Barna- og unglingameistaramót TR fer fram á sunnudaginn

Barna- og unglingameistaramót sem og Stúlknameistaramót Taflfélags Reykjavíkur fer fram sunnudaginn 25. október í félagsheimili T.R. Faxafeni 12. Taflið hefst kl.14.

Tefldar verða 7 umferðir eftir Monrad-kerfi með umhugsunartímanum 15 mín. á skák.

Teflt verður í tveimur flokkum: opnum flokki og stúlknaflokki. Verðlaun verða veitt fyrir þrjú efstu sætin í opna flokknum og þar fyrir utan hlýtur efsti T.R.-ingurinn titilinn Unglingameistari T.R. 2015.

Þá verða veitt verðlaun fyrir þrjú efstu sætin í stúlknaflokknum og þar fyrir utan hlýtur efsta stúlkan úr T.R. titilinn Stúlknameistari T.R. 2015.

Til viðbótar verða veitt verðlaun fyrir efsta sætið í aldursflokknum 13-15 ára (f. 2000-2002), 11-12 ára (f. 2003-2004), 9-10 ára (f. 2005-2006) sem og 8 ára og yngri (f. 2007 og síðar)í báðum flokkum (opna flokknum og stúlknaflokknum).

Mótið er opið öllum krökkum 15 ára og yngri (fædd 2000 og síðar).

Aðgangur á mótið er ókeypis.

Skráningarform

Skráðir keppendur

Bikarsyrpan - Mót 2 hefst föstudaginn 6. nóvember

Bikarsyrpa Taflfélags Reykjavíkur heldur áfram þegar annað mót syrpunnar fer fram helgina 6.-8. nóvember og hefst fyrsta umferð föstudaginn 6. nóvember kl. 17.30. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (6. nóvember)
2. umferð 10.30 á laugardegi (7. nóvember)
3. umferð 14.00 á laugardegi (7. nóvember)
4. umferð 10.30 á sunnudegi (8. nóvember)
5. umferð 14.00 á sunnudegi (8. nóvember). (Lokaumferð + verðlaunaafhending).

Ein yfirseta (bye) er leyfð í umferðum 1-3 og fæst fyrir hana 1/2 vinningur.  Tilkynna þarf skákstjóra um yfirsetu fyrir lok umferðarinnar á undan.

Vinsamlegast skráið þátttakendur sem fyrst, það hjálpar við undirbúning mótsins!

Skráningarform

Skráðir keppendur

Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í hverju
 móti auk áskrifta á Chess.com eða Chesskid.com.  Þá verða veitt sérstök verðlaun fyrir samanlagðan árangur á mótunum.

Sigurvegari fyrsta móts Bikarsyrpunnar var Róbert Luu.

Hlökkum til að sjá ykkur!

• Mót 1 – úrslit
• Mót 1 – umfjöllun

Næstu mót syrpunnar:

• Mót 3: 4.-6. desember 2015
• Mót 4: 12.-14. febrúar 2016
• Mót 5: 1.-3. apríl 2016
• Mót 6: 27.-29. maí 2016

Æskan og Ellin - Olísmótið fer fram á laugardag

Skákmótið ÆSKAN OG ELLIN, þar sem kynslóðirnar mætast, verður haldið í 12. sinn laugardaginn 24. október  í Skákhöllinni í Faxafeni.

TAFLFÉLG REYKJAVÍKUR og RIDDARINN, skákklúbbur eldri borgara á höfuðborgarsvæðinu með stuðningi OLÍS standa saman að mótshaldinu 3ja sinn en það hefur eflst mjög að öllu umfangi með árunum.  ÆSIR frá skákklúbbi FEB í Ásgarði,  mæta fjölmennir til leiks eins og þeirra er von og vísa.

Fyrstu 9 árin var mótið verið haldið í Strandbergi, safnaðarheimili Hafnarfjarðar-kirkju, þar sem Riddarinn hefur aðsetur og eldri skákmenn hittast til tafls vikulega allan ársins hring.  Þessi mót - þar sem kynslóðirnar mætast - hafa jafnan verið fjölsótt jafnt af yngri sem eldri skákmönnum og velheppnuð. Yfir  80 ára aldursmunur er hefur iðulega verið milli yngsta og elsta keppandans.

Þátttaka í mótinu er ókeypis og miðast við börn og ungmenni á grunnskólaaldri, 15 ára og yngri og roskna skákmenn, 60 ára og eldri. Mótið hefst kl. 13 og tefldar verða 9 umferðir með 7 mínútna umhugsunartíma.   

Vegleg verðlaun og viðurkenningar!

