Davíð Kjartansson sigraði á stórmóti Árbæjarsafns og Taflfélags Reykjavíkur

Stórmót Árbæjarsafns og TR fór fram í kornhlöðunni í Árbæjarsafni í gær. Þátttakan var heldur minni en undanfarin ár og kann að skýrast af því að mótið fór nú fram tveimur dögum á eftir Borgarskákmótinu. Það var þó vel skipað og tveir af verðlaunahöfum Borgarskákmótsins voru mættir til leiks, Fide meistararnir Davíð Kjartansson og Róbert Lagerman.

Davíð Kjartansson sem hafnaði í öðru sæti á Borgarskákmótinu fór nú mikinn og vann yfirburðarsigur. Sigraði hann alla andstæðinga sína, hlaut sjö vinninga af sjö mögulegum og varð heilum tveimur vinningum á undan næstu mönnum. Í öðru til fimmta sæti urðu þeir Róbert Lagerman, Bárður Örn Birkisson og Gylfi Þórhallsson og Þorvarður Fannar Ólafsson með fimm vinninga.

Líkt og á Borgarskákmótinu tóku nokkur af okkar efnilegustu skákkrökkum þátt í bland við eldri og reyndari meistara. Kristján Dagur Jónsson (10) stóð sig vel og krækti í þrjá vinninga með góðu jafntefli við gamla brýnið Jón Víglundsson í lokaumferðinni. Þá var árangur Bárðar Birkissonar eftirtektarverður en hann tapaði einungis gegn Fide meisturunum tveimur en sigraði aðra andstæðinga sína.

Tvær stúlkur tóku þátt, þær Sigríður Björg Helgadóttir sem hlaut 3 1/2 vinning og Freyja Birkisdóttir (2v).

Skákstjórn var í öruggum höndum Torfa Leóssonar líkt og undanfarin ár.

Heildarúrslit má finna á chess-results hér

Myndir frá mótinu: [Sýna allar]

Taflfélag Reykjavíkur vill þakka þeim sem tóku þátt og Árbæjarsafni fyrir að hýsa mótið í Kornhlöðunni sem er án vafa einn skemmtilegasti og mest sjarmerandi skáksalur landsins.

Sjáumst að ári!

Á heimasíðu TR má finna fullt af myndum frá mótinu.

Landskeppnin: Jafnt í seinni umferðinni - Færeyingar unnu með þrem

Seinni umferð Landskeppninnar (Landsdystur) við Færeyinga fór fram í hátíðarsal SA í gær. Færeyingar höfðu þriggja vinninga forskot eftir fyrri daginn og var dagsskipunin allt annað en massívur varnarleikur.

Nokkrar breytingar voru gerðar á liði Íslands í seinni umferðinni; Halldór Brynjar Halldórsson og Haraldur Haraldsson komu inn fyrir SA og Tómas Veigar Sigurðarson og Elsa María Kristínardóttir fyrir Huginn.

Nýliðarnir byrjuðu vel og vann Elsa (1890) nokkuð öruggan sigur gegn Gutta Petersen (1639) og var fyrst til að klára sína viðureign. Því næst var röðin komin að Tómasi Veigari (1926) sem landaði öruggum sigri gegn Luitjen Apol (2056) — Tómas heldur því enn 100% árangri í keppninni, en hann hefur nú unnið 3 af 3 skákum sem hann hefur teflt — Ísland var því næstum því búið að jafna stöðuna, en átta skákum var enn ólokið.

IM John Rödgaard færir Áskatli Erni gjöf

Þá fór að síga á ógæfuhliðina, en Halldór Brynjar Halldórsson (2217) tapaði sinni skák gegn FM Ólafi Berg (2302) og Hlíðar Þór Hreinsson (2236) tapaði gegn Sjúrði Þorsteinssyni(2168) og stóðu leikar þá jafnir, 2-2. Því næst vann Björn Ívar Karlsson (2264) góðan sigur gegn Eyðun Nölsoe (2211) en Haraldur Haraldsson (1987) tapaði sinni skák gegn Herluf Hansen (2006), var því enn jafnt 3-3 og ljóst að lið Færeyinga varð að tapa öllum sem eftir voru, ef Íslendingar ættu að eiga möguleika á að jafna.

