Guðni Stefán í Fjölni

Guðni Stefán Pétursson (2135) er genginn til liðs við Skákdeild Fjölnis úr Taflfélagi Reykjavíkur þar sem hann hefur alið manninn.

 

Skákhátíð Hróksins á Grænlandi 2008 hafin

Skákhátíð Hróksins á Grænlandi 2008 hófst í dag, í þremur þorpum á austurströndinni. Þetta er sjötta árið í röð sem liðsmenn Hróksins efna til hátíðar fyrir börn á Grænlandi.
 
Skákhátíð Hróksins nær að þessu sinni til þorpanna Kulusuk, Tasiilaq og Kuummiit, og nær hámarki um næstu helgi þegar VI. alþjóðamót Hróksins á Grænlandi verður haldið í Tasiilaq. Hróksmenn héldu fyrsta skákmótið í sögu Grænlands árið 2003, og leiðangurinn nú er sá fimmtándi sem vinnur að útbreiðslu skáklistarinnar meðal okkar næstu nágranna.
 
Hátíðin nú felur í sér kennslu, fjöltefli, barnaskákmót og fleiri viðburði í þorpunum þremur. Á miðvikudag verða þannig barnaskákmót í öllum þorpunum þremur og er gert ráð fyrir að hátt í 200 grænlensk börn taki þátt í mótunum.
 
Skákmótið um næstu helgi verður jafnframt afmælismót Sigurðar Péturssonar, sem kallaður er Ísmaðurinn, en hann býr í Kuummiit og hefur verið ómissandi hjálparhella við starfið á Grænlandi.
 
Nánari fréttir verða sagðar á bloggsíðu leiðangursins, www.godurgranni.blog.is

Keppendalisti Íslandsmótsins í skák (uppfært)

Einn sterkasti landsliðsflokkur síðustu ára verður á Íslandsmótinu í skák sem hefst 27. ágúst nk.  Meðal þátttakenda eru fjórir stórmeistarar og þrír alþjóðlegir meistarar. 

Meðalstigin er 2409 skákstig. Í fyrsta sinn í fjölda ára verður hægt að ná stórmeistaraáfanga en til þess þarf 8-8½ vinning.  Í áfanga að alþjóðlegum meistaratitli þarf 6-6½ vinning. 

Keppendalistinn:

Nr.	Nafn	Tit.	Félag	Stig	SM-áfangi	AM-áfangi
1	Hannes Hlífar Stefánsson	SM	TR	2566
2	Héðinn Steingrímsson	SM	Fjölnir	2540
3	Henrik Danielsen	SM	Haukar	2526
4	Stefán Kristjánsson	AM	TR	2477
5	Þröstur Þórhallsson	SM	TR	2449
6	Jón Viktor Gunnarsson	AM	Bol	2437	8,5
7	Björn Þorfinnsson	FM	Hellir	2422	8,5	6,5
8	Magnús Örn Úlfarsson	FM	Hellir	2403	8,5	6,5
9	Bragi Þorfinnsson	AM	Bol	2387	8,5
10	Róbert Harðarson	FM	Hellir	2354	8,0	6,5
11	Þorvarður F. Ólafsson		Haukar	2177	8,0	6,0
12	Jón Árni Halldórsson		Fjölnir	2165	8,0	6,0

Ný mótaáætlun SÍ

Stjórn SÍ samþykkti nýja mótaáætlun á stjórnarfundi sl. fimmtudag.  Hana má finna í heild sinni hér.  Einnig má þar finna ýmiss mót taflfélaganna.  Forystumenn taflfélaga eru hvattir til að til að koma upplýsingum um fyrirhuguð mót til umsjónarmanns mótaáætlunar í tölvupósti.  Einnig ef menn sjá einhverjar villur.  Rétt er að vekja athygli á því að hér um að ræða áætlun sem getur breyst. 

Fulltrúar Íslands á EM ungmenna

Stjórn SÍ hefur valið 10 fulltrúa sem tefla fyrir íslands hönd á EM ungmenna sem fram fer í Hercog Novi í Svartfjallalandi 14.-25. september nk.  

