Guðmundur sigraði á hraðkvöldi Hellis

Guðmundur Gíslason sigraði á hraðkvöldi Hellis sem fram fór 18. október sl. Guðmundur fékk 6 vinninga í sjö skákum á hraðkvöldinu og var það aðeins Elsa María sem náði að slá hann út af laginu í þriðju umferð en lengra komust andstæðingar hans ekki. Jafnir í 2.- 3. sæti voru svo Magnús Sigurjónsson og Stefán Bergsson með 5 vinninga. Skammt þar frá var svo Sæbjörn Guðfinnsson þannig að Bolvíkingar röðuðu sér í þrjú af fjórum efstu sætum.

Þátttakendur voru 25 sem er ein mesta þátttaka á þessum skákkvöldum síðan Hellir flutti í Álfabakkann.

Í upphafi hraðkvöldsins fór fram verðlaunaafhending fyrir Meistaramót Hellis.   Myndir frá henni má nálagst í myndaalbúmi. 

Lokastaðan á hraðkvöldinu:

Röð     Nafn                                           Vinn.

 

•  1       Guðmundur Gíslason,                       6/7
•  2-3    Magnús Sigurjónsson,                     5
•           Stefán Bergsson,                             5
•  4-7    Sæbjörn Guðfinnsson,                     4.5
•           Elsa María Kristínardóttir,                4.5
•           Patrekur Maron Magnússon,           4.5
•           Vigfús Ó. Vigfússon,                        4.5
•  8-9    Eiríkur Örn Brynjarsson,                  4
•           Páll Andrason,                                 4
• 10-17 Birkir Karl Sigurðsson,                     3.5
•           Jón Úlfljótsson,                                3.5
•           Rafn Jónsson,                                  3.5
•           Stefán Már Pétursson,                     3.5
•           Oliver Aron Jóhannesson,                3.5
•           Guðmundur Kristinn Lee,                  3.5
•           Örn Leó Jóhannsson,                       3.5
•           Kristófer Jóel Jóhannesson,              3.5
• 18-22 Kristinn Andri Kristinsson,                 3
•           Jón Birgir Einarsson,                          3
•           Vignir Vatnar Stefánsson,                 3
•           Jón Trausti Harðarson,                      3
•            Dawid Kolka,                                    3
• 23-24 Pétur Jóhannesson,                          2
•            Estanislao Plantada,                        2
• 25       Björgvin Kristbergsson,                    1

Myndaalbúm frá verðlaunaafhendingu

Pistill frá Íslandsmeisturunum

Guðmundur Daðason, formaður Taflfélags Bolungarvíkur, hefur skrifað pistil um fyrri hluta Íslandsmóts skákfélaga á heimasíðu félagsins.

Heimasíða TB

Skákþáttur Morgunblaðsins: Ísland bætti sig um 24 sæti í opnum flokki Ólympíumótsins

Íslensku liðin sem tefldu á Ólympíumótinu í Khanty Manyisk í Síberíu bættu árangur sinn verulega frá síðasta Ólympíumóti. Allir íslensku þátttakendurnir hækkuðu á stigum og karlasveitin, sem varð í 40. sæti af 148 þátttakendum, bætti sig um 24 sæti frá síðasta móti og var 14 sætum ofar en styrkleikaröð fyrir mótið gerði ráð fyrir. Þátttaka karlasveitarinnar var undir smásjá, einkum vegna skipunar liðsins. Undirrituðum var í árslok 2009 boðið að þjálfa liðið og gegna starfi liðsstjóra og var síðar falið að gera tillögu um skipan liðsins. Sú tillaga var síðan samþykkt af stjórn SÍ og hlaut harða gagnrýni. Fannst ýmsum úr skákdeild Hauka valið beinast gegn einstaklingi úr þeirra röðum. Eftir afhroðið í Dresden 2008, þar sem Ísland varð í 64. sæti, hlaut að liggja í augum uppi að enginn úr þeirri sveit gat gengið í landslið Íslands á eigin forsendum. Að sinna ekki á neinn hátt æfingum landsliðshópsins og hætta síðan við þátttöku með litlum fyrirvara á Skákþingi Íslands var ekki í boði ef menn vildu komast í lið. Að endingu voru valdir Hannes Hlífar Stefánsson, Héðinn Steingrímsson, Bragi Þorfinnsson, Björn Þorfinnsson og Hjörvar Steinn Grétarsson. Þessir einstaklingar, hver með sín sérkenni, náðu vel saman.

„Nýliðarnir" voru drýgstir á lokasprettinum. Bragi og Björn Þorfinnssynir hlutu 3 ½ vinning af fjórum í lokaumferðunum tveimur. Sveitin hlaut 26 ½ vinning af 44 mögulegum um 60% vinningshlutfall og 13 stig. Hefði orðið mun ofar ef vinningar sveita með 13 stig væru látnir gilda en ekki flókinn útreikningur mótsstiga. Þannig hlutu Svíar aðeins 24 vinninga og 13 stig en reiknast samt í 34. sæti. Athyglisverð staðreynd er sú að Ísland var á svipuðu róli og ofursveit Búlgaríu sem hafnaði í 31. sæti með 13 stig og 26 ½ vinning en meðalstigin þar voru tæplega 2700 stig.

