Sumarsyrpa Breiðabliks 2016

Sumarsyrpa Breiðabliks er með samskonar fyrirkomulagi og hin vinsæla Bikarsyrpa TR.
Mótið er ætlað börnum á grunnskólaaldri (fæddum 2000 og síðar) sem ekki hafa náð 1600 skákstigum. Mótið er reiknað til íslenskra og alþjóðlegra skákstiga.
Tefldar eru 5 umferðir eftir svissneska kerfinu. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Það margborgar sig að vanda sig og nota tímann, en samt má búast við því að margar skákir klárist á styttri tíma.

Dagskrá:

• Föstudagurinn 5.ágúst :  1 umferð klukkan 17.30
• Laugardagurinn 6.ágúst : 2 umferð klukkan 10.30
• Laugardagurinn 6.ágúst : 3 umferð klukkan 14
• Sunnudagurinn 7.ágúst : 4 umferð klukkan 10.30
• Sunnudagurinn 7.ágúst : 5 umferð klukkan 14

Teflt er í Glersalnum í Stúkunni við Kópavogsvöll.

Sigur og jafntefli í dag á Ólympíuskákmótinu

Það gekk á ýmsu á ólympíuskákmótinu undir 16 ára í Slóvakíu í dag. Í fyrri umferð dagsins gerði sveitin 2-2 jafntefli við pólska sveit. Þar unnu Bárður Örn Birkisson og Hilmir Freyr Heimisson sínar skákir. Í síðari umferð dagsins vannst 3-1 sigur á Hong Kong. Þá unnu Vignir Vatnar Stefánsson og Hilmir Freyr sínar skákir.

Úrslit 6. umferðar

Úrslit 7. umferðar

Íslenska sveitin hefur 7 stig eftir 7 umferðir og er í 26. sæti. Áttunda og næstsíðasta umferð fer fram á morgun og þá teflir Ísland við Belgíu.

Íslenska liðið er 32. í styrkleikaröð 54 liða. Hverju liði er skylt að hafa eina stúlku liðinu sem tefla skal a.m.k. 3 skákir af 9 á mótinu. Kjartan Maack er liðsstjóri liðsins.

• Heimasíða mótsins
• Beinar útsendingar 
• Chess-Results

Hjörvar og Einar Hjalti unnu í dag

Hjörvar Steinn Grétarsson (2550) og Einar Hjalti Jensson (2371) komu sterkir til baka í dag í sjöttu umferð Xtracon-mótins (Politiken Cup) í dag eftir töp í gær. Báðir unnu þeir sannfærandi sigra. Hjörvar hefur 5 vinninga en Einar Hjalti hefur 4½ vinning.

Sjöunda umferð fer fram á morgun. Þá teflir Hjörvar við alþjóðlega meistarann Kevin Goh Wei Ming (2435) frá Singapore en Einar teflir við rússneska stórmeistarann Vladimir Burmakin (2549).

Sigurlaug R. Friðþjófsdóttir (1815) hefur 3 vinninga og Lárus H. Bjarnason (1516) hefur 1½ vinning. 

398 skákmenn frá 26 löndum taka þátt í mótinu. Þar af eru 27 stórmeistarar. 

• Heimasíðan mótsins
• Chess-Results
• Beinar útsendingar á Chess24 (hefjast flestar kl. 11:15).

Pistill frá Slóvakíu - fyrsti hluti

Kjartan Maack hefur skrifað pistil um veruna um Ólympíuskákmót 16 ára og yngri. Hér má finna fyrsta hluta pistilsins. Framhald væntanleg.

-------------- 

Ólympíumót ungmenna yngri en 16 ára fer fram í Poprad, Slóvakíu dagana 22.júlí -29.júlí. Landsliðið er þannig skipað: 1.Vignir Vatnar Stefánsson (2171) 2.Bárður Örn Birkisson (2048) 3.Björn Hólm Birkisson (1977) 4.Hilmir Freyr Heimisson (1974) 5.Svava Þorsteinsdóttir (1313). 

