Meistaramót SSON hófst í gær - Magnús formaður

Meistaramót SSON hófst í gærkveldi með fyrstu umferð.   Alls taka níu skákmenn þátt í mótinu sem framhaldið verður næstu miðvikudagskvöld en tefldar verða hverju sinni tvær skákir (61 mín á mann).

Í gær var einnig haldinn aðalfundur félagsins.  Magnús Matthíasson er formaður félagsins.

Stjórn SSON:

Formaður:  Magnús Matthíasson
Ritari:  Magnús Garðarsson
Gjaldkeri:  Ingimundur Sigurmundsson
Meðhjálpari:  Úlfhéðinn Sigurmundsson
Meðhjálpari:  Erlingur Jensson

Úrslit 1. umferðar:

Name	Rtg	Res.	Name	Rtg
Erlingur Atli Pálmarsson	1425	0  -  1	Ingvar Örn Birgisson	1820
Ingimundur Sigurmundsson	1775	1  -  0	Grantas Grigorianas	1740
Magnús Matthíasson	1670	½  -  ½	Magnús Gunnarsson	1990
Magnús Garðarsson	1465	0  -  1	Erlingur Jensson	1690
Úlfhéðinn Sigurmundsson	1785		Bye	0

Heimasíða SSON

 

Hraðkvöld hjá Helli í kvöld

Taflfélagið Hellir heldur hraðkvöld mánudaginn 13. september og hefst mótið kl. 20:00. Tefldar verða 7 umferðir með sjö mínútna umhugsunartíma.  Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Í tilefni af því að nú er uppskerutími í grænmetisgörðum landsmanna og uppskeran í garði formanns Hellis er með afbrigðum góð verða dregin út tvenn aukaverðlaun úr garðinum.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Laugardagsæfingar TR hefjast í dag

Áratuga löng hefð er fyrir laugardagsæfingum Taflfélags Reykjavíkur.  Þær hefjast aftur eftir sumarfrí laugardaginn 11. september kl. 14.  Að venju fara æfingarnar fram í húsnæði félagsins að Faxafeni 12.

Í fyrra mætti oftar en ekki vel á fjórða tug barna á æfingarnar en alls voru í kringum 100 börn sem sóttu þær.  Á æfingunum eru sett upp skákmót, skákkennsla fer fram og skákþrautir leystar ásamt ýmsum öðrum uppákomum.  Þá er boðið upp á léttar veitingar um miðbik æfinganna en sá partur er orðinn órjúfanlegur hluti af æfingunum hjá börnunum.

Haldið er utan um mætingu og árangur barnanna og hverri æfingu er gerð góð skil í ítarlegum pistlum.

Aðgangur er ókeypis og eru æfingarnar ætlaðar börnum fæddum 1997 og síðar.

Umsjón með laugardagsæfingunum skipta þær með sér, Sigurlaug Regína Friðþjófsdóttir, formaður T.R. og Elín Guðjónsdóttir sem situr í stjórn félagsins.

Skákkennarar eru Torfi Leósson og Ólafur Kjartansson, félagsmenn í T.R.  Báðir eru þeir sterkir skákmenn með yfir 2000 elo-stig.

Pistlar laugardagsæfinga veturinn 2009-2010

Myndir frá laugardagsæfingum

Skákskólinn með kennslu í Mosfellsbæ

Skákskóli Íslands í samstarfi við íþróttamálayfirvöld í Mosfellsbæ hefur í þessari viku staðið fyrir skákæfingum að Varmá. Kennt er í snoturri kennslustofu sem hentar vel fyrir kennslu um 20 nemenda. Á hverjum degi í þessari viku hafa einmitt um tuttugu 6-7 ára gamlir krakkar mætt í stofuna góðu og fengið að kynnast undirstöðuatriðum skáklistarinnar. Hver hópur mætir einungis 1-2 sinnum þannig að í heildina munu á annað hundrað börn mæta á skákæfingarnar.

Verkefnið er hluti af íþróttaskólanum Frístundafjör sem yngstu nemendur þriggja skólanna í Mosfellsbæ taka þátt í. Börnin mæta strax eftir skólatíma og er æfingin einn klukkutími.

Þessar æfingar verða út næstu viku en að þeim loknum er stefnt á vikulegar æfingar annars vegar í Lágafellsskóla og hins vegar að Varmá fyrir nemendur Varmárskóla.

Umsjón með æfingunum hefur Stefán Bergsson.

Rimaskóli Norðurlandameistari barnaskólasveita

 

Skáksveit Rimaskóla sigraði á Norðurlandamóti barnaskólasveita sem fram fór um helgina í Osló í Noregi.  Svein sigraði finnsku sveitina 3,5-0,5 í lokaumferðinni og hlaut 15 vinninga, 1,5 vinningi meira en Danir sem urðu aðrir.  Oliver Aron Jóhannesson, Jón Trausti Harðarson og Kristinn Andri Kristinsson unnu í lokaumferðinni en Dagur Ragnarsson gerði jafntefli á fyrsta borði.     

