EM-keppandinn: Mikael Jóhann Karlsson

Átta fulltrúar frá Íslandi taka þátt í EM ungmenna sem fram fer í Budva í Svartfjalllandi dagana 28. september - 9. október. Fulltrúarnir átta standa þessa dagana í fjáröflun fyrir keppnina en stærsti kostnaðurinn lendir á þeim sjálfum. Keppendurnir verða kynntir til leiks næstu daga og vikur hér á Skák.is. Byrjað er á þeim elsta Mikael Jóhanni Karlssyni sem keppir í U18.

Nafn

Mikael Jóhann Karlsson.

Fæðingardagur

26. júní 1995.

Félag

Skákfélag Akureyrar.

Hefurðu teflt áður á EM/HM ungmenna?

Keppti síðast á HM í Tyrklandi 2009 og afþakkaði boðið á EM í fyrra.

Helstu skákafrek

Íslandsmeistari í skólaskák 2008 og 2011, Íslandsmeistari drengja og telpna 2010, unglingameistari Íslands 2011 (U20), Meistari Skákskóla Íslands 2012, annað sæti á Unglingameistaramóti Íslands 2012 (eftir Hjörvari).  Vann Norðurlandsmót unglinga 7 sinnum í röð  8 sinnum allt í allt. Vann B-flokk Haustmóts TR 2011, 3. sæti á Skákþingi Reykjavíkur 2013 og 3. sæti á NM í skólaskák (17-19 ára).

Skemmtilegasta skákferðin

Czech Open 2013 sem var að ljúka, ég fór í ferð með félögum mínum og var á tímabili í toppbaráttunni og græddi 40 stig.

Eftirminnilegasta skákin

Þegar ég vann Dag Andra Friðgeirsson í úrslitaskák um fyrsta Íslandsmeistaratitilinn minn!

Viltu styrkja ungmennin sem fara á EM?

Það er hægt með því að kaupa vörur á afar hagstæðu verði á Netsöfnun.is og styrkja um leið ungmennin átta.

Það er einnig hægt að styrkja við ungmennin með framlögum með greiðslukorti; 2.000 kr., 5.000 kr. og 10.000 kr.

Guðmundur með 3,5 vinning eftir 4 umferðir - mætir Gustafsson á morgun

Alþjóðlegi meistarinn Guðmundur Kjartansson (2434) er með 3,5 vinning að loknum fjórum umferðum á alþjóðlegu móti sem nú er í gangi í Barcelona. Í dag vann hann heimamann með 2216 skákstig en andstæðingarnir í umferðum 1-3 höfðu 2045-2170 skákstig.

Í fimmtu umferð, sem fram fer á morgun, teflir hann við þýska stórmeistarann og félagsmann í Taflfélagi Vestmannaeyja Jan Gustafsson (2619). Skákin verður í þráðbeinni útsendingu á vef mótsins og hefst kl. 14:30.

• Heimasíða mótsins
• Chess-Results
• Beinar útsendingar (hefjast almennt kl. 14:30)

Minningarmót um Guðmund Arnlaugsson fer fram á laugardag í MH

Minningarmót um Guðmund Arnlaugsson fer fram í Menntaskólanum við Hamrahíð laugardaginn 31. ágúst. Mótið fer fram í tilefni aldarafmælis Guðmundar sem fæddist 1. september 1913. Á afmælisdaginn sjálfan verður svo málþing tileinkað Guðmundi þar sem Helgi Ólafsson verður fulltrúi skákhreyfingarinnar og fjallar um feril Guðmundar bæði skákmanns og ekki síður um feril hans sem virts skákdómara.

Heildarverðlaun á mótinu eru 150.000 kr. Fyrirkomulag mótsins og málþingsins verður nánar kynnt á morgun en mótið hefst kl. 14. Skráning hefst einnig á morgun Skák.is. Mótið er öllum opið en gamlir nemendur Guðmundar eru sérstaklega hvattir til að mæta. Þátttökugjöld verða 1.000 kr. en 500 kr. fyrir 15 ára og yngri.

