Róbert - Kasakstan 2-0

FIDE-meistarinn Róbert Harðarson (2315) átti góðan dag í dag í Olomouc í Tékklandi en hann vann sigur í báðum sínum skákum í dag en andstæðingar hans voru báðir frá Kasakstan.  Í sjöttu umferð sigraði hann Gulmira Dauletova (2210), sem er alþjóðlegur meistari kvenna, og í sjöundu umferð vann hann Maxat Alaguzov (2200).  Róbert hefur unnið 3 sigra röð, hefur 4,5 vinning, og er í 3.-5. sæti.  

Meðalstig flokksins eru 2297 og 8 vinninga þarf í 11 skákum til að ná áfanga að alþjóðlegum meistaratitli. 

• Heimasíða Olomouc-mótisns
• Chess Results (Olomouc)

Héðinn Steingrímsson stórmeistari í skák!

Héðinn Steingrímsson (2470) gerði jafntefli við  Sebastian Plischki (2397) í níundu og síðustu umferð alþjóðlega mótsins í Mladá Boleslva í Tékklandi.   Með árangrinum tryggði  Héðinn sér sinn þriðja og síðasta stórmeistaraáfanga og hefur þegar náð tilskyldum skákstigum!  Héðinn Steingrímsson er því orðinn stórmeistari í skák!  Héðinn fékk 7 vinninga á mótinu og var öruggur sigurvegari þess, fékk 1,5 vinningi meira en næsti maður! 

Allir áfangarnir komu í hús í ár! 

Til hamingju Héðinn!

 

 

• Heimasíða mótsins
• Chess-Results 

Róbert sigraði í 5. umferð í Olomouc

FIDE-meistarinn Róbert Harðarson (2315) sigraði slóvakíska alþjóðlega meistarann Ladislav Kotan (2279) í 5. umferð alþjóðlega mótsins í Olomouc.  Róbert hefur nú 2,5 vinning og er í 7. sæti.

Tvær umferðir eru tefldar í dag og eru báðir andstæðingar Róberts frá Kasakstan!

Meðalstig flokksins eru 2297 og 8 vinninga þarf í 11 skákum til að ná áfanga að alþjóðlegum meistaratitli.

Mynd: Róbert, t.v. að tafli við Guðmund Kjartansson. 

 

• Heimasíða Olomouc-mótisns
• Chess Results (Olomouc)

Héðinn aðeins einu jafntefli frá stórmeistaratitli!

Alþjóðlegi meistarinn Héðinn Steingrímsson (2470) sigraði tékkneska stórmeistarann Radoslaw Jedynak (2540) í áttundu og næstsíðustu umferð alþjóðlegs skákmóts sem fram fór í Mladá Boleslva í Tékklandi í dag.  Héðinn þarf nú jafntefli í lokaumferðinni gegn Þjóðverjanum Sebastian Plischki (2397) til þess að verða stórmeistari í skák.  Héðinn er langefstur á mótinu en hann hefur 6,5 vinning og hefur 2 vinninga forskot á næstu menn og sigurinn á mótinu þegar hans.   

Héðinn hefur þegar náð tveimur af þeim þremur stórmeistaraáföngum sem hann þarf að ná og hefur einnig náð tilskyldum 2500 skákstigum.  Geri Héðinn jafntefli á morgun verður hann því næsti stórmeistari Íslendinga!

Nú er bara að vona að Héðinn klári dæmið á morgun!  Skákin hefst kl. 7 í fyrramálið á íslenskum tíma en Tékkarnir bjóða þeim miður ekki upp á beina útsendingu.

• Heimasíða mótsins
• Chess-Results 

Elsa María og Tinna Kristín efstar á unglingalandsmótinu á Höfn

Tinna Kristín Finnbogadóttir, UMSB, og Elsa María Þorfinnsdóttir, ÍBR (Hellir) sigruðu í skákkeppni á 10. unglingalandsmóti UMFÍ á Höfn í Hornafirði, sem fram fór í Nýheimum, menningar-og fræðslumiðstöð staðarins í dag.