Lukkudísirnar gengu í lið með okkar mönnum þegar Jakob Sævar Sigurðsson (1786) vann á tíma gegn Hjalta Petersen (1880), eftir að þeir höfðu báðir verið í miklu tímahraki. Jón Kristinn Þorgeirsson (2227) tapaði þá sinni skák gegn Rana Nölsoe (2062) og enn var jafnt, 4-4. Þá var ljóst að forskot Færeyinga yrði ekki jafnað og sigurinn því þeirra.

IM Einar Hjalti Jensson mátaði IM John Rödgaard með H+B gegn H!

Tvær skákir voru enn ókláraðar, IM Einar Hjalti Jensson (2394) tefldi hörkuskák gegn IM John Rödgaard (2348) og tókst að lokum að máta þann síðarnefnda með hrók og biskup gegn hrók. Að lokum var eftir skák Símons Þórhallssonar (2106) og John Jacobsen (1850), en sá fyrrnefndi tapaði eftir að hafa leikið af sér peði í tímahraki.

Niðurstaðan varð því 5-5 í seinni umferðinni, sem er öllu skárra en úr þeirri fyrri, en samanlagt unnu Færeyingar sem sagt 11,5 – 8,5.

Að lokum voru stutt ræðuhöld þar sem Færeyingum var þakkað fyrir drengilega keppni og þeir þökkuðu fyrir sig með gjöfum til handa Skákfélagi Akureyrar og Huginn og hrópuðu þrefalt húrra fyrir vináttu þjóðanna.

Skákstjórar voru: Hermann Aðalsteinsson og Áskell Örn Kárason.

• Mótið á Chess-Results
• Heimasíða SA
• Heimasíða Hugins

 

Meistaramót Hugins hefst eftir viku

Meistaramót Hugins (suðursvæði) 2015 hefst mánudaginn 24. ágúst klukkan 19:30. Mótið er 7 umferða opið kappskákmót sem lýkur 8. september (A-flokki líkur 7. september). Leyft verður að taka 1 yfirsetu í 1.-5. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik í A-flokki en 45 mínútur+30 sek. á leik í B-flokki. Þeir sem eru undir 1600 sigum geta valið hvorn flokkinn þeir fara í..

Mótið er öllum opið og er reiknað til alþjóðlegra og íslenskra skákstiga. Skráning í mótið fer fljótlega af stað á skák.is en einnig er hægt að skrá sig með því að hringja í skákstjóra s-866-0116 (Vigfús). Upplýsingar um skráða keppendur eru hér:

Teflt er á mánudögum, þriðjudögum og fimmtudögum.

Aðalverðlaun:

50.000
40.000
30.000

Aukaverðlaun (miðað er við alþjóðleg skákstig)

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá Sigurbirni að verðmæti kr. 5.000.
• Besti árangur undir 1800 skákstigum:  Skákbók hjá Sigurbirni að verðmæti kr. 5.000.
• Besti árangur undir 1600 skákstigum: Skákbók hjá Sigurbirni að verðmæti kr. 5.000.
• Besti árangur stigalausra: Skákbók hjá Sigurbirni að verðmæti kr. 5.000.
• Unglingaverðlaun (15 ára og yngri), skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.
• B-flokkur, skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.000; Aðrir 3.000.
Allir titilhafar fá frítt í mótið

Umferðartafla:

• 1. umferð, mánudaginn, 24. ágúst, kl. 19:30 (B-flokkur kl. 18,00)
• 2. umferð, þriðjudaginn, 25. ágúst, kl. 19:30 (B-flokkur kl. 18,00)
• 3. umferð, fimmtudaginn, 27. ágúst, kl. 19:30 (B-flokkur kl. 18,00)
• 4. umferð, mánudaginn, 31. ágúst, kl. 19:30 (B-flokkur kl. 18,00)
• 5. umferð, þriðjudaginn, 1. september, ágúst, kl. 19:30 (B-flokkur kl. 18,00)
• 6. umferð, fimmtudaginn, 3. september, kl. 19:30 (B-flokkur kl. 18,00)
• 7. umferð, mánudaginn, 7. september, kl. 19:30 (Bara A-flokkur)
• 7. umferð þriðjudaginn, 8. september, kl. 18.00 (Bara B-flokkur)

