Norðurlandameistarinn og fararstjórinn efstir á hraðkvöldi Hugins

Dagur Ragnarsson og Gunnar Björnsson létu ekki deigan síga eftir Norðurlandamótið í skólaskák og skelltu sér á hraðkvöld Hugins sl. mánudagskvöld og luku því báðir með 6,5v í sjö skákum. Þeir voru einnig jafnir að stigum og gerðu jafntefli í innbyrðis viðureigninni svo ekki var skilið á milli þeirra. Þeir fara kannski bara saman út að borða pizzuna frá Dominos. Í þriðji varð svo hinn fararstjórinn á Norðurlandamótinu Stefán Bergsson með 5v. Þótt Gunnar og Dagur drægju saman út í happdrættinu tókst þeim ekki að velja Stefán heldur Felix Steinþórsson sem einnig fær pizzu frá Dominos.  Næsta mánudag 2. mars verður svo atkvöld. Auk hefðbundinna verðlauna gefur efsta sætið á atkvöldinu þátttökuréttt í fjöltefli Mamadyarovs sem fram fer í Gamma fimmtudaginn 12. mars um morguninn.

Lokastaðan á hraðkvöldinu:

1. Dagur Ragnarsson, 6,5v/7
2. Gunnar Björnsson, 6,5v
3. Stefán Bergsson, 5v
4. Óskar Víkingur Davíðsson, 4v
5. Örn Leó Jóhannsson, 4v
6. Felix Steinþórsson, 4v
7. Hjálmar Sigurvaldason, 4v
8. Dawid Kolka, 3,5v
9. Eiríkur K. Björnsson, 3,5v
10. Kristófer Ómarsson, 3v
11. Vigfús Ó. Vigfússon, 3v
12. Heimir Páll Ragnarsson, 3v
13. Hörður Jónasson, 2v
14. Sigurður Freyr Jónatansson, 2v
15. Sindri Snær Kristófersson, 2v
16. Björgvin Kristbergsson, 0v

EM: Hannes með jafntefli í annarri umferð

Hannes Hlífar Stefánsson (2573) gerði jafntefli í gær við úkraínska stórmeistarann Alexander Moiseenko (2695) en Guðmundur Kjartansson (2484) tapaði fyrir tyrkneska stórmeistaranum Dragan Solak (2607). Þriðja umferð hefst nú kl. 13 í dag.

Þá teflir Hannes við armenska stórmeistarann Hrant Melkumyan (26739 sem verður meðal keppenda á Reykjavíkurskákmótinu og Guðmundur teflir við Ísraelsmanninn Michael Hasidovsky (2173).

Það er hægt að fylgjast með þeim félögum í beinni útsendingu.

Alls taka 250 skákmenn frá 33 löndum þátt í mótinu. Þar af eru 113 stórmeistarar. Hannes er nr. 84 í stigaröð keppenda en Guðmundur er nr. 116.

• Heimasíða mótsins
• Beinar útsendingar (hefjast kl. 13)
• Chess-Results

Gagginn - Skemmtikvöld TR fer fram á morgun

Gagginn 2015 fer fram næstkomandi föstudagskvöld (27. feb) á sjötta skemmtikvöldi Taflfélags Reykjavíkur í vetur.  Mótið hefst 20.00 Gagginn er sveitakeppni fyrrverandi nemenda í grunnskólum landsins.  Fjórir skákmenn eru í hverju liði og þurfa liðsmenn hvers skóla að hafa stundað þar nám á einhverjum tímapunkti allavegana einn vetur og helst að hafa náð prófum á sæmilega vinundandi hátt. Gömul bekkjarmynd eða prófskírteini sem sannar skólasókn æskileg, en þó ekki nauðsyn.

 

Fyrirkomulagið verður eftirfarandi.

