Þrettán lið taka þátt í Hraðskákkeppni taflfélaga

Alls taka 13 lið þátt í Hraðskákkeppni taflfélaga og er um að ræða metjöfnun í þátttöku.  Í morgun, var dregið hvaða lið mætast lið mætast í 1. og 2. umferð en drátturinn fór fram í höfuðstöðvum Landsbankans í umsjón Ólafs Ásgrímssonar.   Fyrstu umferð á að vera lokið þann 20. ágúst og 2. umferð á að vera lokið 31. ágúst.

1. umferð (fyrrnefnda liðið á heimaleik):

• ·         Kátu biskuparnir – Taflfélag Garðabæjar
• ·         Taflfélag Akraness – Skákfélag Akureyrar
• ·         Skákdeild KR – Skáksamband Austurlands
• ·         Skákfélag Reykjanesbæjar – Skákdeild Fjölnis
• ·         Skákfélag Selfoss og nágrennis – Taflfélag Bolungarvíkur

Taflfélag Reykjavíkur, Taflfélagið Hellir og Skákdeild Hauka komast beint í 2. umferð.

2. umferð (fyrrnefnda liðið á heimaleik):

• ·         Taflfélagið Hellir – Skákdeild KR/Skáksamband Austurlands
• ·         Kátu biskuparnir/Taflfélag Garðabæjar – Taflfélag Reykjavíkur
• ·         Skákdeild Hauka – Skákfélag Selfoss og nágrennis/Taflfélag Bolungarvíkur
• ·         Taflfélag Akraness/Skákfélag Akureyrar – Skákfélag Reykjanesbæjar/Skákdeild Fjölnis

Hraðskákkeppni taflfélag hefur farið fram síðan 1995 og hefur verið í umsjón Taflfélagsins Hellis frá upphafi.  Núverandi meistari er Taflfélag Reykjavíkur en Hellismenn hafa verið sigursælastir í keppninni og unnið hana alls 6 sinnum, TR-ingar hafa unnið fjórum sinnum en Skákfélag  Hafnarfjarðar og Hrókurinn sigruðu einu sinni hvort félag.

Fylgst verður með gangi máli á Skák.is og á heimasíðu Hellis.

Lágmarkssigur á Japan

Íslenska sveitin virðist föst í einhverju miðjumoði um mitt ólympíumótið hér í Singapore.  Úrslitin eru ýmist 2,5-1,5 eða 1,5-2,5. 

Viðureign okkar í dag, gegn Japan, hófst reyndar vel, en bæði Daði og Helgi unnu á innan við 2 tímum.  Skák Helga var t.a.m. aðeins 18 leikir.

Hinar tvær skákirnar voru hinsvegar langar og þar reyndust Japanarnir fastari fyrir.

Á 1. borði lenti Sverrir snemma í hálfgerðri beyglu snemma.  Hann varðist þó af þolinmæði, en afréð að lokum að gefa tvö peð til að virkja menn sína og einfalda stöðuna.  Japaninn tefldi bara allt of vel og sigurinn lenti hans megin. 

Enn lengri var skák Matta á 4. borði, en í jafnri stöðu gerði hann þau mistök að vanmeta færi andstæðingsins.  Á mikilvægu augnabliki fann Japaninn ekki leið sem hefði getað haldið pressunni gangandi og Matti nýtti tækifærið til að einfalda stöðuna og upp kom jafnteflislegt endatafl sem keppendur sömdu á. 

Sem sagt:  

Ísland - Japan 2,5-1,5 

Af öðru er það að segja að Indverjarnir eru gjörsamlega að strauja mótið.  Þeir unnu Ungverja, stigahæstu sveitina, 3,5-0,5 í gær og svo Tyrki með sama mun í morgun.

Indverjarnir eru nú með 19 vinninga eftir sex umferðir og þriggja vinninga forskot á næstu sveit.  Enda hefur það komið í ljós að það er ekki allt að marka stigin hjá krökkunum.

