Skákþáttur Morgunblaðsins: Skákin fangar athygli Jóns og Gunnu

Stór hluti norsku þjóðarinnar sat límdur við skjáinn síðustu daga ársins 2017 þegar heimsmeistaramótin í at-skák og hraðskák fóru fram í Riyadh í Sádi-Arabíu, en auk vefmiðlanna var norska sjónvarpið, NRK, með beinar útsendingar frá viðureignum Magnúsar Carlsen. Niðurstaðan: hinn 48 ára gamli Indverji Wisvanathan Anand varð heimsmeistari í atskák og Magnús Carlsen heimsmeistari í hraðskák.

Skákin er á mikilli uppleið í sjónvarpi og á netinu. Vandinn hefur verið sá að keppnisgreinin sem slík hefur þótt gera of miklar kröfur til þekkingar áhorfandans og ekki náð að fanga athygli Jóns og Gunnu. Eins og mótin eru matreidd nú til dags með skákskýringum, nærmyndum af keppendum, tímahraki og tölvugreiningu er að verða breyting á. Þegar við bætist hátt verðlaunafé eykst athygli stærstu fjölmiðlanna; 250 þúsund dalir voru í 1. verðlaun í hvoru móti og má geta þess að CNN sýndi langan þátt um mótið. En heimsmeistaramótið beindi einnig athygli að bjánalegum skákreglum og atvik úr viðureign Magnúsar Carlsen í 1. umferð hraðskákarinnar kallaði á sterk viðbrögð:

Magnus Carlsen – Inarkiev

Síðasti leikur heimsmeistarans var 27. Ha7xb7+. Rússinn Inarkiev sá fram á að staða hans væri töpuð eftir 27. ... Hxb7 28. Bxe8+ og eftir uppskipti á hrókum á hvítur að vinna á umframpeðinu en lék þess í stað ólöglegum leik, 27. ... Re3+. Af mörgu vitlausu regluverki sem komið hefur frá FIDE síðustu árin opnar ein sú vitlausasta á þann möguleika að sá sem leikur ólöglegum leik getur unnið skákina; Magnús lék nefnilega 28. Kd3 og Inarkiev krafðist vinnings á þeirri forsendu að Magnús hefði leikið ólöglegum leik! Þótti mörgum býsna lágt lotið en viti menn: dómarinn féllst á að það væri réttmæt krafa! Stuttu síðar var svo farið að rýna í reglurnar og niðurstaðan varð sú að skákinni skyldi haldið áfram eftir 27. leik hvíts. Inarkiev neitaði að tefla frekar en dómarinn var settur af og okkar maður í Sádi-Arabíu, alþjóðlegi dómarinn Omar Salama, var settur yfir viðureignir heimsmeistarans.

Atvikið virtist slá Magnús Carlsen út af laginu fyrri keppnisdaginn en þann síðari náði hann vopnum sínum og að lokum hlaut hann 16 vinninga af 21 mögulegum. Karjakin og Anand komu næstir með 14½ vinning hvor.

 

Minningarmót um Steinþór Baldursson

Skáksamband Íslands og Skákskóli Íslands hafa samvinnu um alþjóðlegt mót skipað skákmönnum 20 ára og yngri til að minnast Steinþórs Baldurssonar, stjórnarmanns í SÍ, sem féll frá langt um aldur fram haustið 2016. 24 skákmenn hófu keppni á fimmtudaginn og tefldar verða sjö umferðir með tímamörkunum 90 30. Eftir fyrstu tvær umferðirnar voru fjórir með tvo vinninga, þ.ám. Birkir Örn Bárðarson. 

Hinn 16 ára gamli Aron Thor Mai fékk á sig sjaldséða leið í Najdorf-afbrigði Sikileyjarvarnar en var öllum hnútum kunnugur:

Aron Thor Mai – Ljuten Apol (Færeyjar)

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. Bg5 e6 7. f4 Rc6 8. Rxc6 bxc6 9. e5 h6 10. Bh4 g5 11. fxg5 Rd5 12. Re4 Db6 13. c3 hxg5 14. Bxg5 dxe5?

