Einvígið á Borgarbókasafninu

Í aðalsafni Borgarbókasafnsins má nú finna rekka tengdan einvígi aldarinnar.   Það er gert í tilefni 40 afmælis einvígisins.  Það er Saga Kjartansdóttir, formaður Skákfélagsins ÓSK, sem vinnur í safninu, sem stendur fyrir þessu framtaki, en hugmyndin er Aðalsteins Thorarensen.

Vel til fundið og tilvalið fyrir skákákhugamenn að lesa sér til um þennan stórmerkilega atburð.  Nánar má lesa um framtak Borgarbókasafnsins á Skákhorninu.  

Myndir (Aðalsteinn Thorarensen)

Íslendingar að tafli í Pardubice

Fimm Íslendingar sitja nú að tafli í Pardubice í Tékklandi þar sem fram fer skákhátíðin Czech Open.  Aðalmótin hefjast 20. júlí, en þá bætast fleiri við, en þessa dagana eru í gangi styttri mót.  Í dag hófust atskákmót sem lýkur á morgun.  

Smári Rafn Teitsson (2057) tekur þátt í efsta flokki (G1).  Hann er nr. 128 af 164 keppendum.  Eftir 3 umferðir af 9 hefur Smári hlotið 1 vinning.  Hann hefur gert jafntefli við stigaháa andstæðinga (2366-2395).

Fjórir Íslendingar taka þátt í flokki skákmanna með minna en 1800 skákstig (G3).  Dawid Kolka (1532) og Felix Steinþórsson (2329) hafa 2 vinninga en Steinþór Baldursson, faðir Felix, og Róbert Leó Jónsson hafa 1 vinning. 

Það er nokkuð merkileg tilviljun að í fyrst umferð mætust feðgarnir Steinþór og Felix!

• Heimasíða mótsins
• Chess-Results

Ponomariov, Karjakin og Kramnik efstir í Dortmund

Ponomariov (2726), Karjakin (2779) og Kramnik (2799) eru efstir með 3,5 vinning að loknum fimm umferðum á Dortmund Sparkasen-mótinu sem nú er í fullum gangi. 

Átta skákmenn taka þátt í mótinu sem fram fer í 13.-22. júlí.  Meðalstig eru 2711 skákstig.  Í tilefni afmælis Hannesar Hlífars Stefánssonar, Jóns Viktors Gunnarssonar og Sævars Bjarnasonar verður frídagur á morgun, 18. júlí.   

• Heimasíða mótsins
• Beinar útsendingar (umferðir hefjast kl. 13 nema lokaumferðin kl. 11)
• Chessbomb

Smári Rafn: Pistill frá Pardubice

Þriðjudaginn 10. júlí 2012 héldu þrír skákmenn af stað í skákferð til Pardubice í Tékklandi. Þetta voru þeir Smári Rafn Teitsson (2057), þjálfari Íslandsmeistara barnaskólasveita (Álfhólsskóla), og tveir nemendur hans: Dawíd Kolka (1532) og Róbert Leó Jónsson (1203). Flogið var til Stuttgart og svo var tekin lest til Munchen þar sem gist var á Siddiqi Pension lengst í útjaðri borgarinnar (neðanjarðarlest á síðustu stoppistöð og svo strætó líka á síðustu stoppistöð!). Gæðin á þeim gististað voru reyndar ekki meiri en svo að eftir að hafa sloppið þaðan heilu á höldnu gekk hann undir nafninu "Shit í kúk", en nóg um það.

11. júlí tókum við svo lest til Prag og þaðan aðra á áfangastaðinn Pardubice. Við fundum eftir talsverða leit blokkina sem við búum í (blokk F, íbúð 602), hún er staðsett um 1km frá skákhöllinni.

