Magnus Carlsen sigraði í Biel

Norski undradrengurinn Magnus Carlsen (2710) sigraði á sterku alþjóðlegu skákmóti sem lauk í dag í Biel í Sviss.   Í síðustu umferð vann Magnus Aserann Radjabov (2746), sem var efstur fyrir lokaumferðina, og varð efstur ásamt Bandaríkjamanninum Alexander Onichuk (2650).  Þeir tefldu svo einvígi með styttri tíma í kvöld og þarf hafði Magnús betur 3-2.  

 

 

Lokaröð efstu manna:

1. Magnus Carlsen (2710), Noregi, 5,5 v. af 9
2. Alexander Onichuk (2650), Bandaríkjunum, 5,5 v.
3.-6.  Yannick Pelletier (2583), Sviss, Judit Polgar (2707), Ungverjalandi, Alexander Grischuk (2726), Rússlandi, og Teimour Radjabov (2746) Azerbæjdan, 5 v.

Mynd: Carlsen og Onichuk að tafli í kvöld 

Heimasíða mótsins

Héðinn og Róbert að tafli í Tékklandi

Tveir íslenskir skákmenn sitja þessa dagana að tafli í Tékklandi.  Alþjóðlegi meistarinn Héðinn Steingrímsson (2470) tekur þátt í alþjóðlegu skákmóti í Mladá Boleslav og FIDE-meistarinn Róbert Harðarson (2315) teflir á skákhátíðinni í Olomouc.  Báðir hafa þeir byrjað vel.  Héðinn hefur 4 vinninga eftir 5 umferðir en Róbert hefur 1,5 vinning eftir 2 umferðir.

Báðir eru þeir að sækjast eftir því að ná lokaáfanga að meistaratitlum.  Héðinn er að berjast við að verða stórmeistari en Róbert stefnir að því að verða alþjóðlegur meistari. 

Héðinn þarf 7 vinninga í 9 skákum en Róbert þarf 8 vinninga í 11 skákum.

Í báðum mótunum fara fram 2 umferðir á morgun.

Mynd: Héðinn Steingrímsson að tafli í Kaupþing Open í Luxemborg sem fram fór í júlí en þar náði hann sínum öðrum stórmeistaraáfanga.   

• Heimasíða Mladá-mótsins
• Chess Results (Mladá)
  
• Heimasíða Olomouc-mótisns
• Chess Results (Olomouc)

Unglingalandsmót UMFÍ

Tíunda unglingalandsmót UMFÍ verður haldið á Höfn í Hornarfirði um verslunarmannahelgina. Keppt er í tíu íþróttagreinum og er skákin þar á meðal. Skákkeppnin fer fram laugardaginn 4. ágúst frá kl. 10.00 - 15.00. Verðlaunahafar í hverjum flokki fá verðlaunapeninga og allir keppendur fá keppnisgögn og ýmsan varning.

Keppt er í fjórum flokkum; 11-12 ára, 13-14 ára, 15-16 ára og 17-18 ára. Einnig verður boðið upp á fjöltefli kl. 17:00 á laugardegi. Á undanförnum landsmótum UMFÍ hafa margir af okkar efnilegustu skákmönn verið þátttakendur og keppnin  verið spennandi og skemmtileg.

Skákdeild Umf. Fjölnis mun hafa umsjón með skákkeppninni á landsmótinu en allar frekari upplýsingar er að finna á heimasíðu mótsins.

Heimasíða unglingalandsmótsins 

Áskorendaflokkur hefst 28. ágúst

Stjórn Skáksambands Íslands hefur ákveðið að keppni í áskorendaflokki 2007 fari fram dagana 28. ágúst – 5. september n.k. . Mótið mun fara fram á höfuðborgarsvæðinu.   Efstu tvö sætin gefa föst sæti í Landsliðsflokki að ári. 

Stjórn Skáksambands Íslands hefur ákveðið að keppni í áskorendaflokki 2007 fari fram dagana 28. ágúst – 5. september n.k. . Mótið mun fara fram á höfuðborgarsvæðinu.   Efstu tvö sætin gefa föst sæti í Landsliðsflokki að ári. 

Ákveðið hefur verið að sameina Unglingameistaramótið (u20 ára) og öldungaflokk áskorendaflokknum.  Mun sá sem efstur verður þeirra sem ella hefðu keppt í unglingaflokki hljóta titilinn “Unglingameistari Íslands 2007” og í verðlaun farseðil (á leiðum Flugleiða) á skákmót erlendis.  Sömu verðlaun verða í öldungaflokki.  Það er þó háð því að a.m.k. 5 keppendur verði í hvorum flokki.