1. Liðakeppni, fjórir keppendur í hverri sveit og skal þeim styrkleikaraðað.  (Skákstig, ekki árangur á samræmdu prófunum).  Heimilt er að hafa 2 varamenn í hverju liði.
2. Fjöldi umferða og fyrirkomulag fer eftir fjölda sveita.  Stefnt er að því að hafa sirkað 12 umferðir.
3. Tímamörk eru alþjóðlegu hraðskáktímamörkin  3 mín + 2 sek á leik
4. Nái menn ekki í sveit, þá er heimilt að hafa einn lánsmann í liðinu en sá verður að hafa lokið grunnskólaprófi en má ekki hafa meira en ca. 2100 elo stig.  Lið sem notar lánsmann getur unnið til verðlauna en ekki heiðursnafnbótina Gagginn 2015
5. Það lið sem sigrar Gaggann 2015 fær eitt sæti í úrslitum um Skemmtikvöldakónginn 2015.  Það er í höndum viðkomandi liðs að velja keppenda í þá rimmu.  Geti liðsmenn ekki komið sér saman um hverjum hlotnist sá heiður verður árangur á samræmdu prófunum látinn gilda.
6. Gerð verða hlé á taflmennskunni til Billjardbarsferða eftir þörfum og óskum skákmanna.
7. Verðlaun:  1. Verðlaun – 8000 kr. úttekt á Billanum  2. Verðlaun – 5000 kr. úttekt á Billanum 3. Verðlaun.  – 2000 kr. úttekt á Billanum.
8. Sérverðlaun upp á 5000 kr. úttekt á Billanum verða veitt því liði sem mætir í flottasta liðsbúningnum.
9. Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins líkt og í grunnskólum.
10. 2000 kr. þátttökugjald á sveit.
11. Sigursveitin hlítur nafnbótina Gagginn 2015

Skráning fer fram á staðnum og menn beðnir um að mæta tímanlega.

Vignir Vatnar og Svava Unglingameistarar Reykjavíkur!

Barna-og unglingameistaramót Reykjavíkur sem og Stúlknameistaramót Reykjavíkur fór fram í skákhöll Taflfélags Reykjavíkur sunnudaginn 22. febrúar. Mótið var opið fyrir börn á grunnskólaaldri.

Þrenn verðlaun voru veitt fyrir þrjú efstu sætin í mótinu, þrenn verðlaun fyrir efstu stúlkur og svo aldursflokkaverðlaun í hvorum flokki fyrir sig (fædd 1999-2001, 2002-2003, 2004-2005 og 2006 og síðar). Þau sem eru búsett í Reykjavík eða eru félagar í reykvískum taflfélögum tefldu um titilinn Unglingameistari Reykjavíkur 2015 og Stúlknameistari Reykjavíkur 2015. Tefldar voru 7 umferðir með 15 mín. umhugsunartíma á skák í opna flokknum og í stúlknaflokki tefldu þær allar við alla 6 umferðir. 

Þátttakendur voru 43 og var mótið vel skipað. Mörg af efnilegustu börnum og unglingum landsins voru með á mótinu.  Skemmtilegur gestur bættist við á mótinu en það var John G Ludwig frá Bandaríkjunum, sem er með 2205 Elo stig!  Hann tók snemma forystuna í opna flokknum, tefldi á 1. borði allt mótið og vann allar sjö skákirnar og þar með mótið! 

Baráttan um unglingameistaratitilinn var gríðarlega jöfn og skemmtileg. Fyrir lokaumferðina var John G Ludwig efstur með fullt hús, en næstir honum komu Vignir Vatnar og Bárður Örn með 5 vinninga.  Vignir mætti Birni Hólm í seinustu umferð, meðan Bárður Örn fékk það erfiða verkefni að reyna að marka á Bandaríska meistarann.  Björn Hólm gerði sér lítið fyrir og vann Vigni og náði honum þar með að vinningum.  Allt var því undir í viðureign Bárðar og John G.  Ludwig.  Skákin var í járnum nær allan tímann og lentu báðir keppendur í ævintýranlegu tímahraki í lokin. Taflmenn flugu í allar áttir þegar báðir keppendur áttu einungis örfáar sekúndur eftir á klukkunni.  Svo fór að lokum að Bárður féll á tíma þegar John átti eftir eina sekúndu eftir!  Bárður var því einungis einni sekúndu frá því að vinna titilinn. 

