Hjörvar Steinn Grétarsson og Nigel Short mætast í MótX-einvíginu í Kópavogi

MótX gefur grunnskólum Kópavogs 100 taflsett.

Hjörvar Steinn Grétarsson, yngsti stórmeistari Íslands, og Nigel Short, sem teflt hefur um heimsmeistaratitilinn, mun mætast í MótX-einvíginu í Kópavogi í maí 2016. Skákfélagið Hrókurinn skipuleggur viðburðinn og af þessu tilefni færði MótX grunnskólum Kópavogs 100 taflsett að gjöf við athöfn í Salaskóla á þriðjudag. Ármann Kr. Ólafsson bæjarstjóri veitti taflsettunum viðtöku og síðan tefldi Hjörvar Steinn fjöltefli við nemendur Salaskóla.

 

Hafsteinn Karlsson skólastjóri bauð gesti og nemendur velkomna við athöfnina í Salaskóla, en þar hefur skáklífið vaxið og dafnað frá stofnun skólans árið 2003. Hrafn Jökulsson forseti Hróksins flutti ávarp  og sagði að skáklífið í Kópavogi væri nú í miklum blóma. Á þriðja hundrað börn tóku á dögunum þátt í sveitakeppni grunnskólanna í Kópavogi og skákdeild Breiðabliks starfar af miklum þrótti. Hann sagði mikið fagnaðarefni að MótX skyldi veita Hjörvari Steini tækifæri til að tefla við goðsögnina Nigel Short, en þeir Hjörvar munu tefla sex atskákir og verður samhliða efnt til mikillar skákhátíðar í skólum Kópavogs.

 

Fulltrúar MótX hf. við athöfnina voru þeir Vignir Steinþór Halldórsson stjórnarformaður, Svanur Karl Grétarsson framkvæmdastjóri og Viggó Einar Hilmarsson fjármálastjóri. Ármann bæjarstjóri þakkaði MótX fyrir rausnarlega gjöf til skólanna, og sagði mikið fagnaðarefni að einvígi Hjörvars og Shorts færi fram í Kópavogi, enda mikil skákvakning meðal ungu kynslóðarinnar í bænum.

 

Nigel Short (f. 1965) varð stórmeistari 19 ára að aldri og hefur náð þriðja sæti á stigalista skákmanna í heiminum. Árið 1993 varð hann fyrsti Englendingurinn til að tefla um heimsmeistaratitilinn. Hann beið lægri hlut fyrir Gary Kasparov í einvígi, en hefur allar götur síðan verið meðal þeirra bestu. Hann nýtur mikillar virðingar í skákheiminum og er mjög vinsæll greinahöfundur, enda hefur hann heimsótt 108 lönd og er hvarvetna mikill aufúsugestur.
 
Hjörvar Steinn Grétarsson fæddist árið sem Short tefldi um heimsmeistaratitilinn -- 1993 -- og vakti kornungur athygli fyrir mikla hæfileika. Hann varð stórmeistari 2013 og á nýafstöðnu Evrópumóti landsliða í Laugardalshöll náði hann bestum árangri íslensku landsliðsmannanna. Hjörvar tapaði ekki skák á mótinu og árangur hans jafngilti 2670 skákstigum.

 

Í tengslum við MótX-einvígi Hjörvars Steins og Nigel Shorts verður efnt til ýmissa viðburða á vormánuðum, svo Kópavogur mun iða af skáklífi.

Jólapakkamót Hugins fer fram á laugardaginn

Jólapakkaskákmót Hugins verður haldið laugardaginn 19. desember nk. í Ráðhúsi Reykjavíkur. Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 18. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.

Keppt verður í allt að 6 flokkum:

• Flokki fæddra 2000-2002
• Flokki fæddra 2003-2004
• Flokki fæddra 2005-2006
• Flokki fæddra 2007-2008
• Flokki fæddra 2009 síðar
• Peðaskák fyrir þau yngstu

Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.

Í verðlaun verða meðal annars bækur, mynddiskar, pússluspil, skáknámskeið, töfl og fleira. Í lokinn verður happdrætti þar sem m.a. verður dreginn út Bluetooth hátalari frá Heimilistækjum. Allir þátttakendur fá svo við brottför góðgæti frá Góu og Andrésblað.

Skráning á mótið fer fram á Skák.is (kassinn efst) og á Skákhuganum.