12. júlí byrjaði svo alvaran, fyrsta mótið af fimm sem drengirnir taka þátt í og fyrsta af fjórum hjá undirrituðum (strákarnir sitja nú, 17. júlí, að tafli í parahraðskákmóti). Um sjö umferða opna liðakeppni var að ræða, fjórir í liði (F-mótið). Við fundum unga þýska stelpu til að tefla með okkur sem fjórða mann, og þótt hún hafi ekki fengið vinning erum við henni þakklátir að hafa gefið okkur möguleikann á að taka þátt. Við kölluðum liðið okkar Iceland (og biðjum alla velvirðingar á að hafa endað í 91. sæti af 103!) .Bæði Dawíd og ég hækkum á stigum, og Róbert Leó, sem er ekki með alþjóðleg stig, sýndi frammistöðu upp á 1801 stig. Sannarlega glæsilegt hjá Róberti, sem er að tefla af meiri styrk en ég hef áður séð hjá honum. Róbert Leó vann góðan sigur á +1900 stiga manni í fyrstu umferð og kom í veg fyrir að við töpuðum á núllinu (við töpuðum aldrei á núllinu í þessu móti og vorum nokkuð sáttir með það, enda sterkt mót). Róbert vann einnig +1700 stiga mann og gerði traust jafntefli við +1800 stiga mann. Róbert Leó fékk 2,5 v. í sex tefldum skákum (við fengum skottu í 4. umferð).

Hjá Dawíd vantaði oft herslumuninn, en þessi ellefu ára strákur er hér að öðlast mikilvæga reynslu. Hann fékk 1,5 v. af sex og hækkar þó um 22 stig. Hann gerði jafntefli við 1922 stiga mann í 5. umferð og vann svo örugggan sigur á 1738 stiga manni í 7. og síðustu umferð.

Eftir að hafa tapað naumlega fyrir 2084 stiga manni í fyrstu umferð hrökk Smári í gang og tapaði ekki skák eftir það. Í 2. umferð pressaði ég (Smári) stíft til vinnings með hvítu gegn Markusi Bach (2060), sem varðist vel og á endanum tók ég jafntefliboði nr. 2. Í næstu tveimur skákum vann ég býsna örugga sigra gegn 1900 stiga mönnum og í 6. umferð kom heltraust jafntefli með svörtu á móti Karel Krondraf (2173).

7. umferðin er svo kapítuli út af fyrir sig. Í mínu tilviki fyrir það að skákin tefldist svona: 1 e4: 1-0. Búið. Mér fannst skrýtið strax í upphafi umferðarinnar að lið andstæðinganna samanstóð af þrem eldri mönnum sem settust á borð 2-4. Í ljós kom að maðurinn á 2. borði þorði einfaldlega ekki að tefla við mig og ákvað að hann ætti meiri séns á mót ellefu ára snáða. Ég get ekki neitað því að það hlakkaði dálítið í mér þegar Dawíd tók hann síðan gjörsamlega í bakaríið. Þessi maður hélt því fram við mig að e-r 2010 stiga maður myndi kannski og kannski ekki mæta innan klukkutíma og tefla á fyrsta borði. Lúalegt, því þessir þrír vissu allir að skráði fyrsta borðs maðurinn myndi aldrei mæta, því þegar ég fór og kvartaði til skákstjóranna kom í ljós að sá hafði ekki teflt eina einustu skák í mótinu. Skákstjórarnir sögðust þó ekkert geta gert í málinu, en að hert yrði á reglunum fyrir næsta mót (töluðu um sektir og jafnvel brottvísanir fyrir svona framkomu). Þetta kostaði okkur að hugsanlega fyrsti (og eini) sigur okkar í mótinu var tekinn af okkur vegna þessarar óíþróttamannslegu framkomu andstæðinganna. Ég og Dawíd unnum, en Róbert og Anushka töpuðu, en öll hefðu þau átt með réttu að fá léttari andstæðinga. Talandi um óíþróttamannslega framkomu þá var reyndar mesta dramatíkin á fjórða borði, þar sem andstæðingarnir pirruðu hina tólf ára gömlu Anushku með því að vera oft að tala á meðan umferðinni stóð, og vildi hún meina að þeir hafi verið að ræða leiki í skák hennar. Á endanum varð hún mjög reið og neitaði að tefla áfram, en pabbi hennar taldi hana á að halda áfram. Það gneistaði milli hennar og andstæðingsins og þurfti skákstjórinn að standa yfir þeim. Hann bað mig að segja henni eftir skákina að hún hefði sýnt óíþróttamannslega hegðun með því að gefa ekki fyrr (hún var vissuleg miklu liði undir). Rök hans voru m.a. þau að andstæðingurinn hefði getað fengið hjartaáfall og dáið. Þrátt fyrir að það sé vissulega alltaf möguleiki finnst mér vafasamt að ætla að banna henni að tefla til enda. Ég sagði honum að patt væri alltaf möguleiki, því hlyti hún að mega lifa í voninni um það.

