Æskan & Ellin - Olísmótið í skák

Skákmótið ÆSKAN OG ELLIN, þar sem kynslóðirnar mætast, verður haldið í 12. sinn laugardaginn 24. október  í Skákhöllinni í Faxafeni.

TAFLFÉLG REYKJAVÍKUR og RIDDARINN, skákklúbbur eldri borgara á höfuðborgarsvæðinu með stuðningi OLÍS standa saman að mótshaldinu 3ja sinn en það hefur eflst mjög að öllu umfangi með árunum.  ÆSIR frá skákklúbbi FEB í Ásgarði,  mæta fjölmennir til leiks eins og þeirra er von og vísa.

Fyrstu 9 árin var mótið verið haldið í Strandbergi, safnaðarheimili Hafnarfjarðar-kirkju, þar sem Riddarinn hefur aðsetur og eldri skákmenn hittast til tafls vikulega allan ársins hring.  Þessi mót - þar sem kynslóðirnar mætast - hafa jafnan verið fjölsótt jafnt af yngri sem eldri skákmönnum og velheppnuð. Yfir  80 ára aldursmunur er hefur iðulega verið milli yngsta og elsta keppandans.

Þátttaka í mótinu er ókeypis og miðast við börn og ungmenni á grunnskólaaldri, 15 ára og yngri og roskna skákmenn, 60 ára og eldri. Mótið hefst kl. 13 og tefldar verða 9 umferðir með 7 mínútna umhugsunartíma.   

Vegleg verðlaun og viðurkenningar!

Auk aðalverðlauna verða aldurflokkaverðlaun í 3 flokkum ungmenna og öldunga. Gjafabréf  fyrir flugmiðum á mót erlendis með Icelandair fyrir sigurvegara í barna og unglingaflokkum, 9 ára og yngri; 19-12 ára og 13-15 ára.  Úttektarkort fyrir eldsneyti hjá OLÍS fyrir efstu menn í 3 öldungaflokkum, 60-69 ára; 70-79 ára og 80 ára og eldri. Auk þess fær efsta stúlkan sem og yngsti og elsti keppandi mótsins heiðursverðlaun. Verðlaunpeningar verða veittir í öllum flokkum auk bókaverðlauna ofl.

Mótsnefnd skipa þeir Björn Jónsson, formaður TR, Einar S. Einarsson, formaður Riddarans. 

Skráning til þátttöku fer fram á www.skak.is og www.taflfelag.is  vikuna fyrir mót.  Hámarksfjöldi keppenda miðast við 100 og því mikilvægt að skrá sig sem fyrst og/eða mæta tímanlega á mótsstað.    

Atskákmót Reykjavíkur fer fram í dag

Atskákmót Reykjavíkur sem jafnframt er atskákmót Hugins, suðursvæði fer fram mánudaginn 19. október.  Mótið fer fram í félagsheimili Hugins, Álfabakka 14a í Mjódd. Tefldar verða 6 umferðir með Svissnesku-kerfi og hefur hvor keppandi 15 mínútur á skák. Mótið hefst kl. 19:30.Verði tveir jafnir í baráttunni um annan hvorn titilinn verður teflt tveggja skáka hraðskákeinvígi.  Verði jafnt að því loknu verður hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani. Verði fleiri en tveir jafnir verður tefld einföld umferð, hraðskák. Verði enn jafnt þá bráðabani. 

Núverandi atskákmeistari Reykjavíkur og atskákmeistari Hugins er Hjörvar Steinn Grétarsson. 

Verðlaun:

1. 15.000
2. 8.000
3. 4.000 

Þátttökugjöld: 

• 16 ára og eldri: 1000 kr 
• 15 ára og yngri: 500

Oliver Aron sigraði á Hraðskákmóti Taflfélags Reykjavíkur

Í dag fór fram Hraðskákmót Taflfélags Reykjavíkur í skákhöll félagsins.  Setja átti mótið klukkan tvö en beðið var til hálfþrjú eftir nokkrum keppendum sem voru að taka þátt í Íslandsmóti ungmenna í Rimaskóla um morguninn og komu svo brunandi í Fenið.