Hraðkvöld hjá Hugin í kvöld

Hraðkvöld Hugins verður mánudaginn 17. ágúst nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Hjörvar hlaut 6 vinninga í Riga

Alþjóðlega mótinu í Riga í Lettlandi lauk í dag. Hjörvar Steinn Grétarsson (2567) varð efstur íslensku keppendanna með 6 vinninga í 9 umferðum. Hann endaði í 11.-38. sæti (29. sæti á stigum). Guðmundur Kjartansson (2447) hlaut 5½ og endaði í 39.-56. sæti (49. sæti) og Oliver Aron Jóhannesson (2263) hlaut 3 vinninga og endaði í 159.-172. sæti (161. sæti).

Heimamaðurinn Alexei Shirov (2702) og Armeninn Robert Hovhannisyan (2612) urðu efstir og jafnir með 7½ vinning.

Guðmundur hækkaði um 3 stig fyrir frammistöðu en bæði Hjörvar og Oliver lækkuðu á stigum.

Alls tók 191 skákmaður þátt í mótinu frá 38 löndum. Þar á meðal voru 29 stórmeistarar og jafnmargir alþjóðlegir meistarar. Hjörvar var nr. 16 í stigaröð keppenda, Guðmundur nr. 40 og Oliver nr. 97.

• Heimasíða mótsins
• Chess-Results
• Beinar útsendingar
• Chessbomb

 

Tap gegn Færeyjum í gær - verður hefnt í dag?

Nú um helgina fer fram Landskeppni (Landsdystur) við knáa skákpilta frá Færeyjum. Lið Íslands er skipað félögum frá Norðurlandi – Skákfélagi Akureyrar og Skákfélaginu Huginn. Keppt er í 19. sinn í ár, en keppnin var fyrst háð árið 1978.

Teflt var á Laugum í Þingeyjarsveit í gær en í dag er haldið til Akureyrar, þar sem hátíðarsalur SA (Íþróttahöllinni á Akureyri, gengið inn að vestan) verður heimavöllur Íslands. Taflið hefst kl. 14 og eru áhorfendur velkomnir!

Lið Íslands hefur 2174 stig að meðaltali og lið Færeyja 2052.

Ekki blés byrlega fyrir okkar menn í gær, þrátt fyrir að vera með mun stigahærra lið, því engum tókst að vinna skák en þrír töpuðu sínum viðureignum. Okkar menn voru mögulega óheppnir á köflum, en bæði Jón Kristinn Þorgeirsson og Jakob Sævar Sigurðsson voru tveim peðum yfir í sínum skákum, en gerðu báðir jafntefli. Fleirum voru mislagðar hendur í umferðinni; Áskell Örn lék sig óvænt í mát (skv. heimildum) og Björn Ívar átti hugsanlega vinningsmöguleika í lokastöðunni, með fyrirvara um ítarlegri greiningu.

Niðurstaða dagsins er því stórtap, 3,5 – 6,5 og Færeyingar í afar sterkri stöðu fyrir seinni umferðina.

Nokkrar breytingar verða gerðar á liði Íslands fyrir seinni umferðina: Halldór Brynjar Halldóssson, Tómas Veigar Sigurðarson og Elsa María Kristínardóttir koma inn í liðið en Áskell Örn Kárason, Smári Sigurðsson og Sigurður Daníelsson hvíla.

Nánar á Skákhuganum og á heimasíðu SA.

Úrslitin á Chess-Results. 

Stórmót TR og Árbæjarsafns fer fram í dag

Stórmót Taflfélags Reykjavíkur og Árbæjarsafns fer fram í ellefta sinn sunnudaginn 16. ágúst. Teflt verður í Árbæjarsafni og hefst taflið kl. 14. Tefldar verða sjö umferðir með umhugsunartímanum 7 mín. á skák. Veitt verða verðlaun fyrir þrjú efstu sætin í Stórmótinu, 15.000 kr., 10.000 kr. og 5.000 kr.

