GAMMA Reykjavíkurskákmótið hefst á miðvikudag - Giri teflir við fjármálaráðherra á þriðjudaginn

Upphitun fyrir Reykjavíkurmótsveislan hefst í höfuðstöðvum GAMMA, þriðjudaginn 18. apríl nk. kl. 13:00. Þá teflir ofurstórmeistarinn Anish Giri, helsta stjarna Reykjavíkurskákmótsins, klukkufjöltefli við 10-12 skákmenn. Meðal andstæðinga hans þar verður fjármálaráðherrann Benedikt Jóhannesson en ráðherrann var um skeið meðal efnilegustu skákmanna landsins áður en önnur hugðarefni tóku við. Friðrik Ólafsson, fyrrverandi forseti FIDE, mun vera viðstaddur og leika fyrsta leik fjölteflisins. Upphitunin heldur áfram kl. 18 þegar opnunarpartý mótsins verður haldin í Smurstöðunni í Hörpu. Þangað eru allir keppendur og skákáhugamenn velkomnir. 

Andstæðingar Giri í fjölteflinu verða engin lömb að leika sér við. Elstur þeirra verður Gunnar Gunnarsson, 83 ára, fyrrum Íslandsmeistari í skák (árið 1966) og fótbolta með Val (árið 1956). Þá munu landsliðskonurnar Guðlaugu Þorsteinsdóttur og Nansý Davíðsdóttur meðal annars etja kappi við Giri. 

Fjölteflið verður forsmekkurinn að sjálfu Alþjóðlega Reykjavíkurskákmótinu sem fram fer í Hörpu 19.-27. apríl. Mótið verður hið  sterkasta og fjölmennasta í 53 ára sögu þess. 

Alls eru um 280 skákmenn skráðir til leiks frá um 45 löndum. Þar af eru 35 stórmeistarar og hafa þeir aldrei verið fleiri. 

Ofurstórmeistararnir 

Ofurstórmeistarar eru þeir taldir sem hafa 2700 skákstig eða meira. Áðurnefndur Anish Giri, sem hefur 2771 skákstig, er einn besti skákmaður heims og sá stigahæsti sem nokkurn tímann hefur teflt á Reykjavíkurskákmóti í hálfrar aldar sögu mótanna. 

Georgíumaðurinn Baadur Jobava er einn frumlegasti skákmaður heims og vekur taflmennska hans jafnan athygli.

Dmitry Andreikin er þekktur fyrir að tefla ávallt til sigurs og vakti kraftmikil taflmennska hans í mótinu í fyrra mikla athygli. 

Goðsagnir

 

Lettinn Alexei Shirov er einn allra skemmtilegast skákmaður heims, þekktur fyrir sinn leiftrandi stíl,  og hefur hefur margoft verið líkt landa sinn, Mikhail Tal, sem sigraði á fyrsta Reykjavíkurskákmótinu árið 1964. Shirov sigraði á Reykjavíkurskákmótinu 1992 ásamt Jóhanni Hjartarsyni og hefur síðan haldið sér í hópi bestu skákmanna heims. Hann er fjórði í stigaröð keppenda.

 

Gata Kamsky tefldi síðast á Reykjavíkurskákmótinu 1990. Þá var hann 15 ára að aldri og þótti undrabarn. Kamsky komst næstum því á topp skákheimsins því hann tefldi heimsmeistaraeinvígi við Karpov sem hann tapaði.

 

Eugene Torre hefur löngum verið besti skákmaður Filippseyinga. Torre er sá skákmaður, sem teflt hefur á flestum Ólympíuskákmótum allra skákmanna í skáksögunni, eða alls 22 sinnum. Á Ólympíuskákmótinu í Bakú í fyrra hlaut hann 10 vinninga í 11 skákum og hefur sjaldan verið í betra formi.   

Óvæntir sigurvegarar tveggja síðustu ára Abijeet Gupta og Erwin L´Ami eru svo að sjálfsögðu meðal keppenda.

