Caruana skákmeistari Bandaríkjanna

Meistaramóti Bandaríkjanna í skák lauk í gær. Fabiano Caruana (2795) kom sá og sigraði á fyrsta sínu meistaramóti en Caruana hafði áður ítalskan ríkisborgararétt. Fabi hlaut 8,5 vinninga í 11 skákum og fékk faðmlag að móti loknu.

Hikaru Nakamura (2787) og Wesley So (2773) komu næstir með 7,5 vinning. Allir eru þeir á topp 10 í heiminum. Þeir tefla í hraðskákmóti með sjálfum Garry Kasparov sem fram fer á fimmtu- og föstudag. Nánar um það síðar á Skák.is.

Afar miklar sviptingar voru í kvennaflokki. Þar var Íslandsvinurinn Tatev Abrahamyan (2342), með fjólublá hárið, lengi vel efst en tap í lokaumferðinni varð til þess að Nazi Paikidze (2346) náði efsta sætinu í lokaumferðinni. 

Á myndinni skemmtilegu sem fylgir er Paikdze að uppgötva að það titillinn sé í hennar höndum vinni hún Irenu Krush sem hún gerði svo. 

Athyglivert er að skoða nöfn keppenda á mótinu og velta því fyrir sér hversu margir þeirra eru fæddir í Bandaríkjunum!!

Heimasíða mótsins

Landsmótið í skólaskák - dagskrá

Landsmótið í skólaskák fer fram í Smáraskóla Kópavogi dagana 6. – 8. maí. Smáraskóli er staðsettur rétt við félagssvæði Breiðabliks.

Teflt er í yngri flokki (1. – 7. bekkur) og eldri flokki (8. – 10. bekkur)

Tólf keppendur tefla í hvorum flokki sjö umferðir eftir svissnesku kerfi.

Dagskráin er sem hér segir:

1. Umferð föstudagur klukkan 16:00
2. Umferð föstudagur klukkan 17:00
3. Umferð föstudagur klukkan 18:00
4. Umferð föstudagur klukkan 20:00
5. Umferð laugardagur klukkan 11:00
6. Umferð laugardagur klukkan 17:00
7. Umferð sunnudagur klukkan 10:00

Fyrstu þrjár umferðirnar eru atskákir með tímamörkunum 20 05 en seinni fjórar kappskákir reiknaðar til stiga með tímamörkunum 90 30 á alla skákina. Milli þriðju og fjórðu umferðar bíður Skáksambandið keppendum upp á pizzur.

Þátttökugjald er krónur 5000 og greiðist inn á reikning 101 – 26 – 12763 kennitala: 580269-5409. Þátttökugjald skal vera greitt fyrir upphaf fyrstu umferðar. Í skýringu skal setja nafn keppanda.

Ásamt glæsilegum farandgripum til varðveislu í eitt ár fær sigurvegari hvors flokks 40.000 kr. styrk til að fara á skákmót erlendis.

Allar fyrirspurnir berist til landsmótsstjóra; [e-mail] og 863-7562.

 

Hemmamótinu - keppninni um Vals-hrókinn frestað til 4. maí

Af óviðráðanlegum ástæðum þarf að færa Hemmamótið - keppnina um Vals-hrókinn aftur til miðvikudagsins 4. maí. Að öðru leyti er fyrirkomulag mótsins óbreytt.

 

Skáknámskeið fyrir fullorðna á laugardaginn

Skákakademían í samstarfi við Laugalækjarskóla stendur fyrir skáknámskeiði fyrir skákmenn 16 ára og eldri dagana 30. apríl (laugardagur) og 8. maí (sunnudagur). Námskeiðið fer fram í Laugalækjarskóla. Fyrirlesarar verða FM Ingvar Þór Jóhannesson og FM Björn Ívar Karlsson. Ingvar Þór er landsliðseinvaldur karla fyrir Ólympíuskákmótið í Bakú 2016 og Björn Ívar landsliðseinvaldur kvenna.

Landsliðseinvaldurinn Ingvar Þór mun reyna að dýpka skilning manna á miðtaflinu. „Miðtaflið er sá hluti skákarinnar þar sem skákmenn lenda oft í vandræðum og er það yfirleitt tengt því að finna réttu plönin. Ég mun miðla til þátttakenda ýmsum hugmyndir sem koma að miðtöflum með ríka áherslu á peð, „peðabreak“ og týpísk plön eins og minnihlutaárás. Einnig mun ég fjalla um skiptamunsfórnir og mismunandi tilgang þeirra.“ – Ingvar Þór Jóhannesson

