Símon páskaeggjameistari SA

 

Í gær, annan í páskum, fór fram páskaeggjamót Skákfélagsins. Samtals mættu 14 keppendur til leiks og var tefld hraðskák, allir við alla. Þrír yngstu keppendurnir röðuðu sér í þrjú efstu sætin. Páskaeggjameistari varð Símon Þórhallsson sem lagði alla sína andstæðinga á ippon. Næstir honum komu Jón Kristinn Þorgeirsson og Andri Freyr Björgvinsson. Hlutu þeir allir páskaegg að launum.

Einnig voru dregin út aukaverðlaun og hneppti Haki Jóhannesson þau. Því miður náðist hann ekki á mynd en meðfylgjandi mynd sýnir ungu mennina.
Lokastaðan varð sem hér segir:

Símon              13 vinningar af 13 mögulegum

Jón Kristinn       11

Andri              10,5

Tómas              9

Elsa               8

Sigurður A. og Gylfi    7

Sigurður E. og Heiðar   5

Haraldur           4,5

Hjörtur og Karl    4

Haki               3

Hilmir             0

Lokamót Bikarsyrpu TR hefst á föstudaginn

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fimmta og síðasta mót Bikarsyrpunnar þennan veturinn hefst föstudaginn 6. apríl og stendur til sunnudagsins 8. apríl. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 6. apríl kl. 17.30 (fös)
2. umferð: 7. apríl  kl. 10.00 (lau)
3. umferð: 7. apríl  kl. 13.00 (lau)
4. umferð: 7. apríl  kl. 16.00 (lau)
5. umferð: 8. apríl  kl. 10.00 (sun)
6. umferð: 8. apríl  kl. 13.00 (sun)
7. umferð: 8. apríl  kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan. Merkja skal við yfirsetu í 1. umferð á neðangreindu skráningarformi.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Skákstjórn: Þórir Benediktsson, s. 867 3109, [e-mail]

Bjørn Møller Ochsner skákmeistari Danmerkur

Alþjóðlegi meistarinn ungi, Bjørn Møller Ochsner (2454) vann öruggan sigur á Skákþingi Danmerkur sem fram fór um páskana í Svendborg. Bjørn hafði þegar tryggt sér sigur fyrir lokaumferðina og hlaut 8 vinninga í 9 skákum. Í 2.-3. sæti með 6 vinninga urðu Jonas Buhl Bjerre (2379) og Jesper Søndergård Thybo (2472). 

Árangur þess fyrrnefnda er afar athyglisverður. Hann er eðeins 13 ára (fæddur 2004) og var að ná í sínn síðasta áfanga að alþjóðlegum meistaratitli. Jonas og Jesper urðu báðir Evrópumeistarar í sínum aldursflokkum á síðasta ár.

Eini stórmeistarinn meðal keppenda, Allan Stig Rasmussen (2538) náði sér ekki á strik og varð fjórði með 5½ vinning.

Lokastaðan: 

1. IM Bjørn Møller Ochsner, 8 point
2.-3. FM Jonas Buhl Bjerre, 6 point
2.-3. IM Jesper Søndergård Thybo, 6 point
4. GM Allan Stig Rasmussen, 5½ point
5. IM Mikkel Djernæs Antonsen, 4½ point
6. IM Martin Percivaldi, 3½ point
7.-9. FM Poul Rewitz, 3 point
7.-9. IM Mads Hansen, 3 point
7.-9. IM Nikolaj Borge, 3 point
10. IM Rasmus Skytte, 2½ point

Nánar á heimasíðu danska skáksambandsins.

 

Helgi Dam skákmeistari Færeyja

Skákþing Færeyja fór fram um páska í Þórshöfn. Helgi Dam Ziska kom sá og sigraði en hann hlaut 5½ af 7 mögulegum. Annar varð Rógvi Egilstoft Nielsen með 4½ og þriðji varð Carl Eli Samuelsen með 4 vinninga.

