Hjörvar endaði með sigri á Xtracon-mótinu

Hjörvar Steinn Grétarsson (2550) vann danska FIDE-meistarann Johnny Veng (2280) í lokaumferð Xtracon-mótins (Politiken Cup). Í umferðunum þar á undan gekk hins vegar ekki vel hjá stórmeistaranum. Einar Hjalti Jensson (2371) tapaði hins vegar í lokaumferðinni. Hjörvar hlaut 7 vinninga og endaði í 23.-42. sæti (28.) en Einar hlaut 6½ vinning og endaði í 43.-75. sæti (50.). 

Einar hækkar um 4 stig fyrir frammistöðu sína en Hjörvar lækkar um 9 stig.

Sigurlaug R. Friðþjófsdóttir (1815) hlaut 4½ vinning og Lárus H. Bjarnason (1586) hlaut 3½ vinning.

Sjö skákmenn urðu efstir og jafnir með 8 vinninga. Sigurvegari mótsins eftir stigaútreikning varð þýski stórmeistarinn Matthias Bluebaum (2618). 

Gunnar Finnlaugsson tók þátt í Pub Quiz mótsins og náði þar öðru sæti ásamt félaga sínum.

398 skákmenn frá 26 löndum tóku þátt í mótinu. Þar af voru 27 stórmeistarar. 

• Heimasíðan mótsins
• Chess-Results
• Beinar útsendingar á Chess24

Ágætis árangur á opna tékkneska mótinu

Opna tékkaneska mótinu (Czech Open) lauk í gær í Pardubice. Oliver Aron Jóhannesson (2232) hlaut 4½ vinning í 9 skakum og Dagur Ragnarsson (2274) hlaut 4 vinninga en þeir tefldu í a-flokki. Oliver hækkar um 5 stig en Dagur lækkar um 2 stig.

Fimm íslenskir skákmenn tefldu í b-flokki. Jón Trausti Harðarson (2078) stóð sig þeirra best en hann hlaut 6 vinninga og var lengi vel í toppbaráttunni. Haraldur Baldursson (1926) hlaut 5 vinninga, Sigurður Ingason (1846) 4½ vinning, Óskar Haraldsson (1735) 3 vinninga og Veronika Steinunn Magnúsdóttir (2786) 2½ vinning.

Haraldur hækkar um 31 stig, Jón Trausti um 24 og Sigurður um 19. Óskar lækkar um 3 stig og Veronika um 36.

Árangur íslensku keppendanna

 

• Heimasíða mótsins
• Chess-Results
• Beinar útsendingar (hefjast kl. 13). 

Hannes og Bragi tefla í Dresden

Landsliðsmennirnir Hannes Hlífar Stefánsson (2577) og Bragi Þorfinnsson (2433) hnýttu skóþvenga sína á föstudag og héldu til Þýskalands þar sem þeir taka þátt í ZMDI-mótinu í Dresden. Fyrsta umferð fór fram í gær og unnu þeir báðir. Hannes vann Þjóðverjann Frank Reinemer (2162) en Bragi lagði Thomas Kastek (2080) að velli.

Önnur umferð fer fram í dag. Hannes teflir við Theo Gungl (2290) og Bragi við Benjamin Wagner (1901).

• Heimasíða mótsins
• Úrslitaþjónusta
• Beinar útsendingar (hefjast kl. 12)

Skákþáttur Morgunblaðsins: Vachier-Lagrave – nýr maður í 2. sæti heimslistans

Ef velja ætti fimm skákmenn úr skáksögunni sem á sinni tíð höfðu algera yfirburði yfir samtíðarmenn sína koma margir til greina en ég hygg að óhætt sé að setja Magnús Carlsen á þann lista, slíkir eru yfirburðir hans um þessar mundir. Garrí Kasparov er þarna vitaskuld líka; á 20 ára ára tímabili, 1985-2005, trónaði hann einn á toppi elo-listans. Síðan koma José Raul Capablanca, Bobby Fischer og Anatolí Karpov. Aðra kandídata má telja Emanuel Lasker sem var yfirburðamaður í byrjun 20. aldar, Alexander Aljekín á árunum í kringum 1930 og Mikhail Tal eftir einvígið við Botvinnik árið 1960.

