Fjölnir sigraði á Íslandsmóti unglingasveita með fullu húsi!

Skákdeild Fjölnis sigraði með ótrúlegum yfirburðum á Íslandsmóti unglingsveita sem fram fór á laugardaginn í Garðaskóla. Sveitarmeðlimir unnu allar 28 skákir sínar! Það er í fyrsta skipti í 10 ára sögu mótsins sem það gerist. Þetta er annað skiptið sem Fjölnir vinnur keppnina en fyrst unnu þeir hana í fyrra.

Með Fjölni tefldu Dagur Ragnarsson, Oliver Aron Jóhannesson, Jón Trausti Harðarson og Nansý Davíðsdóttir. Eðli málsins samkvæmt fengu þau öll borðaverðlaun. Besti varamaðurinn var hins Jón Jörundur Guðmundsson hjá KR sem fékk 5 vinninga í 6 skákum.

Sveit Hellis varð í 2. sæti með 22 vinninga, skor sem venjulegu móti gæti dugað til sigur. Sveitin tapaði 0-4 fyrir Fjölni, gerði 2-2 jafntefli við TR en vann allar aðrar sveitir. Ung sveit en allir sveitarmeðlimirnir geta teflt í keppninni í 3-4 ár.  Silfursveit Hellis skipuðu: Hilmir Freyr Heimisson, Dawid Kolka, Felix Steinþórsson og Heimir Páll Ragnarsson.

Sveit TR endaði í 3. sæti með 20 vinninga en langt bil var í fjórða sætið. Í sveit TR voru: Vignir Vatnar Stefánsson, Veronika Steinunn Magnúsdóttir, Gauti Páll Jónsson, Rafnar Friðriksson og Donika Kolica.

B-sveit TR varð í 4. sæti og varð efst b-sveita. Árangur KR-inga sem urðu í 5. sæti kom svo verulega á óvart.

C- og d-sveitir Hellis urðu efstar slíkra sveita.

Lokastöðu mótsins má ná á Chess-Results.

Það var Taflfélag Garðabæjar sem stóð fyrir mótinu og gerði það að myndarbrag nú sem endranær. Skákstjórn var í örggum höndum Páls Sigurðssonar.

• Chess-Results 
• Myndaalbúm (PS)

Hraðkvöld hjá Helli í kvöld

Taflfélagið Hellir heldur hraðkvöld mánudaginn 26. nóvember nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

HM kvenna: Og þá eru eftir tvær

Undanúrslitum Heimsmeistaramóts kvenna lauk í dag í Khanty-Mansiysk. Úkraínska skákskonana   vann kínversku skákkonuna Wenjun Ju eftir bráðabana en áður hafði búlgarska skákkonan Antoaneta Stefanova lagt indversku skákdrottninguna Harika Dronavalli að velli. Það verða því Ushenina og Stefanova sem tefla til úrslita um heimsmeistaratitilinn. Tefla þær fjögurra skáka einvígi og til þrautar með styttri umhugsunartíma verði jafnt.

Hou Yifan, núverandi heimsmeistari, hefur svo tryggt rétt til að tefla að tefla heimsmeistaeinvígi að ári, en þá sem áskorandi. Það gerði Yifan með því að vinna fremur öruggan sigur í Grand-Prix keppni kvenna. Teflt er árlega um heimsmeistaratitil kvenna.

Heimsmeistaraeinvígð hefst á þriðjudag.

• Heimasíða mótsins
• Beinar útsendingar (hefjast kl. 9)

Að tefla við Smára er eins og að reyna að handjárna ál!

Í dag fór fram skylduleikjamót hjá Skákfélagi Akureyrar, með umhugsunartímanum 5 mínútur + 3 sek á leik. Eins og flestir vita hafa slík mót farið þannig fram að tefldar eru stöður tengdar einhverskonar þema, t.d. úr einhverju skákmóti, ákveðinni byrjun eða eftir þekktan skákmann.

Að þessu sinni varð úr að tefldar voru stöður úr hraðskákum fyrv. heimsmeistarans, Tigran Petrosian. Sá tefldi þó sjaldan hraðskák, amk opinberlega, enda finnast aðeins sex slíkar í gagnagrunnum. Stöður úr þeim öllum voru tefldar, þ.e. byrjað var á 9. leik svarts í öllum tilfellum og svo bættust við þrjár stöður úr hraðskákum Robert J. Fischer, enda tefldar níu umferðir.