Stigahæstir keppenda voru FM hnakkarnir úr Grafarvoginum Dagur Ragnarsson (2272) og Oliver Aron Jóhannesson (2198) en þeim næstir á stigum voru feðgarnir og vöðvabunktin Jóhann Ingvason (2172) og Örn Leó Jóhannsson (2123).  Nokkrir nýbakaðir Íslandsmeistarar ungmenna komu sjóðandi heitir inn en Hilmir Freyr Heimisson (14), Bárður Örn Birkisson (15) og litla systir hans Freyja (9) voru meðal þess fríða hóps sem mætti beint í mótið úr Rimaskóla.

Tefldar voru samkvæmt venju 2×7 umferðir með 5 mínútna umhugsunartíma.  Oliver Aron tók snemma forystu og sigraði í tíu fyrstu skákunum sínum.  Var hann þá kominn með þægilegt forskot sem hann hélt þrátt fyrir 1-1 jafntefli við Dag Ragnarsson og tap gegn Hilmi Frey í lokaumferðinni.  Oliver hlaut samanlagt 11 1/2 vinning í umferðunum 14 sem er glæsilegur árangur.

Baráttan um silfrið var mjög hörð en fyrir lokaskákirnar tvær voru þeir Hilmir Freyr, Bárður Örn og Dagur Ragnarsson jafnir í 2-4 sæti með 8 1/2 vinning.  Bárður Örn og Dagur mættust þá meðan Hilmi beið það erfiða verkefni að kljást við Oliver.  Bárður og Dagur sættust á skiptan hlut, unnu sitthvora skákina meðan Hilmir Freyr gerði sér lítið fyrir og sigraði Oliver 1 1/2 – 1.  Hann kom því annar í mark með 10 vinninga sem er frábær árangur en Hilmir er einungis 14 ára.  Annað sætið tryggði honum einnig hraðskákmeistaratitil Taflfélags Reykjavíkur 2015 en eflaust þarf að leita nokkuð langt aftur til að finna jafn ungan skákmann til að hampa þeim titli.  Dagur tók svo bronsið á stigum með 9 1/2 vinning.

Mótið var hið skemmtilegasta, ævintýralegur klukkubarningur í nokkrum skákum, mát á síðustu sekúndunum og töp með ólöglegum leikjum voru nokkur.  Mótið fór þó prúðmannlega fram og þurfti skákstjóri lítið að hafa sig í frammi. Helst var það að setja þurfti út á að menn væru að nota báðar hendur við uppskipti í tímahraki en það reynist mörgum erfitt að venja sig af því.

Nokkur skringileg atvik komu upp, t.d. tapaði séntilmaðurinn Hörður Jónasson fyrir Pétri Jóhannessyni.  Pétur skildi kónginn sinn eftir í uppnámi eitt sinn en Hörður benti honum bara á það og skákin hélt áfram.  Nokkrum leikjum síðar skildi svo Hörður kónginn eftir í uppnámi og krafðist Pétur umsvifalaust sigurs.  Skákdómari stóð þá yfir skákinni og gat ekki annað en samþykkt kröfuna.

Freyju urðu á þau mistök í byrjun að víxla kóng og drottningu í upphafi skákar sem hvorki hún né Björgvin Kristbergsson tóku eftir.  Eftir nokkuð marga leiki bombaði Björgvin svo út Dh5(+) og hélt að hann væri að skáka þeirri litlu.  Þau stoppuðu klukkuna þegar þau áttuðu sig á að mistökunum.  Dómari lét skákina halda áfram þótt skákmaðurinn sem stillti upp rangt hagnist hér á mistökum sínum.  De8xh5! var náttúrulega svarið.

í mótslok fór svo fram verðlaunaafhending fyrir bæði Haustmót TR og Hraðskákmót TR.

Taflfélag Reykjavíkur óskar verðlaunahöfum Haustmótsins til hamingju.  Oliver Aron með sigurinn á hraðskákmótinu og hinum unga Hilmi Frey með titilinn Hraðskákmeistari Taflfélags Reykjavíkur 2015.  Einnig viljum við þakka kærlega öllum þeim sem tóku þátt í mótunum og vonumst til að sjá ykkur öll að ári!

