Páskaeggjasyrpan: Háspenna og dramatík á þriðja mótinu

Þriðja og síðasta mótið í Páskaeggjasyrpu Nóa Síríus og Taflfélags Reykjavíkur fór fram í gær og var það fjölmennasta mótið til þessa. Toppbarátta beggja flokka var æsispennandi og réðust úrslit ekki fyrr en í lokaumferðinni. Einnig skapaðist mikil spenna yfir því hver myndi hljóta flesta vinninga samanlagt í mótunum þremur. Sú spenna komst þó ekki í hálfkvisti við spennuna sem myndaðist vegna allra páskaeggjanna sem biðu í gulu kössunum á kantinum eftir að komast í hendur verðandi eigenda sinna. Spurningum um stærð eggjanna, uppruna og innihald rigndi yfir skákstjórana svo minnti um tíma á hraðaspurningar í Gettu Betur.

Í yngri flokki hóf Anna Katarina Thoroddsen mótið af miklum krafti og gerði sér lítið fyrir og vann fyrstu sex skákir sínar. Hennar helsti keppinautur, Einar Tryggvi Petersen, lenti í vandræðum í 4.umferð þar sem hann varð að játa sig sigraðan gegn Einari Degi Brynjarssyni. Einar Tryggvi hafði halað inn 5 vinninga þegar hann mætti taplausri Önnu Katarinu í síðustu umferð. Þar hafði Einar Tryggvi betur og náði þar með Önnu Katarinu að vinningum og skaust upp fyrir hana á stigum. Einar Tryggvi tryggði sér því sigur í mótinu og Anna Katarina varð í 2.sæti. Í 3.sæti lenti hinn ungi og efnilegi Leon Bjartur Sólar Arngrímsson en hann nældi sér í 5 vinninga og tapaði einungis fyrir Einari Tryggva og Önnu Katarinu. Jöfn honum að vinningum voru Einar Dagur Brynjarsson, Soffía Berndsen, Bjartur Þórisson og Katrín María Jónsdóttir, en öll voru þau lægri en Leon Bjartur á stigum. Stúlknaverðlaunin komu í hlut Soffíu Berndsen.

Katarina og Bjartur Þórisson voru í toppbaráttu allra mótanna þriggja og þau röðuðu sér í þrjú efstu sætin í keppninni um samanlagðan vinningafjölda. Einar Tryggvi varð hlutskarpastur með 19 vinninga, Anna Katarina hlaut 17 vinninga og Bjartur Þórisson varð þriðji með 16,5 vinning. Stúlknaverðlaunin komu í hlut Soffíu Berndsen en hún fékk alls 14 vinninga í mótunum þremur.

Í eldri flokki var ekki með nokkru móti hægt að sjá fyrir efstu sætin fyrr en síðasta klukkan hafði verið stöðvuð. Benedikt Þórisson, sem daginn áður hafði tryggt sér sæti í úrslitum í Barna Blitz hraðskákmótinu, hélt áfram að ná góðum úrslitum og vann meðal annarra Ísak Orra Karlsson og Örn Alexandersson. Benedikt var efstur ásamt Gunnari Erik Guðmundssyni fyrir síðustu umferð þar sem þeir mættust í úrslitaviðureign. Þar hafði Gunnar Erik betur og tryggði hann sér því sigur í mótinu með 6 vinninga í 7 skákum. Gunnar Erik fór taplaus í gegnum mótið og leyfði aðeins tvö jafntefli, gegn Benedikt Briem og Erni Alexanderssyni. Í 2.sæti varð Örn Alexandersson með 5,5 vinning og í 3.sæti, einnig með 5,5 vinning, var Batel Goitom Haile. Benedikt Þórisson hafnaði í 4.sæti með 5 vinninga. Jafnir honum að vinningum, en lægri á stigum, voru þeir Karl Andersson Claesson og Gabríel Sær Bjarnþórsson. Stúlknaverðlaunin komu í hlut Ásthildar Helgadóttur en hún lauk tafli með 3,5 vinning.

Flesta samanlagða vinninga í eldri flokki í mótunum þremur fékk Batel Goitom Haile, alls 17,5 vinningur. Í 2.sæti varð Gunnar Erik Guðmundsson með 16 vinninga. Þriðji varð Árni Ólafsson með 14 vinninga. Stúlknaverðlaunin komu í hlut Iðunnar Helgadóttur sem halaði inn 10 vinninga í mótunum þremur.

