Gallerý Skák: Stefán - kom sá og sigraði

Þröngt var á þingi í gærkvöldi þegar Jólakappmót Gallerý Skákar var háð í Listasmiðjunni, Bolholti.  Þátttakendur hafa aldrei verið fleiri eða alls 26 talsins - því varða að tefla í listaverkageymslunni líka - svo allir kæmust fyrir.

Eftir tvísýna baráttu þar sem Kristinn Bjarnason leiddi óvænt lengst framan af - seig Stefán Bergsson fram úr öðrum keppendum á lokasprettinum og vann mótið með minnsta mun eða hálfum vinningi, hlaut 9 vinninga af 11 mögulegum. Fast á hæla honum kom svo bankastjórinn fyrrverandi, Kristinn, og Jón G. Friðjónsson, prófessor, með 8.5 v. Nokkuð bil var í næstu 2 keppendur, þá Guðfinn R. Kjartansson og Gísla Gunnlaugsson eða 1.5 v, en síðan skyldi aðeins 1 vinningur að keppendur í 6. - 17. sæti, enda geta allir unnið alla í þessum hópi á góðum degi.  

Stefán, sem er framkvæmdastjóri Skákakademíu Reykjavíkur og kennir því skák meira en hann teflir, var að sjálfsögðu ánægður með árangur sinn, en kvað þó lukkudísirnar hafa verið sér óvenju hliðhollar að þessu sinni. Þrátt fyrir að loft væri lævi blandið á stundum sveif samt góður jólaandi sveif yfir vötnunum og menn voru ekki að berja hvern annan niður á tíma í jafnteflisstöðum eins og því miður oft gerist þegar keppnisharkan ber menn ofurliði.

Veglegir vinningar voru í mótinu og verðugar viðurkenningar til sumra veittar í mótslok.

Þrettándamót Gallerýsins verður haldið fimmtudaginn 5. janúar á sama stað og tíma, þe. kl. 18-22, næg bílastæði.

 Meira á www.galleryskak.net.

Myndaalbúm (ESE)

Glöggur Gunnar

Gunnar Björnsson forseti Skáksambands Íslands sigraði í Jólaskákgetraun Skáklandsins.

Forsetinn hefur starfað lengi innnan skákhreyfingarinnar og þekkir því síðustu áratugi vel og hefur vísast einnig nýtt sér hinar ýmsu uppflettiaðferðir sem til eru í tæknivæddum heimi.

Gunnar hlýtur að launum skákbók og taflsett frá Skákakademíu Reykjavíkur.

Skáklandið

Jólabikarmót Hellis fer fram í dag

Jólabikarmót Hellis fer fram föstudaginn 30. desember nk og hefst taflið kl. 19.30. Fyrirkomulagið verður þannig að tefldar verða hraðskákir með fimm mínútna umhugsunartíma og eftir Monrad kerfi. Eftir fimm töp falla keppendur úr leik. Þannig verður teflt þangað til einn stendur eftir og allir andstæðingarnir fallnir úr leik. Teflt er í félagsheimili Hellis í Álfabakka 14a í Mjóddinni.

Þrír efstu fá bikara í verðlaun. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Davíð Kjartansson Íslandsmeistari í netskák

FIDE-meistarinn Davíð Kjartansson varð í gær Íslandsmeistari í netskák annað árið í röð og í þriðja sinn.  Davíð varð jafni Arnari E. Gunnarssyni að vinningum en hafði betur í úrslitaeinvígi, 2-0.  Rúnar Sigurpálsson og Ingvar Þór Jóhannesson urðu jafnir í 3. sæti.

Alls tóku 63 skákmenn þátt í mótinu sem er þar með fjölmennasta mótið þessi jól.  Það var Taflfélagið Hellir sem stóð fyrir mótinu.

Á morgun eru væntanleg úrslit í einstaka stigaflokkum.

Röð efstu manna:

• 1.-2. Davíð Kjartansson og Arnar E. Gunnarsson 7½ v.
• 3.-4. Rúnar Sigurpálsson og Ingvar Þór Jóhannesson 7 v.
• 5.-7. Arnar Þorsteinsson, Guðmundur Gíslason og Erlingur Þorsteinsson 6½ v,
• 8.-12. Lenka Ptácníková, Róbert Lagerman, Áskell Örn Kárason, Tómas Veigar Sigurðarson og Sigurbjörn Björnsson 6 v.

Omar Salama hafði umsjón með mótinu.

 

Henrik efstur í Kaupmannahöfn

Stórmeistarinn Henrik Danielsen (2542) vann FIDE-meistarann Per Andreasen (2251) í fimmtu umferð CXU-nýársmótsins sem fram fór í kvöld.  Henrik er einn efstur með 4½ vinning.

Á morgun eru tefldar tvær síðustu umferðirnar.  Sú fyrri hefst kl. 12 og þá mætir Henrik stórmeistaranum Jonny Hector (2573) og sú síðari kl. 18.  Báðar skákir Henriks verða sýndar beint.

Henrik er næststigahæstur keppenda á eftir Jonny Hector (2573). 

• Heimasíða mótsins (beinar útsendingar)
• Mótstafla

 

Guðmundur vann í 2. umferð í Hastings

Alþjóðlegi meistarinn Guðmundur Kjartansson (2326) vann enska skákmanninn John Sugden (2180)í 2. umferð Hastings-mótsins sem fram fór í dag.  Guðmundur hefur 1 vinning.   Í þriðju umferð, sem fram fer á morgun, teflir hann við Englendinginn Adrian Pickersgill (1990).

