Sverrir Þorgeirsson í landsliðsflokk

Sverrir Þorgeirsson (2177) tekur sæti í landsliðsflokki.  Sverrir tekur sæti stórmeistarans Henriks Danielsen (2494) sem forfallaðist.   Ekki er lengur gerlegt að ná áfanga að stórmeistaraáfanga en til að ná áfanga að alþjóðlegum meistaratitli þarf 6,5 vinning.    Jafnframt er búið að draga um töfluröð en í fyrstu umferð mætast m.a. einu keppendurnir sem hafa orðið Íslandsmeistarar þ.e. Jón Viktor Gunnarsson og Hannes Hlífar Stefánsson.

Pörun 1. umferðar:

 

Name	Rtg	Res.	Name	Rtg
Johannesson Ingvar Thor	2343	-	Kristjansson Stefan	2466
Thorhallsson Throstur	2407	-	Thorgeirsson Sverrir	2177
Thorfinnsson Bragi	2396	-	Lagerman Robert	2347
Gislason Gudmundur	2382	-	Olafsson Thorvardur	2206
Gunnarsson Jon Viktor	2429	-	Stefansson Hannes	2574
Arngrimsson Dagur	2383	-	Thorfinnsson Bjorn	2376

 

• Heimasíða mótsins
• Chess-Results

Skákþing Norðlendinga fer fram 16.-18. apríl á Húsavík

Skákþing Norðlendinga 2010 fer fram á veitingastaðnum Gamla Bauk á Húsavík helgina 16-18 apríl. Það er skákfélagið Goðinn sem sér um mótshaldið. Mótið er opið öllu skákáhugafólki.

Tefldar verða 7 umferðir eftir monrad-kerfi, 4 atskákir og 3 kappskákir. Mótið verður reiknað til Íslenskra skákstiga og til FIDE-skákstiga.
Núverandi skákmeistari Norðlendinga er Gylfi Þórhallsson.

Skákstjóri verður Ólafur Ásgrímsson.

Dagskrá

föstudagur   16 apríl kl 20:00   1-4 umferð. Atskák 25 mín á mann
laugardagur 17 apríl kl 10:30   5. umferð.   90 mín + 30 sek/leik
laugardagur 17 apríl kl 16:30   6. umferð.    90 mín + 30 sek/leik
sunnudagur  18 apríl kl 10:30  7. umferð.    90 mín + 30 sek/leik

Verðlaun

1. sæti.  50.000 krónur  (lögheimili á Norðurlandi)
2. sæti.  25.000 krónur   ------------------------------
3. sæti.  10.000 krónur   ------------------------------

1. sæti.  50.000 krónur  ( lögheimili utan Norðurlands)
2. sæti.  25.000 krónur  ------------------------------------
3. sæti.  10.000 krónur  ------------------------------------

Peningaverðlaunum verður skipt á milli manna, verði menn jafnir að vinningum í báðum flokkum.

Aukaverðlaun

Efstur skákmanna undir 1800 íslenskum skákstigum (lögheimili á Norðurl.)

Efstur heimamanna (Félagsmanna Goðans)

Efstur stiglausra. (lögheimili á Norðurl.)

Eingöngu verður hægt að vinna til einna aukaverðlauna.

Harðskákmót Norðlendinga 2010 verður svo haldið sunnudaginn 18. apríl á sama stað og hefst það eigi fyrr en kl 15:00. Ekkert þátttökugjald er í það mót.
Núverandi Hraðskákmeistari Norðlendinga er Rúnar Sigurpálsson 

Skráning og þátttökugjald.

Skráning í mótið er hafin og fer hún fram efst á heimasíðu skákfélagsins Goðans, á sérstöku skráningaformi.  Skráningu verður lokað á hádegi 16 apríl.

Þátttökugjaldið í mótið er krónur 2500 fyrir 17 ára og eldri, en 1000 krónur fyrir 16 ára og yngri.

Mögulegar breytingar á framantöldum upplýsingum vera kynntar hér á síðunni, ef með þarf.

