Susan Polgar heimsótti gröf Fischers á 75 ára afmælidegi meistarans

Susan Polgar fór í kirkjugarðinn í Laugdælum og heimsótti þar gröf ellefta heimsmeistarans í dag. Hún komst við enda tengd Fischer vináttuböndum. Hún kom jafnframt við á Fischer-setrinu á Selfossi. Með henni í för var eiginmaður hennar, Paul Truong, og Zurab Azmaiparashvili forseti Skáksambands Evrópu. 

Susan var svo viðstödd setningu Fischer-slembiskákmótsins og sagði frá uppruna skákarinnar en hún aðstoðaði Fischer við þróunar hennar. Susan gefur jafnframt hluta verðlaunanna á mótinu.

Zurab Azmaiparashvili, setti mótið svo formlega, og lék fyrsta leikinn fyrir Olver Aron Jóhannesson gegn Gata Kamsky e2-e4. Mótið er jafnframt Evrópumót í skák og er haldið í samvinnu SÍ og ECU. Fyrsta opinbera Fiscer-slembiskákmótið í heiminum. 

Mótið er fullum gangi núna og er hægt að fylgjast með beinni útsendingu hér.

 

Skákmót öðlinga hefst miðvikudaginn 21. mars

Skákmót öðlinga 40 ára og eldri hefst miðvikudaginn 21. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina  auk 30 sekúndna viðbótartími á hvern leik. Núverandi Skákmeistari öðlinga er Björgvin Víglundsson.

Dagskrá:
1. umferð miðvikudag 21. mars kl. 19.30
2. umferð miðvikudag 28. mars kl. 19.30
3. umferð miðvikudag 4. apríl kl. 19.30
4. umferð miðvikudag 11. apríl kl. 19.30
5. umferð miðvikudag 18. apríl kl. 19.30
6. umferð miðvikudag 25. apríl kl. 19.30
7. umferð miðvikudag 2. maí kl. 19.30

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Láta skal skákstjóra vita um yfirsetu fyrir lok umferðarinnar á undan.

Hraðskákmót öðlinga fer fram miðvikudaginn 9. maí kl. 19:30 og að því loknu fer þar fram verðlaunaafhending fyrir bæði mót. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Tímamörk
90 mín + 30 sek viðbót eftir hvern leik

Verðlaun
1. sæti kr. 40.000
2. sæti kr. 20.000
3. sæti kr. 10.000

Verðlaunafé verður skipt eftir Hort-kerfi verði keppendur jafnir að vinningum. Lokaröð keppenda ræðst af mótsstigum (tiebreaks).

Röð mótsstiga (tiebreaks): 1. Buchholz (-1) 2. Buchholz 3. Innbyrðis viðureign 4. Sonneborn-Berger

Þátttökugjald (greiðist með reiðufé við upphaf móts)

kr. 5.000 – Innifalið er frítt kaffi allt mótið ásamt rjómavöfflum og öðru góðgæti á lokakvöldi

Evrópumótið í Fischer-slembiskák fer fram í dag í Hörpu á 75 ára afmælisdegi Fischers - menntamálráðherra setur mótið

Evrópumótið í Fischer-slembiskák fer fram í dag í Hörpu á 75 ára afmælisdegi meistarans. Mótið er einstæður viðburður enda fyrsta opinbera slíka mót í heiminum. Flestir sterkustu keppendur mótsins eru skráðir til leiks. Meira að segja mæta nokkrir keppendur sérstaklega til landsins, frá Hollandi, til að taka þátt. Mótið hefst kl.13 og mun Lilja Alfreðsdóttir, menntamálaráðherra, setja mótið og leika fyrst leik þess. Væntalega fyrsti ráðherra heims sem leikur fyrsta leikinn í Fischer-slembiskákmóti í heiminum!

Þótt að mótið sé Evrópumótið er mótið opið öllum. Efsti Evrópubúinn verður hins vegar krýndur Evrópumeistari. 

