Barna- og unglingameistaramót TR fer fram í dag

Barna- og unglingameistaramót sem og Stúlknameistaramót Taflfélags Reykjavíkur fer fram sunnudaginn 25. október í félagsheimili T.R. Faxafeni 12. Taflið hefst kl.14.

Tefldar verða 7 umferðir eftir Monrad-kerfi með umhugsunartímanum 15 mín. á skák.

Teflt verður í tveimur flokkum: opnum flokki og stúlknaflokki. Verðlaun verða veitt fyrir þrjú efstu sætin í opna flokknum og þar fyrir utan hlýtur efsti T.R.-ingurinn titilinn Unglingameistari T.R. 2015.

Þá verða veitt verðlaun fyrir þrjú efstu sætin í stúlknaflokknum og þar fyrir utan hlýtur efsta stúlkan úr T.R. titilinn Stúlknameistari T.R. 2015.

Til viðbótar verða veitt verðlaun fyrir efsta sætið í aldursflokknum 13-15 ára (f. 2000-2002), 11-12 ára (f. 2003-2004), 9-10 ára (f. 2005-2006) sem og 8 ára og yngri (f. 2007 og síðar)í báðum flokkum (opna flokknum og stúlknaflokknum).

Mótið er opið öllum krökkum 15 ára og yngri (fædd 2000 og síðar).

Aðgangur á mótið er ókeypis.

Skráningarform

Skráðir keppendur

Æskan og Ellin 2015 Kynslóðabilið brúað!

Í dag fór fram í húsnæði Taflfélags Reykjavíkur hið mikla kynslóðabrúarskákmót, Æskan og Ellin, sem fór nú fram í tólfta sinn. Mótið er samstarfsverkefni Riddarans, skákklúbbs eldri borgara, Taflfélags Reykjavíkur og OLÍS sem jafnframt er stærsti bakhjarl mótsins. Að auki veita mótahaldinu góðan stuðning POINT á Íslandi, Urður bókaútgáfa Jóns Þ. Þórs og Litla Kaffistofan í forsvari Stefáns Þormars.

Verðlaunasjóður var glæsilegur; peningaverðlaun,  flugmiðar til Evrópu með Icelandair, eldsneytisúttektir, verðlaunabikarar- og peningar, skákbækur og veitingaúttektir.  Meðal vinninga var m.a. nýútkomin og glæsileg bók eftir Jón Þ. Þór “Meistarar skáksögunnar”.

Mótinu er ætlað að brúa kynslóðabil skákmanna en það er opið skákmönnum 15 ára og yngri sem og 60 ára og eldri en fyrirkomulagið skapar sérlega skemmtilega stemningu þar sem kátínan skín úr andlitum ungra sem roskna. Skák er svo sannarlega fyrir alla og á sér engin aldursmörk. Þannig var 75 ára aldursmunur á yngsta og elsta keppendanum!

Fimmtíu og fimm vaskir skákmenn voru mættir til leiks að þessu sinni sem er heldur minn en undanfarin ár og er skýringanna fyrst og fremst að leita til þess að nú er vetrarfrí í skólum en einnig eru margir öflugir skákkrakkar á leið á heimsmeistaramótið í Grikklandi sem án efa hefðu annars tekið þátt.

Hinn magnaði skákfrömuður Einar S. Einarsson bauð gesti velkomna og fór yfir sögu mótsins.  Því næst steig stórmeistarinn Hjörvar Steinn Grétarsson í pontu og hélt stutta tölu.  Hjörvar tók margoft þátt í þessu móti á sínum yngri árum með glæstum árangri.  Að því loknu lék hann fyrsta leiknum í skák Braga Halldórssonar sem margsinnis hefur unnið mótið og Einars S. Einarssonar.

Spennan var mikil strax í byrjun og mörg óvænt úrslit þar sem ungir liðsmenn æskunnar létu hina eldri og reyndari finna vel fyrir kunnáttu sinni við skákborðið.  Mátti oft ráða í úrslit skáka úr fjarlægð þegar þeir stuttu tóku á sprett frá skákborðinu til skákstjóra brosandi út að eyrum til að tilkynna úrslit.

Það voru þó fulltrúar ellinnar sem tóku snemma forystu á mótinu.  Sævar Bjarnason og Júlíus Friðjónsson virtust í einkar góðu formi og sigruðu alla andstæðinga sína í fyrstu fjórum umferðunum.  Þeir mættust svo í mikilli rimmu í fimmtu umferð og lauk henni með þrátefli.  Reyndist það eina skákin sem Sævar vann ekki og hann kom í mark langefstur með 8 1/2 vinning af níu mögulegum.  Júlíusi fataðist hins vegar flugið í lok móts, sem gaf tveimur skákmönnum möguleika á að skjótast upp fyrir hann.  Þór Valtýsson átti góðan endasprett og kom annar í mark með 7 vinninga.  Sama má segja um Guðfinn Kjartansson sem var annar fyrir lokaumferðina en beið þá lægri hlut fyrir Sævari.  Vaskleg framganga hans dugði þó í þriðja sætið með 6 

Annars lagið gerðu fulltrúar æskunnar atlögu að ellinni og brutu sér leið upp á pallinn.  Var þeim þó ýtt þaðan jafnharðan.  Fengu þeir þó þar dýrmæta reynslu og nasasjón af því hve kalt getur verið á toppnum.  Halldór Atli Kristjánsson stoppaði þar tvær umferðir eftir að hafa náð fræknu jafntefli við Þór Valtýsson og Aron Þór Mai fékk gullið tækifæri í lokaumferðinni til enda í einu af toppsætunum er hann mætti Júlíusi í lokaumferðinni en tapaði í hörkuskák.

Verðlaun voru veitt í fjölmörgum flokkum í lokin, auk þess sem sumir voru heppnari en aðrir í skemmtilegu vinningahappadrætti.

Í flokki elstu skákmannanna; +80 ára varð hlutskarpastur Gunnar Gunnarsson með 6 vinninga, annar varð Sigurður Kristjánsson  með 5 1/2 vinning líkt og Björn Víkingur Þórðarson sem varð þriðji á stigum.

Í flokki +70 fengu verðlaun Jóhann Örn Sigurjónsson (6 1/2),  Gísli Gunnlaugsson (6) og Eiríkur Viggósson (6)

Í flokki +60 voru það Júlíus Friðjónsson (6 1/2), Sigurjón Sigurbjörnsson (6) og Bragi Halldórsson (6) sem kræktu sér í glæsilega vinninga.

Æskan fékk einnig fjölmörg verðlaun, en þar var keppt í þremur aldursflokkum, 9 ára og yngri 10-12 ára og 13-15 ára.  Einnig voru veitt stúlknaverðlaun og sérstök verðlaun til yngsta keppandans.

Í flokki 9 ára og yngri var baráttan hnífjöfn og spennandi allan tímann.  Þrír strákar komu þar hnífjafnir í mark með 4 vinninga og þurfti að grípa til stigaútreiknings.  Þar var Gabríel Sær Bjarnþórsson hlutskarpastur og hlaut í verðlaun meðal annars flug með Icelandair til eins af áfangastöðum félagsins í evrópu.  Annar á stigum varð Alexander Björnsson sjónarmun á undan Benedikt Þórissyni sem varð þriðji.

Í flokki 10-12 ára var baráttan ekki síður hörð.  Þar komu jafnir í mark með fimm vinninga þeir Halldór Atli Kristjánsson, Mikhaylo Kravchuk og Sverrir Hákonarson.  Halldór tók fyrsta sætið á stigum, Misha varð annar og Sverrir þriðji.  Hlutu þeir allir vegleg verðlaun og er Halldór flugmiða með Icelandair ríkari eftir glæsta frammistöðu.

Í flokki 13-15 ára sigraði Aron Þór Mai með 5 1/2 vinning líkt og Nansý Davíðsdóttir og Jóhann Arnar Finnsson en hærri á stigum.  Nansý tók annað sætið og Jóhann bronsið.  Líkt og í hinum æskuflokkunum mun Aron Þór fljúga á vit ævintýranna með Icelandair.

Nansý vann stúlknaverðlaunin, og Bjartur Þórisson sem einungis er 6 ára hlaut viðurkenningu sem yngsti keppandinn.  Hann stóð sig frábærlega, hlaut 3 vinninga og lagði  að velli t.a.m. engann annan en Pétur Jóhannesson í hörkuskák.  Elsti keppandi mótsins var einnig leystur út með verðlaunum en það var að þessu sinni Björn Víkingur Þórðarson.

Pétur var þó einn af þeim fjölmörgu og heppnu keppendum sem dregnir voru út í mótslok í vinningahappdrætti mótsins. Meðal annarra sem dregnir voru út voru Friðgeir Hólm, Alexander Mai og Óskar Hákonarson.

Myndskreytta frásögn má finna á heimasíðu TR.

Lokastaðan á Chess-Results.

Skákþáttur Morgunblaðsins: Magnús Carlsen og Alexander Grischuk sigruðu í Berlín

Á heimsmeistaramótunum í atskák og hraðskák sem fram fóru í Berlín dagana 10.-14. október sl. og drógu til sín nær alla sterkustu skákmenn heims var spurningin sem brann á vörnum manna sú hvort heimsmeistarinn Magnús Carlsen næði að verja báða titlana sem hann vann í fyrra í Dubai og var því í raun þrefaldur heimsmeistari. Hann svaraði þeirri spurningu fyrir sitt leyti í atskákhlutanum þar sem tímamörkin voru 15mín. +10sek. og umferðirnar 15 talsins. Á lokasprettinum minnti hann á kappakstursbíl sem gat leyft sér að hægja á ferðinni á leiðinni að marklínunni; öruggur sigur 11½ vinningur af 15 mögulegum en næstir komu í mark Jan Nepomniachtchi og Teimour Radjanov með 10½ vinning.

Í 21 umferðar hraðskákmótinu þar sem teflt var eftir tímamörkunum 3mín. +2sek. virtist allt ætla að fara á sömu leið. Eftir tíu umferðir hafði Magnús 9 vinninga af 10 mögulegum en tapaði þá fyrir Karjakin og það reyndist ekki gott veganesti fyrir lokasprettinn. Norsku sjónvarpsmennina frá NRK sem voru með 5-6 klst. beinar útsendingar alla keppnisdagana rak í rogastans þegar Magnús byrjaði með einum vinningi af fyrstu fjórum. En hann náði vopnum sínum og þegar tvær umferðir voru eftir var hann aðeins ½ vinningi á eftir efstu mönnum. En í 20. umferð tapaði hann fyrir Vasilí Ivantsjúk og þá var draumurinn úti. Í mótslok stóð Rússinn Alexander Grischuk uppi sem heimsmeistari í hraðskák, hlaut 15 ½ vinning, en næstir komu Vladimir Kramnik og Vachier Lagrave með 15 vinninga. Magnús varð einn í sjötta sæti með 14 vinninga.

Fjórir íslenskir skákmenn tóku þátt í mótunum í Berlín. Þá tók Friðrik Ólafsson sæti áfrýjunarnefnd mótsins. Jóhann Hjartarson náði bestum árangri í atskákunum, hlaut 7½ vinning eða 50% og greinarhöfundur hlaut 7 vinninga, Hannes Hlífar hlaut 6 vinninga og Margeir Pétursson 4½ vinninga. Í hraðskákunum fengu Jóhann og Hannes Hlífar 10 vinninga en greinarhöfundur og Margeir Pétursson 8½ vinning. Keppnisformið er sennilega það sem koma skal í skákinni en hægt var að fylgjast með öllum skákunum í beinum útsendingum á Chess24, Chessbomb og ICC.

Engir auðveldir mótherjar en mótin drógu til sín í kringum 200 skákmenn. Til marks um mannvalið má nefna að í lokaumferð atskákarinnar mætti Jóhann Hjartarson einu af stóru nöfnum skákarinnar sl. 20 ár, Alexander Morozevich. Hann er mikill sérfræðingur í skoska leiknum en það er Jóhann raunar líka. „Skylmingar“ þeirra voru stórskemmtilegar:

Alexander Morozevich - Jóhann Hjartarson

Skoskur leikur

1. e4 e5 2. Rf3 Rc6 3. d4 exd4 4. Rxd4 Rf6 5. Rxc6 bxc6 6. e5 Rd5

Heppileg „gleymska“. Jóhann ætlaði að leika 6. ... De7.

7. Bd3 d6 8. De2 Be7 9. O-O O-O 10. Hd1 De8 11. He1 dxe5 12. Dxe5 Be6 13. De4 Rf6 14. Dh4 Dd8 15. Bg5 h6

Eini leikurinn og egnir „Moro“ jafnframt til að fórna.

16. Bxh6! gxh6 17. Dxh6 Dd4 18. He3 Hfd8

19. Rc3?

Frestunarárátta er þekkt í skákinni. Eftir 19. Hg3+ Rg4 20. Rc3 vinnur hvítur manninn til baka með vænlegri stöðu.

19. ... Rg4! 20. Hg3 Dxf2+ 21. Kh1 Hxd3!

Grípur tækifærið, 22. cxd3 er svarað með 22. ... Dxg3! og vinnur.

Hxg4+ Bxg4 23. cxd3 Dxb2! 24. Hc1 Hd8 25. h3 Hxd3 26. Re4

Hvítur á engan betri leik.

26. ... Hxh3+! 27. gxh3 Bf3+ 28. Kg1 Dg2 mát.

Helgi Ólafsson [e-mail]

Grein þessi birtist í Morgunblaðinu 17.október

Skákþættir Morgunblaðsins

Áskell og Elsa efst á Framsýnarmótinu

Áskell Örn Kárason og Elsa María Kristínardóttir eru með fullt hús vinninga þegar þremur umferðum er lokið á Framsýnarmótinu í skák sem hófst í gærkvöldi á Laugum. Haraldur Haraldsson og Hermann Aðalsteinsson koma næstir með tvo vinninga. Úrslit hafa að mestu verið eftir bókinni fyrir utan að Sigurbjörn Ásmundsson og Sveinbjörn Sigurðsson gerðu jafntefli í annarri umferð.

Stöðu mótsins má nálgast á Chess-Results.

Í fjórðu umferð, sem hefst kl 10:30 mætast m.a. Áskell og Elsa og Hermann og Haraldur.

• Skákhuginn
• Chess-Results

Æskan og ellin - Olísmótið fer fram í dag

Skákmótið ÆSKAN OG ELLIN, þar sem kynslóðirnar mætast, verður haldið í 12. sinn laugardaginn 24. október  í Skákhöllinni í Faxafeni.

TAFLFÉLG REYKJAVÍKUR og RIDDARINN, skákklúbbur eldri borgara á höfuðborgarsvæðinu með stuðningi OLÍS standa saman að mótshaldinu 3ja sinn en það hefur eflst mjög að öllu umfangi með árunum.  ÆSIR frá skákklúbbi FEB í Ásgarði,  mæta fjölmennir til leiks eins og þeirra er von og vísa.

Fyrstu 9 árin var mótið verið haldið í Strandbergi, safnaðarheimili Hafnarfjarðar-kirkju, þar sem Riddarinn hefur aðsetur og eldri skákmenn hittast til tafls vikulega allan ársins hring.  Þessi mót - þar sem kynslóðirnar mætast - hafa jafnan verið fjölsótt jafnt af yngri sem eldri skákmönnum og velheppnuð. Yfir  80 ára aldursmunur er hefur iðulega verið milli yngsta og elsta keppandans.