Ólympíumótsins í Khanty Manyisk verður sennilega minnst fyrir góða framkvæmd og frábæra frammistöðu Vasilí Ivantsjúk sem leiddi Úkraínumenn til sigurs. Ivantsjúk hlaut 8 vinninga úr tíu skákum á 1. borði. Efstu lið urðu:

1. Úkraína 19 stig 2. Rússland 18 stig 3. Ísrael 17 stig 4. Ungverjaland 17 stig 5. Kína 16 stig.

Í tíundu umferð mættu Íslendingar sveita Litháa með feðgana Evgenij Svesnikov, sem vann Hannes Hlífar óvænt, og Vladimir Svesnikov sem varð að láta í minni pokann fyrir Braga Þorfinnssyni á þriðja borði:

Bragi Þorfinnsson - Vladimir Svesnikov

Katalónsk byrjun

1. d4 d5 2. c4 e6 3. Rf3 Rf6 4. g3 dxc4 5. Bg2 c5 6. O-O Rc6 7. Da4 Bd7 8. Dxc4 b5 9. Dd3 Hc8 10. dxc5 Bxc5 11. Rc3 O-O 12. Bg5 Rb4 13. Bxf6 gxf6 14. Dd2 Bc6 15. Dh6 He8 16. Had1 Bf8 17. Dh5 Db6 18. a3 Rc2 19. Hc1 Bxf3

Sennilega eru þessi uppskipti misráðin.

20. Dxf3 Rd4 21. Dg4+ Kh8 22. Hcd1 Hed8 23. Dh5 Kg8 24. e3 Rb3 25. Be4 f5

Betra var 25. ... h6.

Sjá stöðumynd

26. Rd5!

Þrumuleikur sem byggist á valdleysi hróks á c8, t.d. 26. ... exd5 27. Bxf5 h6 28. Bxc8 Hxc8 29. Dg4+ og vinnur.

26. ... Hxd5 27. Hxd5 Bg7

eða 27. ... fxe4 28. Hg5+ Bg7 29. Dh6 og vinnur.

28. Hd7 Hf8 29. Bg2 Bxb2 30. Dg5+ Bg7 31. Hfd1 h6 32. De7 a5 33. Hb7 Da6 34. Hd8 Hxd8 35. Dxf7+ Kh8

- og svartur gafst upp um leið.

Fjallað verður um frammistöðu kvennaliðsins í næsta pistli.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 10. október 2010.

Skákþættir Morgunblaðsins

Kramnik byrjar með látum í Bilbao - Carlsen byrjar hörmulega

Kramnik (2780) byrjar vel á ofurskákmótinu í Bilbao á Spáni sem hófst í gær.   Kramnik sigraði stigahæsta skákmann heims, Magnus Carlsen (2826) í gær og í dag vann hann Shirov (2749).   Carlsen sem tapaði þremur skákum á Ólympíuskákmótinu hefur tapað í báðum sínum skákum.   Í dag tapaði hann fyrir Anand (2800).

Fjórir skákmenn taka þátt í mótinu og veitt eru 3 stig fyrir sigur og 1 stig fyrir jafntefli.  Tefld er tvöföld umferð.

Staðan eftir 2. umferð:

1. Kramnik 6 stig (2 v.)
2. Anand 4 stig (1½ v.)
3. Shirov 1 stig (½ v.)
4. Carlsen 0 stig (0 v.)

Heimasíða mótsins

 

 

Eyjamenn efstir eftir fyrstu umferð

Taflfélag Vestmannaeyja leiðir eftir fyrstu umferð Íslandsmót skákfélaga eftir 8-0 stórsigur á Skákdeild KR.    Taflfélag Bolungarvíkur er í 2. sæti eftir 6½-1½ sigur á Fjölni og Hellismenn eru í þriðja sæti eftir 6-2 sigur á Taflfélagi Reykjavíkur.    Önnur umferð fer fram í fyrramálið í Rimaskóla og hefst kl. 11.   B-sveit Bolvíkinga leiðir í 2. deild, Víkingaklúbburinn í þriðju deild og Kórdrengirnir og B-sveit Selfyssinga í fjórðu deild. 

Í upphafi keppninnar var Lenka Ptácníková heiðruð fyrir frábæran árangur sinn á Ólympíuskákmótinu í  Síberíu og Gunnar Björnsson, forseti SÍ, upplýsti að stjórn SÍ hafi ákveðið í tilefni þess árangurs að senda Lenku á EM einstaklinga í kvennaflokki sem fram fer í Istanbul á næsta ári.  