Bobby Fischer þróaði skákina meðal annars í samstarfi við sérstakan gest Reykjavíkurskákmótsins, Susan Polgar, og hér ein fárra mynda af Fischer tefla slíka skák - sennilega tekin um miðja tíunda áratuginn. 

Susan mun á sjálfan afmælisdaginn heimsækja gröf Fischers ásamt Zurab Azmaiparashvili, forseta Evrópska skáksambandsins, og án efa munu þau minnast meistarans á sérstæðan hátt. 

Að sjálfsögðu verður mótið í þráðbeinni útsendingu og geta menn fylgst með mótinu á sambærilegan hátt og öðrum umferðum. Ritstjóri hefur heimildir fyrir því að titringur en jafnframt tilhlökkun sé meðal skákskýrenda fyrir mótið enda eru allir á leiðinni í djúpu laugina - enda reynslan engin! Hið öfluga útsendingarlið mun hins vegar væntanlega leysa málið. Áhorefndur eru hvattir til að fjölmenna í Hörpu og fylgjst með mótinu. Væntanlega upplifa menn sérstakar stundir. 

Sælustund er á Smurstöðinni í Hörpu á milli 16 og 19 og pub-kviss hefst í Björtu loftum kl. 20:30. 

 

 

Jóhann Hjartarson, Helgi Áss, Hannes Hlífar og Jón Viktor hlutskarpastir á Skákhátíð MótX 2018

Nú er lokið hinni geysisterku og vel skipuðu Skákhátíð MótX, sem var haldin af Skákfélaginu Hugin og Skákdeild Breiðabliks. Frísklega var teflt í stúkunni við Kópavogsvöll og margar bráðskemmtilegar skákir glöddu augað.

Í björtum sal glerstúkunnar var loftið þrungið dæmigerðri spennu lokaumferðar þriðjudaginn 27. febrúar síðastliðinn. Aðstæður voru þó óvenjulegar að því leyti að úrslitaskák Jóhanns Hjartarsonar og Helga Áss Grétarssonar í A-flokknum var ekki tefld á staðnum heldur sýnd á skjá að keppendum fjarstöddum. Ástæðan var sú að Jóhann þurfti af landi brott og skákin því tefld fyrir fram og úrslitum haldið leyndum. Voru leikir stórmeistaranna leiknir jafnóðum í réttri tímaröð til að tryggja að úrslitin hefðu ekki óeðlileg áhrif á ákvarðanatöku annarra keppenda í toppbaráttunni.

Við þessar aðstæður var ekki síður spennandi að fylgjast með skák þeirra Jóhanns og Helga en þó að þeir hefðu verið á staðnum í eigin persónu. Þeir Jóhann og Helgi, sem voru efstir og jafnir fyrir lokaumferðina, sættust loks á skiptan hlut eftir langa og stranga vörn Helga. Sá síðar nefndi lét reyndar svo um mælt eftir skákina að sér liði yfirleitt best í afleitum stöðum og hann hefði því vísvitandi komið sér í vandræði til þess að fá eitthvað út úr skákinni!

Á öðru borði kom Hannes Hlífar Stefánsson Björgvini Jónssyni á óvart í byrjun og eftir að kóngssókn Suðurnesjamannsins rann út í sandinn náði Hannes smám saman frumkvæðinu og knésetti Björgvin í vel útfærðri skák. Á þriðja borði tókust Þröstur Þórhallsson og Jón Viktor Gunnarsson á í hörkuskák þar sem lengi var óljóst hvor stæði betur. Úr varð tímahrak þar sem Þröstur tefldi til vinnings en misreiknaði sig aðeins í endataflinu og varð að leggja niður vopnin.

 

Úrslitin í A flokki Skákhátíðar MótX 2018 urðu því þau að þeir Jóhann Hjartarson, Helgi Grétarsson, Hannes Hlífar Stefánsson og Jón Viktor Gunnarsson komu jafnir í mark með 5 vinninga af 7 möguleikum, en Jóhann varð efstur á stigum. Sjónarmun þar á eftir varð svo Hjörvar Steinn Grétarsson með 4,5 vinninga.