Lukkan var með Guðrúnu Fanneyju Briem í dag er hún var dregin út í happdrættinu og hlaut hún að launum páskaegg nr.6.

Taflfélag Reykjavíkur þakkar öllum þeim fjölmörgu börnum sem lögðu leið sína í Faxafenið og tóku þátt í að gera Páskaeggjasyrpuna árið 2017 að þeim stórskemmtilega og eftirminnilega viðburði sem raunin varð. Nói Síríus fær jafnframt miklar og góðar þakkir fyrir ánægjulegt samstarf.

Sjáumst að ári liðnu! 

Nánari úrslit og stöðu í yngri flokki má nálgast hér.

Nánari úrslit og stöðu í eldri flokki má nálgast hér.

Nánar á heimasíðu TR.

Stóra páskaeggjamót KR fer fram í kvöld

Það er jafnan hart barist á skákmótunum í KR- heimilinu hvort heldur er á mánudagskvöldum eða árdegismótunum á laugardagsmorgnum.  Það sem af er ári hafa margir fræknir kappar fagnað þar glæstum sigrum eða hafnað í öðru sæti ella eða enn neðar. Meðal sigursælla keppenda undanfarið hafa verið Magnús Sigurjónsson, Jón G. Briem, Guðfinnur Kjartansson, Stefán Þormar, Gunnar Gunnarsson, Bjarni Hjartarson  o.fl. að ógleymdum Björgvini Víglundssyni, tvöföldum Íslandsmeistara (bæði 50+ og 65 ára og eldri) sem gerði sér lítið fyrir og vann kappteflið um Friðrikskónginn með fullu húsi fyrr í vetur. 

Á mánudagskvöldið kemur verður svo haldið þar hið árlega Kapp- og Happ páskaeggjamót, þar sem 3 risa páskaegg frá sælgætisgerðinni SAMBÓ verða í vinning auk fjölda annarra girnilegra nammieggja frá GÓU. Bæði sigurvegarar í einstökum aldursflokkum karla og kvenna geta gert sér góðar vonir um að fara ekki tómhentir heim og eins þeir sem detta óvænt í lukkupottinn í mótslok þegar darraðardansinum lýkur.  

Um er að ræða 7 mínútna 11–13 umferða alvöru hraðskákmót, eftir keppendafjölda. Ýtt verður á klukkurnar kl. 19.30 og allir sem taflmanni geta valdið hjartanlega velkomnir til þátttöku.

Páskaeggjamót Hugins fer fram í kvöld

Páskaeggjamót Hugins verður haldið í 25. sinn mánudaginn 10. apríl 2017, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráningarform er er á skak.is og eru væntanlegir þátttakendur beðnir um að skrá sig til að auðvelda undirbúning mótsins. Mótið verður reiknð til alþjóðlegra hraðskákstiga.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 2001 – 2004) og yngri flokki (fæddir 2005 og síðar). Sá sem er efstur í hverjum árgangi fær einnig páskaegg sem og efstu þrjár stúlkurnar á mótinu. Að auki verða tvö páskaegg dregin út. Enginn fær þó fleiri en eitt páskaegg. Lítið páskaegg verður svo fyrir þá sem ekki vinna til verðlauna.

Páskaeggjamótið verður haldið í félagsheimili Hugins í  Álfabakka 14a í Mjóddinni. Inngangur er milli Subway og Fröken Júlíu en salur félagsins er á þriðju hæð hússins.

Upplýsingar um þegar skráða keppendur má finna hér.

Guðmundur öruggur sigurvegari þrátt fyrir tap - Dagur fylgir Gumma í landsliðsflokk

Guðmundur Gíslason (2314) vann öruggan sigur í áskorendaflokki Íslandsmótsins í skák sem lauk í dag í Stúkunni í Kópavogi. Guðmundur tapaði fyrir félaga sínum Halldóri Grétari Einarssyni (2257) en það kom að lítilli sök. Guðmundur hlaut 7½ vinning, vinningi meira en næsti maður. Dagur Ragnarsson (2316). Fjölnismaðurinn vann Lenku Ptácníková (2242) og fylgir Gumma í landsliðsflokk sem fram fer í Hafnarfirði 10.-20. maí nk. Jóhann Ingvason (2121), sigurvegarinn frá í fyrra, varð þriðji með 6 vinninga.