Í gær 16. júlí var svo parakeppni, Czech pairs rapid open, umhugsunartími 10-5. Ég og Dawíd tefldum saman og Róbert tefldi með rússneskum skákmanni. Róbert hélt áfram að tefla vel og vann meðal annars 2060 stiga mann. Við Dawíd mættum í fyrstu umferð Rússunum GM Ramil Hasangatin (2504) og IM Iulia Mashinskaya (2285). Dawíd var hársbreidd frá jafntefli, en ég gerði hið óvænta og vann stórmeistarann, slíkt hefur ekki gerst hjá mér áður. Þetta var greinilega minn dagur, því ég vann einnig Vaclav Svoboda (2386) og fleiri góða, og endaði með sex v. af sjö í nokkuð sterku móti. Minn besti árangur á ferlinum held ég að ég geti fullyrt. Í lokin voru nokkur pör lesin upp og verðlaunuð, og þar á meðal Teitsson-Kolka. Ég veit reyndar ekki nákvæmlega fyrir hvað, en allavega fannst mér við alveg eiga skilið verðlaun! Við vorum jafntefliskóngarnir, með fimm jafnteflisviðureignir (1-1), einn sigur )2-0) og eitt tap (0-2). Gerðum samt engin jafntefli í skákum okkar!

Í dag 17. júlí tefldu svo Róbert og Dawíd á Blitz pairs open (umhugsunartími: 5-0) og enduðu í 23. sæti af 26. Mótið var sterkt, og árangurinn því fullkomlega viðunandi. Vegna góðs gengis Róberts í liðakeppninni varð úr að hann tefldi á fyrsta borði og Dawíd og 2. Róbert fékk 2,5 v. af 11 og Dawíd 6/11.

Í ferðinni það sem af er höfum við þrátt fyrir allt náð að gera sitthvað fleira en að tefla, meðal annars farið tvisvar í sundhöllina og tvisvar í bíó. Veðrið hefur verið sæmilegt, þó ekkert spes. Felix og pabbi hans koma í dag og brátt bætast einnig Hannes Hlífar, Hjörvar og Siggi Eiríks í hópinn. Á morgun og hinn tefla Smári, Róbert, Dawíd og Felix í Czech Rapid Open, umhugsunartími 15-10. Skákhátíðin í Pardubice samanstendur af mörgum mótum, aðalmótið Czech Open byrjar 20. júlí.

Skrifað í Pardubice 17. júlí 2012

Smári Rafn Teitsson

Hraðskákkeppni taflfélaga 2012

Hraðskákkeppni taflfélaga, hefst venju samkvæmt nú eftir verslunarmannahelgi. Þetta er í átjánda sinn sem keppnin fer fram en Bolvíkingar eru núverandi meistarar.  Í fyrra var metþátttaka en þá tóku 18 lið þátt í keppninni.  

Teflt er eftir útsláttarfyrirkomulagi.     

Dagskrá mótsins er sem hér segir:

• 1. umferð (16 liða úrslit): Skuli vera lokið 15. ágúst (hugsanleg forkeppni ef meira en 16 lið taka þátt)
• 2. umferð (8 liða úrslit): Skuli vera lokið 25. ágúst
• 3. umferð (undanúrslit): Skuli vera lokið 5. september
• 4. umferð (úrslit): Um 15. september (líklegt að keppnin verði sett á helgina 7.-9. september eða 14-16. september.