15. Dxd5! Be7

15. ... exd5 er svarað með 17. Rf6+ og 18. Rxd5+ sem vinnur drottninguna.

16. Dd2 Bxg5 17. Rx

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 6. janúar 2018.

Skákþættir Morgunblaðsins

Hannes vann í fyrstu umferð í Prag

Stórmeistarinn Hannes Hlífar Stefánsson (2523) tekur um þessar mundir þátt í tveimur alþjóðlegum mótum í Tékklandi. Hið fyrra fer fram í Prag dagana 12.-19. janúar óg í framhaldinu fer Hannes til Marienbad og teflir 20.-27. janúar. Þess fyrir utan tekur Hannes þátt í Skákhátíð MótX í Stúkunni í Breiðabliki en tekur yfirsetur þar á meðan hann er í Tékkó.

Fyrsta umferð fór fram í gær og þar vann Hannes stigalágan þjóðverja (2071). Fyrirstaðan í dag verður meiri en í dag mætir rússneska alþjóðlega meistaranum Nikolay Monin (2193) í fyrri skák dagsins sem nú er í gangi. 

• Heimasíða mótsins
• Chess-Results
• Beinar útsendingar

Vignir Vatnar sigraði á hraðkvöldi

Vignir Vatnar Stefánsson sigraði á atkvöldi Hugins sem fram fór 8. janúar sl. Vignir Vatnar fékk 5,5v af sex mögulegum og það var Kristján Halldórsson sem náði jafnteflinu í fimmtu  umferð en aðrir máttu játa sig sigraða. Síðan komu þrír jafnir með 4v en það voru þeir Stephan Briem, Kristján Halldórsson og Benedikt Briem. Af þeim var Stephan hæstur á stigum og hlaut annað sætið. Kristján kom næstur að stigum og hlaut þriðja sætið en Benedikt þurfti að láta sér nægja fjórða sætið þótt hann hafi lagt að velli sér eldri og reyndari skákmenn á atkvöldinu.

Tölvan var látin um dráttinn eins og á síðustu skákkvöldum. Upp kom talan sjö þannig að Vigfús var dreginn í þetta sinn og höfðu sumir á orði að þetta væri nú ekkert random. Vignir Vatnar valdi gjafabréf frá Dominos og Vigfús valdi Saffran enda lítur hver sínum augum á silfrið. Næsta skákkvöld verður mánudaginn 29. janúar og þá verður hraðkvöld.

Lokastaðan á hraðkvöldinu:

1.  Vignir Vatnar Stefánsson, 5,5v/6

2.  Stephan Briem, 4v

3.  Kristján Halldórsson, 4v

4.  Benedikt Briem, 4v

5.  Kristófer Ómarsson, 3,5v

6.  Sigurður Freyr Jónatansson, 3v

7.  Vigfús Ó. Vigfússon, 3v

8.  Hjalti Atlason, 3v

9.  Örn Alexandersson, 2,5v

10. Hjálmar Sigurvaldason, 1,5v

11. Björgvin Kristbergsson, 1v

12. Hörður Jónasson, 1v

Lokastaðan í chess-results:

Óvænt úrslit í 1.umferð Skákþings Reykjavíkur

Margar skemmtilegar skákir voru tefldar í skáksal Taflfélags Reykjavíkur á miðvikudagskvöld þegar flaggskip félagsins, Skákþing Reykjavíkur, lagði úr höfn. Það má með sanni segja að þetta sögufræga skákmót hafi byrjað með látum. Stigahærri skákmenn þurftu margir hverjir að hafa mikið fyrir viðureignum sínum gegn þeim stigalægri svo oft skall hurð nærri hælum. Þó svo stigamunurinn væri 500-900 stig þá var handagangurinn í öskjunni slíkur að eitthvað varð undan að láta. Þessari fyrstu umferð lauk með þremur óvæntum úrslitum sem kann að gefa fyrirheit um það sem koma skal í Skákþinginu þetta árið.