Risaskákmót í Breiðabliksstúkunni.

Sveitakeppni Kópavogs í skák milli grunnskólanna í Kópavogi er nú lokið. Alls kepptu um 250 börn á þessu móti.

Keppendur komu frá eftirtöldum skólum: Álfhólsskóla, Hörðuvallaskóla, Salaskóla, Smáraskóla og Vatnsendaskóla.

Geysilegur áhugi er á skákiðkun í þessum grunnskólum og hafa nemendur úr þeim náð margir eftirtektarverðum árangri.

Mótið hefur jafnan verið á vormisseri en vegna þess mikla álags sem hefur skapast við lok vetrarstafs þar sem allar íþróttagreinar eru að summera upp árangur vetrarins með mótum hverja helgi. Þá tóku skákkennarar í Kópavogi þessa ákvörðun að færa mótið á haustmisseri. 

Mótsstjóri var Halldór Grétar Einarsson.

Mótinu var skipt upp í 4 aldurshólf.

Úrslit yngsti flokkur  1.-2. bekkur

1. Hörðuvallaskóli a lið ..15 v
2. Vatnsendaskóli a lið .. 14 v
3. Álfhólsskóli a lið  ..12,5 v

Sjá nánar: http://www.chess-results.com/tnr199347.aspx?lan=1

Mynd af borðaverðlaunum:

Úrslit 3.-4 bekkur. 

1. Salaskóli b lið ..14v
2. Salaskóli a lið  ..14v
3. Smáraskóli a lið ..14v.

Sjá nánar: http://www.chess-results.com/tnr197274.aspx?lan=1

 

Úrslit 5.-7. bekkur.  Efstu 3

1. Hörðuvallaskóli a lið ..22,5 v
2. Álfhólsskóli a lið  ..20,5 v
3. Salaskóli b lið  ..15,5 v.

Sjá nánar: http://www.chess-results.com/tnr198334.aspx?lan=1

 

Úrslit 8.-10. bekkur. 

1. Álfhólsskóli a lið  ..23 v
2. Salaskóli a lið  ..21,5 v
3. Smáraskóli a lið  ..18 v

Sjá nánar: http://www.chess-results.com/tnr199327.aspx?lan=1

 

 

Björn hraðskákmeistari Garðabæjar

Fjölmennt Hraðskákmót Garðabæjar fór fram í gær mánudaginn 14 desember. en alls tóku þátt 32 keppendur sem er metþátttaka og húsfyllir. Mótið var jafnframt 35 ára afmælismót félagsins.

Margir þéttir hraðskákmenn mættu til leiks en enginn þéttari en Garðbæingurinn og alþjóðlegi meistarinn Björn Þorfinnsson sem vann alla sína andstæðinga 9 að tölu. hinn 12 ára Vignir Vatnar Stefánsson varð í 2 sæti en í 3 sæti varð hinn margreyndi víkingur Gunnar Freyr Rúnarsson en hann vann mótið í fyrra.

Sjá má myndir frá mótinu í myndaalbúmi í færslunni á undan.

Myndaalbúm á Facebook.

Riddarinn - Hinir sigursælu undanfarið - Jólaskákmótið 2015

Það er fastur punktur í tilverunni hjá mörgum skákáráttuöldungum að storka örlögunum Í baráttunni um  efsta eða neðsta sætið á vikulegum mótum í hópi Riddara reitaða borðsins í Hafnarfirði og fá þannig útrás fyrir áunna skákáráttustreituröskun. Þar er ávallt teflt á miðvikudögum allan ársins hring í Vonarhöfn einum af fundarsölum safnaðarheimilis Hafnarfjarðarkirkju þar sem lengi er von á einum.  

Að undanförnu hafa þeir Ingimar Halldórsson, Jón Þ. Þór,  Gunnar Kr. Gunnarsson og Guðfinnur R. Kjartansson verið einna sigursælastir og unnið mótin suður þar nokkuð örugglega  til skiptis.  Björn Víkingur Þórðarson sá aldni höfðingi er þó jafnan drjúgur að velgja þeim og öðrum undir uggum sem stundum hefur riðið baggamuninn og ráðið úrslitum að öðrum skákskörfum eins og Sigurði E. Kristjánssyni,  Össurri Kristinssyni, Páli G. Jónssyni, Kristjáni Stefánssyni og Friðbirni K. Hólm ólöstuðum sem átt hafa sína góðu spretti ásamt fleirum.  