Lokastöðuna má nálgast hér: 

1. Helgi Dam Ziska, HT 5½ stig

2. Rógvi Egilstoft Nielsen, ST 4½

3. Carl Eli Samuelsen, HT 4

4. Sjúrður Thorsteinsson, HT  3½

5. Hans Kristian Simonsen, KT 3

6. Ólavur Simonsen, KTF 2½

7. Rógvi Mortensen, HT 2½

8. Rani Nolsøe, KTF2½

 

Nánar á heimasíðu færeyska skáksambandsins. 

Magnús vann Hou Yifan - Vitiugov með fullt hús

Önnur umferð GREENKE Chess Classic fór fram í gær. Fjórum skákum af fimm lauk með hreinum úrslitum. Heimsmeistarinn Magnus Carlsen (2843) vann Hou Yifan (2654). Rússinn Nikita Vitiugov (2735) er hins vegar óvænt efstur en hann hefur unnið báðar sínar skák. Í gær vann hann Georg Meier (2648). 

MVL (2789) vann Anand (2776) og Aronian lagði Maiditsch (2701) að velli. Áskorandinn Caruana (2784) gerði jafntefli við Bluebaum (2631). Carlsen, Aronian og MVL hafa 1,5 vinning.

Staðan: 

Þriðja umferð fer fram í dag og hefst kl. 13.

Nánar á Chess.com. 

Í a-flokki GRENKE Chess Open átti Vignir Vatnar Stefánsson (2300) góðan gærdag og vann báðar sínar skákir. Hann hefur 4 vinninga eftir 7 umferðir. Mótinu lýkur í dag með umferðum 8 og 9.

Í b-flokki hefur Stefán Már Pétursson 3,5 vinninga en Guðmundur G. Guðmundsson hefur 3 vinninga. 

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open

 

Íslandsmót grunnskólasveita fer fram 15. apríl í TR

Íslandsmót grunnskóla 8.–10. bekkur 2018 fer fram í Taflfélagi Reykjavíkur, Taflfélagi Reykjavíkur, sunnudaginn 15. apríl. Tefldar verða 7 umferðir með umhugsunartímanum 10+5. Teflt verður eftir svissneska kerfinu. Taflmennskan hefst kl. 13 og lýkur mótinu um kl. 17.  

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 8.–10. bekk. Ef sérstaklega efnilegir skákmenn finnast í 1.–7. bekk er þeim leyfilegt að tefla með sínum skóla en þá aðeins í a- og b-sveit. Í hverri sveit mega vera allt að þrír varamenn. 

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla. 

Veitt verða verðlaun fyrir efstu b-c sveitir ásamt verðunum fyrir efstu sveitir af landsbyggðinni. 

Veitt verða borðaverðlaun fyrir bestan árangur á 1.-4. borði.  

Íslandsmeistarinn fær  keppnisrétt til þátttöku á Norðurlandamóti grunnskólasveita sem fram fer í Finnlandi í september.  

Skráning fer fram á Skák.is. Skráningu skal lokið í í síðasta lagi á hádegi 13. apríl nk. 

Ath. Áríðandi er að sveitirnar séu skráðar fyrirfram. 

Upplýsingar um þegar skráðar sveitir má finna hér.

Skólameistaramót Kópavogs fara fram 13. apríl - 12. maí

Skólameistaramót Kópavogs fara fram í stúkunni við Kópavogsvöll á næstu vikum: 

Föstudaginn 13.apríl fyrir hádegi 8:30 - 11:30: Meistaramót Kópavogs í skólaskák: 3.-4.bekkur – opið öllum.

Föstudaginn 13.apríl eftir hádegi 12:00 - 13:45: Meistaramót Kópavogs í skólaskák: 2. bekkur – opið öllum.

Föstudaginn 13.apríl eftir hádegi 14:00 - 15:45: Meistaramót Kópavogs í skólaskák: 1. bekkur – opið öllum.

