Hraðkvöld hjá GM Helli í Mjóddinni í kvöld

Skákfélagið GM Hellir heldur hraðkvöld mánudaginn 25. nóvember nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili GM Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþáttur Morgunblaðsins: Magnus Carlsen er nýr heimsmeistari

Þá hefur það gerst. Norðmaður er orðinn heimsmeistari í skák! Við hljótum að óska frændum okkar til hamingju með Magnus og heimsmeistaratitilinn. Lokatölur í einvíginu, 6 ½ : 3 ½, eru mælikvarði á þá yfirburði sem Magnus Carlsen hafði yfir hinn geðþekka indverska heimsmeistara, Viswanathan Anand. Íslenskir skákunnendur hafa fylgst náið með frammistöðu norska undrabarnsins allt frá því að hann tefldi fyrst hér á landi 13 ára gamall í mars árið 2004 og vann Anatolí Karpov í hraðskákhluta Reykjavik rapid á NASA við Austurvöll og gerði síðan jafntefli við Garrí Kasparov í atskák-hluta mótsins. Þessar skákir vöktu á Magnusi gríðarlega athygli heima fyrir og nú tæplega 10 árum síðar berast þær fréttir að skákæði hafi gripið um sig með norsku þjóðinni. Minna fór fyrir Magnusi þegar hann tefldi á Reykjavíkurskákmótinu 2006; hann var þá orðinn magnaður baráttumaður sem var á fleygiferð upp styrkleikalistann.

Áhugi á þessu einvígi út um allan heim náði nýjum hæðum og tengdist einkum persónu Magnusar Carlsen sem verður 23 ára gamall eftir viku og er næstyngsti heimsmeistari skáksögunnar.

Hinn nýi heimsmeistari er góð fyrirmynd, kurteis, snyrtilega klæddur og á sér svipuð áhugamál og aðrir ungir menn, ágætur á skíðum, grimmur í fótbolta, „tístir" og bloggar. Hann hefur efnast vel á verðlaunafé og auglýsingasamningum, t.d. fyrir tískuvörur G-Star Raw. Er enn ólofaður og býr í foreldrahúsum í Bærum í grennd við Ósló. Lítill vafi leikur á því að góður stuðningur foreldra og systra hefur skipt miklu máli fyrir Magnus en þau ferðast með honum út um allar þorpagrundir. Við skákborðið er hann allajafna pollrólegur og virkar stundum dálítið syfjulegur. Hann virðist hafa hæfileika til þess að vinna úr gríðarlega magni upplýsinga - og kann einnig að forðast upplýsingar! Og þegar horft er yfir þessar tíu skákir einvígisins er vart hægt að benda á slakan leik hjá Magnusi. Anand náði sér aldrei á strik en í 9. skákinni vissi hann að einungis sigur kom til greina, hann lagði allt undir:

9. einvígisskák:

Viswanathan Anand - Magnus Carlsen

Nimzoindversk vörn

1. d4 Rf6 2. c4 e6 3. Rc3 Bb4 4. f3 d5 5. a3 Bxc3+ 6. bxc3 c5 7. cxd5 exd5

Algengara er 7. ... Rxd5 en að venju sniðgengur Magnus þekktustu leiðir.

8. e3 c4 9. Re2 Rc6 10. g4 O-O 11. Bg2 Ra5 12. O-O Rb3 13. Ha2 b5 14. Rg3 a5 15. g5 Re8 16. e4 Rxc1 17. Dxc1 Ha6 18. e5 Rc7 19. f4 b4 20. axb4 axb4 21. Hxa6 Rxa6 22. f5 b3

Spurningin var auðvitað sú hvort peðastormur hvíts á kóngsvæng væri meira en ógnandi en þetta frípeð. „Houdini" metur stöðuna aðeins betri á svart.

23. Df4 Rc7 24. f6 g6 25. Dh4 Re8 26. Dh6 b2

- Sjá stöðumynd -

27. Hf4!

Fífldjarfur leikur, að því er virðist ekki lakari en 27. Re2 sem einnig kemur til greina. Hótunin er 28. Hh4 og mátar.