Myndskreytta frásögn má finna á heimasíðu TR

Hraðskákmót TR fer fram í dag

Hraðskákmót Taflfélags Reykjavíkur verður haldið í húsnæði félagsins að Faxafeni 12 sunnudaginn 18. október kl. 14:00. Tefldar verða 2×7 umferðir eftir Swiss kerfi og er umhugsunartími 5 mínútur á skák. Mótið er jafnan vel sótt, en fjörutíu þátttakendur voru með í fyrra.

Þátttökugjald kr 500 fyrir 16 ára og eldri, en frítt fyrir 15 ára og yngri. Verðlaun fyrir þrjú efstu sætin.

Að loknu hraðskákmótinu fer fram verðlaunaafhending fyrir Haustmót Taflfélags Reykjavíkur.

Í fyrra sigraði Róbert Lagerman en hann hlaut 12 vinninga í skákunum fjórtán.  Kjartan Maack er núverandi Hraðskákmeistari félagsins eftir harða baráttu í fyrra.

• Hraðskákmót TR 2014

Skákþáttur Morgunblaðsins: Taugaspenna í úrslitaeinvígi

Sergei Karjakin sem fæddur er og uppalinn í Úkraínu en teflir nú fyrir Rússland er sigurvegari heimsbikarmóts FIDE sem lauk í Baku í Aserbadsjan sl. mánudag. Karjakin var stálheppinn að vinna keppnina. Það gerði gæfumuninn að hann var sterkari á taugum en eldri andstæðingar hans. Þannig var afar gremjulegt fyrir Úkraínumanninn Pavel Eljanov í undanúrslitum að leyfa Karjakin sem var með koltapað tafl að fá upp sömu stöðuna þrisvar í 6. skák einvígis og missa þannig af tækifæri til að fylgja eftir magnaðri frammistöðu á fyrri stigum; Eljanov hlaut 9 ½ úr 12 kappskákum. Úrslit í fimm af sjö einvígjum Karjakins réðust í skákum með styttri umhugsunartíma. Alls hófu 128 skákmenn heimsbikarmótið og stóð keppnin í 25 daga. Úrslitaeinvígi sitt háði Karjakin við Rússann Peter Svidler og þeir tefldu samtals 10 skákir og ekki einni einustu lauk með jafntefli! Fyrst tefldu þeir fjórar kappskákir og Svidler vann tvær fyrstu tvær og þurfti aðeins jafntefli í tveim síðustu. En hið mikla álag á taugakerfið sem fylgir keppni af þessu tagi varð honum um megn. Í vænlegri stöðu þriðju einvígisskákarinnar gerðist þetta:

3. skák:

Svidler – Karjakin

27. Hbe1(?)

„Þú leikur alltaf vitlausa hróknum,“ stóð einhversstaðar skrifað. Eftir 27. Hfe1! er hvíta staðan unnin t.d. 27. ... Df5 28. Hbc1! Rd3 29. Hf1 o.s.frv. eða 27. ... Dxe3 28. Hxe3 e5 29. Rd7! o. s.frv. Þrátt fyrir þessa ónákvæmni er hvíta staðan enn mun betri.

27. ... exd5? 28. Hxf2??

Eftir 28. Dc3! getur svartur gefist upp.

28. ...Dh4 29. Dd2??

Algert hrun. 29. Dxe8 Dxf2+ 30. Kh2 Dxb6 31. He7+ Kh7 32. Dd7 dugar til jafnteflis.

29. ... Hxf2 30. Dc3+ d4!

– og Svidler gafst upp, 31. Dc7+ er svarað með 31. ... Hf7! o.s.frv.

Degi síðar vann Karjakin fjórðu kappskákina og jafnaði 2:2. Mánudaginn 5. október var svo tekið til við skákir með styttri umhugsunartíma, fyrst atskákirnar, 25 10. Aftur jafnt og samkvæmt reglum tóknu nú við þá tvær hraðskákir með tímamörkunum 10 10. Aftur jafnt og nú staðan 4:4. Þá voru tefldar tvær hraðskákir, 5 3. Í þeirri fyrri var leikið svo ónákvæmt að undrum sætti. Þegar hér er komið sögu í þeirri skák var Svidler með mun betri tíma og vinningsstöðu:

9. skák:

Karjakin – Svidler

Leik áður hafði Svidler sleppt valdi á hróknum og nú vildi hann laga kóngsstöðuna aðeins ...