Skákþing Reykjavíkur var fyrst haldið árið 1932. Þá fór með sigur úr býtum hinn sexfaldi Íslandsmeistari Ásmundur Ásgeirsson. Síðan þá hafa margir af fremstu skákmönnum þjóðarinnar hampað Reykjavíkurmeistaratitlinum, enginn þó oftar en stórmeistarinn Þröstur Þórhallsson og alþjóðlegi meistarinn Jón Viktor Gunnarsson; alls sjö sinnum. Á meðal sigurvegara eru stórmeistararnir Friðrik Ólafsson (1960, 1963, 1975), Margeir Pétursson (1980), Helgi Ólafsson (1976, 1977), Hjörvar Steinn Grétarsson (2009, 2010), Stefán Kristjánsson (2002, 2006) og Jón L. Árnason (1981).

Keppendur Skákþingsins þetta árið eru alls 57 og þar á meðal eru tveir fyrrum Reykjavíkurmeistarar. Alþjóðlegi meistarinn Bragi Þorfinnsson (2426), sem vann mótið árið 2004, og FIDE-meistarinn Sigurbjörn J. Björnsson (2288), sem varð hlutskarpastur árið 2007, þykja báðir sigurstranglegir. Aðrir titilhafar sem munu vafalítið blanda sér í toppbaráttuna eru alþjóðlegi meistarinn Einar Hjalti Jensson (2336), FIDE-meistarinn Dagur Ragnarsson (2332), FIDE-meistarinn Vignir Vatnar Stefánsson (2304) og stórmeistari kvenna Lenka Ptácníková (2218).

Mótið hófst á því að skákdrottningin Birna Halldórsdóttir lék fyrsta leikinn á efsta borði í skák Einars Hjalta (2336) sem hafði hvítt gegn Óskari Long Einarssyni (1785). Birna hefur ásamt manni sínum, Ólafi Ásgrímssyni, staðið staðföst vaktina hjá Taflfélagi Reykjavíkur í áratugi og hafa þau hjónin gætt félagið einstöku og ómetanlegu lífi. Það fór vel á því að Birna léki fyrsta leikinn í einu elsta og virtasta skákmóti þjóðarinnar þar sem Ólafur gegnir embætti skákstjóra. Birna lék kóngspeði Einars Hjalta fram um tvo reiti og var sem peðið öðlaðist fítonskraft því það reyndist örlagavaldur snemma tafls. Töfrar Birnu eru órannsakanlegir.

Í þessari fyrstu umferð urðu þau tíðindi helst að fyrrum formaður Taflfélags Reykjavíkur, Sigurlaug R. Friðþjófsdóttir (1734), skellti Degi Ragnarssyni (2332) með hvítu. Dagur geystist upp drottningarvænginn og með óstöðvandi frípeð á b-línunni stóð pilturinn með pálmann í höndunum. Sjaldgæf villa hefur slæðst í útreikningana hjá Degi því hann bauð upp á varhugaverð drottningakaup sem umturnuðu taflinu. Skyndilega blasti við mát uppi í borði, óleysanleg leikþröng og Sigurlaug stóð til vinnings. Hún setti örlögin í hendur Guðsmannsins sem dansaði um borðið undir lok skákarinnar þar til hann komst á a3-f8 skálínuna og vinningurinn var í höfn.

Rektor Menntaskólans við Hamrahlíð, Lárus H. Bjarnason (1539) gerði sér lítið fyrir og vann MR-inginn Gauta Pál Jónsson (2161) í nokkuð sérkennilegri Sikileyjarvörn þar sem Gauti Páll pakkaði inn peði og færði rektornum að gjöf í skiptum fyrir virka menn og betri peðastöðu. Þó grunsamlega pakka beri að nálgast af varúð þá þáði rektorinn gjöfina án nokkurra eftirmála. Hann stóð af sér allt sprikl Gauta Páls og hafði að lokum sigur í 45 leikjum.

