Páskaeggjasyrpa TR heldur áfram í dag

Páskaeggjasyrpa Nóa Síríus og Taflfélags Reykjavíkur heldur áfram á morgun, sunnudaginn 2.apríl. Taflið hefst klukkan 13 og er áætlað að því ljúki um klukkan 15:45.

Keppt verður í tveimur flokkum, 1-3.bekk (og yngri) og 4-10.bekk. Sjö umferðir verða tefldar með 5 mínútna umhugsunartíma á mann og bætast 3 sekúndur við tímann eftir hvern leik (5+3). Hraðskákstig verða reiknuð. Enginn ólöglegur leikur er leyfður og því tapast skák við fyrsta ólöglega leik.

Verðlaunapeningur og páskaegg verða í verðlaun fyrir þrjú efstu sætin í hvorum flokki. Þá verður jafnframt páskaegg í verðlaun fyrir efstu stúlkuna í hvorum flokki. Að móti loknu verður einn þátttakandi dregin út í happdrætti og hlýtur sá heppni að launum stórt páskaegg. Þátttakendur geta aðeins fengið eitt páskaegg hver í hverju móti Páskaeggjasyrpunnar, þó er happdrættisvinningurinn undanskilin þeirri reglu. Að loknu þriðja og síðasta mótinu verða veitt stór páskaegg í verðlaun fyrir samanlagðan árangur.

Allir sem taka þátt í minnst tveimur af þremur mótum Páskaeggjasyrpunnar fá páskaegg í verðlaun fyrir þátttökuna og verða þau afhent í lok þriðja mótsins.

Skráning fer fram í gegnum skráningarformið hér að neðan, en einnig má nálgast það í gula kassanum á skak.is.

Taflfélag Reykjavíkur og Nói Síríus hlakka til að sjá ykkur á móti númer 2 í PÁSKAEGGJASYRPUNNI 2017!

Skráningarform

Skráðir keppendur

Páskaskákmót Vinaskákfélagsins fer fram á morgun

Páskaskákmót Vinaskákfélagsins verður haldið mánudaginn 3. apríl kl: 13 í Vin að Hverfisgötu 47. Tefldar verða 6 umferðir með 7 mínútur á skák. Mótið verður reiknað til hraðskákstiga.  

Í hléi verður boðið upp á hið frábæra og ógleymanlega kaffi og veitingar. Góð verðlaun verða í boði. (Kannski verða einhver páskaegg í verðlaun).

Þið getið skráð ykkur á mótið á gula kassanum efst á síðunni á skak.is

Allir velkomnir!!

Skákþáttur Morgunblaðsins: Stefnir í þátttökumet á Reykjavíkurskákmóti

Jóhann Hjartarson verður meðal keppenda á Reykjavíkurskákmótinu sem hefst í Hörpu þann 19. apríl nk. Jóhann tefldi síðasta Reykjavíkurskákmótið árið 1996 og hann hefur tvívegis verið í hópi sigurvegara þess, árin 1984 og 1992. Þá verður Hannes Hlífar Stefánsson einnig með en búast má við því að þeim fjölgi, bestu íslensku skákmönnunum, eftir því sem líður nær móti. Undanfarin ár hafa Reykjavíkurskákmótin verið haldin í byrjun mars en ákveðnir erfiðleikar vegna pantana urðu til þess að það var fært fram í apríl. Það skapar að vísu ákveðinn vanda hjá framhaldsskólanemendum sem eru í óða önn að undirbúa sig fyrir vorpróf.

Alls eru 277 keppendur skráðir til leiks og gæti mótið hæglega orðið það fjölmennasta frá upphafi. Reykjavíkurmótið hefur unnið sér sess sem eitt skemmtilegasta og sterkasta opna skákmótið í skákheiminum í dag og þegar hafa nokkrir þekktir kappar boðað komu sína. Stighæstir eru Hollendingurinn Anish Giri, Rússinn Dmitry Andreikin og Georgíumaðurinn Baadur Jobava sem eru allir yfir 2700 elo stigum. Þá má nefna skákmenn á borð við Alexei Shirov, Gata Kamsky, Gawain Jones og Filippseyinginn Eugenio Torre. 

Athyglin beinist að Praggnanandaah

Fjölmargir indverskir skákmenn munu verða með á Reykjavikurmótinu að þessu sinni og sumir koma ár eftir ár eins og t.d. skákdrottningin Tania Sadchev. En í ár mun athyglin sennilega beinast að Ramesh Praggnanandaah sem er aðeins 11 ára gamall og orðinn alþjóðlegur meistari. Hann vekur athygli hvar sem hann teflir. Sl. haust tefldi hann á sterku alþjóðlegu móti á eyjunni Mön þar sem hann vann þekktan meistara í aðeins 18 leikjum með svörtu. Skákina tefldi hann geysilega vel en stenst þó vart samanburð við skák sem Bobby Fischer tefldi við Donald Byrne 13 ára:

 

Axel Bachman – Ramesh Praggnanandaah

Kóngsindversk vörn

1. d4 Rf6 2. Bf4 g6 3. Rc3 d5 4. Dd2 Bg7 5. Bh6

Þetta virkar hálf frumstætt en svona gerast nú kaupin á eyrinni í dag.

