Fimmta umferð Íslandsmótsins hefst í Hafnarfirði kl. 17

 

Fimmta umferð Íslandsmótsins í skák hefst kl. 17 í dag í Hraunseli, Flatahrauni 3 í Hafnarfirði. Þar eru afar góðar aðstæður fyrir keppendur og áhorfendur. Mótið hefur verið í senn sviptingasamt og taflmennskan mjög fjörleg.

Í dag getur staðan skýrst á toppnum - því efstu og stigahæstu menn mætast innbyrðis á tveimur borðum. Annars vægast Fjölnisfélagarnir Héðinn og Dagur og hins Hannes og Guðmundur Kjartansson.

Í umferð dagsins mætast:

• FM Dagur Ragnarsson (3) - SM Héðinn Steingrímsson (3½)
• SM Hannes Hlífar Stefánsson (2½) - AM Guðmundur Kjartansson (3)
• FM Vignir Vatnar Stefánsson (1½) - AM Björn Þorfinnsson (2½)
• FM Guðmunudur Gíslason (½) - FM Sigurbjörn Björnsson (2)
• FM Davíð Kjartansson (½) - Bárður Örn Birkisson (1)

 

Staðan:

1. Héðinn Steingrímsson 3½ v.
2.-3. Guðmundur Kjartansson og Dagur Ragnarsson 3 v.
4.-5. Björn Þorfinnsson og Hannes Hlífar Stefánsson 2½ v.
6. Sigurbjörn Björnsson 2 v.
7. Vignir Vatnar Stefánsson 1½ v.
8. Bárður Örn Birkisson 1 v.
9.-10. Davíð Kjartansson og Guðmundur Gíslason ½ v.

Á skákstað er hægt að fylgjast með skákunum á stóru tjaldi í skáksalnum. Einnig er hægt að setjast inn í skákskýringaherbergið þar sem hægt er að spá í spilin með öðrum áhorfendum. 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.

Grandelius og Jobava sigurvegar Sigeman-mótsins

Sigeman-mótinu lauk í gær í Malmö í Svíþjóð. Íslandsvinirnir Nils Grandelius (2665) og Baadur Jobava (2713) urðu efstir og jafnir á mótinu. Báðir hlutu þeir 3 vinninga í 5 skákum. Pavel Eljanov (2755) og Erik Blomquist urðu í 3.-4. sæti með 2½ vinning.

Lokastaðan

 

Nánar um mótið á Chess.com.

Héðinn efstur á Íslandsmótinu í skák - Guðmundur og Dagur koma næstir

Fjórðu umferð Íslandsmótsins í skák er rétt nýlokið í Hafnarfirði. Héðinn Steingrímsson (2562) er efstur með 3½ vinning eftir öruggan sigur í aðeins 17 leikjum gegn Davíð Kjartanssyni (2389). Guðmundur Kjartansson (2437) og Dagur Ragnarsson (2320) eru í 2.-3. sæti með 3 vinninga eftir jafntefli í innbyrðis skák. Guðmundur sótti lengi vel að Degi sem varðist fimlega og náði þráskák og jafntefli.  

Björn Þorfinnsson (2407) vann Guðmund Gíslason (2306). Sigurbjörn Björnsson og Hannes Hlífar Stefánsson (2566) gerðu jafntefli í æsispennandi skák. Sigurbjörn fórnaði hrók fyrir sterk frípeð. Hannes átti vinningsleið í framhaldinu sem hann fann ekki og síðar átti Sigurbjörn vinningsleið sem hann einnig missti af. Jafntefli varð niðurstaðan. 

Bárður Örn Birkisson (2162), 17 ára, og Vignir Vatnar Stefánsson (2334), 14 ára, gerðu jafntefli í skák ungu mannanna þar sem Bárður átti lengi vel undir högg að sækja en varðist mjög vel og hélt sínu. 

Staðan:

1. Héðinn Steingrímsson 3½ v.
2.-3. Guðmundur Kjartansson og Dagur Ragnarsson 3 v.
4.-5. Björn Þorfinnsson og Hannes Hlífar Stefánsson 2½ v.
6. Sigurbjörn Björnsson 2 v.
7. Vignir Vatnar Stefánsson 1½ v.
8. Bárður Örn Birkisson 1 v.
9.-10. Davíð Kjartansson og Guðmundur Gíslason ½ v.

