Reykjavíkurskákmót í 50 ár - bók eftir Helga Ólafsson

Eins og kunnugt er hefur Skáksamband Íslands ráðist í ritun bókar um sögu Reykjavíkurskákmótsins. Helgi Ólafsson, stórmeistari og skólastjóri Skákskóla Íslands, er höfundur bókarinnar. Ljóst má vera að fáir valda því hlutverki eins vel. Helgi er hafsjór fróðleiks um mótið og var sjálfur staddur í hringiðu þess um 30 ára skeið.

Saga Reykjavíkurmótsins er jafnframt saga skáklistarinnar á Íslandi, þar sem mótið hefur myndað þungamiðju skáklífs og veitt íslenskum skákmönnum tækifæri til þess að etja kappi við erlenda skákmeistara á heimavelli og þjóðinni ánægju af því að geta fylgst með skák á heimsmælikvarða úr návígi. Reykjavíkurskákmótið er elsti viðburður sem ber í titli nafn höfuðborgarinnar og er enn starfrækt og haldið reglulega. Sagan er einnig aldarspegill, þar sem Helgi hefur ekki einatt næmt auga fyrir því sem gerist á skákborðinu heldur einnig utan þess.

Verkið verður gefið út í tveimur bindum. Hið fyrra segir sögu mótanna frá 1964 til 1990 og kemur út nú í mars fyrir Opna Reykjavíkurskákmótið í umsjón Sagna útgáfu, en Menningarfélagið Mátar sá um yfirlestur ritsins. Sú ákvörðun hefur einnig verið tekin að fresta útgáfu tímaritsins Skákar en leggja þess í stað áherslu á Sögu Reykjavíkurskákmótsins í 50 ár. Seinna bindið kemur út að ári.

Það er von Skáksambands Íslands að bókin hljóti góðar viðtökur. Hægt er að skrá sig fyrir eintaki hér eða á Skák.is (guli kassinn efst) og nálgast sjóðheitt eintak á Reykjavíkurskákmótinu eða fá sent í pósti. Hvort bindi mun kosta 4.900 kr. 

Áskrifendur Tímaritsins Skákar verða sjálfkrafa skráðir fyrir eintaki og fá greiðsluseðil í netbanka en geta afpantað með töluvpósti í netfangið [e-mail] ef þeir óska ekki eftir bókinni.

Skemmtikvöld TR - Gagginn fer fram á föstudagskvöld

Gagginn 2015 fer fram næstkomandi föstudagskvöld (27. feb) á sjötta skemmtikvöldi Taflfélags Reykjavíkur í vetur.  Mótið hefst 20.00 Gagginn er sveitakeppni fyrrverandi nemenda í grunnskólum landsins.  Fjórir skákmenn eru í hverju liði og þurfa liðsmenn hvers skóla að hafa stundað þar nám á einhverjum tímapunkti allavegana einn vetur og helst að hafa náð prófum á sæmilega vinundandi hátt. Gömul bekkjarmynd eða prófskírteini sem sannar skólasókn æskileg, en þó ekki nauðsyn.

 

Fyrirkomulagið verður eftirfarandi.

1. Liðakeppni, fjórir keppendur í hverri sveit og skal þeim styrkleikaraðað.  (Skákstig, ekki árangur á samræmdu prófunum).  Heimilt er að hafa 2 varamenn í hverju liði.
2. Fjöldi umferða og fyrirkomulag fer eftir fjölda sveita.  Stefnt er að því að hafa sirkað 12 umferðir.
3. Tímamörk eru alþjóðlegu hraðskáktímamörkin  3 mín + 2 sek á leik
4. Nái menn ekki í sveit, þá er heimilt að hafa einn lánsmann í liðinu en sá verður að hafa lokið grunnskólaprófi en má ekki hafa meira en ca. 2100 elo stig.  Lið sem notar lánsmann getur unnið til verðlauna en ekki heiðursnafnbótina Gagginn 2015
5. Það lið sem sigrar Gaggann 2015 fær eitt sæti í úrslitum um Skemmtikvöldakónginn 2015.  Það er í höndum viðkomandi liðs að velja keppenda í þá rimmu.  Geti liðsmenn ekki komið sér saman um hverjum hlotnist sá heiður verður árangur á samræmdu prófunum látinn gilda.
6. Gerð verða hlé á taflmennskunni til Billjardbarsferða eftir þörfum og óskum skákmanna.
7. Verðlaun:  1. Verðlaun – 8000 kr. úttekt á Billanum  2. Verðlaun – 5000 kr. úttekt á Billanum 3. Verðlaun.  – 2000 kr. úttekt á Billanum.
8. Sérverðlaun upp á 5000 kr. úttekt á Billanum verða veitt því liði sem mætir í flottasta liðsbúningnum.
9. Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins líkt og í grunnskólum.
10. 2000 kr. þátttökugjald á sveit.
11. Sigursveitin hlítur nafnbótina Gagginn 2015

Skráning fer fram á staðnum og menn beðnir um að mæta tímanlega.

Friðrik Ólafsson, stórmeistari 80 ára - Afmælisfagnaður í Fischersetri, sunnudaginn 1.mars kl 15:00 n.k.