Margt var sagt um skákstíl Petrosian, en sem dæmi líkti Harold Charles Schonberg því að tefla við Petrosian, við að reyna að handjárna ál, hvergi væri hægt að ná taki á honum.

Það sama verður framvegis sagt um Smára „ál" Ólafsson, enda var ekki annað að sjá en hann hafi verið beintengdur við Petrosian heitinn þegar hann, sá fyrrnefndi, sigraði örugglega á mótinu, tapaði ekki skák en gerði tvö jafntefli sem er mjög í anda heimsmeistarans fyrv..

Að öðru leyti fóru leikar þannig;

Smári Ólafsson                                                                                       7 af 8.
Einar Garðar Hjaltason                                                                          5
Tómas Veigar og Sigurður Eiríksson                                                    4,5
Haki Jóhannesson, Logi Rúnar Jónsson og Sveinbjörn Sigurðsson   3,5
Sigurður Arnarson                                                                                  2,5
Karl Steingrímsson                                                                                  2

Heimasíða SA

Skákþættir Morgunblaðsins: Á bak við tjöldin með Averbakh

Skipta má skákmönnum í sex flokka," skrifar Júrí Averbakh í endurminningum sínum, Center stage and behind the scenes. Í fyrsta flokki nefnir hann „dráparana". Þetta eru menn á borð við Aljekín, Botvinnik, Kortsnoj og Fischer. Það einkennir þessa einstaklinga að þeir hafa verið afskiptir í æsku - hafa t.d. alist upp án föður og virðast haldnir „ödipusarduld".

Í flokki nr. 2 eru „baráttumennirnir". Viðureignin er barátta þar sem öllu skiptir að einbeita sér að fullu. Í þessum flokki eru menn á borð við Lasker, Tal og Kasparov.

Í þriðja flokki eru „hinir sönnu íþróttamenn". Skákin er keppnisgrein sem lýtur sínum eigin lögmálum. Þegar leik er lokið eru slíkir einstaklingar yfirleitt hversdagsgæfir og prúðir en þeir gefa ekki þumlung eftir á „keppnisvellinum". Capablanca, Euwe, Keres, Smyslov og Spasskí tilheyra þessum flokki.

Í fjórða flokki eru „leikmennirnir". Þeir hafa oft hæfileika í öðrum keppnisgreinum. „Leikmennirnir" eru oft hjátrúarfullir og taka tapi illa og þegar það gerist er óheppni yfirleitt um að kenna. Karpov og Petrosjan tilheyra þessum flokki.

Í fimmta flokki koma svo „listamennirnir" og í þeim sjötta „landkönnuðir". Hin „listrænu tilþrif" mega sín oft lítils gagnvart keppnishörku hinna. Júrí Averbakh, sem er fæddur 1922, setur sig í hóp „landkönnuða". Hann hefur útsýn yfir alla skáksöguna - ekki aðeins sem öflugur stórmeistari og Sovétmeistari árið 1954, heldur einnig sem forseti sovéska skáksambandsins til margra ára, skákdómari, ritstjóri, blaðamaður, aðstoðarmaður fjögurra heimsmeistara: Botvinniks, Spasskís, Tals og Petrosjans. Stórkostlegur fræðimaður sem skrifaði mikinn bálk um endatöfl. Eitt afbrigði Kóngsindversku varnarinnar ber nafn hans og um það skrifaði Margeir Pétursson bók sem fékk góða dóma.

Áhugamönnum um sagnfræði skákarinnar þykir áreiðanlega fengur í ýmsu því sem Averbakh ritar um: Heimsmeistarinn Botvinnik óskar eftir leyfi til að byggja sumarhús á eftirsóttu svæði í grennd við Moskvu. Neitun berst undirrituð af Bería, hinum illræmda innanríkisráðherra. Botvinnik sendir inn aðra beiðni og nú til Stalíns sem undirritar skipun þess efnis að Botvinnik skuli fá skika lands á þessu svæði og byggingarefni.