Umsjónaraðili getur heimilað seinkanir við sérstakar aðstæður.     

Skráning til þátttöku rennur út 5. ágúst nk.   Forráðamenn taflfélaga eru vinsamlegast beðnir um að hafa samband við Gunnar Björnsson í netfangið [e-mail] eða í síma 820 6533.
Tilkynna þarf eftirfarandi:

Lið
Liðsstjóri
Símanúmer liðsstjóra
Netfang liðsstjóra

Reglur keppninnar:
1.  Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.
2.  Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.
3.  Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.
4.  Ætlast er til þess að þeir sem tefli séu fullgildir meðlimir síns félags. Aðeins má tefla með einu taflfélagi í keppninni.
5.  Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.
6.  Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.
7.  Heimalið bjóði upp á léttar veitingar, t.d. kaffi, gos, kökur eða kex.
8.  Viðureignirnar skulu fara fram innan 100 km. radíus (max 1-1,5 klst. ferðalag) frá Reykjavík nema að félög komi sér saman um annað.
9.  Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.
10.  Úrslit keppninnar verða ávallt aðgengileg á heimasíðu Hellis, www.hellir.blog.is , sem er heimasíða keppninnar, og á www.skak.is.
11.  Mótshaldið er í höndum Taflfélagsins Hellis sem sér um framkvæmd mótsins.

Dagur með góðan lokasprett í Búdapest

Alþjóðlegi meistarinn Dagur Arngrímsson (2366) vann ungverska alþjóðlega meistarann Ervin Toth (2477) í 9. og síðsutu umferð First Saturday-mótsins sem fór í dag.  Dagur vann því tvær síðustu skákirnar.

Dagur hlaut 4,5 vinning og endaði í sjötta sæti.  Frammistaða hans samsvaraði 2435 skákstigum og hækkar hann um 9 stig fyrir hana.   

10 skákmenn tefldu í SM-flokki og var Dagur næststigalægstur keppenda.  Meðalstig í flokknum voru 2428 skákstig.

• Heimasíða mótsins
• Chess-Results

Tikkanen sænskur meistari (lagfært)

Hans Tikkanen (2573) varð í dag sænskur meistari skák í annað skipti.  Fjórir keppendur urðu efstir og jafnir á sænska meistaramótinu sem fram fór í Falun.   Það var fullyrt hér í frétt á Skák.is í gær að titilinn réðist á stigaútreikning.  Það er ekki rétt heldur var haldin aukakeppni á milli efstu manna þar sem hver keppandi hafði 12 mínútur.  Þar hafði Tikkanen sigur en hann hlaut 2,5 vinning.

Lokastaðan:

• 1.-4. GM Hans Tikkanen (2573), GM Emanuel Berg (2573), IM Bengt Lindberg (2409) og IM Axel Smith (2491) 
• 5.-6. GM Nils Grandelius (2570) og GM Pia Cramling (2489) 5 v.
• 7. IM Erik Blomqvist (2457) 4,5 v.
• 8. FM Erik Hedman (2381) 4 v.
• 9. GM Jonny Hector (2530) 3,5 v.
• 10. Eric Vaarala (2251) 1 v.

Heimasíða mótsins

 

Álfhólsskólamenn tefldu í liðakeppni í Czech Open

Skáksveit frá Íslandsmeisturum barnaskólasveita, Álfhólsskóli, tefldi í liðakeppni sem er hluti af skákhátíðinni Czech Open, sem fram fer í Pardubice í Tékklandi.  Í sveitinni tefldu Smári Rafn Teitsson (2057), liðsstjóri strákanna, Dawid Kolka (1532), Róbert Leó Jónsson og einn ungur Tékki til að fylla upp í skáksveitina.

Smári Rafn (2057), fékk 4 vinninga í 6 skákum, Dawid fékk 1,5 vinning og Róbert Leó fékk 2,5 vinning.  Dawid hækkar um 22 stig en Smári Rafn um 5 stig. Róbert Leó hefur ekki alþjóðleg skákstig en frammistaða hans samsvaraði 1880 skákstigum.  