Þátttaka í mótinu er ókeypis og miðast við börn og ungmenni á grunnskólaaldri, 15 ára og yngri og roskna skákmenn, 60 ára og eldri. Mótið hefst kl. 13 og tefldar verða 9 umferðir með 7 mínútna umhugsunartíma.   

Vegleg verðlaun og viðurkenningar!

Auk aðalverðlauna verða aldurflokkaverðlaun í 3 flokkum ungmenna og öldunga. Gjafabréf  fyrir flugmiðum á mót erlendis með Icelandair fyrir sigurvegara í barna og unglingaflokkum, 9 ára og yngri; 19-12 ára og 13-15 ára.  Úttektarkort fyrir eldsneyti hjá OLÍS fyrir efstu menn í 3 öldungaflokkum, 60-69 ára; 70-79 ára og 80 ára og eldri. Auk þess fær efsta stúlkan sem og yngsti og elsti keppandi mótsins heiðursverðlaun. Verðlaunpeningar verða veittir í öllum flokkum auk bókaverðlauna ofl.

Mótsnefnd skipa þeir Björn Jónsson, formaður TR, Einar S. Einarsson, formaður Riddarans. 

Skráning til þátttöku fer fram á www.skak.is og www.taflfelag.is vikuna fyrir mót.  Hámarksfjöldi keppenda miðast við 100 og því mikilvægt að skrá sig sem fyrst og/eða mæta tímanlega á mótsstað.    

Ný skákbók: Meistarar skáksögunnar eftir Jón Þ. Þór

Ugla hefur gefið út bókina Meistarar skáksögunnar eftir Jón Þ. Þór.

Skáklistin hefur frá fornu fari verið í hávegum höfð — en það er ekki fyrr en um miðja 19. öld sem föst skipan kemst á kappskákir og svokallaðir skákmeistarar fara að koma fram á sjónarsviðið.

Í þessari bók segir Jón Þ. Þór sögu helstu meistara skáksögunnar frá Steinitz til Bobbys Fischers og Friðriks Ólafssonar. Hann rekur fjölbreytta og ævintýrilega ævi meistaranna, bregður upp lifandi mynd af skákferli þeirra og skýrir með fjölmörgum stöðumyndum eftirminnilegustu skákir þeirra.

Fjöldi ljósmynda prýðir bókina.

Meistarar skáksögunnar er 280 bls. í stóru broti. 

Jón Þ. Þór er dr. í sagnfræði og afkastamikill fræðimaður. Hann hefur sent frá sér fjölda bóka um söguleg efni. Hann hefur líka skrifað mikið um skák. Á yngri árum var hann í fremstu röð íslenskra skákmanna.

Hægt er að skrá sig fyrir bókinni hér á Skák.is (guli kassinn efst). Verð aðeins kr. 5.249 sé pantað í í gegnum Skák.is sem er 30% afsláttur frá almennu verði (kr. 7.499). 

U-2000 mót TR hefst á miðvikudaginn

Taflfélag Reykjavíkur fer nú aftur af stað með hið vinsæla U-2000 mót sem síðast var haldið fyrir sléttum áratug. Undanfarin ár hefur sífellt bæst í flóru viðburða hjá félaginu og er hugmyndin með endurvakningu U-2000 mótanna sú að koma til móts við þá skákmenn sem ekki hafa náð 2000 Elo-stigum og vilja gjarnan spreyta sig í opnu móti þar sem stigamunur á milli keppenda er minni en ella.

Þátttökurétt hafa allir þeir sem hafa minna en 2000 Elo-stig og er þá almennt miðað við alþjóðleg Fide-stig. Tefldar eru sjö umferðir eftir svissneska kerfinu og er umhugsunartími 90 mínútur fyrir alla skákina auk 30 sekúndna sem bætast við eftir hvern leik. Leyfðar eru tvær yfirsetur í umferðum 2-5 sem skal tilkynna fyrir lok umferðarinnar á undan en 1/2 vinningur fæst fyrir yfirsetu. Teflt er einu sinni í viku, á miðvikudagskvöldum kl. 19.30, í Skákhöll félagsins að Faxafeni 12.

