Íslandsmót barnaskólasveita fer fram næstu helgi

Íslandsmót barnaskólasveita verður haldið helgina 2.-3. apríl í Rimaskóla í Reykjavík.

Skákakademía Reykjavíkur er mótshaldari.

Fyrirkomulag: Fjórir skákmenn eru í hverri sveit og 1-4 til vara. Tefldar verða níu umferðir með 15 mínútna umhugsunartíma á mann.

Liðsstjórar skulu mæta 12:30 á laugardag og skila inn liðum sínum á Monrad-spjöldum.

Dagskrá mótsins; Tefldar verða fimm umferðir á laugardegi og fjórar á sunnudegi. Taflið hefst 13:00 á laugardag og 11:00 á sunnudag.

Skráning sveita og fyrirspurnir skulu berast á [e-mail] eigi síðar en miðvikudaginn 30. mars. Með skráningu skal fylgja gsm og netfang liðsstjóra.

Verðlaun verða veitt fyrir þrjú efstu sætin í mótinu, bestu b-e sveitir og borðaárangur.

Íslandsmeistarar munu vinna sér inn rétt til þátttöku á Norðurlandamóti barnaskólasveita sem fram fer í haust.

Reykjavíkurmót grunnskólasveita

Reykjavíkurmót grunnskólanna í skák 2011 fer fram mánudaginn 4. apríl n.k. og hefst kl.17. Tefldar verða 7 umferðir með 10 mín. umhugsunartíma á skák.  Allar sveitirnar keppa í einum opnum flokki, og veitt verða verðlaun fyrir þrjár efstu sveitirnar sem og þrjár efstu stúlknasveitirnar.  Hver sveit skal skipuð fjórum nemendum frá hverjum skóla auk 1-4 varamanna. Hverjum skóla er heimilt að senda fleiri en eina sveit til þátttöku og skal þá sterkasta sveitin nefnd A, sú næststerkasta B, o.s.frv. Sigursveitin verður Reykjavíkurmeistari grunnskólasveita 2011 og hlýtur farandbikar til vörslu í eitt ár. Mótið hefst, sem áður segir, kl.17 og lýkur um kl.20.   Verðlaunaafhending verður strax að móti loknu.

Sveitakeppni grunnskóla í Reykjavík er haldin í samvinnu Taflfélags Reykjavíkur og Íþrótta- og tómstundasviðs Reykjavíkur og fer keppnin fram í félagsheimili T.R., Faxafeni 12, Reykjavík.

Mikilvægt er að skólarnir sendi fylgdarmann með sínu liði, keppendum til halds og trausts. Þátttaka tilkynnist til skrifstofu Íþrótta- og tómstundasviðs eða á netfang: [e-mail] einnig er hægt að senda skráningu á [e-mail]  eigi síðar en kl 14 mánudaginn 4. apríl. Skráning í síma 411-5000.  Þátttökurétt hafa eingöngu nemendur í grunnskólum Reykjavíkur.

Mikael Jóhann sigraði á Skylduleikjamóti

Í dag tefldu skákfélagsmenn skylduleikjamót. Þema mótsins var Winaver afbrigði franskrar varnar og voru tefldar níu stöður sem komu upp úr stöðunni hér að neðan. Tíu skákmenn skráðu sig til leiks og tefldu einfalda umferð með 10 mínútna umhugsunartíma.

[FEN "rnbqk1nr/pp3ppp/4p3/2ppP3/1b1P4/P1N5/1PP2PPP/R1BQKBNR b KQkq - 0 5"] *

Mikael Jóhann Karlsson hélt áfram sigurgöngu sinni og sigraði með 7½ vinning af 9 mögulegum, annað mótið í röð sem Mikael vinnur. Tómas Veigar kom næstur með 7 vinninga og Áskell Örn var þriðji með 6½.

Næst á dagskrá er firmakeppnin, n.k. fimmtudag kl. 20. Tekið skal fram að öllum er heimil þátttaka enda detta fyrirtæki út en ekki skákmenn !.

Lokastaða efstu manna:

Mikael Jóhann Karlsson                                            7½
Tómas Veigar Sigurðarson                                        7
Áskell Örn Karlsson                                                  6½
Sigurður Eiríksson                                                     6
Jón Kristinn Þorgeirsson                                           5½
Haki Jóhannesson                                                      4
Ari Friðfinnsson                                                        4