27. ... b1(D)+ 28. Rf1??

Óskiljanleg mistök. Eftir 28. Bf1 verður svartur að gefa nýju drottninguna til baka og framhaldið gæti orðið: 28. ... Dd1 29. Hh4 Dh5 30. Rxh5 gxh5 31. Hxh5 Bf5 32. g6! Bxg6 33. Hg5 Da5 34. Hg3. Menn svarts er bundnir í báða skó og ýmsir möguleikar leynast í stöðunni. Þarna fór lokatækifæri Anands í einvíginu.

28. ... De1!

Með hugmyndinni 29. Hh4 Dxh4 30. Dxh4 Da5 og vinnur. Anand gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 24. nóvember 2013

Skákþættir Morgunblaðsins

[Event "Anand-Carlsen World Championship"] [Site "Chennai IND"] [Date "2013.11.21"] [EventDate "2013.11.07"] [Round "9"] [Result "0-1"] [White "Viswanathan Anand"] [Black "Magnus Carlsen"] [ECO "E25"] [WhiteElo "?"] [BlackElo "?"] [PlyCount "56"] 1.d4 Nf6 2.c4 e6 3.Nc3 Bb4 4.f3 d5 5.a3 Bxc3+ 6.bxc3 c5 7.cxd5 exd5 8.e3 c4 9.Ne2 Nc6 10.g4 O-O 11.Bg2 Na5 12.O-O Nb3 13.Ra2 b5 14.Ng3 a5 15.g5 Ne8 16.e4 Nxc1 17.Qxc1 Ra6 18.e5 Nc7 19.f4 b4 20.axb4 axb4 21.Rxa6 Nxa6 22.f5 b3 23.Qf4 Nc7 24.f6 g6 25.Qh4 Ne8 26.Qh6 b2 27.Rf4 b1=Q+ 28.Nf1 Qe1 0-1

HM landsliða: Úkraínumenn efstir

Úkraínumenn eru efstir á HM landsliða sem nú er í gangi í Antalya í Tyrklandi. Ivanchuk og félagar hafa farið mikinn og eru efstir með fullt hús stiga. Hafa unnið allar fimm viðureignir sínar. Rússar eru aðrir með 7 stig en Hollendingar, Armenar og Kínverjar eru skammt á eftir með 6 stig. Það er hart barist á mótinu enda tefla þarna flestir sterkustu skákmenn heims en þátt 10 landslið.

• Heimasíða mótsins
• Beinar útsendingar (hefjast almennt kl. 13)

Jólapakkamót GM Hellis fer fram 21. desember

Jólapakkaskákmót GM Hellis verður haldið laugardaginn 21. desember nk. í Ráðhúsi Reykjavíkur. Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 16. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.
 
Keppt verður í allt að 5 flokkum: Flokki fæddra 1998-2000, flokki fæddra 2001-2002, flokki fæddra 2003-2004 og flokki fæddra 2005 og síðar og peðaskák fyrir þau yngstu. Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.  Skráning á mótið fer fram á heimasíðu GM Hellis og er skráningarform efst þar á síðunni.

Vel heppnað skemmtikvöld

Skemmtikvöld ungmenna fór fram fyrr í kvöld á sal Skákskólans. Þátttakendur voru  eitthvað á annan tuginn en þó nokkra vantaði sem eru í miðjum próflestri. Sérstaka ánægju vakti óvænt heimsókn Friðriks Ólafssonar. Friðrik hlýddi á Hjörvar Stein fara yfir feril sinn og sagði lítillega frá atvikum á sínum glæsilega skákferli. Stefnt er á að Friðrik flytji erindi á næsta skemmtikvöldi ungmenna eftir áramót. Friðrik nefndi í kvöld að svona skemmti- og fræðslukvöld væru um margt gagnleg, hann hefði sjálfur farið á sitt fyrsta skemmtikvöld 1946 þá 11ára gamall þar sem stórmótið í Gronigen var tekið til umfjöllunar.

Margt forvitnilegt kom fram í fyrirlestri Hjörvars. Helst ber að nefna að hann taldi sig ekki hafa verið sérstaklega efnilegan framan af sínum ferli; fyrsta stóra stökkið var áskorendaflokkur 2006 þegar hann vann sér inn rétt til þátttöku í landsliðsflokki yngstur allra tíma. Það met stendur enn.

Greinilega kom fram í máli Hjörvars hvað liggur einna helst að baki árangri hans; áhugi og aftur áhugi á skák. Án áhuga og þess að finna gaman að tefla myndi lítið gerast. Minntist hann Carlsens í þeim efnum sem hefur látið hafa eftir sér að hann hugsi meir og minna um skák öllum stundum. Það er til mikillar fyrirmyndar hve mikið Hjörvar Steinn gefur af sér til yngri skákmanna. Björn Þorfinnsson forfallaðist og bíður því erindi hans um alþjóðleg skákmót seinni tíma.

Keppendur í heilinn og höndin voru alls tólf og tefldu allir við alla en dregið var í lið. Eins og jafnan í heilinn og höndin var nokkur hasar milli liðsfélaga og allt að því rifrildi. Í því skyni er rétt að nefna liðsfélagana Jón Trausta Harðarson og Jóhönnu Björgu Jóhannsdóttur. Jóhanna er keppnismanneskja mikil og mátti Jón síns lítið gegn skapofsa landsliðskonunnar sem var ekki alltof sátt með alla leiki ljónsins úr Grafarvogi. Hugsanlega má þó gera að því skóna að Jón hafi með ýmsum leikjum sínum verið vísvitandi að reyna á þolinmæði makkers síns við mikla kátínu áhorfenda.

Fór svo að sterkustu liðin, Mikael Ívar Karlsson og Oliver Viktor Gunnarsson unnu en heildarúrslit má finna hér; http://chess-results.com/tnr117823.aspx?lan=1&art=1&wi=821

Skemmtikvöldið fór vel fram í alla staði, létt stemning einkenndi taflmennsku kvöldsins þar sem undirspilið var helstu hittarar tíunda áratugsins. Kvöldinu lauk um ellefuleytið og héldu þá hin prúðu íslensku skákungmenni heim á leið. Stefnt er að öðru skemmtikvöldi á útmánuðum.

Stefán Bergsson.

Glærur frá Hjörvar fyglja með sem viðhengi.

Skrár tengdar þessari bloggfærslu:

• Glærusýning frá HSG
• Fyrirlestur - Hjörvar

Fullveldismót SA í dag

Sunnudaginn 1. desember næstkomandi verða liðin 95 ár frá því land vort Ísland hlaut fullveldi. Fullveldið er næstum því jafngamalt Skákfélaginu, sem innan tíðar getur fagnað 95 ára afmæli sínu, eða þann 11. febrúar á næsta ári.

Í tilefni af þessu merka afmæli fullveldisins mun SA halda skákmót. Vonandi verður þar vel mætt og snöfurmannlega. Ef næg þátttaka fæst verður efnt til flokkakeppni - bændaglímu og verður þátttakendum skipað í lið eftir aldri, þ.e. þeir sem eldri eru og reyndari munu skora þá yngri og ákafari á hólm. Til umhugsunar í hverri skák munu menn hafa eitthvað meira en 5 mínútur, jafnvel allt að 10. Verður þetta ákveðið þegar nær dregur. 

En umfram allt eru skákvini fjær og nær hvattir til að mæta og hylla fullveldi landsins okkar og væntalegt stórafmæli skákfélagsins okkar.

Heitt verður á könnuni og Svali fyrir ungviðið.  Taflið hefst kl. 13.

Jólamót TR og SFS hefst á morgun - 37 sveitir skráðar

 

Nú fer að líða að hinu árlega jólaskákmóti Taflfélags Reykjavíkur og Skóla- og frístundasviðs Reykjavíkurborgar.

 

Þátttakendum hefur verið að fjölga síðast liðin ár og því verður fyrirkomulagi keppninnar breytt og í yngri flokki verður keppt í tveimur riðlum sunnudaginn  1. desember.

Suður riðill hefur keppni kl. 10.30 . Norður riðill hefur keppni kl. 14.00 (sjá skiptingu hér að neðan) Tvær efstu sveitir í hvorum riðli munu keppa til úrslita við sveitirnar úr hinum riðlinum um þrjú efstu sætin mánudaginn 2. desember kl. 17:00.

Keppni í eldri flokki verður mánudaginn 2. desember kl. 17:00.

Upplýsingar:

Yngri flokkur (1. - 7. bekkur)

Keppnisstaður:  Taflfélag Reykjavíkur, Faxafeni 12

Keppt verður í stúlkna og drengja flokkum (opnum flokkum). Heimilt er að senda  A, B, C o.s.frv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Í yngri flokki verður keppt í tveimur riðlum sunnudaginn  1. desember.

Suður riðill hefur keppni kl. 10.30 (sjá skóla hér að neðan)

Norður riðill hefur keppni kl. 14.00 (sjá skóla hér að neðan)

Tefldar verða 6 umferðir (hraðmót) eftir Monrad kerfi.

Umhugsunartími: 10 mín. á skák.  Þátttökurétt hafa börn úr grunnskólum Reykjavíkur í  1.-7. bekk.  Mikilvægt er að liðsstjóri fylgi liðum hvers skóla.  Verðlaunaafhending verður að lokinni keppni.

Tvær efstu sveitir í hvorum riðli munu keppa til úrslita við sveitirnar úr hinum riðlinum um þrjú efstu sætin mánudaginn 2. desember kl. 17:00.

Eldri flokkur (8. - 10. bekkur).

Keppnisstaður:  Taflfélag Reykjavíkur, Faxafeni 12.

Keppt verður í stúlkna og drengja flokkum (opnum flokkum). Heimilt er að senda  A, B, C o.sfrv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Keppni í eldri flokki verður mánudaginn 2. desember kl. 17:00.

Tefldar verða 6 umferðir (hraðmót) eftir Monrad kerfi.

Umhugsunartími: 15. mín. á skák.  Þátttökurétt hafa unglingar úr grunnskólum Reykjavíkur í 8.-10. bekk. Verðlaunaafhending verður að lokinni keppni.

Þátttaka í báða flokka tilkynnist til skrifstofu Skóla- og frístundasviðs Reykjavíkur eigi síðar en föstudaginn 29. nóvember.  Ekki verður hægt að skrá lið á mótsstað.

Skráning sendist á netfang: [e-mail]

Skipting í riðla yngri flokks

Yngri flokkur - Suður riðill (kl. 10.30):

Árbæjarskóli, Ártúnsskóli,  Breiðagerðisskóli, Breiðholtsskóli, Brúarskóli, Fellaskóli, Fossvogsskóli, Grandaskóli, Háaleitisskóli, Hlíðaskóli, Hólabrekkuskóli, Hraunkot, Hvassaleitisskóli, Klettaskóli, Klébergsskóli, Melaskóli, Norðlingaskóli, Selásskóli, Seljaskóli, Suðurhlíðarskóli og Ölduselsskóli.

Yngri flokkur - Norður riðill (kl. 14:00):

Austurbæjarskóli, Dalsskóli, Foldaskóli, Háaleitisskóli, Hamraskóli, Háteigsskóli, Húsaskóli, Ingunnarskóli , Ísaksskóli, Kelduskóli, Landakotsskóli, Langholtsskóli, Laugarnesskóli, Rimaskóli, Sæmundarskóli, Vættaskóli, Vesturbæjarskóli og Vogaskóli.

Taflfélag Reykjavíkur og Skóla- og frístundasvið Reykjavíkurborgar vonast til að sem flestir þessara skóla sjái sér fært að senda sveitir til leiks á eitt af skemmtilegustu mótum vetrarins!

Björn Jónsson

Formaður Taflfélags Reykjavíkur

Skemmtikvöld ungmenna í kvöld

Skákskólinn og Skákakademían standa fyrir skemmtikvöldi ungmenna fædd 1990-1999 á laugardagskvöldið kemur. Kvöldið fer fram á sal Skákskólans.

