Lokamót Bikarsyrpu TR hófst í gær

36 keppendur eru skráðir til leiks í fimmta og síðasta mót vetrarins í Bikarsyrpu TR sem er næstamesta þátttaka frá upphafi. Fyrsta umferð fór fram í gær og báru krakkarnir sig afar fagmannlega að við skákborðin enda mörg hver orðin reynd í bransanum. Venju samkvæmt samanstendur keppendalistinn af mjög reynslumiklum krökkum í bland við aðra sem eru að stíga sín fyrstu skref í kappskákmóti.

Þrátt fyrir að úrslit fyrstu umferðar hafi verið nokkuð eftir hinni títtnefndu bók, þá urðu til margar baráttuskákir á borðunum köflóttu og ljóst er að það verður ekkert gefið eftir í komandi orrustum helgarinnar. Önnur umferð hefst í daglaugardag kl. 10 og eru áhorfendur hvattir til að mæta og fylgjast með þessum glæsilega hópi að störfum við taflborðin. Alltaf heitt á könnunni!

Á Chess-Results má finna öll úrslit í mótinu.

Nánar á heimasíðu TR.

 

Öðlingamótið: Lenka með fullt hús

 

Þegar þremur umferðum er lokið í Skákmóti öðlinga er stórmeistari kvenna, Lenka Ptacnikova (2200), ein efst með fullt hús vinninga. Þriðja umferð fór fram í gærkveldi þar sem Lenka lagði Hrafn Loftsson (2169) í baráttuskák. Fimm keppendur koma næstir með 2,5 vinning, þ.á.m. Fide-meistarinn Sigurbjörn Björnsson (2278) og Þorvarður F. Ólafsson (2176) en þeir gerðu átakalítið jafntefli sín í milli í orrustu gærkveldsins. Á þriðja borði gerðu Sverrir Örn Björnsson (2135) og Kristján Örn Elíasson (1829) sömuleiðis jafntefli en á næsta borði lagði Ögmundur Kristinsson (2010) Halldór Garðarsson (1793) þar sem Halldór féll á tíma í stöðu þar sem hann hafði kóng og hrók gegn kóngi, hróki og biskupi Ögmundar.

Búast má við að línur fari að skýrast í næstu umferðum en fjórða umferð fer fram næstkomandi miðvikudagskvöld þar sem mætast á efstu borðum Sigurbjörn og Ögmundur, Kristinn J. Sigurþórsson (1744) og Þorvarður, sem og Kristján Guðmundsson (2289) og Haraldur Baldursson (1949). Að venju má sjá öll úrslit, ásamt innslegnum skákum, á Chess-Results.

Nánar á heimasíðu TR.

 

Heimsmeistarinn slapp með skekkinn

Öllum skákum fimmtu umferðar GRENKE-mótsins í gær lauk með jafntefli. Staðan á toppnum er því óbreytt. MVL (2789), Caruana (2784) og Vitiugov (27359 eru því sem fyrr efstir. Magnus Carlsen (2843) og Aronian (2794) fylgja þar humátt á eftir með hálfum vinningi minna.  

Sú skák sem vakti mesta athygli var skák Georg Meier (26489 og heimsmeistarans. Sá þýski missti af fallegri vinningsleið í 39. leik og heimsmeistarinn slapp því með skrekkinn.

Nánar á Chess.com. 

Staðan:

 

Sjötta umferð fer fram í dag og hefst kl. 13. Þá teflir Norðmaðurinn við Aronian. Forystusauðirnir Vitiugov og MVL mætast. 

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open

 

Lokamót Bikarsyrpu TR hefst í dag

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fimmta og síðasta mót Bikarsyrpunnar þennan veturinn hefst föstudaginn 6. apríl og stendur til sunnudagsins 8. apríl. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 6. apríl kl. 17.30 (fös)
2. umferð: 7. apríl  kl. 10.00 (lau)
3. umferð: 7. apríl  kl. 13.00 (lau)
4. umferð: 7. apríl  kl. 16.00 (lau)
5. umferð: 8. apríl  kl. 10.00 (sun)
6. umferð: 8. apríl  kl. 13.00 (sun)
7. umferð: 8. apríl  kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan. Merkja skal við yfirsetu í 1. umferð á neðangreindu skráningarformi.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Skákstjórn: Þórir Benediktsson, s. 867 3109, [e-mail]

Caruana í hóp efstu manna á GRENKE

Áskorandinn, Fabiano Caruana (2784), virðist vera í góðu formi þessa dagana. Í gær vann hann Íslandsvininn Arkadij Naiditsch (2701) á GRENKE-mótinu sem nú er teflt Baden Baden. Ítalinn fyrrverandi er nú efstur ásamt þeim MVL (2789) og Nikita Vitiugov (2735) en þeir hafa allir hlotið 3 vinninga í 4 skákum. Heimsmeistarinn, Magnus Carlsen (2843), er í 4.-5. sæti með 2½ vinning ásamt Levon Aronian (2794). Carlsen gerði í gær jafntefli við MVL.