Auk aðalverðlauna verða aldurflokkaverðlaun í 3 flokkum ungmenna og öldunga. Gjafabréf  fyrir flugmiðum á mót erlendis með Icelandair fyrir sigurvegara í barna og unglingaflokkum, 9 ára og yngri; 19-12 ára og 13-15 ára.  Úttektarkort fyrir eldsneyti hjá OLÍS fyrir efstu menn í 3 öldungaflokkum, 60-69 ára; 70-79 ára og 80 ára og eldri. Auk þess fær efsta stúlkan sem og yngsti og elsti keppandi mótsins heiðursverðlaun. Verðlaunpeningar verða veittir í öllum flokkum auk bókaverðlauna ofl.

Mótsnefnd skipa þeir Björn Jónsson, formaður TR, Einar S. Einarsson, formaður Riddarans. 

Skráning til þátttöku fer fram á www.skak.is og www.taflfelag.is  vikuna fyrir mót.  Hámarksfjöldi keppenda miðast við 100 og því mikilvægt að skrá sig sem fyrst og/eða mæta tímanlega á mótsstað.    

Óskað eftir fleiri sjálfboðaliðum á EM

Skráðir sjálfboðaliðar á EM landsliða eru nálægt 40 talsins. Til að mótshaldið gangi sem best þarf rúmlega tíu sjálfboðaliða í viðbót.

Sjálfboðaliðar munu vinna á tveimur vöktum eða frá 14-18 og svo 18-21. Vaktirnar standa alla daga frá 13.- 22. nóvember að 18. nóvember undanskyldum. Störf sjálfboðaliða snúast til að mynda um miðasölu, öryggisgæslu, kaffiumsjón, verðmætageymslu o.s.frv.

Sjálfboðaliðar fá boð í lokahóf mótsins og gjöf frá Skáksambandi Íslands. Þá verður þeim tryggð góð aðstaða í Laugardalshölinni þar sem mótið fer fram.

Skráning og upplýsingar á [e-mail]

Jóhann Örn sigurvegari á Haustmóti Ása

Það var virðulegur hópur heldri skákmanna sem mætti til leiks í Ásgarði í gær, á Haustmót Ása 2015. Þarna voru mættir margir mjög sterkir skákmenn, og hart barist á mörgum borðum. Það mættu þrjátíu og einn til leiks í gær. Jóhann Örn Sigurjónsson vann mótið með glæsibrag fékk 9 vinninga af 10 mögulegum. Jóhann tapaði engri skák en gerði tvö jafntefli, við þá Braga Halldórsson og Þór Valtýsson

Bragi Halldórsson fékk silfrið með 7½ vinning. Jafnir í þriðja til fjórða sæti urðu þeir Páll G Jónsson og Þór Valtýsson með 7 vinninga báðir. Páll verulega hærri á stigum og fékk því bronsið. Þór var svo hæstur af þeim sem eru 70 til 80 ára og fékk gullpening.

Í elsta hópnum 80 + varð Björn V Þórðarson efstur með 5 ½ vinning og fékk gullpening.

Í yngsta hópnum 60 til 70 ára  urðu jafnir þeir Erlingur Hansson og Stefán Þormar

Erlingur var hærri á stigum og fékk því gullpeninginn.

Það er mikið um að vera í skákinni á þessum haustdögum eins og venjulega.

Riddararnir tefla í Hafnarfjarðar kirkju  á miðvikudag.

Á laugardag verður skemmtilegt skákmót í húsakynnum TR Æskan og ellin, það eru þau sem eru yngri en 15 ára og eldri en 60 ára. TR og Riddarar standa að þessu móti.

Ég hvet alla mína félaga sem peði valda að mæta á þetta mót, það er alltaf gaman að tefla við unga fólkið.

Mótið byrjar kl 13.00

Sjá nánari úrslit dagsins í töflu og myndir frá ESE

 

Skákstjóranámskeið meðfram EM

Í kringum EM landsliða verður boðið upp á skákstjóranámskeið sem einn virtasti skákstjóri heims, Takis Nikolopoulos, heldur. Á vefsíðu mótsins segir:

A FIDE Arbiters’ Seminar is organized from 15th to 20th of November 2015 in Reykjavík, Iceland, by the Icelandic Chess Federation’s Arbiters’ Committee, in cooperation with the Icelandic Chess Federation and under the auspices of FIDE. The Seminar will be held parallel to the European Team Chess Championship 2015.

The Lecturer will be IA Panagiotis Nikolopoulos (GRE), Chairman of the FIDE Arbiters’ Commission and FIDE Lecturer and Assistant Lecturer will be IA Omar Salama(ICL).

• The venue of the Seminar will be the Laugardalshöllin, in Reykjavík.
• The language of the Seminar will be English.
• The Seminar will give FIDE Arbiter norms and titles according to the Regulations for the titles of the Arbiters.