Landsliðseinvaldurinn Björn Ívar hefur hækkað mikið á stigum síðustu árin og tryggði sér fyrr á árinu sinn fyrsta áfanga að alþjóðlegum meistaratitli. Björn hefur mikið stúderað endatöfl síðustu misserin sem hann telur lykilatriði í nýlegum árangri sínum.  „Ég mun fara í hvernig á að sjá fyrir sér endataflið í byrjun og miðtafli. Þetta mun bæta skákstyrk manna þannig að þeir munu öðlast aukið sjálfstraust við borðið og vita hvenær þeir eiga að skipta upp í endatafl (sem þeir vita að er unnið) menn læra að haga peðastöðunni sinni eftir því hvaða menn eru eftir á borðinu. Ég mun einnig fara í mikilvæg atriði í helstu hróksendatöflum, lykilatriði í biskupaendatöflum og peðsendatöflum, drottning gegn hrók, mát með tveimur biskupum, mát með biskup og riddara. Þá mun ég taka fyrir dæmi úr endatöflum þekktra meistara skáksögunnar. Get sannarlega lofað því að menn bæta sig um hið minnsta 50-100 stig ef þeir læra efnið.“ – Björn Ívar Karlsson.

 

Kennt er báða dagana frá 12:00 – 16:00, með kaffihléum. Kennslan verður í formi fyrirlestra og fá þátttakendur efni fyrirlestrana að námskeiði loknu.

Liðsmenn stórefnilegrar unglingasveitasveitar Laugalækjarskóla munu einnig sitja námskeiðið.

Skráning á [e-mail]

Námskeiðsgjald: Kr. 13.900. Kaffi og með því innifalið. Greiða skal í síðasta lagi 2. maí.

Sé greitt fyrir 28. apríl kostar námskeiðið kr. 9.900.

Leggist inn á reikning Skákakademíunnar: 0101-26-083280, kt. 700608-3280.

ATH: Hámarksþátttökufjöldi miðast við átján.

 

Fjölniskrakkar upplifðu skákævintýri í Eyjum

Skákdeild Fjölnis bauð öllum áhugasömustu skákkrökkum deildarinnar að taka þátt í Sturlubúðum, skákbúðum deildarinnar sem haldnar voru í 5. sinn í samstarfi við Skákakademíu Reykjavíkur. Að þessu sinni var siglt til Vestmannaeyja og skákbúðirnar fengu frábæra aðstöðu í grunnskólanum þar sem öll kennsla fór fram og gisting í boði.

Eingöngu Fjölniskrökkum var boðið að taka þátt í Sturlubúðum að þessu sinni enda hafa æfingar Fjölnis í vetur verið fjölmennari en nokkru sinni fyrr. Það er Sturla Pétursson hjá Gúmmívinnustofunni sem styður skákdeild Fjölnis myndarlega í minningu afa síns og nafna, skákfrömuðar og leiðbeinenda í barna-og unglingastarfi á síðustu öld.

Dagskráin í Eyjum var stíf en viðburðarík. Tveggja tíma kennslustundir voru í umsjá Hannesar Hlífars, Björns Ívars og Stefáns Bergssonar. Tímarnir þeirra nýttust afar vel og áhugasamir Fjölniskrakkar áttu erfitt með að standa upp frá skákþrautum og skákþjálfun. Inn á milli voru frjálsir tímar og þá nýttu krakkarnir sér til að leika saman á velútbúinni skólalóð og rölta um bæinn. Flestir æfðu sig í sprangi ofl þjóðlegum íþróttum Eyjamanna.

Veitingastaðurinn Gott sá um að elda ofan í krakkana og þar var fæðið ekki af verri endanum. Síðari daginn hélt skákþjálfun áfram og dagskráin endaði með Eyjaskákmóti sem allir þátttakendur skákbúðanna tóku þátt í og allir verðalunaðir í lok mótsins. Sólin skein glatt í Eyjum á meðan beðið var eftir að Herjólfur legði af stað til baka. Þá brugðu þátttakendur sér í sundlaugina glæsilegu og léku sér þar í einum hóp í tvær klukkustundir. 

Helgi Árnason skipulagði skákbúðirnar að venju og var í góðu samstarfi við Arnar Sigmundsson formann TV sem lánaði skákbúðunum öll taflsettin, Sigurlás skólastjóra og Kristján húsvörð í grunnskólanum og síðast en ekki síst Geir Jón Þórisson, fyrrum löggu og íbúa í Grafarvogi sem tók á móti hópnum og flutti allan farangur gestanna til og frá borði í Herjólf. Fjórir foreldrar voru með í för og sáu til þess að ekkert kæmi upp á sem skyggt gæti á ferðagleðina. Sturlubúðir voru þátttakendum að kostnaðarlausu en skákkrakkarnir efnilegu sem flest voru á aldrinum 9 - 14 ára sýndu og sönnuðu að þetta tækifæri til æfinga og samveru áttu þau sannarlega skilið. 