Á miðvikdaginn kemur þann 16. desember fer þar fram hið árlega Jólaskákmót klúbbsins. Keppt verður um veglega jólapakka og annan góðan glaðning mönnum til yndisauka. Einnig detta einhverjir í lukkupott þótt illa hafi gengið við að máta mann og annan - ef heppnin er með í för.

Tefldar verða 11 umferðir með 10 mín. umhugsunartíma.  Mótið sem hefst kl. 13 eins og venjulega er öllum opið til hátíðabrigða. Engin aldursmörk að þessu sinni – bara einbætts sigurvilja og góðrar skákgetu krafist.

www.riddarinn.net

Jólahraðskákmót Ása fer fram í dag

Æsir í Ásgarði tefla sitt jólahraðskákmót á morgun þriðjudag í Stangarhyl 4. Mótið hefst kl 13.00 Tefldar verða 11 umferðir með 7 mín umh. Allir eldri skákmenn velkomnir, karlar 60+ og konur 50+. Bragi Halldórsson sigraði á þessu móti síðast.

Þetta verður síðasti skákviðburður ársins hjá okkur.Á nýju ári byrjum við að tefla aftur þriðjudaginn 5 janúar.

Stjórn Ása.

Atskákmót Skákklúbbs Icelandair - Íslandsmótið í atskák

Atskákmót Skákklúbbs Icelandair – Íslandsmótið í atskák fer fram sunnudaginn 27. desember á Hótel Natura (áður Hótel Loftleiðir) og hefst kl. 13. 

Tefldar eru 9 umferðir eftir svissneska kerfinu með 15 mínútna umhugsunartíma. Teflt verður í einum flokki.

Þátttökugjald: 3.000 og 2.000 fyrir 12 og yngri. Stórmeistarar og alþjóðlegir meistarar fá frítt í mótið en FM-meistararar greiða 1.500 kr.

Verðlaunin fyrir efstu þrjú sætin í mótinu eru:

1. 100.000 kr.
2.  50.000 kr.
3.  25.000 kr.

Verðlaun skiptast eftir Hort-kerfi.

Einnig verða veitt verðlaun fyrir efsta keppandann í fjórum undirflokkum.

Efsti keppandinn í hverjum flokki fær farmiða fyrir tvo til Evrópu með Icelandair (skattar ekki innifaldir)

• 2300-yfir
• 2000-2299
• 1700-1999
• 0-1699

Einnig verða veitt verðlaun fyrir:

• Óvæntasta sigurinn: 40.000 inneign hjá Flugfélaginu fyrir óvæntasta sigurinn samkvæmt stigamun.
• Efsta unglinginn fæddan 2000 eða síðar sem fær 40.000 kr inneign hjá Flugfélagi Íslands.

Miðað verður við atskákstig FIDE stig 1. des -> annars FIDE stig -> annars íslensk stig 1. des svo  -> svo frammistöðu á síðasta atskákmóti ef fyrir hendi annars 1.500 stig.

Verða tveir eða fleiri jafnir í verðlaunaflokkum gildir stigaútreikningur. Sama gildir um Íslandsmeistaratitilinn.

Skráning fer fram í gula kassanum efst Skák.is og stendur til 15:00 þann 26. desember og hér er hægt að sjá þegar skráða keppendur.

 

Stefán Gíslason skákmeistari Vestmannaeyja 2015

Nú er nýloknu Skákþingi Vestmannaeyja 2015.

Hinn gamalkunni skákmaður, Stefán Gíslason sigraði og er því Skákmeistari Vestmannaeyja 2015. Stefán hefur lengi teflt með félaginu og tekið þátt í flestum mótum þess síðustu áratugi, en þetta er í fyrsta sinn sem hann hlýtur hinn eftirsótta titil. Stefán hlaut 4 vinninga af 5 mögulegum og varð einn efstur á skákþinginu.

Keppendur á Skákþinginu að þessu sinni voru 6, en auk Stefáns tóku þátt þeir Sigurjón Þorkelsson, Þórarinn I. Ólafsson, Arnar Sigurmundsson, Einar B. Guðlaugsson og Gísli Einarsson, en flestir þessir eru gamalkunnir skákmenn í félaginu.

Í 2-3 sæti urðu þeir Sigurjón og Einar, jafnir með 3,5 vinninga.