Skákstjóri mótsins var Ólafur S. Ásgrímsson. Halldór Grétar Einarsson, formaður Breiðabliks, aðstoðaði við mótið og átti heiðurinn af beinum útsendingum. 

Lokastöðu mótsins má nálgast á Chess-Results. 

• Heimasíða SÍ
• Beinar útsendingar
• Vefútsending
• Chess-Results

Barna Blitz: Róbert Luu og Benedikt Þórisson komnir áfram

Hún var óvenjuleg Laugardagsæfingin í gær því hún var jafnframt undankeppni í svokölluðu Barna Blitz sem haldið er samhliða Reykjavíkurskákmótinu. Tvö sæti voru í boði fyrir þau börn sem eru fædd árið 2004 eða síðar. Spennan var því enn meiri en venjulega á þessum vel sóttu æfingum.

Fyrirfram var búist við sterkari þátttakendum en yfirleitt mæta á þessar æfingar. Róbert Luu var sá sterkasti að þessu sinni en Róbert stundaði Laugardagsæfinguna grimmt er hann tók sín fyrstu skref í skáklistinni. Róbert hefur síðustu ár náð langt í Barna Blitz keppninni og var því til alls líklegur, enda langstigahæstur keppenda.

Svo fór að Róbert vann mótið með 6 vinninga í 7 skákum. Hann varð þó að sætta sig við tap gegn Benedikt Þórissyni er hann uggði ekki að sér í vörninni og gleymdi að lofta út fyrir kónginn. Benedikt hefur verið á mikilli siglingu að undanförnu og þessi sigur tryggði honum 2.sætið með 5,5 vinning. Benedikt fylgir því Róberti í úrslit Barna Blitz sem fram fer laugardaginn 22.apríl.

Skákstjóri var Gauti Páll Jónsson.

Nánar á heimasíðu TR.

Aðalfundur Vinaskákfélagsins fer fram 4. maí

Aðalfundur Vinaskákfélagsins verður haldinn 4 maí 2017 í Vin, Hverfisgötu 47, 101 Reykjavík klukkan 19:30. 

Dagskrá aðalfundar er sem hér segir:

1. Forseti setur fundinn.
2. Kosning fundarstjóra.
3. Skýrsla stjórnar lögð fram.
4. Reikningar lagðir fram til samþykktar.

Kaffi hlé!

5. Lagabreytingar.
6. Kosning stjórnar.
7. Önnur mál. 

Stjórnin.

 

 

Þriðja og síðasta mót Páskaeggjasyrpunnar hefst kl.13 í dag

Þriðja og síðasta mót Páskaeggjasyrpu Nóa Síríus og Taflfélags Reykjavíkur verður haldið í dag, sunnudaginn 9.apríl. Taflið hefst klukkan 13 og er áætlað að því ljúki um klukkan 15:45.

Keppt verður í tveimur flokkum, 1-3.bekk (og yngri) og 4-10.bekk. Sjö umferðir verða tefldar með 5 mínútna umhugsunartíma á mann og bætast 3 sekúndur við tímann eftir hvern leik (5+3). Hraðskákstig verða reiknuð. Enginn ólöglegur leikur er leyfður og því tapast skák við fyrsta ólöglega leik.

Verðlaunapeningur og páskaegg verða í verðlaun fyrir þrjú efstu sætin í hvorum flokki. Þá verður jafnframt páskaegg í verðlaun fyrir efstu stúlkuna í hvorum flokki. Að móti loknu verður einn þátttakandi dregin út í happdrætti og hlýtur sá heppni að launum stórt páskaegg. Þátttakendur geta aðeins fengið eitt páskaegg hver í hverju móti Páskaeggjasyrpunnar, þó er happdrættisvinningurinn undanskilin þeirri reglu. Að loknu þriðja og síðasta mótinu verða veitt stór páskaegg í verðlaun fyrir samanlagðan árangur.

