Jafntefli í fimmtu einvígisskák Kramnik og Aronian

Kramnik (2801) og Aronian (2820) gerðu jafntefli í fimmtu og næstsíðustu skák vináttueinvígis þeirra sem fram fer í Zurich í Sviss.  Staðan er nú 2,5-2,5.  

Sjötta og síðasta skák einvígisins fer fram á morgun og hefst kl. 11. 

Heimasíða einvígisins

Magnús Geir skólameistari Vesturbæjarskóla

Magnús Geir Kjartansson sigraði með fullu húsi á Meistaramóti Vesturbæjarskóla 2012, hlaut 6 vinninga af 6 mögulegum. Ásgeir Beinteinn Árnason hreppti 2. sætið og Steingrímur Stefánsson hlaut bronsið.

Hinn nýbakaði skólameistari hefur verið fastur liðsmaður í sveit Vesturbæjarskóla í vetur, rétt einsog Ásgeir og systkini hans sem eru í skólanum. Þannig hefur Svava Árnadóttir verið oddviti í stúlkusveit skólans.

Skákklúbbur var stofnaður í skólanum fyrr í vetur og er formaður hinn kornungi félagsmálafrömuður Kristján Gabríel Þórhallsson, en hann hafði áður stofnað skákklúbb í Landakotsskóla. Æfingar eru hjá klúbbnum tvisvar í viku, á þriðjudögum og fimmtudögum.

Þá hefur í vetur verið vikuleg kennsla fyrir 3. bekkinga, í umsjón Stefáns Bergssonar framkvæmdastjóra Skákakademíu Reykjavíkur og Róberts Lagerman skákmeistara.

Þá hefur Hallgrímur Sveinn Sævarsson stuðningsfulltrúi við Vesturbæjarskóla verið ómissandi hjálparhella við að byggja upp skáklífið í skólanum, auk þess að aðstoða við barna- og ungmennaæfingar KR í Frostaskjóli á miðvikudögum en þangað mæta krakkar úr öllum skólum Vesturbæjar.

Myndaalbúm (HJ og HSS)

Skákþing Norðlendinga fer fram á Akureyri 25.-28. maí

Skákþing Norðlendinga 2012

Akureyri 25.-28. maí 2012

150 ára afmælismót Akureyrarkaupstaðar

100 ára afmælismót Júlíusar Bogasonar skákmeistara

Skákþingið hefur verið haldið árlega frá 1935 og er nú háð í 78. sinn.  Sérstaklega verður vandað til mótshaldsins nú í tilefni af því að 150 ár eru liðin frá því Akureyrarbær öðlaðist kaupstaðaréttindi. Þá er með mótshaldinu þess minnst að í ár eru 100 ár liðin frá fæðingu Júlíusar Bogasonar skákmeistara. Júlíus varð skákmeistari Akureyrar 19 sinnum og  5 sinnum skákmeistari Norðlendinga.

Teflt verður í félagsheimili Skákfélags Akureyrar, Íþróttahöllinni við Skólastíg (gengið inn að vestan).  

Dagskrá:

Tefldar verða 7 umferðir eftir svissnesku kerfi, 3 atskákir og 4 kappskákir.  

Föstudagur 25. maí kl. 20.00: 1.-3. umferð. Atskák, 25 mín/mann.
Laugardagur 26. maí kl. 10.00: 4. umferð. Kappskák, 90 mín + 30 sek/leik.
Laugardagur 26. maí kl. 16.00: 5. umferð. Kappskák, 90 mín + 30 sek/leik.
Sunnudagur 27. maí kl. 13:00: 6. umferð. Kappskák, 90 mín + 30 sek/leik.
Mánudagur 28. maí kl. 10.00: 7. umferð. Kappskák, 90 mín + 30 sek/leik.

Mánudagur 28. maí kl. 14.30: Hraðskákmót Norðlendinga.

Mótið verður reiknað til íslenskra skákstiga og til FIDE-skákstiga.