Gamla brýnið Jón Úlfljótsson (1687) hélt upp á 50 ára Skákþingsafmælið sitt með því að læsa hurðum og henda lyklinum gegn Sigurbirni J. Björnssyni (2288). Þó sögur fari af þróttmiklum keppnismönnum í Faxafeninu sem komist hafa í gegnum læstar hurðar þá reyndist staða Jóns svo rammgirt að vel vopnum búinn sérsveitarmaður hefði þurft frá að hverfa. Jón og Sigurbjörn sættust því á skiptan hlut eftir 41 leik.

Önnur úrslit þessarar viðburðaríku 1.umferðar voru samkvæmt hinni víðfrægu bók. Engu að síður voru margir meistarar framtíðarinnar hársbreidd frá því að gera þaulvönum keppnismönnum skráveifu. Þessi fyrsta umferð lofar því svo sannarlega góðu fyrir fyrir framahaldið og eru skákunnendur hvattir til þess að taka þátt í veislunni með því að líta við í skáksalinn. Hörkuskákir eru framundan í 2.umferð mótsins sem hefst næstkomandi sunnudag klukkan 13:00. Íslenskukennarinn og rithöfundurinn Bragi Halldórsson (2082) stýrir þá hvítu mönnunum á efsta borði gegn Einari Hjalta (2336). Á öðru borði hefur Aron Þór Mai (2066) hvítt gegn stórmeistarabananum Vigni Vatnari (2304).

Taflfélag Reykjavíkur mun sem fyrr þjónusta skákáhugamenn með öflugri úrslitaþjónustu, leiftursnöggum innslætti skáka, glóðvolgum ljósmyndum úr skáksal og kræsingum úr eldhúsinu. Þeir skákáhugamenn sem ekki eiga heimangengt geta fylgst með skákum efstu borða í beinni útsendingu á netinu.

Skákir 1.umferðar ásamt úrslitum og mótstöflu má finna á Chess-Results.

Sjá nánar á heimasíðu TR.

Skákþing Akureyrar hefst á sunnudaginn

Skákþing Akureyrar, hið 80. í röðinni hefst nk. sunnudag 14. janúar. 

Teflt verður í Skákheimilinu í Íþróttahöllinni við Skólastíg.

Dagskrá:

1. umferð sunnudaginn 14. janúar   kl. 13.00    
2. umferð fimmtudaginn 18. janúar  kl. 18.00
3. umferð sunnudaginn 21. janúar   kl. 13.00
4. umferð sunnudaginn 28. janúar   kl. 13.00
5. umferð sunnudaginn 4. febrúar   kl. 13.00
6. umferð sunnudaginn 11. febrúar  kl. 13.00
7. umferð sunnudaginn 18. febrúar  kl. 13.00

 Öllum er heimil þátttaka í mótinu.

Tefldar verða 7 umferðir skv. svissnesku kerfi. *

Sigurvegar mótsins hreppir heiðurstitilinn: **

 „Skákmeistari Akureyrar 2018“

Umhugsunartími verður 90 mínútur á skákina, auk þess sem 30 sekúndur bætast við tímann fyrir hvern leik (90+30).   

Þátttökugjald er kr. 3.000 fyrir skuldlausa félagsmenn, kr. 4.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Mótið verður reiknað til íslenskra og alþjóðlegra skákstiga. 

Verðlaun:

1. sæti kr. 20.000
2. sæti kr. 14.000
3. sæti kr. 8.000

stigaverðlaun (1799 stig og minna) kr. 8.000

 Skráning er hjá skákstjóra í netfangið [e-mail] eða á facebook-síðu Skákfélags Akureyrar.

Einnig er hægt að skrá sig á skákstað eigi síðar en 15 mínútum fyrir upphaf fyrstu umferðar.