Fimmta umferð fer fram á morgun og hefst kl. 17. Þá eru tveir toppbaráttuslagir. Héðinn teflir við Dag og Guðmundur mætir Hannesi. 

Teflt er í Hraunseli, Flatahrauni 3, Hafnarfirði, við frábærar aðstæður bæði fyrir keppendur og áhorfendur. 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.

Fjórða umferð Íslandsmótsins hefst kl. 13 í Hafnarfirði

 

Fjórða umferð Íslandsmótsins í skák hefst núna kl. 13 í dag í Hraunseli, Flatahrauni 3 í Hafnarfirði. Þar eru afar góðar aðstæður fyrir keppendur og áhorfendur. Miklar sviptingar í umferð gærdagsins og spurning hvort slíkt verði einnig upp á teningnum í dag. Tveir af efstu mönnum mönnum mótsins, Guðmundur Kjartansson og Dagur Ragnarsson mætast. 

Í umferð dagsins mætast:

• AM Guðmundur Kjartansson (2½) - FM Dagur Ragnarsson (2½)
• SM Héðinn Steingrímsson (2½) - FM Davíð Kjartansson (½)
• FM Sigurbjörn Björnsson (1½) - SM Hannes Hlífar Stefánsson (2)
• AM Björn Þorfinnsson (1½) - FM Guðmundur Gíslason (½)
• Bárður Örn Birkisson (½) - FM Vignir Vatnar Stefánsson (1)

Á skákstað er hægt að fylgjast með skákunum á stóru tjaldi í skáksalnum. Einnig er hægt að setjast inn í skákskýringaherbergið þar sem hægt er að spá í spilin með öðrum áhorfendum. 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.

Skákþáttur Morgunblaðsins: Ekki fæðast allir með "fléttugleraugun" á nefinu

Hæfileikar manna á skáksviðinu eru stundum skilgreindir eftir hæfni þeirra til að sjá fyrir snjalla leiki. Ýmsir aðrir þættir eru vitaskuld líka mikilvægir en eitt er víst: ekki fæðast allir með "fléttugleraugun" á nefbroddinum. Með stöðugum æfingum er samt hægur vandi að rækta með sér hæfni á þessu sviði. Frægir fléttumeistarar eins og Mikhael Tal virtust hrista flétturnar fram úr erminni eins og enginn væri morgundagurinn og ekki nema von að menn stöldruðu við og spyrðu: Hvernig fer maðurinn að þessu? Hver er galdurinn? Svarið er að þrumuleikirnir koma stundum ef "almenn skynsemi" er látin víkja eitt andartak. Orðum þetta svo: í flókinni stöðu stendur valið kannski milli fjögurra eða fimm leikja og ólíklegasti möguleikinn getur verið sá eini rétti; sjaldnast reyndar – en stundum. Það er alveg ómaksins vert að brjóta hlekki hugar til að "útiloka vitleysuna," – eins og einn góður maður orðaði það. Á minningarmótinu um Aserann Vugar Gashimov féllu leikir þannig í sigurskák Topalovs gegn öflugasta skákmanni Pólverja:

Shamkir 2017

Radoslav Wojtaszek – Venselin Topalov

Slavnesk vörn

1. d4 d5 2. c4 c6 3. Rf3 Rf6 4. e3 Bf5 5. Rc3 e6 6. Rh4 Bg6 7. Rxg6 hxg6 8. Bd3 c5 9. Db3 Dd7 10. cxd5 exd5 11. dxc5 Rc6 12. Bd2 Bxc5 13. Hc1 Hd8 14. Ra4 Bd6 15. Rc5 Bxc5 16. Hxc5 d4 17. Bb5 O-O 18. Bxc6 bxc6 19. f3 De7 20. Hc2 Rd5 21. Kf2 Hb8 22. Da3 

Svartur virðist hafa jafnað taflið án mikilla erfiðleika og fremur dauflegt endatafl virðist blasa við. En Topalov skyggndist dýpra í stöðuna og spurði sig síðan: hver er ólíklegasti leikurinn í stöðunni?

22. ... Hxb2!!

Alveg magnað. Ef nú 23. Dxe7 þá kemur 23. ... Hxc2, og biskupinn fellur og e-peðið gerir út um taflið.