42. ... Kg8?? 43. Dxb8+

Þar fauk hrókur fyrir ekki neitt og Svidler gafst upp. Hann byggði upp vinningsstöðu í 10. skákinni og færi svo yrðu þeir að tefla svonefnda „Armageddon-skák. En „taugaorkan“ sem Rússum er svo tíðrætt um var búin og hann tapaði hörmulega. Lokaniðurstaðan 6:4, Karjakin í vil en þeir komast þó báðir í áskorendakeppnina. 

Bragi efstur á Haustmóti TR

Bragi Þorfinnsson er efstur í keppni A-riðils á Haustmóti Taflfélags Reykjavíkur sem nú stendur yfir. Bragi hefur hlotið 4 ½ vinning af fimm mögulegum og á í harðri keppni við Oiver Aron Jóhannesson og Einar Hjalta Jensson sem eru með 4 vinninga. Í B-riðli eru Guðlaug Þorsteinsdóttir og Agnar Tómas Möller efst með 4 vinninga en Guðlaug á skák til til góða. Gauti Páll Jónsson er langefstur í C-riðli með fullt hús eftir fimm umferðir og í Opna flokknum er Oliver Alexander Mai efstur með 4 ½ vinning.

Grein þessi birtist í Morgunblaðinu 10.október

Skákþættir Morgunblaðsins

Einar Hjalti sigurvegari Haustmóts TR

 

 

Alþjóðlegi meistarinn Einar Hjalti Jensson er sigurvegari Haustmóts Taflfélags Reykjavíkur 2015.  Einar hlaut 7,5 vinning í skákunum níu og er vel að sigrinum kominn en hann fór taplaus í gegnum mótið.  Í öðru sæti með 6,5 vinning var kollegi hans, Bragi Þorfinnsson, og þá var Oliver Aron Jóhannesson þriðji með 6 vinninga.  Bragi var efstur TR-inga og er því Skákmeistari Taflfélags Reykjavíkur 2015.

Í B-flokki sigraði Guðlaug Þorsteinsdóttir með 7 vinninga en hún leiddi flokkin frá byrjun.  Með sigrinum tryggði Guðlaug sér sæti í A-flokki að ári.  Í öðru sæti með 6 vinninga var Vignir Vatnar Stefánsson og þriðji í mark með 5,5 vinning kom Agnar Tómas Möller.

Gauti Páll Jónsson vann glæsilegan sigur í C-flokki en hann fékk fullt hús vinninga í skákunum níu og hækkar um 111 Elo-stig.  Gauti Páll teflir án nokkurs vafa í að minnsta kosti B-flokki að ári.  Veronika Steinunn Magnúsdóttir kom næst með 6,5 vinning og þá Aron Þór Mai með 6 vinninga en Aron átti mjög gott mót og hækkar um hvorki meira né minna en 124 Elo-stig.

Skemmtilegum opnum flokki lauk með sigri Arnars Milutins Heiðarssonar sem hlaut 7 vinninga.  Sannarlega glæsilegur og athyglisverður sigur í ljósi þess að Arnar var aðeins nr. 17 í stigaröð 20 keppenda.  Fyrir árangurinn hækkar Arnar um 125 Elo-stig og er því óumdeildur stigakóngur mótsins.  Í öðru sæti með 6,5 vinninga var Alexander Oliver Mai sem einnig átti afar gott mót og hækkar mikið á stigum.  Jafnir í 3.-4. sæti með 6 vinninga urðu svo Þorsteinn Magnússon og Jón Þór Lemery.

Lokaumferðin sem fram fór í gærkveld galt nokkuð fyrir þá staðreynd að allnokkrir keppendur virtust ekki hafa áttað sig á því að níunda og síðasta umferðin yrði tefld á þessum tíma þrátt fyrir góða kynningu á dagskrá mótsins.  Meðal þeirra sem misstu af lokaumferðinni var einmitt alþjóðlegi meistarinn Bragi Þorfinnsson en hann var í toppbaráttu fyrir umferðina.  Þá vantaði keppendur bæði í B- og C-flokki og nokkuð marga vantaði í opna flokknum.  Mótshaldarar vilja nota tækifærið og ítreka mikilvægi þess að keppendur kynni sér vel dagskrá móta sem þeir eru þátttakendur í.

En lítum nú á helstu úrslit lokaumferðarinnar.  Í A-flokki hafði sigurvegari mótsins, Einar Hjalti, betur gegn Gylfa Þórhallssyni en Oliver Aron fékk frían vinning gegn Braga vegna fyrrgreindra ástæðna.  Oliver átti gott mót og tapaði aðeins gegn Einari.  Þá tefldi Björgvin Víglundsson vel í mótinu og lauk því með sigri á Erni Leó Jóhannssyni en Björgvin varð fjórði með 5,5 vinning og er nú á leið yfir 2200 Elo-stig en ekki er langt síðan hann snéri aftur að skákborðinu eftir margra ára hlé.

Í heild var A-flokkurinn mjög skemmtilegur en eins og við var búist voru Einar Hjalti og Bragi í nokkrum sérflokki.  Stutt jafntefli voru hverfandi en af skákunum 45 lauk þriðjungi þeirra með skiptum hlut, 19 unnust á hvítt og 10 á svart.  Björgvin hækkaði mest á stigum (28) og þá Gylfi (20) og Örn Leó (20).

Í B-flokki tapaði Guðlaug sinni fyrstu viðureign og var það annar af tvíburunum knáu, Bárður Örn Birkisson, sem knésetti hana.  Þrátt fyrir það er sigur Guðlaugar verðskuldaður en hún var í forystu frá fyrstu mínútu.  Hækkar hún um 50 Elo-stig fyrir árangurinn og virðist komin á beinu brautina á ný eftir öldudal að undanförnu.  Vignir Vatnar gerði jafntefli við Siguringa Sigurjónsson og tryggði sér með því annað sætið þar sem Agnar Tómas Möller mætti ekki til leiks.  Það er ánægjulegt að sjá Vigni Vatnar vera kominn í gang en hann hækkar um 67 Elo-stig og ljóst er að hann verður með um 2100 stig á næsta stigalista Fide.

Eins og svo oft áður var B-flokkurinn mjög jafn og spennandi þar sem ekki munaði mörgum stigum á stigahæsta og stigalægsta keppandanum sem sést kannski vel á nokkuð háu jafnteflishlutfalli en tæpum helmingi viðureignanna lauk með skiptum hlut.

Toppbaráttan í C-flokki náði aldrei að vera spennandi, til þess var Gauti Páll einfaldlega einu númeri of stór fyrir flokkinn.  Gauti hélt öruggri forystu allan tímann og stakk aðra keppendur af en í lokaumferðinni lagði hann hinn unga og efnilega Róbert Luu.  Það er engu að síður vel af sér vikið hjá Gauta að vinna með fullu húsi en hann hækkar um 111 Elo-stig og stefnir nú hraðbyri að því að fara aftur yfir 1900 stig þar sem hann á miklu frekar heima.

Veronika Steinunn var sú eina sem veitti Gauta einhverja keppni en líkt og aðrir keppendur þurfti hún að horfa á eftir honum í reyknum.  Þrátt fyrir að vera í öðru sæti á Veronika enn mikið inni og einvörðungu tímaspursmál hvenær næsta stökk kemur.  Aron Þór Mai heldur áfram mikilli siglingu og hækkar sem fyrr segir mikið á stigum en hann var áttundi í stigaröð tíu keppenda.

Sigur Arnars Milutins í opna flokknum er sannarlega glæsilegur en sá ungi piltur er á hraðri uppleið ásamt mörgum þeirra sem kepptu í opna flokknum.  Alexander Oliver átti líka mjög gott mót og var í forystu lengi vel en þurfti að lokum að láta toppsætið af hendi eftir mikla baráttu.

Taflfélag Reykjavíkur þakkar öllum þeim sem tóku þátt í Haustmótinu fyrir að skapa með okkur enn eitt spennandi og skemmtilegt Haustmót.  Hér að neðan fylgir lítilein samantekt.  Sjáumst að ári!

A-flokkur

• AM Einar Hjalti Jensson 7,5v
• AM Bragi Þorfinnsson 6,5v
• Oliver Aron Jóhannesson 6v

B-flokkur

• Guðlaug Þorsteinsdóttir 7v
• Vignir Vatnar Stefánsson 6v
• Agnar Tómas Möller 5,5v

C-flokkur

• Gauti Páll Jónsson 9v
• Veronika Steinunn Magnúsdóttir 6,5v
• Aron Þór Mai 6v

Opinn flokkur

• Arnar Milutin Heiðarsson 7v
• Alexander Oliver Mai 6,5v
• Þorsteinn Magnússon, Jón Þór Lemery 6v

Mestu stigahækkanir

Arnar Milutin Heiðarsson (125), Aron Þór Mai (124), Gauti Páll Jónsson (111), Alexander Oliver Mai (85), Vignir Vatnar Stefánsson (67).

Ítarlega myndskreytta frásögn má finna á heimasíðu TR.

• Heimasíða TR
• Chess-Results

Æskan og Ellin fer fram laugardaginn 24. október

Skákmótið ÆSKAN OG ELLIN, þar sem kynslóðirnar mætast, verður haldið í tólfta sinn laugardaginn 24. október í Skákhöllinni í Faxafeni.

Þetta er í þriðja sinn sem TAFLFÉLG REYKJAVÍKUR og RIDDARINN, skákklúbbur eldri borgara á höfuðborgarsvæðinu með stuðningi OLÍS standa saman að mótshaldinu til að tryggja það að myndarlega sé að því staðið.

Fyrstu 9 árin var mótið verið haldið í Strandbergi, safnaðarheimili Hafnarfjarðar-kirkju, þar sem Riddarinn hefur aðsetur og eldri skákmenn hittast til tafls vikulega allan ársins hring.  Þessi mót – þar sem kynslóðirnar mætast – hafa jafnan verið fjölsótt jafnt af yngri sem eldri skákmönnum og velheppnuð. Yfir 80 ára aldursmunur hefur iðulega verið milli yngsta og elsta keppandans.

Þátttaka í mótinu er ókeypis og miðast við börn og ungmenni á grunnskólaaldri, 15 ára og yngri og roskna skákmenn, 60 ára og eldri. Mótið hefst kl. 13 og tefldar verða 9 umferðir með 7 mínútna umhugsunartíma.

Verðlaunasjóður mótsins  er kr. 100.000, auk þess sem veitt verða aldurflokkaverðlaun í 3 flokkum ungmenna og öldunga. Gjafabréf  fyrir flugmiðum á mót erlendis með Icelandair fyrir sigurvegara í barna og unglingaflokkum, 9 ára og yngri; 10-12 ára og 13-15 ára.  Úttektarkort fyrir eldsneyti hjá OLÍS fyrir efstu menn í 3 öldungaflokkum, 60-69 ára; 70-79 ára og 80 ára og eldri. Auk þess fær efsta stúlkan sem og yngsti og elsti keppandi mótsins heiðursverðlaun. Fagrir  verðlaunagripir og verðlaunapeningar verða í öllum flokkum auk bókaverðlauna ofl.

Myndarlegt vinningahappdrætti í mótslok.

Mótsnefnd skipa þeir Björn Jónsson, formaður TR, og Einar S. Einarsson, formaður Riddarans.

Hámarksfjöldi keppenda miðast við 100 og því mikilvægt að skrá sig sem fyrst og mæta tímanlega á mótsstað.

Skráningarform

Fylgjast má með skráningu hér.

Framsýnarmótið fer helgina 23.-25. október

Framsýnarmótið 2015 verður haldið í matsal fyrrverandi Litlaugaskóla á Laugum í Reykjadal helgina 23-25 október nk. Tefldar verða 7 umferðir alls, fyrstu fjórar með atksákartímamörkum (25 mín) en þrjár síðari skákirnar með 90 mín + 30 sek/leik.

 

Þátttökugjald 2.000 kr en 1.000 kr fyrir 16 ára og yngri.