 

* Mótsstjórn áskilur sér rétt til þess að gera breytingar á fjölda umferða þegar endanlegur þátttakendalisti liggur fyrir.  Ákvörðun um fyrirkomulag verður tilkynnt keppendum fyrir upphaf fyrstu umferðar.

** Skákmeistari Akureyrar getur aðeins sá orðið sem er búsettur á Akureyri og/eða er fullgildur félagi í Skákfélagi Akureyrar. 

TORG skákmót Fjölnis verður haldið 26. janúar á Skákdegi Íslands – Ókeypis þátttaka

Skákdeild Fjölnis hefur staðið fyrir afar glæsilegu TORG – skákmóti, hvert ár síðan 2004. Þetta er eitt allra vinsælasta barna-og unglingaskákmót landsins og er ætlað öllum áhugasömum grunnskólanemendum í Grafarvogi og á landinu öllu. Teflt er um verðlaunagripi og 30 verðlaun eða happadrættisvinninga. Teflt er í hátíðarsal Rimaskóla og hefst skákmótið kl. 15:00 föstudaginn 26. janúar og lýkur sama dag um kl 17:00. Skráning á staðnum og því heppilegt að allir keppendur mæti korteri fyrir keppni.

TORG skákmótið ber að þessu sinni upp á Skákdag Íslands 26. janúar sem er afmælisdagur Friðriks Ólafssonar fyrsta stórmeistara Íslands í skák. Friðrik verður 83 ára þennan dag og verður honum boðið að vera viðstaddur mótið sem heiðursgestur og fylgjast með æsku Íslands að tafli. Þátttaka á þessu glæsilega móti er ókeypis. Hagkaup og Emmess ís eru styrktaraðilar mótsins. Fyrirtækin gefa fjölda vinninga og bjóða öllum þátttakendum upp á ís, drykk og nammi í skákhléi. Fyrirtækin á Torginu við Hverafold gefa einnig vinninga til mótsins, gjafabréf á pítsur, bækur, tískufatnað ofl.  Foreldrar sem eru meðvitaðir um áhuga barna sinna á skáklistinni ættu að hvetja börn sín til að taka þátt í þessu vinsæla skákmóti og taka tímann frá. Foreldrar eru einnig velkomnir að fylgjast með og þiggja kaffiveitingar á staðnum. Grunnskólanemendur, fjölmennum á skemmtileg skákmót í Rimaskóla á Skákdegi Íslands föstudaginn 26. janúar kl. 15.00 – 17:00.  

 

Jón Torfason vann Nýársskákmót Vinaskákfélagsins

Nýársskákmót Vinaskákfélagsins var haldið mánudaginn 8. Janúar 2018 í Vin að Hverfisgötu 47. Tefldar voru 6 umferðir með 7 mínútur á skák. Skákstjóri var Hörður Jónasson. Þetta var fyrsta skákmót ársins 2018 hjá Vinaskákfélaginu. 11 keppendur tók þátt í skákinni og var sérstaklega gleðilegt að Jón Torfason skyldi geta verið með.

Halldóra Pálsdóttir forstöðukona í Vin lék fyrsta leikinn á skák þeirra Róbert Lagerman og Finn Finnssonar.

Mótið tókst vel og var glatt á hjalla.

Jón Torfason sigraði mótið með 5,5 vinninga og var hærri á stigum heldur en Róbert Lagerman sem fékk líka 5,5 vinninga og annað sætið. Þriðja sætið varð Hjálmar Sigurvaldason með 4 vinninga.

Eftir skákmótið gæddu keppendur sér á dýrindis vöfflum með sultu og rjóma og kaffi. Ennfremur var reitt fram brauðterta og þakkar stjórn Vinaskákfélagið fyrir góðar veitingar.

Skákþing Reykjavíkur hefst í kvöld

Skákþing Reykjavíkur hefst miðvikudaginn 10. janúar kl. 19.30. Tefldar verða níu umferðir eftir svissnesku kerfi. Tímamörk eru 90 mínútur og bætast við 15 mínútur eftir 40 leiki. 30 sekúndur bætast við eftir hvern leik alla skákina. Teflt er í húsnæði Taflfélags Reykjavíkur að Faxafeni 12.