23. Dxb2 dxe3+ 24. Bxe3 Dxe3+ 25. Kg3

25. Kf1 kom einnig til greina og er skárri kostur þó að staðan sem kemur upp eftir 25. ... Rf4 26. Dc2 Db6! sé nánast óverjandi, t.d. 27. g3 Rd5! og 28. ... Re3+

25. ... Df4+ 26. Kf2 Hb8! 27. Dc1 Dd4+ 28. Kg3 Re3! 29. Hc5 Hb2 30. Hg1

 

Og hér hefði skákin mátt fá verðugan endi með öðrum frábærum leik, 30. ... Hc2! og Wojtaszek hefði stöðvað klukkuna og gefist upp þar sem 31. Hxc2 leiðir til máts, 31. ... Rf5+ 32. Kh2 Dh4 mát! Takið eftir að 31. Dxc2 Rxc2 32. Hxc3 dugar heldur ekki vegna 32. ... Dxg1. Leikurinn sem Topalov velur dugar samt til sigurs.

30. ...Hxa2 31. h3 Dd6+ 32. f4 Dd3 33. Kh2 De4 34. Hg5 Hc2

- og Wojtaszek gafst upp. Framhaldið gæti orðið 35. De1 Dxf4 36. Hg3 Rf5 o.s.frv.

Heimaðurinn Shakriyar Mamedyarov sigraði nokkuð óvænt, hlaut 5 ½ vinning úr níu skákum. Í 2. – 4. sæti komu So, Topalov og Kramnik með 5 vinninga hver.

 

 

Keppni í landsliðsflokki hefst í Hafnarfirði 10. maí

 

Af þeim tíu skákmönnum sem taka þátt í keppni landsliðsflokks á Skákþingi Íslands 2017 hafa fjórir orðið Íslandsmeistarar, Hannes Hlífar Stefánsson, Héðinn Steingrímsson, Þröstur Þórhallsson og Guðmundur Kjartansson. Aðrir keppendur í stigaröð eru Björn Þorfinnsson, Guðmundur Gíslason, Vignir Vatnar Stefánsson, Dagur Ragnarsson, Sigurbjörn Björnsson og Bárður Örn Birkisson. Mótið fer fram í Hraunseli í Hafnarfirði. Umferðirnar hefjast kl. 17. 

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 6. maí

Skákþættir Morgunblaðsins

Vignir gerði jafntefli við stórmeistarann - þrír efstir og jafnir eftir ótrúlega umferð

Þriðja umferð Íslandsmótsins í skák fór fram í Hafnarfirði í dag og gekk á ýmsu. Hinn 14 ára Vignir Vatnar Stefánsson (2334) gerði sér lítið fyrir og gerði jafntefli við stórmeistarann Héðin Steingrímsson (2562), þrefaldan Íslandsmeistara. Reyndar var það þannig að það var stórmeistarinn sem þurfti að hafa fyrir jafnteflinu. Dagur Ragnarsson (2320) og Guðmundur Kjartansson (2437) eru jafnir Héðni á toppnum. Báðir eftir ótrúlega sigra gegn andstæðingum sínum í dag. Hannes Hlífar Stefánsson (2566) er fjórði með 2 vinninga.

Aðeins einni skák lauk með jafntefli þ.e. áðurnefndi skák Vignis og Héðins. Björn Þorfinnsson (2407) vann öruggan sigur á Bárði Erni Birkissyni (2162) eftir að hafa lagt fyrir hann lævíslega gildru sem Bárður féll í. Hannes Hlífar sýndi sínar bestu hliðar þegar hann vann Guðmund Gíslason (2336). Á miklu gekk hins vegar í skákum Kjartanssona Davíðs (2389) og Guðmundar (2437) annars vegar og Dags Ragnarssonar (2320) og Sigurbjörns Björnssonar (2268) hinsvegar. 

Davíð virtist lengi vel vera að hafa sigur gegn Guðmundi en missti þráðinn í hróksendatafli. Lék fyrst niður skákinni í jafntefli og síðar í tap. Skák Sigurbjörns og Dags skipti nokkrum sinnum um eigendur. Í lokin virtist Sigurbjörn hafa nokkra vinningsmöguleika en lék af sér þá heilum hrók og mátti gefast upp.

Staðan:

1.-3. Dagur Ragnarsson, Héðinn Steingrímsson og Guðmundur Kjartansson 2½ v.
4. Hannes Hlífar Stefánsson 2 v.
5.-6. Björn Þorfinnsson og Sigurbjörn Björnsson 1½ v.
7. Vignir Vatnar Stefánsson 1 v.
8.-10. Bárður Örn Birkisson, Davíð Kjartansson og Guðmundur Gíslason ½ v.