Fulltrúar Íslands eru:

• U18: Sverrir Þorgeirsson (2102)
• U18: Daði Ómarsson (2029)
• U18: Tinna Kristín Finnbogadóttir (1655)
• U16: Hjörvar Steinn Grétarsson (2299)
• U16: Patrekur Maron Magnússon (1872)
• U16: Hallgerður Helga Þorsteinsdóttir (1907)
• U16: Jóhanna Björg Jóhannsdóttir (1655)
• U14: Dagur Andri Friðgeirsson (1812)
• U14: Geirþrúður Anna Guðmundsdóttir (1585)
• U12: Friðrik Þjálfi Stefánsson (1455)

Heimasíða mótsins

Íslensku ólympíuliðin valin

Íslensku liðin sem tefla á ólympíuskákmótinu í Dresden í Þýskalandi 12.-25. nóvember nk. hafa verið valin.   Sama lið teflir í opnum  flokki og náði svo góðum árangri í EM landsliða í fyrra.  Í kvennaliðnu eru hins tveir nýliðar, sem áður hafa ekki teflt með a-landsliði Íslands, þær Hallgerður Helga Þorsteinsdóttir og Elsa María Kristínardóttir.  

Opinn flokkur:

• SM Hannes Stefánsson (2566)
• SM Héðinn Steingrímsson (2540)
• SM Henrik Danielsen (2526)
• AM Stefán Kristjánsson (2477)
• SM Þröstur Þórhallsson (2449)

Kvennaflokkur:

• KSM Lenka Ptácníková (2259)
• KFM Guðlaug Þorsteinsdóttir (2156)
• Hallgerður Helga Þorsteinsdóttir (1907)
• Sigurlaug R. Friðþjófsdóttir (1819)
• Elsa María Kristínardóttir (1778)

Heimasíða mótsins

Sterkur landsliðsflokkur á Íslandsmótinu í skák

Einn sterkasti landsliðsflokkur síðustu ára verður á Íslandsmótinu í skák sem hefst 29. ágúst nk.  Meðal þátttakenda eru fjórir stórmeistarar og fjórir alþjóðlegir meistarar.  Aðeins þrír keppendanna hafa minna en 2400 skákstig.

Meðalstigin er 2416 skákstig. Í fyrsta sinn í fjölda ára verður hægt að ná stórmeistaraáfanga en til þess þarf átta vinninga.  Í áfanga að alþjóðlegum meistaratitli þarf sex vinninga.   

Þátt taka:

 

Nr.	Nafn	Tit.	Félag	Stig
1	Hannes Hlífar Stefánsson	SM	TR	2566
2	Héðinn Steingrímsson	SM	Fjölnir	2540
3	Henrik Danielsen	SM	Haukar	2526
4	Stefán Kristjánsson	AM	TR	2477
5	Þröstur Þórhallsson	SM	TR	2449
6	Arnar E. Gunnarsson	AM	TR	2442
7	Jón Viktor Gunnarsson	AM	TR	2437
8	Björn Þorfinnsson	FM	Hellir	2422
9	Magnús Örn Úlfarsson	FM	Hellir	2403
10	Bragi Þorfinnsson	AM	Bol	2387
11	Þorvarður F. Ólafsson		Haukar	2177
12	Jón Árni Halldórsson		Fjölnir	2165

Sterkir skákmenn í tvöföldu afmælismóti skákfélags Vinjar

Ellefu þátttakendur skráðu sig til leiks í tvöföldu afmælismóti sem skákfélag Vinjar stóð fyrir í gær, mánudag kl. 13:00. Mótið var bæði skemmtilegt og spennandi og var elsti þátttakandinn Ágúst Ingimundarson, sem ýmislegt kann fyrir sér í fræðunum, og sá yngsti hin geysiöfluga Elsa María Kristínardóttir sem á framtíðina fyrir sér.

