Borgarstjórinn féll...........á tíma

Ólafur F. Magnússon  borgarstjóri undirritaði stofnsamning að kákakademíu Reykjavíkurborgar. Við þetta tækifæri reyndist borgarstjóri tilkippilegur til að taka eina hraðskák við hinn efnilega skákmann Jón Trausta Harðarson í Rimaskóla. Borgarstjóri sem hér á árum áður var liðsmaður í sterkri skáksveit MH virtist engu hafa gleymt. Hann var þó fljótur að átta sig á því að Jón Trausti var
ekkert lamb að leika við.  Skákin var allan tímann í jafnvægi þar til undir lokin að báðir áttu innan við mínútu eftir. Þá reyndu þeir báðir að vekja upp drottningu sem borgarstjóra tókst loksins en dugði ekki til, Jón Trausti varðist fimlega og báðir féllu þeir samtímis á tímamörkum og skákin því
jafntefli.

Jafnframt var í Höfða efnt til skákmóts. Þátttakendur voru hinir bráðefnilegu lærisveinar Davíðs Kjartanssonar í  barnaskólaskáksveit Rimaskóla. Eftir að hafa reynt með sér í skáklistinni, teflt við Ólaf F. borgarstjóra og Hrafn Jökulsson þá stilltu þeir sér upp með nýkjörnum forseta
Skáksambandsins Birni Þorfinnssyni. Það verður m.a. þeirra að koma að háleitum markmiðum Skákakademíunnar og gera Reykjavík að Skákhöfuðborg heimsins árið 2010.

Stofnun Skákakademíu Reykjavíkur

Reykjavíkurborg, Landsbankinn, Mjólkursamsalan og Orkuveita Reykjavíkur undirrituðu í dag stofnsamning að Skákakademíu Reykjavíkur. Stofnhlutafé er 20 milljónir króna.

Hlutverk Skákakademíu Reykjavíkur (SR) verður að byggja upp skákíþróttina í höfuðborginni með sérstakri áherslu á skóla borgarinnar, en auk þess að standa árlega að Skákhátíð Reykjavíkur þar sem hápunktur vikunnar verði Alþjóðlega Reykjavíkurskákmótið sem héðan í frá verður haldið árlega en ekki á tveggja ára fresti eins og verið hefur frá 1964. 

Grunnurinn að starfi SR verður í þágu ungu kynslóðarinnar. Skákvakningin meðal barna og ungmenna á Íslandi á síðustu árum er til marks um aðdráttarafl skáklistarinnar og rannsóknir sýna að bein tengsl eru milli námsárangurs og skákkunnáttu. Akademíunni er ætlað að ýta enn frekar undir þessa þróun enda einsýnt að skákiðkun meðal barna og ungmenna hefur ótvírætt forvarnagildi og er líkleg til þess að efla þroska og heilbrigð lífsviðhorf.

SR á að vera lifandi miðpunktur þess metnaðarfulla verkefnis, vinna með grunnskólunum, styðja við starf taflfélaganna í Reykjavík og vera í nánu sambandi við Skáksambandið.

Skákvakningin á Íslandi á síðustu árum, hin ríka skákhefð okkar og sú velvild sem skáklistin nýtur valda því að nú er raunhæft að keppa að því að Reykjavík verði Skákhöfuðborg heimsins árið 2010.

Í stjórn Skákakademíu Reykjavíkur sitja: Júlíus Vífill Ingvarsson, formaður SR, Svandís Svavarsdóttir, Árni Emilsson, Karl Stefánsson, Óttar Felix Hauksson, Róbert Harðarson og Gunnar Björnsson. Varamenn eru: Guðlaug Þorsteinsdóttir, Halldóra Traustadóttir, Helgi Árnason, Helgi Ólafsson og Lenka Ptacnikova.

Verndari Skákakademíunnar er Friðrik Ólafsson, stórmeistari.