Hinn viðkunnalegi John G Ludwig sigraði því á mótinu með fullu húsi en sex keppendur komu honum næstir með fimm vinninga,  þeir Vignir Vatnar Stefánsson, Bárður Örn Birkisson, Björn Hólm Birkisson, Óskar Víkingur Davíðsson, Dawid Kolka og Mykhaylo Kravchuk. Stig réðu úrslitum og varð Vignir Vatnar í 2. sæti og Bárður Örn Birkisson í 3. sæti. Það varð því Vignir Vatnar Stefánsson sem varð Unglingameistari Reykjavíkur 2015, en hann hefur nú unnið titilinn þrjú ár í röð!  Það hefur ekki gerst síðan stórmeistarinn Helgi Áss Grétarsson sigraði 1990-1992.  Vignir Vatnar á enn eftir nokkur ár í þessum flokki og verður spennandi að sjá hvort honum tekst að bæta metið.  Það er þó ljóst að margir efnilegir skákmenn munu gera harða atlögu að titlinum á næstu árum líkt og raunin var í ár. 

Í Stúlknameistaramótinu tóku 7 stelpur þátt og tefldu þær allar við alla. Tvær stúlkur komu hnífjafnar í mark, þær Ylfa Ýr Welding og Svava Þorsteinsdóttir. Spennan leyndi sér ekki er þær hófu að tefla tvær einvígisskákir um titillinn. Svava vann fyrri skákina og Ylfa Ýr lagði allt unir í seinni skákinni.  Eftir mikla baráttu vann þó Svava einnig seinni skákina. Hún sigraði því mótið og varð Stúlknameistari Reykjavíkur 2015. Í 3. sæti varð Vigdís Lilja Kristjánsdóttir. Stelpurnar sem tóku þátt eiga framtíðina fyrir sér, enda þær yngstu einungis 7 ára gamlar! 

Báðir titilarnir, Unglingameistari Reykjavíkur 2015 og Stúlknameistari Reykjavíkur 2015 fóru eins og í fyrra til Taflfélags Reykjavíkur. 

Flestir keppendur mótsins komu frá Taflfélagi Reykjavíkur eða 22. Keppendur frá Hugin voru 8, 2 frá Skákdeild Breiðabliks, 1 frá Víkingaklúbbnum, 1 frá Fjölni og 9 keppendur voru utan félaga.

Heildarúrslit er að finna hér

Veitt voru aldursflokkaverðlaun bæði í opnum flokki og stúlknaflokki.

Aldursflokkaverðlaun opinn flokkur:

 Fæddir 1999-2001: Bárður Örn Birkisson

Fæddir 2002-2003: Vignir Vatnar Stefánsson

Fæddir 2004-2005: Óskar Víkingur Davíðsson

Fæddir 2006 og síðar: Adam Salama, Stefán Orri Davíðsson

Aldursflokkaverðlaun stúlknaflokkur:

 Fæddar 1999-2001: Svava Þorsteinsdóttir

Fæddar 2002-2003: engin stúlka í þessum aldurshópi tók þátt

Fæddar 2004-2005: Ylfa Ýr Welding

Fæddar 2006 og síðar: Elsa Kristín Arnaldardóttir. 

Mótshaldari var Taflfélag Reykjavíkur. Skákstjórar voru Björn Jónsson og Sigurlaug Regína Friðþjófsdóttir. Birna Halldórsdóttir sá um veitingar á meðan mótinu stóð.

Taflfélag Reykjavíkur þakkar öllum keppendum fyrir þátttökuna og óskar þeim Vigni Vatnar og Svövu til hamingju með titlana!