Skákdrottningar 

 

Indverska skákdrottningin Tania Sadchev stal senunni í fyrra með frábærri frammistöðu og geislandi framkomu. Hún er fastagestur hér. Landskona hennar Harika Dronavalli tekur einnig þátt en hún er meðal bestu skákkvenna heims.

 

Meðal annarra gesta má nefna hina mongólsku Tuvshintugs Batchimeg en hún verður þar með fyrsti skákmaðurinn frá Mongolíu sem teflir á Reykjavíkurskákmótinu.

 

 

Einnig má nefna hina írönsku Dorsa Derakhshani sem hefur vakið athygli fyrir það að neita að tefla með slæðu og hefur gerð brotræk úr landsliði Írans fyrir þá sök.

 

 

Undrabörnin

Það hefur ávallt verið lögð mikil áhersla á að fá hingað til landsins undrabörn. Í áranna rás hafa t.d. Magnus Carlsen, Gata Kamsky, Fabiano Caruana og Hikaru Nakamura,  sótt landið sem kornungir skákmenn.

 

Á mótinu nú er vert að benda á tvo unga indverska drengi sem báðir eru taldir geta orðið meðal bestu skákmanna heims - jafnvel heimsmeistarar. Praggnanandhaa Rameshbabu er annar þeirra. Sá er aðeins 11 ára og sá yngsti í heimi sem náð hefur titli alþjóðlegs meistara.

 

Hinn er Nihal Sarin, 12 ára, og er líka alþjóðlegur meistari. Sarin þessi lagði Helga Ólafsson t.d. nýlega að velli í hraðskák í Moskvu.  Þeir eru báðir talda hafa möguleika á því að verða yngsti stórmeistari sögunnar. Nýlega grein má lesa um kappann í Chessbase. Hann er þessa stundina að tefla í Fagranesi í Noregi og er að gera þar mjög góða hluti.  

Heimavarnarliðið 

Nærri 100 íslenskir skákmenn taka þátt í mótinu nú og þar á meðal þrír stórmeistarar. Stigahæstur þeirra er Hannes Hlífar Stefánsson, sigursælasti skákmaður í sögu Reykjavíkurskákmótanna. Hannes hefur sigrað fimm sinnum á mótinu.

Það sætir tíðindum að Jóhann Hjartarson tekur nú þátt í mótinu nú í fyrsta skipti í 21 ár og er það mikið fagnaðarefni.  Sá þriðji er svo Þröstur Þórhallsson.  Sjö íslenskar skákkonur taka þátt. Fyrir þeim fer Lenka Ptáncíková, stórmeistari kvenna og margfaldur Íslandsmeistari.

 

Alþjóðulegu meistararnir Guðmundur Kjartansson, Bragi og Björn Þorfinnssynir taka þátt og það gerir einnig Vignir Vatnar Stefánsson, okkar efnilegasti skákmaður. 

Íslenska heimavarnarliðið er skemmtilegt blanda af atvinnumönnum, áhugamönnum, eldri skákmönnum og ungum ljónum sem eru að stíga sín fyrstu skref. Akureyringar fjölmenna á Reykjavíkurskákmótið nú og er það gleðilegt og vitnar um skákgrósku norðan heiða. 

Færeyingar fjölmennir 

Um 180 erlendir skákmenn taka þátt í mótinu og hafa þeir aldrei verið fleiri. Flestir þeirra koma frá Bandaríkjunum, Indlandi og Kanada.  Góð þátttaka Færeyinga vekur athygli en þeir eru 12 talsins. Fyrir þeim hópi fer Helgi Dam Ziska, fyrsti stórmeistari okkar góðu frændþjóðar. 

Ekki bara skákmót

 

Reykjavíkurskákmótið er miklu frekar skákhátíð  en skákmót. Efnt er til alls konar sérviðburða meðan mótið fer fram. Áður hefur verið minnst á fjöltefli Anish Giri. Meðal annarra sérviðburða má nefna: 

Opnunarpartý, fyrirlestur um skákþjálfun, fyrirlestur um það sem gerist bakvið tjöldin í heimsmeistaraeinvígum, hraðskákmót, barnahraðskákmót, spurningkeppni (pub quiz), fótbolta, gullna hringinn með viðkomu við leiði Fischers og kotrumót. 