Úrslit 1. umferðar í 1. deild:

Fjolnir A	TB A	1½	:	6½
Hellir A	TR A	6	:	2
Haukar A	SA A	3½	:	4½
TV A	KR A	8	:	0

Staðan í 1. deild:

 

Rk.	Team	TB1
1	TV A	8
2	TB A	6,5
3	Hellir A	6
4	SA A	4,5
5	Haukar A	3,5
6	TR A	2
7	Fjolnir A	1,5
8	KR A	0

Staðan í 2. deild:

 

Rk.	Team	TB1
1	TB B	6
2	Matar	5
3	TR B	4
4	Hellir B	3,5
5	TA	2,5
6	SSON	2
7	SR A	1
8	Haukar B	0

Staðan í 3. deild:

 

Rk.	Team	TB1	TB2
1	Vikingaklubburinn A	2	6
2	TV B	2	5
3	Godinn A	2	5
4	TR C	2	4,5
5	SR B	2	4,5
6	KR B	2	3,5
7	TG A	2	3,5
8	TG B	1	3
9	Hellir D	1	3
10	Hellir C	0	2,5
11	SA B	0	2,5
12	SA C	0	1,5
13	TB C	0	1,5
14	Sf. Vinjar A	0	1
15	Haukar C	0	1
16	TV C	0	0

Staðan í 4. deild:

 

Rk.	Team	TB1	TB2
1	Kordrengirnir	2	6
2	SSON B	2	6
3	Godinn B	2	5,5
4	SFÍ	2	5,5
5	TV D	2	5
6	Sf. Sauðarkroks	2	4
7	SA D	2	4
8	Fjolnir C	2	4
9	Fjolnir B	2	3,5
10	Vikingaklubburinn B	2	3,5
11	S.Austurlands	2	3,5
12	Godinn C	1	3
13	TR E	1	3
14	UMSB	0	2,5
15	UMFL	0	2,5
16	TR D	0	2,5
17	Hellir E	0	2
18	Sf. Vinjar B	0	2
19	TG C	0	1
20	Fjolnir D	0	0,5
21	Aesir feb	0	0,5
22	TV E	0	0
23	Osk	0	0

Upplýsingar um pörun í 3. og 4. deild á morgun má nálgast á Chess-Results.

 

• Chess-Results
• Myndaalbúm

Ól: 11. pistill

Undirritaður hefur gjörsamlega svikið öll loforð um pistlaskrif síðustu daga og úr því skalt bætt.   Í gær gekk vel en í dag gekk ekki jafnvel.   Lenka hefur þó stolið athyglinni en í dag tryggði hún sér áfanga að alþjóðlegum meistaratitli og það er ekki amalegt þar sem áfangi á ólympíuskákmótinu telur 20 skákir og Lenka því búin að ná tilskyldum áföngum og þarf nú „aðeins“ að ná 2400 skákstigum til að verða útnefnd.  Og í gær fór fram skrautlegur FIDE-fundur þar sem gekk á ýmsu og Kirsan er sem fyrr forseti FIDE og Búlgarinn Silvio Danilov var kjörinn forseti ECU, eitthvað sem fáir áttu von á fyrir nokkrum mánuðum síðan.  Þrátt fyrir slæmt gengi í dag eru allir íslensku skákmennirnir, tíu, í stigaplús.  

Byrjum á strákunum.   Þar sem undirritaður var mjög upptekinn í gær, gat hann ekkert fylgst með skákunum .   Ég samdi við Sigurbjörn um að senda mér SMS og fékk þau skilaboð að það liti illa út – skömmu síðar kom svo skeyti um að það stefndi í stórsigur!   Fljótt að breytast.  Héðinn átti góða skák en mér skilst að lukkan hafi fylgt bæði Hannesi og Hjörvari.   Björn gerði solid jafntefli gegn undrabarninu Jorge Cori.   Frábær úrslit gegn Perú en okkur hefur oft gengið vel gegn Suður-Ameríku en það héldum við – þangað til í dag – en þá töpuðum við 1-3 fyrir Chile.   Hannes gerði gott jafntefli með svörtu en Hjörvar tapaði á fjórða borði.    Héðinn gerði svo jafntefli á öðru borði og Bragi tapaði eftir hetjulega vörn.   Semsagt súrt tap.   Á morgun tefla strákarnir við sveit Lettlands sem er áþekk og íslenska sveitin.   Á fyrsta borði tefli Íslandsvinurinn Miezis og á öðru borði teflir goðsögnin Svesnikov.  Myndavélin mín bilaði í dag eftir að ég hafði tekið myndir af stelpunum í dag svo ég á engar myndir af strákunum.  

Og svo stelpurnar.   Í gær náðust frábær úrslit gegn Ítalíu, 2-2.  Jóhanna vann en Lenka og Hallgerður gerðu jafntefli.   Sigurlaug tapaði.   Í dag var stórt tap, 0,5-3,5, gegn Mongólíu.   Lenka gerði jafntefli á fyrsta borði en aðrar skákir töpuðust.   Undirritaður gaf Lenku frjálst val með jafntefli þar sem mér fannst hagsmunir hennar með með AM-áfangann það mikilvægir.  Lenka tefldi sig sigurs, þrátt fyrir það, en náði ekki að beygja andstæðinginn.   Tinna tefldi byrjunina ónákvæmt í byrjun og tapaði, Jóhanna lenti í erfiðri vörn og Hallgerður virtist hafa góða jafnteflissénsa en tapaði.  Þetta voru önnur slæmu úrslit kvennasveitarinnar og þau fyrstu síðan í fyrst umferð.  Stelpurnar tefla á morgun við sterka sveit Austurríkis, sem hefur gengið fremur illa, miðað við hversu sterkar þær eiga vera.  