Það vakti athygli á dögunum á mótinu í Bilbao á Spáni að Magnús Carlsen tapaði í fyrstu umferð fyrir Nakamura. Norðmaðurinn hefur unnið fjögur síðustu mót sem hann hefur tekið þátt í og vaknaði sú spurning hvort efsta sætið í móti, þar sem þrjú stig eru gefin fyrir sigur og eitt fyrir jafntefli væri í hættu. Hann svaraði fyrir sig með því að vinna næstu þrjár skákir og var nálægt því að leggja Giri, sem hann hefur aldrei unnið í kappskák, með svörtu í fimmtu umferð. Eftir fyrri umferð mótsins blasti sú staðreynd við að hrein úrslit höfðu aðeins fengist í skákum Magnúsar; öllum öðrum viðureignum hafði lokið með jafntefli og staðan þessi:

1. Carlsen 10 stig – 3 ½ v. af 5. 2. Nakamura 7 stig – 3 v. 3. Giri 5 stig – 2 ½ v. 4.- 6. Karjakin, Wei og So 4 stig – 2 v.

Viðureignar Magnúsar við áskorandann Sergei Karjakin í þriðju umferð var beðið með mikilli eftirvæntingu og Magnús brást ekki aðdáendum sinum og vann glæsilega. Fátt sem bendir til annars en að hann verji heimsmeistaratitilinn í New York í haust.

Í skákinni sem hér fer á eftir grípur Karjakin hvað eftir annað í tómt þegar hann er að reyna að skapa sér færi á drottningarvæng. Fyrirvaralaust stendur hann frammi fyrir miklum ógnunum á kóngsvæng, sem Carlsen hefur undirbúið af slægð. Vinningsleikurinn byggist á banvænni leppun.

 

Bilabo 2016; 3. umferð:

Magnús Carlsen – Sergei Karjakin

Sikileyjarvörn

1. e4 c5 2. Rf3 d6 3. c3 Rf6 4. Be2 g6 5. O-O Bg7 6. Bb5+!?

Sérkennilegt „tempótap“ sem gefist hefur furðu vel.

6....Rc6 7. d4 Db6 8. Ba4 cxd4 9. cxd4 O-O 10. d5 Rb8 11. Rc3 Bg4 12. h3 Bxf3 13. Dxf3 Rbd7 14. Hb1 Hfc8 15. Bc2 Re5 16. De2 Rfd7 17. Bg5 h6 18. Bh4 g5 19. Bg3 Da6 20. Dd1 Hc4 21. Kh1 Hac8 22. f4 gxf4 23. Bxf4 Db6 24. Dh5 Rf6 25. Df5!

Þarna setur drottningin óþægilega pressu á kóngsstöðu svarts.

25....Dd8 26. Bb3 Hd4 27. Bxe5 dxe5 28. Hbd1 Dd7 29. Df3!

Hafnar öllum óskum um uppskipti og viðheldur hótuninni 30. Hxd4 exd4 31. e5 o.s.frv.

29....Hb4 30. Hd2 Hf8 31. g4!

Peð eru líka sóknarmenn!

31....a5 32. Hg2 Rh7 33. h4 Hb6 34. g5 Kh8 35. Hfg1 f5?

Gerir illt verra. Eina vörnin var fólgin í 35....Hg6.

36. Dh3!

Banvæn leppun.

36....Hb4 37. gxh6 Bxh6 38. Dg3!

Hótar 39. Dg8+! og mátar.

38....Rf6 39. Dg6 Rg4 40. Hxg4

- og Karjakin gafst upp.

Í Þýskalandi dró til tíðinda þegar Vachier-Lagrave vann hið árlega skákmót í Dortmund með yfirburðum, hlaut 5 ½ vinning af sjö mögulegum og varð 1 ½ vinningi fyrir ofan næstu menn, Kramnik, Caruana og Dominguez. Úrslitin þýða að þessi hógværi franski stórmeistari er nú kominn í 2. sæti heimslistans með 2811 elo-stig.