Þesir viðburðir eru opnir gestum og gangandi. 

Umferðir hefjast yfirleitt kl. 15. Boðið verður upp á skákskýringar alla daga í Hörpu og hefjast þær um tveimur tímum eftir upphaf umferðar eða um kl. 17. Um skákskýringar sjá okkar fremstu skákmenn af þeim sem ekki taka þátt í mótinu að þessu sinni.

Beinar útsendingar á netinu verða í umsjón Simon William og Fionu Antoni-Steil. 

Ítarlegur fréttaflutningur frá mótinu verður alla daga á www.skak.is.

Heimasíða mótsins

Páskamót SA fer fram á mánudaginn

Sælir félagar í lok páskaveislunnar mánudaginn 17 apríl kl 13:00 bjóðum við upp á Skákveislu. Páskahraðskáksmótið. Nú ríður á að menn láti sig ekki vanta, heldur mæti hressir og kátir eftir páskeggjaátið og brenni nokkrum kaloríum við skákborðið. Það mættu 17 keppendur á Bikarmótið og nú stendur til að slá þá tölu út. Mótið er opið öllum sem kunna mannganginn.

Sjá nánar á heimasíðu SA.

Áskell tapaði fæstum á Bikarmótinu

Þegar Bikarmótinu var fram haldið í dag, föstudaginn langa, kom fram tillaga um að lengja skákirnar. Skákstjóri lagðist þó gegn því og sættust keppendur að tefla enn 15 mínútna skákir, þótt dagurinn væri langur. Eins og vera ber fækkaði keppendum smám saman þegar á leið og eftir níundu umferð voru einungis þrír eftir. Ólafur Kristjánsson gekk svo af skaptinu eftir tap fyrir Jóni Kristni og settust þá að tafli Jón og Áskell, einir eftir. Var Jón með tvö töp (fyrir Sigurðum A og E), en Áskell með eitt og hálft (fyrir Jóni sjálfum og hálft gegn Eymundi). Skákina vann Jón eftir nokkrar sviptingar og nægði nú jafntefli í síðustu skák mótsins. Hann fékk þó snemma lakara tafl og mátti að lokum játa sig sigraðan. Þar með var hann kominn í þrjú töp, en Áskell hékk í tveimur og hálfu og fær nafn sitt á bikarinn að launum. Lauk mótinu í tólftu umferð og þótti á allan máta vel heppnað. Þó má vera að reglum verði breytt lítillega til að minnka hættuna á að sami keppandi sitji yfir fleiri en eina umferð í röð, eins og gerðist nú í dag. 

Sjá nánar á heimasíðu SA.

Bráðfjörugt Bikarmót SA

Hið árlega Bikarmót Skákfélagsins hófst í gær, skírdag. 17 keppendur mættu til leiks. Mótið er útsláttarkeppni og falla menn út eftir þrjú töp. Nokkuð er farið að saxast á keppendahópinn, en þó voru enn tíu eftir þegar upp var staðið eftir sex umferðir í gær. Tefldar eru 15 mínútna skákir.

Mótinu verður framhaldið í dag, föstudaginn langa kl. 13. Í sjöundu umferð eigast þessi við (tapaðar skákir í sviga):

• Benedikt Briem(2,5)-Ólafur Kristjánsson(2)
• Óskar Long(2,5)-Áskell Örn Kárason(1,5)
• Eymundur Eymundsson(1,5)-Sigurður Arnarson(2)
• Ulker Gasanova(2,5)-Jón Kristinn Þorgeirsson(1)
• Haki Jóhannesson(2,5)-Haraldur Haraldsson(1,5)

Fyrirkomulag mótsins er óvenjulegt, með útsláttarfyrirkomulagi eins og lýst er hér að framan. Dregið er í hverja umferð og geta sömu keppendur því mæst oft og þessvegna haft sama litinn margar skákir í röð. Það heyrði til sérstakra tíðinda í gær að þeir Óskar Long Einarsson og Stephan Briem drógust saman í fjórum fyrstu umferðunum. Óskar vann þrjár skákir af fjórum, þannig að Stephan fékk ekki fleiri andstæðina á mótunu. Líkindurekingssérfræðingur Skákfélagsins telur að líkurnar á að þetta gerist hafi verið a.mk. 1:70000. Fleiri keppendur rákust ítrekað hver á annan, en allt setti þetta skemmtilegan brag á mótið, sem væntnalega lýkur á morgun. 