Dagskrá
1. umferð: 28. október kl. 19.30
2. umferð: 4. nóvember kl. 19.30
3. umferð: 11. nóvember kl. 19.30
4. umferð: 18. nóvember kl.19.30
5. umferð: 25. nóvember kl. 19.30
6. umferð: 2. desember kl. 19.30
7. umferð: 9. desember kl. 19.30

Tvær yfirsetur leyfðar í umferðum 1-5.  Hægt er að tilkynna um yfirsetu í 1. umferð í síma 899 9268 (Björn) eða 867 3109 (Þórir).

Tímamörk
90 mín + 30 sek viðbót eftir hvern leik

Verðlaun
1. sæti kr. 30.000 og sæti í B-flokki Wow-air Vormóts TR 2016
2. sæti kr. 20.000
3. sæti kr. 10.000

Aukaverðlaun kr. 10.000 verða fyrir þann skákmann sem nær flestum samanlögðum vinningum úr bæði U-2000 mótinu og Skákþingi Garðabæjar (samanlögð Buchholz stig ráða ef jafnt á vinningum).

Þátttökugjöld
18 ára og eldri kr. 5.000, kr. 3.000 fyrir félagsmenn í TR
17 ára og yngri kr. 2.000, kr. 1.000 fyrir félagsmenn í TR

Skráningarform

Skráðir keppendur

Guðmundur atskákmeistari Reykjavíkur - Hjörvar atskákmeistari Hugins

Dagur Ragnarsson, Hjörvar Steinn Grétarsson og Guðmundur Kjartansson enduðu efstir og jafnir með 5 vinninga á vel sóttu Atskákmóti Reykjavíkur sem sem fram fór á mánudagskvöldið.

Dagur var þeirra hæstur á stigum en hann sigraði Hjörvar í 5. umferð og tók þar með forystuna af Hjörvari fyrir lokaumferðina. Jafntefli við Omar Salama í lokaumferðinni þýddi hins vegar að þeir Hjörvar ásamt Guðmundi voru efstir og jafnir. Guðmundur byrjaði mótið með tapi gegn Páli Andrasyni og útlitið ekki beint bjart. Monrad meðbyr og hagstæð úrslit í lokaumferðunum fleyttu honum hins vegar áfram í mótinu og í úrslita viðureign milli efstu manna um titilinn. Tefld var einföld umferð með 5 mínútur á klukkunni. Þegar dregið var um töfluröð var niðurstaðan sú að Hjörvar fékk hvítt í báðum skákunum en tefldi í fyrstu umferð við Guðmund og svo við Dag í annarri umferð. Dagur fékk svart á móti Hjörvari og hvítt gegn Guðmundi í lokaumferðinni. Guðmundur fékk svart í báðum skákunum en fékk hlé á milli umferða. Leikar fóru svo þannig að Guðmundur vann Hjörvar í fyrstu umferð. Síðan vann Hjörvar Dag í annarri umferð og svo lagði Guðmundur Dag í lokaumferðinni. Þar með varð Guðmundur atskákmeistari Reykjavíkur og sýndi fram á að það borgar sig aldrei að gefast upp þótt á móti blási í upphafi. Hjörvar varð efstur Huginsmanna og því atskákmeistari Hugins annað árið í röð.

Lokastaðan á Chess-Results.

Framsýnarmótið hefst í kvöld

Framsýnarmótið 2015 verður haldið í matsal fyrrverandi Litlaugaskóla á Laugum í Reykjadal helgina 23-25 október nk. Tefldar verða 7 umferðir alls, fyrstu fjórar með atksákartímamörkum (25 mín) en þrjár síðari skákirnar með 90 mín + 30 sek/leik.

 

Þátttökugjald 2.000 kr en 1.000 kr fyrir 16 ára og yngri.