Skáksamband Íslands stendur fyrir mótinu í samvinnu við afkomendur Guðmundar, Menntaskólann við Hamrahlíð og Nýherja.

Meistaramót Hellis hefst í kvöld

Meistaramót Hellis 2013 hefst mánudaginn 26. ágúst klukkan 19:30. Mótið er 7 umferða opið kappskákmót sem lýkur 9. september.   Vegleg og fjölbreytt verðlaun eru í boði.  Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra skákstiga. Skráning í mótið er hér á heimasíðu Hellis og hér á Skák.is.  Upplýsingar um þegar skráða keppendur má finna hér.

Teflt er á mánudögum, þriðjudögum og miðvikudögum.

Aðalverðlaun:

1. 40.000
2. 30.000
3. 20.000

Aukaverðlaun:

• Skákmeistari Hellis: Houdini 3 Aquarium Pro
• Besti árangur undir 2200 skákstigum: Houdini 3 Aquarium Standard
• Besti árangur undir 1800 skákstigum:ChessOK Aquarium 2012

• Besti árangur undir 1600 skákstigum: CT-ART 4.0 (taktískar æfingar)

• Besti árangur stigalausra: Skákbók hjá Sigurbirni að verðmæti kr.5.000.
• Unglingaverðlaun (15 ára og yngri), skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.
• Kvennaverðlaun, skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

• Félagsmenn kr. 3.000; aðrir 4.000-
• Unglingar 15 ára og yngri: Félagsmenn: 2.000; Aðrir 3.000.
• Allir titilhafar fá frítt í mótið

Umferðartafla: 

• 1. umferð, mánudaginn, 26. ágúst, kl. 19:30
• 2. umferð, þriðjudaginn, 27. ágúst, kl. 19:30
• 3. umferð, miðvikudaginn, 28. ágúst, kl. 19:30
• 4. umferð, mánudaginn, 2. september, kl. 19:30
• 5. umferð, þriðjudaginn, 3. september, ágúst, kl. 19:30
• 6. umferð, miðvikudaginn, 4. september, kl. 19:30
• 7. umferð, mánudagur, 9. september, kl. 19:30

Óvæntir hlutir á Heimsbikarmóti - þrír Rússar í undanúrslitum

Það má með sanni segja að úrslitin í átta manna úrslitum Heimsbikarmótsins í skák hafi verið heldur óvænt. Kramnik (2784) komst áfram eftir sigur á Korobov (2720) en í hinum þremur einvígunum komust hinir stigalægri áfram. Tomashevsky (2706) heldur áfram að gera frábæra hluti og sló nú Kamsky (2741), Vachier-Lagreve (2719) hafði betur gegn Caruana (2796) og Andreikin (2716) vann Svidler (2746).

Það eru því þrír Rússar og einn Frakki sem eru eftir. Undanúrslitin hefjast á morgun og þá mætast Tomashevsky - Andreikin og Vachier-Lagrave - Kramnik.

• Heimasíða mótsins 
• Beinar útsendingar (hefjast kl. 13)

Dagur endaði með 3,5 vinning

Alþjóðlegi meistarinn Dagur Arngrímsson (2385) endaði í 8.-9. sæti af 10 keppendum í alþjóðlegu móti í Búdapest í sem lauk í dag. Dagur hlaut 3,5 vinning.

Sigurvegari mótsins voru Ungverjarnir Imre Hera (2567) og Oliver Mihok (2451) en þeir hlutu 6 vinninga.

Frammistaða Dags samsvaraði 2327 skákstigum og lækkar hann um 6 stig fyrir hana.

• Heimasíða mótsins
• Chess-Results 

Skákþáttur Morgunblaðsins: Haltu opnu fyrir því óvænta

Wang Hao - Alexey Dreev

Svartur leikur og vinnur.

Staðan hér að ofan kom upp í 2. umferð heimsbikarmótsins í skák sem nú stendur yfir í Tromsö í Noregi. Staðan sem Alexei Dreev sat frammi fyrir minnir okkur á það að stundum þarf að brjóta hlekki hugar til að finna besta leikinn; að halda opnum huga gagnvart óvæntum möguleikum - það er vandinn. Ekki veit ég hvað braust um í huga Dreev en fyrsta spurning þessa öfluga stórmeistara hefði átt að vera: hverjir eru valkostirnir? Hann kaus að leika 46. ... Re1+, hafði vinningsmöguleika á ýmsum stigum en jafntefli varð þó niðurstaðan. Góður leikur var 46. ... Hc3, en sá albesti í stöðunni er af dýpri gerðinni: 46. ... f5!! Eftir 47. Hbxd3 He2+ verður hvítur mát, t.d. 48. Kf1 Hf2+ 49. Kg1 Hc1+ og mátar.

Þetta er annað stórmótið sem Norðmenn standa fyrir í ár og vitanlega má rekja þessa framkvæmdagleði til frammistöðu Magnúsar Carlsen; Norðmenn eru að safna sér saman fyrir heimsmeistaraeinvígið sem hann mun heyja við Anand í haust; á næsta ári halda þeir svo Ólympíumótið i skák. Ýmsir gestir okkar frá síðustu Reykjavíkurmótum hafa verið að gera góða hluti. Kínverjinn kornungi Wei hefur slegið út Nepomniachtchi og Shirov, Norðmaðurinn Hammer sló Movsesian úr keppni og sigurvegarinn frá síðasta Reykjavíkurmóti, Pavel Eljanov, er kominn áfram í 3. umferð. Meðal þeirra sem þurft hafa að snúa heim eru Judit Polgar og landi hennar Peter Leko, sem laut í lægra haldi fyrir Perúmanninum Granda Zuniga og Gata Kamsky. Upphaflega voru 128 skákmenn skráðir til leiks en um um helgina verða þeir orðnir 32.

Cori-systkinin frá Perú, Deysi og Jorge, unnu hugi og hjörtu manna á Reykjavíkurmótinu 2010. Jorge Cori var til alls vís er hann mætti Teimour Radjabov í 1. umferð. Kappskákunum lauk 1:1 en vegna tungumálaörðugleika kom upp misskilningur varðandi tímasetningu á hraðskákunum, Cori mætti of seint og var dæmdur úr leik. Hann átti betra skilið eins og eftirfarandi vinningsskák ber með sér. Lokahnykkurinn er bráðsnjall. Eitt það erfiðasta í skák er að bakka með vel staðsettan mann en þegar menn eru í stuði „koma svona leikir til manns", orðaði það einhver ágætur maður:

Jorge Cori - Teimour Radjabov

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. Rf3 O-O 6. Be2 e5 7. O-O Rc6 8. d5 Re7 9. b4 Rh5 10. He1

Ein vinsælasta leiðin enn í dag komin frá Ivan Sokolov. Radjabov gerþekkir þetta afbrigði.

10. ... f5 11. Rg5 Rf4 12. Bxf4 exf4 13. Hc1 h6 14. Re6 Bxe6 15. dxe6 Bxc3 16. Hxc3 fxe4 17. Bf1 e3 18. fxe3 fxe3 19. Hcxe3 a5 20. b5 c6 21. bxc6 bxc6 22. Hd3 Db6 23. Kh1 d5 24. cxd5 cxd5 25. Hxd5!?

Vegna hins ógnandi frípeðs á e6 tekur hvítur ekki mikla áhættu þó hann láti skiptamun af hendi.

25. ... Rxd5 26. Dxd5 Had8 27. De4 Hf6?

Eðlilegur leikur en samt meinleg ónákvæmni. Best var 27. ... Hf5.

28. e7! He8 29. Dd5+

Lítur vel út en 29. a4! var mun sterkara. Við hótuninni 30. Bb5 er þá lítið að gera.

29. ... Kg7 30. De5 Df2?