Fimmta umferð fer fram í dag og hefst kl. 13. Þá mætir Caruana Vishy Anand (2776), Carlsen teflir við Georg Meier (2648). Skák MVL og Aronian (2794) getur orðið afar áhugaverð. 

Nánar á Chess.com. 

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open

 

Páskamót Vinaskákfélagsins fer fram á mánudaginn

Páskamót Vinaskákfélagsins verður haldið mánudaginn 9 apríl kl: 13, í Vin að Hverfisgötu 47. Tefldar verða 6 umferðir með 7 mínútur á skák. Skákstjóri verður Hörður Jónasson. Mótið verður reiknað til hraðskákstiga. 

Í hléi verður boðið upp á kaffi og vöfflur. Góð verðlaun verða í boði. Þið getið skráð ykkur á mótið á gula kassanum efst á síðunni á skak.is. Einnig getið þið skráð ykkur á staðnum.

Allir velkomnir!!

Upplýsingar um þegar skráða keppendur má finna hér.

 

Hilmir Freyr: Pistill frá Xtracon í Helsingør, Danmörku

Ég tók þá ákvörðun, með frekar stuttum fyrirvara að taka þátt í Xtracon skákmótinu í Helsingør í Danmörku, eftir að mér bauðst gisting með krökkunum sem tefla flest í danska ungmenna landsliðinu. Mótið var haldið var dagana 22. júlí til 30. júlí sl. Ég hef einu sinni áður teflt á þessu móti en það var árið 2013.

Teflt er í Konventum sem er bygging með mörgum rýmum og er borðunum raðað í þau og teflt er frá jarðhæð uppá 3.hæð í húsinu. Ég veit að það truflar suma en ekki mig. Meðfram sjálfu mótinu er boðið uppá aðra viðburði og ég tók t.d þátt í Parlyn móti þar sem ég var í liði með FM Mikkel Manosri Jacobsen vini mínum. Við fengum 8 ½ vinning.

Sjálft mótið var skemmtilegt, ég endaði með 6,5 vinning af 10 mögulegum.

Mig langar að sýna eftirfarandi skák:  Ég var hvítur á móti Andreas Fossan (1998) frá Noregi og við fórum í Uppskipta-Frakkann, Exchange-French.  

1.d4 e6 2.e4 d5 3.exd5 exd5 4.c4 Nf6 5.Nc3 Be7 6.Bg5 c6 7.Bxf6 Bxf6 8.cxd5 O-O 9.Bc4 Re8+ 10.Nge2 b5 11.Bd3 b4 12.Ne4 Bxd4 13.Nxd4 cxd5 14.Ne2! Hér ef að svartur drepur nú riddarann á e4 þá kemur Bxe4 og svartur getur ekki drepið tilbaka útaf máti á áttundu reita röðinni, þannig (15.Bxe4 Dxd1+ 16.Hxd1 og hótunin er ennþá sú sama en svartur getur reynt (16.Ba6 17.Bxa8 myndi koma 17.Hxe2+ 18.Kf1 og 18.Rd2+ og þar myndi skákinn enda með þráleik. En hvítur er með frábæran leik í stað 17.Bxa8 og það er (17.Hd2!) valdar bara riddarann á e2 og svartur getur ekki drepið biskupinn á e4 útaf máti á áttundureitaröðinni og nú hótar hvítur bara að taka hrókinn á a8. Þess vegna hélt skákinn áfram svona þar sem ég var bara manni yfir og vann tiltölulega auðveldlega. 14.Nc6 15.N4g3 Qh4 16.Bb5 Bb7 17.Bxc6 Bxc6 18.O-O d4 19.Qxd4 Qg5 20.Qf4 Qd5 21.f3 Qc5+ 22.Kh1 Bb5 23.Rfe1 Qf2 24.Ne4 Qb6 25.N2g3 Rad8 26.Nf5 Qg6 27.Rac1 Bd3 28.b3 h6 29.Nxh6+ gxh6 30.Nf6+ Kf8 31.Qxb4+ 1-0.

Hilmir Freyr Heimisson.

 

-------------------

Fyrir áhugasama má vekja athygli á að Xtracon Chess Open fer fram 21.-29. júlí í ár. Meðal skráðra keppenda eru Jóhann Hjartarson og Baadur Jobava. 

[Event "Xtracon Chess Open"] [Site "Elsinore"] [Date "2017.07.23"] [EventDate "2017.07.22"] [Round "3.57"] [Result "1-0"] [White "Hilmir Freyr Heimisson"] [Black "Andreas Fossan"] [ECO "C01"] [WhiteElo "2215"] [BlackElo "1998"] [PlyCount "61"] 1. d4 e6 2. e4 d5 3. exd5 exd5 4. c4 Nf6 5. Nc3 Be7 6. Bg5 c6 7. Bxf6 Bxf6 8. cxd5 O-O 9. Bc4 Re8+ 10. Nge2 b5 11. Bd3 b4 12. Ne4 Bxd4 13. Nxd4 cxd5 14. Ne2 Nc6 15. N4g3 Qh4 16. Bb5 Bb7 17. Bxc6 Bxc6 18. O-O d4 19. Qxd4 Qg5 20. Qf4 Qd5 21. f3 Qc5+ 22. Kh1 Bb5 23. Rfe1 Qf2 24. Ne4 Qb6 25. N2g3 Rad8 26. Nf5 Qg6 27. Rac1 Bd3 28. b3 h6 29. Nxh6+ gxh6 30. Nf6+ Kf8 31. Qxb4+ 1-0