Ferðalagið

Það voru nokkuð lúnir skákmenn sem lentu á flugvellinum í Búdapest laust eftir miðnætti aðfaranótt 21.júlí. Um tvö leytið komum við á hótelið sem mótshaldarar höfðu útvegað okkur og stóð til að halda ferðalaginu áfram til Slóvakíu klukkan 9 morguninn eftir.

Hótelið lofaði ekki góðu við fyrstu sýn, reyndar ekki við aðra sýn heldur. Aðalinngangur hótelsins var harðlæstur og ljósin slökkt. Við fundum dyrabjöllu og ýttum á hana. Stuttu síðar birti til í anddyrinu og hurðin opnaðist. Í dyrunum stóð hótelstjórinn með úfið hár, hálf lokuð augu og bara alls ekkert hress. Hann sagði eitthvað óskiljanlegt eins atkvæðis orð og gekk aftur inn, og við á eftir. Tók þá við posafarsinn. Korti liðsstjórans var rennt í gegn en posavélin neitaði að bregðast við með hefðbundnum hætti. Nokkur reikistefna skapaðist og varð niðurstaðan sú að greiðslan hafði ekki farið í gegn. Hressi hótelstjórinn reyndi aftur og aftur og aftur. Og svo aftur. Þá loks hrökk apparatið í gang eða allt þar til kom að því að prenta kvittun. Þá aðgerð neitaði apparatið staðfastlega að framkvæma. Hressi hótelstjórinn skipti þá um pappír og reyndi aftur. Þá slökkti kerfið á sér í hvert sinn sem PIN númerið var slegið inn. Þá bankaði hótelstjórinn hraustlega í apparatið. Þá loks spýttist út kvittunin, nema hvað það stóð ekkert á henni. Eftir nokkra rannsóknarvinnu kom í ljós að pappírsrúllan snéri öfugt í apparatinu. Hressi hótelstjórinn gaf þá frá sér nokkur hugljúf slavnesk orð, og eitt enskt; Shit! Allt hafðist þetta að lokum og íslenska liðið komst upp á herbergi fyrir klukkan þrjú. Fóru þá allir að sofa, nema liðsstjórinn sem hringdi umsvifalaust í embættismenn kortafyrirtækis síns til að kanna hve oft hann hafði greitt fyrir herbergin fjögur. Kom það ánægjulega á óvart að aðeins hafði verið tekið tvisvar af kortinu. Þegar upp var staðið veitti þetta sérstaka hótel okkur öllum nýja lífsreynslu. Enda hafði það allt til alls; faxtæki í lobbýinu, hermannabedda til að hvílast og bílaverkstæði undir herbergjunum. Allt hugsað til þess að herða landsliðið andlega fyrir átökin sem framundan voru.

Klukkan 9 morguninn eftir stóð íslenska liðið með töskur við vegarkantinn og beið þess að langferðabíll renndi í hlað. Klukkan 10 stóð íslenska liðið enn við sama vegarkant. Liðsstjórinn hóf þá að grennslast fyrir um orsakir þessarar seinkunar. Reyndist skýring mótshaldara einföld. Rússnesku bílstjórarnir tveir höfðu villst í Búdapest. Klukkan 11 voru þeir ennþá villtir. Þeir renndu loks í hlað, á fimmtán manna bíl með tengivagni fyrir ferðatöskur, um klukkan 12. Þegar rússnesku bílstjórarnir opnuðu hurðina á bílnum valt út allt byrjunarlið landsliðs Azerbaijan, og varamaðurinn líka. Liðsstjórinn lá rænulítill í öftustu sætaröð. Þeir hresstust eilítið við að fá vatnssopa og gátu þá lýst raunum sínum. Höfðu þeir setið vatnslausir í þessum fimmtán manna bakaraofni í 3 klukkustundir. Okkur þótti nokkuð vel af sér vikið að hafa keyrt frá Azerbaijan til Ungverjalands á aðeins þremur klukkustundum, en komumst fljótt að því að svo var ekki raunin. Þeir höfðu flogið frá heimaslóðum og lent á flugvellinum í Búdapest um morguninn hvar rússnesku bílstjórarnir biðu þeirra. Þeir voru sem sagt þrjár klukkustundir frá flugvellinum að hótelinu okkar, leið sem við fórum nóttina áður á sjö mínútum. Af þessu mátti ráða að bílferðin til Slóvakíu myndi ekki ganga snurðulaust fyrir sig.

