F3-kvöld í kvöld - Íslandsmeistarinn mætir

Á fimmtudagskvöldið 5. júní verður loks F3-kvöld. Það hefst kl. 20. Gestir kvöldsins, verða Hjörvar Steinn Grétarsson, sigurvegari Wow air Vormóts TR, og Guðmundur Kjartansson, nýkrýndur Íslandsmeistari í skák. Báðir voru þeir jafnframt valdir í ólympíuliðið sem heldur til Tromsö þann 1. ágúst nk.  Þeir munu segja frá sigrum sínum og skýra skákir.

Sigurbjörn Björnsson kemur á staðinn og kynnir nýja sendingu af bókum frá Quality Chess.

 

F3-kvöld eru opinn fyrir alla félagsmenn F3-klúbbsins.

Upplýsingar um klúbbinn og hvernig megi ganga í hann má nálgast á heimsíðu klúbbsins.

Caruana byrjar best á No Logo Norway Chess

Í gær hófst No Logo Norway Chess - mótið í Stafangri í Noregi. Þátt taka 10 skákmenn. Níu þeirra eru meðal fjórtán stigahæstu skákmanna heims en sá tíundi er annar fulltrúa heimamanna Simen Agdestein. Íslendingar eiga sinn fulltrúa á staðnum en það er undirritaður sem er meðal skákstjóra á mótinu

Hátíðin hófst þann 2. júní með hraðskákmóti sem haldið var í eyju sem er rétt fyrir utan Stafangur. Sú eyja er stundum kölluð Paradís en aðstæður þar eru afar sérstakur og minnir helst á Suður-Ameríku. Carlsen fór mikinn á hraðskákmótinu og rúllaði því með því að fá 7,5 vinning í 9 skákum.

Allmargir gestir eru á skákstað. Má þar helst nefna Garry Kasparov, sem hér heiðursgestur og lék fyrsta leikinn fyrir Carlsen gegn Giri í fyrstu umferð. Hann fór reyndar í morgun.

Aðstæður á skákstað eru afbragðsgóðar og fagmennska mikil. Það er gaman að fylgjast með þessum toppskákmönnum sem allir eru toppeinstaklingar. Engir stjörnustælar, allir ákaflega geðþekkir og þeim fylgja nákvæmlega engin vandræði. Mæta snyrtilegir við skákborðið og eru allir sem einn ákaflega góðar fyrirmyndir. Tveir þeirra eru í merktum jakkafötum stuðningsaðila en það eru Magnus Carlsen og Sergei Karjakin. Flestir þeirra virðist vera í einir á ferð en a.m.k. Giri, Caruana og Aronian hafa hér aðstoðarmenn. Aðstoðarmaður Giri er Tukmakov.

Ég er einn þriggja skákstjóra en verð reyndar ekki nema fyrstu þrjár umferðirnar auk þess sem ég var einn skákstjóra hraðskákmótsins. Eftir þrjár umferðir tekur annar skákstjóri við mínu hlutverki.

Meðal starfsmanna hér eru 3-4 Danir sem sjá alfarið um beinar útsendingar og komu hér eingöngu í þeim tilgangi. Nigel Short og Dirk Jan Geuzendam, ritstjóri New in Chess, eru með skákskýringar (live commentary) á staðnum. Norska sjónvarpið er út um allt og Hans Olav Lahlum situr þar og talar svo klukkutímum skiptir og fer á kostum. Skák er flott sjónvarpsefni.

Mótið heitir No Logo Norway Chess. Helsti styrktaraðili þess er veðmálafyrirtækið Unibet. Ekki má auglýsa veðmálafyrirtæki í Noregi og því er þessi óvenjulega leið farinn að kalla mótið No Logo Norway Chess. Með þessu frumlega heiti hafa mótshaldarar í raun og veru tryggt að allir vita hver styrkir það.

Hér gilda aðlagaðar Sofíu-reglur. Keppendur mega ekki semja jafntefli, nema að þráteflt sé, fyrr en eftir 40 leiki. Hvernig 40 leikja regla var endanlega ákveðin er skemmtileg. Í gær sátum við skákstjórarnir úti við og fórum yfir reglurnar ásamt Jöran Aulin-Jansson forseta norska skáksambandsins sem er hér mótsstjóri. Í reglum stóð eingöngu að Sofíu-reglan gilti en ekkert um leikjafjölda. Rætt var um 30 eða 40 leiki eða hvort það alfarið bannað að semja jafntefli sem er jú upphaflega Sofíu-reglan. Þá birtist Grischuk úti til að reykja - en hann er eini keppandinn sem það gerir. Kallar þá Jöran á Grischuk og spyr um hans álit. Grischuk svarar um hæl og það sé fáránlegt að miða við 30 leiki. Annað hvort ætti alfarið að banna alfarið jafnteflisboð eða miða við 40 leiki. Skákirnar væru oft ótefldar við 30 leiki.

Þar með var það ákveðið. Miðað var við 40 leiki. Það var semsagt Grischuk sem réði því! Ég tek ofan fyrir baráttuhugnum í Grischuk sem nú er þriðji stigahæsti skákmaður heims. Hann er greinilega ekki hingað kominn til að semja stutt.

Mesta fjörið í gær var í skákum Carlsen og Giri. Carlsen tókst ekki að kreista fram sigur og þráteflt eftir rúma 30 leik. Caruana vann Grischuk í mikill tímahraksskák en hér er enginn viðbótartími á fyrstu tveimur tímamörkunum.  Þetta er eins og denn. Barið á klukkuna og ekki skrifað í tímahrakinu.

Önnur umferð fer fram í dag og hefst kl. 13:30. Hvet menn til að fylgjast með skemmtilegri útsendingu á heimasíðu mótsins. Einnig er hægt að fylgjast með Hans Olav á NRK2.

Nokkrar myndir fylgja með. Náði lítið að taka af myndum af skákunum sjálfa vegna skákstjórastafa en reyndi að að fanga stemminguna að öðru leyti.  Ætti að vera auðveldara í dag - þegar mótið er komið í "rútínu".

Gunnar Björnsson

Myndaalbúm (GB)

Meistaramót Skákskóla Íslands hefst á föstudaginn

Meistaramót Skákskóla Íslands fyrir starfsárið 2013/2014 hefst föstudaginn 6. júní. Tefldar verða sjö umferðir eftir svissneska kerfinu. Þátttökurétt hafa nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans. 

Núverandi meistari  Skákskóla Íslands er Nökkvi Sverrisson

Þátttökuréttur:

Allir nemendur skólans og þeir sem tekið hafa þátt í námskeiðum á vegum skólans.

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

Dagskrá mótsins verður með eftirfarandi hætti:

Umferðafjöldi: Sjö umferðir. Í þrem fyrstu umferðunum verða tefldar atskákir en fjórar lokaumferðirnar eru kappskákir.

Tímamörk: Atskákir:  25 10  þ.e 25 mínútur að viðbættum sekúndum fyrir hvern leik. 

Kappskákir:  90 30 þ.e. 90 mínútur á alla skákina og 30 sekúndur bætast við eftir hvern leik.

Fyrirkomulag: Svissneska kerfið - swiss perfect.

Skákstig: Mótið verður reiknað til skákstiga.  Fjórar síðustu umferðirnar eru reiknaðar til íslenskra- og alþjóðlegra stiga. At-skákirnar eru ekki reiknaðar til stiga. 

Verðlaun:

A:

1. verðlaun:

Meistaratitill Skákskóla Íslands 2012/2013 og farandbikar. Einnig  flugfar með Icelandair á Evrópuleið* og uppihalds kostnaði kr. 30 þús.

2. verðlaun: Flugfarmiði á leiðum Icelandair á Evrópuleið.

3. - 5. verðlaun: Vandaðar skákbækur.

Verðlaun fyrir keppendur 12 ára og yngri.

1. - 3. verðlaun: Vandaðar skákbækur.

 

Verðlaun fyrir krakka 8 ára og yngri

1. - 3. verðlaun: Vandaðar skákbækur. 

 

* ^{Mótshaldarinn áskilur sér rétt til að finna hagstæðasta fargjald sem hægt er að fá enda verði tilkynnt um ferðir með góðum fyrirvara.} 

* Verðlaunahafi verður að nýta sér farmiða innan 12 mánuða frá lokum mótsins.

 

B:

 

Dagskrá:

1. umferð: Föstudagurinn 6. júní kl. 18  

2. umferð: Föstudagurinn 6. júní kl. 19

3. umferð. Föstudagurinn 6. júní kl. 20.

 

4. umferð: Laugardagurinn 7. júní kl. 10-14  

5. umferð: Laugardagurinn 7. júní kl. 15 - 19

 

6. umferð: Sunnudagurinn 8. júní kl. 10.-14.

7. umferð: Sunnudagurinn 8. júní kl. 15-19.

 

Verðlaunaafhending fer fram strax að móti loknu.

Athugið að hver keppandi getur tekið ½ vinnings yfirsetu í 1.-6. umferð. Tilkynna skal fyrir mótið hvenær óskað er yfirsetu.

Þátttöku skal tilkynna í síma SÍ 56 89141 á netfangið [e-mail] eða [e-mail] .

Mótsnefnd áskilur rétt til að gera breytingar á fyrirfram boðaðri dagskrá.

Elsa María sigraði á hraðkvöldi

Elsa María Kristínardóttir sigraði á hraðkvöldi Hugins sem haldið var 2. júní. Elsa María fékk 6 vinninga í sjö skákum og voru það Jón Úlfljótsson og Vigfús sem náðu jafntefli. Annar varð Vigfús Ó. Vigfússon með 5,5 vinning en auk þess að gera jafntefli við Elsu Maríu tók hann upp á því að tapa fyrir Kristni Jens sem sagðist myndu ganga ánægður til náða eftir það verk og sofa vel. Þriðji var svo Jón Úlfljótsson með 5 vinninga. 

Í lok hraðkvöldsins dró svo Elsa María Sindra Snæ Kristófersson í happdrættinu og fengu þau bæði gjafamiða á Saffran.

Næsti viðurburður í Mjóddinni er Mjóddarskákmótið sem verður 14. maí í göngugötunni en næsta æfing í félagsheimili Hugins í Álfabakka 14a verður mánudaginn 16. júní kl. 20 og þá verður einnig hraðkvöld. Það verður lokaæfing fyrir sumarhlé.

Lokastaðan á hraðkvöldinu:

1.  Elsa María Kristínardóttir        6v/7

2.  Vigfús Ó. Vigfússon                5,5v

3.  Jón Úlfljótsson                        5v

4.  Kristófer Ómarsson                4,5v

5.  Kristinn Jens Bjartmarsson     4,5v

6.  Gunnar Nikulásson                 4,5v

7.  Aron Þór Maí                           3,5v

8.  Sindri Snær Kristófersson       3v

9.  Hjálmar Sigurvaldason           3v

10. Gunnar Friðrik Ingibergsson  3v

11. Hörður Jónasson                    2,5v

12. Alexander Oliver Maí              2,5v

13. Stefán Orri Davíðsson            1,5v

Sigurvegarar og landsliðsmenn á F3-kvöldi

Á fimmtudagskvöldið 5. júní verður loks F3-kvöld. Það hefst kl. 20. Gestir kvöldsins, verða Hjörvar Steinn Grétarsson, sigurvegari Wow air Vormóts TR, og Guðmundur Kjartansson, nýkrýndur Íslandsmeistari í skák. Báðir voru þeir jafnframt valdir í ólympíuliðið sem heldur til Tromsö þann 1. ágúst nk.  Þeir munu segja frá sigrum sínum og skýra skákir.

Sigurbjörn Björnsson kemur á staðinn og kynnir nýja sendingu af bókum frá Quality Chess.

F3-kvöld eru opinn fyrir alla félagsmenn F3-klúbbsins.

Upplýsingar um klúbbinn og hvernig megi ganga í hann má nálgast á heimsíðu klúbbsins.

Hannes Hlífar í Taflfélag Reykjavíkur

Stórmeistarinn Hannes Hlífar Stefánsson er genginn til liðs við Taflfélag Reykjavíkur eftir nokkurra ára fjarveru.  Hannes Hlífar þarf ekki að kynna fyrir skákáhugamönnum en hann hefur um árabil verið einn af sterkustu og sigursælustu skákmönnum þjóðarinnar og er sem stendur fjórði stigahæsti skákmaður landsins með 2540 Elo-stig.

Hannes sýndi snemma mikla skákhæfileika og var á unga aldri orðinn mjög sterkur skákmaður.  Fjórtán ára varð hann heimsmeistari unglinga 16 ára og yngri, ári seinna var hann orðinn alþjóðlegur meistari og 1993 varð hann stórmeistari.  Hannes er tólffaldur Íslandsmeistari og þá hefur hann ellefu sinnum teflt með sveit Íslands á Ólympíumótinu í skák, eða á hverju móti síðan 1992.  Fimm sinnum hefur Hannes sigrað á Opna alþjóðlega Reykjavíkurmótinu.

Það er mikill fengur fyrir Taflfélag Reykjavíkur að fá Hannes til liðs við sig þar sem hann hittir fyrir félaga sinn og nýkrýndan Íslandsmeistara, alþjóðlega meistarann Guðmund Kjartansson.  Koma Hannesar er vatn á myllu hins þróttmikla starfs félagsins sem hefur sjaldan verið öflugra.

Taflfélag Reykjavíkur býður Hannes Hlífar velkominn heim í félagið.

Sumarnámskeið Skákfélagsins Hugins fyrir stelpur

Í júní ætlum við að vera með námskeið fyrir stelpur í 1-7 bekk. Í boði verða tvær vikur, vikan 16.-20. júní og svo 23.-27. júní. Fyrri vikuna verðum við frá 9-14, þar sem þriðjudagurinn dettur út (17. júní) en seinni vikuna verðum við frá 9-13.  Staðsetning Víkingsheimilið. 

Vikan er á 10.000 kr en ef báðar eru teknar er það 15.000 kr. Veittur er 20% systkinaafsláttur.

Ýmislegt munum við bralla, t.d skákkennsla, tvískákir, heilin og höndin og margt fleira!

Væri gaman að sjá sem flestar! Um að gera að halda sér við yfir sumartímann.

Við setjum takmörkun á fjölda þátttakenda og miðum við ca. 20 stelpur.

Skráning fer fram á [e-mail]. Um að gera að skrá sig sem fyrst!

Kennarar eru Elsa María Kristínardóttir og Jóhanna Björg Jóhannsdóttir landsliðskonur í skák.

Frestur til að sækja um styrki til SÍ rennur út 5. júní

Styrkumsóknir til SÍ er afgeiddar þrisvar á ári, þ.e. 10. febrúar, 10. júní og 10. október. Frestur til að sækja um styrki fyrir næstu úthlutun ætti að renna út um mánaðarmótin næstu en vegna Íslandsmótis er fresturinn nú lengdur til 5. júní nk.

Styrkjareglur SÍ

Aðalmarkmið styrkveitinga stjórnar Skáksambands Íslands til einstaklinga er að styðja við bakið á þeim skákmönnum sem sýnt hafa mestar framfarir, metnað og ástundun á síðustu 12 mánuðum, og þykja því líklegastir til að ná enn lengra í nánustu framtíð. Einnig er markmiðið að verðlauna fyrir afburðaárangur og hvetja þannig til afreka.

Styrkjum frá SÍ er ekki ætlað að styrkja hinn almenna skákáhugamann til farar erlendis, heldur einungis þá sem þykja skara fram úr. Sérstök áhersla er lögð á yngri skákmenn sem eru tilbúnir til að leggja á sig þjálfun til að standa sig á þeim mótum sem styrkbeiðni liggur fyrir um. 

Við allar úthlutanir á að vera lögð áhersla á jafnrétti kynjanna og að þeim stúlkum sem skarað hafa fram úr í hverjum aldursflokki sé gert kleift að afla sér reynslu á skákmótum erlendis til jafns á við stráka. Sams konar kröfur um ástundun, árangur og framfarir eru hins vegar gerðar til stúlkna og drengja, kvenna og karla, hvað styrkjaúthlutanir varðar

Viðmið við styrkúthlutanir

1.     Allir styrkþegar SÍ (ungir, alþjóðlegir og aðrir) þurfa að uppfylla eftirfarandi þrjú skilyrði:

• Hafa teflt 50 kappskákir á síðustu 24 mánuðum fyrir árið 2010 og 60 skákir fyrir árið 2011 og síðar.
• Hafa sýnt umtalsverðar framfarir á sl. 12 mánuðum, sem sjáist m.a. á árangri á skákmótum ársins, hækkun skákstiga og reglulegri þjálfun.
• Hafa sýnt virkni í skákmótum innanlands.

2.     Ungir skákmenn (25 ára og yngri) hafa forgang þegar kemur að úthlutun ferðastyrkja. Eftirfarandi börn og unglingar njóta sérstaks forgangs:

• Undir 12 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 12-16 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 16-20 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 20-25 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)

3.     Alþjóðlegir meistarar geta fengið ferðastyrki frá SÍ óháð aldri.

4.     Þeir sem þiggja stórmeistaralaun geta ekki fengið almenna ferðastyrki frá SÍ.

5.     Aðrir skákmenn geta fengið ferðastyrki ef þeir ná árangri sem samsvarar 2350 stigum eða meira ("performance") í móti sem styrkur er sóttur um. Ákvörðun um styrkveitingu er tekin eftir mót.

Umsóknareyðublöð og skil 

Allir sem sækja um styrk til SÍ þurfa að leggja fram umsókn á þar til gerðu rafrænu eyðublaði.

Rafræna eyðublaðið

Þar á að koma fram hvers vegna tiltekið skákmót er valið og hvers vegna viðkomandi telur að hann hafi rétt á styrk frá SÍ skv. ofangreindum skilyrðum.

Í umsókninni skal lögð fram æfingaáætlun þar sem þjálfun fyrir tiltekið mót og þátttaka á skákmótum næstu 3 mánuði er skýrð.

Ef umsókn er ófullnægjandi og ekki skilað á þann hátt sem að ofan greinir, er henni sjálfkrafa vísað frá. 

Styrkir SÍ eru afgreiddir þrisvar sinnum á ári. 10. febrúar, 10. júní og 10. október. Sækja þarf um styrkina í lok mánaðarins á undan [nú 5. júní]. Ætlast er til að sótt sé um styrki áður en haldið er mót en ef góðar aðstæður valda því að sótt er um eftir á er tekið tillit til þess.

Sérstök styrkjanefnd, skipuð af stjórn SÍ, fer yfir allar umsóknir og gerir tillögur til stjórnar um afgreiðslu styrkja hverju sinni. 

Að jafnaði getur enginn fengið meira en 60.000 krónur á ári í styrk frá SÍ, nema þegar hann er fulltrúi Íslands á alþjóðlegum mótum erlendis. Ef einhver þykir skara sérstaklega fram úr á sl. 12 mánuðum er þó hægt að gera undantekningu á þessari reglu og hækka árlegan styrk til viðkomandi aðila. 

Skyldur styrkþega gagnvart SÍ: 

Að loknu móti skulu styrkþegar senda stutta frásögn til styrkjanefndar og skýra skák frá mótinu sem þeir hlutu styrk til að taka þátt í. Styrkjanefnd mun síðan birta greinina í einhverjum miðli skákhreyfingarinnar.

Ef stjórn SÍ fær áreiðanlegar upplýsingar um ósæmilega og vítaverða hegðun styrkþega á skákstað (t.d. áfengisnotkun á meðan á móti stendur) og ef styrkþegi hættir á skákmóti án löglegra forfalla, mun viðkomandi vera sviptur þeim styrk sem honum var veittur. Viðkomandi mun auk þess ekki koma til greina við úthlutun styrkja SÍ næstu 12 mánuði.

Styrkir eru borgaðir út eftir að skákmóti lýkur, þegar ljóst er að skyldur styrkþega hafa verið uppfylltar.

Guðmundur og Lenka skákmeistarar Íslands 2014

Þá er 100. Skákþingi Íslands lokið. Úrslit urðu þau að Guðmundur Kjartansson er skákmeistari Íslands 2014 og Lenka Ptachnikova skákdrottning Íslands 2014.

Mótið fór fram við góðar aðstæður í stúkunni við Kópavogsvöll. Teflt var í tveimur flokkum, landsliðsflokki þar sem tíu, úr hópi okkar allra sterkustu skákmanna öttu kappi, og áskorendaflokki, þar sem 43 keppendur tefldu í opnum flokki.

Spennan var mikil í báðum flokkum og ekki ljóst fyrr en eftir síðustu skák í dag hverjir verma myndu efstu sæti hvors flokks.

Landsliðsflokkur.

Þegar Guðmundur samdi jafntefli við Hjörvar Stein Grétarsson í síðustu umferð var þegar ljóst að hann yrði næsti skákmeistari Íslands því Hannes Hlífar Stefánsson hafði samið jafntefli við Henrik Danielsen skömmu áður. Hannes var sá eini sem gat náð Guðmundi að vinningum og hefði þurft sigur í síðustu umferð. Nýtt nafn var því skráð í sögubækurnar í gær.

Guðmundur er afar vel að sigrinum kominn. Hann tefldi vel allt mótið og var sá eini sem ekki tapaði skák - hlaut 6.5 vinninga í 9 skákum og náði áfanga að stórmeistaratitli með frammistöðu sem jafngilti 2.624 Elo stigum! Þetta er frábær árangur og nú verður þessi vart langt að bíða að Guðmundur ljúki síðasta áfanganum og verði 15. stórmeistari okkar Íslendinga.

Gummi er hvers manns hugljúfi en með keppnisskapið á sínum stað. Það er ljóst að hann hefur bætt sig verulega síðustu misseri og endataflstækni hans er með þeim hætti að reyndari meistarar gætu lært af henni lexíu. Fyrir sigurinn hlýtur Guðmundur 300.000 kr. í verðlaun auk þess sem stórmeistaraáfanginn er verðlaunaður sérstaklega af Skáksambandi Íslands. Glæsilegur fulltrúi yngri kynslóðar skákmanna, fyrirmynd sem gaman verður að fylgjast með í framtíðinni.

Jafnir í 2.-3. sæti með 5.5 vinninga urðu Héðinn Steingrímsson og Hannes Hlífar Stefánsson. Héðinn byrjaði illa en sótti í sig veðrið og náði 4 vinningum í síðustu 5 skákunum. Hannes Hlífar, sem unnið hefur Skákþing Íslands oftar en nokkur annar, eða alls 12 sinnum, var í forystu í mótinu framan af, en fataðist ögn flugið og verður að sætta sig við skipt annað sætið að þessu sinni. Héðinn hlýtur silfrið á stigum.

1. Guðmundur Kjartansson 6.5 vinninga

2.       Héðinn Steingrímsson  5.5 vinninga (24 stig)

3.       Hannes Hlífar Stefánsson 5.5 vinninga (22 stig)

Að öðru leyti er vísað til töflu: (http://chess-results.com/tnr134014.aspx?lan=1&art=4&flag=30&wi=821)

Áskorendaflokkur.

Í áskorendaflokki, bar Sigurður Daði Sigfússon sigur úr býtum með 7.5 vinninga af 9 mögulegum. Daði tapaði snemma móts fyrir Magnúsi Teitssyni, en leyfði svo einungis eitt jafntefli í næstsíðustu umferð á móti Lenku. Gott mót hjá Sigurði Daða. Annað sæti hreppti Lenka Ptachnikova með 7.0 vinninga. Hún sigraði Davíð Kjartansson í síðustu umferð en Davíð varð að sigra til þess að ná Sigurði Daða. Það gekk ekki eftir og Lenka hafði betur í langri skák. Lenka tefldi vel í mótinu og er vel að silfrinu komin og mun ásamt Sigurði Daða tefla í landsliðsflokki að ári.

Davíð varð þriðji á stigum, en jafnir honum með 6.5 vinninga komu Óliver Aron Jóhannesson og hinn 11 ára Vignir Vatnar Stefánsson.

1.       Sigurður Daði Sigfússon                 7.5 vinninga

2.       Lenka Ptachnikova         7.0 vinninga

3.       Davíð Kjartansson 6.5 vinninga (46 stig)

4.       Óliver Aron Jóhannesson 6.5 vinninga (45.5 stig)

5.       Vignir Vatnar Stefánsson 6.5 vinninga (40.5 stig)

Annars er vísað til töflu á chess-result vefnum: http://chess-results.com/tnr129653.aspx?lan=1&art=1&flag=30&wi=821.

Kvennaflokkur:

Kvennaflokkur var háður sem hluti af áskorendaflokki. Lenka Ptachnikova, sem verið hefur sterkust íslenskra skákkvenna síðustu ár, var hlutskörpust. Lenka hlaut 7 vinninga en á hæla hennar komu svo stöllur hennar úr landsliðinu, Hallgerður Helga Þorsteinsdóttir og Tinna Kristín Finnbogadóttir með 5.5 vinninga. Hallgerður hlaut silfrið á stigum.