Úkraínumenn eru efstir í opnum flokki með 16 stig en Rússar og Frakkar koma næstir með 15 stig.    Í kvennaflokki hafa Rússar nánast tryggt sér sigur en þær hafa fullt hús stig, 18 stig!   Kínverjar, Úkraínumenn, Georgíumenn, Indverjar og Búlgarar hafa 14 stig.  

Og þá er það Norðurlandakeppnin.   Þar er staðan í báðum flokkum sem hér segir:

Opinn flokkur:

• ·         29 (23) Noregur, 11 stig (194 B-stig)
• ·         42 (34) Svíþjóð, 11 stig (167,5)
• ·         45 (44) Danmörk, 11 stig (162)
• ·         50 (54) Ísland, 10 stig (180)
• ·         72 (60) Finnland, 9 stig (133,5)
• ·         85 (83) Færeyjar, 9 stig (112)

Kvennaflokkur:

• ·         36 (55) Svíþjóð, 10 stig (178)
• ·         57 (69) Ísland, 9 stig (146,5)
• ·         58 (45) Noregur, 9 stig (135)
• ·         66 (57) Danmörk, 8 stig (116)

Og þá um FIDE-fundinn í gær.   Hann var sögulegur í meira lagi.    Fín umfjöllun er um hann á ChessBase og bendi ég sérstaklega á myndband sem vísað er til í fréttinni sem lýsir all svakalegri sennu á fundinum.  Vil sérstaklega benda á álkulegan mann, sem situr hægra megin við Kasparov í rifrildissennu Kasparovs og Larry (frá Bermúda) – sjá mynd.  

Kirsan stjórnaði fundinum harðri hendi og leyfði mönnum ekki að komast upp með neitt múður.   Strax hófust deilur um umboð (proxy) og t.d. komu tveir menn sem sögðust vera fulltrúar Perú.   Ekki taldi ég mig hafa neinar forsendur til að vita hvor væri réttkjörinn fulltrúi  Perú en hvorki Kirsan né stuðningsmenn voru ekki í neinum vafa um það.  

Atkvæðagreiðslan var skrautleg.   Stuðningsmenn Karpovs fengu það í gegn að kosningin var algjörlega leynileg.   Tjald var sett ofan á kjörklefann til að koma í veg fyrir myndatökur að ofan.   Allir þurftu að nota sama pennann og bannað var að nota myndavél.   Bannað var að gera kross í reitinn heldur þurfti að haka við í reitinn.   Ef menn krossuðu er atkvæðið ólöglegt.   Mér skilst að þetta sé af trúarlegum ástæðum.   Stuðningsmenn Karpov töldu það auka líkur sínar en engu að síður fékk framboð hans aðeins 55 atkvæði gegn 95 atkvæðum Kirsan.   Mjög athyglisvert í ljós þess að gera má ráð fyrir að Karpov hafi a.m.k. um 35 atkvæði frá Evrópu auk atkvæði Nikaragúa en undirritaður hefur umboð þess lands á FIDE-fundinum!   Kjörnefndarfulltrúinn var nokkuð hissa þegar hann sá mig og sagði mig ekki líta út fyrir að vera frá Nikaragúa!

Og strax eftir fundinn bauð Kirsan Karpov sæti varaforseta  og mættu þér „félagarnir“ saman á blaðamannafund í dag.   Mér skilst reyndar að Karpov ætli ekki að þiggja embættið en talar samt um aukna samvinnu.   Mér sýnist á öllu að ekki sé hægt að leggja Kirsan og verður hann forseti FIDE á meðan hann vill og e.t.v. er eini kosturinn að vinna með honum hvort sem mönnum líkar betur eða verr.  

Og þá um Evrópufundinn.  Robert von Weizsäcker hafði rekið mjög slaka kosningabaráttu og var mér nokkuð ljóst fljótlega að hann hafði lítinn séns til að vera kjörinn þrátt fyrir að hafa góða menn með sér eins og t.d. Jóhann Hjartarson.   Til dæmis mætti hann til leiks aðeins eins degi fyrir kosningar.   Eins og komið fram fóru fram réttarhöld í Lausanne þar sem framboð Karpov freistaði þess að fá framboð Kirsans ólöglegt.   Það gekk ekki eftir og er talið að kostnaður sem fellur á FIDE sé um ein milljón dollara.    Að mati manna Karpovs og Kasparovs eiga Kirsans og hans menn að borga þennan kostnaðinn en ekki FIDE.   Út af formlegheitunum var málið háð fyrir hönd fimm skáksambandanna (Þýskaland, Spánn, Bandaríkin, Sviss og Úkraína).