Hér var eina vonin fólgin í því að draga í land og leika 30. ...Db8! með hugmyndinni 31. Dxb8 Hxf1+ 32. Hxf1 Hxb8, e7 peðið fellur og svartur á jafnteflisvon.

31. Bb5! Kh7

32. Da1!

- Radjabov gafst upp.

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 18. ágúst 2013

Skákþættir Morgunblaðsins

Mögnuð Menningarnótt

Heldur var vott í veðri þegar Skákhátíð Skákakademíunnar hófst á hádegi í gær, á Menningarnótt. Hin besta stemning hafði þó ríkt á Lækjartorgi um morguninn og hressir hlauparar á hverju horni. Við undirbúning og uppsetningu skáktjaldsins urðu skipuleggjendur skákhátíðarinnar dolfallnir yfir krafti Kára Steins maraþonshlaupara sem hreinlega spretti í mark og fór hálf maraþonið á rétt rúmum klukkutíma sem er ótrúlegur tími. Sannkölluð stjarna hann Kári Steinn.

Skákdagskráin hófst á því að ungmennalandslið Íslands bauð gestum og gangandi að tefla við sig. Fjölmargir gestir hátíðarinnar tefldu við krakkana í ungmennalandsliðinu og tóku margir hverjir nokkrar skákir og þar á meðal tveir ungir skákmenn frá Spáni. Ungmennalandsliðið var með framtaki sínu að safna styrkjum og áheitum fyrir för sína á EM í Svartfjallalandi sem hefst eftir nokkrar vikur. Svona viðburður eflir einnig tengsl og einingu meðal liðsmanna sem skiptir miklu máli þegar haldið er í skákvíking. Tefldu krakkarnir í um sex klukkutíma og sýndu mikinn dugnað og eiga hrós skilið.

Ingvar Þór hraðastur

Leifturskákin dró að sé mikinn fjölda áhorfenda enda mikil læti og fjör. Tefldar voru níu umferðir, allir við alla, tvær skákir milli andstæðinga í hverri umferð, alls átján skákir í heildina. Keppendur lögðu sig alla fram og oft á tíðum var gríðarlegt tímahrak í gangi með tilheyrandi fljúgandi taflmönnum og stöku blótsyrði. Þónokkur þrætuefni komu upp meðal keppenda en var það þó leyst að lokum í mesta bróðerni enda Leifturskákmótið fyrst og fremst til gamans fyrir keppendur og áhorfendur. Ingvar Þór hafði að lokum sigur og það nokkuð öruggan. Lokastöðuna má sjá á Chess-Results.

Jóhann með tak á Hjörvari

Að loknu Leifturskákmótinu var dregið í töfluröð á Íslandsmóti skákfélaga í fyrstu og aðra deild. Töfluröðin hef þegar birst á skak.is og eru nokkrar athyglisverðar viðureignir í fyrstu umferð í báðum deildum. Hápunktur hátíðarinnar var hraðskákeinvígi Jóhanns Hjartarsonar og Hjörvars Steins Grétarssonar. Jóhann vann fyrstu skákina eftir krappa vörn í marga leiki. Hjörvar hafði teygt sig of langt. Í annarri skákinni hafði Jóhann haft betra tafl en lék af sér drottningu og gafst upp. Í þriðju skákinni hafði Hjörvar betra með hvítu en skipti að lokum í upp í endatafl þar sem hann lék af sér. Fjórðu skákina vann Jóhann nokkuð laglega og þar með einvígið 3-1. Er þetta því í þriðja skiptið sem Jóhann leggur Hjörvar í fjögurra skáka hraðskákeinvígi og sýnir þvi enn styrk sinn sem besti skákmaður landsins.