Keppendur geta tekið tvær yfirsetur (bye) í umferðum 1-6. Leggja skal inn ósk um yfirsetu til skákstjóra við upphaf umferðarinnar á undan. Hálfur vinningur fæst fyrir yfirsetu.

Athygli er vakin á því að umferðir á sunnudögum hefjast kl. 13:00.

Dagskrá

1. umferð miðvikudag 10. janúar kl. 19.30
2. umferð sunnudag 14. janúar kl. 13.00
3. umferð miðvikudag 17. janúar kl. 19.30
4. umferð sunnudag 21. janúar kl. 13.00
5. umferð miðvikudag 24. janúar kl. 19.30
6. umferð sunnudag 28. janúar kl. 13.00
7. umferð miðvikudag 31. janúar kl. 19.30
8. umferð sunnudag 04. febrúar kl. 13.00
9. umferð miðvikudag 07. febrúar kl. 19.30

Hraðskákmót Reykjavíkur fer fram sunnudaginn 11. febrúar kl. 13 og verður þá jafnframt verðlaunaafhending fyrir Skákþingið.

Tímamörk

90 mín á 40 leiki, síðan 15 mín, auk 30 sek eftir hvern leik alla skákina.

Skákstjórn

IA Ólafur Ásgrímsson og IA Ríkharður Sveinsson ([e-mail] / s.772 2990)

Aðalverðlaun

• 1. sæti kr. 80.000
• 2. sæti kr. 40.000
• 3. sæti kr. 20.000

Stigaverðlaun

• Besta frammistaða miðað við eigin stig (rating performance – eigin stig) – kr. 10.000.
• U2000 og U1800 – kr. 10.000.
• U1600, U1400, U1200, stigalausir – bókaverðlaun.

Fide stig gilda við úthlutun stigaverðlauna (íslensk stig til vara). Hver keppandi getur aðeins hlotið ein aukaverðlaun (ofangreind röð verðlauna gildir).

Þátttökugjöld (greiðist með reiðufé við upphaf móts).

kr. 5.000 fyrir 18 ára og eldri.
kr. 2.500 fyrir 17 ára og yngri.

Skráningarform

Skráðir keppendur

Keppt er um titilinn “Skákmeistari Reykjavíkur 2018” og hlýtur sá keppandi sem verður efstur þeirra sem eiga lögheimili í Reykjavík, eða eru félagsmenn í reykvísku skákfélagi, titilinn og farandbikar til varðveislu í eitt ár. Núverandi Skákmeistari Reykjavíkur er alþjóðlegi meistarinn Guðmundur Kjartansson.

Verði keppendur jafnir að vinningum í þremur efstu sætunum, verður verðlaunum skipt (Hort-kerfi), en stigaútreikningur (tiebreaks) látinn skera úr um lokaröð. Í öðrum verðlaunaflokkum ganga verðlaun óskipt til þess sem hefur flest stig eftir stigaútreikning. Röð stigaútreiknings: 1. Innbyrðis úrslit 2. Buchholz (-1) 3. Buchholz (median) 4. Sonneborn-Berger.

Skákþing Reykjavíkur er reiknað til alþjóðlegra skákstiga. Skákir mótsins verða slegnar inn og birtar á pgn formi.

Vinsamlegast mætið tímanlega á skákstað til að staðfesta skráningu og greiða þátttökugjald. Skráningu lýkur 15 mínútum fyrir auglýst upphaf móts, þ.e. kl. 19:15.

