Tal Memorial: Caruana vann Carlsen - fjórir efstir

Þriðja umferð Tal Memorial fór fram í Moskvu í dag. Stærstu tíðindi umferðarinnar voru þau að Caruana (2774) vann Carlsen (2868) með svörtu - sveið hann í endatafli. Anand (2786) vann Morozevich (2760) og Nakamura (2784) sigraði Karjakin (2782). Caruana og Nakamura eru efstir með 2 vinninga ásamt Mamedyarov (2753) og Gelfand (2755).

Frídagur er á morgun. Mótinu verður framhaldið 17. júní kl. 11. Þá mætast meðal annars Caruana-Nakamura og Andreikin-Carlsen.

 

• Heimasíða mótsins
• Beinar útsendingar
• Chessbomb

Dagur vann í sjöttu umferð

Alþjóðlegi meistarinn Dagur Arngrímsson (2396) vann sína aðra skák í röð á Gullna sands mótinu í Albena í Búlgaríu þegar hann lagði georgískan FIDE-meistara (2197) að velli. Dagur hefur nú 4 vinninga og er í 26.-65. sæti.

Í sjöundu umferð, sem fram fer á morgun, teflir hann við makedónska stórmeistarann Milan Drasko (2469). Upplýsingar um einstök úrslit hjá Degi það af er móti má nálgast hér.

Stórmeistararnir Zbynek Hracek (2625), Tékklandi, og Vladislav Nevednichy (2580), Rúmeníu, eru efstir með 5,5 vinning.

222 skákmenn taka þátt frá 31 landi. Þar af eru 38 stórmeistarar og 46 alþjóðlegir meistarar. Dagur er nr. 65 á stigum.

• Heimasíða mótsins
• Chess-Results
• Beinar útsendingar (hefjast kl. 12)

17. júní: Fjöltefli

Eins og undanfarin ár mun Skákakademían standa fyrir fjöltefli á 17. júní. Fjölteflið fer fram við útitaflið í Lækjargötu. Dagskráin hefst klukkan tvö og stendur til fimm. Nokkrir skákmeistarar munu tefla við gesti og gangandi. Helst bera að nefna þá Hjörvar Stein Grétarsson sem mun hefja fjölteflið og nýbakaðan Íslandsmeistara Hannes Hlífar Stefánsson. Þeir félagar munu einnig taka léttar hraðskákir við gesti og hægt er að óska eftir skákum á netfangið [e-mail].

 

Félagarnir Björn og Björgvin

 

Davíð Kjartansson fékk smá hjálp frá dóttur sinni í fyrra.

 

Hjörvar tefldi einnig á fjölteflinu í fyrra.

 

 

Birgir Berndsen og feðgarnir Vignir Vatnar og Stefán Már.

Gelfand, Mamedyarov og Carlsen efstir á Tal Memorial

Önnur umferð Tal Memorial fór fram í Moskvu í dag. Sigurvegarar dagsins voru tveir. Gelfand (2755) sem vann Caruana (2774) á snaggaralegan hátt og Nakamura (2775) sem lagði Kramnik (2811) að velli. Gelfand, Mamedyarov og Carlsen (2868) eru efstir með 1,5 vinning. Það vekur athygli hverjir verma neðstu sætin. Anand (2786) er næstneðstur með hálfan vinning en Kramnik rekur lestina. Er ekki enn kominn á blað.

Þriðja umferð fer fram á morgun og hefst kl. 11. Þá mætast meðal annars Carlsen og Caruana.

• Heimasíða mótsins
• Beinar útsendingar
• Chessbomb

Dagur með 3 vinninga eftir 5 umfeðir í Albena

Alþjóðlegi meistarinn Dagur Arngrímsson (2396) hefur 3 vinninga eftir 5 umferðir á Golden Sands mótinu í Albena í Búlgaríu. Í dag gerði hann jafnteflivið franskan FIDE-meistara (2261).

Upplýsingar um einstök úrslit hjá Degi það af ser móti má nálgast hér.

222 skákmenn taka þátt frá 31 landi. Þar af eru 38 stórmeistarar og 46 alþjóðlegir meistarar. Dagur er nr. 65 á stigum.

• Heimasíða mótsins
• Chess-Results
• Beinar útsendingar (hefjast kl. 12)

Nýtt fréttabréf SÍ

Nýtt fréttabréf Skáksambands Íslands kom út í dag en bréfið kemur út einu sinni á mánuði yfir sumarið. Bréfið er sent í tölvupósti til viðtakenda. Hægt er að skrá sig fyrir fréttabréfinu hér á Skák.is (ofarlega til vinstri).

Meðal efnis er:

• Hannes Hlífar Íslandsmeistari í tólfta sinn
• Lenka Íslandsmeistari kvenna
• Björn með stórmeistaraáfanga
• Arnar Íslandsmeistari í atskák
• Björn og Vignir fengu stigaverðlaun
• Skákhátíð á Ströndum, 21.-23. júní
• Verkaskipting stjórnar SÍ
• Nýir formenn
• NM kvenna
• Niðurtalning N1 Reykjavíkurmótsins 2014
• Mót á döfinni

Fréttabréfið má nálgast hér.

Hægt er að nálgast eldri fréttabréf hér.

Fjöltefli í Háskóla unga fólksins

Háskóli unga fólksins hefur stækkað mikið undanfarin ár. Háskólinn sem er eins konar kennslubúðir nemenda fer ávallt fram í byrjun júní. Í ár var gríðarleg ásókn í skólann og komust færri að en vildu. Skemmtileg hefð hefur myndast síðustu ár að bjóða nemendum upp á fjöltefli. Í ár tók Skákakademían verkið að sér og tefldi Stefán Bergsson við fjölmargt af framtíðarfólki landsins. 

Ein stúlka vakti mikla athygli í fjölteflinu. Tefldi góða byrjun og fór svo í mátsókn með riddara og drottningu. Litlu munaði að sú sókn myndi virka og hafnaði hún til dæmis jafnteflisboði. Stúlka þessi er í Langholtsskóla þar sem skák verður kennd í vali á unglingastigi næsta vetur og var hún hvött til að velja sig inn í skákina.

Fjölteflið tókst í alla staði vel enda fyrirmyndar skipulagning hjá starfsfólki Háskóla unga fólksins.

Myndaalbúm 

Vigfús sigraði á hraðkvöldi Hellis

Vigfús Ó. Vigfússon sigraði með fullu húsi 7 vinninga í jafn mörgum skákum á hraðkvöldi Hellis sem fram fór 10. júní. Eftir að hafa tröll grísað á Bárð í fyrstu umferð þá komu vinningarnir á færibandi. Elsa María var að vísu nálægt því að ná jafntefli í næst síðustu umferð en þegar hún féll á tíma átti Vigfús sekúndu eftir á klukkunni.

Annar var Jón Úlfljótsson með 5,5 vinning en hann fylgdi Vigfúsi eins og skugginn allt mótið og átti möguleika á efsta sætinu í lokaumferðinni ef úrslitin hefðu orðið honum hagstæðari. Þriðji varð svo Örn Leó Jóhannsson með 5 vinninga. Vigfús dró svo Gunnar Björnsson í happdrættinu og báðir fengu þeir úttektarmiða á Saffran.

Næsta hraðkvöld verður 24. júní nk. og verður það síðasta hraðkvöldið þangað til í haust.

Lokastaðan á hraðkvöldinu:

Röð   Nafn                         Vinningar  M-Buch. Buch. Progr.

  1   Vigfús Ó. Vigfússon,             7        20.0  28.5   28.0
  2   Jón Úlfljótsson,                 5.5      20.5  28.5   23.5
  3   Örn Leó Jóhannsson,              5        20.0  29.5   19.0
 4-7  Páll Andrason,                   4        21.5  30.5   18.0
      Gauti Páll Jónsson,              4        16.5  23.5   17.0
      Gunnar Nikulásson,               4        16.5  20.5   16.0
      Björn Hólm Birkisson,            4        16.0  22.5   13.0
8-11  Elsa María Kristínardóttir,      3.5      22.0  32.5   17.0
      Gunnar Björnsson,                3.5      19.0  27.0   15.0
      Hörður Jónasson,                 3.5      16.0  22.0   13.5
      Hjálmar Sigurvaldason,           3.5      15.5  19.5   11.5
 12   Bárður Örn Birkisson,            3        17.5  24.5   12.0
 13   Heimir Páll Ragnarsson,          2.5      13.5  18.5    9.5
 14   Óskar Víkingur Davíðsson,        2        17.5  21.5    6.0
 15   Björgvin Kristbergsson,          1        17.5  23.0    5.0
 16   Pétur Jóhannesson,               0        15.0  20.0    0.0

Styrkjareglur SÍ taka breytingum

Stjórn SÍ hefur gert smávægilegar breytingar á styrkjareglum sínum. Breytingin felur í sér að styrkumsóknir verða afgreiddar framvegis þrisvar sinnum á ári, þ.e. 10. febrúar, 10. júní og 10. október. Umsóknir þurfa að hafa borist eigi síðar en í lok mánaðarins á undan.