Alls tóku 17 börn og unglingar þátt í mótinu og tefldar voru 7 umferðir. Keppnin var jöfn og spennandi allt frá upphafi til enda.

Tinna og Elsa fengu sex vinninga og fast á hæla þeirra komu þau Páll Andrason UMSK og Sigríður Björg Helgadóttir Umf. Fjölni með 5 vinninga. Umsjón með mótinu hafði skákdeild Fjölnis og skákstjóri var Helgi Árnason. Davíð Kjartansson skákmeistari úr Fjölni mun tefla fjöltefli á landsmótinu í stóra tjaldinu á mótsvæðinu.

Lokastaða efstu manna:

1-2        Tinna Kristín Finnbogadóttir       UMSB               6  vinningar
             Elsa María Þorfinnsdóttir          ÍBR
 
3-4        Sigríður Björg Helgadóttir           Fjölni                5  vinningar
            Páll Andrason                           UMSK         
 
5-9        Davíð Þór Jónsson                    UMSK               4 vinningar
            Auður Eiðsdóttir                        UMSB
            Emil Sigurðsson                        HSK
            Hulda Rún Finnbogadóttir          UMSB
            Einar Bjarni Björnsson               USAH

Heimasíða unglingalandsmótsins

Tvö töp hjá Róberti

FIDE-meistarinn Róbert Harðarson (2315) átti ekki góðan í AM-flokki skákhátíðirnar í Olomouc í Tékklandi en hann tapaði báðum skákum dagsins.   Róbert hefur 1,5 vinning að loknum fjórum umferðum.

Í 3. umferð tapaði hann fyrir tékkneska alþjóðlega meistaranum Vladimir Talla (2430) og í þeirri fjórðu fyrir úkraínska FIDE-meistaranum Andrey Baryshpoltes (2307).    

Meðalstig flokksins eru 2297 og 8 vinninga þarf í 11 skákum til að ná áfanga að alþjóðlegum meistaratitli.

• Heimasíða Olomouc-mótisns
• Chess Results (Olomouc)

Héðinn þarf 1½ vinning í 2 skákum til að verða stórmeistari

Alþjóðlegi meistarinn Héðinn Steingrímsson (2470) þarf 1½ vinning í lokaumferðunum tveimur á alþjóðlegu skákmóti sem fram fer í Mladá Boleslav í Tékklandi til að ná sínum lokaáfanga að stórmeistaratitli.  Sjötta og sjöunda umferð fóru fram í dag og fékk Héðinn 1½ vinning í þeim.  Héðinn er efstur með 5½ vinning. 

Í sjöttu umferð gerði hann jafntefli við tékkneska alþjóðlega meistarann Petr Neuman (2437) en í sjöundu umferð vann hann Tékkann Jan Sodoma (2334).

Héðinn á reyndar erfiða andstæðinga eftir.  Í áttundu og næstsíðustu umferð, sem fram fer á morgun, teflir hann við stigahæsta keppenda mótsins, tékkneska stórmeistarann Radoslaw Jedynak (2540) og í lokaumferðinni sem fram fer á sunnudag teflir hann við Þjóðverjann Sebastian Plischki (2397) en þessir tveir eru einmitt í 2. og 3. sæti, sá fyrrnefndi með 4½ vinning og sá síðarnefndi með 4 vinninga.

• Heimasíða mótsins
• Chess-Results 

Ísland með á ólympíuskákmóti 16 ára og yngri í fyrsta skipti í 10 ár

 

Eftir 10 ára hlé mun íslensk sveit keppa á Ólympíuskákmóti 16 ára og yngri nú í ár. Mótið verður haldið í Singapore en þar munu leiða saman hesta sína 36 sveitir frá fjölmörgum löndum dagana 5.-11. ágúst næstkomandi.

Ísland tók síðast þátt í mótinu árið 1997 en árangur sveitarinnar þótti einstaklega góður árið 1995 þegar Ísland hampaði ólympíumeistaratitlinum öllum að óvörum. Voru þá margir efnilegir skákmenn í sveit Íslands en sveitina skipuðu Jón Viktor Gunnarsson, Bragi Þorfinnsson, Bergsteinn Einarsson, Björn Þorfinnsson og Einar Hjalti Jensson.   Fararstjóri drengjanna þá var Haraldur Baldursson.