Grein þessi birtist í Morgunblaðinu 23. júlí 2016

Skákþættir Morgunblaðsins

[Event "Bilbao"] [Site "Bilbao ESP"] [Date "2016.07.15"] [EventDate "2016.07.13"] [Round "3"] [Result "1-0"] [White "Magnus Carlsen"] [Black "Sergey Karjakin"] [ECO "B50"] [WhiteElo "2855"] [BlackElo "2773"] [PlyCount "79"] 1. e4 c5 2. Nf3 d6 3. c3 Nf6 4. Be2 g6 5. O-O Bg7 6. Bb5+ Nc6 7. d4 Qb6 8. Ba4 cxd4 9. cxd4 O-O 10. d5 Nb8 11. Nc3 Bg4 12. h3 Bxf3 13. Qxf3 Nbd7 14. Rb1 Rfc8 15. Bc2 Ne5 16. Qe2 Nfd7 17. Bg5 h6 18. Bh4 g5 19. Bg3 Qa6 20. Qd1 Rc4 21. Kh1 Rac8 22. f4 gxf4 23. Bxf4 Qb6 24. Qh5 Nf6 25. Qf5 Qd8 26. Bb3 Rd4 27. Bxe5 dxe5 28. Rbd1 Qd7 29. Qf3 Rb4 30. Rd2 Rf8 31. g4 a5 32. Rg2 Nh7 33. h4 Rb6 34. g5 Kh8 35. Rfg1 f5 36. Qh3 Rb4 37. gxh6 Bxh6 38. Qg3 Nf6 39. Qg6 Ng4 40. Rxg4 1-0

Tap í lokaumferðinni gegn Moldóvum - Íranir ólympíumeistarar

Ísland tapaði ½-3½ fyrir sveit Moldava í lokaumferð Ólympíuskákmóts 16 ára og yngri. Björn Hólm Birkisson gerði jafntefli en aðrar skákir töpuðust. Sveitin endaði í 24. sæti af 54 sveitum en fyrirfram var sveitinni raðað í sæti nr. 32. Íranar unnu öruggan sigur á mótinu en ljóst er að Íran verður stórveldi í skák innan ekki svo margra ára.

Úrslit 9. umferðar

Röð efstu sveita

Íslenska liðið skipuðu:

1. Vignir Vatnar Stefánsson 4½ af 8
2. Bárður Örn Birkisson 4½ af 8
3. Björn Hólm Birkisson 4 v. af 9
4. Hilmir Freyr Heimisson 6 v af 8
5. Svava Þorsteinsdóttir 1 v af 3

Kjartan Maack var liðsstjóri íslenska liðsins.

 

• Heimasíða mótsins
• Beinar útsendingar 
• Chess-Results

Íslandsmót kvenna hefst á miðvikudaginn

Íslandsmót kvenna hefst miðvikudaginn 3. ágúst í húsnæði Skáksambands Íslands, Faxafeni 12, Reykjavík. Teflt verður í einum flokki, þ.e. mótið opið öllum konum/stúlkum.

Tímamörk: 90 mín. + 30 sek. á leik auk 30 mínútna eftir 40 leiki.

Dagskrá:         

• 1. umferð: Miðvikudagurinn, 3. ágúst, kl. 19:30
• 2. umferð: Föstudagurinn, 5. ágúst, kl. 19:30
• 3. umferð: Laugardagurinn, 6. ágúst kl. 14:00
• 4. umferð: Sunnudagurinn, 7. ágúst kl. 14:00
• 5. umferð: Þriðjudagurinn, 9. ágúst kl. 19:30
• 6. umferð: Fimmtudagurinn, 11. ágúst, kl. 19:30
• 7. umferð: Laugardagurinn, 13. ágúst kl. 14:00

Leyfilegt er taka tvær hálfvinnings yfirsetur (bye) í umferðum 1-4. 

Verðlaun:       

• 1. 75.000-
• 2. 45.000.-
• 3. 30.000.-

Íslandsmeistari kvenna fór einnig boð á Norðurlandamót kvenna sem fram fer í Sastamala Finnlandi 22.-30. október nk. 

Verði tvær eða fleiri konur efstar verður teflt til þrautar með skemmri umhugsunartíma um Íslandsmeistaratitlinn.