Dagskrá:

Föstudagur 23. október kl 20:00  1. umferð
Föstudagur 23. október kl 21:00  2. umferð
Föstudagur 23. október kl 22:00  3. umferð
Föstudagur 23. október kl 23:00  4. umferð

Laugardagur 24. október kl 10:30  5. umferð
Laugardagur 24. október kl 16:30  6. umferð

Sunnudagur 25. október  kl 10:30  7. umferð

Mótið verður reiknað til Fide-skákstiga, Fide-atskákstiga og Íslenskra skákstiga.
Nánari upplýsingar um mótið verða birtar þegar nær dregur en einnig fást upplýsingar hjá Hermanni Aðalsteinssyni í síma 821-3187

Skráning fer fram á Skák.is (guli kassinn efst)

Skákþing Garðabæjar hefst á mánudaginn

Skákþing Garðabæjar hefst mánudaginn 26. október 2015.   Tefldar verða 7 umferðir og verður mótið reiknað til íslenskra og alþjóðlegra stiga. 

Mótsstaður: Garðatorg 1. (gamla Betrunarhúsið). 2. hæð. Inngangur til hægri við verslunina Víði. 

Umferðatafla:

• 1. umf. Mánudag, 26. okt.  kl. 19.30. (B flokkur kl. 18:00)
• 2. umf. Mánudag, 2. nóv.  kl. 19.30  (B flokkur kl. 18:00)
• 3. umf. Fimmtudag, 5. nóv. kl. 19.30  (B flokkur kl. 18:00)
• 4. umf. Mánudag, 9. nóv. kl. 19.30  (B flokkur kl. 18:00)
• 5. umf. Mánudag, 23. nóv. kl. 19.30  (B flokkur kl. 18:00)
• 6. umf. Mánudag, 30. nóv. kl. 19.30  (B flokkur kl. 18:00)
• 7. umf. Mánudag, 7. des.  kl. 19.30  (B flokkur kl. 18:00)

Verðlaunaafhending og Hraðskákmót Garðabæjar 14. Desember kl 19:30.

Keppnisfyrirkomulag er svissneskt kerfi. Skákstjóri er Páll Sigurðsson. Sími 860 3120.

Tímamörk eru 90 mínútur og 30 sek sem bætist við hvern leik. Mótið er opið öllum og geta því stigalágir valið milli flokka.

B flokkur bara fyrir skákmenn með 1499 stig eða minna. Umhugsunartími  er 45 mín + 30 sek. á leik. 

Leyfilegt er í mótinu í umferðum 1-5 að taka hjásetu gegn hálfum vinning. Ekki er hægt að taka hjásetu eftir að pörun í umferð liggur fyrir.

Verðlaun auk verðlaunagripa:

Heildarverðlaun uþb. 60% af aðgangseyri skipt eftir Hort Kerfinu. Amk. 3 verðlaun í hvorum flokki.

Verðlaun skiptast (50/30/20). Lágmarks-heildarverðlaun í A flokki eru 20.000 og 10.000 í B flokki.  

Mótið er um leið skákþing Taflfélags Garðabæjar. (keppt er um titilinn ef jafnt).

Aukaverðlaun verða fyrir þann skákmann sem nær flestum samanlögðum vinningum úr bæði Skákþingi Garðabæjar og U2000 móti Taflfélags Reykjavíkur. (samanlögð Buchholz stig ráða ef jafnt á vinningum) Kr. 10.000.-

Sæmdartitilinn Skákmeistari Garðabæjar geta aðeins fengið félagsmenn taflfélags í Garðabæ eða skákmaður með lögheimili í Garðabæ.

Þátttökugjöld:

• Félagsmenn. Fullorðnir 3000 kr. 17 ára og yngri ókeypis.
• Utanfélagsmenn. Fullorðnir 4000 kr. Unglingar 17 ára og yngri 2000 kr 

Skráning í mótið fer fram á heimasíðu TG. www.tgchessclub.com

Skákmeistari Garðabæjar 2014 er Guðlaug Þorsteinsdóttir.