Eftir kosningarnar mun Nigel Freeman frá Bermúda, gjaldkeri FIDE, hafa sagt við að hann og hans skáksamband yrði lögsótt og krafið um greiðslu þess kostnaðar.   Í kjölfar þess leið yfir Weizsäcker og þurfti að stumra yfir honum.   Mér skilst að hann hafi jafnað sig þokkalega og sé á leiðinni af landi brott á morgun.     Stungið var upp á því að fresta fundinum en framboðslið (ticket) Þjóðverjans ákvað að leggja til að fundinum yrði framhaldið þrátt fyrir þetta.   Sokolov talaði fyrir hönd þeirra.

Ekki voru sömu formlegheitin í þessari atkvæðagreiðslu og leyfilegt var t.d. að nota eigin penna og krossa í kassann!     Skipuð vor kjörnefnd og var ég svo valinn af framboði Þjóðverjans til að fylgjast með atkvæðagreiðslunni og talningunni fyrir þeirra hönd.   

Fulltrúar allra 54 ríkjanna kusu.   Danilov fékk 25 atkvæði, Ali frá 20 atkvæði og Weizsäcker aðeins níu atkvæði.    Í 2. umferð fékk Danilov 30 atkvæði og Ali 24 atkvæði

Fyrir nokkrum mánuðum síðan töldu fáir að Búlgarinn hefði séns.   Þjóðverjinn rak slaka kosningabaráttu og margir töldu Ali of tengdan Kirsan til að geta stutt hann.   Danilov rak afar skynsama kosningabaráttu.  Tók ekki afstöðu í baráttu Kirsan og Karpov á meðan hinir tveir tengdu sig mjög við hvorn frambjóðandann.   Auk þess skilst mér að Danilov hafi með sér gott fólk og þá eru sérstaklega nefndir Pólverjinn sem var varaforsetaefni hans og serbnesk kona sem einnig er  yfirdómari á Ólympíuskákmótinu.  Ivan Sokolov bauð sig fram í stjórnina og náði ekki kjöri, því miður, og var heldur súr yfir því kvöld.

Látum þetta duga í bili en ég enn nóg efni á lager!

Gunnar Björnsson

 

Ól í skák: Pistill nr. 10

Enn halda stelpurnar áfram að standa sig vel hér á Ólympíuskákmótinu og frammistaðan í kvöld gegn Albönum var til mikillar fyrirmyndar.   Lenka vann sinn sjötta sigur í röð!   Undirritaður er ofboðslega stoltur af stelpunum sem allar hafa yfirperformað.  Strákarnir gerðu 2-2 jafntefli við Bosníu þar sem öllum skákunum lauk með jafntefli.    Strákarnir hafa allir einnig yfirperformaða svo íslensku liðin geta borið höfuðið hátt.   

Með kvennaliðið virðist það lögmál að því minna sem undirritaður er með þeim – því betur gengur!   Ég var mjög lítið með þeim í dag og verð ekkert með þeim á morgun, sennilega en þá fara fram FIDE-kosningarnar.  Útlitið fyrir morgundaginn er því mjög gott. 

Og varðandi FIDE-kosningarnar.    Í kvöld var boð þar sem fulltrúum sem styðja Karpov var boðið.   Athyglisvert boð þar sem Karpov og sérstaklega Kasparov fóru mikinn.   Þar talaði einnig Richard Conn, Bandaríkjamaður, sem er varaforsetaefni Karpovs.  Þar undirbjó hann okkur sem sitja fundinn fyrir alls konar málalengingar, t.d. um kosningu fundarstjóra, deilur um umboð, leynilegar kosningar og þess háttar.    Við fengum matarpakka fyrir morgundaginn, sem inniheldur m.a. vatn, banana og hnetur til að menn geti haft sem mest úthald!

Ég sé ekki fram á að vera neitt með liðunum á morgun, en mun reyna,  ef ég hef tök á að senda fréttir frá FIDE-fundinum, en ég veit ekki hvort ég hef tök á því, kemur í jós.  

Nóg í bili.

Gunnar Björnsson

 

Ól í skák: Sjötti pistill

Báðar viðureignirnar töpuðust í gær.  Stelpurnar töpuðu með minnsta mun fyrir Víetnam og var liðsstjórinn mjög sáttur við það enda þær Víetnömsku mun stigahærri.   Jóhanna Björg hafði meira að segja vinningsstöðu svo á góðum degi hefðu jafntefli getað náðst í hús.   Strákarnir töpuðu 1-3 fyrir Grikkjum.   Þar leit dæmið einnig ágætlega út en andstæðingur Hjörvars átti algjöra sleggju , Hd2, sem ekki einu sinni Helgi hafði séð.  

Byrjum á strákunum.   Fremur stutt jafntefli hjá Hannesi og Héðni á 1. og 2. borði, Bragi lenti í beyglu á 3. borði, féll á tíma en þá sennilega með tapað.  Hjörvar tefldi byrjunina ónákvæmt en náði samt fínni stöðu.  Menn voru bjartsýnir á stöðu hans þar til þess sleggja kom og þá féll staðan.   Tap 1-3 gegn sterku liði Grikkja.