Sjá nánar á heimasíðu SA.

Helgi Áss er hraðskákmeistari öðlinga 2017

Stórmeistarinn Helgi Áss Grétarsson bar sigur úr býtum á Hraðskákmóti öðlinga sem fór fram í gærkveld en hann lauk keppni með fullt hús vinninga í skákunum sjö. Helgi er því hraðskákmeistari öðlinga á jómfrúarári sínu sem háttvirtur öðlingur. Fide-meistarinn Ingvar Þór Jóhannesson koma annar í mark með 5,5 vinning en Ingvar er sömuleiðis á sínu fyrsta ári í Öðlingamótunum. Jafnir í 3.-5. sæti með 4,5 vinning urðu Bragi Halldórsson, Arnaldur Loftsson og Þór Valtýsson þar sem Bragi hlaut 3. sætið að loknum stigaútreikningi.

Að móti loknu fór einnig fram verðlaunaafhending fyrir skákmót öðlinga sem lauk á dögunum. Þar urðu efstir og jafnir með 6 vinninga Björgvin Víglundsson og Ingvar Þór þar sem Björgvin varð ofar á stigum. Þorvarður F. Ólafsson varð þriðji með 5,5 vinning. Björgvin er aukinheldur Íslandsmeistari skákmanna 50 ára og eldri en öðlingamótið var einnig Íslandsmót þess aldurshóps í ár.

 

• Chess-Results (Öðlingamót)
• Chess-Results (Hraðskákmót)
• Umfjöllun um Skákmót öðlinga

Nánar á heimasíðu TR.

Óskar Víkingur sigraði á páskaeggjamóti Hugins

Páskaeggjamót Hugins í Mjódd fór fram í 25 sinn síðastliðinn mánudag 10.apríl. Keppendur voru 49 sem gerir mótið eitt af þeim best sóttu. Að þessu sinni var umhugsunartíminn 5 mínútur + 2 sekúndur á hvern leik í stað 7 mínútna umhugsunartíma eins og verið hefur hingað til en umferðirnar voru sjö eins og áður.

Það var djús og vatn fyrir keppendur en heitt á könnunni fyrir foreldra og var glatt á hjalla allan tímann, Eins og og oft áður fengust afgerandi úrslit því í þetta sinn sigraði Óskar Víkingur Davíðsson örugglega á mótinu með því að vinna alla sjö andstæðinga sína nokkuð örugglega. Þótt Óskar hafi áður unnið til verðlauna á mótinu er þetta hans fyrsti sigur og aldrei að vita nema þeir verði fleiri síðar. Það var jöfn barátta um næstu sæti og þar gerðu margir tilkall til verðlauna en þegar upp var staðið var Gunnar Erik Guðmundsson einn í öðru sæti með 6v. Hann tefldi vel á mótinu og tapaði aðeins fyrir Óskari. Þar sem Gunnar Erik var sá eini þeirra sem var með 5v fyrir lokaumferðina, sem náði sér í vinning í síðustu umferðinni voru margir jafnir með 5v í lokin eða samtals 10 skákmenn. Af þeim var Magnús Hjaltason efstur á stigum og hlaut hann þriðja sætið. 

Veitt voru verðlaun í fjórum flokkum. Þremur aldursflokkum. Þrír efstu keppendur komu úr flokki þeirra sem fæddir voru 2005 – 2008 en það voru eins og fram hefur komið Óskar Víkingur Davíðsson, Gunnar Erik Guðmundsson og Magnús Hjaltason. Í elsta aldursflokkum þeirra sem fædd voru 2001-2004 voru efst  þau Karl Anderson Claesson, Rakel Tinna Gunnarsdóttir og Steindór Sólon Arnarson.