Skráning fer fram hér á Skák.is (guli kassinn efst).

Upplýsingar um þegar skráða keppendur má finna hér. 

Pistill frá Slóvakíu - þriðji hluti

Í fyrradag birtist fyrsti hluti pistils Kjartans Maack um Ólympíuskákmót 16 ára og yngri. Í gær var birist svo annar hluti pistilins.

Í dag er þriðji hluti birtur þar sem fjallað er um umferðir 4-5. 

-------------- 

Ólympíumót ungmenna yngri en 16 ára fer fram í Poprad, Slóvakíu dagana 22.júlí -29.júlí. Landsliðið er þannig skipað: 1.Vignir Vatnar Stefánsson (2171) 2.Bárður Örn Birkisson (2048) 3.Björn Hólm Birkisson (1977) 4.Hilmir Freyr Heimisson (1974) 5.Svava Þorsteinsdóttir (1313).  

4.umferð – S Afríka 2 (1¹/2 - 2¹/2)

Daginn fyrir brottför frá Íslandi fékk liðsstjóri símhringingu frá hinum reynslumikla skákþjálfara, Torfa Leóssyni, sem eitt sinn stóð í sömu sporum og stýrði u16 ára landsliði Íslands á Ólympíumóti. Torfi varaði sérstaklega við skákmönnum frá S-Afríku sem hann sagði með alltof lág stig miðað við styrkleika. Liðsstjórinn reyndi að koma þessum skilaboðum áleiðis til liðsmanna en hefur trúlega ekki lagt nógu mikla áherslu á þetta. Verandi talsvert stigahærri mættum við sigurviss til leiks. Bárður hvíldi. Fljótlega varð ljóst að viðureignin yrði hnífjöfn því stöðurnar voru óljósar á öllum borðum, ef eitthvað var hallaði á okkar lið. Svava lenti í vandræðum á 4.borði og Vignir fékk ekki úr miklu að moða á 1.borði. Björn lék svo af sér og tapaði, og Svava tapaði sinni skák slysalega. Vignir reyndi að kreista fram vinning úr jafnri stöðu en allt kom fyrir ekki og jafntefli varð niðurstaðan. Við vorum því aðeins með hálfan vinning eftir þrjár skákir og ljóst að viðureignin myndi tapast. Það var því huggun harmi gegn er Hilmir náði að snúa á andstæðing sinn og vinna sína skák. Þetta tap gegn S-Afríku var mikið högg og sporin heim voru afar þung.

Þegar heim á hótel var komið var fyrirskipunin einföld; skák bönnuð þar til morguninn eftir. Landsliðsmenn reimuðu þess í stað á sig skó og héldu út í kvöldið með fótbolta og körfubolta. Mörgum körfum, mörkum og tilþrifum síðar höfðu allir náð að skila vonbrigðum dagsins út um svitaholurnar. Á leiðinni tilbaka fórum við yfir stöðuna og yfir hvað þarf að gera til að snúa við blaðinu. Liðsmenn brugðust vel við því það var allt annað yfirbragð á liðinu sem mætti daginn eftir gegn S-Afríku 3.

 

5.umferð – S Afríka 3 (4 – 0)

Lið S-Afríku 3 var eingöngu skipað stúlkum sem allar voru mun stigalægri en okkar liðsmenn. Svava hvíldi í þessari viðureign. Liðsstjóra þótti erfitt að taka þá ákvörðun því Svava hefði fengið mjög ákjósanlegan andstæðing. Hins vegar þótti liðsstjóra brýnt að stilla upp bæði Birni og Vigni eftir vonbrigði gærdagsins. Þessi viðureign var kjörin til þess að tefla sig í gang aftur. Hilmir var taplaus og Bárður vel hvíldur, því kom ekki til greina að hvíla þá aftur. Þess vegna var sterkasta liðinu stillt upp gegn veikasta andstæðingi okkar til þessa. Vanmat var hvergi sjáanlegt hjá þeim sem tefldu í þessari viðureign enda var sigurinn afar öruggur, 4-0. Allir sátu við borðið nær alla viðureignina og þegar stöður urðu vænlegar héldu allir áfram að vanda hvern einasta leik. Vignir Vatnar vann mann nokkuð fljótt og stuttu síðar skákina. Hilmir beitti brögðum á 4.borði og vann líka örugglega með því að máta svarta kónginn á h5 með biskupi sínum á e2. Þeir bræður Björn og Bárður sýndu fádæma þolinmæði og yfirvegun því þeir tryggðu sinn sigur ekki fyrr en seint í skákunum. Þó vissulega hafi krafan verið 4-0 sigur gegn þessum mun veikari andstæðingi, þá var liðsstjórinn afar ánægður með hvernig liðsmenn nálguðust verkefnið.