Nánar á Chess-Results. 

Keppni í flokki Hvítra hrafna var afar jöfn allt frá fyrstu umferð. Í lokaumferðinni hjá þessum gömlu kempum sem eru enn ungir í anda, sömdu þeir Jón Þorvaldsson og Jónas Þorvaldsson fljótlega um skiptan hlut en Júlíus Friðjónsson sigraði Braga Halldórsson eftir nokkrar sviptingar. Bragi stóð lengst af betur í skákinni en lék af sér drottningunni í tímahraki og því fór sem fór. Friðrik Ólafsson, sem átti að tefla við Björn Halldórsson, forfallaðist og varð því miður að gefa síðustu skák sína í mótinu. Friðrik setti afar sterkan og skemmtilegan svip á Skákhátíðina og er þessum heiðursmanni og stafnbúa íslenskrar skáksögu þökkuð þátttakan sérstaklega.

Hlutskarpastur í flokki Hvítra hrafna 2018 varð Júlíus Friðjónsson með 3,5 vinninga af 5 mögulegum, annar varð Jón Þorvaldsson með 3 vinninga en þeir Júlíus voru taplausir á mótinu. Í þriðja sæti varð Bragi Halldórsson.

Nánar á Chess-Results.

Í B-flokknum tefldu flestir efnilegustu skákmenn landsins í bland við eldri og reyndari skákmenn. Hart var barist í lokaumferðinni í flokknum.

Siguringi Sigurjónsson tefldi mjög vel í mótinu og endaði í efsta sæti þar sem hann varð hærri á stigum en Hilmir Freyr Heimisson sem var jafn honum með 5,5 vinninga af 7 mögulegum. Þeir tveir unnu sér rétt til taflmennsku í A-flokknum á næsta ári. Aron Þór Mai tók 3ja sætið með 5 vinninga.

Nánar á Chess-Results.

Baráttan um nafnbótina Unglingameistari Breiðabliks var spennandi. Birkir Ísak Jóhannsson stóð að lokum uppi sem sigurvegari eftir stigaútreikning.

 

Skemmtilegt stelpuskákmót Susan Polgar haldið í Hörpu í dag

Í dag á alþjóðlega kvennadeginum var haldið afar skemmtilegt stelpumót í Hörpu. Fjöldi stúlkna kom til að hlusta á Susan Polgar svara nokkrum spurningum og segja frá ferli sínum. Fram kom t.d. að það væru 30 ár síðan Susan Polgar kom síðast til Íslands en þá tefldi hún á Reykjavíkurskákmótinu og síðar sama ár á Egilsstöðum þar sem hún sigraði á alþjóðlegu móti.  Susan heldur betur slóg í gegn í dag og hlustuðu stelpurnar agndofa á hana.

Af því loknu var slegið upp Stelpuskákmóti Susan Polgar. Tefldar voru 5 umferðir og var þögnin og hlýðnin aðdáunarverð. Batel Goitom Haile kom sá og sigraði en hún vann allar skákirnar sínar.

Lokastaðan á Chess-Results. 

Fyrr um daginn heimsótti Susan Laufásborg þar sem þar Omar Salama, varaforseti SÍ og aðaldómari Reykjavíkurskákmótins, kennir skák. 

Sigurlaug R. Friðþjófsdóttir stjórnaði af miklum fyrirlestri Susan af gríðarlegum myndarskap og segir svo frá Feacebook-síðu sinni: 

Yfirdómari mótsins var Hallfríður Sigurðardóttir og stjórnaði af miklum myndarskap. 

Að loknu móti afhendu Susan og Katrín Jakobsdóttir, forsætisráðherra, öllum stelpunum viðureknningarskjal sem Susan afhendi. Stelpurnar fengu svo mynd af sér með Susan.

Frábærlega vel heppnaður viðburður sem mun örugglega hvetja stelpurnar til dáða!