Þátttökugjöld í Stórmótinu eru kr. 1.300 fyrir 18 ára og eldri, en ókeypis fyrir yngri en 18 ára, eldri borgara (67) og öryrkja. Þátttökugjöld eru jafnframt aðgangseyrir að safninu en þeir sem þegar hafa aðgang, t.d. með menningarkorti, þurfa ekki að borga þátttökugjald.

Frekari upplýsingar veitir Torfi Leósson, netfang: ([e-mail]) eða í síma 697-3974. Mótið er jafnan einn af upphafsviðburðum skákársins, og við vonumst til að sjá sem flesta á þessu skemmtilega móti.

Skákþáttur Morgunblaðsins: Endalok Evans-bragðs

Eitt þekktasta leikbragð skákarinnar er kennt við við William Davies Evans, kaptein í breska sjóhernum á því tímabili við upphaf 19. aldar þegar Napóleóns-stríðin voru ekki á enda kljáð. Í frístundum sat hann og tefldi á uppihaldskrá sinni í London, beitti bragði sínu við hvert tækifæri og vann margan frækilegan sigur. Til er í handriti skák sem hann tefldi og vann í 20 leikjum gegn landa sínum Alexander McDonnell. Sá varð síðar frægur fyrir maraþoneinvígi sem hann háði síðar í London við Frakkann La Bourdonnais. Evans-bragð sprettur upp úr Ítalska leiknum: 1. e4 e5 2. Rf3 Rc6 3. Bc4 Bc5 og nú 4. b4!? Besta leið svarts hefur löngum verið talin sú að hirða b4-peðið og gefa það síðan aftur við hentugt tækifæri. Fischer og Kasparov tefldu stundum Evans-bragð, sá fyrrnefndi í léttari skákum, en frægt varð þegar Kasparov vann Anand í aðeins 25 leikjum á skákmóti í Ríga árið 1995. Það vill nú samt verða svo með unnendur gambíta að þeir eiga stundum erfitt með að fóta sig í flóknum stöðum, t.d. þegar þeir hafa leiðst út í að henda miklum liðsafla „fyrir borð“. Í dag vandast málið fræðilega með „skákreikna“ beintengda við gagnagrunna sem meta stöðurnar á örskotsstundu. En samt hafa gambítarnir, t.d. kóngsbragð, skólað til marga öfluga stórmeistara og nægir að nefna Boris Spasskí og Jón L. Árnason.

Á skákmóti sem lauk í Dortmund í Þýskalandi á dögunum vann Fabiano Caruana öruggan sigur eftir mikinn sprett þar sem hann vann fimm skákir í röð og varð að lokum 1½ vinningi á undan næsta manni, Filippseyingnum Wesley So. Í einni af sigurskákunum kom Evans-bragð við sögu. Sennilega hefur andstæðingur hans, Nisipeanu frá Georgíu, ætlað að koma Caruana á óvart en Ítalinn, sem brátt mun tefla fyrir Bandaríkjamenn, reyndist öllum hnútum kunnugur. Í skýringum sem hann gerði við skákina komst hann svo að orði að frá sínum sjónarhóli væri bragð Evans búið að vera. Einhvern veginn flögrar að manni að Caruana hafi kynnt sér skákir sem Hannes Hlífar Stefánsson tefldi fyrir allmörgum árum.

Dortmund 2015; 7. umferð:

Dieter Nisipeanu – Fabiano Caruana

Ítalskur leikur – Evans-bragð

1. e4 e5 2. Rf3 Rc6 3. Bc4 Bc5 4. b4 Bxb4 5. c3 Ba5 6. d4 d6 7. Db3 Dd7

Þessi og næsti leikur svarts halda stöðunni saman. lakara er 7. ... De7 vegna 8. d5 þó að svartur geti barist áfram með 8. ... Rd4!

8. dxe5 Bb6 9. a4 Ra5 10. Da2 Rxc4 11. Dxc4 Re7 12. Ba3

Þekktur staður fyrir biskupinn í Evans-bragði en skapar engin vandamál.