Keppni í kvennaflokki fer fram laugardaginn 26. maí og hefst kl. 10.00. Þetta að því tilskildu að næg þátttaka fáist. Lágmark er 6 keppendur svo mótið fari fram. Tefldar verða atskákir, 5-7. umferðir.  

Þátttökugjald:   kr. 4000 fyrir 17 ára og eldri, kr. 2000 fyrir 16 ára og yngri.  Þátttaka í hraðskákmótinu er innifalin. Þeir sem einungis tefla í hraðskákmótinu greiða kr. 500 fyrir þátttökuna.  Þátttökugjald í kvennaflokki kr. 1000.

Verðlaun: Verðlaunafé verður að lágmarki kr. 150.000, þar af kr. 40.000 í fyrstu verðlaun. 

Öllum er heimil þátttaka á mótinu, en aðeins þátttakendur með lögheimili á Norðurlandi geta unnið þá meistaratitla sem teflt verður um, þ.e. Skákmeistari Norðlendinga, (í meistaraflokki, kvennaflokki og unglingaflokki) og Hraðskákmeistari Norðlendinga.  

Skráning:  í netfangið [e-mail] og er skráningarfrestur til miðnættis 24. maí. Þeir sem mæta til leiks eftir að skráningarfrestur er liðinn geta ekki verið vissir um að fá sæti á mótinu. 

Gallerý Skák: Þór Valtýsson hampaði sigri

Eftir hálfsmánaðarhlé vegna sumarkomunnar tóku menn  vasklega til tafls í skák- og listasmiðjunni í Bolholti í gærkvöldi. Sextán skákgarpar á breytilegum aldri voru mættir og létu hvorki „hambrigðapersónustreyturöskun" né „mótlætisstreituröskun" eða aðra landlægar geðraskanir hafa áhrif á taflmennsku sína og baráttuvilja.

Allir  keppendur tóku örlögum sínum á skákborðinu með jafnaðargeði að þessu sinni og með bros á vör amk. að nafninu til.  Sannur íþróttaandi sveif yfir vötnunum í tilefni vorsins og hækkandi sólar með blóm í haga.

Til þess að standa sig að þessu leyti  urðu þó sumir að beita sig afar hörðu,  bíta fast á jaxlinn og bölva í hljóði svo lítið bæri á.  Bæði tannlæknir, sálfræðingur og málfræðiprófessor voru meðal þátttakanda, sem litu eftir þessum þremur þáttum hver fyrir sig: gnístran tanna, geðssveiflum og orðfæri manna og gættu þess vandlega að ekkert færi úrskeiðis nema þá á skákborðinu sjálfu eins hendir þegar teflt er að hörku og ekkert er gefið eftir - nema síður sé. 

Þegar yfirlauk eftir 11 umferðir  og margar feikilegar veltefldar baráttuskákir stóðu þeir upp efstir og jafnir Þór Valtýsson og Gunnar Kr. Gunnarsson með 8 vinninga og þrjá niður. Þór Valtýsson norðanmaður hampaði þó glæstum sigri á stigum og hlaut velútilátið lófatak fyrir.  Næstir komu svo þeir Jón G. Friðjónsson og Friðgeir K. Hólm með 7.5 vinninga og Þórarinn Sigþórsson, hinn eitilharði baráttumaður og landskunna aflakló  varð svo einn í 5. sæti með 7 vinninga.

Stefán Þormar Guðmundsson „Hellisheiðarséní" ásamt tveimur öðrum valinkunnum görpum fylgdi svo í kjölfarið með 6.5 v. eins og sjá má á meðf. mótstöflu.   Nánar á www.galleryskak.net.

 

 

Barna-og unglingameistaramót Reykjavíkur sem og Stúlknameistaramót Reykjavíkur

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 29. apríl  í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir Monrad-kerfi með umhugsunartímanum 15 mín. á skák. Teflt verður í einum flokki.
Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2012, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2012, sé hún búsett í Reykjavík eða félagi í reykvísku taflfélag. Til viðbótar verða veitt verðlaun fyrir þrjú efstu sætin í aldursflokknum 12 ára og yngri (fædd 1999 og síðar).