Allir sem taka þátt í minnst tveimur af þremur mótum Páskaeggjasyrpunnar fá páskaegg í verðlaun fyrir þátttökuna og verða þau afhent í lok þriðja mótsins.

Skráning fer fram í gegnum skráningarformið hér að neðan, en einnig má nálgast það í gula kassanum á skak.is. Birnukaffi verður opið svo engin þarf að tefla með tóman maga!

Taflfélag Reykjavíkur og Nói Síríus hlakka til að sjá ykkur á móti númer 3 í Páskaeggjasyrpunni 2017!

Skráningarform

 

Hraðskákmót öðlinga fer fram á miðvikudagskvöld

Hraðskákmót öðlinga fer fram miðvikudaginn 12. apríl í félagsheimili TR að Faxafeni 12. Mótið hefst kl. 19.30 og er opið fyrir alla 40 ára (á árinu) og eldri. Tefldar verða 7 umferðir með umhugsunartímanum 4 mín + 2 sek á leik (umferðum kann að vera fjölgað í níu ef næg þátttaka verður).  Í lok mótsins fer fram verðlaunaafhending fyrir Hraðskákmótið sem og Skákmót öðlinga sem lauk fyrir skemmstu.

Þátttökugjald er kr. 1.000 og er í því innifalið ilmandi nýtt kaffi. Greiða skal með reiðufé við upphaf móts.

Mótið verður reiknað til alþjóðlegra (Fide) hraðskákstiga.

Núverandi Hraðskákmeistari öðlinga er Róbert Lagerman.

Skákmenn 40+ eru hvattir til að fjölmenna!

Skráning fer fram hér að neðan.

Skráningarform

Skráðir keppendur

Skákþáttur Morgunblaðsins: Wesley So ætlar að verða heimsmeistari

Það er varla neinum blöðum um það að fletta að stórveldin meðal þjóða Asíu eru Kínverjar og Indverjar. En það hefur ekki alltaf verið þannig. Anand ruddi brautina fyrir Indverja á árunum í kringum 1990 en þá vann hann sér sæti í áskorendakeppninni. Kínverjar tefldu fyrst á ólympíumóti ári 1978 en fram að þeim tíma voru Filippseyingar Asíu-stórveldið í skákinni þökk sé sterkri skákhefð og Eugenio Torre sem árið 1974 varð fyrsti stórmeistari Asíu og hefur teflt í fleiri ólympíumótum en nokkur annar. Á því síðasta sem fram fór í Bakú í Aserbadsjan náði hann árangri sem lengi verður í minnum hafður hann tefldi á 3. borði fyrir Filppseyinga og hlaut 10 vinninga af 11 mögulegum. Miklar vonir bundu Filippseyingar við Torre á uppgangsárunum og sumarið 1976 vann hann sterkt skákmót í Manila og lagði þar sjálfan Karpov heimsmeistara að velli. Torre var á þessum árum fenginn til að stjórna sjónvarpsþætti um skák og tók einnig að sér hlutverk í kvikmyndum sem kann að hafa leitt hann á brautir fjarri hinni einmanalegu göngu til æðstu metorða skáklistarinnar.

„Heitasti“ skákmaðurinn í dag er líka frá Filippseyjum; Wesley So hefur opinberlega lýst því yfir að hann stefni á að verða heimsmeistari. Hann hefur unnið hvern sigurinn á fætur öðrum undanfarið, nú síðast á stórmótunum í London og Wijk aan Zee og er kominn í 2. sæti á stigalista FIDE með 2822 elo stig. Þar trónir Magnús Carlsen á toppnum með með 2838 elo stig. Munurinn er ekki mikill en áðurnefndur Karpov lýsti því nýlega yfir að Norðmaðurinn bæri enn höfuð og herðar yfir kollega sína.