Skrár tengdar þessari bloggfærslu:

• Pistillinn í PDF

Þrettán ára strákur vann opna flokkinn á GRENKE-mótinu

Þrettán ára þýskur strákur, Vincent Keymer (2403) stal senunni á GRENKE Chess Open sem lauk í gær. Sá þýski sem tefldi í a-flokki vann þar sigur þrátt fyrir að vera aðeins nr. 99 í stigaröð keppanda. Keymer varð með þessum árangri fyrir ofan 49 stórmeistara og þar af fjóra með meira en 2700 skákstig. Í lokaumferðinni lagði hann sjálfan Richard Rapport (2715) að velli. Ein óvæntustu mótaúrslit skáksögunnar. Þjálfari hans er Peter Leko.

 

 

What do you do when you just won the biggest Open in Europe and €15.000? You analyze the last game with your trainer. #leko #keymer #grenkeopen pic.twitter.com/cjX0WC69eS

— GRENKEChess 2018 (@GRENKEChess) April 2, 2018

 

Vignir Vatnar Stefánsson (2300) var einnig meðal keppenda. Hann hlaut 5,5 vinninga. Eftir slaka byrjun hrökk Vignir í gang í lokaumferðunum og hlaut 3,5 vinninga í 4 síðustu umferðunum. Vignir gerði jafntefli við þýska stórmeistarann Roland Schmaltz (2470) í lokaumferðinni.

Lokastöðuna í a-flokkinum má finna hér. 

Stefán Már Pétursson (1698), faðir Vignis, tefldi í b-flokki og hlaut 5 vinninga. Félagi hans, Guðmundur G. Guðmundsson (1591), hlaut 3,5 vinninga. 

Í sjálfu aðalmótinu, sem ber nafnið GRENKE Chess Classic, unnu Caruana og MVL sínar skákir í 3. umferð. Caruana vann Georg Meier en Frakkinn lagði Hou Yifan að velli. Öðrum skákum lauk með jafntefli. MVL og Vitiugov eru efstir. Carlsen er í 3.-5. sæti. 

Staðan

Frídagur er í dag. Mótið heldur áfram á morgun. Þá færist má frá Karlsruhe til Baden-Baden. 

Nánar á Chess.com. 

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open

 

Ekkert verður úr sameiningu Hugins og TR

Ekkert verður úr sameiningu Skákfélagsins Hugins og Taflfélags Reykjavíkur sem lesa mátti um í frétt á Skák.is 1. apríl sl. 

Ekki reyndi á vilja félagsmanna fyrir sameiningu félaganna enda var fréttin uppspuni frá rótum. Jón Þorvaldsson átti hugmyndina og ritaði textann að mestu leyti. Formennirnir, Kjartan Maack og Pálmi Pétursson tóku þátt í sprellinu með Jóni og létu meðal annars taka af sér mynd saman. 

Upprunalega fréttin

Birkir Karl efstur á hraðkvöldi Hugins

Birkir Karl Sigurðsson sigraði á hraðkvöldi Hugins sem fram fór 26. mars sl. Birkir Karl fékk 11 vinninga af 12 mögulegum. Tefld var tvöföld umferð og varð það aðeins Pétur Pálmi Harðarson sem náði að vinna Birkir Karl í annarri skák þeirra. Annar var Pétur Pálmi  með 10 vinninga og hann tapaði einnig annarri skák í viðbót. Þriðji var svo Vigfús Ó. Vigfússon með 7,5 vinninga. 

Forritin hjá Chess-results vöru í einhverju óstuði á þessu hraðkvöldi svo ekki var hægt að nota það með góðu móti með á hraðkvöldinu stóð. Það stoppaði ekki hraðkvöldið og var gripið til gömlu góðu mótstöflunnar. Fyrst málum var þannig komið fyrir þá var hraðkvöldið líka klárað handvirkt með því Birkir  dró í happdrættinu. Hann valdi töluna 2 sem ekki er algengt að komi upp í þessum drætti svo það var Pétur Pálmi sem var sá heppni að þessu sinni. Smá hlé verður nú á þessum skákkvöldum þannig að það næsta verður ekki fyrr en síðasta mánudag í apríl.

Lokastaðan á atkvöldinu: 

1. Birkir Karl Sigurðsson 11v/12
2. Pétur Pálmi Harðarson 10v
3. Vigfús Ó. Vigfússon, 7,5v
4. Hjálmar Sigurvaldason, 5v
5. Björgvin Kristbergsson, 4v
6. Hörður Garðarsson, 3,5v
7. Pétur Jóhannesson, 1v

Lokastaðan í chess-results: