Tal Memorial: Carlsen vann Anand - Gelfand og Nakamura efstir

Áskorandinn Magnus Carlsen (2868) vann heimseistarann Vishy Anand (2786) í fimmtu umferð Tal Memorial sem fram fer í dag. Sennilega er þetta síðasta skák þeirra fyrir heimsmeistaraeinvígi þeirra á milli sem fram fer í Chennai í Inlandi í nóvember nk. Gelfand (2755) vann Morozevich og er efstur ásamt Nakamura (2784). Öðrum skákum lauk með jafntefli. Carlsen er þriðji ásamt Mamedyarov (2753.

Í sjöttu umferð, sem fram fer á morgun og hefst kl. 11. mætast Gelfand og Carlsen. Nakamura mætir Anand.

 

• Heimasíða mótsins
• Beinar útsendingar
• Chessbomb

Dagur endaði með 5 vinninga - Grandelius sigurvegari mótsins

Alþjóðlegi meistarinn Dagur Arngrímsson (2396) tapaði sínum skákum í 8. og 9. umferð Gullna sands mótsins í Albena í Búlgaríu. Dagur hlaut 5 vinninga og endaði í 65.-98. sæti.

Sænski Eyjamaðurinn Nils Grandelius (2544) sigraði á mótinu en hann hlaut 7½ vinning.

Frammistaða Dags samsvaraði 2396 skákstigum og hækkar hann um 3 stig fyrir hana.

Upplýsingar um einstök úrslit hjá Degi má nálgast hér.

222 skákmenn tóku þátt frá 31 landi. Þar af voru 38 stórmeistarar og 46 alþjóðlegir meistarar. Dagur var nr. 65 á stigum.

• Heimasíða mótsins
• Chess-Results
• Beinar útsendingar (hefjast kl. 12)

Rúnar gengur í Skákfélag Íslands

Þrenn félagaskipti hafa átt sér stað síðustu daga og öll tengjast þau Skákfélagi Íslands. Rúnar Berg (2126) hefur gengið til við félagið en hann var síðast í Taflfélaginu Helli.

Páll Andrason (1775) og Eiríkur Örn Brynjarsson (1629) hafa hins vegar sagt sig úr félaginu. Þeir hafa gengið til liðs við Kórdrengina.

 

Aðalfundur SSON

Boðað er til aðalfundar SSON miðvikudaginn 26. júní, fundurinn fer fram í Selinu á Selfossi og hefst kl. 19:30.

Dagskrá aðalfundar

1. Skýrsla stjórnar (formaður og gjaldkeri)
2. Fischersetur
3. Landsmót UMFÍ á Selfossi
2. Kosning stjórnar
3. Mótahald 2013-2014
4. Önnur mál

Fyrir liggur að formaður mun ekki gefa kost á sér til embættis áfram og mögulega verða einhverjar aðrar breytingar á stjórn.  Eitt framboð til formanns hefur þegar borist.

Heimasíða SSON

Lýðveldisskákmót í Vin, þriðjudag klukkan 13!

Skákfélag Vinjar býður til hraðskákmóts í Vin, Hverfisgötu 47, þriðjudaginn 18. júní klukkan 13 í tilefni af 69 ára afmæli lýðveldisins. Tefldar verða 6 umferðir og að hætti hússins verður boðið upp á gómsætar veitingar í leikhléi.

Lýðveldisskákmótið markar jafnframt upphaf hátíðahalda vegna 10 ára afmælis skákstarfs í Vin. Í júní 2003 mætti Hrókurinn á Hverfisgötuna, með í för voru meistarar á borð við Ivan Sokolov, Luke McShane, Predrag Nikolic, Nick de Firmian og Reginu Pokorna. Í kjölfarið var stofnað skákfélag sem hefur blómstrað allar götur síðan, og er stór hluti af samfélaginu í Vin.

Allir eru velkomnir á lýðveldisskákmótið í Vin og þátttaka er ókeypis. 

Tal Memorial: Nakamura efstur eftir sigur á Caruana

Nakmura (2784) er í miklu stuði á Tal Memorial. Hann tapaði glæsilega í fyrstu umferð en hefur nú unnið þrjár skákir í röð og er einn efstur. Fórnarlamb dagsins var Caruana (2774). Öðrum skákum lauk með jafntefli og þar með talið skák Carlsen (2868) og Andreikin (2713). Mamedyarov (2753) og Gelfand (2755) eru í 2.-3. sæti með 2,5 vinning.

Fimmta umferð verður tefld á morgun og hefst kl. 11. Þá mætast meðal annars Carlsen og Anand sem mætast munu í heimsmeistaraeinvígi í nóvember. Nakamura mætir Andreikin.