 

Jón Trausti og Oliver unnu allar sínar skákir, 5 af tölu og Kristinn Andri fékk 3 vinninga í þremur skákum. 

Myndir af Norðurlandameisturum eru væntanlegar.

Lokastaðan:

• 1. Rimaskóli 15½ v.
• 2. Danmörk 14 v.
• 3. Noregur I 9½ v.
• 4. Svíþjóð 9 v.
• 5. Noregur II 8½ v.
• 6. Finnland 3½ v.

Sveit Rimaskóla skipa:

• 1. Dagur Ragnarsson 1½ v. af 5
• 2. Oliver Aron Jóhannesson 5 v. af 5
• 3. Jón Trausti Harðarson 5 v. af 5
• 4. Kristófer Jóel Jóhannesson 1 v. af 2
• 5. Kristinn Andri Kristinsson 3 v. af 3

Liðsstjóri var Hjörvar Steinn Grétarsson en fararstjóri var Helgi Árnason, skólastjóri.

• Heimasíða mótsins
• Myndaalbúm mótsins (myndir fengnar af heimasíðu mótsins)
• Tournament Services

NM barnaskólasveita: Sigur gegn Dönum

Það byrjar vel hjá liði Rimaskóla í NM barnaskólasveita sem fram fer um helgina í Osló.  Í 2. umferð vann sveitin sterka danska sveit 3-1 og er efst með 6 vinninga, vinningi á undan dönsku sveitinni.  Norsku sveitirnar eru í 3.-4. sæti með 4½ vinning.  Oliver Aron Jóhannesson, Jón Trausti Harðarson og Kristinn Andri Kristinsson unnu en Dagur Ragnarsson tapaði á fyrsta borði.  Í þriðju umferð, sem fram fer í síðar í dag teflir sveitin við Noreg II.

Staðan:

• 1. Rimaskóli 6 v.
• 2. Danmörk 5 v.
• 3.-4. Noregur II og Noregur I 4½ v.
• 5. Svíþjóð 2½ v.
• 6. Finnland 1½ v.

Sveit Rimaskóla skipa:

• 1. Dagur Ragnarsson 0 v. af 2
• 2. Oliver Aron Jóhannesson 2 v. af 2
• 3. Jón Trausti Harðarson 2 v. af 2 
• 4. Kristófer Jóel Jóhannesson 1 v. af 1
• 5. Kristinn Andri Kristinsson 1 v. af 1

Liðsstjóri er Hjörvar Steinn Grétarsson en fararstjóri er Helgi Árnason, skólastjóri.

• Heimasíða mótsins
• Myndaalbúm mótsins (myndir fengnar af heimasíðu mótsins)
• Tournament Services

Aronian byrjar vel í Shanghai

Aronian (2783) byrjar vel í fyrri hluta Bilbao Final Masters-mótinu sem hófst í Shanghai í Kína í morgun.  Aronian vann Kínverjann Wang Hao (2724) í fyrstu umferð.  Kramnik (2780) og Shirov (2749) gerðu jafntefli.

Tveir efstu menn mótsins tefla á sjálfu aðalmótinu sem fram fer í Bilbao, 9.-15. október nk. ásamt stigahæsta skákmanni heims, Magnusi Carlsen (2826) og heimsmeistaranum Anand (2800). 

Veitt eru 3 stig fyrir sigur og 1 stig fyrir jafntefli.  Tefld er tvöföld umferð. 

Árrisulir geta fylgst með skákum mótsins í Shanghai en umferðirnar hefjast kl. 6 á morgnanna.

• Heimasíða mótsins
• Skákirnar í beinni

TR sigraði SFÍ í Hraðskákkeppni taflélaga

Viðureign Skákfélags Íslands og Taflfélags Reykjavíkur í Hraðskákkeppni taflfélaga fór fram í húsakynnum Skáksambands Íslands síðastliðið þriðjudagskvöld. Elsta taflfélag landsins, hið 110 ára gamla Taflfélag Reykjavíkur, sigraði það yngsta, hið 4 mánaða gamla Skákfélag Íslands, örugglega með 50 vinningum gegn 22. Staðan í leikhléi var 10,5  - 25,5 TR í vil.

Bestir í lið SFÍ voru Sigurður Daði Sigfússon 7,5/12 og Örn Leó Jóhannsson 6/12 en bestir TR-inga voru Guðmundur Kjartansson 11/12, Daði Ómarsson 10/11 og Hrafn Loftsson 10/12.

Það er því ljóst að í undanúrslitum Hraðskákkeppni taflfélaga mætast annars vegar Hellismenn og Bolvíkingar og hins vegar Taflfélag Reykjavíkur og Skákdeild Hauka. Undanúrslitum á að vera lokið eigi síðar en 9. september en úrslitaviðureignin fer svo væntanlega fram miðvikudaginn 15. september næstkomandi.

