Norðurlandamótið í skák fer fram í Växjö í júní-júlí

 

Norðurlandamótið í skák fer fram í Växjö í Svíþjóð dagana 26. júní - 2. júlí nk. Alls er teflt í fjórum mótum.

Fyrst má sjálft aðalmótið sem jafnframt er svæðamót og fær sigurvegarinn keppnisrétt á Heimsbikarmótinu í Georgíu.

Hin mótin eru Norðurlandamót kvenna og Norðurlandamót eldri skákmanna bæði fyrir 50 ára og eldri sem og 65 ára og eldri.

Mótið er afmælismót Skáksambands Svíþjóðar en sambandið fagnar 100 ára afmæli í ár. 

Nánari upplýsingar um mótið má nálgast á heimasíðu sænska skáksambandsins. 

Boðsbréfið sjálft má nálgast hér. 

 

Guðmundur með 1½ vinnings forskot - Kristján í öðru sæti

Guðmundur Gíslason (2314) er kominn með annan fótinn, nánast báða, í landsliðsflokkinn í Hafnarfirði í maí. Í sjöundu umferð í gær gerði hann jafntelfi við Dag Ragnarsson (2316). Guðmundur hefur 6½ vinning og 1½ vinnings á Kristján Eðvarðsson (2228) sem lagði Jóhann Ingvason (2121), sigurvegarann frá í fyrra, að velli. Jóhann, Björgvin Víglundsson (2143), Dagur, Tómas Björnsson (2179) og Lenka Ptácníková (2242) eru 3.-7. sæti með 4½ vinning. Bragi Halldórsson (2110) hefur svo 4 vinninga.

Í dag kl. 13 hefst næstsíðasta umferð og er spennan mikil um hver fylgi Guðmundi í landsliðsflokkinn.

• Guðmundur Gíslason (6½) - Kristján Eðvarðsson (5)
• Tómas Björnsson (4½) - Dagur Ragnarsson (4½)
• Jóhann Ingvason (4½) - Björgvin Víglundsson (4½)
• Bragi Halldórsson (4) - Lenka Ptácníková (4½)

Áhorfendur eru velkmnir í Stúkuna. Birnukaffi hefur flutt sig um set og þar nú með aðsetur! 

• Heimasíða SÍ
• Beinar útsendingar
• Vefútsending
• Chess-Results

Bræður áfram í Barna Blitz eftir undanrásir Víkingaklúbbsins

Undanrásir Víkingaklúbbsins fyrir Reykjavík barnablitz fór fram í á miðvikudaginn hjá Víking. 14. keppendur tóku þátt. Efstur varð Óskar Víkingur neð 5.5 af 6. Stefán Orri bróðir hans annar með 5.0. Róbert Luu þriðji með 4.5. Tefldar voru 6. umerðir með 6 mínútna umhugsunartíma. Skákstjórar á mótinu voru Sigurður Ingason og Gunnar Fr. Rúnarsson.

Úrslit:

1. Óskar Víkingur Davíðsson 5.5
2. Stefán Orri Davíðsson 5
3. Róbert Luu 4.5
4. Benedikt Þórisson 4.0
5. Bjartur Þórisson 3.5
6. Ásthildur Helgadóttir 3.5
7. Batel 3.0
8. Áslaug 3.0
9. Einar Dagur Brynjarsson 3.0
10. Bergþóra Helga Gunnarsdóttir 2.0
11. Ása 2.0
12. Sigurður Rúnar Gunnarsson 2.0
13. Ísak Trausti Ingólfsson 1.0
14. Skotta 0.0

Nánar á heimasíðu Víkingaklúbbsins.

Guðmundur heldur sínu striki í Stúkunni

Guðmundur Gíslason (2314) heldur áfram sigurgöngu sinni í áskorendaflokki Íslandsmótsins í skák. Í gær vann hann Lenku Ptácníková (2242). Sjötta sigurskákin í jafn mörgun skákum. Jóhann Ingvason (2121), sem vann Jón Kristinsson (2166), er annar með 4½ vinning. Dagur Ragnarsson (2316) og Kristján Eðvarðsson (2228) koma svo næstir með 4 vinninga. Fimm keppendur hafa svo 3½ vinning svo baráttan verður hörð um efstu tvö sætin sem gefa keppnisrétt í landsliðsflokki.