12. ... 0-0 13. 0-0 He8

Í skýringum sínum telur Caruna að enn betra hefði verið að leika 13. ... Rg6 og eftir 14. exd6 cxd6 15. Hd1 Dg4! hóti svartur m.a. 16. .... Rf4.

14. exd6 cxd6 15. Hd1 Dc6 16. Rbd2 Be6 17. Dxc6 Rxc6 18. Bxd6 Had8 19. Bb4 Hd3!

Svartur hefur gefið peð um stundarsakir en menn hans standa vel.

20. a5 Bc7 21. Rf1 Hxd1 22. Hxd1 Rxa5 23. Rd4 Rc4 24. Rxe6 Hxe6 25. Hd7 Hc6 26. Rg3 g6!

Svarta staðan er alltaf betri vegna þess hve illa biskupinn á b4 stendur. Áður en svartur ræðst til atlögu loftar hann út og hindrar för riddarans til f5 í leiðinni.

27. Re2 a5 28. Rd4?

Hann varð að leika 28. Be7.

28. ... axb4 29. Rxc6 b3 30. Hxc7 Rd6!

Magnaður lokahnykkur, b3-peðið rennur upp í borð þó að hvítur sé hrók yfir.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 8. ágúst 2015

Skákþættir Morgunblaðsins

[Event "Dortmund"] [Site "Dortmund GER"] [Date "2015.07.05"] [EventDate "2015.06.26"] [Round "7"] [Result "0-1"] [White "Liviu Dieter Nisipeanu"] [Black "Fabiano Caruana"] [ECO "C52"] [WhiteElo "2654"] [BlackElo "2805"] [PlyCount "60"] 1. e4 e5 2. Nf3 Nc6 3. Bc4 Bc5 4. b4 Bxb4 5. c3 Ba5 6. d4 d6 7. Qb3 Qd7 8. dxe5 Bb6 9. a4 Na5 10. Qa2 Nxc4 11. Qxc4 Ne7 12. Ba3 O-O 13. O-O Re8 14. exd6 cxd6 15. Rd1 Qc6 16. Nbd2 Be6 17. Qxc6 Nxc6 18. Bxd6 Rad8 19. Bb4 Rd3 20. a5 Bc7 21. Nf1 Rxd1 22. Rxd1 Nxa5 23. Nd4 Nc4 24. Nxe6 Rxe6 25. Rd7 Rc6 26. Ng3 g6 27. Ne2 a5 28. Nd4 axb4 29. Nxc6 b3 30. Rxc7 Nd6 0-1

Jón Viktor sigraði á Borgarskákmótinu

Alþjóðlegi meistarinn Jón Viktor Gunnarsson sem tefldi fyrir Malbikunarstöðina Höfða sigraði á 28. Borgarskákmótinu sem fram fór í Ráðhúsi Reykjavíkur í gær. Hann sigraði alla andstæðinga sína og kom í mark með 7 vinninga. Jón Viktor sigraði einnig mótið í fyrra en þá hlaut hann 6 1/2 vinning.

Formaður borgarráðs og staðgengill Borgarstjóra Sigurður Björn Blöndal setti mótið, og hafði á orði að síðasta skák sem hann hefði teflt við hefði verið gegn Róbert Lagerman á Grænlandi fyrir nokkrum árum. Nefndi hann einnig í ræðu sinni að það væri gaman að sjá hve skákin héldi vel velli, væri í sókn og hve breiður hópur skákmanna væri mættur í Ráðhúsið. Að því loknu lék hann fyrsta leiknum í skák Jóns Viktors og Sigurðar Ingasonar.

Mótið í ár var ágætlega mannað en alls tóku 63 keppendur þátt að þessu sinni. Yfir sjötíu ára aldursmunur var á yngsta og elsta keppenda mótsins þeim Adam Ómarssyni (8) og Páli G. Jónssyni (82) og stóðu báðir sig með með prýði.

Fyrirfram máttti búast við harðri keppni titilhafanna á mótinu um sigurinn og sú varð raunin. Fide meistarinn Davíð Kjartansson sem tefldi fyrir Olís kom annar í mark á eftir Jón Viktor með sex vinninga og tapaði einungis innbyrðisviðureign þeirra. Þriðji varð svo annar Fide meistari, fyrrnefndur Róbert Lagerman (Faxaflóahafnir) með 5 1/2 vinning.