Filippseyingar eru t.d. með þrjá stigalausa á 2.-4. borði en eru samt í 2. sæti með 16 vinninga.  Á fyrsta borði er síðan undrabarnið Wesley So, AM með 2516 sem ég held að eigi stutt eftir í SM-titilinn.

Torfi Leósson

Sigur gegn Japan

Íslenska liðið vann sigur á japönsku liði 2,5-1,5 í 6. umferð ólympíuskákmóts 16 ára og yngri, sem fram fór í nótt.   Daði Ómarsson og Helgi Brynjarsson unnu sínar skákir, Matthías Pétursson gerði jafntefli en Sverrir Þorgeirsson tapaði.

Sveitin er nú í 16. sæti með 12,5 vinning af 24 mögulegum.  Indverjar leiða á mótinu, hafa 19 vinninga.  

Í 7. umferð, sem fram fer síðar í dag, teflir íslenska sveitin við suður-afríska sveit.

Torfi Leósson mun án efa gera umferðinni í morgun betur skil hér síðar í dag.

 

• Heimasíða mótsins
  
• Chess-Results

Róbert gerði jafntefli í 8. umferð

FIDE-meistarinn Róbert Harðarson (2315) gerði sitt annað jafntefli í röð er hann samdi um skiptan hlut við úkraínska alþjóðlega meistarann Maxim Chetverik (2347).  Róbert hefur 5,5 vinning og er í 4.-5. sæti.  

Möguleikar Róberts á að ná sínum lokaáfanga að alþjóðlegum meistaratitli eru nú endanlega fyrir bý en engu að síður er frammistaða Róbers góð.   

 

• Heimasíða Olomouc-mótisns
• Chess Results (Olomouc)

Gremjulegt tap fyrir Bandaríkjunum

Ekki fór alveg jafn vel gegn bandaríska liðinu í dag eins og ég hafði gert mér vonir um.

Daði vann reyndar góða skák í Drekaafbrigðinu í Sikileyjarvörn, rétt eins og í 4. umferð fyrr um daginn!  Þetta verður eflaust til að gleðja ritstjóra skak.is.

Ingvar tefldi á 1. borði í þessari umferð og virtist vera að vinna glæsilegan sigur þegar allt snerist skyndilega í höndunum á honum og Bandaríkjamaðurinn hafði sigur.  Sennilega missti Ingvar af sigri þarna einhvers staðar.

Á 3. borði tefldi Helgi þunga skák.  Hann var lengi peði undir, en andstæðingur hans náði ekki að komast neitt áfram og jafntefli varð niðurstaðan.

Matti lenti hinsvegar í vandræðum snemma í sinni skák og andstæðingur hans tefldi þar að auki vel.  Tapið reyndist ekki vera umflúið.

Úrslitin urðu því gremjulegt 1,5-2,5 tap.

Íslenska liðið er með 10 vinninga úr 20 skákum.

Ef til vill var það slæmur fyrirboði að við skyldum hitta bandaríska þjálfarann kl.07.00 um morguninn á líkamsræktarstöð hótelsins, en við höfum hafið alla morgna á snöggri líkamsrækt.

Torfi Leósson

Sigur í 4. umferð

Eftir útreiðina gegn Indverjum í gær voru menn ekkert yfir sig bjartsýnir fyrir viðureignina í morgun sem var gegn Malasíu.  Sveit Malasíu hafði m.a. náð 1,5 vinningi gegn Ungverjum, sem eru hæst skrifaðir á pappírunum.

 

En þetta fór þó frekar vel.  Daði átti góða skák í dag og vann örugglega á 3. borði.  Helgi vann sömuleiðis á 4. borði, en andstæðingur hans lék hratt, en ekki alltaf vel.

 Á 1. og 2. borði var róðurinn þyngri, en þar höfðu Malasíumenn einmitt náð 1,5 gegn Ungverjum.  Það fór líka svo gegn okkur.  Ingvar gerði jafntefli á 2. borði í skák þar sem báðir skiptust á að vera með aðeins betra.