Sjöunda umferð fer fram í kvöld og hefst kl. 18:30. Þá mætast meðal annars:

• Dagur Ragnarsson (4) - Guðmundur Gíslason (6)
• Kristján Eðvarðsson (4) - Jóhann Ingvason (4½)
• Lenka Ptácníková (3½) - Hallór Grétar Einarsson (3½)
• Tómas Björnsson (3½) - Kristinn Jens Sigurþórsson (3½)
• Björgvin Víglundsson (3½) - Gylfi Þór Þórhallsson (3)

Áhorfendur eru velkmnir í Stúkuna. Birnukaffi hefur flutt sig um set og þar nú með aðsetur! 

• Heimasíða SÍ
• Beinar útsendingar
• Vefútsending
• Chess-Results

Lokaundankeppni Reykjavik Open Barna Blitz fer fram á morgun í TR

Eins og frá árinu 2009 stendur Skákakademía Reykjavíkur í samstarfi við taflfélög borgarinnar fyrir Reykjavík Open Barna-Blitz sem er hraðskákmót fyrir krakka í sjöunda bekk og yngri, það er fædd 2004 og síðar.

Taflfélag Reykjavíkur, Huginn, Skákdeild Fjölnis og Víkingaklúbburinn eru öll með undanrásir þar sem tvö sæti eru í boði í úrslitunum sem tefld verða laugardaginn 22. apríl.

Huginn: Mánudaginn 3. apríl í Mjóddinni (úrslit). Baltasar Máni Wedholm og Ísak Orri Karlsson unnu sér keppnisrétt í úrslitum. 

Víkingaklúbburinn: Miðvikudaginn 5. apríl í Víkinni(úrslit). Óskar Víkingur og Stefán Orri Davíðssynir unnu sér keppnisrétt í úrslitum.

Skákdeild Fjölnis: Miðvikudaginn 5. apríl í Rimaskóla (úrslit). Arnór Gunnlaugsson og Kristján Dagur Jónsson unnu sér keppnisrétt í úrslitum 

Taflfélag Reykjavíkur: Laugardaginn 8. apríl í Taflfélagi Reykjavíkur að Faxafeni 12, hefst 14:00.

 

Stóra páskaeggjamót KR á mánudagskvöldið

Það er jafnan hart barist á skákmótunum í KR- heimilinu hvort heldur er á mánudagskvöldum eða árdegismótunum á laugardagsmorgnum.  Það sem af er ári hafa margir fræknir kappar fagnað þar glæstum sigrum eða hafnað í öðru sæti ella eða enn neðar. Meðal sigursælla keppenda undanfarið hafa verið Magnús Sigurjónsson, Jón G. Briem, Guðfinnur Kjartansson, Stefán Þormar, Gunnar Gunnarsson, Bjarni Hjartarson  o.fl. að ógleymdum Björgvini Víglundssyni, tvöföldum Íslandsmeistara (bæði 50+ og 65 ára og eldri) sem gerði sér lítið fyrir og vann kappteflið um Friðrikskónginn með fullu húsi fyrr í vetur. 

Á mánudagskvöldið kemur verður svo haldið þar hið árlega Kapp- og Happ páskaeggjamót, þar sem 3 risa páskaegg frá sælgætisgerðinni SAMBÓ verða í vinning auk fjölda annarra girnilegra nammieggja frá GÓU. Bæði sigurvegarar í einstökum aldursflokkum karla og kvenna geta gert sér góðar vonir um að fara ekki tómhentir heim og eins þeir sem detta óvænt í lukkupottinn í mótslok þegar darraðardansinum lýkur.  

Um er að ræða 7 mínútna 11–13 umferða alvöru hraðskákmót, eftir keppendafjölda. Ýtt verður á klukkurnar kl. 19.30 og allir sem taflmanni geta valdið hjartanlega velkomnir til þátttöku.