Frétt RÚV um Stelpuskákmótið

 

 

GAMMA Reykjavíkurskákmótið - Jóhann lagði ofurstórmeistara, Yilmaz efstur

Fjórða umferð Reykjavíkurskákmótsins lauk nú í kvöld. Tyrkinn Mustafa Yilmaz verður einn í efsta sæti með fullt hús vinninga eftir að hafa lagt af velli indverska stórmeistarann Suri Vaibhav í Najdorf afbrigði Sikileyjarvarnar. Elshan Moradiabadi var því sá eini sem gat náð honum að vinningum en hann gerði öruggt jafntefli með svörtu við stigahæsta skákmann mótsins, Richard Rapport sem komst ekkert áfram gegn góðum undirbúningi Írans.

 

Augu flestra voru þó á þriðja borði þar sem Jóhann Hjartarson tefldi frábæra skák gegn næststigahæsta manni mótsins Pavel Eljanov (2713) frá Úkraínu.  Pavel hefur lengi verið með sterkustu skákmönnum heims og farið mest yfir 2750 skákstig. Jóhann lagði hann að velli með svörtu mönnunum í kóngsindverskri vörn. Jóhann sagði í útsendingu mótsins að leikur sinn ...He8 sem leit furðulega út hafi verið hugmynd sem leikið var gegn honum á Ólympíuskákmótinu í Baku og hann ákvað að reyna hugmyndina gegn Eljanov. Það gekk vægast sagt vel og Jóhann vann í frábærri skák!

 

. Jóhann er því í stórum hópi skákmanna með 3,5 vinning af 4 og gaman verður að sjá hvern hann mun kljást við í næstu umferð.

 

Birkir Ísak Jóhannsson er einn fjölmargra ungra skákmanna sem eru að standa sig vel á mótinu og hann bætti enn í stigagróða sinn með góðu jafntefli við þýska FIDE meistarann Oliver Bewersdorff

 

 

 

Frídagur verður í mótinu á morgun vegna Evrópumeistaramótsins í Slembiskák (Fischer Random) en Reykjavíkurskákmótið heldur áfram á laugardaginn klukkan 13:00 með 5. umferð.

 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni

 

Útsending 4. umferðar (Jóhann Hjartarson akýrir sína skák í lokin)

 

 

Watch Reykjavik Open, Round 3 from Chess on www.twitch.tv

Reykjavik Open Pub Quiz á morgun klukkan 20:30

Hið árlega og vinsæla Reykjavik Open Pub Quiz fer fram á morgun, föstudag klukkan 20:30. Að þessu sinni verður viðburðurinn í Björtu Loftum sem er salur á 6. hæð í Hörpu.

Pub Quizzið er einn vinsælasti hliðarviðburður Reykjavíkurskákmótsins ár hvert. Fyrirkomulag er alltaf þannig að 30 spurningar eru um skák og skáksögu. Mikið af spurningunum í ár verða um Bobby Fischer þar sem mótið í ár er minningarmót um meistarann.

Þátttaka er opin öllum og verðlaun í boði. Passa bara að mæta með góða skapið og gera sitt besta! Meðal fyrrverandi sigurvegara er sjálfur heimsmeistarinn í skák, Magnus Carlsen og því ekki dónalegur félagsskapur sem sigurvegararnir komast í!

Fjölnir: Pistill um Íslandsmót skákfélaga

Fjölnismenn settu sér markmið sem stóðust nákvæmlega 

Skákdeild Fjölnis vill óska Skáksambandi Íslands til hamingju með velheppnað Íslandsmót skákfélaga. Við sem mættum til leiks glöddumst í góðum og fjölbreyttum hópi. Ef þú ert virkur skákmaður eignastu á Íslandsmóti skákfélaga fjölda góðra vina eða kunningja, sem takast á með virðingu og jákvæðu keppnisskapi á þessari "árshátíð" íslenska skáksamfélagsins. Ströng og krefjandi dagskrá, en tíminn er fljótur að líða á Íslandsmótinu. Síðari hlutinn einni umferð skemmri en á móti kemur meiri háttar verðlaunahátíð á Kringlukránni sem enginn má láta fram hjá sér fara. Undirritaður vill af góðri reynslu alls ekki missa af samkundunni. Skákmóðir keppnismenn og konur, reynast allir perluvinir og klappa hver öðrum rækilega á bakið og slá mönnum gullhamra.