Íslenska liðið hefur 3 stig og 7 vinninga og er í 65. sæti.   Norðmenn eru efstir Norðurlandanna með 6 stig, Svíar hafa 5 stig, Finnar 4 stig, Danir 3 stig og Færeyingar 2 stig.  14 lið hafa 6 stig.  

Lenka vann afar nettan sigur á fyrsta borði og skora ég menn að fara yfir þá skák á Skákhorninu.   Sérstaklega eru leikirnir Hcd8 og Dh5 laglegir.   Hallgerður og Sigurlaug lentu fljótlega í vandræðum og töpuðu.   Jóhanna fékk fínt tafl á fjórða borði eftir góðar ráðleggingar frá Helga.   Fékk unnið tafl en andstæðingurinn var seigur og hélt jafnteli.

Íslenska liðið hefur 2 stig og 5 vinninga og er í 69. sæti.  Svíar og Danir hafa 4 stig, Norðmenn hafa 3 stig.  11 lönd hafa 6 stig.

Mér skilst að Rússarnir fái 50.000$ hver ef þeir sigra á Ólympíuskákmótinu svo heilmikið er undir.

FIDE-þingið hófst í dag.  Ég kíki þangað inn í mýflugumynd til að kíkja á aðstæður.  Nú eru í gangi nefndarfundi sem ég lítið von á því að sækja.  Fundur Evrópusambandsins er 28. september og hann stefni ég að sækja.  Kosningar FIDE og ECU fara fram 29. september.   Á morgun er Arbiters´s Commission, sem gæti verið spennandi fyrir mig.

Er ég var á leiðinni á milli hótela í gær rakst ég á Kasparov sjálfan.   Hann var í rokna stuði en hann Karpov og stuðningsmenn þeirra mættu víst í gær frá Kiev þar sem þeir voru að funda.   Ég hitti einnig vin minn Bolat Asanov frá Kasakstan sem tefldi á alþjóðlega Hellismótinu 1993 og er að ég held forseti sambands þeirra.   Kasakar styðja Karpov.

Rússarnir eru að standa sig fyrr.  Nú er t.d. hætt að rukka fyrir leigubíla sem ég hef hingað til þurft að borga.  Ekki að það skipti miklu máli, sem taxinn kostar um 100 rúblur, eða tæpar 400 kr. 

Öryggisgæsla er hér töluverð.  Keppendur fá svokallað rautt spjald sem þeir þurfa að hafa ef þeir fara t.d. á klósettið.  Um leið og þeir eru búnir er það tekið af þeim.   Björn, sem hvíldi í gær, mætti á skákstað, og tókst einhvern veginn að komast framhjá vörðunum.  Hann gerði hins vegar þau grundvallarmistök að fara fram að ná í vatn fyrir Hjörvar og komst auðvitað ekki til baka.  Aðspurður hvernig hann komst inn sagðist Björn hafa verið að klára sína skák.

Ýmsir kappar eru hér liðsstjórar sem gætu fyllilega komist í sín landslið.  Get ég þar nefnt Khalifman, Bareev og Helga Ólafsson.   Thorbjörn Bromann er liðsstjóri danska landsliðsins og Oleg Romanishin er liðsstjóri þess úkraínska. 

Í gær uppgötvaði ég að hér væri VIP-herbergi sem ég hefði aðgang sem FIDE-fulltrúi.  Svo í stað þess að skrifa í sveittu blaðamannaherbergi án loftræstingar er ég staddur í illa kósí herbergi þar sem boðið er upp á rauðvín og osta.  Reyndar er áreitið hér meira en í sveitta blaðamannaherberginu en nú í augnablikinu sit ég hliðin á forseta albanska skáksambandsins sem er að spyrja mig um MP Reykjavíkurskákmótið!   Finnbjörn, færeyski fulltrúinn er einnig mættur.  Sérdeilis skemmtilegur náungi og einnig er hérna Írinn sem er einnig afar skemmtilegur.   Ég hef verið að dreifa upplýsingum um Reykjavíkurmótið á þessa náunga og skynja mikinn áhuga.

Nóg í bili, meira á morgun.

Gunnar Björnsson

Ól í skák: Pistill nr. 5

Það var fínt gengi hjá íslensku liðunum í gær.  Strákarnir gerðu gott 2-2 jafntefli gegn Svíum og stelpurnar unnu Íra 3,5-0,5.   Karpov er mættur á svæðið og spennan  fyrir FIDE-kosningarnar eykst. 

Byrjum á strákunum.   Nú er það þannig að ég hef ekki séð skákirnar en mér skilst að lukkan hafi fremur verið með þeim.   Bjössi lenti fljótlega í erfiðleikum gegn Grandelius og tapaði.  Mér skilst reyndar að nærri lokunum hafi Bjössi verið með fína stöðu.  Héðinn gerði jafntefli gegn Agrest en Rybka segir að Svíinn hafi getað náð upp hartnær unnu tafli.  Að sögn Braga hafði hann verra alla skákina nema eftir 2 síðustu leiki Cisak.  Eftir næstsíðasta leikinn hafði Bragi örlítið betra og eftir lokaleikinn unnið!   Hannes gerði jafntefli gegn Berg þar sem hinn síðarnefndi gat fórnað skiptamun og náð upp vænlegri stöðu.  Okkur grunar að Berg hafi viljað hafa öryggið á oddinum þar sem hann hafi metið sigursénsa Svíanna mikla á þeim punkti.  Semsagt gott jafntefli!