Vikulegar skákæfingar Skákfélags Reykjanesbæjar að hefjast

Skákfélag Reykjanesbæjar er að hefja vikulegar skákæfingar á miðvikudögum frá kl 19.30 - 22.00 í húsnæði Bjargarinnar að Suðurgötu 15 í keflavík. Allir velkomnir.

Skákþáttur Morgunblaðsins: Friðrik gegn Larsen – hálfrar aldar barátta

Þess hefur verið getið í þessum pistlum að skákjöfrar Íslendinga og Dana, þeir Friðrik Ólafsson og Bent Larsen, urðu 75 ára fyrr á þessu ári. Friðrik er fæddur 26. janúar og Larsen 5. mars. Leiðir þeirra lágu fyrst saman á HM ungmenna í Birmingham 1951 og þeir háðu margan snarpan bardaga fram að síðustu kappskákinni á 60 ára afmælismóti Friðriks í Þjóðmenningarhúsinu haustið 1995. Valt er að treysta gagnagrunnum fyrir tölfræði þessa tímabils; áreiðanlegur listi sem greinarhöfundi barst á dögunum greinir frá 35 kappskákum, hvor vann 15 skákir en jafnteflin voru aðeins fimm talsins og niðurstaða nálega hálfrar aldar baráttu er því 17 ½ : 17 ½.

Einhver eftirminnilegasti sigur Friðriks yfir Larsen var á Reykjavíkurmótinu 1978 í skák sem birt var hér á dögunum. Einstætt er það tímabil frá 1956-1966 þegar 14 skákir sem þeir tefldu unnust allar á svart, 9:5 fyrir Friðrik þar. Upp úr 1967 hófst Larsen handa við að saxa á hið mikla forskot sem Friðrik hafði náð og náði að jafna árið 1995 eins og áður sagði.

Í þessari merku sögu viðureigna hljóta menn alltaf að staðnæmast við einvígi þeirra um Norðurlandameistaratitilinn sem fram fór í Sjómannaskólanum í ársbyrjun 1956. Þetta var stærsti skákviðburður sem fram hafði farið á Íslandi. Húsfyllir á allar skákir einvígsins og komust færri að en vildu. Friðrik lét þess síðar getið, að þjóðerni andstæðingsins hefði kallað fram heitar tilfinningar hjá landanum; nú væri komið að skuldaskilum vildu sumir meina. Og kannski var „óvinurinn" Bent Larsen ekki svo slæmur fulltrúi gamla nýlenduveldisins, a.m.k. virkaði hann dálítið yfirlætislegur á suma þegar hann las dönsku blöðin á milli leikja. Friðrik svaraði fyrir sig með því að hefja blaðalestur sjálfur - en allt kom fyrir ekki. Larsen náði öruggri forystu 3 ½ : 1 ½:

„Hann kann allt," heyrði einhver Friðrik segja. Og svo „flúði" Friðrik hina aðgangshörðu stuðningsmenn sína alla leið upp í Skíðaskála. Þegar hann kom í bæinn aftur vann hann tvær skákir og jafnaði metin, 3 ½ : 3 ½. Hafði hvítt í lokaskákinni - mikil spenna.

„Fyrst það átti fyrir fylgismönnum Friðriks að liggja að sjá hetjuna sína tapa úrslitaskákinni," skrifaði Larsen, „þá var kannski bót í máli að skákin var af minni hálfu glæsilega tefld."

Reykjavík 1956; 8. einvígisskák:

Friðrik Ólafsson - Bent Larsen

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. Bg5 e6 7. Df3 Be7. O-O-O Dc7 9. Hg1 Rc6 10. g4 Re5 11. De2 b5 12. f4 b4!

Kraftmikill leikur, 13. fxe5 er svarað með 13. ... dxe5 og vinnur manninn til baka.

13. Rb1 Red7 14. Bh4 Bb7 15. Bg2 Rc5 16. Rd2 Hc8 17. Kb1 Ra4 18. R2b3 h6 19. Be1 Rc5 20. Rd2 Rfd7 21. h4 g6 22. g5?

Gagnatlaga hvíts á kóngsvængnum snýst gegn honum. Betra var 22. f5 og staðan má heita í jafnvægi.

22. ... e5 23. fxe5 dxe5 24. Rf3

Re6!

Herjar á veika blettinn í stöðu hvíts, f4-reitinn.

25. Hc1 Rf4 26. Df1 Bc6! 27. c4 bxc3 28. Hxc3 Bb5!

Þetta hafði Friðrik sést yfir. Hörfi drottningin í 30. leik kemur 30. ... Bd3+ og mátar.

29. Hxc7 Hxc730. Bg3 Bxf1 31. Bxf1 hxg5 32. hxg5 Bc5 33. Rxe5 Bxg1 34. Bxf4 Bh2! 35. Bxh2 Hxh2 36. Ref3 Hh1 37. a3 Rc5 38. Ka2 Hxf1 39. Rxf1 Rxe4 40. Re3 Hc5

- og hvítur gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 22. ágúst 2010.

Skákþættir Morgunblaðsins