Fjórða umferð fer fram á morgun og hefst kl. 13. Þá mætast meðal annars forystusauðirnir Guðmundur og Dagur. Héðinn teflir við Davíð. Hannes mætir Sigurbirni.

Á skákstað er hægt að fylgjast með skákunum á stóru tjaldi í skáksalnum. Einnig er hægt að setjast inn í skákskýringaherbergið þar sem hægt er að spá í spilin með öðrum áhorfendum. 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.

Þriðja umferð Íslandsmótsins hefst kl. 13

Þriðja umferð Íslandsmótsins í skák hefst núna kl. 13 í dag í Hraunseli, Flatahrauni 3 í Hafnarfirði. Þar eru afar góðar aðstæður fyrir keppendur og áhorfendur. Margar spennandi skákir í dag. Má þar nefna að forystusauðurinn Héðinn mætir Vigni Vatnar sem og skák Dags Ragnarssonar og Sigurbjörns Björnssonar sem báðar hafa 1½ vinning. 

Taktu þátt í getraun um röð efstu manna mótsins

Í umferð dagsins mætast:

• FM Vignir Vatnar Stefánsson (½) - Héðinn Steingrímsson (2)
• FM Dagur Ragnarsson (1½)- FM Sigurbjörn Björnsson (1½)
• FM Davíð Kjartansson (½) - Guðmundur Kjartansson (1½)
• SM Hannes Hlífar Stefánsson (1) - FM Guðmundur Gíslason (½) 
• Bárður Örn Birkisson (½)- AM Björn Þorfinnsson (½)  

Á skákstað er hægt að fylgjast með skákunum á stjóru tjaldi í skáksalnum. Einnig er hægt að setjast inn í skákskýringaherbergið þar sem hægt er að spá í spilin með öðrum áhorfendum. 

• Heimasíða mótsins
• Chess-Results
• Beinar útsendingar (Chess24) - hefjast kl. 17 á virkum dögum og kl 13 um helgar.

Vorhátíð TR fer fram í dag

Vorhátíð TR verður haldin næstkomandi laugardag þann 13.maí og hefst fjörið klukkan 14. Vorhátíðin er einskonar uppskeruhátíð allra þeirra barna sem mætt hafa á æfingar Taflfélags Reykjavíkur á þessari vorönn. Öllum börnum sem hafa sest að tafli á byrjendaæfingum, stúlknaæfingum, framhaldsæfingum, afreksæfingum eða á sjálfri Laugardagsæfingunni er velkomið að taka þátt í hátíðinni með okkur. Einnig öll þau börn sem teflt hafa fyrir hönd félagsins í Íslandsmóti unglingasveita og Íslandsmóti skákfélaga.

Á Vorhátíðinni teflum við 6 umferða mót með tímamörkunum 5 mínútur á skák auk 3 sekúndna sem bætast við eftir hvern leik (5+3). Verðlaunapeningar verða veittir fyrir 3 efstu sætin, 3 efstu stúlkur, 3 efstu af þeim sem eru fædd 2005 eða síðar og 3 efstu af þeim sem eru fædd 2008 eða síðar. Að auki verða veittar viðurkenningar fyrir góða ástundun á vorönninni.

Við hlökkum til að hitta ykkur öll og fagna saman vel heppnaðri vorönn!

Aðalfundur SÍ fer fram 27. maí nk.

Aðalfundur Skáksambands Íslands fer fram laugardaginn 27. maí í skákhöll TR, Faxafeni 12. Í viðhengjum með má finna ársreininga SÍ, lagabreytingatillögu Gunnars Björnssonar um Íslandsmót skákfélaga og svo sjálft fundarboðið.

Heimasíða SÍ.

Skrár tengdar þessari bloggfærslu:

• Ársreikningar SÍ 2016
• Aðalfundurboð 2017
• Íslandsmót skákfélaga - lagabreytingatillaga

Meistaramót Skákskóla Íslands fer fram 26.-28. maí

Meistaramót Skákskóla Íslands fyrir starfsárið 2016/2017 fer fram dagana 26.–28. maí og verður í tveim styrkleika/stigaflokkum.  Annar flokkurinn verður skipaður keppendum sem hafa 1600 alþjóðleg elo-stig eða meira en hinn flokkurinn er skipaður keppendum sem er undir 1600 elo stigum eða stigalausir. 