Hjá stelpunum gekk á ýmsu.  Lenka vann sína skák auðveldlega, Hallgerður einnig fremur auðveldlega.  Tinna fékk skítastöðu.  Hún greip til þess ráð fórna manni til að hrista upp í stöðunni og það gekk upp þar sem andstæðingurinn tók ekki manninn og talaði um flotta fléttu hjá Tinnu eftir skákina!  Sigurlaug hélt annars uppi fjörinu í gær.   Sigurlaug fórnaði peði og einhvern veginn smá versnaði staðan og var Sigurlaug um tíma þremur peðum undir.   Sigurlaug seiglaðist hins vegar áfram og náði að halda jafntefli.  Góður sigur gegn Írum!

Sú sem tefldi við Hallgerði er væntanlega einn elsti keppandinn hér en hún var rúmlega sjötug og sagði Sigurlaug strax hafa séð fyrir sér hana Birnu Norðdahl.   Hann var nokkuð óörugg og átti það til að ýta á klukkuna með annarri hönd en hún lék.  Einnig stoppaði hún klukkuna á einum tímapunkti þar sem sólin skein í augun á henni og lék ólöglegum leik í restina, þá reyndar með koltapað.  Hallgerður tók hins vegar alveg rétta taktík á þetta, hélt sínu jafnaðargerði og lét þetta engin áhrif á sig hafa. 

Skákstjórarnir eru annars sér kapítuli eins og svo oft áður.  Skákstjórinn í fyrstu umferð (Einstein) skyldi t.d. ekki þegar aðalskákstjórinn sagði „start the clocks" og talaði bara rússnesku.  Sú í gær talaði svo bara spænsku og var að reyna tjá sig við mig á því tungumáli gær. ....með engum árangri.   Einn skákstjóri er á hverja viðureign. 

Eins og fram hefur komið eru aðstæður allar til fyrirmyndar og það litla sem hefur verið ólagi hefur lagað!   Koddarnir pirruðu suma en haldið var í súpermarkaðinn í gær og koddar keyptir þá sem vildu.  Héðinn og Sigurlaug voru hins vegar það klók að þau tóku með sér kodda frá Íslandi.  Einnig færðu Rússarnir reykherbergið þannig að nú þarf ekki lengur að labba í gegnum það þegar farið er á klósettið.

Við stelpurnar vorum samferða Ivan Sokolov í gær á skákstað  Hann var í rokna stuði.  Allt í einu stekkur hann upp í rútunni og kallar „There are cows on the road" en mætti bara undrunarandlitum.     Hann endurtók sig með miklum látum og menn kíkja.  Jú mikið rétt.   Það var verið að reka beljur yfir þjóðveginn!   „How can they do it?  There is something between".     Ivan tók sig svo til og vann Adams í gær.   Hallgerður átti svo komment dagsins þegar hún spurði hver þetta væri (þ.e. Ivan).  

Ég hitti Oliver vin minn úr flugvélinni (ég geri ráð fyrir að menn hafi lesið fyrri pistla).  Hann teflir fyrir blinda og sjónskerta.    Í fyrstu umferð tefldu þeir við Rússa II, í 2. umferð við Rúanda og mæta svo Aserum í dag!   Enginn millivegur!

Susan Polgar er víst mætt á staðinn samkvæmt blogginu hennar.  Þar var talað um „biggest upset"  og úrslitin í viðureign Íslands og Svía nefnd þar ásamt nokkrum öðrum.  Þótt að Svíarnir hafi verið stigahærri vil ég nú ekki kalla þetta „big upset" .   Ég gerði athugasemd við bloggið hennar og spurði afhverju þetta væri „big upset".  Fékk svar frá nafnlausum (Anonymous) sem svaraði á skemmtilegan hátt „Sweden had 4 GMs in the match while Iceland had 2 weak Ims"  Þorfinnur, aní komments? J

Karpov mun víst vera mættur á svæðið en í gær var verið að setja upp bás fyrir hann.  Kirsan hefur haft bás frá upphafi og hefur verið að gefa gjafir, einhverjar töskur.  Á pokunum með gjöfunum stendur: Kirsan + hjartamerki = FIDE.   Ekki höfum við Íslendingarnir þegið þessar gjafir. 

Ég fékk athyglisvera yfirhalningu fyrir Geoffrey Borg, Maltverja sem er í stjórn FIDE og ECU og Kirsan-maður.   „You don´t have a choice, as a western state you have to vote for Karpov".   Hljómaði eins og við værum ekki að kjósa eftir því hvernig við mætum einstaklingana heldur verið þetta einhver skylda.   Ég sagðist ekki vilja setja málið upp á þennan hátt en vildi ekki ræða þetta frekar við hann.   Borg segist stefna á heimsókn ásamt Kirsan til Reykjavíkur, væntanlega þá í kringum MP Reykjavíkurskákmótið.   Hann talaði ávallt eins og Kirsan væri þegar öruggur um sigur. 