Skákir Skákþings Reykjavíkur

Skákir Skákþings Reykjavíkur eru nú aðgengilegar en það var Gauti Páll Jónsson sem sá um innsláttinn.  Skákþinginu lauk sem kunnugt er með sigri alþjóðlega meistarans Jóns Viktors Gunnarssonar.

• Skákirnar
• Uppgjör Skákþingsins

Æsir í Ásgarði: Björgvin efstur - Bragi næstur

Góður hópur skákhyggjumanna var saman komin í Stangarhyl í gær til að beita gerhygli sinni og sköpunargáfu á 64 hvítum reitum og svörtum. Í þeirra hópi nokkrir gamalkunnir landsliðsflokksmenn auk allmargra sókndjarfra ástríðu- og kaffihúsaskákmanna, haldnir skákáráttustreituröskun og alvanir rústabjörgun er því er að skipta. Enda var taflmennskan óvenju lífleg og ekki að sjá að sköpunargleði hinna öldnu seggja sé á neinu undanhaldi nema síður sé. Engrar skákkvíðahugröskunar varð vart og því síður valkvíða enda þótt fjöldi valkvæðra misgóðra leikaraða væri í boði. Ekki verra að hafa smáfélagskap milli skáka - einkum þegar illa gengur.  

Björgvin OG Bragi urðu jafnir að vinningum að þessu sinni. Sá fyrrnefndi fór taplaus í gegn um mótið sem hann vann á stigum. Hinn aldni meistari Páll G.

Jónsson (<82) gerði sér lítið fyrir og lagði Braga Halldórsson af velli í snaggaralegri skák en sá gamli er með þennan eftirsótta X-faktor, sem oft ríður baggamuninn jafnt á skákborðinu sem annars staðar.  

Vinningsskákir dagsins voru tileinkaðar hinum síunga og ötula forystumanni klúbbsins, Finni Kr. Finnssyni, sem tók sér frí frá skákstjórastörfum til að fagna 80 ára afmæli sínum í faðmi fjölskyldunnar. Heill honum áttræðum og enn eldri. 

Nánari úrslit má sjá á hinni myndskreyttu mótatöflu hér að neðan ef hún prentast sæmilega. /E

Nýtt fréttabréf SÍ

Nýtt Fréttabréf SÍ kom út í fyrradag. Meðal efnis er:

• Dagur Ragnarsson Norðurlandameistari í skólaskák - tvenn silfurverðlaun
• Björn Þorfinnsson með stórmeistaraáfanga
• Reykjavíkurskákmót í 50 ár - bók eftir Helga Ólafsson
• Styttist í Reykjavíkurskákmót - Afmælismót Friðriks Ólafssonar
• EM einstaklinga 
• Actavis skákmeistari vinnustaða
• Rimaskóli Reykjavíkurmeistari grunnskólasveita
• Jóhann Arnar sigraði sigurvegari þriðju Bikarsyrpu TR
• Reykjavíkurskákmótið 2015 - Nýjustu skráningar
• Mót á döfinni

Fréttabréfið má nálgast hér.

Hægt er að skrá sig fyrir Fréttabréfinu sem kemur að jafnaði út tvisvar á mánuði yfir vetrarmánuðina ofarlega á vinstri hluta Skák.is.

Eldri fréttabréf má nálgast hér.

Skákdeild Fjölnis stendur fyrir Sturlubúðum 7.-8. mars í Vatnaskógi

Áhugasömum skákkrökkum á grunnskólaaldri sem æfa skák reglulega er boðið að taka þátt í skákbúðum í Vatnaskógi helgina 7.–8. mars nk.