Gaman er að benda á skemmtilegt viðtal við þá Þorfinnssyni, sem birtist í Morgunblaðinu, að mótinu loknu.   

Sveitin í ár er ekki skipuð síður efnilegri mönnum en ljósmyndari Morgunblaðsins tók mynd af köppunum á dögunum. Frá vinstri eru þeir Ingvar Ásbjörnsson, Helgi Brynjarsson, Matthías Pétursson, Daði Ómarsson og Sverrir Þorgeirsson. Allir eru drengirnir 16 ára og því á síðasta ári en liðstjóri sveitarinnar er Torfi Leósson. Sveitin hefur í sumar undirbúið sig að krafti undir mótið en Skákskóli Íslands hefur séð um undirbúninginn.

Sveitin er sú 12. sterkasta af 36 sveitum en í íslensku sveitina vantar Hjörvar Stein Grétarsson, okkar sterkasta mann í þessum aldursflokki.

Skák.is mun fylgjast vel með mótinu og mun Torfi liðsstjóri blogga reglulega á Skák.is og senda myndir frá mótinu. 

Mynd: Stöðumyndin sem hluti sést af er úr frægri skák í heimsmeistaraeinvígi.   Spurt er úr hvaða einvígi?  Svör má setja sem athugasemdir! 

Áfram Ísland!

Skák.is á nýjum stað!

Skákvefurinn Skák.hefur nú flutt sig um set og verður framvegis á blogghluta Morgunblaðsvefjarins, mbl.is. Vefurinn verður sem fyrr á slóðinni skak.is en mun frá og með breytingunni áframsendast á slóðina skak.blog.is.

Á Skák.is hefur megináherslan verið lögð á innlendar skákfréttir og fylgst glögglega með íslenskum skákmönnum þegar þeir hafa teflt á erlendri grundu. Einnig hefur verið fylgst með stærri erlendum viðburðum.

Ritstjóri vefjarins er Gunnar Björnsson en hann hefur ritstjóri frá upphafi, nánar tiltekið frá 1. apríl 2000. Vefurinn er nú rekinn af Skáksambandi Íslands en var upphaflega hluti af Strikinu.  

Þann 5. ágúst nk. hefst í Singapore ólympíuskákmót 16 ára og yngri þar sem Ísland mun taka þátt í fyrsta skipti 10 ár en mótið mun standa til 11. ágúst.  Torfi Leósson fararstjóri krakkanna mun blogga reglulega frá skákstað á vefinn.       


Rétt er að benda á eftirfarandi á vinstri hluta heimasíðunnar:

• Myndaalbúm: Hér verða myndasöfn frá ýmsum viðburðum.  Fyrsta myndaalbúmið verður frá Singapore þar sem Torfi Leósson ætlar að senda myndir frá mótinu.
• Færsluflokkar: Allar fréttir fara í „spil og leikir“ en auk þess verða fréttir sundurliðaðar enn frekar lesendum til hægðarauka.
• Tenglarnir: Hér verða tenglar yfir viðburði sem eru í gangi hverju sinni.  Þessi tenglar verða síbreytilegir en aðrir tenglar munu ekki breytast mikið. 

Morgunblaðið og Skák.is vænta góðs af samvinnu þessara miðla. Leit.is er þökkuð góð samvinna síðustu mánuði.  

Ritstjóri vonar að skák- og skákáhugamenn muni koma til með að kunna vel við gamlan vef á nýjum stað! 

Bragi skrifar um Politiken Cup

Alþjóðlegi meistarinn Bragi Þorfinnsson hefur skrifað pistil um Politiken Cup, sem fram fór í Danaveldi í lok júlímánaðar en alls tóku 26 Íslendingar þátt í því móti!  

Skemmtilegan og fjörlegan pistil hans má finna á vef Hellis á Moggablogginu. 

Moggabloggsíða Hellis