Ungu skákmennirnir settu sterkan svip á mótið og fóru mikinn. Örn Leó Jóhannsson (Efling stéttarfélag) og Jón Trausti Harðarson (Grillhúsið) hlutu báðir 5 vinninga og enduðu í 4.-13. sæti. Tvíburabræðurnir unguBjörn og Bárður Birkissynir sem tefldu fyrir Byko og Hamborgarbúllu Tómasar vöktu athygli og lögðu að velli marga reynda meistara. Má þar nefna Forseta skáksambandsins Gunnar Björnsson (Landsvirkjun) sem þurfti að játa sig sigraðann gegn þeim báðum, Stefán Bergsson(Jómfrúin) og gamla brýnið Gunnar Gunnarsson (Sjóvá) sem þurftu að lúta í gras gegn Bárði og alþjóðlegi skákdómarinn Omar Salama (Hvalur hf) sem fann engar löglegar leiðir til að verjast Birni. Þá stóð Óskar Víkingur Davíðsson (10) (Íslandsbanki) sig mjög vel og kom í mark með 4 1/2 vinning eftir góðan endasprett.

Af stúlkunum stóð Lenka (Íslandspóstur) sig best (4v), Guðlaug (3 1/2),Veroníka (3) og Freyja Birkisdóttir sem einungis er níu ára hlaut 2 vinninga.

Skák og lífskúnsterinn Einar S. Einarsson átti trúlega stystu skák mótsins þegar að hann kæfingarmátaði Guðlaugu Þorsteinsdóttir með þekktu stefi í Búdapestarvörninni í einungis 7 leikjum.

Töluverður fjöldi áhorfenda var á mótinu, þá einkannlega túristar sem staddir voru í Ráðhúsinu og fylgdust spenntir með af pallinum. Aðrir höfðu minni áhuga á taflmennskunni en þeim mun meiri á öndunum á tjörninni. Þeirra á meðal sonur Omars og Lenku sem grandskoðaði fuglalífið á meðan á móti stóð.

Skákfélagið Huginn og Taflfélag Reykjaavíkur vilja koma á framfæri þökkum til allra þeirra sem tóku þátt, Borgarinnar fyrir að hýsa mótið og síðast en ekki síst þeim fjölmörgu fyrirtækjum sem styrktu mótið.

Sjáumst að ári!

Nánar á Skákhuganum og á heimasíðu TR

Íslandsmeistararnir og hraðskákmeistararnir mætast

Í gær var dregið í aðra umferð Hraðskákeppni taflfélaga. Íslandsmeistarar Hugins og hraðskákmeistarar taflfélaga, Taflfélags Reykjavíkur, mætast í átta liða úrslitum en þessi lið mættust í úrslitum í fyrra.

Einnig var dregið í Litlu bikarkeppnina sem nú fer fram í fyrsta sinn en þar mætast liðin sem töpuðu í fyrstu umferð.

Það var Ólafur S. Ásgrímsson, yfirdómari keppninnar, sem dró. Drátturinn fór fram í kaffistofu Björgunar.

Hraðskákkeppni taflfélaga:

• Skákfélag Akureyrar - Víkingaklúbburinn
• Vinaskákfélagið/Taflfélag Bolungarvíkur - Skákdeild Hauka/TRuxvi
• Taflfélag Reykjavíkur - Skákfélagið Huginn a-sveit
• Skákfélagið Huginn b-sveit - Taflfélag Garðabæjar

Litla bikarkeppnin:

• Skákfélag Íslands - Skákgengið
• Ungmennasamband Borgarfjarðar - Skákfélag Selfoss og nágrennis
• Vinaskákfélagið/Taflfélag Bolungarvíkur - Skákddeild Fjölnis
• Skákdeild Hauka/TRuxvi - Skákfélag Reykjanesbæjar

Annarri umferð á að vera lokið eigi síðar en 30. ágúst nk.

Heimasíða keppninnar