Hollenskur sigur á gríðarlega vönduðu minningarmóti um Steinþór

Skáksamband Íslands og Skákskóli Íslands stóðu í sameiningu fyrir minningarmóti um Steinþór Baldursson dagana 4.-7. janúar. Mótið var haldið í Stúkunni við Kópavogsvöll. Um var að ræða unglingaskákmót fyrir tuttugu ára og yngri. Mótið var sannarlega í samræmi við hugsjónir Steinþórs enda var unga kynslóðin, grasrótin og framtíðin honum einkar hugleikin. Alls tóku 24 skákmenn þátt í mótinu. Þar af voru þrettán íslenskir og ellefu erlendir skákmenn sem komu frá fjórum löndum.

Mótið var sett 4. janúar.  Mikill fjöldi fólks var viðstaddur og mátti þar sjá flesta helstu forsvarsmenn skákhreyfingarinnar, gamla samstarfsfélaga, vini og ekki síst fjölskyldu Steinþórs. Gunnar Björnsson, forseti Skáksamband Íslands, hélt stutta ræðu þar sem Steinþórs var minnst og farið yfir alltof stuttan feril (en árangursríkan) hans í skákhreyfingunni.

Móðir Steinþórs, Arndís Ármann Steinþórsdóttir, hélt einnig ræðu og sýndi meðal annars viðurkenningu sem Steinþór fékk árið 1977 fyrir að gera jafntefli við Hort í fjöltefli í Valhúsaskóla, undirritaða af Einari S. Einarssyni, þáverandi forseta SÍ. Það fylgdi sögunni að viðurkenningin hefði ávallt verið Steinþóri hjartfólgin og hangið upp á vegg í herbergi hans alla tíð.

Að þessu loknu lék Felix, sonur Steinþórs, fyrsta leik mótsins, 1. d2-d4, fyrir Alexander Oliver Mai gegn stigahæsta keppenda mótsins, Hollendingnum, Thomasi Beerdsen.

Að lokinni setningu mótsins var gestum og gangandi boðið í súpu og brauð í boði mótshaldara. Stóðu þar vaktina þau Birna Halldórsdóttir og Ólafur S. Ásgrímsson með miklum myndarskap.

Thomas þessi reyndist bestur allra og sigraði á mótinu. Hann hlaut 6 vinninga og var taplaus. Tefldi af öryggi og vann flesta andstæðinga sína örugglega og fljótt.  Annar varð Lettinn Aleksandrs Jazdanovs með 5½ vinning. Þriðji varð annar Hollendingur Tycho Dijkhuis (2402) með 5 vinninga. Bárður Örn Birkisson tók svo síðustu peningaverðlaunin en hann varð fjórði með 4½ vinning. Mun hann ætla að fjárfesta í nýjum buxum fyrir þau!

Símon Þórhallsson, Alexander Oliver Mai, Gauti Páll Jónsson, Oliver Aron Jóhannesson og Dagur Ragnarsson hlutu 4 vinninga. 

Steinþórsmótið nú er fyrsta alþjóðlega unglingamótið sem haldið er á Íslandi um langt árabil. Mikil eftirspurn er eftir slíku mótshaldi og vonandi verður framhald á því. Það er afar mikilvægt fyrir skákmenn framtíðarinnar að fá tækifæri til að tefla oftar við erlenda skákmenn – í stað þess að tefla sífellt við sömu andstæðinga sí og æ. Íslensku skákmennirnir gerðu margir hverjir gott mót.

Taflmennskan var ströng en tefldar voru tvær skákir alla daga nema lokadaginn.  Ungum skákmönnum finnst ekkert tiltöku mál að tefla tvær skákir á dag, þótt sumir hinna eldri séu minna hrifnir af slíku álagi!

Birkir Ísak Jóhannsson hækkaði mest íslensku skákmannanna að stigum (+37). Næstir voru Bárður (+36), Símon (+24), Óskar Víkingur Davíðsson (+17), Benedikt Briem (+17) og Alexander Oliver (+11). 

Lokahóf mótsins var svo haldið á sunnudeginum. Birna og Ólafur buðu upp á íslenskt lambakjöt fyrir keppendur og aðra gesti sem heldur betur sló í gegn.

