Góður skákfélagi fallinn frá - Eiður Ágúst Gunnarsson

Eiður Ágúst Gunnarsson,söngvari og skákunnandi er látinn 77 ára að aldri.

Þrítugur að aldri fór Eiður til náms  við óperudeild Konservatorium der Stadt Köln í Þýskalandi, eftir að hafa stundað söngnám hér heima.

Eiður var afreksmaður í frjálsum íþróttum á sínum yngri árum.

Hann var einnig orðinn öflugur skákmaður þegar hann hélt á vit nýrra ævintýra og afreka í óperuhúsum Evrópu.

Eiður hafði alla tíð mikinn áhuga á skákíþróttinni og tefldi alltaf eitthvað meðan hann bjó úti í Evrópu.

Eiður byrjaði að tefla með eldri borgurum á höfuðborgarsvæðinu fyrir nokkrum árum, bæði hjá Ásum í Stangarhyl og Riddurum í Hafnarfirði.

Eiður var eftirminnilegur maður og hvers manns hugljúfi.

Skákfélagar hans í Ásum og Riddurum þakka honum kærlega fyrir allar góðar skákir.

Við skákfélagar hans vottum eiginkonu hans Lucindu Grímsdóttur og syni hennar Grími Inga innilega samúð.

Finnur Kr Finnsson

Gelfönd efst á Tal Memorial

Boris Gelfand (2755) vann Hikaru Nakamura (2784) í sjöundu umferð Tal Memorial sem fram fór í dag. Með því náði Gelfand forystunni á mótinu, hefur 5 vinninga. Dmitry Andreikin (2713) vann Kramnik (2803) en öðrum skákum lauk með jafntefli. Fyrsta sigurskák Rússa á mótinu.

Nakamura er annar með 4,5 vinning en Carlsen er í 3.-5. sæti ásamt Mamedyarov (2753) og Andreikin. Þeir hafa 4 vinninga. Það vekur óneitanlega mikla athygli að Kramnik rekur lestina á mótinu er með 2 vinninga.

Í áttundu og næstsíðustu umferð, sem fram fer á morgun mætast meðal annars: Carlsen-Nakamura, Gelfand-Mamedyarov. Í botnbaráttunni mætast Anand og Kramnik.

• Heimasíða mótsins
• Beinar útsendingar
• Chessbomb

Henrik vann í fyrstu umferð í Osló

Minningarmótið um Svein Johannessen hófst í dag í Osló í Noregi. Stórmeistarinn Henrik Danielsen (2508) vann í fyrstu umferð Danann Lars-Henrik Bech Hansen (2045), forseta danska skáksambandsins.

Á morgun verða tefldar 2. og 3. umferð. Þær hefjast kl. 8 og 14 og verða sýndar beint. Í 2. umferð mætir Henrik Norðmanninum Lars Oskar Hauge (2191).

60 keppendur frá 10 löndum taka þátt í mótinu og þar á meðal sex stórmeistarar. Henrik er þriðji í stigaröð keppenda.

• Heimasíða mótsins
• Úrslitaþjónusta
  

Lenka með 4,5 vinning - mætir Kasparov á morgun

Lenka Ptácníková (2255) er með 4,5 vinning að loknum sjö umferðum á alþjóðlega mótinu í Teplice í Tékklandi. Á morgun verður Lenka í þráðbeinni en þá mætir hún hvít-rússneska stórmeistaranum Sergey Kasparov (2482). Umferðin hefst kl. 14.

Jakob Sævar Sigurðsson (1768) og Sigurður Eiríksson (1946) hafa 3 vinninga. 

• Heimasíða mótsins
• Beinar útsendingar (hefjast kl. 14)
• Chess-Results

Norðurlandamót kvenna fer fram í september í Norræna húsinu

Norðurlandamót kvenna fer fram í glæsilegum húsakynnum í Norræna húsinu í Reykjavík dagana 17.-23. september. Tefldar verða níu umferðir eftir svissneska kerfinu og gefur mótið því möguleika á alþjóðlegum áföngum. Mótið er opið öllum konum, ekki aðeins frá Norðurlöndunum. Von er á mörgum sterkum skákkonum frá hinum Norrænu löndunum.

Heildarverðlaun nema 250.000 kr.

Nánari upplýsingar má finna á vefsíðu mótsins.