Þeir munu tefla á atskákmóti sem fram fer næstu daga en aðalkeppnin hefst þann 20. júlí.  Þar verða landsliðsmennirnir Hannes Hlífar Stefánsson og Hjövar Steinn Grétarsson meðal keppenda.  

• Czech Open 
• Chess-Results

 

Bragi einn sigurvegara á opna skoska meistaramótinu

 

Alþjóðlegi meistarinn Bragi Þorfinnsson (2465) varð einn sigurvegara á opna skoska meistaramótinu sem lauk í Glasgow í dag.  Bragi gerði jafntefli við hvít-rússneska stórmeistarann Vitaly Teterev (2530) í lokaumferðinni.   Frammistaða Braga samsvararaði 2575 skákstigum og hækkar hann um 15 stig fyrir hana.

Róbert Lagerman (2315) og Mikael Jóhann Karlsson (1929) unnu í lokaumferðinni.   Hjörvar Steinn Grétarsson (2507), Nökkvi Sverrisson (1973), Emil Sigurðarson (1808), Jón Trausti Harðarson (1774), Birkir Karl Sigurðsson (1709) og Óskar Long Einarsson (1571) gerðu jafntefli.

Jafnir Braga í efsta sæti urðu stórmeistararnir Momchil Nikolov (2556), Búlgaríu, Teterev, Jacob Aagaard (2506), Danmörku, og enski alþjóðlegi meistarinn Jonathan Hawkins (2499).

Lokastaða íslensku keppendanna:

• 1.-5. Bragi Þorfinnsson (2465) 7 v.
• 11.-19. Hjörvar Steinn Grétarsson (2507) 6 v.
• 20.-32. Róbert Lagerman (2315) 5,5 v.
• 33.-47. Nökkvi Sverrisson (1973) 5 v.
• 48.-65. Mikael Jóhnn Karlsson (1929), Emil Sigurðarson (1808) og Jón Trausti Harðarson (1774) 4,5 v
• 82.-93. Birkir Karl Sigurðsson (1709) 3,5 v.
• 105.-108. Óskar Long Einarsson (1587) 2,5 v.

Sjö af níu íslensku keppenda hækka á stigum fyrir frammistöðu sína.  Það eru: Jón Trausti (39), Nökkvi (39), Emil (31), Óskar (23), Birkir (16), Bragi (15) og Mikael (4).  Það voru aðeins Hjörvar (-1) og Róbert (-8) sem lækka á stigum.  

116 skákmenn taka þátt í mótinu og þar af voru 9 stórmeistarar og 13 alþjóðlegir meistarar.  Hjörvar var nr. 8 í stigaröð keppenda, Bragi nr. 13 og Róbert nr. 25.

• Heimasíða mótsins
• Beinar útsendingar (umferðir hefjast kl. 12)
• Úrslitaþjónusta

Hans Tikkanen sænskur meistari í skák

Hans Tikkanen (2573) varð í dag sænskur meistari skák í annað skipti.  Fjórir keppendur urðu efstir og jafnir á sænska meistaramótinu sem fram fór í Falun.  En Svíarnir fara aðra leið en Íslendingar og Norðmenn, sem láta tefla um meistaratitilinn, en þeir látu stigaútreikning ráða.  Þar varð Tikkanen efstur fjögurra keppenda, á afar spennandi meistaramóti.  Berg (2573), Lindberg 2409) og Smith (2491) urðu jafnir Tikkanen að vinningum.

Lokastaðan:

• 1.-4. GM Hans Tikkanen (2573), GM Emanuel Berg (2573), IM Bengt Lindberg (2409) og IM Axel Smith (2491) 
• 5.-6. GM Nils Grandelius (2570) og GM Pia Cramling (2489) 5 v.
• 7. IM Erik Blomqvist (2457) 4,5 v.
• 8. FM Erik Hedman (2381) 4 v.
• 9. GM Jonny Hector (2530) 3,5 v.
• 10. Eric Vaarala (2251) 1 v.

Heimasíða mótsins