Gunnar Björnsson, forseti SÍ, og Helgi Ólafsson, skólastjóri Skákskóla Íslands, afhentu verðlaun mótsins. Sigurvegari mótsins fékk í verðlaun íslenskt hraun og var dolfallinn yfir þessum verðlaunagrip – sem honum fannst greinilega miklu merkilegri en "enn einn bikarinn".

Mótshaldið var þeim sem þetta ritar ákaflega minnisstætt. Velviljinn var svo bersýnilegur. Þakkir fá sérstakar bæði Landsbankinn og Kvika banki en Steinþór vann á báðum stöðum. Án stuðnings þessara fyrirtækja hefði mótshaldið ekki verið mögulegt. Að minnsta kosti ekki jafn gríðarlega vandað! Sérstakar þakkir fá þeir Hannes Frímann (Kviku) og Árni Þór (Landsbankanum).

Ekki vantaði vilja skákstjóra við að vinna við mótið – enda flestir gamlir félagar Steinþórs og margir minnast Tromsöf-erðlagsins með miklum hlýhug. Róbert Lagerman, Ingibjörg Edda Birgisdóttir, Omar Salama, Kristján Örn Elíasson og Hörður Jónasson stóðu öll vaktina.

 

Auk mín skipuðu Helgi Ólafsson og Stefán Bergsson mótsstjórn. Óskar Long Einarsson og Þorsteinn Stefánsson reyndust óþreytandi við alls konar reddingar og stúss. Ásdís Bragadóttir, framkvæmdastjóri Skáksambands Íslands, vann mikið starf og var eins og svo oft áður manneskjan bakvið tjöldin við framkvæmd mótsins.

Gríðarlega vandað.

Gunnar Björnsson.

Skákþing Akureyrar hefst 14. janúar

Skákþing Akureyrar, hið 80. í röðinni hefst nk. sunnudag 14. janúar. 

Teflt verður í Skákheimilinu í Íþróttahöllinni við Skólastíg.

Dagskrá:

1. umferð sunnudaginn 14. janúar   kl. 13.00    
2. umferð fimmtudaginn 18. janúar  kl. 18.00
3. umferð sunnudaginn 21. janúar   kl. 13.00
4. umferð sunnudaginn 28. janúar   kl. 13.00
5. umferð sunnudaginn 4. febrúar   kl. 13.00
6. umferð sunnudaginn 11. febrúar  kl. 13.00
7. umferð sunnudaginn 18. febrúar  kl. 13.00

 Öllum er heimil þátttaka í mótinu.

Tefldar verða 7 umferðir skv. svissnesku kerfi. *

Sigurvegar mótsins hreppir heiðurstitilinn: **

 „Skákmeistari Akureyrar 2018“

Umhugsunartími verður 90 mínútur á skákina, auk þess sem 30 sekúndur bætast við tímann fyrir hvern leik (90+30).   

Þátttökugjald er kr. 3.000 fyrir skuldlausa félagsmenn, kr. 4.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Mótið verður reiknað til íslenskra og alþjóðlegra skákstiga. 

Verðlaun:

1. sæti kr. 20.000
2. sæti kr. 14.000
3. sæti kr. 8.000

stigaverðlaun (1799 stig og minna) kr. 8.000

 Skráning er hjá skákstjóra í netfangið [e-mail] eða á facebook-síðu Skákfélags Akureyrar.

Einnig er hægt að skrá sig á skákstað eigi síðar en 15 mínútum fyrir upphaf fyrstu umferðar.

 

* Mótsstjórn áskilur sér rétt til þess að gera breytingar á fjölda umferða þegar endanlegur þátttakendalisti liggur fyrir.  Ákvörðun um fyrirkomulag verður tilkynnt keppendum fyrir upphaf fyrstu umferðar.

** Skákmeistari Akureyrar getur aðeins sá orðið sem er búsettur á Akureyri og/eða er fullgildur félagi í Skákfélagi Akureyrar.