Skákdeild Fjölnis sendi þetta keppnisár þrjár skáksveitir til leiks, þar af eina ungmennasveit. A og B sveitir Grafarvogsbúa voru í ákjósanlegri stöðu eftir fyrri hluta mótsins, báðar í verðlaunasæti og B sveitin í 2. sæti, sem gefur rétt á að færast upp um deild. A sveitin hefur sl. þrjú ár verið afar "stapíl" bæði hvað varðar mannskap og árangur. Þeir erlendu félagar okkar sem áður hafa teflt fyrir Fjölnismenn, en hafa í rúmt ár verið sparaðir, voru kallaðir til leiks, Íslandsvinir með Fjölnishjarta sem slær í hverjum einstaka skákmeistara. Að þessu sinni tefldum við fram þremur útlendingum en spöruðum þess í stað stórmeistarann okkar Héðin sem náði 87,5 % árangri í fyrri hlutanum, og gefur aldrei tommu eftir þegar hann teflir fyrir Fjölnismenn.

Fjölnir notaði aðeins 26 skákmenn í þau 20 sæti sem þurfti í þrjár skáksveitir. Stöðugleikinn hjálpar að okkar mati. Í 1. deildinni gerðist það helst að Fjölnir hélt sínu 3. sæti frá fyrri hluta mótsins og bætti enn betur á forskotið eftir þrjá glæsilega sigra í þremur síðustu umferðunum. Átta skákmenn tefldu nær allar umferðirnar og börðust fyrir hverju stigi, allt fram í síðustu skák. Kallöðu oft á áhættu hjá þessum áhugaverðu skákmönnum, sem oftast tókst en gat líka endað með sáru tapi. Evrópumeistari 18 ára Jesper Thybo tefldi fyrir Fjölnismenn allar níu umferðirnar og leiddi sveitina með frábærum árangri síðari hlutann. Þessi félagi Dags og Olivers Arons er mikill fengur fyrir sveitina og ákaflega vinalegur í allri viðkynningu. Pontus Carlsson og Robert Ris eru sterkir skákmenn og sannir Íslandsvinir sem við Fjölnismenn sannreynum. Oliver Aron, nýbakaður Norðurlandameistari í skólaskák átti góða seríu í deildinni og er ásamt Degi Ragnarssyni helsti framtíðarlaukur uppaldra Fjölnismanna. Sigurbjörn Björnsson verkefnastjóri Fjölnis fyrir EM og fleiri viðburði tapaði bara einni skák og var með um 70% vinningshlutfall. Loks skal minnast á okkar einstaka "super sub" Tómas Björnsson sem til skiptis kom inn á í 1. eða 3. deild. Tómas er taplaus allt frá því hann gekk til liðs við Fjölni að nýju fyrir þremur árum og varð engin breyting á því nú.

B sveit Fjölnis missti 2. sætið eftir tap gegn Víkingasveitinni B á föstudagskvöld. Undirritaður liðstjóri bjó í framhaldinu til áætlun á 2. sætið sem hann kynnti liðsmönnum og gekk út þá einföldu lausn að vinna tvær síðustu seturnar og stefna á 8 vinninga þennan laugardag.

Þetta lét okkar unga B sveit ganga eftir og rúmlega það. BB- b sveitin var lögð með tæpasta mun en Fjölnismenn réttlættu 2. sætið og upp um deild með 6-0 sigri á SA C í lokaumferð.

