), Englandi, en þeir hlutu 7 vinninga.

Árangur Henriks samsvarar 2498 skákstigum og stendur hann í stað fyrir frammistöðu sína.

Alls taka 60 skákmenn þátt í mótinu og þar af 6 stórmeistarar. Henrik er fjórði stigahæsti þátttakandi mótsins. Mótið er níu umferðir en tekur aðeins fimm daga.

Íþróttir | Slóð | Facebook | Athugasemdir (0)

22.6.2010 | 12:18

Stefán sigraði á fyrsta sumarmóti Vinnuskólans og Akademíunnar

Fyrsta sumarmót Vinnuskóla Reykjavíkur og Skákakademíu Reykjavíkur fór fram miðvikudaginn 16. júní síðastliðinn við útitaflið í Lækjargötu. Mótið hófst kl.12.30 og voru tefldar fimm umferðir með 7 mín. umhugsunartíma. Veðrið var afar milt og gott þótt að sólin hafi ekki látið sjá sig nema þó akkúrat á meðan mótinu stóð! Alls tóku 28 skákmenn þátt í mótinu sem verður að teljast frábært og settu börn úr skákhópi Skákakademíu Reykjavíkur sem og unglingar úr Vinnuskólans í Reykjavík mikinn svip á mótið í bland við reyndari skákmenn.

Skákmótin eru liður í fræðslustarfi Vinnuskóla Reykjavíkur í að vekja áhuga unglinganna á skáklistinni, miðbæjarlífið og glæða bæinn mannlífi. Viðburðir sem þessi vekja óskipta athygli erlendra ferðamanna og gesta borgarinnar sem eiga leið hjá, og myndast því mjög skemmtileg stemmning í kringum mótin.

Úrslitaskákin fór fram á sjálfu útitaflinu og var tefld með klukku. Tilgangurinn var sá að afsanna að skák væri ekki íþrótt en viðbúið var að viðureignin yrði verulega athyglisverð ef keppendur kæmust í mikið tímahrak. Úrslitaskákin var spennandi og vel tefld af báðum keppendum þeim Stefáni Bergssyni og Oliver Aron þar sem Stefán syndi sennilega eina ótrúlegustu takta sem hafa sést á útitaflinu. Skemmtileg og bragðgóð verðlaun voru í boði Hamborgarabúllunnar sem fóru að sjálfsögðu afar vel í keppendur.

Mótið heppnaðist frábærlega og voru þátttakendur á öllum aldri. Næsta mót verður haldið á morgun 23 Júní og hefst það kl 12:30

Staða efstu manna :

1 Stefán Bergsson
2 Oliver Aron Jóhannesson
3. Sigríður Björg Helgadóttir
4 Kristinn Andri Kristinsson
5. Arnar Valgeirsson
6. Kristófer Jóel Jóhannesson
7. Hrund Hauksdóttir
8, Davíð Roach Gunnarsson

Skákstjórar : Björn Þorfinnsson og Davíð Kjartansson.

Íþróttir | Slóð | Facebook | Athugasemdir (0)

22.6.2010 | 12:15

Henrik tapaði fyrir Mikkelsen

Stórmeistarinn Henrik Danielsen (2514) tapaði fyrir danska alþjóðlega meistarann Nikolaj Mikkelsen (2409) í áttundu og næstsíðustu umferð minningarmótsins um Svein Johannessen sem fram fór í Osló í morgun. Henrik hefur 5 vinninga og er 12.-14. sæti. Í níundu og síðustu umferð, sem fram fer síðar í dag, teflir Henrik við danska FIDE-meistarann Nils Ragnar Grotnes (2223).

Norski stórmeistarinn Jon Ludvig Hammer (2610) er efstur með með 6½ vinning og enski stórmeistarinn Mark Hebden (2539) og Mikkelsen eru í 2.-3. sæti með 6 vinninga.

Alls taka 60 skákmenn þátt í mótinu og þar af 6 stórmeistarar. Henrik er fjórði stigahæsti þátttakandi mótsins. Mótið er níu umferðir en tekur aðeins fimm daga.

Íþróttir | Slóð | Facebook | Athugasemdir (0)

21.6.2010 | 23:03

Lenka Íslandsmeistari kvenna

Lenka Ptácníková (2267) sigraði Jóhönnu Björg Jóhannsdóttur (1738) í síðari einvígisskák þeirra um Íslandsmeistaratitil kvenna í skák. Lenka sigraði því í einvíginu 2-0 og er nú Íslandsmeistari í þriðja sinn!