Í flokki þeirra sem fædd voru 2009 og síðar hlutu verðlaun þeir Einar Dagur Brynjarsson, Egill Breki Pálsson og Gunnar Freyr Valsson.

Stúlknaverðlaun fengu Iðunn Helgadóttir, Batel Goitom Haile og Ylfa Ýr Welding Hákonardóttir. Þær tefldu á efstu borðum allt mótið og stóðu sig mjög vel og gáfu strákunum ekkert eftir.

Auk þess fékk efsti keppandi í hverjum aldursflokki páskaegg í verðlaun. Ef sá efsti hafði unnið páskaegg í aðalverðlaun fékk sá næsti í aldursflokknum páskaeggið.

Í lokin voru sjö páskaegg dregin út og duttu þar í lukkupottinn þau Árni Ólafsson, Kiril Alexander Igorson, Alfreð Dossing, Arnór Gunnlaugsson, Adam Omarsson, Víkingur Eldon Arnarson og Bergþór Helga Gunnarsdóttir. Þau sem ekki hlutu verðlaun á mótinu voru svo leyst út með páskaeggi nr. 3 þannig að allir fóru ánægðir heim. Mótsstjórar voru Alec Elías Sigurðarson, Erla Hlín Hjálmarsdóttir og Vigfús Ó. Vigfússon.

Eftirtaldir hlutu verðlaun á páskaeggjamótinu:

Flokkur 2001-2004:

1. Karl Anderson Claesson, 4v
2. Rakel Tinna Gunnarsdóttir, 3,5v
3. Steindór Sólon Arnarson, 3v

Flokkur 2005-2008:

1. Óskar Víkingur Davíðsson, 7v
2. Gunnar Erik Guðmundsson, 6v
3. Magnús Hjaltason, 5v

Flokkur 2009 og yngri

1. Einar Dagur Brynjarsson, 4v
2. Egill Breki Pálsson, 4v
3. Gunnar Freyr Valsson, 4v

Stúlkur:

1. Iðunn Helgadóttir, 5v
2. Batel Goitom Haile, 5v
3. Ylfa Ýr Welding Hákonardótttir, 4v

Árgangaverðlaun:

• Árgangur 2011:  Jósef Omarsson
• Árgangur 2010:  Leon Bjartur Sólar Arngrímsson
• Árgangur 2009:  Bjartur Þórisson (Einar Dagur Brynjarsson)
• Árgangur 2008:  Soffía Arndís Berndsen
• Árgangur 2007:  Rayan Sharifa (Gunnar Erik Guðmundsson)
• Árgangur 2006:  Stefán Orri Davíðsson
• Árgangur 2005:  Anton Breki Óskarsson (Óskar Víkingur Davíðsson)
• Árgangur 2004:  (Steindór Sólon Arnarson)
• Árgangur 2003:  Tinna Chloé Kjartansdóttir (Rakel Tinna Gunnarsdóttir)
• Árgangur 2002:  Sigurður Arnar Garðarsson
• Árgangur 2001:  (Karl Anderson Claesson) 

Gert verður hlé á barna- og unglingaæfingum fram yfir páskahátíðina. Næsta æfing verður mánudaginn 24. apríl og hefst kl. 17.15. Æfingarnar eru í félagsheimili Hugins í Álfabakka 14a í Mjóddinni. Gengið er inn milli Subway og Fröken Júlíu og salurinn er á þriðju hæð.

Nánar á heimasíðu Hugins.

Páskamót KR - Dagur Ragnarsson vann með fullu húsi

Hinn ungi og örtvaxandi skákmeistari Dagur Ragnarsson gerði sér lítið fyrir og vann Stóra-Páskamót KR með fullu húsi eða 13 vinningum af 13 mögulegum. Vart er hægt að gera betur og þar með skaut hann 22 öðrum þátttakendum ref fyrir rass með  sannfærandi hætti. Tómas Björnsson varð annar  með 10.5 v.; Gunnar Freyr Rúnarsson þriðji  með10 v. og Gauti Páll Jónsson fjórði með 9.5 v. en eftir það fór að teygjast úr lestinni.