Nánari upplýsingar.

Allar upplýsingar um mótsstaðinn, gistimöguleika, hliðarviðburði, og fl. er að finna hér:http://www.godinn.blog.is/blog/godinn/entry/983547/

Upplýsingar um skráða keppendur er að finna hér:
http://spreadsheets.google.com/ccc?key=0Arg3nCphWhFydDR1R09NWVZRUFVjYmQ1WDVDU1ptR0E&hl=en

Mótið á chess-results: http://chess-results.com/tnr32006.aspx  

Hermann Aðalsteinsson formaður skákfélagsins Goðans veitir allar upplýsingar um mótið í síma 4643187 og 8213187.  [e-mail]

Jón Kristinn Íslandsmeistari barna

Jón Kristinn Þorgeirsson sigraði á Íslandsmóti barna annað árið í röð í dag í Vestmannaeyjum. Jón Kristinn sem er frá Akureyri sigraði alla andstæðinga sína og hlaut 8 vinninga af 8 mögulegum.    Í öðru sæti varð Sigurður A. Magnússon, frá Vestmannaeyjum, varð annar með 6,5 vinning og í 3.-5. sæti urðu Jörgen Freyr Ólafsson, Róbert Aron Eysteinsson og Róbert Leó Jónsson með 5,5 vinning.

Árgangaverðlaun skiptust bróðurlega milli helstu félaga, en þau hlutu:

 1999  Jón Kristinn Þorgeirsson, Skákfélagi Akureyrar
 2000  Dawid Kolka, Taflfélaginu Helli
 2001  Erik Daníel Jóhannesson, Skákdeild Hauka
 2002  Máni Sverrisson, Taflfélagi Vestmannaeyja
 2003  Vignir Vatnar Stefánsson, Taflfélagi Reykjavíkur

Keppendur voru 31, þar af komu 12 úr Reykjavík og tveir frá Akureyri, en aðrir voru heimamenn.

Eftir Íslandsmóti var brugðið á leik og skipað í tvær tíu krakka sveitir, ein frá höfuðborgarsvæðinu og aðra frá Landsbyggðinni og tefldu þær saman tvær umferðir.  Leikar fóru þannig að í fyrri umferðinni skildu sveitirnar jafnar 5-5 og í þeirri síðari sigraði höfuðborgarsvæðið 7,5-2,5, þannig að heildarúrslit urðu 12,5-7,5 höfuðborginni í vil.

Ítarleg umfjöllun er væntanleg á heimasíðu TV og þar má líka finna fjölda mynda.

Lokastaðan:

 

Rk.	Name	Rtg	Club/City	Pts.
1	Thorgeirsson Jon Kristinn	1505	SA	8
2	Magnusson Sigurdur A	1340	TV	6,5
3	Olafsson Jorgen Freyr	1215	TV	5,5
4	Eysteinsson Robert Aron	1330	TV	5,5
5	Jonsson Robert Leo	1180	Hellir	5,5
6	Kolka Dawid	1170	Hellir	5
7	Johannesson Kristofer Joel	1295	Fjölnir	5
8	Palsdottir Soley Lind	1075	TG	5
9	Johannsdottir Hildur B	0	Hellir	5
10	Kjartansson Sigurdur	0	Hellir	5
11	Long Larus Gardar	1145	TV	5
12	Magnusdottir Hafdis	0	TV	5
13	Johannesson David Mar	1190	TV	4
14	Kjartansson Eythor Dadi	1210	TV	4
15	Sverrisson Mani	0	TV	4
16	Johannesson Erik Daniel	0	Sd. Hauka	4
17	Stefansson Vignir Vatnar	0	TR	4
18	Fridriksson Felix Orn	0	TV	4
19	Magnusson Matthias	0	Fossvogsskóla	4
20	Jocobsen Odinn Orn	0	Digranesskola	3,5
21	Sigthorsdottir Sigridur M	0	TV	3,5
22	Oskarsdottir Audbjorg H	0	TV	3,5
23	Sveinsson Mikael Mani	0	SA	3
24	Steinthorsson Felix	0	Hjallaskola	3
25	Andersen Alexander	0	TV	3
26	Hallgrimsdottir Diana	0	TV	2,5
27	Hallgrimsdottir Elisa	0	TV	2
28	Sigursteinsdottir Inga Birna	0	TV	2
29	Egilsson Arnar Gauti	0	TV	1,5
30	Hlynsdottir Anita Lind	0	TV	1,5
31	Magnusdottir Adalheidur	0	TV	1