Myndaalbúm (HÁ)

Carlsen efstur á Norway Chess

Sjötta umferð Norway Chess-mótsins fór fram í dag. Harikrishna (2763) vann Anish Giri (2790) og Eljanov (2765) hafði betur gegn Grandelius (2649). Öðrum skákum lauk með jafntefli og þar á meðal skák MVL (2768) og Magnúsar Carlsen (2851).

Magnús er efstur á mótinu með 4 vinninga. MVL, Topalov (2754), Harikrishna (2763) og Kramnik (2801) koma næstir með 3,5 vinninga.

Frídagur er á morgun.

 

• Heimasíða mótsins
• Beinar útsendingar

 

Sumarskákmót í Vin í dag!

Vinaskákfélagið og Hrókurinn standa fyrir Sumarskákmóti í Vin, Hverfisgötu 47, klukkan 13 í dag, mánudag. Tefldar verða sex umferðir með 7 mínútna umhugsunartíma.
 
Allir eru hjartanlega velkomnir og í leikhléi verður að vanda boðið upp á ljúffengar veitingar.
 
Skáklífið hefur blómstrað í Vin í vetur. Æfingar eru á mánudögum kl. 13 en þar er teflt alla daga og reglulega haldin stórmót. A-lið Vinaskákfélagsins sigraði með glæsibrag í 3. deild Íslandsmóts skákfélaga í vetur og B-liðið varð í þriðja sæti í 4. deild og teflir í 3. deild að ári.

Hraðkvöld hjá Hugin í kvöld

Hraðkvöld Hugins verður mánudaginn 25. apríl nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Hemmamótið - keppnin um Valshrókinn

Hemmamótið-keppnin um VALS-Hrókinn fer fram í Lollastúkunni í Valsheimilinu að Hlíðarenda miðvikudaginn 4. maí og hefst kl. 18. Tefldar verða níu umferðir eftir svissneska kerfinu og verða tímamörkin 4 2, þ.e. 4 mínútur á alla skákina að viðbættum 2 sekúndum fyrir hvern leik.

Mótið er haldið til minningar um Hemma Gunn en hann var meðal þátttakenda í Valsmótinu 2013 en lést nokkrum vikum síðar. Hermann Gunnarsson var ómetanlegur stuðningsmaður skáklistarinnar á íslandi,   og hrókur alls fagnaðar og þess vegna rakið að tefla jafnframt um VALS-Hrókinn en núverandi handhafi hans er Jón Viktor Gunnarsson. Jón Viktor vann einnig mótið árið 2014.

Hermann Gunnarsson var einn fræknasti afreksmaður Vals, markakóngur í knattspyrnu og handknattleik og klæddist margoft landsliðstreyju í báðum greinum; átti þess utan nokkra leiki í körfuknattleik með Val.  

VALS-Hrókurinn var gefinn af Jóhanni Eyjólfssyni fyrrverandi formanni Vals en gripurinn sem úr tré kom í leitirnar ekki  alls fyrir löngu en fyrst var keppt um hann fyrir meira en 60 árum og meðal sigurvegara á þeim tíma voru Gunnar Gunnarsson og Björn Theódórsson. Fjölmörg önnur verðlaun verða veitt  m.a. varningur  frá HENSON fyrirtæki formanns skákdeildar Vals, Halldórs Einarsson. Vakin er athygli því að EM treyja Tólfunnar er meðal verðlauna. Allir skákunnendur er hvattir til að taka þátt í mótinu og gamlir Valsmenn og konur eru alveg sérstaklega velkomin. Mótið er öllum opið meðan húsrúm leyfir. 

Mótið nú er haldið af Skákdeild Vals í samvinnu við Skáksamband Íslands og Skákskóla Íslands.

Mótið verður reiknað til alþjóðlegra hraðskákstiga.

Skráning fer fram á Skák.is (guli kassinn efst). Upplýsingar um þegar skráða keppendur má finna hér.

Henrik endaði í 6.-8. sæti í Kaupmannahöfn

Stórmeistarinn Henrik Danielsen (2480) endaði í 6.-8. sæti á Copenhagen Chess Challenge sem lauk í dag. Henrik hlaut 6 vinninga. Sænski stórmeistarinn Jonny Hector (2493) sigraði á mótinu en hann hlaut 7,5 vinning.

Frammistaða Henriks samsvaraði 2480 og stóð hann í stað stigalega á mótinu. Úrslit í einstökum skákum Henriks má nálgast hér.

62 skákmenn frá 10 löndum tóku þátt í mótinu. Þar af voru 7 stórmeistarar. Henrik var fjórði stigahæsti keppandinn.

• Heimasíða mótsins
• Chess-Results
• Beinar útsendingar (kl. 8 og 13:30)