5. ... O-O 6. Bxg7 Kxg7 7. O-O-O c5 8. e3 Rc6 9. f3 c4 10. e4 b5!

Svarar sókn á miðborði með kröftugum hætti. Hvítur hættir ekki á að opna b-línuna.

11. exd5 Rb4 12. Rxb5 Rxa2+! 13. Kb1 Dxd5

Í fljótu bragði virðist hvítur geta leikið 14. Rc7 en eftir 14. ... Db7! 15. Rxa8 kemur 15. ... c3! og vinnur.

14. Ra3 c3! 15. bxc3 Hb8+ 16. Ka1 Da5 17. Kxa2 Rd5 18. Re2 Be6!

– og þar sem engin vörn finnst gegn riddaraskák á c3 gafst Bachmann upp, t.d. 19. c4 Rb4+ 20. Kb2 Rd3+ 21. Ka2 Hb2+ og mátar.

 

Keppni í landsliðsflokki hefst 9. maí

Ákveðið hefur verið að keppni í landsliðsflokki á Skákþingi Íslands fari fram í Hafnarfirði dagana 9. – 20. maí og verða keppendur tíu talsins, en ekki 12 eins og venja er. Jóhann Hjartarson hyggst ekki verja titil sinn en keppendalistinn lítur þannig út: 1. Héðinn Steingrímsson 2. Hannes Hlífar Stefánsson 3. Guðmundur Kjartansson 4. Þröstur Þórhallsson 5. Björn Þorfinnsson 6. Vignir Vatnar Stefánsson 7. Sigurbjörn Björnsson 8. Bárður Örn Birkisson og síðan er keppt um tvö sæti að auki í Áskorendaflokki Skákþings Íslands sem hefst þann 1. apríl nk.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 25. mars 2017

Skákþættir Morgunblaðsins

Magnús Carlsen mætir á Reykjavíkurskákmótið!

Heimsmeistarinn Magnus Carlsen mætir á GAMMA Reykjavíkurskákmótið. Magnús tekur ekki þátt að þessu sinni enda rekst mótið á GRENKE Chess Classic í Baden Baden í Þýskalandi sem fram fer 15.-22. apríl. Þátttaka Magnúsar þar þýðir að pabbi hans getur ekki heldur tekið þátt á Reykjavíkurskákmótinu.

Feðgarnir Magnús og Henrik ætla hins vegar að mæta til Reykjavíkur eftir mótið í Baden Baden og hlaða batterín. Náðst hefur samkomulag við Magnús að hann taki hér eitt klukkufjöltefli við 20 skákmenn auk þess sem hann mun árita bækur og vera með skákskýringar.

Áhugasamir skákmenn geta skráð til leiks í fjöltefið og gildir þar reglan fyrstur sækir fyrstur fær. Áhugasamir geta skráð sig til leiks í gula kassanum efst á Skák.is.  Fjölteflið verður haldið í höfuðstöðvum GAMMA mánudaginn 24. apríl og hefst kl. 11.

Áskorendaflokkur hefst í dag í Stúkunni

Áskorendaflokkur Íslandsmótsins í skák fer  1.-9. apríl nk. Teflt er í Breiðabliks-stúkunni í Kópavogi. Tefldar verða níu umferðir eftir svissneska kerfinu.

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki í ár sem fram fer á Hafnarfirði, 9.-20. maí nk.

Séu menn jafnir ræður stigaútreikningur.

Skráning

Þátttökugjöld eru 5.000 kr. Unglingar 15 ára og yngri (2000 og síðar) fá 50% afslátt. F3-félagar fá frítt í mótið.

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 15 mínútur eftir 40 leiki. 30 sekúnda viðbótartími eftir hvern leik.

Dagskrá: 

1. umferð, laugardagurinn, 1. apríl, kl. 13:00
2. umferð, sunnudagurinn, 2. apríl, kl. 13:00
3. umferð, mánudagurinn, 3. apríl, kl. 18:30
4. umferð, þriðjudagurinn, 4. apríl, kl. 18:30
5. umferð, miðvikudagurinn, 5. apríl, kl. 18:30
6. umferð, fimmtudagurinn, 6. apríl, kl. 18:30
7. umferð, föstudagurinn, 7. apríl, kl. 18:30
8. umferð, laugardagurinn, 8. apríl, kl. 13:00
9. umferð, sunnudagurinn, 9. apríl, kl. 13:00

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra.