Sigurbjörn og Róbert Íslandsmeistarar

Síðasti viðburður dagsins var Íslandsmótið í heilinn og höndin. Keppendalistinn var nokkuð sterkur eins og sjá má þegar mótstaflan er skoðuð. Nokkrir voru að tefla heilinn og höndin í fyrsta skiptið og virtust hafa gaman af enda er þetta form skákar skemmtilegt og óhefðbundið. Jón Viktor og Bergsteinn Einarsson fóru vel af stað og fyrir lokaumferðina voru þeir efstir með aðeins hálfan vinning niður. Í sjöttu og síðustu umferð tefldu þeir gegn Magnúsi Erni Úlfarssyni og Rúnari Berg. Úr var gríðarlega spennandi skák. Rétt fyrir utan skáktjaldið fylgdist Róbert Lagerman með skákinni gegnum glugga og það með miklum tilþrifum og svipbrigðum. Ástæðan var sú að ef Jón Viktor og Bergsteinn myndu tapa yrðu Róbert og félagi hans Sigurbjörn Björnsson Íslandsmeistarar. Rúnar og Magnús reyndust örlagavaldar og tryggðu Sigurbirni og Róberti titilinn. Lokastöðu mótsins má finna á Chess-Results.

Þrátt fyrir blautt veður tókst hátíðin vel. Fjöldi gesta kíkti við í skáktjaldinu, tefldi við ungmennalandsliðið eða fylgist með viðburðunum. Dúndrandi salsa-tónlist hliðina tjaldinu gaf þessu svo öllu saman skemmtilegan og sérstakan blæ. Skákhátíð Skákakademíunnar á Menningarnótt var nú haldin þriðja árið í röð og hefur fest sig í sessi.

Hrafn Jökulsson tók frábærar myndir sem finna má í myndaalbúmi Menningarnætur.

Meistaramót Hellis hefst á morgun

Meistaramót Hellis 2013 hefst mánudaginn 26. ágúst klukkan 19:30. Mótið er 7 umferða opið kappskákmót sem lýkur 9. september.   Vegleg og fjölbreytt verðlaun eru í boði.  Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra skákstiga.  Skráning í mótið er hér á heimasíðu Hellis og hér á Skák.is.  

Teflt er á mánudögum, þriðjudögum og miðvikudögum.

Aðalverðlaun:

1. 40.000
2. 30.000
3. 20.000

Aukaverðlaun:

• Skákmeistari Hellis: Houdini 3 Aquarium Pro
• Besti árangur undir 2200 skákstigum: Houdini 3 Aquarium Standard
• Besti árangur undir 1800 skákstigum:ChessOK Aquarium 2012

• Besti árangur undir 1600 skákstigum: CT-ART 4.0 (taktískar æfingar)

• Besti árangur stigalausra: Skákbók hjá Sigurbirni að verðmæti kr.5.000.
• Unglingaverðlaun (15 ára og yngri), skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.
• Kvennaverðlaun, skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

• Félagsmenn kr. 3.000; aðrir 4.000-
• Unglingar 15 ára og yngri: Félagsmenn: 2.000; Aðrir 3.000.
• Allir titilhafar fá frítt í mótið

Umferðartafla: 

• 1. umferð, mánudaginn, 26. ágúst, kl. 19:30
• 2. umferð, þriðjudaginn, 27. ágúst, kl. 19:30
• 3. umferð, miðvikudaginn, 28. ágúst, kl. 19:30
• 4. umferð, mánudaginn, 2. september, kl. 19:30
• 5. umferð, þriðjudaginn, 3. september, ágúst, kl. 19:30
• 6. umferð, miðvikudaginn, 4. september, kl. 19:30
• 7. umferð, mánudagur, 9. september, kl. 19:30

Grandelius tekur ekki þátt í HM ungmenna

Sænski stórmeistarinn og félagsmaður Taflfélags Vestmannaeyja Nils Grandelius tekur ekki á HM ungmenna sem fram fer í Antakya í Tyrklandi dagana 13.-26. september nk. Antakyna liggur upp að landamærum Sýrlands. Yfirvöld í Svíþjóð mæla á móti ferðalögum á þetta svæði vegna ástandsins þar.

Þetta er fremur súrt þar sem fyrir liggur að Nils væri einn sigurstranglegasti keppandinn.

Sjá nánar á vefsíðu Lars Grahn.