Antwerpen 1955: Averbakh fær ekki hamið 18 ára pilt, Boris Spasskí, sem kominn er til Belgíu til þess að verða heimsmeistari unglinga. Í viðurvist sendiherra Sovétríkjanna gengur bunan út úr Spasskí um það sem aflaga fer í Sovét. „Yfirfrakki" sem sendur hefur verið með Spasskí til Belgíu og reynist eins og ævinlega vera KGB-maður, tilkynnir Averbakh að hann muni skila skýrslu um framgöngu Spasskís, sem Averbakh veit að þýðir ævilanga útskúfun. Averbakh tekst að fresta skýrslugjöf og síðar að láta málið niður falla. Nokkru síðar teflir Averbakh kostulegt æfingaeinvígi við Botvinnik heimsmeistara en eftir millisvæðamótið í Portoroz 1958 gengur hann til liðs við undramanninn Tal, Botvinnik til sárrar gremju. Averbakh fjallar um Bobby Fischer, kosningar á FIDE-þingum, Kortsnoj, einvígi Karpovs og Kasparovs, fall Sovétríkjanna, hégómaskap, svindl, og tortryggni. Júrí Averbakh stendur álengdar sem hinn mikli heiðursmaður og stækkar þá skákburði sem hann kemur nærri. Og hann kemur „þurr innan úr rigningunni".

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 18. nóvember 2012.

Skákþættir Morgunblaðsins

Jens Kristiansen heimsmeistari öldunga

Danski alþjóðlegi meistarinn Jens Kristiansen (2429) varð í gær heimsmeistari öldunga (60+) í skák. Nokkuð óvæntur sigur þar Jens var aðeins nr. 9 í stigaröð keppenda á mótinu þar sem 11 stórmeistarar voru meðal keppenda.

Sigurinn tryggir ekki að Kristiansen heimsmeistaratitil heldur fær hann jafnframt stórmeistaratitil!

Í 2.-3. sæti urðu stórmeistararnir Anatoly Vaisser (2540), Frakklandi, og Evgeny Sveshnikov (2507), Lettlandi.

• Heimasíða mótsins
• Chess-Results

Jón Árni og Sigurður að tafli í Tékklandi

Félagarnir Jón Árni Halldórsson (2196) og Sigurður Ingason (1883) hafa setið að tafli í Tékklandi og tekið þátt í tveimur alþjóðlegum skákmótum.

Fyrst tóku þeir þátt í alþjóðlegu móti í Brno 10.-17. nóvember. Jón Árni hlaut 5,5 vinning og endaði í 12.-20. sæti en Sigurður hlaut 4,5 vinning og endaði í 30.-38. sæti.

Síðar tóku þeir þátt í alþjóðlegu skákmóti Pilsen 18.-24. nóvember. Þar hlaut Jón Árni 4,5 vinning og endaði í 8.-14. sæti en Sigurður hlaut 3,5 vinning og endaði í 24.-31. sæti.

Prýðisframmistaða hjá Jóni Árna sem gerði m.a. jafntefli við stórmeistarann Mikhaeil Ivanov (2381) í síðara mótinu.

• Heimasíða mótsins (Brno)
• Chess-Results
• Heimasíða mótsins (Pilsen)
• Chess-Results

 

Kappteflið um Patagóníusteininn: Vignir Vatnar sigurvegari

Sumir fæðast með skákbakteríu í blóðinu en aðrir rækta hana með sér. Þeir fyrrnefndu eru mun betur settir því þá fylgir svokallaður X-factor með í vöggugjöf.  Eins konar snilligáfa sem hægt er að beisla með góðri ástundun og mikilli vinnu.  Við þekkjum til nokkurra slíkra sem gert hafa garðinn frægan þó engin nöfn séu hér nefnd utan okkar manns, Friðriks Ólafssonar.

Kappteflið um undrasteininn merkilega úr iðrum jarðar hinum megin á hnettinum hefur nú staðið í nokkrar vikur.  Þetta er í þriðja sinn sem um grjótið gullvæga er teflt. Það var enginn annar en hinn „líttellimóði  fléttumeistari"  Gunnar Kr. Gunnarsson (79), sem bar sigur í bæði fyrri skiptin.   Mótin hafa verið öllum skákmönnum opin, hvort heldur þeir vildu taka þátt í þeim öllum eða bara einu og einu,  til að spreyta sig og/eða sýna snilli sína.   Afar góð þátttaka hefur verið í keppninni og yfir 30 skákkempur á öllum aldri  komið að taflinu.