116 skákmenn taka þátt í Hastings.  Þar á meðal eru 13 stórmeistarar.  Guðmundur er nr. 30 í stigaröð keppenda. 

• Heimasíða mótsins 
• Beinar útsendingar (kl. 14:15)
  

Daði Ómarsson sigraði með yfirburðum á Jólahraðskákmóti TR

Hart var barist á fjölmennu og sterku Jólahraðskákmóti TR í gær - þó ekki um fyrsta sætið, því Daði Ómarsson var í fantaformi; búinn að tryggja sér sigur fyrir síðustu umferð og vann síðan mótið með fullu húsi. Því meiri var baráttan um annað sætið en sex voru jafnir með einn og hálfan vinning niður, þegar níunda og síðasta umferð hófst. Hlutskarpastur þar varð hinn ungi og bráðefnilegi Vignir Vatnar Stefánsson og skaut þar með mörgum hraðskákareynsluboltanum aftur fyrir sig eins og sjá má á meðfylgjandi lokaröð. Í 3. sæti varð svo Arnaldur Loftsson sem hafði betur í innbyrðis viðureign við bróður sinn Hrafn, í síðustu umferðinni.

• 1   Daði Ómarsson                               9      
•  2-3  Vignir Vatnar Stefánsson             6.5     
•       Arnaldur Loftsson                           6.5     
•   4   Jóhann Ingvason                           6       
• 5-11  Hrafn Loftsson                             5.5    
•       Páll Andrason                                 5.5    
•       Birkir Karl Sigurðsson                     5.5    
•       Örn Leó Jóhannsson                      5.5    
•       Guðmundur K. Lee                         5.5    
•       Vilhjálmur Pálmason                       5.5     
•       Kristján Örn Elíasson                      5.5    
• 12-15 Eggert Ísólfsson                          5       
•       Jon Olav Fivelstad                          5       
•       Jón Úlfljótsson                                5       
•       Gauti Páll Jónsson                         5       
• 16-17 Kristófer Ómarsson                    4.5    
•       Atli Jóhann Leósson                       4.5    
• 18-22 Elsa María Kristínardóttir            4       
•       Sigurlaug R. Friðþjófsdóttir             4       
•       Leifur Þorsteinsson                        4       
•       Áslaug Kristinsdóttir                       4       
•       Hilmir Hrafnsson                            4       
•  23   Hilmir Freyr Heimisson                3.5    
• 24-27 Donika Kolica                            3      
•       Björgvin Kristbergsson                  3       
•       Óskar Long Einarsson                  3      
•       Arnar Ingi Njarðarsson                  3      
•  28   Mikael Kravchuk                         2.5     
•  29   Pétur Jóhannesson                    1.5     
•  30   Bjarki Arnaldarson                    0      

Myndir væntanlegar

Mikael Jóhann yfirjólasveinn SA

Jólahraðskákmót SA var háð í gærkveldi. Tíu jólasveinar mættu til leiks og tefldu tvöfalda umferð. Sigurvegarinn leyfði aðeins tvö jafntefli og vann mótið með fáheyrðum yfirburðum. Hann hlaut að launum vænan flugeldapakka sem gæti komið að góðum notum á gamlaárskvöld.

Lokastaðan:

• 1. Mikael Jóhann Karlsson       17
• 2. Áskell Örn Kárason              13,5
• 3. Jón Kristinn Þorgeirsson      12
• 4.-5. Tómas Veigar Sigurðarson og
• Sigurður Arnarson                    10
• 6. Sigurður Eiríksson                  9
• 7. Haki Jóhannesson                 8
• 8. Andri Freyr Björgvinsson       4,5
• 9. Karl E Steingrímsson             3,5
• 10. Ari Friðfinnsson                    2,5

Næsta stórmót í Skákheimilinu verður nýjársmótið alkunna. Það hefst kl. 14 á nýjársdag.

Volcano mótið á gamlársdag

Á gamlársdag fer fram hið árlega Volcano skákmót í Vestmannaeyjum, en þetta mót er 4 ára gamalt og hefur verið haldið í samstarfi við Volcano veitingahúsið í Vestmannaeyjum.  Að venju eru allir velunnarar félagsins velkomnir og hefst það kl. 13:00 á veitingastaðnum Volcano við Strandveg í Vestmannaeyjum.  Verðlaun verða pizzuúttektir á veitingastaðnum og fleira.

Nánari upplýsingar um mótið má finna á heimasíðu TV.  Þar er einnig spáð í framtíðina með völvu félagsins!

Heimasíða TV

Guðmundur tapaði fyrir Wang Yue í fyrstu umferð

Alþjóðlegi meistarinn Guðmundur Kjartansson (2326) tapaði fyrir kínverska stórmeistaranum Wang Yue (2697) í fyrstu umferð alþjóðlega mótsins í Hasting sem fram fór í gær.  

Í 2. umferð sem nú er í gangi teflir Guðmundur við Englendinginn John Sugden (2180). 

116 skákmenn taka þátt í Hastings.  Þar á meðal eru 13 stórmeistarar.  Guðmundur er nr. 30 í stigaröð keppenda. 

• Heimasíða mótsins 
• Beinar útsendingar (kl. 14:15)