 

• Heimasíða TV
• Chess-Results

Skákþáttur Morgunblaðsins: Hannes Hlífar gaf eftir á lokasprettinum

Eftir glæsilegan sigur Hannesar Hlífars Stefánssonar á Reykjavíkurmótinu á dögunum höfðu margir vonast eftir betri frammistöðu hans á Evrópumóti einstaklinga sem lauk í Rijeka í Króatíu sl. miðvikudag. Þó verður að telja árangurinn viðunandi. Hannes hlaut 6½ vinning af 11 mögulegum, hafnaði í 109. sæti og var örlítið yfir ætluðum árangri. Þetta mót var mun þéttara en Reykjavíkurmótið, af 408 skákmönnum sem hófu keppni var Hannes nr. 120 í styrkleikaröðinni og Henrik Danielssen sem einnig tefldi í Rijeka og hlaut 6 vinninga var nr. 186.

Um tíma var útlitið fyrir enn betri frammistöðu Hannesar því að eftir sjö umferðir var hann kominn með 5 vinninga. Tvö töp í áttundu og níundu umferð gerðu vonir hans að engu. Hann átti erfitt uppdráttar í ýmsum tískubyrjunum. Þó hann tefldi illa með hvítu gegn Berlínarvörn Búlgarans Kirils Georgiev og í 3. umferð þegar hann féll í þekkta gildru í Nimzo-indverskri vörn er niðurstaða greinarhöfundar engu að síður sú að Hannes sé í mikilli sókn um þessar mundir. En efstu menn urðu:

1. Jan Nepomniachtsí ( Rússland ) 9 v. (af 11). 2.-3. Baadur Jobava (Georgíu) og Artyom Timofeev ( Rússland ) 8½ v.

Íslandsvinurinn Ivan Sokolov var í fararbroddi allt mótið og tefldi af mikilli hörku. Hann tapaði hinsvegar með hvítu í lokaumferðinni fyrir Ungverjanum Almasi og hafnaði í 13. sæti. Sigurvegarinn Nepomaniachtsí þræddi ekki algengustu leiðirnar í skákum sínum en tefldi af þeim mun meiri léttleika. Hann sigraði á Aeroflot-mótinu í Moskvu árið 2008 og hefur unnið ýmis góð afrek síðan.

Þegar eftirfarandi skák var tefld í 9. umferð var Georgíumaðurinn Jobava einn efstur og því úrslitastund mótsins runnin upp. Gegn Caro Kann-vörninni valdi hann sjaldséðan leik, 3. f3 og fjórði leikurinn, a4, kom mönnum einnig spánskt fyrir sjónir. En þessi óvenjulega byrjun sló Jobava út af laginu og Nepo náði að byggja upp ógnandi stöðu á kóngsvængnum. Bráðsnjall leikur var 21. Rd5 og síðan kom gegnumbrotið, 24. e6! Eftir það hrundu varnir svarts. Þeir sem fylgdust með skákinni á hinum ýmsu vefsíðum sýndist hvítur eiga marga vænlega kosti í 24. leik en þá kom hinn rólegi leikur, 27. h3.