Nú hafa verið tefld 5 mót af 6 í mótaröðinni alls 55 skákir á mann. Fjögur bestu mót hvers keppanda telja til vinningsstiga, stig þeirra með 2 mót eða minna falla niður.  Eftir mótið nú í vikunni er staðan nú þessi:

1.      Vignir Vatnar Stefánsson ........ 8 fj 8 8 10 = 34 stig

2.      Guðf. R. Kjartansson ..............(3) 8 6 3 8   = 25  stig

3.      Harvey Georgsson .................  fj 10 10 1   = 21 stig

4.      Össur Kristinsson  ...................  3  5  5 0 8 = 21 stig  

5.      Gunnar Gunnarsson ...............10 fj fj 10 0 = 20 stig    aðrir með minna.

Af þessu er ljóst að yngsti keppandinn og ungstirnið undraverða Vignir Vatnar Stefánsson (9 ára) hefur þegar tryggt sér sigur í mótaröðunni, enda þótt eitt skákkvöld sé eftir. Enginn getur tæknilega náð honum að GrandPrix stigum. Vignir sem er nýkominn heim úr erfiðum slag á HM 10 ára og yngri í Slóveníu þar sem hann stóð sig afbragðs vel.

Það var gaman að fylgjast með honum að tafli í Gallerýinu þar sem hann lék margan gamlingjans grátt.  Meðal annars lagði hann meistarann sigursæla GunnaGunn,  fyrrv.  Íslandsmeistara í skák að velli í veltefldri skák og  gerði jafntefli við sigurvegara mótsins Benedikt Jónasson, fv. TR-meistara, með yfir 40 ára taflmennsku í meistaraflokki að baki.  Hér er mikið efni á ferð sem á skilið mikið hrós fyrir frammistöðu sína og  óhætt er að óska þegar til hamingju með sigurinn.

Ekki verður annað sagt en þetta séu nokkuð merkileg og jafnframt söguleg úrslit miðað við það mikla skákmannaval sem mætt hefur til tafls í Gallerýinu undanfarnar vikur. Mörg önnur skemmtileg og sumpart óvenjuleg úrslit urðu í ýmsum öðrum skákum gærkvöldsins eins og meðf. mótstafla hér að neðan ber vel með sér.

ESE-skákþankar 23.11.12

Myndaalbúm (ESE)

Smári vann 15 mínútna mót Goðans

Smári Sigurðsson vann öruggan sigur á 15 mín skákmóti Goðans sem fram fór í gærkvöld. Smári vann alla sína andstæðinga 7 að tölu. Smári vann 15 mín mótið í þriðja sinn í röð í gærkvöldi og vann þvi verðlaunabikarinn til eignar. Var þetta í fimmta skiptið sem Smári vann 15 mín mótið og hefur Smári einokað sigurinn í mótinu fyrir utan eitt skipti þegar Jakob Sævar bróðir hans vann það árið 2009.

 

Þeir feðgar, Jón og Hermann, Smári, Bjarni Jón, Jakob og Hlynur. 

Jakob Sævar og Hermann Aðalsteinsson urðu jafnir að vinningum í öðru sæti, en Jakob hlaut annað sætið á stigum. Þeir félagar tefldu saman í lokaumferðinni og endað sú skák með jafntefli. 

Hlynur Snær Viðarsson varð efstu í flokki 16 ára og yngri með 3 vinninga. Bjarni Jón kristjánsson varð í öðru sæti og Jón Aðalsteinn Hermannsson varð í þriðja sæti.

Lokastaðan:

1.  Smári Sigurðsson                       7  af  7
2.  Jakob Sævar Sigurðsson           4,5
3.  Hermann Aðalsteinsson              4,5
4.  Sighvatur Karlsson                    4
5-6. Ævar Ákason                           3
5-6. Hlynur Snær Viðarsson            3
7-8. Bjarni Jón Kristjánson              2
7-8. Heimir Bessason                      2
9.    Sigurbjörn Ásmundsson           1 
10.  Jón Aðalsteinn Hermannsson  0     

 

Íslandsmót unglingasveita fer fram í dag í Garðaskóla

Íslandsmót unglingasveita verður haldið þann 24. nóvember næstkomandi í Garðalundi í Garðabæ. (Garðaskóli)

Mótið hefst kl. 13 og stendur líklega fram til 17. Umhugsunartími á mann eru 15 mínútur.

Mótið er liðakeppni taflfélaga og eru 4 í hverju liði auk varamanna.

Reglugerð mótsins má finna með því að smella hér. 
http://www.skaksamband.is/?c=webpage&id=249

• Heimasíða TG 
• Chess-Results