Stefán er vel að titlinum kominn, enda vel að sér í skákfræðunum, en það er kannski hin eðlislæga hógværð Stefáns sem veldur því að hann hefur ekki unnið þennan titil fyrir löngu síðan. Um ævi og störf Stefáns má lesa hér!

Jólahraðskákmót Ása fer fram á morgun

Æsir í Ásgarði tefla sitt jólahraðskákmót á morgun þriðjudag í Stangarhyl 4. Mótið hefst kl 13.00 Tefldar verða 11 umferðir með 7 mín umh. Allir eldri skákmenn velkomnir, karlar 60+ og konur 50+. Bragi Halldórsson sigraði á þessu móti síðast.

Þetta verður síðasti skákviðburður ársins hjá okkur.Á nýju ári byrjum við að tefla aftur þriðjudaginn 5 janúar.

Stjórn Ása.

Mikil stemning suður með sjó!

Kátt var á hjalla og mikil stemning þegar fjórða Jólamót Krakkaskákar og Samsuð fór fram í Holtaskóla í Keflavík í gær. Glæsilegt þátttökumet var slegið þegar 49 krakkar á grunnskólaaldri mættu til leiks. Telft var í yngri flokki (1.-5. bekkur) og eldri flokki (6.- 10. bekkur) ásamt því að þeir allra yngstu og óreyndustu gátu valið að tefla peðaskák.

Mikil kennsla er nú í grunnskólum Suðurnesja og markar mótið ákveðinn hápunkt á haustönninni. Siguringi Sigurjónsson kennir skák í Njarðvíkurskóla, Holtaskóla Keflavík, Grunnskóla Grindavíkur, Hópskóla Grindavík, Sandgerðisskóla og Gerðaskóla Garði. Alls telja nemendur Siguringa allt að fjögur hundruð. Sannarlega glæsileg uppbygging í gangi suður með sjó.

 

Í yngri og eldri flokki voru tefldar níu umferðir með átta mínútna umhugsunartíma. Stelpur og strákar tefldu saman í flokki en sér verðlaun fyrir hvort kyn. Í peðaskákinni voru níu keppendur og tefldu allir við alla. Í yngri flokki var Sólon Siguringason í miklum sérflokki enda með töluvert meiri keppnisreynslu en aðrir keppendur. Efst stúlkna og í öðru sæti í mótinu varð Birta Eiríksdóttir. Birta er í vöskum stelpnahópi frá Grindavík sem stundar skákina af miklu kappi hjá Siguringa. Afraksturinn er farinn að skila sér og í haust varð Birta Íslandsmeistari stúlkna 8ára og yngri. Má búast við Grindvíkingum sterkum á Íslandsmóti barnaskólasveita fyrir fyrsta til þriðja bekk sem fram fer í mars.

Rétt eins og í yngri flokki vannst eldri flokkurinn með fullu húsi. Ólafur Þór sýndi mikið öryggi og vann allar sínar skákir. Efst stúlkna varð Nadía sem hefði hæglega getað fengið fleiri vinninga og sýndi góða takta. Í peðaskákinni vann ung snót að nafni Emilía og er frá Grindavík glæsilegan sigur og tapaði bara einni skák en vann sjö.

Úrslit:

Yngri flokkur strákar:

1. Sólon Siguringason. Níu vinningar af níu!
2. Flóvent Rigve Adhikari.
3. Hjörtur Jónas Klemensson.

Yngri flokkur stelpur:

1. Birta Eiríksdóttir. Átta vinningar af níu.
2. Ólöf Bergvinsdóttir.
3. Svanhildur Róbertsdóttir.

 Eldri flokkur strákar:

1. Ólafur Þór. Níu vinningar af níu!
2. Björn Kristinn.
3. Kjartan Óli.

Eldri flokkur stúlkur:

1. Nadía. Fimm vinningar af níu.
2. Hekla.
3. Arnhildur.

 Að móti loknu voru dregnir fjölmargir vinningar út í veglegu happadrætti. Til að mynda voru dregin út 15 taflsett og fjögur lambalæri. Vinninga gáfu Skáksamband Íslands og Nettó. Mótsstjóri var Siguringi Sigurjónsson og skákstjórar Stefán Bergsson, Agnar Olsen og Jon Olav Fivelstad. Jon Olav lauk nýlega skákstjóranámskeiði og hefur nú bæst í góðan hóp skákstjóra.