EM einstaklinga 2010; 9. umferð:

Jan Nepomniachtsí - Badur Jobava

Caro-Kann vörn

1. e4 c6 2. d4 d5 3. f3 Db6 4. a4 e5 5. dxe5 dxe4 6. a5 Dc7 7. f4 Rh6 8. Rc3 Bb4 9. Bd2 e3 10. Bxe3 O-O 11. Rf3 Hd8 12. Bd3 Ra6 13. De2 Bxa5 14. O-O Rb4 15. Be4 Bf5 16. Kh1 Bb6 17. Bxb6 Dxb6 18. Rg5 c5 19. Hae1 Dg6 20. Bxb7 Rxc2 21. Rd5 Hxd5 22. Bxd5 Bd3 23. Df3 He8

24. e6 Rxe1 25. Hxe1 fxe6 26. Hxe6 Kh8 27. h3 Hxe6 28. Bxe6 Bb5 29. f5 De8 30. f6 Df8 31. f7

- og svartur gafst upp.

HM einvígi - Karpov vill verða forseti FIDE

Í næsta mánuði hefst í Sofia í Búlgaríu einvígi Venselins Topalov og Wisvanathans Anand um heimsmeistaratitilinn. Tefldar verða 12 skákir.

Miðað hefur verið við að einvígið hefjist 5. apríl nk. og að 12. skák þess verði á dagskrá 24. apríl.

Frá Rijeka í Króatíu berast þær fréttir að Anatolí Karpov fyrrum heimsmeistari hafi afráðið að bjóða sig fram í kjöri til forseta FIDE sem fram fer á þinginu í Khanty Manyisk í Síberíu næsta haust. Kirsan Ilumzinhov hefur verið forseti FIDE síðan 1995.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 21. mars 2010.

Skákþættir Morgunblaðsins

Íslandsmót barna fer fram í dag í Vestmannaeyjum

Íslandsmót barna fer fram í dag í Vestmannaeyjum.  31 krakki er skráðir til leiks og þar með nánast allir sterkustu skákmenn landsins á þessum aldri (10 ára og yngri).   Hægt verður að fylgjast með gangi mála á heimasíðu TV og á Chess-Results í dag.

Smyslov látinn

Vassily Smyslov, sem var heimsmeistari í skák 1957-58 lést í gær, 89 ára að aldri.   Smyslov tefldi nokkrum sinnum á Íslandi og má þar nefna Reykjavíkurskákmótið 1974 en hann sigraði á mótinu og á 60 ára afmælismóti Friðriks Ólafssonar, sem fram fór 1995.   Smyslov tefldi síðast kappskák árið 2002, þá 81 árs.   

 

 

Ferðapistill frá Rijeka

Undirritaður fór í sína fyrstu "embættisferð" sem forseti SÍ til Rijeka í Króatíu helgina 12.-14. mars sl.  Um var að ræða fund á vegum ECU (European Chess Union) sem fram fór samhliða EM einstaklinga í Rijeka í Króatíu.  Fundurinn bar nafnið Extra Ordinary Meeting og var að mér skilst framhaldsfundur frá í Novi Sad þegar EM landsliða fór fram þar sem ekki náðist að klára öll mál.    Förina lengdi ég um einn dag m.a. til að geta mætt á eina umferð EM einstaklinga og hitti þar m.a. Hannes og Henrik og ýmsa Íslandsvini eins og t.d. Sokolov, Movsesian og Emanuel Berg.

Ástæðan fyrir því að ég fór var sú að þessu sinni ákváðu gestgjafar að borga gistikostnað fyrir tvær nætur fyrir fulltrúa ECU sem og allan fararkostnað í Króatíu.  ECU lýsti sig tilbúið að borga fyrir ferðakostnað upp að allt að 500 evrum sem dugði að langmestu leyti fyrir ferðakostnaði mínum, uppá vantaði e.t.v. um 20-30 evrur.  Þar sem ég átti inni ferðaávísun frá kreditkortafyrirtæki, bauð ég konunni með og úr var bæði skemmtileg og fróðleg ferð. 

Ferðalagið á föstudeginum til Rijeka var langt og strangt og sjálfsagt var ég sá fulltrúi sem lagði á sig lengsta ferðalagið. Fyrst var flogið til London, beðið þar í 5 tíma, flogið svo til Zagreb, og þaðan er tveggja tíma akstur til Rijeka.  Vaknað var um kl. 5 um morguninn og ekki mætt á hótelið fyrr en undir miðnætti.  Ferðalagið til baka tók einnig svipaðan tíma.  