Skráning fer fram á Chess-Results og eru íslenskar skákkonur hvattar til að skrá sig sem fyrst til leiks. Þátttökugjöld eru kr. 10.000 en 50% afsláttur er fyrir 16 ára og yngri.

Boðsbréf um mótið, reyndar á ensku, fylgir með sem viðhengi.

Skrár tengdar þessari bloggfærslu:

• Boðsbréf fyrir NM kvenna 2013

Helgi velur 10 manna landsliðshóp fyrir EM landsliða

Helgi Ólafsson, landsliðseinvaldur í opnum flokki, hefur valið 10 manna landsliðshóp. Fimm þeirra munu svo eiga sæti í landsliði Íslands á EM landsliða sem fram fer í Varsjá í Póllandi í nóvember nk. Val Helga verður tilkynnt 1. ágúst nk.

Íslandsmeistarinn 2013, Hannes Hlífar Stefánsson, hefur þegar tryggt sér sæti í landsliðinu en fjórir af hinum níu skipa hin sætin.

Landsliðshópinn skipa:

• AM Björn Þorfinnsson (2377)
• AM Bragi Þorfinnsson (2493)
• AM Dagur Arngrímsson (2396)
• AM Guðmundur Kjartansson (2453)
• SM Hannes Hlífar Stefánsson (2507)
• SM Henrik Danielsen (2508)
• SM Héðinn Steingrímsson (2561)
• AM Hjörvar Steinn Grétarsson (2509)
• SM Stefán Kristjánsson (2494)
• SM Þröstur Þórhallsson (2449)

Friðrik Ólafsson meðal keppenda á Afmælismóti Jóhanns Hjartarsonar í Trékyllisvík

Skákhátíð hefst á Ströndum með fjöltefli í Stjórnsýsluhúsinu á Hólmavík klukkan 16 á föstudag. Skákveislan heldur áfram á föstudagskvöld í Djúpavík og stendur alla helgina.

 

Þetta er sjötta árið í röð sem Hrókurinn stendur fyrir skákhátíð í Árneshreppi, sem er nyrsti hreppur Strandasýslu og fámennasta sveitarfélag landsins. Þar fara saman blómlegt mannlíf, stórbrotin náttúra og magnaðir sögustaðir.

Á föstudagskvöld verður hátíð sett á Hótel Djúpavík kl. 20.30, sem er með sérstakt tilboð á hlaðborði í tilefni dagsins. Síðan verður blásið er til tvískákar-móts, en það er mjög fjörugt afbrigði skákarinnar, þar sem tveir eru saman í liði.

Á laugardag berst leikurinn til Trékyllisvíkur, þar sem Securitas-Afmælismót Jóhanns Hjartarsonar verður haldið. Jóhann Hjartarson er einn sigursælasti meistari skáksögunnar, og komst í fjögurra manna úrslit í keppninni um heimsmeistaratitilinn.

Hann varð fimmtugur fyrr á árinu, og honum er nú haldin allsherjar veisla í samkomuhúsinu af því tilefni. Jóhann og kona hans, Jónína Ingvadóttir, hafa verið fastagestir á skákhátíð á Ströndum frá upphafi.

Margir meistarar mæta til að heiðra Jóhann og Jónínu. Til leiks eru skráðir Jón L. Árnason, Helgi Ólafsson og Hannes Hlífar Stefánsson. Sérstaka ánægju vekur að Friðrik Ólafsson fyrsti stórmeistari Íslendinga og fyrrum forseti FIDE-Alþjóða skáksambandsins skuli mæta til leiks. Friðrik, sem varð 78 ára í janúar, er goðsögn í íslenskri skáksögu og var meðal bestu skákmanna heims um árabil.

Securitas-Afmælismót Jóhanns Hjartarsonar í Trékyllisvík hefst klukkan 14 á laugardag í samkomuhúsinu, og verða tefldar 9 umferðir, með 10 mínútna umhugsunartíma.

Til mikils er að vinna, því sigurvegarinn fær að launum útskorinn ísbjörn eftir Guðjón Kristinsson frá Dröngum, sem er einn fremsti handverks- og listamaður okkar. Veitt eru peningaverðlaun, samtals 100 þúsund, fyrir efstu sætin. Fjöldi annarra vinninga er í boði – meðal annars handverk, bækur,inneign í kaupfélaginu og gersemar frá Grænlandi.