Á kvöldinu verða tveir merkilegir fyrirlestrar ásamt hraðskákmóti í Heilinn og höndin þar sem tveir stórmeistarar munu tefla!

Sjónvarpsstjarnan og skemmtikrafturinn Björn Þorfinnsson hefur einna mestu reynslu Íslendinga af taflmennsku á opnum erlendum mótum síðustu tvo áratugina. Björn hefur teflt ansi víða og hefur verið lúnkinn við að finna skemmtileg erlend mót þar sem  hægt er að hækka á stigum og njóta taflmennskunnar í botn.

Að mörgu þarf að hlúa þegar farið er á erlend mót; gisting, flug, aðstæður á mótsstað, möguleikar á að hækka á stigum, veðurfar og fleira.

Frá öllu þessu og ferðum sínum mun Björn segja frá á léttan og ljúfan hátt.

Árangur Hjörvars Steins þarf lítið að kynna, en hvað nákvæmlega liggur að baki? Hversu marga klukkutíma stúderaði hann sjálfur þegar hann var fimtán ára, hafði hann kvóta á þeim hraðskákum sem hann tefldi, hvað fór hann oft erlendis að tefla á hverju ári, hefur hann haldið sig við sömu byrjanir síðan hann var lítill, leggur hann áherslu á hreyfingu og hollt líferni?

Hjörvar mun í snaggaralegum fyrirlestri fara yfir staðreyndir frá sínum ferli allt til þess að efnileg ungmenni viti hvað þarf til að bæta sig í skák og á hvað skal leggja áherslu.

Að loknum fyrirlestrum verða veitingar og svo hraðskákmót í Heilinn og höndin.

Húsið opnar  19:30 og fyrirlestrar hefjast 20:00.

Aðgangseyrir 1000kr. Skráning á FB-síðu kvöldsins eða á [e-mail]

Öll meðferð áfengis bönnuð.

Héraðsmót HSÞ í skák fyrir 16 ára og yngri

Miðvikudaginn 4. desember verður héraðsmót HSÞ í skák fyrir 16 ára og yngri haldið í matsal Litlulaugaskóla á Laugum. Mótið hefst kl 16:00 og lýkur um kl. 18:00. 

Tefldar verða 7 umferðir eftir monrad-kerfi og verður umhugsunartíminn 10 mín á keppanda í hverri skák. Mótsgjald er aðeins 500 krónur. Skákfélagið GM-Hellir sér um keppnishaldið og fá allir þátttakendur verðlaun. 

Sérstök verðlaun verða veitt fyrir þrjú efstu sætin í þremur aldursflokkum:  

8 ára og yngri     (1-3 bekkur)
9-12 ára            (4-7 bekkur)
13-16 ára          (8-10 bekkur) 

Vinningahæsti keppandinn hlýtur farandbikar að launum og nafnbótina Héraðsmeistari HSÞ í skák 2012.

Skráning í mótið fer fram hjá Hermanni í síma 4643187, 8213187 eða með tölvupósti á netfangið: [e-mail]  (Tilgreina þarf, nafn, aldur, bekk og félag innan HSÞ)

Jón Árni efstur á Skákþingi Garðabæjar

Jón Árni Halldórsson (2193) er efstur á Skákþingi Garðabæjar með 5 vinninga en sjötta og næstsíðasta umferð fór fram í gærkvöldi. Jón Árni vann Siguringa Sigurjónsson (1923) í gær. Gylfi Þórhallsson (2154) sem vann Kristin Jón Sævaldsson (1758) er annar með 4½ vinning. Sex skákmenn hafa 4 vinninga. Spennan er því mikil fyrir lokaumferðina sem fram fer næsta fimmtudagskvöld. 

Pörun lokaumferðarinnar liggur ekki fyrir þar sem einni skák var frestað. Mótstöflu a-flokks má finna á Chess-Results.  

Þorsteinn Magnússon (1286) og Brynjar Bjarkason (1179) eru efstir í b-flokki með 5 vinninga. Bjarki Arnaldarson (1075) er þriðji með 4½ vinning.

Mótstöflu b-flokks má finna á Chess-Results.

• Heimasíða TG
• Chess-Results