Á laugardeginum var hópnum safnað upp í rútu og keyrt var með okkur skákstað og því loknu á keppnisstað skákklúbbsins í Rijeka, þar sem ECU-fundurinn fór fram.  Um var að ræða 700 fm. húnæði, býsna stórt og með mörgum sölum sem bendir til þess að skák sé mjög vinsæl þarna.  Fullt var af sjónvarpsvélum var á staðnum sem sjálfsagt mátti að skýra að mestu leyti með nærveru Karpov og til að byrja með þurfti maður að hlusta á ræður fyrirmenna í bænum og gott ef ekki á einhvern ráðherra.  

Alls eiga 54 lönd aðild að ECU og voru viðstaddir þarna ríflega 40 fulltrúar og einhver umboð í gangi svo samtals voru þarna um 45 atkvæði virk.  Meðal fulltrúa má nefna Nigel Short, sem sat fundinn fyrir Englendinga, en aðra þekkti ég ekki fyrir fundinn.   Ég náði reyndar best saman með Wales-verjanum David James, menntaður kennari, sem var hinn viðkunnanlegasti.  

Í upphafi fór fram nafnakall og þegar sagt var Iceland og ég rétti upp hönd fór ekki framhjá mér að sumir fóru beinlínis úr hálsliði til að sjá hver kæmi þaðan.   Sjálfsagt þekkust flestir þarna innanborðs og ég einn nýliða en mig grunar „Iceland" kalli fram ýmis viðbrögð.  Þannig er það bara bara.   Nigel Short glotti t.d. ógurlega við mig og sagði ég að ætti að koma til Grikklands og vinna á ólífuekrunni sinni upp í IceSave-skuldirnar og alls konar glósur fékk ég öðru hverju, en alltaf þó í gamansömum tón.   Mér kom samt á óvart hversu mikið menn vissu um ástandið á Íslandi og nöfn bankana á Íslandi virtist vera mönnum jafn þekkt eins og t.d. Barclays. 

Fundurinn gekk ágætlega og átakalaus en var nokkuð langur.  Farið var yfir svokölluð ECU-statues og fannst mér menn gleyma sér stundum í tækniatriðum og sagði sessunaut mínum það.  Hann útskýrði fyrir mér þá að sum þessara „tækniatriða" var alls ekki svo einföld og þetta snérust líka um völd.   Málið er að þrír menn hafa lýst yfir, eða eru taldir líklegir í framboð sem forsetar ECU, og því var kraumandi spenna undirliggjandi.    Kosningar fara fram í Síberíu í haust en fundurinn verður haldinn samhliða Ólympíuskákmótinu.  

 Til dæmis var rætt fram og til baka um tillögu sem endanum var samþykkt svona:

„Nominations for the Presidential ticket and Continental Presidents must reach the FIDE Secretariat at least three months before the opening of the General Assembly. To be elected, each candidate shall be nominated by his federation. He/She should have been a member of their federation at least one year before the General Assembly.

No person can be elected to a FIDE-office against the will of his national federation. This stipulation may be waived by the General Assembly only in exceptional cases. Federations that are against the nomination of one of their members for a FIDE office, should raise their objections to such a nomination before the election.

A Federation is entitled to nominate only one candidate for one position"

Ég skyldi ekki hvað hvernig menn gátu rætt þetta fram og aftur og rifist um alls konar smávægilegar breytingar á orðlagi en þá sagði David James mér að það væru dæmi um að menn hafi skipt um skáksambönd.  Fróðlegt að bera saman t.d. við viðtalið við Friðrik Ólafsson á Rás 2 um daginn.  