Sérstakur gestur hátíðarinnar er frú Kristjana Guðmundsdóttir Motzfeldt, ekkja Jonathans Motzfeldt sem var í 17 ár forsætisráðherra Grænlands.

Að loknu afmælismótinu verður slegið upp grillveislu og efnt til hins árlega ,,landsleiks“ í fótbolta milli liðsmanna Ungmennafélagsins Leifs heppna í Árneshreppi og gestaliðsins Strandaglópa.

Á sunnudaginn lýkur hátíðinni með hraðskákmóti í Kaffi Norðurfirði, sem hefst kl. 12. Tefldar verða 8 umferðir með 5 mínútna umhugsunartíma og er mótið haldið til heiðurs Böðvari Böðvarssyni, sem verður 77 ára þann dag.

Meðal þeirra sem gefa verðlaun og vinninga á Skákhátíð á Ströndum 2013 eru Flugfélagið Ernir, Sparisjóður Strandamanna, Securitas, Kaupfélag Steingrímsfjarðar, Sena, Edda, DV, Tónastöðin, Henson, Arion banki, auk þess sem Skáksamband Íslands, Brim ehf. og Atvinnuvegaráðuneytið styðja mótshaldið. Nokkrir einstaklingar gefa handverk og listmuni, m.a. Helgi Þórsson, Jóhanna Kristjónsdóttir og Ásdís Bragadóttir.

Gestir og keppendur á Skákhátíð í Árneshreppi koma víða að. Meðal keppenda verða heimamenn, sum efnilegustu skákbörn Íslands og áhugamenn úr öllum áttum.

 

Skákáhugamenn eru hvattir til að skella sér á Strandir norður um helgina. Urðartindur í Norðurfirði býður upp á herbergi í nýlegu hóteli í botni fjarðarins, en þaðan er ægifagurt útsýni. Sími þar er 843 8110.

 

Auk þess sem mótshaldarar hafa yfir að ráða fyrsta flokks svefnpokagistingu í Norðurfirði, með góðri eldunaraðstöðu. Þá eru góð tjaldstæði í Árneshreppi svo allir ættu að finna eitthvað við sitt hæfi. 

 

Allir eru velkomnir á skákhátíðina og þátttaka í öllum viðburðum er ókeypis. 

 

Nánari upplýsingar veitir Róbert Lagerman mótstjóri í síma 6969658, netfang [e-mail].

Nakamura einn efstur eftir sigur á Anand

Bandaríkjamaðurinn Hikaru Nakamura (2784) fer mjög mikinn á Tal Memorial sem fram fer þessa dagana í Moskvu. Í sjöttu umferð, sem fram fór í dag, vann hann Anand (2786) mjög örugglega. Nakamura er nú efstur með 4,5 vinning. Öðrum skákum lauk með jafntefli þar með talið skák Gelfand (2755) og Carlsen (2868). Gelfand er annar með 4 vinninga en Carlsen og Mamedyarov (2753) eru í 3.-4. sæti með 3,5 vinning.

Frídagur er á morgun. Í sjöundu umferð, sem fram fer á föstudag og hefst kl. 11 mætast meðal annars Carlsen og Morozevich sem og Nakamura og Gelfand.

• Heimasíða mótsins
• Beinar útsendingar
• Chessbomb

Mika Karttunen skákmeistari Finnlands

Alþjóðlegi meistarinn Mika Karttunen (2441) varð í dag skákmeistari Finnlands. Í öðru leyti varð alþjóðlegi meistarinn Vilka Sipila (2411) og í þriðja sæti varð hinn ungi FIDE-meistari Daniel Ebeling (2368).

• Heimasíða mótsins 
• Chess-Results

Fjölmenni í fjötefli

Fjölmenni mætti í fjöltefli á sautjánda júní. Þrátt fyrir leiðinlegt veður var ágætis skjól við útitaflið þar sem Hjörvar Steinn og Hannes Hlífar tefldu við tugi gesta. Hjörvar hóf taflið en Hannes kom inn í miðju fjöltefli og léku þeir félagar sitthvorn leikinn dágóða stund. Hannes kláraði svo fjölteflið sem Hjörvar hóf.

Tveir skákmenn lögðu Hjörvar að velli; gamall félagi hans úr skáksveit Rimaskóla Hörður Aron Hauksson, og  Pétur Pétursson kennari.

Myndaalbúm (HJ)