B sveitin fær því annað tækifæri á að tefla í næstefstu deild. B sveitin er mikil fyrirmyndarsveit, skipuð ungmennum frá 16 ára aldri, nokkuð jafnt drengjum og stúlkum sem hafa frá upphafi teflt fyrir Fjölni. Krakkarnir hafa farið saman í keppnisferðir erlendis (Västerås) og flest teflt í sigursælum skáksveitum Rimaskóla. Varaformaðurinn okkar Erlingur Þorsteinsson er traustur í framlínunni og var með 100% árangur. Það afrekaði líka Dagur Andri Friðgeirsson sem þrátt fyrir miklar annir í námi heldur við hæfni sinni í skáklistinni. Það gladdi okkur líka mikið í sigurvímunni að snillingurinn Nansý Davíðsdóttir náði 2000 stiga múrnum með tveimur sigurskákum þennan laugardag. Hún á mikið inni enda ekki mikið teflt keppnisskákir að undanförnu.

Ungmennaliðið var skipað sjö grunnskólanemendum úr Rimaskóla og Foldaskóla sem halda merkjum sinna skóla á lofti. Joshua Davíðsson fer þarna fremstur og var með 75% vinningshlutfall á 1. borði sem telst býsna gott í þessari annars sterku deild.

Skákdeild Fjölnis var stofnuð árið 2004. Deildin hefur frá upphafi haldið úti árangursríku barna-og unglingastarfi sem hefur reynst skákdeildinni dýrmætt í markvissu og samfelldu uppbyggingarferli. Einu sinni Fjölnismaður, alltaf Fjölnismaður er markmið stjórnar sem staðið hefur hingað til.

Fjölnismenn þakka skákmönnum á Íslandsmótinu fyrir ánægjulegan félagsskap þessa helgi með kærri skákkveðju.

 

Helgi Árnason liðstjóri

Heimsviðburður: Evrópumótið í Fischer-slembiskák fer fram á morgun: Skráningu lýkur í dag

Evrópumótið í Fischer-slembiskák fer fram á morgun í Hörpu á 75 ára afmælisdegi meistarans. Mótið er einstæður viðburður enda fyrsta opinbera slíka mót í heiminum. Flestir sterkustu keppendur mótsins eru skráðir til leiks fyrir utan að það að nokkrir koma hingað sérstaklega til landsins til að taka þátt.

Afar góð verðlaun eru á mótinu en nánar um mótið má lesa hér.

Mótið hefst kl.13.  Lokað verður fyrir skráningu að lokinni fjórðu umferð GAMMA Reykjavíkurskákmótsins í kvöld (um kl. 22). 

Þátttökugjöld eru kr. 1.000 sem taka þátt í Reykjavíkurskákmótinu en kr. 2.500 fyrir aðra. Frítt fyrir stórmeistara og alþjóðlega meistara.

Bobby Fischer þróaði skákina meðal annars í samstarfi við gest Reykjavíkurskákmótsins, Susan Polgar, og hér ein fárra mynda af Fischer tefla slíka skák. 

Mælt er með því að þau séu lögð inn á reikning Skáksambandsins 101-26-12763, kt. 580269-5409 en einnig má greiða þau á skákstað.

Ekki missa af tækifærinu á að tala fyrsta Fischer-slembiskákmótinu. Móti sem á mögulega eftir að koma stórum snjóbolta af stað.

Skráning á Skák.is (guli kassinn)

Þátttökulistinn

Stelpuskákmót Susan Polgar fer fram í dag í Hörpu - forsætisráðherra setur fjórðu umferðina

Í dag fer fram Stelpuskákmót Susan Polgar í Hörpu. Mótið er opið öllum stúlkum í grunnskólum og þegar eru ríflega 20 stelpur skráðar til leiks flestar úr öflugu unglingastarfi TR.

Susan mun kynna fyrir stúlkunum leyndardóma skákarinnar og segja frá reynslu sinni í skálistinni. Susan var þriðja konan í sögunni til að verða stórmeistari í skák og er ein besta skákkona allra tíma. Dagskráin hefst kl. 15 í Stemmu. Allar stúlkur velkomnar!

Af því loknu verður stelpuskákmót þar sem Susan og Katrín Jakobsdóttir, forsætisráðherra, munu afhenda verðlaun að móti loknu. 

Forsætisráðherra mun leika fyrsta leik fjórðu umferð GAMMA Reykjavíkurskákmótsins.