Vegna þessara breytinga nú hefur fresturinn til að sækja um styrki verið lengdur til 30. júní í ár og verða styrkumsóknir sem bárust eða berast eftir 10. júní afgreiddar eigi síðar en 10. júlí næstkomandi.

Styrkjareglur SÍ

Aðalmarkmið styrkveitinga stjórnar Skáksambands Íslands til einstaklinga er að styðja við bakið á þeim skákmönnum sem sýnt hafa mestar framfarir, metnað og ástundun á síðustu 12 mánuðum, og þykja því líklegastir til að ná enn lengra í nánustu framtíð. Einnig er markmiðið að verðlauna fyrir afburðaárangur og hvetja þannig til afreka.

Styrkjum frá SÍ er ekki ætlað að styrkja hinn almenna skákáhugamann til farar erlendis, heldur einungis þá sem þykja skara fram úr. Sérstök áhersla er lögð á yngri skákmenn sem eru tilbúnir til að leggja á sig þjálfun til að standa sig á þeim mótum sem styrkbeiðni liggur fyrir um. 

Við allar úthlutanir á að vera lögð áhersla á jafnrétti kynjanna og að þeim stúlkum sem skarað hafa fram úr í hverjum aldursflokki sé gert kleift að afla sér reynslu á skákmótum erlendis til jafns á við stráka. Sams konar kröfur um ástundun, árangur og framfarir eru hins vegar gerðar til stúlkna og drengja, kvenna og karla, hvað styrkjaúthlutanir varðar

Viðmið við styrkúthlutanir

1.     Allir styrkþegar SÍ (ungir, alþjóðlegir og aðrir) þurfa að uppfylla eftirfarandi þrjú skilyrði:

• Hafa teflt 50 kappskákir á síðustu 24 mánuðum fyrir árið 2010 og 60 skákir fyrir árið 2011 og síðar.
• Hafa sýnt umtalsverðar framfarir á sl. 12 mánuðum, sem sjáist m.a. á árangri á skákmótum ársins, hækkun skákstiga og reglulegri þjálfun.
• Hafa sýnt virkni í skákmótum innanlands.

2.     Ungir skákmenn (25 ára og yngri) hafa forgang þegar kemur að úthlutun ferðastyrkja. Eftirfarandi börn og unglingar njóta sérstaks forgangs:

• Undir 12 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 12-16 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 16-20 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 20-25 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)

3.     Alþjóðlegir meistarar geta fengið ferðastyrki frá SÍ óháð aldri.

4.     Þeir sem þiggja stórmeistaralaun geta ekki fengið almenna ferðastyrki frá SÍ.

5.     Aðrir skákmenn geta fengið ferðastyrki ef þeir ná árangri sem samsvarar 2350 stigum eða meira ("performance") í móti sem styrkur er sóttur um. Ákvörðun um styrkveitingu er tekin eftir mót.

Umsóknareyðublöð og skil 

Allir sem sækja um styrk til SÍ þurfa að leggja fram umsókn á þar til gerðu rafrænu eyðublaði.

Rafræna eyðublaðið

Þar á að koma fram hvers vegna tiltekið skákmót er valið og hvers vegna viðkomandi telur að hann hafi rétt á styrk frá SÍ skv. ofangreindum skilyrðum.

Í umsókninni skal lögð fram æfingaáætlun þar sem þjálfun fyrir tiltekið mót og þátttaka á skákmótum næstu 3 mánuði er skýrð.

Ef umsókn er ófullnægjandi og ekki skilað á þann hátt sem að ofan greinir, er henni sjálfkrafa vísað frá. 

Styrkir SÍ eru afgreiddir þrisvar sinnum á ári. 10. febrúar, 10. júní og 10. október. Sækja þarf um styrkina í lok mánaðarins á undan. Ætlast er til að sótt sé um styrki áður en haldið er mót en ef góðar aðstæður valda því að sótt er um eftir á er tekið tillit til þess.

Tímabundið sérákvæði: Þar sem þessar reglur eru  settar á í júní 2013 er umsóknarfrestur lengdur til júníloka 2013. Svör við umsóknunun sem bárust/berast eftir 10. júní verða afgreiddar eigi síðar en 10. júlí 2013.