Dagskrá:

Föstudagur 23. október kl 20:00  1. umferð
Föstudagur 23. október kl 21:00  2. umferð
Föstudagur 23. október kl 22:00  3. umferð
Föstudagur 23. október kl 23:00  4. umferð

Laugardagur 24. október kl 10:30  5. umferð
Laugardagur 24. október kl 16:30  6. umferð

Sunnudagur 25. október  kl 10:30  7. umferð

Mótið verður reiknað til Fide-skákstiga, Fide-atskákstiga og Íslenskra skákstiga.
Nánari upplýsingar um mótið verða birtar þegar nær dregur en einnig fást upplýsingar hjá Hermanni Aðalsteinssyni í síma 821-3187

Skráning fer fram á Skák.is (guli kassinn efst)

Einvígi Einars og Braga á Haustmótinu

Alþjóðlegu meistararnir Einar Hjalti Jensson og Bragi Þorfinnsson eru í nokkrum sérflokki á Haustmóti TR en þeir eru efstir og jafnir með 6,5 vinning þegar ein umferð er ótefld. Bragi hefur þegar tryggt sér titilinn skákmeistari TR 2015.

Nokkra athygli vekur að Björgvin Víglundsson er þriðji með 4,5 vinning en hann hefur nú snúið aftur að taflborðinu eftir langt hlé.  Þess ber þó að geta að staðan getur enn breyst nokkuð þar sem enn á eftir að tefla tvær frestaðar viðureignir, annarsvegar á milli alþjóðlega meistarans Sævars Bjarnasonar og Olivers Arons Jóhannessonar og hinsvegar Olivers og Arnar Leós Jóhannssonar.  Í næstsíðustu umferð sem fór fram í gær sigraði Bragi stórmeistara kvenna, Lenku Ptacnikovu, en Einar hafði betur gegn Oliver.

Í B-flokki sigraði Guðlaug Þorsteinsdóttir Hörð Aron Hauksson og tryggði sér þar með sigur í flokknum og sæti í A-flokki að ári.  Guðlaug hefur átt mjög gott mót og að loknum átta umferðum er hún með 7 vinninga, 1,5 vinningi meira en Agnar Tómas Möller og Vignir Vatnar Stefánsson sem koma næstir með 5,5 vinning.  Ólíkt umferðunum tveimur á undan lauk aðeins einni viðureign með skiptum hlut en hún var á milli Agnars og Bárðar Arnar Birkissonar.  Vignir sigraði hinsvegar Snorra Þór Sigurðsson.

Gauti Páll Jónsson hefur algjöra yfirburði í C-flokknum og hefur tryggt sér glæsilegan sigur en hann hefur fullt hús vinninga eftir að hafa lagt Hörð Jónasson að velli í áttundu umferð.  Veronika Steinunn Magnúsdóttir er önnur með 5,5 vinninga en hún beið lægri hlut gegn Ólafi Guðmarssyni.  Aron Þór Mai hefur átt mjög gott mót og er sem stendur í þriðja sæti með 4,5 vinning en hann á inni frestaða skák gegn Héðni Briem.

Í opna flokknum heldur Arnar Milutin Heiðarsson áfram góðu gengi en hann lagði Jón Þór Lemery með laglegri fléttu.  Arnar hefur 6,5 vinning en næstur kemur Alexander Olvier Mai með 5,5 vinning og síðan fylgja fimm keppendur með 5 vinninga.

Níunda og lokaumferðin fer fram í kvöld og hefst hún kl. 19.30.

Nánar á heimasíðu TR

• Úrslit, staða og pörun

Heimsmeistarinn snappaði í Berlín

Heimsmeistarinn í skák átti ekki gott mót á heimsmeistaramótinu í hraðskák í Berlín. Sérstaklega gekk honum illa í gær og endaði að lokum í sjötta sæti.

Á myndbandi á NRK má sjá viðbrögð Magnúsar í tapskákunum. Óhætt er að fullyrða að heimsmeistaranum þyki ekki gaman að tapa.

P.s. Takið sérstaklega eftir svipbrigðum Ivanchuks þegar hann mátar Carlsen (eftir rúmar 30 sekúndur). Svipbrigðin eru hreint og beint stórkostleg.