Fundargerð aðalfundar SÍ

Fundargerð aðalfundar SÍ frá 11. maí er nú aðgengileg. Hana má nálgast hér sem Word-viðhengi.

Hraðkvöld hjá Helli í kvöld

Taflfélagið Hellir heldur hraðkvöld mánudaginn 10. júní nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Vel heppnuð Skákhátíð á Ströndum - Jóhann sigraði á eigin afmælismóti

Það fór fram mikil Skákhátíð á Ströndum um helgina. Þar fóru fjórir skákviðburðir a fjórum stöðum. Hæst bar afmælismót Jóhanns Hjartarson sem fram í Trékyllisvík á laugardaginn. Jóhann gerði sér lítið fyrir og sigraði á eigin afmælismóti!

Skákhátíðin hófst með fjöltefli í Hólmavík þar sem Róbert Lagerman tefldi við gesti og gangandi og leyfði nokkur jafntefli. 

Um kvöldið var svo tvískákmót á Hótel Djúpavík. Þar sigraði forsetaliðið en það skipuðu Hrafn Jökulsson, Róbert og Gunnar Björnsson með fullu húsi. Í öðru sæti varð Flotta liðið (Vigfús Ó. Vigfússon og Heimir Páll Ragnarsson) og í þriðja sæti varð Jónaliðið (Jón Kristinn Þorgeirsson og Jón Birgir Einarsson).

Hápunktur hátíðirnar var afmælismót Jóhanns sem fram á laugardaginn í félagsheimili Árnesinga í Trékyllisvík. Þar sigraði Jóhann með fullu húsi, Hannes Hlífar Stefánsson varð annar og Stefán Bergsson varð þriðji. Jón Kristinn Þorgeirsson hlaut unglingaverðlaunin.

Um kvöldið var svo slegið upp grillveislu þar sem boðið var upp á ljúffeng lambalæri frá Ferskum kjötvörum og grænmeti frá Sölufélagi garðyrkjumanna.

Á sunnudaginn fór svo Hraðskákmót Norðurfjarðar. Þar urðu Jóhann og Hannes efstir en nú hafði Hannes efsta sætið eftir stigaútreikning. Jónarnir L. Árnason og Kristinn urðu í 3.-4. sæti en Jón L. tók þriðja sætið eftir stigaútreikning.

Hrafn Jökulsson, forseti Skákfélagsins Hróksins, sem stóð fyrir hátíðinni á án efa eftir að gera mótinu mun betri skil á næstum dögum hér á Skákis. Hann tók jafnframt aragrúa mynda.

Ritstjóri vill þakka Hrafn og Róberti kærlega fyrir frábærlega vel heppnaða skákhátíð!

Gelfand sigurvegari Tal Memorial

Hinn hvít-rússneskættaði Ísraelsmaður Boris Gelfand (2755) sigraði á Tal Memorial sem lauk í dag í Moskvu. Sigur Gelfand er verður að teljast afar óvæntur enda var hann næststigalægstur 10 keppenda. Frammistaða Gelfand samsvaraði 2900 skákstigum. Gelfand gerði stutt jafntefli við Kramnik (2803) í lokaumferðinni og tryggði sér þar með sigur þar sem Carlsen (2864) mátti sætta sig við jafntefli við Mamedyarov (2753).

Morozevich (2760) vann Nakamura (2784) en öðrum skákum lokaumferðirnar lauk með jafntefli. Þriðja tap Nakamura í röð!

Kramnik varð neðstur á mótinu og það vekur einnig athygli að heimsmeistarinn Anand (2786) varð næstneðstur.

Ritstjórinn sem var staddur á Skákhátíð á Ströndum fór í heldur léttan gír um helgina og uppnefndi Gelfand sem Gelföndina í fréttaflutningi. Ritstjóri fór þar heldur framúr sjálfum sér og biðst forláts á því.

• Heimasíða mótsins
• Beinar útsendingar
• Chessbomb

Henrik með tvö jafntefli í dag

Stórmeistarinn Henrik Danielsen (2508) gerði jafntefli í báðum umferðum dagsins á minningarmótinu um Svein Johannessen sem nú fer fram í Osló.

Í fjórðu umferð við sænska stórmeistarann Tiger Hillarp (2517) en í þeirri fimmtu við færeyska alþjóðlega meistarann Helga Dam Ziska (2474).

Í fyrri skák morgundagsins, sem fer í fyrramálið, teflir Henrik við norska FIDE-meistarann Aryan Tari (2430).

Tari er efstur með 4,5 vinning ásamt Tiger Hillarp og enska stórmeistaranum Mark Hebden (2548).

60 keppendur frá 10 löndum taka þátt í mótinu og þar á meðal sex stórmeistarar. Henrik er þriðji í stigaröð keppenda.