Það er skákdeild Fjölnis í samstarfi við Skákakademíu Reykjavíkur og Skákskóla Íslands sem stendur fyrir skákbúðunum í fjórða sinn. Fyrri þrjú  námskeiðin heppnuðust mjög vel bæði hvað varðar árangur og ánægju. Kennarar verða þau Helgi Ólafsson, Lenka Ptacnikova, Stefán Bergsson og Björn Ívar Karlsson. Í Vatnaskógi er frábær aðstaða fyrir starfsemi skákbúðanna, vistlegur svefnskáli sem rúmar alla undir einu þaki, íþróttahús, tómstundaaðstaða og góður matur í matar-og kaffihléum. Aðeins er reiknað með 40 þátttakendum og því rétt að áhugasamir skákkrakkar skrái sig sem fyrst á skrifstofu Skáksambands Íslands s. 568 9141 eða í tölvupósti á netfangið skaksamband@skáksamband.is. til að missa ekki af þessum einstæða viðburði. Helgi Árnason formaður skákdeildar Fjölnis og fararstjóri svarar upplýsingum í síma 664 8320.

Verð á hvern þátttakanda er 7500 kr fyrir þessa tvo daga. Innifalið í gjaldinu er allur matur, kennsla, skálaleiga, þátttaka í Góu páskaeggjaskákmótinu og viðurkenningar. Rútuferð fram og til baka kostar 2500 kr til viðbótar. Kostnaður því alls 10.000 kr. Í síðustu skákbúðum sem haldnar voru að Úlfljótsvatni í febrúar 2014 greiddu nokkur skákfélög hluta gjaldsins fyrir sína félaga.

Sturlubúðir eru kenndar við Sturlu Pétursson skákfrömuð sem þjálfaði unga og efnilega skákkrakka um og eftir miðja síðustu öld og er alnafni hans styrktaraðili Fjölnis við framkvæmd skákbúðanna. Lagt er af stað frá BSÍ / N1 kl. 10 á laugardagsmorgni og komið til baka kl. 15:45 á sunnudegi.

 

Hannes og Guðmundur unnu í fyrstu umferð á EM einstaklinga

EM einstaklinga hófst í gær í Jerúsalem í Ísrael. Hannes Hlífar Stefánsson (2573) og Guðmundur Kjartansson (2484) unnu báðir fremur stigalága heimamenn (1721-1962). Róðurinn verður mun erfiðaðri í dag en þá teflir Hannes við úkraínska stórmeistarann Alexander Moiseenko (2695) en Guðmundur við tyrkneska stórmeistarann Dragan Solak (2607).

Umferðin hefst kl. 13 og verður hægt að fylgjast með þeim félögum í beinni útsendingu.

Alls taka 250 skákmenn frá 33 löndum þátt í mótinu. Þar af eru 113 (!!) stórmeistarar. Hannes er nr. 84 í stigaröð keppenda en Guðmundur er nr. 116.

• Heimasíða mótsins
• Beinar útsendingar (hefjast kl. 13)
• Chess-Results

Skákhátíðin í Rimaskóla næsta laugardag er fyrir alla grunnskólanemendur

Skákhátíðin í Rimaskóla n.k. laugardag er ætluð öllum grunnskólanemendum landsins en ekki bara nemendum í Rimaskóla eins og hægt var að lesa úr frétt um hátíðina á skak.is í gær. Rótarýklúbbur Grafravogs í samstarfi við Skákdeild Fjölnis efnir til þessarar skákhátíðar í Rimaskóla næsta laugardag, 28. febrúar frá kl. 13:00 – 15:15. Hátíðin hefst með skákmóti þar sem verðmæti vinninga er 50.000 kr, allt gjafabréf í Kringlunni  Tefldar verða sex umferðir með 7 mínútna umhugsunartíma. Í lok mótsins verður boðið upp á pítsur og safa og allir þátttakendur sem ljúka skákmótinu fá ókeypis bíómiða

Skráning er á mótsstað og þátttakendur beðnir um að mæta tímanlega til skráningar. Stórrmeistarinn Jón L. Árnason leikur fyrsta leikinn og skákstjórar verða þeir Helgi Árnason formaður skákdeildar Fjölnis og Páll Sigurðsson formaður Taflfélags Garðabæjar.