Einnig var sett inn ákvæði um að mótshaldarar yrðu að njóta samþykkis skáksambands þess lands sem mótið ætti að vera haldið í .  Eitthvað sem maður hafði haldið að ætti vera kommon sens eða hvað?   Nei, nei, alls ekki, David James, sagði mér að skýringin á væri sú að um það eru dæmi að menn hafi verið bjóða í mót frá ýmsum ríkjum og t.d. sá sem var aðalmótshaldari nú hefur haldið mót í ýmsum ríkjum fyrrum Júgóslavíu.   Torvelda á slíkt.     

Einnig var farið yfir reglur og m.a. kom fram tillaga um það að framvegis yrði ekki Zero-tolerance reglan á viðburðum ECU.   Það var samþykkt samhljóða að gefa hálftíma og mun sú regla væntanlega taka gildi á mótum hérlendis í haust.  FIDE hefur þó ekki fellt sína reglu ennþá og geri ég ráð fyrir hún gildi t.d. á ólympíuskákmótinu.

Í lok fundarins var farið yfir komandi Evrópumót.  EM einstaklinga 2011 í opnum flokki verður haldið í Aix-les -Bains Frakklandi 20. mars - 3. apríl 2011, og EM einstaklinga í kvennaflokki í Gaziantep í Tyrklandi.   Að lokum hvatti fulltrúi Georgíu sér hljóðs og hélt þar ræðu um Rússa og lýsti yfir óánægju með Karpov og tengsl hans við yfirvöld og var að lokum stöðvaður af. 

Karpov hvatti sér hljóðs í lok fundarins og lýsti yfir framboði sem forseti FIDE í haust og fékk góðar móttökur.  Það mun víst vera málum blandið hvort hann geti boðið sig fram en hvert skáksamband má víst að bjóða fram einn frambjóðanda og Kirshan er einnig Rússi.  Frakkar hafa boðið Karpov fram sem sinn fulltrúa en það mun vera ekki vera ljóst hvort það gangi upp.    Mín tilfinning núna er sú að Karpov hafi ekki séns ef hann ef hann fær á annað borð að bjóða sig fram.  Máli mín til stuðnings get ég vísað til þess að allir heimsálfuforsetarnir styðja Kirshan.  Svo hefur Tyrkland einnig lýst stuðningi við Kirshan en mín tilfinning er að Ali Nihat forseti Skáksambands Tyrklands sé sigurstranglegastur þeirra sem bjóða sig fram sem forseta ECU og þar muni menn horfa á þau kraftaverk sem gerst hafi í tyrknesku skáklífi.    Karpov fengi sem umtalsvert fylgi Evrópu en mig grunar að hann muni eigi erfitt uppdráttar t.d. í Asíu og Afríku. 

Á ChessBase má finna umfjöllun og myndir frá ECU-fundinum.

Um kvöldið var svo haldið aftur á hótelið og þar bauð Búlgarinn Sergei Danilov, sem er vel þekktur sem umboðsmaður Topalov, m.a., í svokölluðu Toilet-gate málinu, í kokteil þar sem hann tilkynnti um framboð sem forseti ECU undir yfirskriftinni „I know".  Það var nokkuð sérstæð framsetning.  Búlgarski forsetinn hélt mikla lofræðu um Danilov og þuldi upp hverja hann þekkti (ráðherra, vinur Topalovs og menn úr viðskiptalífinu) hann væri vel menntaður og þess háttar.   Danilov hélt svo ræðu þar sem hann lýsti yfir markmiðum sínum. 

I Novi Sad í haust hafði forseti tyrkneska skáksambandsins Ali Nihat lýst yfir framboði en Tyrkir hafa verið afskaplega virkir á skáksviðinu síðustu misseri og eru að ná mjög eftirtektarverðum árangri.   Forseti ECU til 12 ára, Boris Kutin, hefur svo ekki gefið annað til kynna en að hann verði í framboði.  Einhvern ónægja er meðal Vestur-Evrópubúa mun vera með það að þrír Austur-Evrópubúar séu í framboði en það þýðir lítið að kvarta og gera ekkert í málunum eins og mig grunar að verði niðurstaðan.  