Þegar skráðir keppendur

 

Fjórðungur Dalskóla með á skólamótinu

Öflug skákkennsla hefur verið í Dalskóla í Úlfarsárdal þennan vetur sem Bjarni Jóhannsson íþróttakennari skólans sinnir. Bjarni var á sínum tímum nemandi í Rimaskóla og var meðal fyrstu nemanda þar sem fengu skákkennslu fyrir tilstuðlan Helga Árnasonar skólastjóra um miðjan tíunda áratuginn. Skólinn tekur þátt í verkefni Skáksambandsins Skák eflir skóla - Kennari verður skákkennari og er Bjarni fulltrúi skólans.

Skólaskákmót skólans fór fram á dögunum. Mikil þátttaka var en fjórðungur skólans settist að tafli og voru nemendur á öllum skólastigum meðal þátttakenda. Sigurvegari varð ungur skákmaður að nafni Mikael Trausti sem hefur teflt í nokkur ár. Eins og áður segir var þátttaka afar góð en í kringum 50 nemendur tóku þátt. 

 

Páskamót Vinaskákfélagsins fer fram á mánudaginn

Páskaskákmót Vinaskákfélagsins verður haldið mánudaginn 3. apríl kl: 13 í Vin að Hverfisgötu 47. Tefldar verða 6 umferðir með 7 mínútur á skák. Mótið verður reiknað til hraðskákstiga.  

Í hléi verður boðið upp á hið frábæra og ógleymanlega kaffi og veitingar. Góð verðlaun verða í boði. (Kannski verða einhver páskaegg í verðlaun).

Þið getið skráð ykkur á mótið á gula kassanum efst á síðunni á skak.is

Allir velkomnir!!

Páskaeggjamót Hugins fer fram 10. apríl

Páskaeggjamót Hugins verður haldið í 25. sinn mánudaginn 10. apríl 2017, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráningarform er er á skak.is og eru væntanlegir þátttakendur beðnir um að skrá sig til að auðvelda undirbúning mótsins. Mótið verður reiknð til alþjóðlegra hraðskákstiga.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 2001 – 2004) og yngri flokki (fæddir 2005 og síðar). Sá sem er efstur í hverjum árgangi fær einnig páskaegg sem og efstu þrjár stúlkurnar á mótinu. Að auki verða tvö páskaegg dregin út. Enginn fær þó fleiri en eitt páskaegg. Lítið páskaegg verður svo fyrir þá sem ekki vinna til verðlauna.

Páskaeggjamótið verður haldið í félagsheimili Hugins í  Álfabakka 14a í Mjóddinni. Inngangur er milli Subway og Fröken Júlíu en salur félagsins er á þriðju hæð hússins.

Upplýsingar um þegar skráða keppendur má finna hér.

Páskaeggjafjörið er hafið hjá TR

Páskaeggjasyrpa Nóa Síríus og Taflfélags Reykjavíkur hófst síðastliðinn sunnudag og er óhætt að segja að kátt hafi verið í skákhöllinni. Hátt í 60 börn voru samankomin til þess að iðka skáklistina í von um að næla sér í nokkra vinninga og jafnvel eitt páskaegg að auki. Eins og gefur að skilja geta ekki allir hlotið verðlaun, en allir geta notið þess að glíma við skákgyðjuna í góðra vina hópi, ef hugurinn er þannig innstilltur. Mótshaldarar eru því fegnir að hafa ekki þurft að veita verðlaun fyrir afburða kátínu, brandarasmíðar, framúrskarandi söng eða snerpu í eltingaleik. Því erfitt hefði verið að skera úr um sigurvegara í þeim flokkum. Leikreglur skákmóta eru á hinn bóginn þeim kostum gæddar að auðvelt er að skera úr um sigurvegara; fjöldi vinninga er þægilegur mælikvarði að því leyti.

Í yngri flokki var mikil spenna á toppnum og margar stórskemmtilegar skákir tefldar. Líkt og gjarnan vill verða hjá yngstu iðkendunum þá skiptu skákirnar alloft um eigendur og stundum réðust úrslitin jafnvel á ólöglegum leik. Einn var sá skákmaður sem stóðst allar raunir og leysti öll verkefni sem fyrir hann voru lögð í skákunum sjö. Einar Tryggvi Petersen gerði sér lítið fyrir og vann allar sínar skákir í mótinu. Einar Tryggvi hefur verið iðinn við kolann að undanförnu og hafa skákþjálfarar TR tekið eftir stórstígum framförum hjá pilti. Í 2.sæti varð hinn reynslumikli Bjartur Þórisson með 5,5 vinning. Líkt og Einar Tryggvi þá hefur Bjartur verið sérlega duglegur að mæta á skákæfingar hjá TR undanfarin misseri. Þessir ungu og efnilegu piltar eru góður vitnisburður um að ástundun og framfarir haldast í hendur.