Á leiðinni til Poprad lentu rússnesku bílstjórarnir upp á kant við “konuna” í google maps appinu og virtu ráð hennar ítrekað að vettugi. Fengum við því aukalega heila klukkustund um borð í heitum langferðabílnum; heila klukkustund aukalega af rússneskri dægurlagatónlist. Á einum tímapunkti er Rússarnir hófu að rífast um hvort beygja ætti til hægri eða vinstri þá mátti heyra einhvern farþegann raula stefið úr Klaufabárðunum. Þegar Poprad skiltið loks birtist og það glitti í Tatra fjöllin þá bentu Rússarnir sigri hrósandi í átt að borginni þar sem við ætluðum að tefla 9 skákir á Ólympíumóti ungmenna undir 16 ára. Þeir höfðu sigrað konuna í google maps.

Framhald væntanlegt þar sem fjallað verður um hverja umferð fyrir sig.

Kjartan Maack.

Oliver vann Jansa - Jón Trausti með fullt hús

Oliver Aron Jóhannesson (2232) vann tékkneska stórmeistarann Vlastimil Jansa (2411) í 4. umferð opna tékkneska mótsins (Czech Open) sem fram fór í gær. Oliver hefur 2½ vinning. Dagur Ragnarsson (2274) tapaði sinni skák og hefur 2 vinninga. Oliver og Dagur tefla í a-flokki.

Jón Trausti Harðarson (2078) er í banastuði í b-flokki og hefur fullt hús ásamt þremur keppendum eftir 4 umferðir. Í gær vann hann þýska FIDE-meistarann Johannes Dorst (2215).

Árangur íslensku keppendanna

 

• Heimasíða mótsins
• Chess-Results
• Beinar útsendingar (hefjast kl. 13). 

Stórsigur gegn Suður-Afríku

Íslenska liðið á Ólympíuskákmóti 16 ára og yngri sneri aftur með góðum sigri gegn suður-afrísku liði í fimmtu umferð 4-0 sem fram fór í gær. Vignir Vatnar Stefánsson, tvíburarnir, Bárður Örn og Björn Hólm Birkissynir og Hilmir Freyr Heimisson unnu sínar skákir. Sveitin hefur 4 stig eftir 5 umferðir. Frídagur er í dag.

Úrslit 5. umferðar

 

Í sjöttu umferð sem fram fer á morgun teflir Ísland við pólska sveit.

Íslenska liðið er 32. í styrkleikaröð 54 liða. Hverju liði er skylt að hafa eina stúlku liðinu sem tefla skal a.m.k. 3 skákir af 9 á mótinu. Kjartan Maack er liðsstjóri liðsins.

• Heimasíða mótsins
• Beinar útsendingar 
• Chess-Results

Tónar og tafl

Verið velkomin í tafl með ljúfum tónum á Óðinstorgi!

Flemming Viðar Valmundsson harmonikkuleikari verður á svæðinu og tekur lagið.

Gestum og gangandi býðst að spreyta sig í tafli á meðan að ljúfir harmonikkutónar flæða um torgið. Stefán Bergsson frá Skákakademíu Reykjavíkur verður á staðnum og leiðbeinir þeim sem hafa áhuga.

C is for Cookie sjá um veitingar á torginu.
Óðinstorgstilboð: Uppáhellt kaffi og pönnukaka á 500 kr!

Viðburðurinn verður milli kl. 14 og 17, miðvikudaginn 27. júlí.