For more detailed information:
IA Omar Salama
e-mail : [e-mail]
Tel. : [phone]

SCHEDULE

• November 15: 09:00-13:00, Laws of Chess
• November 16: 09:00-13:00, Laws of Chess, Tournament Rules
• November 17: 09:00-13:00, System of games, Swiss Rules
• November 18: 19:00-22:00, Arbiters’ titles, Anti cheating guidelines for Arbiters
• November 19: 09:00-13:00, Title and Ratings regulations
• November 20: 09:00-13:00, Examination test

PARTICIPATION FEES

• 100 euros

PARTICIPANTS

• 10-20

—–
IA Takis Nikolopoulos
Chairman
FIDE Arbiters’ Commission

Tíu nýir Íslandsmeistarar!

Tíu Íslandsmeistarar voru krýndir á Íslandsmóti ungmenna sem fram fór í Rimaskóli helgina 17. og 18. október sl. Leikgleðin og spennan var í fyrirrúmi hjá keppendum sem voru á annað hundraðið. Segja má að sú nýbreytni að halda Íslandsmótin á þennan hátt, þ.e. að skipta í fleiri aldurstengda flokka hafi tekist vonum framar. Nánar allir sterkustu skákkrakkar landsins, frá 6-16 ára, tóku þátt og skemmtu sér vel!

Íslandsmót 8 ára og yngri

32 krakkar tóku þátt. Góð þátttaka stúlkna vakti athygli en helmingur keppenda var kvenkyns. Adam Omarsson kom sá og sigraði en hann vann allar átta skákir sínar. Hann hefur ekki langt að sækja skákgáfurnar en foreldrar hans eru landsliðskonan Lenka Ptácníková og Omar Salma.

Gunnar Erik Guðmundsson varð annar með 7 vinninga. Snorri Sveinn Lund, Fannar Smári Jóhannsson og Bjartur Þórisson urðu í 3.-5. sæti. Snorri Sveinn fékk bronsið eftir stigaútreikning.

Spennan meðal stúlknanna varð öllu meiri Þar urðu Elsa Kristín Arnaldardóttir, Birta Eiríksdóttir og Ólöf Bergvinsdóttir jafnar og efstar með 5 vinninga. Eftir dramatíska úrslitakeppni hampaði Birta, sem kemur úr Grindavík, Íslandsmeistaratitlinum.

Lokastaðan á Chess-Results.

Íslandsmót 9-10 ára

33 keppendur tóku þátt.Þar var talið líklegast að baráttan yrði á milli Óskars Víkings Davíðssonar og Róberts Luu. Og það varð raunin. Þeir gerðu jafntefli sín á milli. Róbert vann allar aðrir skákir en Óskar tapaði fyrir Sóloni Siguringasyni.

Sólon varð í 3.-5. sæti ásamt Freyju Birkisdóttur og Stefán Orra Davíðssyni. Sólon hlaut bronsið eftir stigaútreikning.

Freyja varð Íslandsmeistari stúlkna 9-10 ára. Elísabet Xiang Sveinsdóttir varð önnur og Embla Sólrún Jóhannesdóttir þriðja.

Lokastaðan á Chess-Results.

Íslandsmót 11-12 ára

21 keppandi tók þátt. Flokkurinn sá var sennilega sá mest spennandi og úrslitin réðust ekki fyrr en í lokaskák lokaumferðirnar. Að henni lokinni var ljóst að Arnar Milutin Hreiðarsson varð einn efstur en möguleiki var á aukakeppni. 

Þetta er annar bikar Arnars á nokkrum dögum en hann vann sigur í opnum flokki Haustmóts TR. Arnar vann m.a. félaga sinn úr Hörðuvallaskóla, Vignir Vatnar Stefánsson, á mótinu. 

Mykhaylo og Alexander Oliver Mai urðu í 2.-3. sæti. Mykhaylo hlaut silfrið eftir stigaútreikning.

Elín Edda Jóhannsdóttir varð Íslandsmeistari stúlkna 11-12 ára. Hún ekki langt að sækja skákgenin því hún er systir landsliðskonurnar Jóhönnu Bjargar Jóhannsdóttur.

Nadía Heiðrún Arthúrsdóttir varð önnur og Sigrún Jónsdóttir þriðja.

Lokastaðan á Chess-Results.

Íslandsmót 13-14 ára 

Átta keppendur tóku þátt. Hilmir Freyr Heimisson hafði þar mikla yfirburði en hann vann allar sjö skákir sína. Hilmir gerði svo enn betur sama dag þegar varð hraðskákmeistari TR. Tveir titlar sama dag! Aron Þór Mai varð annar með 4½ og Heimir Páll Ragnarsson og Nansý Davíðsdóttir urðu í 3.-4. sæti með 4 vinninga Heimir hlaut bronsið og Nansý varð Íslandsmeistari stúlkna í flokknum.