Fjórir upprennandi skákmeistarar röðuðu sér í þriðja sæti með 5 vinninga; Mikael Bjarki Hreiðarsson, Anna Katarina Thoroddsen, Jóhann Helgi Hreinsson og Soffía Berndsen. Í slíkum tilfellum er það tölvuforritið sem reiknar út hvaða skákmaður hafi orðið hlutskarpastur, byggt á andstæðingum hvers og eins. Mikael Bjarki hreppti 3.sætið að þessu sinni. Anna Katarina og Soffía Berndsen urðu efstar stúlkna í yngri flokki en Anna Katarina varð hærri á stigum.

Í eldri flokki var hörkukeppni um efstu sætin. Miklar sviptingar voru í skákum toppbaráttunnar er spennustigið náði hámarki undir lok mótsins. Í efstu sætin raðaði sér mikið keppnisfólk sem hefur sýnt stáltaugar í gegnum tíðina á mótum sem þessum. Svo fór að aðeins hálfur vinningur skildi að efstu tvö sætin. Hlutskarpastur varð Ísak Orri Karlsson með 6,5 vinning. Hann vann fyrstu fjórar skákir sínar en gerði svo jafntefli í 5.umferð gegn hinum síkáta Kristjáni Degi Jónssyni. Ísak Orri tryggði sér svo sigurinn í mótinu með því að vinna síðustu tvær skákir sínar. Í 2.sæti með 6 vinninga varð Batel Goitom Haile og vann hún alla andstæðinga sína að undanskyldum sigurvegaranum sem hún varð að játa sig sigraða gegn í 3.umferð. Í 3.-4.sæti urðu Gunnar Erik Guðmundsson og Karl Andersson Claesson, báðir með 5 vinninga. Gunnar Erik reyndist eilítið hærri á stigum og hreppti því 3.sætið. Batel varð efst stúlkna í eldri flokki, en næstar henni komu Freyja Birkisdóttir og Ásthildur Helgadóttir með 4,5 vinning.

Að loknu móti fór fram verðlaunaafhending og að henni lokinni var dregið í happdrætti. Það var mikil eftirvænting í salnum því happdrættisvinningurinn var bústið páskaegg númer sex frá Nóa Síríus. Sá heppni að þessu sinni var Arnar Páll Halldórsson. Sá lukkunnar pamfíll mun ekki þjást af súkkulaðiskorti um Páskana.

Nánari upplýsingar um úrslit og lokastöðu mótsins má nálgast á chess-results: Yngri flokkur – Eldri flokkur.

Mót númer tvö í Páskaeggjasyrpunni verður haldið næstkomandi sunnudag og fer skráning fram í skráningarformi sem nálgast má hér fyrir neðan. Einnig er hægt að finna skráningarblaðið í gula kassanum á skak.is. Mótið á sunnudag hefst klukkan 13.

Taflfélag Reykjavíkur þakkar öllum þeim börnum sem lögðu leið sína í Faxafenið og gerðu Páskaeggjaspyrpuna að þeirri skákveislu sem raunin varð. Sjáumst næsta sunnudag!

Myndskreytta frásögn má finna á heimasíðu TR.

Skráningarform

Undanrásir Reykjavík Open Barna-Blitz að hefjast

Eins og frá árinu 2009 stendur Skákakademía Reykjavíkur í samstarfi við taflfélög borgarinnar fyrir Reykjavík Open Barna-Blitz sem er hraðskákmót fyrir krakka í sjöunda bekk og yngri, það er fædd 2004 og síðar.

Taflfélag Reykjavíkur, Huginn, Skákdeild Fjölnis og Víkingaklúbburinn eru öll með undanrásir þar sem tvö sæti eru í boði í úrslitunum sem tefld verða sunnudaginn 23. apríl.

Tímasetningar undanrásanna liggja fyrir og eru eftirtaldar: 

Huginn: Mánudaginn 3. apríl í Mjóddinni, hefst 17:15.

Víkingaklúbburinn: Miðvikudaginn 5. apríl í Víkinni, 17:15. 

Skákdeild Fjölnis: Miðvikudaginn 5. apríl í Rimaskóla, hefst 16:30.

Taflfélag Reykjavíkur: Laugardaginn 8. apríl í Taflfélagi Reykjavíkur að Faxafeni 12, hefst 14:00.