Mótið er opið öllum krökkum 15 ára og yngri (fædd 1996 og síðar).

Skráning fer fram á [e-mail] (vinsamlegast gefið upp nafn, fæðingarár, símanúmer, skóla og taflfélag (ef við á)) og einnig er hægt að skrá sig á mótsstað sunnudaginn 29. apríl. frá kl. 13.30- 13.45. Skákmótið hefst kl. 14.

Aðgangur á mótið er ókeypis.

Skólaskákmót Reykjavíkur fer fram á laugardag

Skólaskákmót Reykjavíkur fer fram laugardaginn 28. apríl í Víkinni Sjóminjasafni sem staðsett er að Grandagarði átta.

Taflið hefst 12:00 og tefldar verða átta umferðir með 10 mínútna umhugsunartíma.

Teflt verður í tveimur flokkum; yngri (1.-7. bekkur) og eldri (8.-10.) bekkur.

Efstu sætin gefa rétt til þátttöku á Landsmótinu í skólaskák sem fram fer í Þingeyjarsýslu vikunni eftir mótið.

Þátttökurétt hafa sigurvegarar skólamótanna auk þess sem sterkum skákskólum býðst að senda fleiri skákmenn til leiks.

Skráning á [e-mail]

Þorvarður efstur á öðlingamóti

Þorvarður F. Ólafsson (2175) er efstur með 4,5 vinning að lokinni 5. umferð skákmóts öðlinga, sem fram fór í kvöld í félagsheimili TR, eftir jafntefli við Bjarna Hjartarson (2038).  Bjarni er í 2.-3. sæti með 4 vinninga ásamt Jóhanni Ragnarssyni (2082) sem vann Siguringa Sigurjónsson (1944).  

Úrslit 5. umferðar má finna í heild sinni hér.  

Stöðu mótsins má finna hér. 

Í sjöttu og næstsíðustu umferð, sem fram fer nk. miðvikudagskvöld mætast meðal annars: Þorvarður - Jóhann, Eggert Ísólfsson - Bjarni og Halldór Pálsson - Sigurður Daði Sigfússon.  Röðun sjöttu umferðar má finna í heild sinni hér.

• Heimasíða mótsins 
• Chess-Results

 

Glæsilegur sigur Doniku á meistaramóti Hólabrekkuskóla

Donika Kolica sigraði með fullu húsi á meistaramóti Hólabrekkuskóla í Breiðholti, sem fram fór í dag. Donika sigraði í öllum 7 skákum sínum, og lagði m.a. Dag Kjartansson, besta skákmann skólans til margra ára.

Dagur varð að gera sér silfrið og 6 vinninga að góðu og í þriðja sæti varð Heimir Páll Ragnarsson með 5 vinninga.

Þessir þrír vösku krakkar hafa myndað uppistöðuna í skáksveit skólans, sem m.a. hefur náð bronsi og silfri á Reykjavíkurmóti grunnskóla.

Rík skákhefð er í Hólabrekkuskóla og skólinn er vel búinn taflsettum og tölvuklukkum. Það má þakka Birnu Halldórsdóttur, sem m.a. stóð fyrir kökubasar til að safna fyrir skákklukkunum!

Skák var á stundatöflu 3. bekkinga í Hólabrekkuskóla í vetur og val í unglingadeild. Björn Ívar Karlsson annaðist kennsluna, en auk þess sáu Donika og Björn Þorfinnsson um opnar æfingar eftir skóla.

Sigur Doniku kom nokkuð á óvart, en sýnir að hún er í örri framför sem skákmaður, enda afar dugleg við æfingar.  Donika sigraði Dag í Grand-Prix afbrigði Sikileyjarvarnar sem verður sífellt vinsælla meðal skákmanna á öllum aldri og styrkleikastigum.