Friðrik Ólafsson varð fyrstur Íslendinga til að hljóta útnefningu sem stórmeistari í skák og sá skákmaður íslenskur sem einna lengst hefur náð á alþjóðavettvangi.  Hann var um árabil talinn einn af tíu bestu skákmönnum heims.  Friðrik afrekaði það m.a. að leggja Bobby Fischer í tvígang.  Friðrik varð að loknum farsælum skákferli forseti alþjóðaskáksambandsins FIDE og síðar skrifstofustjóri Alþingis.

Fischersetur býður til afmælisveislu þar sem Friðrik mun halda fyrirlestur um skákferil sinn með sérstakri áherslu á þemað: „Að fórna skiptamun í skák.“

Að loknum fyrirlestri Friðriks verður afhjúpað olíumálverk af heimsmeistaranum Bobby Fischer sem Sigurður Kr. Árnason hefur nýverið lokið við að mála.  Verkið er gjöf höfundar og þeirra Guðmundar G. Þórarinssonar og Einars. S. Einarssonar til Fischerseturs.  Málverkið afhent að viðstöddum listamanninum.  Þess má geta að listamaðurinn málaði frægt verk af Fischer og Spassky sem uppi hangir í safninu.

Sigurður Árnason við verk sitt.

Afmælisfagnaðurinn er öllum opinn, kaffiveitingar í boði og létt hraðskákmót að lokinni dagskrá.

Undanrásir fyrir Reykjavík Barna Blitz 2015

Undankeppni fyrir Reykjavík Barna Blitz verður miðvikudaginn 25. febrúar kl. 17.15 í Víkingsheimilinu. 

Mótið er opið skákmönnum fæddum 2002 og síðar.

Tefldar verða sex umferðir með sjö mínútna umhugsunartíma. Tveir efstu komast í úrslitin sem verða tefld verða samhliða Reykjarvíkurskákmótinu í Hörpu, sem fram fer 10-18 mars.

Til mikils er að vinna því einungis átta keppendur fá þátttökurétt á sjáfri úrslitakeppninni, þar af eru tveir frá móti Víkingaklúbbsins. Hin félögin í Reykjavík sem halda undanrásir eru Skákdeild Fjölnis, Taflfélagið Huginn og Taflfélag Reykjavíkur.

Skráning á mótið sendist á netfangið vikingaklubburinn(hjá)gmail.com fyrir þriðjudaginn 24. febrúar á miðnætti.

EKKI VERÐUR HÆGT AÐ SKRÁ SIG Á STAÐNUM.

Úrslit á mótinu 2011 hér:
Úrslit á mótinu 2012 hér:
Úrslit á mótinu 2013 hér:
Úrslit á mótinu 2014 hér:

 

Skákhátíð fyrir grunnskólanemendur í Rimaskóla næsta laugardag 28. febrúar

Rótarýklúbbur Grafravogs í samstarfi við Skákdeild Fjölnis efnir til mikillar skákhátíðar fyrir alla grunnskólanemendur í Rimaskóla næsta laugardag, 28. febrúar frá kl. 13:00 – 15:15. Auk skákmóts sem hefst kl. 13:00 verður boðið upp á pítsur og allir þátttakendur á skákmótinu fá ókeypis bíómiða. Verðmæti verðlauna eru 50.000 kr og eru það gjafabréf í Kringlunni. Tefldar verða sex umferðir með 7 mínútna umhugsunartíma.

Skráning á mótsstað og eru þátttakendur beðnir um að mæta tímanlega til þess. Stórrmeistarinn Jón L. Árnason leikur fyrsta leikinn og skákstjórar eru þeir Helgi Árnason formaður skákdeildar Fjölnis og Páll Sigurðsson formaður Taflfélags Garðabæjar. Skákhátíðin fer fram á Rótarýdaginn 28. febrúar og vill klúbburinn á þeim degi vekja áhuga á heimahverfi sínu og öflugu skákstarfi í hverfinu.

Sjá nánar í meðfylgjandi PDF-viðhengi.

 

Skrár tengdar þessari bloggfærslu:

• 2015_rotary_skakmot_a4_1.pdf

Íslenska landsliðið í bréfskák efst í úrslitakeppni Evrópumóts landsliða!

Nú þegar úrslitakeppni Evrópumóts landsliða í bréfskák er komin vel af stað er íslenska landsliðið í efsta sæti, en 13 þjóðir taka þátt í mótinu.

Stigahæta þjóðin er Þýskaland með 2588 meðalstig. Ísland er í 11. sæti með meðalstigin 2448. Mótið hófst í júní 2014.