Sérstök styrkjanefnd, skipuð af stjórn SÍ, fer yfir allar umsóknir og gerir tillögur til stjórnar um afgreiðslu styrkja hverju sinni. 

Að jafnaði getur enginn fengið meira en 60.000 krónur á ári í styrk frá SÍ, nema þegar hann er fulltrúi Íslands á alþjóðlegum mótum erlendis. Ef einhver þykir skara sérstaklega fram úr á sl. 12 mánuðum er þó hægt að gera undantekningu á þessari reglu og hækka árlegan styrk til viðkomandi aðila. 

Skyldur styrkþega gagnvart SÍ: 

Að loknu móti skulu styrkþegar senda stutta frásögn til styrkjanefndar og skýra skák frá mótinu sem þeir hlutu styrk til að taka þátt í. Styrkjanefnd mun síðan birta greinina í einhverjum miðli skákhreyfingarinnar.

Ef stjórn SÍ fær áreiðanlegar upplýsingar um ósæmilega og vítaverða hegðun styrkþega á skákstað (t.d. áfengisnotkun á meðan á móti stendur) og ef styrkþegi hættir á skákmóti án löglegra forfalla, mun viðkomandi vera sviptur þeim styrk sem honum var veittur. Viðkomandi mun auk þess ekki koma til greina við úthlutun styrkja SÍ næstu 12 mánuði.

Styrkir eru borgaðir út eftir að skákmóti lýkur, þegar ljóst er að skyldur styrkþega hafa verið uppfylltar. 

Reglur um áfangastyrki og boð á EM-einstaklinga 

Stórmeistara áfangar: SÍ veitir íslenskum skákmanni sem nær stórmeistara áfanga karla 300þús krónur. Hægt er að fá tvo þannig styrki.

Alþjóðlegir áfangar: SÍ veitir íslenskum skákmanni sem nær alþjóðlegum áfanga  karla 100þús krónur. Hægt er að fá þrjá þannig styrki.

Áfangastyrkir eru ekki veittir þeim sem hafa náð viðkomandi titlum.

EM-einstaklinga í opnum flokki: 

Sigurvegari á Skákþingi Íslands er sendur af SÍ á næsta EM-einstaklinga.  

Ef íslenskur skákmaður,

a) nær að fara yfir 2600 FIDE-stig síðustu tólf mánuði fyrir EM

b) eða vinnur Reykjavíkurmótið (jafnt efsta sæti nægir)

c) eða nær árangri 7.umferða eða lengra skákmóti, sem mælist sem frammistaða ("performance") upp á 2670 FIDE-stig eða meira og innifelur GM-áfanga árangur

þá býður SÍ honum á næsta EM einstaklinga.

Ef stutt er frá því að réttur til EM náðist fram að næsta móti, er heimilt að taka boðið út á þarnæsta EM í staðinn.

 

EM-einstaklinga í kvennaflokki: 

Ef íslensk skákkona nær,

a) alþjóðlegum áfanga karla

b) eða nær árangri í 7.umferða eða lengra skákmóti sem mælist sem frammistaða ("performance") upp á 2450 FIDE-stig eða meira og innifelur WGM-áfanga árangur

þá býður SÍ henni á næsta EM-einstaklinga í kvennaflokki.

Ef stutt er frá því að réttur til EM náðist fram að næsta móti, er heimilt að taka boðið út á þarnæsta EM í staðinn.

Tal Memorial: Carlsen vann Kramnik

Tal Memorial hófst í dag í Moskvu. Stigahæsti skákmaður heims, Magnus Carlsen (2868), gerði sér lítið fyrir og vann Kramnik (2811) í fyrstu umferð. Caruana (2774) lagði heimsmeistarann Anand (2783). Flottasta skák umferðarinnar var hins vegar sigur Mamedyarov (2753) á Nakamura (2775). Aserinn fórnaði manni á laglegan hátt í 19. leik. Fórnina verður að finna í skákdálki Fréttablaðsins á laugardag.

Meðal frétta á heimasíðu mótshaldara er um Boris Spassky. Skráningu hans á stigalista FIDE hefur verið breytt en þar er hann nú skráður Rússi en frá 1984 og þar til nú hefur hann verið þar skráður á stigalistanum sem Frakki.

Önnur umferð fer fram á morgun og hefst kl. 11.

• Heimasíða mótsins
• Beinar útsendingar
• Chessbomb