Dagskrá:

Þriðjudagur  28. ágúst  kl. 18.00  1. umferð
Miðvikudagur  29. ágúst  kl. 18.00  2. umferð
Fimmtudagur  30. ágúst  kl. 18.00  3. umferð
Föstudagur  31. ágúst  kl. 18.00  4. umferð
Laugardagur  1. september  kl. 14.00  5. umferð
Sunnudagur  2. september  kl. 14.00  6. umferð
Mánudagur  3. september  kl. 18.00  7. umferð
Þriðjudagur  4. september  kl. 18.00  8. umferð
Miðvikudagur  5. september  kl. 18.00  9. umferð

Umhugsunartími: 

90 mín. + 30 sek. til að ljúka.

Verðlaun:

1. 50.000.-
2. 30.000.-
3. 20.000.-

Aukaverðlaun:

U-2000 stigum 10.000.-
U-1600 stigum 10.000.-
U-16 ára  10.000.-
Kvennaverðlaun 10.000.-
Fl. stigalausra  10.000.-

Lenka norðurlandameistari í skák!

Lenka Ptácníková (2239) sigraði norska skákkonuna Torill Skytte (1999) í 11. og síðustu umferð Norðurlandsmótsins í skák, sem fram fór í morgun.  Með sigrinum tryggði Lenka sér titilinn skákmeistari norðurlanda kvenna og heldur því titlilinum sem hún vann Finnlandi 2005.  Lenka var taplaus á mótinu og hlaut 9,5 vinning í 11 skákum!

Lokastaðan:

1. Lenka Ptácníková (2239) 9,5 v. af 11
2. Christin Andersson (2139), Svíþjóð, 9 v.
3.-4. Svetlana Agrest (2276), Svíþjóð, og Oksana Vovk (2164), Danmörku 7 v.
5. Inna Agrest (2085), Svíþjóð, 6,5 v.
6. Silja Bjerke (2196), Noregi, 5,5 v.

Þetta er í sjötta sinn sem íslensk kona verður skákmeistari norðurlanda.   Guðlaug Þorsteinsdóttir hampaði titlinum 1975, 1977 og 1979 og Sigurlaug R. Friðþjófsdóttir árið 1981 en svo var 24 ára hlé þar til Lenka hampaði titlinum árið 2005.  

Mynd: Lenka að tafli í mótinu. 

• Politiken Cup
• Skákir í beinni

TV tekur þátt í fyrstu deild

Stjórn Taflfélags Vestmannaeyja ákvað á fundi sínum í gær að félagið muni taka sæti sitt í 1. deild Íslandsmóts skákfélaga en vegna breyttra áhersla í starfi félagins hafði stjórnin á fundi 5. júní s.l. ákveðið að draga lið félagsins úr keppni í 1 deild.  Meðal annars vegna þess að ákveðið var að draga úr kostnaði við erlenda keppendur félagsins og leggja meiri áherslu á framfarir innan félagsins.

Fljótlega var ljóst að margir félagsmenn voru ósáttir við þessa ákvörðun og hefur stjórnin staðið í viðræðum við fjölmarga félagsmenn að undanförnu og niðurstaðan varð sú á stjórnarfundi í gær að félagið mun senda fullmannað lið í 1. og 3. deild Íslandsmóts taflfélaga í haust, enda hefur stjórn SÍ góðfúslega beðið með að taka formlega afstöðu í málinu svo ráðrúm gæfist til að skoða málið frá öllum hliðum.

Stjórn TV væntir þess að félagsmenn standi saman um að styrkja félagið til framtíðar og vil koma þökkum til þeirra fjölmörgu sem hafa sýnt starfi þess mikinn áhuga að undanförnu.

Jóhann Hjartarson í Helli

Stigahæsti skákmaður landsins, Jóhann Hjartarson (2596), er genginn til liðs við Íslandsmeistara Taflfélagsins Hellis en síðustu ár hefur Jóhann verið í Skákfélagi Akureyrar. 

Jóhann, er fimmfaldur íslandsmeistari í skák, og hefur marfgoft teflt fyrir Íslands hönd á ólympíuskákmótum og oftar en ekki á fyrsta borði.  Jóhann lagði Victor Korchnoi að velli í frægu einvígi árið 1988 í St. John í Kanada.  

Jóhann er auk þess margfaldur Íslandsmeistari skákfélaga en hann vann titilinn tvívegis með Hróknum og margoft með Taflfélagi Reykjavíkur hér fyrr á árum.