Alþjóðlegt Boðsmót TR 16.-24. júní 2008

Boðsmót TR verður alþjóðlegt mót annað árið í röð. Mótið er haldið til þess að færa ungum Íslendingum meiri reynslu og gefa þeim jafnframt  kost á að reyna við áfanga að alþjóðlegum meistaratitli eða afla sér reynslu.

Tíu keppendur eru skráðir til leiks og verða tefldar níu umferðir. Sex og hálfan vinning þarf til að ná áfanga að alþjóðlegum meistaratitli.

Hér að neðan er keppendalistinn ásamt FIDE- stigum keppenda:

 

IM Jakob Vang Glud  (Danmörk)       2456

IM Espen Lund (Danmörk)                2420

FM Björn Þorfinnsson                        2417

IM Simon Bekker- Jensen (Dan.)    2392

FM Ingvar Þór Jóhannesson               2344

FM Guðmundur Kjartansson              2321

Kamalakanta Nieves (Puerto Rico)     2225

Björn Þorsteinsson                              2192

Torfi Leósson                                      2137

Daði Ómarsson                                   2027 

Teflt verður í salarkynnum Taflfélags Reykjavíkur í Skákhöllinni Faxafeni.

Taflmennskan hefst í öllum umferðum kl. 17:30.

Aðgangur að mótinu er ókeypis og veitingasalan verður opin.

Skákstjóri er Ólafur S. Ásgrímsson alþjóðlegur skákdómari.

Skákakademía Reykjavíkur verður stofnuð á morgun

Til stendur að koma á fót Skákakademíu Reykjavík og verður hún kynnt á blaðamannafundi í Höfða á morgun.  Að Skákakademíunni standa Reykjavíkurborg, Landsbankinn, Mjólkursamsalan og Orkuveitan. 

Hlutverk Skákakademíu Reykjavíkur að byggja upp skáklíf í höfuðborginni með sérstakri áherslu á skóla borgarinnar en auk þess að standa árlega að Skákhátíð Reykjavíkur þar sem hápunktur vikunnar verði Alþjóðlega Reykjavíkurskákmótið. Markmið Skákakademíunnar er að Reykjavík verði skákhöfuðborg heimsins árið 2010.

Stigamót Hellis fer fram um næstu helgi

Stigamót Taflfélagsins Hellis verður haldið í sjöunda sinn dagana 23.-25. maí.   Fyrirkomulagi hefur nú verið breytt en að þessu sinni er mótið helgaratskákmót og er öllum opið.  Góð verðlaun eru í boði á mótinu.  Nú eru átján keppendur skráðir til leiks og þar af einn stórmeistari og tveir alþjóðlegir meistarar.   Skráning fer fram á http://www.hellir.com/.

Keppendalistann má nálgast hér:  http://chess-results.com/tnr13278.aspx

Þátttökugjöld eru kr. 3.000 fyrir fullorna og 2.000 kr. fyrir 15 ára og yngri og rennur óskipt í verðlaunasjóð mótsins.  

Síðasta tækifæri fyrir flesta til að tefla kappskákir innlands í sumar.   

Núverandi Stigameistari Hellis er Omar Salama

Umferðatafla: 

• 1.-4. umferð, föstudaginn 23. maí (19:30-23:30)
• 5. umferð, laugardaginn 24. maí (11-15)
• 6. umferð, laugardaginn 24. maí (17-21)
• 7. umferð, sunnudaginn 25. maí (11-15)

Verðlaun:

• 1. 50% af þátttökugjöldum
• 2. 30% af þátttökugjöldum
• 3. 20% af þátttökugjöldum

Skráning:

• Vefsíða: http://www.hellir.com/
• Sími: 866 0116 (Vigfús eða símsvari)

Tímamörk:

• 1.-4. umferð: 20 mínútur + 5 sekúndur á leik
• 5.-7. umferð: 1½ klst. + 30 sekúndur á leik

Þór sigraði á minningarmóti

Minningarmót um Gunnlaug Guðmundsson fyrrum formann Skákfélags Akureyrar fór fram um sl. helgi. Þór Valtýsson sigraði, fékk 11 vinninga af 15 mögulegum.  Í 2.-3. sæti urðu Sigurður Arnarson og Sigurður Eiríksson með 10,5 v. Tefldar voru fimm mínútna skákir.