Spennan er farin að aukast fyrir þingið.  Það vekur athygli að Weinsacker sem býður sig fram til forseta Evrópska skáksambandsins mætir ekki fyrr en 28. september en Danilov og Ali eru fyrir löngu komnir og byrjaðir að mingla á fullu.  Danilov hefur reyndar aldrei spjallað við mig, telur mig sjálfsagt vonlaust targret.  

Ég er með kynningarblað fyrir MP Reykjavíkurskákmótið og hef komið því m.a. á básana hjá Tyrkjunum og Norðmönnunum en ég er hérna með ein 1.000 eintök!  Þingið hefst á morgun en til að byrja með eru bara nefndarfundir.  Ég hef ekki að hyggju að sækja þá en stefni á setninguna sem er í fyrramálið, til að reyna að grípa andrúmsloftið.   Sjálfar kosningarnar eru 28. september, held ég, bæði hjá FIDE og ECU.  

Undirritaður á afmæli í dag.  Stelpurnar sungu fyrir mig á ganginum, ásamt Bjössa, en hinir strákarnir létu ekki sjá sig.  Ég fékk svo afmælisgjöf frá henni Nataliyu, umsjónarkonu okkar, sem hefur sinnt okkur af stakri natni.  Hún gaf mér Babúsku!  Rússarnir klikka ekki og fylgjast greinilega með afmælisdögum gestanna.

Sem fyrr eru allir í góðu standi og allt eins og það á vera.    Þakka fyrir allar afmæliskveðjurnar.  

Kveðja úr blaðamannaherbergi sem er sveittara nú en nokkru sinni.

Gunnar Björnsson

 

110 ára afmælismót Taflfélags Reykjavíkur - Haustmótið 2010

110 ára afmælismót Taflfélags Reykjavíkur - Haustmótið 2010 hefst sunnudaginn 26. september kl.14.  Mótið er eitt af aðalmótum vetrarins í reykvísku skáklífi og jafnframt meistaramót T.R. Það er áratuga gömul hefð fyrir hinu vinsæla Haustmóti og er það flokkaskipt.

Mótið er öllum opið.

Teflt er í húsakynnum Taflfélags Reykjavíkur, skákhöllinni að Faxafeni 12, á miðvikudögum, föstudögum og sunnudögum og eru góð verðlaun í boði í öllum flokkum. Alls verða tefldar 9 skákir í hverjum flokki.  Lokuðu flokkarnir eru skipaðir tíu keppendum hver þar sem allir tefla við alla, en í opna  flokknum er tefldar níu umferðir eftir svissnesku kerfi.

Skráning fer fram á heimasíðu T.R., http://taflfelag.is/

Hægt er að fylgjast með skráningu hér.

Athygli er vakin á því að skráningu í alla lokaða flokka lýkur laugardaginn 25. september kl. 18.

Núverandi skákmeistari Taflfélags Reykjavíkur er Sigurður Daði Sigfússon.

Dagskrá:

1. umferð: Sunnudag 26. september kl.14.00
2. umferð: Miðvikudag 29. september kl.19.30

3. umferð: Föstudag 1. október kl.19.30
4. umferð: Sunnudag 3. október kl.14.00

5. umferð: Mánudag 4. október kl.19.30
---Hlé vegna afmælisboðs T.R. og íslandsmóts skákfélaga---

6. umferð: Miðvikudag 13. október kl.19.30
7. umferð: Föstudag 15. október kl.19.30
8. umferð: Sunnudag 17. október kl. 14.00
9. umferð: Miðvikudag 20. október. kl.19.30

Verðlaun í A-flokki:
1. sæti kr. 180.000
2. sæti kr.   90.000
3. sæti kr.   40.000
4. og 5. sæti ókeypis í Skákþing Reykjavíkur 2011

Verðlaun í B-flokki:
1. sæti kr. 25.000
2. sæti kr. 10.000
3. sæti  kr.  5.000
4. sæti ókeypis í Skákþing Reykjavíkur 2011

Verðlaun í C-flokki:
1. sæti kr. 15.000
2. og 3. sæti ókeypis í Skákþing Reykjavíkur 2011

Verðlaun í opnum flokki:
1. sæti  kr. 10.000
2. og 3. sæti ókeypis í Skákþing Reykjavíkur 2011

Bætist við fleiri flokkar verða verðlaun í þeim þau sömu og í C-flokki.

Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu.

Tímamörk:

1 klst. og 30 mín. + 30 sek. á leik.

Þátttökugjöld:

3.000 kr. fyrir félagsmenn T.R. 16 ára og eldri (3.500 kr. fyrir aðra).
1.500 kr. fyrir félagsmenn T.R. 15 ára og yngri (2.000 kr. fyrir aðra).