Uppgjör þessarra tveggja eða einhverskonar reikningskil virðast liggja í loftinu; það spurðist út um daginn að í keppni á netinu sem kallast Pro chess league myndu þeir mætast í skák með tímamörkunum 15 2. So tefldi fyrir sveit sem nefnist Erkibiskupar St. Louis en Magnús var í brúnni fyrir Norsku dvergana. Þeir fyrrnefndu unnu 9:7 þó að Magnús hafi unnið allar fjórar skákir sínar þ. ám. So. Í skákinni sem hér fer á eftir tókst norska heimsmeistaranum að þröngva stíl sínum upp á So sem tefldi byrjunin fremur „druslulega,“ skipti vitlaust upp á miðborðinu og mátti síðan fylgjast með Magnúsi bæta stöðu sína hægt og bítandi. Þegar tíminn tók að styttast gáði So ekki að sér:

Wesley So – Magnús Carlsen

Bogo-indverskv vörn

1. d4 Rf6 2. c4 e6 3. Rf3 Bb4+ 4. Bd2 a5 5. a3 Bxd2+ 6. Dxd2 b6 7. Rc3 Bb7 8. g3 O-O 9. Bg2 Re4 10. Rxe4 Bxe4 11. O-O a4 12. De3 Bb7 13. Dd3 f5 14. Re5 Bxg2 15. Kxg2 d6 16. Rf3 Df6 17. e4 Rc6 18. Hae1 Ha5! 

Óvenjulegur staður fyrir hrókinn sem frá a5 eygir f5-reitinn.

19. d5 fxe4 20. Dxe4?

Og hér var tvímælalaust betra að taka á e4 með hrók.

20. ... exd5 21. cxd5 Re7! 22. Hd1 Df5! 23. Dxe7 Dxf3+ 24. Kg1 Hc5 25. Hd2 h6 26. He1? Hf5 27. He3 Hc1+ 28. He1 Hxe1+ 29. Dxe1 He5 30. Dc1 b5 31. h3 Kf8 32. h4 Ke8 33. Kh2 Kd8 34. Dh1 Db3 35. Dg2 He1 36. Dh3 Df3 37. Dg2 Df5 

Svarta staðan er vænleg en vinningsleiðin liggur ekki fyrir. Ein áætlunin gæti verið að bæta stöðu kóngsins ogh sækja að d5-peðinu. En eins og stundum gerist þegar tíminn styttist leikur annar aðilinn gróflega af sér.

38. Dh3?? Hh1+!

– drottningin fellur og frekari barátta er tilgangslaus. So gafst upp.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 1. apríl 2017

Skákþættir Morgunblaðsins

Guðmundur hefur tryggt sér sæti í landsliðssæti - mikil spenna hver fylgir honum upp

Guðmundur Gíslason (2314) er í banastuði í áskorendaflokki Íslandsmótsins í skák. Í dag vann Kristján Eðvarðsson (2228) og hefur hlotið 7½ vinning í átta umferðum! Hefur tveggja vinninga forskot á næstu menn. Mikil spenna er í baráttunni um annað sæti sem jafnframt tryggir keppnisrétt í landsliðsflokki.

Jóhann Ingvason (2121), sem vann Björgvin Víglundsson (2143), Dagur Ragnarsson (2316), sem lagði Tómas Björnsson (2179) að velli, og Lenka Ptácníková (2242), sem hafði betur gegn Braga Halldórssyni (2110), eru í 2.-4. sæti með 5½ vinning. Kristján Eðvarðsson (2228) er fimmti með 5 vinninga og virðist vera úr leik í baráttunni.

Í lokaumferðinni sem fram fer á morgun og hefst kl. 13 mætast:

• Halldór Grétar Einarsson (4½) - Guðmundur Gíslason (7½)
• Lenka Ptácníková (5½) - Dagur Ragnarsson (5½)
• Jóhann Ingvason (5½) - Tómas Björnsson (4½)
• Kristján Eðvarðsson (5) - Jón Kristinsson (4½)

Vinni Jóhann hefur hann tryggt sér annað sæti á mótinu og sæti í landsliðsflokki. Jafntefli dugar einnig Jóhanni ef Lenka og Dagur gera einnig jafntefli. 

Dagur kemst áfram vinni hann og Jóhann vinni ekki. Degi gæti dugað jafntefli ef Jóhann tapar. Lenka þarf ávallt sigur til að komast áfram og þarf þá jafnframt að treysta á að Jóhann vinni ekki. 

Áhorfendur eru velkomnir í Stúkuna. Birnukaffi hefur flutt sig um set og þar nú með aðsetur! 

• Heimasíða SÍ
• Beinar útsendingar
• Vefútsending
• Chess-Results