EM: Hannes og Lenka með jafntefli

Ekki gekk vel hjá íslensku skákmönnunum í fjórðu umferð EM einstaklinga sem fram fór í Aix les Bains í Frakklandi í dag.   Hannes Hlífar Stefánsson (2557) gerði jafntefli við Frakkann Michael Deleva (2236), Lenka Ptácníková (2307) gerði jafntefli við Frakkann Gerard Gorse (2050) og Bragi Þorfinnsson tapaði fyrir Svisslendingnum Lars Rindlisbacher (2202).   Hannes hefur 2,5 vinning en Bragi og Lenka hafa 1 vinning.

Rússnesku stórmeistararnir Vladimir Potkin (2653) og Boris Savchenko (2616) eru efstir með fullt hús.

Í 5. umferð, sem fram fer á morgun, teflir Hannes við Þjóðverjann Alexander Donchenko (2216) en Bragi og Lenka mæta stigalágum Frökkum.

Mótið er ægisterkt.  Alls taka 400 skákmenn þátt og þar af 164 stórmeistarar, 65 alþjóðlegir meistarar og 4 stórmeistarar kvenna.  Íslendingar eiga þarna flesta fulltrúa Norðurlandaþjóða eða 3 talsins en Danir og Norðmenn eiga 2 keppendur hvor þjóð og Svíar, Finnar og Færeyingar einn hver þjóð.  Hannes er nr. 117 í stigaröð keppenda, Bragi er nr. 209 og Lenka er nr. 249.

 

• Heimasíða mótsins
• Beinar útsendingar
• Chess-Results