 

• Heimasíða mótsins
• Beinar útsendingar
• Chessbomb

Fjöltefli í dag á Útitaflinu

Eins og undanfarin ár mun Skákakademían standa fyrir fjöltefli á 17. júní. Fjölteflið fer fram við útitaflið í Lækjargötu. Dagskráin hefst klukkan tvö og stendur til fimm. Nokkrir skákmeistarar munu tefla við gesti og gangandi. Helst bera að nefna þá Hjörvar Stein Grétarsson sem mun hefja fjölteflið og nýbakaðan Íslandsmeistara Hannes Hlífar Stefánsson. Þeir félagar munu einnig taka léttar hraðskákir við gesti og hægt er að óska eftir skákum á netfangið [e-mail].

Félagarnir Björn og Björgvin

 

Davíð Kjartansson fékk smá hjálp frá dóttur sinni í fyrra.

 

Hjörvar tefldi einnig á fjölteflinu í fyrra.

 

 

Birgir Berndsen og feðgarnir Vignir Vatnar og Stefán Már.

Skákþáttur Morgunblaðsins: Tólfti Íslandsmeistaratitill Hannesar í augsýn

Flest bendir til þess að Hannes Hlífar Stefánsson nái að landa sínum tólfta Íslandsmeistaratitli á Opna Íslandsmótinu sem lýkur um helgina í Turninum við Borgartún. Staða efstu manna eftir 8. umferð:1.Hannes Hlífar Stefánsson 7 ½ v. (af 8) 2. Björn Þorfinnsson 6 ½ v. 3.-5. Hjörvar Steinn Grétarsson, Bragi Þorfinnsson og Héðinn Steingrímsson 6 v.

Hart er barist um Íslandsmeistaratitil kvenna en þær efstu voru Lenka Ptacnikova, Hallgerður Helga Þorsteinsdóttir, Elsa María Krístínardóttir og Jóhanna Björg Jóhannsdóttir, allar með 4 ½ v.

Mót þetta fer fram við þær óvenjulegu aðstæður að teflt er á 20. hæð með útsýni yfir fjallahringinn og borgarlandið, yfirbragð þess er hrátt með létt „blúsaða" New York vöruhúss-stemningu svífandi yfir vötnum í ópússuðu rými; þó lýsing geti varla talist góð og kliður berist frá aðliggjandi sal sem hýsir „Birnu-kaffi" hafa keppendur ekki kvartað mikið; einna helst að einhverjir séu að agnúast út í skákstjórana en þeir er nú ýmsu vanir. Ýmis óvænt úrslit hafa séð dagsins ljós, Héðinn Steingrímsson féll á tíma í flókinni stöðu gegn Bandaríkjamanninum Michael Grove í 2. umferð og Bragi Þorfinnsson tapaði fyrir Lofti Baldvinssyni, sem í engu samhengi við slæma byrjun og erfitt miðtafl, hristi fram úr erminni magnaða leikfléttu sem leiddi til máts. Viðureignir sem flokka má undir uppgjör okkar bestu manna eru of fáar að mati undirritaðs og enginn skákmaður hefur náð árangri yfir 2500 elo-stig nema Hannes Hlífar, sem hlaut 50% vinningshlutfall á mótinu í fyrra, en nú blæs byrlegar fyrir honum og árangur hans er uppá 2729 elo-stig.

Sama dag og mótið hófst steig Björn Þorfinnsson upp úr flensu sem herjað hafði á alla fjölskylduna og hóf að vinna hverja skákina á fætur annarri. Eftir flækjur og furður sat hann uppi með gjörtapað tafl gegn Hjörvari Steini Grétarssyni í 5. umferð, en sneri taflinu við í tímahraki Hjörvars og vann! Síðan lagði hann Henrik Danielsen að velli með tilþrifum. Í 7. umferð tapaði hann fyrir Hannesi Hlífari í 7. umferð en svaraði með því að vinna Guðmund Kjartansson í 8. umferð:

Henrik Danielsen - Björn Þorfinnsson

Reti-byrjun

1. Rf3 Rf6 2. g3 d5 3. Bg2 c6 4. b3 g6 5. Bb2 Bg7 6. O-O O-O 7. c4 He8 8. d4 Re4 9. Rc3 Rxc3 10. Bxc3 Be6 11. c5!?

Lokar taflinu en skarpara var 11. Rg5.