Sjáumst teflandi á Óðinstorgi!

Yfir og út. Skák og mát..

Hjörvar Steinn með fullt hús eftir fjórar umferðir

Stórmeistarinn Hjörvar Steinn Grétarsson (2550) hefur fullt hús að loknum fjórum umferðum á Xtracon-mótinu (Politiken Cup). Í gær vann hann Þjóðverjann Malte Colpe (2385). Einar Hjalti Jensson (2371) hefur 3½ vinning en hann gerði jafntefli við þýska stórmeistarann Rasmus Svane (2549) í gær.  

Fimmta umferð fer fram í dag. Hjörvar teflir þá við við þýska alþjóðlega meistarann Dr. Erik Zude (2403) en Einar Hjalti teflir við ítalska stórmeistarann og Íslandsvininn Sabino Brunello (2567). 

Umferð dagsins hefst kl. 11:15. 

Sigurlaug R. Friðþjófsdóttir (1815) hefur 2 vinninga og Lárus H. Bjarnason (1516) hefur 1½ vinning. 

398 skákmenn frá 26 löndum taka þátt í mótinu. Þar af eru 27 stórmeistarar. 

• Heimasíðan mótsins
• Chess-Results
• Beinar útsendingar á Chess24 (hefjast flestar kl. 11:15).

Hjörvar Steinn sigraði á Minningarmóti Jorge Fonseca

Hjörvar Steinn Grétarsson stórmeistari sigraði á Minningarmóti Jorge Fonseca 2016, hlaut 7,5 vinning af 8 mögulegum. Í öðru sæti varð alþjóðlegi meistarinn Jón Viktor Gunnarsson með 7 vinninga og bronsið hreppti stórmeistarinn Helgi Áss Grétarsson. Skákfélagið Hrókurinn stóð fyrir mótinu og voru keppendur alls 27. 

Jorge Fonseca fæddist 1976 og lést á síðasta ári, aðeins 39 ára gamall. Hann ólst upp í Salamanca á Spáni og flutti á unglingsaldri til Madrid. Jorge menntaði sig á Spáni og Belgíu og var stærðfræðingur að mennt. Hann bjó um árabil á Íslandi og var virkur í skáklífinu hér og meðal helstu meistara í kotru. 

Minningarmótið fór fram við afar góðar aðstæður í Pakkhúsi Hróksins við Reykjavíkurhöfn. Þar er miðstöð fatasöfnunar Hróksins í þágu barna, ungmenna og heimilislausra á Grænlandi, og hefur mikið magn af vönduðum og góðum fatnaði verið sent þangað á sl. 2 árum. 

Hjörvar Steinn fékk í sigurlaun málverk eftir hinn fjölhæfa listamann Guðjón Kristinsson frá Dröngum, Jón Viktor fékk inneignarbréf hjá Flugfélagi Íslands og Helgi Grétarsson kassa af Gulli. Helstu bakhjarlar Minningarmóts Jorge Fonseca voru Ölgerðin, Flugfélag Íslands og Ísspor.

Erik Blomqvist skákmeistari Svíþjóðar

Skákþing Svíþjóðar fór fram í Uppsölum nú í júlí. Erik Blomqvist (2531) varð skákmeistari Svíþjóðar en hann hafði mikla yfirburði á mótinu. Erik hlaut 7½ vinning og varð tveimur vinnum fyrir ofan næsta mann. Fyrirfram þótt Nils Grandelius (2643) langsigurstranglegastur en hann varð að gera sér góða sætið að góðu. Alþjóðlegi meistarinn Jonathan Westerberg (2489) varð svo þriðji. 

Þessir þrír skipa sænska landsliðið á ólympíuskákmótinu í Bakú ásamt Tiger Hillarp og Axel Smith.

 

Lokastaðan

Nánari umfjöllun um mótið og meðal annars viðtal við Erik tekið af G. Sverri Þór má finna á heimasíðu sænska skáksambandsins.