 

Kjartan Maack.

Hraðskákkeppni taflfélaga hefst eftir verslunarmannahelgi - skráningarfrestur að renna út

Hraðskákkeppni taflfélaga, hefst venju samkvæmt nú eftir verslunarmannahelgi. Þetta er í 22. skipti sem keppnin fer fram en Skákfélagið Huginn er núverandi meistari. Í fyrra tóku 18 lið þátt keppninni.

Þátttökugjöld eru kr. 6.000 kr. á hverja sveit, en sendi sama félag tvær sveitir í keppnina er gjaldið fyrir b-sveitina 4.000 kr. Greiða skal inn á reikning 327-26-6514, kt. 650214-0640 og senda greiðslukvittun á netfangið [e-mail] fyrir 31. júlí.

Teflt er eftir útsláttarfyrirkomulagi.

Skráningarfrestur rennur út 31. júlí nk. Skráning fer fram á www.skak.is (guli kassinn efst). Hægt er að skrá b-sveitir til leiks en a-sveitir njóta forgangs varðandi þátttöku komi til þess að fleiri en 16 lið skrái sig til leiks.

Upplýsingar um þegar skráðar sveitir má finna hér.

• Heimasíða mótsins
• Skráningarform
• Skráð lið

 

Dagskrá mótsins er sem hér segir:

1. umferð (16 liða úrslit): Skuli vera lokið eigi síðar en 15. ágúst
2. umferð (8 liða úrslit): Skuli vera lokið eigi síðar en 30. ágúst
3. umferð (undanúrslit): Skulu fara fram sunnudaginn, 18. september
4. umferð (úrslit): Skulu fara fram fram laugardaginn, 24. september

Umsjónaraðili getur heimilað breytingar við sérstakar aðstæður. Breyta má dagsetningum á úrslitum og/eða undanúrslitum með samþykki allra viðkomandi taflfélaga.

 

Reglur keppninnar

1. Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.
2. Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar. Mótshaldari leggur fram dómara í undanúrslit og úrslit.
3. Undanúrslit og úrslit keppninnar verða reiknuð til alþjóðlegra hraðskákstiga.
4. Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.
5. Ætlast er til þess að þeir sem tefli séu fullgildir meðlimir síns félags (á Keppendaskrá SÍ). Aðeins má tefla með einu taflfélagi í keppninni.
6. Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.
7. Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.
8. Heimalið bjóði upp á léttar veitingar, t.d. kaffi, gos, kökur. Mótshaldari sér um veitingar í undanúrslitum og úrslitum.
9. Meðlimir b-sveita skula ávallt vera stigalægri en meðlimir a-sveitar (FIDE-stig) sömu umferðar. Skákmaður sem hefur teflt með a-sveit getur ekki teflt með b-sveit síðar í keppninni.
10. Viðureignirnar skulu fara fram innan 100 km. radíus (max 1-1,5 klst.ferðalag) frá Reykjavík nema að félög komi sér saman um annað.
11. Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.
12. Úrslit keppninnar verða ávallt aðgengileg á heimasíðu Hugins, skakhuginn.is sem er heimasíða keppninnar, og á www.skak.is.
13. Mótshaldið er í höndum Skákfélagsins Hugins sem sér um framkvæmd mótsins og mun útvega verðlaunagripi.

Stórsigur gegn Belgum!