• Heimasíða mótsins
• Úrslitaþjónusta
  

Lenka tapaði í lokaumferðinni - og vann svo í fyrstu umferð

Lenka Ptácníková (2255) tapaði fyrir slóvaskía stórmeistaranum Mikalus Manik (2413) í lokaumferð opna mótsins í Teplice í Tékklandi. Strax að loknu móti hélt Lenka svo til Prag þar sem hún tefldi fyrsti umferðina í dag og vann í fyrstu umferð.

Lenka hlaut 5 vinninga í Teplice. Frammistaða hennar samsvaraði 2192 skákstigum og lækkar hún um 8 stig fyrir hana.

Jakob Sævar Sigurðsson (1768) hlaut 3,5 vinning en Sigurður Eiríksson (1946) hlaut 3 vinninga.

• Heimasíða mótsins
• Beinar útsendingar
• Chess-Results

Skákþáttur Morgunblaðsins: Hannes Hlífar Íslandsmeistari í tólfta sinn

Hannes Hlífar Stefánsson er Íslandsmeistari 2013 eftir dramatíska lokaumferð Íslandsmótsins í Turninum við Borgartún. Hannes var með vinningsforskot fyrir lokaumferðina en tapaði fyrir Héðni Steingrímssyni og á svipuðum tíma vann Björn Þorfinnsson Braga bróður sinn og komst upp að hliðinni á Hannesi. Aukakeppni, tvær at-skákir, fór fram samdægurs og Hannes vann 1½ : ½ . Að útkljá baráttuna um titilinn með tveim at-skákum verður að telja snubbóttan endi á Íslandsmóti sem að þessu sinni bauð ekki uppá nægilegar góðar aðstæður fyrir keppendur. Mótshaldarinn, SÍ, fékk húsnæðið til umráða rétt tilbúið undir tréverk og leysti mörg erfið tæknileg viðfangsefni prýðilega. Ljósu punktarnir voru þeir að margir ungir skákmenn náðu afbragðs árangri og fyrsti stórmeistaraáfangi hins vinsæla skákmanns Björns Þorfinnssonar gladdi menn. 70 skákmenn hófu keppni og í efstu sætum urðu:

1. - 2. Hannes Hlífar Stefánsson og Björn Þorfinnsson 8 v. (af 10) 3. - 4. Héðinn Steingrímsson og Hjörvar Steinn Grétarsson 7½ v.

Teflt var um Íslandsmeistaratitil kvenna og varð Lenka Ptacnikova Íslandsmeistari, hlaut 6½ vinning úr 10 skákum. Fyrir lokaumferðina var hún jöfn Jóhönnu Björgu Jóhannsdóttur að vinningum, fékk heldur viðráðanlegri andstæðing að kljást við en Jóhanna, sem tapaði. Sigur Lenku kom ekki á óvart, hún ber höfuð og herðar yfir skákkonur okkar.

Hvað varðar taflmennsku Íslandsmeistarans, Hannesar Hlífars, er varla hægt að segja að þar hafi margt komið á óvart. Sigrar hans voru flestir öruggir og áreynslulausir, hann fékk hvítt í sex skákum af tíu, samdi stutt jafntefli þegar hann tefldi við Hjörvar Stein og Henrik Danielssen og bauð Héðni Steingrímssyni jafntefli snemma tafls í lokaumferðinni, Héðinn hafnaði og afleik Hannesar í lokin má skrifa á reikning taugaspennu sem er eðlilegur fylgifiskur lokaumferðar. Í áttundu umferð vann hann mikilvæga skák gegn Stefáni Kristjánssyni:

Stefán Kristjánsson - Hannes Hlífar Stefánsson

Ítalskur leikur

1. e4 e5 2. Rf3 Rc6 3. Bc4 Bc5 4. c3 Rf6 5. d3 O-O 6. Bb3 d5 7. De2

Stefán teflir ítalska leikinn gjarnan með þessum hætti. Kannski leggur hann það á sig að læra nýja byrjun næst þegar hann sest að tafli.

7. ... h6 8. h3 Be6 9. g4!?

Þessa leikaðferð með framrás g-peðsins sá ég fyrst í blindskák Kasparovs við Helga Áss Grétarsson árið 1995.

9. ... dxe4 10. dxe4 Rh7 11. Rbd2 He8 12. Rf1 Dd7 13. Re3 Bxe3 14. Bxe3 Bxb3 15. axb3 Had8 16. b4 a6 17. Rd2 De6 18. h4 Dg6 19. O-O-O Rf8 20. Df3 Re6 21. g5?!

Hví ekki 21. Df5 eða 21. h5 Dh7 22. Df5.

21. ...h5 22. Rf1?