11. ... Rd7 12. b4 Bg4 13. Dd2 Bxf3 14. Bxf3 e5 15. e3 exd4 16. Bxd4

Var ekki eðlilegra að halda biskupaparinu með 16. exd4 þó svarti hafi ágætt tafl eftir 16. ... Rf6 eða 16. ... Rf8.

16. ... Bxd4 17. Dxd4 Re5 18. Bg2 Df6 19. Kh1 Df5

Einn vandi hvítu stöðunnar varðar aðgang riddarans að c4-reitnum.

20. Had1 Dh5 21. h3 a6 22. Hb1 g5 23. g4?!

Þessi og næstu leikir Henriks virka ráðleysislegir. Eðlilegra var 23. f4 gxf4 24. exf4 Rg4 25. Hf3 eins og „Houdini" stingur uppá.

23. ...Dh4 24. Kg1 Rg6 25. a4 h5 26. Hbd1 He6 27. f4?

Ekki rétta augnablikið fyrir þessa framrás, best var 27. gxh5 Dxh5 28. Dg4 o.s.frv.

27. ... gxf4 28. exf4 He2! 29. gxh5 Dg3 30. Hf2 Rh4!

Vinnur, 31. Hxe2 er svarað með 31. ... Rf3+ og drottningin fellur.

31. Kf1 Rf5! 32. Hxe2 Rxd4 33. Hxd4 Dc3 34. Hed2 He8

- og hvítur gafst upp. Hann gat barist áfram með 35. b5 en staðan er tiltölulega vonlaus.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 9. júní 2013

Skákþættir Morgunblaðsins

[Event "Skákþing Íslands"] [Site "?"] [Date "2013.06.04"] [Round "6.1"] [White "Danielsen, Henrik"] [Black "Thorfinnsson, Bjorn"] [Result "0-1"] [ECO "D78"] [WhiteElo "2500"] [BlackElo "2377"] [PlyCount "68"] [EventDate "2013.??.??"] 1. Nf3 Nf6 2. g3 d5 3. Bg2 c6 4. b3 g6 5. Bb2 Bg7 6. O-O O-O 7. c4 Re8 8. d4 Ne4 9. Nc3 Nxc3 10. Bxc3 Be6 11. c5 Nd7 12. b4 Bg4 13. Qd2 Bxf3 14. Bxf3 e5 15. e3 exd4 16. Bxd4 Bxd4 17. Qxd4 Ne5 18. Bg2 Qf6 19. Kh1 Qf5 20. Rad1 Qh5 21. h3 a6 22. Rb1 g5 23. g4 Qh4 24. Kg1 Ng6 25. a4 h5 26. Rbd1 Re6 27. f4 gxf4 28. exf4 Re2 29. gxh5 Qg3 30. Rf2 Nh4 31. Kf1 Nf5 32. Rxe2 Nxd4 33. Rxd4 Qc3 34. Red2 Re8 0-1

Dagur vann stórmeistara í sjöundu umferð

Alþjóðlegi meistarinn Dagur Arngrímsson (2396) vann sína þriðju skák í röð þegar hann lagði makedónska stórmeistarann Milan Drasko (2469) í sjöundu umferð Gullna sands í Albena í Búlgaríu í morgun. Dagur hefur 5 vinninga og er í 10.-34. sæti.

Í dag eru tefldar tvær skákir. Í síðari skák dagsins mætir hann indverska stórmeistaranum Deep Sengupta (2548). 

Upplýsingar um einstök úrslit hjá Degi það af er móti má nálgast hér.

Stórmeistararnir Zbynek Hracek (2625), Tékklandi, Vladimir Georgiev (2532), Makedóníu, Nils Grandelius (2544), Svíþjóð eru efstir með 6 vinninga.

222 skákmenn taka þátt frá 31 landi. Þar af eru 38 stórmeistarar og 46 alþjóðlegir meistarar. Dagur er nr. 65 á stigum.

• Heimasíða mótsins
• Chess-Results
• Beinar útsendingar (hefjast kl. 12)

Lenka vann í fyrstu umferð í Teplice - verður í beinni útsendingu í dag

Lenka Ptácníková (2255) vann stigalágan danskan andstæðing (1798) í fyrstu umferð opins móts í Teplice í Tékklandi sem hófst í gær. Sigurður Eiríksson (1946) og Jakob Sævar Sigurðsson (1768) sem einnig taka þátt töpuðu báðir í fyrstu umferð.

Lenka mætir í dag stórmeistaranum Marian Jurcik (2525) frá Slóvakíu. Sú viðureign verður sýnd beint á vefsíðu mótsins og hefst kl. 14.

• Heimasíða mótsins
• Beinar útsendingar (hefjast kl. 14)
• Chess-Results