Miðvikudaginn 18.apríl fyrir hádegi 8:30 - 11:30: Meistaramót Kópavogs í skólaskák og Kjördæmamót Reykjaness: 8.-10.bekkur (þeir sem eru með skákstig og 3 stigalausir frá hverjum skóla)

Miðvikudaginn 18.apríl eftir hádegi 12:00-15:00: Meistaramót Kópavogs í skólaskák og Kjördæmamót Reykjaness : 1.-7.bekkur (þeir sem eru með skákstig og 3 stigalausir frá hverjum skóla)

Miðvikudaginn 12.mai fyrir hádegi 8:30 - 11:30: Meistaramót Kópavogs í skólaskák: stúlkur 5.-10.bekkur – opið öllum.

Upplýsingar um þegar skráða keppendur má finna hér.

Mæting í öll mót er 15 mínútum fyrir upphaf þeirra.
Það er Skákdeild Breiðabliks í samvinnu við skákkennara í Kópavogi sem sér um skólamótin.

Jón Kristinn bikarmeistari SA - Páskahraðskákmót SA í dag

Að venju var bikarmót SA haldið um páskana. Mótið hófst á skírdag og lauk á föstudaginn langa. Átta skákjöfrar tefldu um bikarinn að þessu sinni, en mótið er útsláttarkeppni með þeim hætti að þátttakendur falla út eftir þrjú töp (jafntefli = 1/2 tap). Umhugsunartími er 15 mín á skákina. 

Þegar fyrri degi lauk voru þeir Heiðar Ólafsson, Benedikt Stefánsson, Haraldur Haraldsson og Sigurður Einarsson slegnir út, en fimm umferðir voru tefldar þann dag. Á langa deginum áttust við þeir sem eftir sátu og drógust saman þannig að Símon tefldi þrjár skákir við Áskel og Jón Kristinn þrjár við Sigurð Arnarson málningarmeistara. Drátturinn vildi hafa þetta svona og aðrir kostir voru ekki í boði. Ungu mennirnir náðu að knésetja þá eldri (2-1 í báðum tilvikum) og sátu því einir að lokaviðureigninni, þar sem Jón Kristinn hafði betur og hampar því þessum eftirsótta titli.

Næst verður PÁSKAHRAÐSKÁKMÓTIРá dagskrá á mánudag, annan páskadag og hefst kl. 13.00.

TR og Huginn vilja sameinast!

Þau tíðindi hafa orðið í íslenskum skákheimi að stjórnir Taflfélags Reykjavíkur og Skákfélagsins Hugins hafa afráðið að leggja til við félagsfundi hvors félags um sig að þessi tvö fjölmennustu skákfélög landsins renni saman í eitt. Þetta var endanleg niðurstaða stjórna beggja félaganna eftir fundarhöld undanfarna daga. Verði samruninn samþykktur, er lagt til að hið sameinaða félag hljóti nafnið TR Huginn og mun það þá senda sveitir undir því nafni á Íslandsmót skákfélaga leiktíðina 2018-2019. Miðað við fjölda sveita félaganna á nýafstöðnu Íslandsmóti má ætla að hið nýja félag sendi að minnsta kosti 12-13 sveitir á Íslandsmótið sem væri nýtt þátttökumet.

Fyrstu hugmyndir um sameiningu félaganna tveggja komu fram í kringum Íslandsmót skákfélaga um síðustu mánaðamót. Gagnkvæmur áhugi kom upp úr dúrnum og eftir óformlegar þreifingar skipuðu stjórnir félaganna átta manna undirbúningsnefnd undir forystu formannanna Kjartans Maack og Pálma R. Péturssonar til að láta reyna á sameininguna af alvöru.