Sverrir lenti hinsvegar í löngum og erfiðum svíðingi, sem lauk með sigri Malasíudrengsins.

 

Sem sagt: Ísland - Malasía 2,5-1,5.

 

Torfi Leósson

Hraðskákkeppni taflfélaga að hefjast - skráningarfrestur að renna út

Hraðskákkeppni taflfélaga mun hefjast að lokinni verslunarmannahelgi en skráningarfrestur rennur út á morgun 7. ágúst.   Átta félög hafa skráð sig til leiks og eru áhugasöm félög hvött til að skrá sig eigi síðar en á morgun þriðjudag en dregið verður í 1. umferð á miðvikudagsmorgun. 

Eftirfarandi átta félög hafa skráð sig til leiks:

• Taflfélagið Hellir
• Taflfélag Garðabæjar
• Skákdeild KR
• Skáksamband Austurlands
• Skákdeild Hauka
• Taflfélag Reykjavíkur
• Skákfélag Akureyrar
• Skákfélag Reykjanesbæjar

Enn vantar fastagesti eins og Taflfélag Vestmannaeyja, Skákdeild Fjölnis, Taflfélag Bolungarvíkur og  Taflfélag Akraness.

Einnig að hvetja þau félög sem ekki hafa tekið áður þátt til að vera með eins og t.d. Kátu biskupana.  Lítið mál að taka þátt enda útsláttarkeppni og sex skákmenn í hverri viðureign.  

Dagskráin er sem hér segir:

1. umferð (U.þ.b. 12 liða úrslit): Skuli vera lokið um 20. ágúst
2. umferð (8 liða úrslit): Skuli vera lokið 31. ágúst
3. umferð (undanúrslit): Skuli vera lokið 10. september.
4. umferð (úrslit): Skuli vera lokið 20. september.   

Forráðamenn taflfélag eru hvattir til að hafa samband við Gunnar Björnsson í netfangið [e-mail] eða símleiðis 820 6533 fyrir miðnætti miðvikudaginn 7. ágúst.

Reglugerð mótsins er sem hér segir:

1. Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.

2. Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.

3. Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.

4. Ætlast er til þess að þeir sem tefli séu fullgildir meðlimir síns félags. Aðeins má tefla með einu taflfélagi í keppninni.

5. Liðsstjórar koma sér saman um hvenær er teflt og innan tímaáætlunar.

6. Keppnin fer fram á Stór-Reykjavíkursvæðinu.   Heimavöllur liða verður að vera innan 100 km. radíus frá Reykjavík nema að bæði félög samþykki annað.

7. Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.

8. Heimalið bjóði upp á léttar veitingar, t.d. kaffi, gos, kökur eða kex.

9. Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.

10. Úrslit keppninnar verða ávallt aðgengileg á heimasíðu Hellis, www.hellir.com, sem er heimasíða keppninnar, og á www.skak.is

11. Mótshaldið er í höndum Taflfélagsins Hellis sem sér um framkvæmd hennar

Góð frammistaða Omars í Danmörku

Omari Salama (2173) gekk vel á þremur skákmótinu sem hann tók þátt í Danaveldi síðustu vikur en alls hækkaði hann um 34 stig í þeim samtals.  Strax að loknu Politiken Cup hélt Omar til Börnholm þar sem hann tók þátt í Baltic Sea Cup.  Omar fékk 4,5 vinning í 9 skákum eftir klaufaleg töp í lokaumferðunum tveimur svo frammistaðan hefði getað verið enn betri.  

Efstir og jafnir með 7,5 vinning voru kúbanski stórmeistarinn Reynaldo Vera Gonzalez-Quevedo (2479) og danski FIDE-meistarinn Allan Stig Rasmussen (2450).   

Þess má geta að Omar tefldi 29 kappskákir á 24 dögum án þess að fá neinn einasta frídag!    