Annar slakur leikur, betra var 22. Rb3, 222. Rc4 eða 22. Kc2. Nú hrifsar svartur til sín frumkvæðið.

22. ... Hxd1 23. Kxd1 Rf4! 24. Rg3 De6 25. Bxf4 Db3+ 26. Ke1 exf4 27. Dxf4 Dxb2 28. Dd2 Db3 29. Kf1 Hd8 30. De3 Re5 31. Kg2 Rg4 32. Df4 g6!

- Sjá stöðumynd -

Það lá ekki alveg fyrir hvernig best væri að halda á stöðu svarts en Hannes fann bestu leiðina.

33. Dxc7

Hvítur á sér ekki viðreisnar von eftir þennan leik. „Houdini" telur að eina vonin sé fólgin í stórfurðulegum leik, 33. Hh3.

33. ... Hd2 34. Hf1 Re3 35. Kg1 Rxf1 36. Rxf1 Dd1 37. Db8 Kg7 38. De5 Kh7 39. Kg2 g4 40. Rg3 Hd3

- Stefán taldi vonlaust að halda baráttunni áfram og gafst upp.

 

 

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 16 júní 2013

Skákþættir Morgunblaðsins

[Event "Skákþing Íslands"] [Site "?"] [Date "2013.06.06"] [Round "8.1"] [White "Kristjansson, Stefan"] [Black "Stefansson, Hannes"] [Result "0-1"] [WhiteElo "2494"] [BlackElo "2507"] [ECO "C54"] [PlyCount "80"] [EventDate "2013.??.??"] 1. e4 e5 2. Nf3 Nc6 3. Bc4 Bc5 4. c3 Nf6 5. d3 O-O 6. Bb3 d5 7. Qe2 h6 8. h3 Be6 9. g4 dxe4 10. dxe4 Nh7 11. Nbd2 Re8 12. Nf1 Qd7 13. Ne3 Bxe3 14. Bxe3 Bxb3 15. axb3 Rad8 16. b4 a6 17. Nd2 Qe6 18. h4 Qg6 19. O-O-O Nf8 20. Qf3 Ne6 21. g5 h5 22. Nf1 Rxd1+ 23. Kxd1 Nf4 24. Ng3 Qe6 25. Bxf4 Qb3+ 26. Ke1 exf4 27. Qxf4 Qxb2 28. Qd2 Qb3 29. Kf1 Rd8 30. Qe3 Ne5 31. Kg2 Ng4 32. Qf4 g6 33. Qxc7 Rd2 34. Rf1 Ne3+ 35. Kg1 Nxf1 36. Nxf1 Qd1 37. Qb8+ Kg7 38. Qe5+ Kh7 39. Kg2 Qg4+ 40. Ng3 Rd3 0-1

Carlsen vann Nakamura - Gelföndin enn efst

Magnus Carlsen (2864) vann Nakamura (2784) í áttundu og næstsíðustu umferð Tal Memorial sem fram fór í dag. Caruana (2774) hefði betur gegn Morozevich (2760) en öðrum skákum lauk með jafntefli. Gelfand (2755) er efstur fyrir lokaumferðina sem fram fer á morgun en hann hefur 5,5 vinning. Carlsen er annar með 5 vinninga.

Í lokaumferðinni sem fram fer á morgun og hefst kl. 9 mætast meðal annars Kramnik og Gelfand og Mamedyarov (2753) og Carlsen.

• Heimasíða mótsins
• Beinar útsendingar
• Chessbomb

Henrik vann báðar skákirnar í dag - hefur fullt hús

Henrik Danielsen (2508) vann báðar skákir dagsins á minningarmótinu um Svein Johannessen en 2. og 3. umferð fóru fram í dag.

Henrik vann annars vegar Norðmanninn Lars Oskar Hauge (2191) og hins vegar danska stórmeistarann Carsten Höi (2392). Henrik er einn fimm keppenda sem hefur fullt hús.

Á morgun verða tefldar 4. og 5. umferð.

60 keppendur frá 10 löndum taka þátt í mótinu og þar á meðal sex stórmeistarar. Henrik er þriðji í stigaröð keppenda.

• Heimasíða mótsins
• Úrslitaþjónusta
  

Lenka með jafntefli við Kasparov

Lenka Ptácníková (2255) gerði jafntefli við hvít-rússneska stórmeistarann Sergei Kasparov í áttundu og næstsíðustu umferð opins móts í Teplice í Tékklandi. Lenka hefur 4,5 vinning. 

Jakob Sævar Sigurðsson (1768) hefur 3,5 vinning en Sigurður Eiríksson (1946) hefur 3 vinninga. 

Lokaumferðin hefst kl. 7 í fyrramálið. 

• Heimasíða mótsins
• Beinar útsendingar
• Chess-Results