Næsta mót hjá S.A. verður á sunnudag 25. maí kl. 14.00 en þá hefst maí hraðskákmótið.

Omar sigraði á hraðkvöldi

Omar Salama sigraði örugglega með 7 vinningum í sjö skákum á hraðkvöldi Hellis  sem fram fór 19 maí. Þótt andstæðingar hans væru nokkuð duglegir að sprikla þá dugði það ekki til. Í öðru sæti varð Hallgerður Helga Þorsteinsdóttir með 5 vinninga.   Næst komu í einni bendu Vigfús Ó. Vigfússon, Elsa María Þorfinnsdóttir, Jóhanna Björg Jóhannsdóttir og Birkir Karl Sigurðsson.

Lokastaðan á hraðkvöldinu:

• 1.   Omar Salama 7v/7
• 2.   Hallgerður Helga Þorsteinsdóttir 5v
• 3.   Vigfús Ó. Vigfússon 4,5v
• 4.   Elsa María Þorfinnsdóttir 4,5v
• 5.   Jóhanna Björg Jóhannsdóttir 4,5v
• 6.   Birkir Karl Sigurðsson 4,5v
• 7.   Dagur Andri Friðgeirsson 3,5v
• 8.   Örn Stefánsson 3,5v
• 9.   Arnar Valgeirsson 3v
• 10. Patrekur Maron Magnússon 3v
• 11. Benjamín Gísli Einarsson 3v
• 12. Dagur Kjartansson 3v
• 13. Björgvin Kristbergsson 3v
• 14. Brynjar Steingrímsson 3v
• 15. Pétur Jóhannesson 1v

Jónas Pétur Erlingsson látinn

Jónas Pétur Erlingsson, skákmeistari, lést  18. maí sl, fimmtugur að aldri.  Jónas var einn af okkar sterkustu skákmönnum upp úr 1980 og tefld m.a. fyrir Íslands hönd í sexlanda keppninni á unglingaborði.   Einnig tefldi hann í landliðsflokki. 

Jónas var ekki bara hæfileikamaður í skák, því hann náði bæði Íslandsmeistaratitli í bridge og snóker og svo hafði hann náð eftirtektarverðum árangri í golfi.

Hraðkvöld hjá Helli í kvöld

Hraðkvöld hjá Helli verður haldið mánudaginn 19. maí í Hellisheimilinu í Mjódd og hefst kl. 20.  Eins og venjulega eru tefldar 7 umferðir með 7 mínútna umhugsunartíma þannig að mótið tekur tiltölulegan stuttan tíma!  Ljúffeng verðlaun í boði! 

Sigurvegarinn fær pizzu fyrir tvo frá Domionos auk þess sem einn heppinn útdreginn keppandinn fær sömu verðlaun. 

Þátttökugjald er kr. 300 fyrir félagsmenn en kr. 500 fyrir aðra. Þátttökugjald er kr. 200 fyrir 15 ára og yngri félagsmenn en kr. 300 fyrir aðra.

Teflt er í Hellisheimilinu, Álfabakka 14a.  

Allir velkomnir!

Ivanchuk öruggur sigurvegari í Sofíu

Úkraínski stórmeistarinn Vassily Ivanchuk (2740) vann öruggan sigur á M-tel Masters mótinu sem lauk í Sofíu í Búlgaríu dag.  Ivanchuk hlaut 8 vinninga í 10 skákum og var 1,5 vinning fyrir ofan Topalov (2767) sem varð annar.  Þriðji varð Radjabov (2751).

Staðan:

• 1. Ivanchuk (2740) 8 v. af 10
• 2. Topalov (2767) 6,5 v.
• 3. Radjabov (2751) 5,5 v.
• 4. Cheparionv (2696) 4 v.
• 5.-6. Aronian (2763) og Bu Xiangzhi (2708) 3 v.

Heimasíða mótsins