Haldið var upp á fimm ára afmæli skákfélags Vinjar sem stofnað var formlega í júnímánuði 2003, að tilstuðlan Hróksins sem mætti með öfluga sveit meistara á fyrsta mótið. Má þar nefna Tomas Oral, Regínu Pokorna, Luke McShane, Hrafn Jökulsson og Róbert Harðarson, sem einmitt ætlaði að fagna afmæli sínu í gær (þó stóri dagurinn sé í dag, til hamingju Róbert..).

En Fide-meistarinn geðþekki og varaforseti Hróksins, lá heima í rúmi þar sem elli kelling hafði lagt hann að velli tímabundið.

Hrannar Jónsson tók að sér skákstjórn þar sem tefldar voru fimm umferðir eftir Monrad-kerfi og umhugsunartími fimm mínútur.

 

Gunnar Freyr Rúnarson sem er með sterkari skákmönnum landsins, mikill lyftingakappi, hafði sigur með fullu húsi. Mátti hann svo sannarlega hafa fyrir því.
Annar kom Þorvarður Ólafsson með 3,5 vinninga, rétt eins og skákstjórinn Hrannar sem náði bronsinu.

Með 3 vinninga voru Elsa María Kristínardóttir, Ágúst Ingimundarson og Bjarni Sæmundsson, Bahamameistari.

Emil Ólafsson, Finnur Kr. Finnsson, Hreiðar Antonsson og Guðmundur Valdimar Guðmundsson fengu tvo og Arnar Valgeirsson einn.

Allir þátttakendur fengu bókavinninga og eftir verðlaunaafhendinguna var dýrindis kaffiveisla, vöfflur, ís og gúmmelaði og allir þátttakendur fengu bókavinninga.

Myndasafn mótsins

Tvöfalt afmæli í Vin í dag

Fögnum fimm ára afmæli Skákfélags Vinjar með móti í Vin, mánudaginn 28. júlí klukkan 13:00.
"Vinaskákfélagið" eins og það hét fyrst,  var stofnað formlega í júní 2003 þegar Hróksmenn og -konur mættu með fjölda erlendra meistara og héldu stórmót.

Skákfélag Vinjar hefur nú gengið í Skáksamband Íslands og um leið og það fagnar fimm ára afmæli félagsins þá verður haldið við upp á afmæli Róberts Harðarsonar, sem er varaforseti Hróksins og helsti leiðbeinandi Vinjarliðsins. Hann er miklu meira en fimm ára.
Róbert verður skákstjóri mótsins.
 
Allir velkomnir og allir þátttakendur fá glaðning. Svo eru að sjálfsögðu dýrindis kaffiveitingar eftir mótið.

Vin er athvarf Rauða krossins fyrir fólk með geðraskanir og er að Hverfisgötu 47 í Reykjavík.  Teflt er á mánudögum kl. 13:00.  Sími: 561-2612.

Hraðskákkeppni taflfélaga hefst í ágúst

Hraðskákkeppni taflfélaga, sem mun vera eina útsláttarkeppni taflfélaga í ár, mun hefjast eftir verslunarmannahelgi.  Þetta er í fjórtánda sinn sem keppnin fer fram en Taflfélag Reykjavíkur er núverandi meistari en Hellismenn hafa sigrað oftast eða sex sinnum.  

Áætlunin er sem hér segir:

1. umferð (u.þ.b. 12 liða úrslit): Skuli vera lokið um 20. ágúst
2. umferð (8 liða úrslit): Skuli vera lokið 31. ágúst
3. umferð (undanúrslit): Skuli vera lokið 10. september.
4. umferð (úrslit): Skal fara fram laugardaginn 20. september kl. 14.

Skráning til þátttöku rennur út 7. ágúst nk.    Forráðamenn taflfélaga eru vinsamlegast beðnir um að hafa samband við umsjónarmanns mótsins í netfangið mailto:[e-mail]ða í síma 820 6533.

Nánari upplýsingar t.d. um reglur keppninnar má nálgast á heimasíðu Hellis.

• Heimasíða Hellis