Ekki fór það framhjá manni að hvert atkvæði er afar mikilvægt enda aðeins 54 í boði og a.m.k. 3 frambjóðendur.    Það er greinilega að Ísland hefur vakið jákvæða athygli fyrir sitt alþjóða skákmótahald í gegnum tíðina og mönnum fannst það eftirtektarvert að nánast allir sterkustu skákmenn heims undanfarna áratugi hafi teflt á Íslandi. 

Einn frambjóðendanna hefur meira að segja boðað mögulega komu sína til Íslands í apríl til að kynna sín stefnumál og vill þá hitta frammámenn í íslensku skáklífi.  

Á sunnudeginum fóru flestir fulltrúarnir heim en ég ákvað að vera lengur og kíkja á skákstað og taka púlsinn á Hannesi og Henriki sem gistu á öðru hóteli en ég.   Þangað var kortersakstur með rútu á vegum mótshaldara.   Aðstaða á skákstað var til mikillar fyrirmyndar en teflt var í risaíþróttasal.  Borð vel aðgreind og 50 skákir í hvorum flokki sýnd beint á vefnum.  Reyndar var nokkuð sérstakt að aðeins einni skák úr hvorum flokki var varpað fram á risaskjá - íslenskir áhorfendur hefðu ekki verið sáttir við það.  

Þarna tók maður eftir hvernig Zero-tolerance reglan virkar.  Skákstjóri tilkynnti að það væru fimm mínútur væru í skák og þá var skáksalurinn eins og mýflugnabú þar sem allir flýttu sér til sætis.  Svo sátu menn stjarfir og enginn hreyfði sig þar til skákin hófst.  Reyndar fínt fyrir þá sem taka myndir.  

Því hefur verið haldið fram við mig að Ísland að senda sína sterkustu menn á mótið og hafi ekki staðið sig vel í samanburði við önnur lönd.  En skoðum málið.  Ísland átti þarna tvo fulltrúa, Íslandsmeistarann, Henrik, og sigurvegarann á MP Reykjavíkurskákmótsins, Hannes Hlífar. 

Berum saman við hin norðurlöndin.    Frá Finnlandi tók stórmeistarinn Tomi Nyback (2624) þátt.  Frá Danmörk var Bo Jackobsen (2375) sem mig grunar að hafi verið þarna á eigin vegum.  Frá Svíþjóð voru stórmeistararnir Emanuel Berg (2594) og Pontus Carlsson (2478) og eini fulltrúa norrænna kvenna, Pia Cramling (2523) sem stóð svo uppi sem Evrópumeistari.  Og frá Noregi, ríkasta landi heims, var Per Ofstad (2197), 76 ára, sem einnig var þarna sem ECU-fulltrúi.  Maður sem ég spjallaði mikið við og er mikill áhugamaður þess að NM öldunga fari fram á Íslandi árið 2011.   Litla Ísland stendur sig bara býsna vel og auðvitað langbest Norðurlandanna sé miðað við hina klassísku höfðatölu!

Við gistum í raun og veru ekki í Rijeka heldur í litlum bæ fyrir utan sem heitir Obatija en þar búa aðeins um 13.000 íbúar.     Þarna var ríkmannlega byggt sýndist manni og töluvert um túrista.  Aðeins mun vera nokkra tíma sigling til Feneyja.  

Á mánudagsmorgninum var svo haldið heim á leið eftir skemmtilega og fróðlega ferð. 

Gunnar Björnsson

MR Íslandsmeistari framhaldsskólasveita

Sveit Menntaskólans í Reykjavík varð Íslandsmeistari framhaldsskólasveita í skák 2010. M.R. hlýtur því rétt á að tefla fyrir Íslands hönd á Norðurlandamóti framhaldsskólasveita sem fram fer í Danmörku í september. Sveit M.R. varði því Íslandsmeistaratitil sinn frá því í fyrra, og er sveitin Norðurlandameistari frá 2009.