1.       Lenka Ptachnikova         7.0 vinninga

2.       Hallgerður HelgaÞorsteinsdóttir 5.5 vinninga

3.       Tinna Kristín Finnbogadóttir 5.5 vinninga

Sérstök verðlaun voru veitt í áksorendaflokki fyrir bestan árangur miðað við eigin stig. Undir 2.000 stigum náði Aron Thor Mai bestum árangri en Sigurður Daði var bestur yfir 2.000 stigum.

Starfsmenn mótsins hljóta þakkir fyrir einurð, úthald og vandaða umgjörð.

Omar Salama, Steinþór Baldvinsson, og Ingibjörg Edda Birgisdóttir sáu um skákstjórn en auk þess lagði Gunnar Björnsson forseti lóð á vogarskálarnar auk Erlu Hlínar Hjálmarsdóttur og margra annarra. Veitingar sá Birna um eins og henni er einni lagið. Skákskýringar og umsjón mótsvefjar voru í góðum og öruggum höndum landsliðseinvalds kvenna, Ingvars Þórs Jóhannessonar.

 

Meistaramót Skákskóla Íslands 2014

Meistaramót Skákskóla Íslands fyrir starfsárið 2013/2014 hefst föstudaginn 6. júní. Tefldar verða sjö umferðir eftir svissneska kerfinu. Þátttökurétt hafa nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans. 

Núverandi meistari  Skákskóla Íslands er Nökkvi Sverrisson

Þátttökuréttur:

Allir nemendur skólans og þeir sem tekið hafa þátt í námskeiðum á vegum skólans.

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

Dagskrá mótsins verður með eftirfarandi hætti:

Umferðafjöldi: Sjö umferðir. Í þrem fyrstu umferðunum verða tefldar atskákir en fjórar lokaumferðirnar eru kappskákir.

Tímamörk: Atskákir:  25 10  þ.e 25 mínútur að viðbættum sekúndum fyrir hvern leik. 

Kappskákir:  90 30 þ.e. 90 mínútur á alla skákina og 30 sekúndur bætast við eftir hvern leik.

Fyrirkomulag: Svissneska kerfið - swiss perfect.

Skákstig: Mótið verður reiknað til skákstiga.  Fjórar síðustu umferðirnar eru reiknaðar til íslenskra- og alþjóðlegra stiga. At-skákirnar eru ekki reiknaðar til stiga. 

Verðlaun:

A:

1. verðlaun:

Meistaratitill Skákskóla Íslands 2012/2013 og farandbikar. Einnig  flugfar m/Flugleiðum á Evrópuleið* og uppihalds kostnaði kr. 30 þús.

2. verðlaun: Flugfarmiði á leiðum Flugfélags Íslands á Evrópuleið.

3. - 5. verðlaun: Vandaðar skákbækur.

Verðlaun fyrir keppendur 12 ára og yngri.

1. - 3. verðlaun: Vandaðar skákbækur.

 

Verðlaun fyrir krakka 8 ára og yngri

1. - 3. verðlaun: Vandaðar skákbækur. 

 

* ^{Mótshaldarinn áskilur sér rétt til að finna hagstæðasta fargjald sem hægt er að fá enda verði tilkynnt um ferðir með góðum fyrirvara.} 

* Verðlaunahafi verður að nýta sér farmiða innan 12 mánuða frá lokum mótsins.

 

B:

 

Dagskrá:

1. umferð: Föstudagurinn 6. júní kl. 18  

2. umferð: Föstudagurinn 6. júní kl. 19

3. umferð. Föstudagurinn 6. júní kl. 20.

 

4. umferð: Laugardagurinn 7. júní kl. 10-14  

5. umferð: Laugardagurinn 7. júní kl. 15 - 19

 

6. umferð: Sunnudagurinn 8. júní kl. 10.-14.

7. umferð: Sunnudagurinn 8. júní kl. 15-19.

 

Verðlaunaafhending fer fram strax að móti loknu.

Athugið að hver keppandi getur tekið ½ vinnings yfirsetu ´1. - 6. umferð. Tilkynna skal fyrir mótið hvenær óskað er yfirsetu.

Þátttöku skal tilkynna í síma SÍ 5689141 á netfangið [e-mail] eða [e-mail] .

 

Mótsnefnd áskilur rétt til að gera breytingar á fyrirfram boðaðri dagskrá.