Skráning fer fram hér á Skák.is (guli kassinn efst). Upplýsingar um þegar skráða keppendur má finna hér.

Vakin er athygli á því að tímamörk eru mismunandi í flokkunum og færri umferðir verða tefldar í efri styrkleikaflokknum en þar er teflt um sæmdarheitið Meistari  Skákskóla Íslands. Núverandi meistari Skákskólans er Dagur Ragnarsson. 

Þátttökurétt hafa nemendur skólans og allir þeir sem tekið hafa þátt í námskeiðum á vegum skólans eða hlotið þjálfun á vegum skólans.  

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku. 

Mótsnefnd mun jafnframt taka afstöðu til óska þeirra sem ekki ná stigalágmörkum en vilja líka tefla í stigahærri flokknum.  

Flokkur undir 1600–elo-stigum og stigalausir: 

1. umferð: Föstudagur 26. maí kl. 18
2. umferð: Föstudagur 26. maí kl. 20 

3. umferð. Laugardagur 27. maí kl. 10-13.
4. umferð: Laugardagur 27. maí 13 –16
5. umferð: Laugardagur 27. maí 16-19 

6.. umferð: Sunnudagur 28. maí kl. 10-13.

7. umferð: Laugardagur 28. maí kl. 13 –16
8. umferð: Laugardagur 28. maí kl. 16-19 

Tímamörk í öllum umferðunum 30 30. 

Keppendur geta tekið eina eða tvær ½ vinnings yfirsetur í fyrstu fimm umferðunum en tilkynna verður um yfirsetuna fyrir umferð og áður en raðað er í þá næstu. 

 

Flokkur keppenda með 1600 – elo stig og meira. 

 

Tefldar verða sex umferðir eftir svissneska kerfinu í báðum flokkum.

Dagskrá mótsins verður með eftirfarandi hætti:

 

Flokkur 1600 alþjóðleg elo – stig og ofar:

 

1. umferð: Föstudagur 26. maí kl. 16
2. umferð: Föstudagur 26. maí kl. 20

 

3. umferð. Laugardagur 27. maí kl. 10
4. umferð: Laugardagur 27. maí 15

 

5. umferð: Sunnudagur 28. maí kl. 10
6. umferð: Sunnudagur 28. maí kl. 15

 

Tímamörk í öllum umferðunum 90 30.

 

Keppendur geta tekið eða tvær ½ vinnings yfirsetu í fyrstu fjórum umferðunum en verða að tilkynna um yfirsetuna fyrir umferðina og áður en raðað er í næstu umferð.

Skákmenn sem eru með minna en 1600 elo- stig geta óskað eftir því að tefla í flokki stigahærri keppenda og mun mótsnefnd taka afstöðu til þess og skila niðurstöðu með góðum fyrirvara. 

 

Verðlaun í flokki 1600 elo +

 

1. verðlaun: farmiði á skákmót að verðmæti kr. 50 þús + uppihaldskostnaður kr. 35 þús.
2. verðlaun: Farmiði á skákmót að verðmæti kr. 40 þús.
3. – 5. sæti Vandaðar skákbækur.

Auk þess verða veitt stigaflokkaverðlaun í mótinu:

 

1800 – 2000 elo:

1. verðlaun: Farmiði á skákmót að verðmæti kr. 40 þús.

 

1600-1800 elo:

1. verðlaun: Farmiði á skákmót að verðmæti kr. 40 þús.

 

Verðlaun í flokki 1600 elo og minna  og stigalausra:

 

1. verðlaun: farmiði á skákmót að verðmæti kr. 40 þús:
2. – 3. verðlaun: vandaðar skákbækur að eigin vali.

 

Verðlaun keppenda sem eru undir 1200 elo stig eða stigalausir:

1. verðlaun: Vandaðar skákbækur.
2. verðlaun: Landsliðstreyja „tólfunnar“.
3. verðlaun: Landsliðstreyja „tólfunnar“.

 

Mótsstig úrskurða verði keppendur jafnir að vinningum í báðum flokkum - nema í keppni um 1.  sæti í stigahærri flokknum . Þá skal teflt um titilinn: 

Meistari Skákskóla Íslands 2017. 

Aðalstyrktaraðili Meistaramóts Skákskóla Íslands 2017 er  GAMMA.