Fyrir þá sem þekkja til má nefna það Omar, sem er egypskur ríkisborgari, er eiginmaður nýkrýnds norðurlandameistara kvenna, Lenku Ptácníková, og er búsettur hérlendis.  

Baltic Sea Cup 2007 

Róbert gerði jafntefli

FIDE-meistarinn Róbert Harðarson (2315) gerði jafntefli við þýska skákmanninn Philipp Neerforth (2246) í 8. umferð skákhátíðinnar í Olomouc en fyrir skákina Róbert hafði unnið þrjár skákir í röð.  Róbert hefur 5 vinninga og er í 5. sæti.

Möguleikar Róberts á að ná sínum lokaáfanga að alþjóðlegum meistaratitli eru enn fyrir staðar þótt þeir séu litlir en til þess þarf hann vinna allar 3 skákirnar sem eftir eru.  

Meðalstig flokksins eru 2297 og 8 vinninga þarf í 11 skákum til að ná áfanga að alþjóðlegum meistaratitli. 

• Heimasíða Olomouc-mótisns
• Chess Results (Olomouc)

Stórsigur og stórtap í Singapore

Annar keppnisdagur á Ólympíumótinu hér í Singapore hófst með góðum sigri íslensku sveitarinnar á Zambíu í annarri umferð.

 

Leikar fóru 3-1 fyrir Ísland.

Sverrir og Ingvar unnu ótrúlega létt á 1. og 2. borði.  Matti vann sannfærandi á 4. borði en Helgi tapaði eftir að andstæðingur hans hafði séð lengra fram í tímann í taktískri stöðu.  Miðað við taflmennskuna grunar mig að Zambíumenn hafi stillt sínum besta manni upp á 3. borði, en það hef ég séð áður, t.d. hjá Hvít-Rússum á Evrópumóti skólasveita í fyrra.

Það þarf þó ekki að vera að neitt illt búi að baki.  Maður veit t.d. ekki hvernig aðstæður eru í Zambíu; kannski héldu þau úrtökumót fyrir sveitina þar sem tefldar voru 15 mínútna skákir.

 

Við vorum því í hæfilega góðu skapi þegar við mættum Indverjum í 3. umferð síðar um daginn.

Indverjarnir tefla stíft upp á sigur í þessu móti (en þeir hafa aldrei unnið það áður), en til þess að það gangi upp þarf yfirleitt hæfilegan skammt af heppni.

Segja má að þeir hafi tekið út úr þeim banka gegn okkur, því það féll fæst með okkur í dag.

Á 1. borði var andstæðingur Sverris byrjaður að leika kóngnum fram og til baka og átti lítinn tíma eftir.  Sverrir hefði sjálfsagt getað fengið jafntefli hefði hann viljað, en ákvað að reyna að gera eitthvað uppbyggilegt frekar.  Það virkaði hinsvegar ekki betur en svo en að hann lenti í allsvakalegri indverskri flugeldasýningu.  Merkilegt hvað Indverjinn var öruggur í taktíkinni, en hann lék flesta síðustu leikina sína eftir nokkurra sekúndna umhugsunartíma. 

Á 2. borði tapaði Ingvar eftir ónákvæma byrjunartaflmennsku, en hinsvegar hárnákvæma taflmennsku andstæðingsins og ekki mikið meira um það að segja.

Á 3. borði átti Daði hinsvegar hugsanlega vinning í endatafli - a.m.k. jafntefli.  Ég sá ekki nákvæmlega hvað gerðist, en eitthvað fór þetta í vitlausa átt hjá honum og tap var niðurstaðan.

 Á 4. borði tapaði Matti síðan eftir að hafa lent í taktík í stöðu sem ekki mikið virtist vera að gerast.  Síðan tapaði hann endatafli sem virtist þó bjóða upp á einhverja möguleika fyrir hann.

 

Sem sagt, verstu mögulegu úrslit 0-4

 

Torfi Leósson