Íslandsmót 15-16 ára

Sjö keppendur tóku þátt. Bárður Örn Birkisson fór mikinn og varð efstur með fullt hús. Þrír keppendur urðu jafnir í 2.-4. sæti með 4 vinninga. Þeir voru hnífjafnir eftir stigaútreikning og háðu aukakeppni. Þar varð Gauti Páll Jónsson hlutskarpastur og hlaut silfrið. Frændi hans Símon Þórhallsson fékk bronsið en Björn Hólm Birkisson varð fjórði. Freyja Dögg De Leon varð Íslandsmeistari stúlkna 15-16 ára.

Samantekt

Skáksamband Íslands færir Bjarti Veröld kærar þakkir en forlagið gaf bækur sem gefnar voru í aukaverðlaun.

 

Skákstjórn önnuðust Páll Sigurðsson, sem var yfirdómari mótsins, Kristján Örn Elíasson, Björn Ívar Karlsson, Omar Salama, Gunnar Björnsson og Stefán Steingrímur Bergsson. 

Skáksambandið færir öllum þeim sem tóku þátt í þessum skemmtilega viðburði miklar þakkir fyrir. Rimaskóli fær þakkir fyrir lán á húsnæði. Foreldrar fá miklar þakkir fyrir skemmtilega helgi. Mestu þakkirnar fá þó krakkarnir sjálfur sem skemmtu sér vel um helgina.

Sá ákvörðun um að skipta mótinu upp tókst afar vel. Stemmingin varð einkar góð í öllum flokkum.

Skák er skemmtileg!

Framsýnarmótið fer fram næstu helgi

Framsýnarmótið 2015 verður haldið í matsal fyrrverandi Litlaugaskóla á Laugum í Reykjadal helgina 23-25 október nk. Tefldar verða 7 umferðir alls, fyrstu fjórar með atksákartímamörkum (25 mín) en þrjár síðari skákirnar með 90 mín + 30 sek/leik.

 

Þátttökugjald 2.000 kr en 1.000 kr fyrir 16 ára og yngri.

Dagskrá:

Föstudagur 23. október kl 20:00  1. umferð
Föstudagur 23. október kl 21:00  2. umferð
Föstudagur 23. október kl 22:00  3. umferð
Föstudagur 23. október kl 23:00  4. umferð

Laugardagur 24. október kl 10:30  5. umferð
Laugardagur 24. október kl 16:30  6. umferð

Sunnudagur 25. október  kl 10:30  7. umferð

Mótið verður reiknað til Fide-skákstiga, Fide-atskákstiga og Íslenskra skákstiga.
Nánari upplýsingar um mótið verða birtar þegar nær dregur en einnig fást upplýsingar hjá Hermanni Aðalsteinssyni í síma 821-3187

Skráning fer fram á Skák.is (guli kassinn efst)

Henrik endaði í sjötta sæti í Köge

Henrik Danielsen (2509) tók þátt í Xracon-mótinu sem fram fór í Köge dagana 12.-18. október sl. Henrik hlaut 18 stig (veitt voru 3 stig fyrir sigur og eitt fyrir jafntefli). Henrik hlaut reyndar 6½ vinning 9 skákum. Búlgarski stórmeistarinn Boris Chatalbashev (2550) vann mótið en hann hlaut 20 stig. 

Árangur Henriks samsvaraði 2493 skákstigum og stendur hann í stað stigalega eftir mótið.

Heimasíða mótsins

Barna- og unglingameistaramót TR fer fram sunnudaginn 25. október

Barna- og unglingameistaramót sem og Stúlknameistaramót Taflfélags Reykjavíkur fer fram sunnudaginn 25. október í félagsheimili T.R. Faxafeni 12. Taflið hefst kl.14.

Tefldar verða 7 umferðir eftir Monrad-kerfi með umhugsunartímanum 15 mín. á skák.

Teflt verður í tveimur flokkum: opnum flokki og stúlknaflokki. Verðlaun verða veitt fyrir þrjú efstu sætin í opna flokknum og þar fyrir utan hlýtur efsti T.R.-ingurinn titilinn Unglingameistari T.R. 2015.

Þá verða veitt verðlaun fyrir þrjú efstu sætin í stúlknaflokknum og þar fyrir utan hlýtur efsta stúlkan úr T.R. titilinn Stúlknameistari T.R. 2015.

Til viðbótar verða veitt verðlaun fyrir efsta sætið í aldursflokknum 13-15 ára (f. 2000-2002), 11-12 ára (f. 2003-2004), 9-10 ára (f. 2005-2006) sem og 8 ára og yngri (f. 2007 og síðar)í báðum flokkum (opna flokknum og stúlknaflokknum).

Mótið er opið öllum krökkum 15 ára og yngri (fædd 2000 og síðar).

Aðgangur á mótið er ókeypis.

Skráningarform

Skráðir keppendur