Það dugði lítt Belgum að mæta í húfum í landsliðslitunum gegn Íslandi í áttundu og næstsíðustu umferð Ólympíuskákmótmóts 16 ára og yngri í dag. Íslenska liðið gjörsigraði það belgíska 3½- ½. Vignir Vatnar Stefánsson, Björn Hólm Birkisson og Hilmir Freyr Heimisson unnu allir. Vignir með einkar laglegri mannsfórn í endatafli. Sjá skákdálk Fréttablaðsins í fyrramálið.

 

Úrslit 8. umferðar

Íslenska sveitin er nú kominn upp í 18. sæti af 54 sveitum en fyrirfram var sveitinni raðað í 32. sæti styrkleikaröðinni. 

Röð efstu sveita

Afar erfitt hlutskipti bíður sveitarinnar á morgun en þá mætir íslenska sveitin sterkri sveit Moldóva sem er stigahærri á öllum borðum. Umferðin hefst kl. 8 í fyrramálið. 

Pörun 9. umferðar

Íslenska liðið er það 32. í styrkleikaröð 54 liða. Hverju liði er skylt að hafa eina stúlku liðinu sem tefla skal a.m.k. 3 skákir af 9 á mótinu. Kjartan Maack er liðsstjóri liðsins.

• Heimasíða mótsins
• Beinar útsendingar 
• Chess-Results

Pistill frá Slóvakíu - annar hluti

Í gær birtist fyrsti hluti pistils Kjartans Maack um Ólympíuskákmót 16 ára og yngri. Í dag höldum við áfram. Að þessu sinni er fjallað um umferðir 1-3.  

-------------- 

Ólympíumót ungmenna yngri en 16 ára fer fram í Poprad, Slóvakíu dagana 22.júlí -29.júlí. Landsliðið er þannig skipað: 1.Vignir Vatnar Stefánsson (2171) 2.Bárður Örn Birkisson (2048) 3.Björn Hólm Birkisson (1977) 4.Hilmir Freyr Heimisson (1974) 5.Svava Þorsteinsdóttir (1313).  

1.umferð – Þýskaland (1 - 3)

Íslenska liðið mætti sterkri sveit Þýskalands í fyrstu umferð mótsins. Þjóðverjar höfðu á að skipa fimmtu stigahæstu sveit mótsins og skörtuðu heimsmeistara á fyrsta borði. Andstæðingur okkar var því rammur að afli. Liðsstjórinn ákvað að tefla fram sterkasta liðinu til að sjá strax hvernig þeir væru stefndir. Svava hvíldi því í þessari umferð. Um tíma stóðum við höllum fæti á öllum borðum, einkum vegna erfiðleika í byrjunum. En Bárður Örn og Hilmir Freyr sýndu að íslenska liðið mun bíta frá sér á mótinu. Þeir nældu sér í sitthvort jafnteflið með hvítu í 1-3 tapi. Það var sérstaklega ánægjulegt að sjá hvernig Bárður notaði biskupaparið til að stýra skákinni í öruggt jafntefli. Það er alltaf vont að tapa, en við gátum þó staðið upp frá þessari viðureign vitandi að við gerðum eins vel og við gátum. Við mættum einfaldlega ofjarli okkar að þessu sinni. 

2.umferð – Slóvakía KSV (4 - 0)

Fyrri tvöfaldi dagurinn hófst á viðureign við heimamenn, Slóvaka. Þeir sendu 8 sveitir í mótið; A- og B-sveit, og svo sex sveitir frá mismunandi héruðum landsins. Andstæðingar okkar voru frá Kosice héraðinu og vorum við stigahærri á þremur borðum en stigalægri á því fjórða. Hilmir hvíldi sem þýddi að Svava fékk eldskírn sína á Ólympíumóti. Slóvakarnir gáfu okkur ekkert í viðureigninni og þurftum við að sýna mikla þolinmæði á nokkrum borðum. Vignir Vatnar var sérstaklega þolinmóður á efsta borði þar sem hann bætti stöðu sína hægt og rólega. Slóvakinn varðist vel en það tók sinn toll á klukkunni. Vignir lék eðlilegum leikjum og beið rólegur þar til Slóvakinn var kominn niður á 30 sekúndurnar. Þá byrjaði Vignir að leggja þrautir fyrir hann og að lokum varð ein slík Slóvakanum að falli. Svava tefldi Sikileyjarvörnina sína en lenti fljótlega í óþægilegri klemmu þegar andstæðingurinn, sem var 200 stigum hærri, fórnaði manni fyrir þrjú peð. Svava fann þó alltaf leiðir til að leysa vandamál og bæta stöðu manna sinna. Seint í miðtaflinu féll Slóvakinn í fallega taktíska gildru sem Svava hafði spunnið sem leiddi til þess að Svava endaði manni yfir í endatafli. Úrvinnsla hennar í lokinn var óaðfinnanleg og reyndist lokahnykkurinn í 4-0 sigri. 