Það er hörð keppni um efsta sætið eins og sjá má hér:

1. Ísland 18 vinningar
2. Rússland 17,5
3. Austurríki 17
4. Litháen 17

Mótið er firnasterkt og þar má finna lið frá Þýskalandi, Rússlandi, Hollandi og Úkraínu svo einhver séu nefnd, sjá nánar undir slóðinni: https://www.iccf.com/event?id=44123

Íslenska liðið skipa eftirtaldir skákmenn:

1. Daði Örn Jónsson 2531
2. Árni Halldórsson 2482
3. Jón A. Pálsson 2459
4. Árni H. Kristjánsson 2451
5. Þorsteinn Þorsteinsson 2438
6. Eggert Ísólfsson 2416
7. Áskell Ö. Kárason 2410
8. Jónas Jónasson 2401

Hraðkvöld hjá Hugin í kvöld - bandarískur gestur meðal keppenda

Hraðkvöld Hugins verður mánudaginn 23. febrúar nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudaga í hverjum mánuði að því undanskildu þegar mánudag ber upp á stórhátíð.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Meðal keppenda á Hraðkvöldi Hugins í kvöld verður 14 ára bandarískur unglingur, John Ludwig (2205) að nafni, en sá gerði sér lítið fyrir og sigraði á Barna- og unglingameistaramóti Reykjavíkur í gær.

 

Frábær árangur Björns í Bunratty - áfangi, mótasigur, þátttökuréttur á EM og 300.000 kr. greiðsla frá SÍ!

Alþjóðlegi meistarinn Björn Þorfinnsson (2373) náði einum besta árangri íslensks skákmanna um nokkurt árabil þegar hann öruggan sigur á Bunratty-mótinu sem lauk á Írlandi í dag.

Björn hlaut 7 vinninga í 9 skákum. Til að ná stórmeistaraáfanga þurfti 6,5 vinning svo Björn fékk hálfum vinningi meira en hann þurfti! 

Það gerir sigur Björns á mótinu enn merkilegri að hann var stigalægstur keppenda og var annar af tveimur keppendum undir 2400 skákstigum.

Árangur Björns samsvaraði 2677 skákstigum og hækkar hann um heil 35 stig fyrir frammistöðuna. Samkvæmt stigum fyrir mót hefði búast mátt við að hann fengi 3,5 vinning en ekki sjö vinninga!

Það er athyglisvert að Björn gerði fjögur stutt jafntefli. Allar skákirnar sem tefldar voru í botn vann hann!

Skáksamband Íslands verðlaunar þá skákmenn sem ná afburðarárangri sem skilgreindur er uppá 2670 skákstig eða hærri. Viðkomandi er sendur á vegum sambandsins á EM einstaklinga. Þar sem EM einstaklinga hefst aðeins eftir tvo daga í Jerúsalem verður Björn að bíða eftir því tækifæri í heilt ár. Björn fær einnig 300.000 kr. greiðslu frá SÍ sem verðlaunar skákmenn sem ná stórmeistaraáföngum.

Þetta er annar stórmeistaraáfangi Björns. Þeim fyrri náði hann á Íslandsmótinu í skák árið 2013 þegar hann jafn Hannesi Hlífari í mark en tapaði úrslitaeinvígi.

Bragi bróðir Björns, sem einnig var meðal keppenda var ekki alveg í sama stuðinu. Hann hlaut 4 vinninga og endaði í 6.-9. sæti. Bragi byrjaði illa en stóð sig vel í seinni helmingi mótsins og var nálægt því að vera á pari stigalega - tapaði þremur stigum. 

• Heimasíða mótsins
• Úrslitaþjónusta
• Beinar útsendingar (10 og 16)
• ChessBomb (tölvuskýringar) 

Félagaskiptagluggi fyrir Íslandsmót skákfélaga lokar á föstudag

Síðari hluti Íslandsmóts skákfélaga fer fram 19.-21. mars nk. í Rimskóla. Aðeins er teflt í fyrstu deild þann nítjánda (fimmtudag) en teflt í öllum deildum 20. og 21. mars (föstudag og laugardag).

Félagaskiptagluggi fyrir þá sem ekki tefldu í fyrri glugganum er opinn fram á föstudaginn 27. febrúar. Þá lokar hann á miðnætti.  

Rétt er að ítreka að aðeins þeir sem ekki tefldu í fyrri hlutanum geta skipt um eða gengið í nýtt félag í þessum glugga. Rétt er einnig að fram að þessi gluggi nær aðeins til Íslendinga eða erlendra skákmanna sem búsettir eru hérlendis.

 

 

Áskell Örn skákmeistari Akureyrar

Í dag lauk sjöundu og síðustu umferð Norðurorkumótsins, Skákþingi Akureyrar 2015. Fyrir lokaumferðina var Jón Kristinn Þorgeirsson efstur, hálfum vinningi á undan formanninum, Áskeli Erni og einum vinningi á undan Ólafi Kristjánssyni. Aðrir áttu ekki möguleika á sigri í mótinu.

Svo fór að Áskell Örn sigraði Ólaf en Jón Kristinn tapaði sinni fyrstu og einu skák á mótinu gegn Smára Ólafssyni. Þar með komst Áskell hálfum vinningi upp fyrir ungstirnið Jón Kristinn. Smári og Símon Þórhallsson deildu þriðja sætinu.

Lokastöðuna í mótinu má sjá á Chess-Results.

Nánar verður fjallað um mótið síðar. Úrslit lokaumferðirnar má finna hér.

• Heimasíða SA
• Chess-Results