Kjartan Maack, formaður TR: „Ég geri mér fulla grein fyrir því að þessi samþykkt stjórnar TR mun koma ýmsum félagsmönnum á óvart og það eru alls ekki allir sáttir, sérstaklega sumir eldri félaganna. En staðreyndin er bara sú að það verður æ erfiðara með hverju árinu að halda úti öflugu félagsstarfi sem kostar bæði tíma og peninga. Þróunin bæði hjá okkur og Hugin, rétt eins og hjá félagasamtökum almennt, hefur verið sú að æ færri hendur bera uppi starfið. Menn lýjast og það bitnar á starfinu.

Það er heldur ekkert launungarmál að Víkingaklúbburinn býr að óþrjótandi fjárstreymi sem ekki sér fyrir endann á. Þannig hafa þeir hrifsað til sín nokkra af sterkustu skákmönnum þjóðarinnar, þar á meðal úr okkar röðum, auk öflugra erlendra málaliða. Það er von stjórnarmanna beggja félaga að með sameiningunni getum við veitt Víkingaklúbbnum verðuga keppni.“

Pálmi R. Pétursson, formaður Hugins: „Það var sameiginleg ákvörðun okkar Kjartans að fara okkur að engu óðslega í þessu vandmeðfarna máli sem ég veit að kemur mörgum í opna skjöldu. Við hjá Hugin höfum vissulega gengið í gegnum sambærilegt ferli áður með sameiningu Goðans-Máta og Hellis, svo að úr varð Huginn. Þó að sú sameining heppnaðist vel, í heildina tekið, reyndist hún bæði flókin og vandasöm. Í ljósi þess hve vel við höfum undirbúið  alla vinnu nú, leyfi ég mér að vera  bjartsýnn á framtíð þessa langstærsta skákfélags landsins, ef samþykki félagsmanna fæst. Ég sé fyrir mér heilmikil samlegðaráhrif, bæði varðandi nýtingu mannafla, fjármuna og húsnæðis, og ekki síst möguleika á að sameina mótahald með glæsibrag. Þar nægir að nefna sameiningu Skákhátíðar MótX og Skákþings Reykjavíkur í eina allsherjar Skákhátíð sem stæði yfir allan janúarmánuð.

Vert er að geta þess að félagar okkar í Hugin norður setja nokkurn fyrirvara við sameininguna, telja að valdahlutföllin milli SV og NA kunni að raskast meira en góðu hófi gegnir. Við þá vil ég segja að jafnræðis verður gætt og sérstakar mótvægisaðgerðir verða settar í stofnsamning hins nýja félags. Ekki er óhugsandi að hið nýja félag muni leita hófanna vestur yfir Vaðlaheiði eða öllu heldur í gegnum hana þegar göngin verða loks tekin í notkun“ sagði Pálmi að lokum kankvís.

Boðað verður til félagsfunda hjá TR og Hugin strax eftir helgi, þannig að síðar í þessum mánuði fæst úr því skorið hvort af sameiningu félaganna verður. 

Carlsen og Caruana gerðu jafntefli - heimsmeistarinn nærri því að leggja áskorendann

Heimsmeistarinn Magnus Carlsen (2843) var afar nærri því að leggja áskorendann, Fabiano Caruana (2784) að velli í hróksendaendatafli. Magnús átti vinningsleik í 54. leik sem honum yfirsást. Öðrum skákum lauk með jafntefli nema að Nikita Vitiugov (2735) vann Matthias Bluebaum (2631) með glæsilegri fléttu.

Frásögn af gangi mála má finna á Chess.com.

Vignir Vatnar Stefánsson (2300) gerði tvö jafntefli í gær í a-flokki og hefur 2 vinninga eftir 5 umferðir.

Í b-flokki hefur stefán Már Pétursson (1698) 2,5 vinning en Guðmundur G. Guðmundsson (1591) 2 vinninga. 

Taflmennskan heldur áfram í dag og hefst kl. 13. Heimsmeistarinn teflir við Hou Yifan (2654), Caruana við Bluebaum. MVL (2789) og Anand (2776) mætast einnig.

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open