Svava Þorsteinsdóttir varð efst kvenna en Björgvin Kristbergsson rak lestina og fékk páskaegg í sárabætur. Fleiri voru leystir út með þeim hætti eða duttu í lukkupottinn. Skákdeildin þakkar gestum og félögum sínum þátttökuna. Teflt er í KR ölll mánudagskvöld kl. 19.30 og á laugardagsmorgnum kl. 10.30. Veri gestir velkomnir.

Meðf. er myndskeið frá mótinu frá hendi GRK

https://youtu.be/uSPIHPCqZX8

Hraðskákmót öðlinga fer fram í kvöld

Hraðskákmót öðlinga fer fram miðvikudaginn 12. apríl í félagsheimili TR að Faxafeni 12. Mótið hefst kl. 19.30 og er opið fyrir alla 40 ára (á árinu) og eldri. Tefldar verða 7 umferðir með umhugsunartímanum 4 mín + 2 sek á leik (umferðum kann að vera fjölgað í níu ef næg þátttaka verður).  Í lok mótsins fer fram verðlaunaafhending fyrir Hraðskákmótið sem og Skákmót öðlinga sem lauk fyrir skemmstu.

Þátttökugjald er kr. 1.000 og er í því innifalið ilmandi nýtt kaffi. Greiða skal með reiðufé við upphaf móts.

Mótið verður reiknað til alþjóðlegra (Fide) hraðskákstiga.

Núverandi Hraðskákmeistari öðlinga er Róbert Lagerman.

Skákmenn 40+ eru hvattir til að fjölmenna!

Skráning fer fram hér að neðan.

Skráningarform

Skráðir keppendur

Kirsan Ilyumzhinov enn forseti FIDE en nánast valdalaus

Stjórnarfundur var haldinn hjá FIDE í Aþenu í gær. Niðurstaða þess fundar var sú að Kirsan Ilyumzhinov heldur stöðu sinni sem forseti FIDE. Völd hans hafa hins vegar enn verið minnkuð og eru í raun og veru nú engin. Öll raunverulegu völd eru í hendi varaforsetans Georgios Makropoulos. 

Niðurstöðu fundar FIDE má finna á heimasíðu sambandsins.

Staða Kirsan er ekki góð. Orðrómur er um að hann vilji bjóða sig aftur fram en með á meðan hann lista Bandaríkjamanna yfir óæskilega menn vegna tenglsa hans við Sýrland er staða hans vonlaus. 

Sögur segja að möguleika munu Karpov og Kasparov takast á um forsetastól FIDE. Hér áður fyrr hafði Kasparov yfirleitt ávallt betur í einvígum þeirra en þau einvígi fóru fram við skákborðið. 

Ítarlega umfjöllun um stöðuna í FIDE má finna á Chess.com.

Wesley So og Sabina Foisor skákmeistarar Bandaríkjanna

Bandaríska meistaramótinu í skák lauk í gær með sigri Wesley So. Hann fyrsti meistaratitilinn en Wesley So er fæddur í Filippseyjum en tók upp bandarískan ríkisborgararétt fyrir nokkrum árum. Wesley So varð ásamt á mótinu ásamt Alexander Onichuk (2667) en þeir hlutu 7 vinninga í 11 skákum.  Frammistaða þess síðarnefnda vekur nokkra athygli enda sló hann þarna við Fabiano Caurana og Nikaru Nikamura sem urðu í 3.-5. sæti með 6½ vinning.

Bandaríkjamenn nota sama kerfi og við Íslendingar og láta tefla til úrslita með styttri tímamörkum séu menn jafnir í efsta sæti. Þar hafði So betur í tveimur atskákum 1½-½ og því skákmeistari Bandaríkjamanna í fyrsta skipti.

Lokastaðan (inniheldur aukakeppni)

 

 

 

 

 

 

 

 

 

 

 

Ekki þurfti aukakeppni í kvennaflokki. Þar vann Sabina Foisor sigur. Sabina þessi tók þátt í Reykjavíkurskákmótinu árið 2015.

 

 

 

 

 

 

 

 

 

Nánar um mótið á Chess24.