Íslandsmót framhaldsskólasveita fór fram í kvöld föstudaginn 26. mars í húsakynnum Taflfélags Reykjavíkur, Faxafeni 12. Sex sveitir voru skráðar til leiks, en þegar til kom forfölluðust sveitir Fjölbrautar í Garðabæ og Fjölbrautar í Breiðholti. Fjórar sveitir tefldu því einfalda umferð með 30 mín. umhugsunartíma. Það voru A- og B sveitir Menntaskólans í Reykjavík, Verzlunarskóli Íslands og Menntaskólinn við Hamrahlíð.

Íslandsmót framhaldsskólasveita hefur verið haldið sleitulaust frá árinu 1971 og var það Taflfélag Reykjavíkur sem stofnaði til þessa móts og hefur verið mótshaldari frá upphafi. Menntaskólinn við Hamrahlíð hefur oftast unnið þessa keppni eða í yfir 20 skipti. Ánægjulegt var að sjá tvöfalt fleiri sveitir nú en í fyrra, en nokkur lægð hefur verið yfir þátttöku í þessu móti undanfarin ár. Keppendur á skákmótinu í kvöld eru flest öll reyndir skákmenn, bæði sem einstaklingar og sem sveitarneðlimir sinna grunnskólasveita undanfarinna ára. Ef þróunin verður sú að skákkrakkar úr grunnskólum landsins haldi áfram keppni í sveitakeppnum framhaldsskóla, þá á þetta mót góða framtíð fyrir sér! Vonandi verða enn fleiri sveitir með að ári liðnu og einnig sveitir frá framhaldsskólum af landsbyggðinni.

Nánari úrslit urðu sem hér segir:

• 1. sæti: Menntaskólinn í Reykjavík A-sveit með 8 1/2 vinning.
• 2. sæti: Verzlunarskóli Íslands með 5 1/2 vinning.
• 3. sæti: Menntaskólinn í Reykjavík B-sveit með 5 1/2 vinning.
• 4. sæti: Menntaskólinn við Hamrahlíð með 4 1/2 vinning.

Í sigurliði M.R. eru:

• 1. b. Sverrir Þorgeirsson
• 2. b. Bjarni Jens Kristinsson
• 3. b. Hallgerður Helga Þorsteinsdóttir
• 4. b. Paul Joseph Frigge

 

Í silfurliði Verzlunarskóla Íslands eru:

• 1. b. Hjörvar Steinn Grétarsson
• 2. b. Patrekur Maron Magnússon
• 3. b. Hörður Aron Hauksson
• 4. b. Jökull Jóhannsson

 

Í bronsliði M.R. B-sveitar eru:

• 1. b. Jóhanna Björg Jóhannsdóttir
• 2. b. Jóhannes Bjarki Tómasson
• 3. b. Mikael Luis Gunnlaugsson
• 4. b. Daníel Björn Yngvason

 

Í liði M.H. sem lenti í 4. sæti eru:

• 1. b. Daði Ómarsson
• 2. b. Tinna Kristín Finnbogadóttir
• 3. b. Matthías Pétursson
• 4. b. Geirþrúður Anna Guðmundsdóttir

 

Skákstjóri var Ólafur H. Ólafsson.

Páskaeggjamót Hellis fer fram á mánudag

Páskaeggjamót Hellis verður haldið mánudaginn 29. mars 2010, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Ókeypis er fyrir félagsmenn í Helli en fyrir aðra er þátttökugjald kr. 500.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 1994 - 1996) og yngri flokki (fæddir 1997 og síðar). Að auki verða tvö páskaegg dregin út og efsta stúlkan í mótinu fær páskaegg í verðlaun. Enginn fær þó fleiri en eitt páskaegg.

Páskaeggjamótið verður haldið í félagsheimili Hellis að Álfabakka 14a í Mjóddinni. Inngangur er við hliðina á Subway en salur félagsins er á þriðju hæð hússins.

Atkvöld hjá Helli á mánudag

Taflfélagið Hellir heldur atkvöld mánudaginn  29. mars 2010 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með tuttugu mínútna umhugsun. Teflt er í félagsheimili Hellis í Álfabakka 14a í Mjóddinni.

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).