3.umferð – Kína (¹/2 - 3¹/2)

Andstæðingur okkar í 3.umferð var alþýðulýðveldið Kína. Það er erfitt að mæta þessari risa-skákþjóð því illmögulegt er að lesa í styrkleika liðsmanna þeirra. Við vorum stigalægri á þremur efstu borðum en stigahærri á 4.borði. Við óttuðumst að styrkleiki þeirra væri meiri en skákstig þeirra gáfu tilefni til að ætla. Sá ótti reyndist á rökum reistur, þá sérstaklega hvað fjórða borðið varðaði. Gegnt Hilmi Frey, á 4.borði, settist 11 ára gömul stúlka klædd í bleikt frá toppi til táar. Bleikir skór, bleikir sokkar, bleik gleraugu og meira að segja bleik teygja í hárinu. Á borðinu hafði hún bleikan hunny bunny kisubrúsa sem geymdi kínverskan eplasafa. Saklausari andstæðing er varla hægt að finna, eða hvað? Hilmir komst lítið áleiðis gegn bleiku vélinni sem lék eðlilegum og góðum leikjum. Hilmir reyndi allt hvað hann gat að vinna skákina en stúlkan gaf engin færi á sér. Hilmir teygði sig nokkuð langt í leit að vinningi og skyndilega var það sú kínverska sem gat teflt til sigurs. Þegar stúlkan áttaði sig á því að hún gat teflt til sigurs breyttist allt hennar fas skyndilega. Varir hennar herptust saman, í augun kom ógnvekjandi morðglampi og kisuglasinu var ýtt til hliðar. Svo fórnaði hún manni fyrir þrjú peð í endataflinu, án mikillar umhugsunar. Mikill ótti greip um sig hjá íslenska liðsstjóranum á þeim tímapunkti. Hilmir Freyr var þó vandanum vaxinn og fann leið til að halda jafnteflinu. Litla kínverska vélin var þó ekkert á því að sætta sig við það og færði kóng sinn fram og aftur um borðið í von um að Hilmi yrðu á mistök. Er ljóst var að Hilmir myndi ekki leika af sér, þá hélt sú kínverska samt áfram að reyna að vinna. Þegar hún fann ekki vinningsleið á borðinu, þá starði hún upp í loft eða á næsta vegg í leit að vinningsleiðinni. Minnti þetta nokkuð á aðferðir Vassily Ivanchuk, þó fátt virðist líkt með þessum tveimur skákmönnum að öðru leyti. Mögulega hefur Ivanchuk verið farinn að rannsaka loft og veggi í skáksölum um 11 ára aldur, en hitt verður að teljast ólíklegt að hann hafi klæðst bleiku eða drukkið eplasafa úr kisuglasi. Kínverska stúlkan var ákaflega vonsvikinn þegar hún varð loks að sættast á skiptan hlut.

Vignir tefldi ágætlega á 1.borði, missti af vænlegri leið í miðtaflinu og endaði í riddaraendatafli með einu peði færra. Andstæðingur Vignis tefldi endataflið afar vel og vissi nákvæmlega hvernig átti að tefla það. Bárður lenti í vandræðum snemma tafls og missti þá af eina möguleikanum til að komast klakklaust frá byrjuninni. Eftirleikurinn reyndist auðveldur fyrir Kínverjann. Hálfur vinningur gegn Kína er ekki glæsilegt, en ekkert stórslys heldur.

Framahald á morgun!

Kjartan Maack.