Þessa dagana fara fram meistaramót í fjölmörgum grunnskólum Reykjavíkur, og víðar, og verður sagt frá úrslitunum hér á skak.is.

Jafntefli í fjórðu einvígisskák Aronian og Kramnik

Aronian (2820) og Kramnik (2801) gerðu jafntefli í fjórðu skák vináttueinvígis þeirra sem fram fer í Zurich í Sviss.  Staðan er nú 2-2.   Þar sem skákin var undir þremur tímum tefldu þeir einnig eina atskák og þar vann Aronian.

Fimmta og næstsíðasta skákin fer fram á föstudag og hefst kl. 13.  Alls tefla þeir sex skákir

Heimasíða einvígisins

Fyrirtækja- og félagaeinvígi

Ágæti forsvarsmaður!

Með þessu bréfi vill Skákdeild Fjölnis bjóða fyrirtæki þínu þátttöku í glæsilegri firma- og félagakeppni í skák sem fram fer í Ráðhúsi Reykjavíkur þann 9. maí n.k. Teflt verður frá kl. 16:00 – 19:00.

Um er að ræða sveitakeppni, þrír í liði ásamt varamönnum. Mótið er óvenjulegt að því leyti að það er sniðið að almennum skákáhugamönnum, þ.e. starfsmönnum fyrirtækja. Einstakt tækifæri gefst til að tefla við mjög sterka mótherja, bestu skákmenn landsins, og jafnframt vera í sigurliði og vinna vegleg verðlaun.

Samanlagður styrkleiki hvers liðs í hverri umferð þarf að vera undir 5.500 stigum. Til að hvetja stigalausa til að vera með, reiknast þeir með aðeins 1.000 ELO stig. Borðaröð er frjáls.

Aðbúnaður í Ráðhúsinu er eins og best verður á kosið, með m.a. fríum veitingum fyrir keppendur, skák sýnd í beinni á sýningartjaldi o.s.frv.

Verðlaun eru glæsileg, en auk verðlaunagripa og medalía verða eftirtalin verðlaun veitt fyrir efstu þrjú sætin:

1. verðlaun: Flug til Evrópu með Iceland Express fyrir 3 liðsmenn – öll gjöld innifalin ásamt Ljósmyndabókinni frá Sögum útgáfu fyrir 3 liðsmenn!             

2. verðlaun: Flug til Evrópu með Iceland Express fyrir 3 liðsmenn – öll gjöld innifalin!                                                    

3. verðlaun: Út að borða fyrir tvo á veitingastaðnum Skrúði – 3 gjafabréf. Ljósmyndabókin frá Sögum útgáfu og geisladiskur frá 12 tónum fyrir 3 liðsmenn!

Einnig verða veitt verðlaun:

                Einstaklingsverðlaun:

1.       verðlaun:  GSM snjallsími, að verðmæti kr. 100.000, frá Símanum.

2.       verðlaun: Út að borða fyrir tvo á veitingastaðnum Vox. Ljósmyndabókin frá Sögum útgáfu og geisladiskur frá 12 tónum

3.-5.verðlaun: Ljósmyndabókin frá Sögum útgáfu og geisladiskur frá 12 tónum

-       Óvæntustu úrslitin - miðað er við stigamun:

1. verðlaun: Ljósmyndabókin frá Sögum útgáfu og geisladiskur frá 12 tónum,

2.-3. verðlaun: Geisladiskur frá 12 tónum

 

-        fyrir þátttökuliðið sem að kemur mest á óvart m.v. fyrirfram styrkleika:

1.-2. verðlaun: Ljósmyndabókin frá Sögum útgáfu fyrir 3 liðsmenn!

3. verðlaun: geisladiskur frá 12 tónum fyrir 3 liðsmenn!

-       snjallasti liðsstjórinn:

1.-3. verðlaun: Ljósmyndabókin Hús eru aldrei ein eða Eyjafjallajökull frá Uppheimum.

-       Flottasti liðsbúningurinn: Ljósmyndabókin frá Sögum útgáfu fyrir 3 liðsmenn!

-       Einnig Headphones og minnislyklar frá Nýherja og fleira, m.a. útdráttarverðlaun, sem að kynnt verða síðar!

ATH. Verðlaunum kann að fjölga og/eða verða enn veglegri.

Við stefnum á að ná 20 sveitum – munum skoða hvað við gerum ef að færri hafa skráð sig

 

Fyrirkomulag                                                                                                                                                                                   -        Teflt verður í Ráðhúsi Reykjavíkur 9. maí næstkomandi kl. 16:00-19:00.                                                        -        Hvert fyrirtæki eða félag sendir þriggja manna skáksveit til leiks með allt að þrjá varamenn. Ekki er nauðsynlegt að keppendur séu starfsmenn viðkomandi fyrirtækis, eða meðlimir í viðkomandi félagi.

-      Tefldar verða 7-10 umferðir með 7-10 mínútna umhugsunartíma.

-      Samanlögð stig, sjá: http://chess-results.com/isl/ratings.aspx?lan=0 , sveitar skulu takmarkast við 5.500 stig í hverri umferð. Stigalausir verða reiknaðir með 1.000 skákstig.

-       Sigurvegari mótsins er það lið sem að hlýtur flesta vinninga

-      Liðsmenn þarf að tilkynna í síðasta lagi daginn fyrir mótsdag.

-      Veitingar í hléi verða í boði Saffran og Icelandic Glacial.

 

Skákdeild Fjölnis stendur að mótinu en verkfræðistofan Verkís, sem fagnar 80 ára starfsafmæli í ár, er aðalstyrktaraðili mótsins. Mótið er haldið til fjáröflunar fyrir skákdeild Fjölnis, en Fjölnir er mjög framarlega í barna- og unglingastarfi, en einnig til að styrkja kaup á vélbúnaði fyrir Héðin Steingrímsson, stigahæsta virka stórmeistara Íslands, sem jafnframt er félagi í Fjölni. Síðasta mót Héðins var þýska Bundesligan, sem að nú er nýlokið, sjá: http://www.skak.blog.is/blog/skak/entry/1234493/

Stefnt er að því að gera mótið að árlegum viðburði og endurvekja þá skemmtilegu stofnanakeppni sem var við lýði fram að síðustu aldamótum.

Ef óskað er eftir, þá hjálpum við til við að halda meistaramót fyrirtækis eða félags.

Þátttökugjald hvers fyrirtækis/félags/hóps er 50.000 kr. Tilkynnið þátttöku sem fyrst á [e-mail] og skráið liðið á http://www.firmakeppnin.blog.is/blog/firmakeppnin/

Firmakeppni Íslands er á Facebook! http://www.facebook.com/profile.php?id=100003387882089

Þar er hægt að auglýsa á Facebook síðunni eftir skákmanni með ELO stig, sem að passa við hina liðsmennina. Einnig er hægt að senda okkur tölvupóst og við munum aðstoða við það.

Skákmenn eru einnig hvattir til að auglýsa eftir liði sem að vantar mann með svipuð ELO stig á Facebook síðunni eða senda okkur tölvupóst og lýsa yfir áhuga á þátttöku.

Við hvetjum þig til að hafa frumkvæði í málinu og vekja athygli á keppninni innan þíns fyrirtækis eða félags og vonumst til að eiga skemmtilega upplifun með þér á mótinu!

Með von um jákvæð viðbrögð, stuðning og skemmtilegt samstarf,

Helgi Árnason, formaður skákdeildar Fjölnis, gsm 664-8320                                                                                       

Héðinn Steingrímsson, stórmeistari og núverandi Íslandsmeistari í skák, gsm 894-0807

Þátttökutilkynning og fyrirspurnir: [e-mail]