Baltasar og Ísak Orri komnir í úrslit á Reykjavik Barna Blitz

Æfingin þann 3. apríl sl. var ekki alveg hefðbundin. Engin dæmi eða þemskák var á æfingunni og hraðskák reglum fylgt í hvívetna. Í verðlaun voru ekki aðeins medalíur eins og vanalega heldur gáfu tvö efstu sætin þátttökurétt í úrslitum Reykjavík Barna Bliz sem fram fer meðan á Reykjavíkurskákmótinu stendur.

Baráttan var jöfn um efstu sætin á æfingunni en þegar upp var staðið hafði Baltasar Máni Wedholm sigurinn með 6v í jafn mörgum skákum. Annar var Ísak Orri Karlsson með 5v. Úrslitin réðust í innbyrðis viðureign þeirra í fjórðu umferð þar sem Baltasar hafði sigur í spennandi skák sem hefði vel getað farið öðru vísi. Þeir tveir unnu sér því þátttökurétt í úrslitum Reykjavík Barna Blitz. Síðan komu jöfn með 4v Batel Goitom Haile og Rayan Sharifa. Batel sem tapaði aðeins gegn efstu mönnum hefði betur á stigum og hlaut þriðja sætið.
Í æfingunni tóku þátt: Baltasar Máni Wedholm Gunnarsson, Ísak Orri Karlsson, Batel Goitom Haile, Rayan Sharifa, Brynjar Haraldsson, Andri Hrannar Elvarsson,Óttar Örn Bergmann Sigfússon, Zofia Momuntjuk, Adrian Efraím Beniaminsson Fer, Wiktoria Momuntjuk, Bergþóra Helga Gunnarsdóttir, Alfreð Dossing, Sigurður Rúnar Gunnarsson, Hans Vignir Gunnarsson og Wihbet Haile.

Næsta mánudag 10. apríl 2017 verður páskaeggjamót Hugins og hefst það kl. 17.00, þ.e. nokkru fyrr en venjuleg mánudagsæfing. Páskaeggjamótið verður reiknað til hraðskákstiga. Eins og æfingarnar verður páskaeggjamótið í félagsheimili Hugins í Álfabakka 14a í Mjóddinni. Gengið er inn milli Subway og Fröken Júlíu og salurinn er á þriðju hæð.

Úrslitin í chess-results:

Halldór Pálsson með fullt hús á hraðkvöldi

Halldór Pálsson sigraði örugglega á hraðkvöldi Hugins sem haldið var mánudaginn 3. apríl sl. Halldór vann allar skákirnar sem hann tefldi á hraðkvöldinu og fékk 7v í jafn mörgum skákum. Sigurinn var tryggður fyrir síðustu umferð en samt engin ástæða til að slaka á. Annar var Magnús Magnússon með 5,5v. Síðan komu jafnir með 4v Vigfús Ó. Vigfússon og Atli Jóhann Leósson. Það hafði Vigfús betur á stigum og hlaut 3. sætið.

Eins og fyrri sigurvegarar sá Halldór um dráttinn í happdrættinu og valdi tölu Harðar Garðarssonar. Báðir völdu þeir pizzumiða frá Dominos. 

Lokastaðan á hraðkvöldinu:

1. Halldór Pálsson, 7v/7
2. Magnús Magnússon, 5,5v
3. Vigfús Ó. Vigfússon, 4v
4. Atli Jóhann Leósson, 4v
5. Hörður Garðarsson, 2,5v
6. Sigurður Freyr Jónatansson, 2,5v
7. Pétur Pálmi Harðarson, 2v
8. Finnur Kr. Finnsson, 0,5v

Úrslitin í chess-results:

Páskeggjamót Hugins fer fram á mánudaginn

Páskaeggjamót Hugins verður haldið í 25. sinn mánudaginn 10. apríl 2017, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráningarform er er á skak.is og eru væntanlegir þátttakendur beðnir um að skrá sig til að auðvelda undirbúning mótsins. Mótið verður reiknð til alþjóðlegra hraðskákstiga.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 2001 – 2004) og yngri flokki (fæddir 2005 og síðar). Sá sem er efstur í hverjum árgangi fær einnig páskaegg sem og efstu þrjár stúlkurnar á mótinu. Að auki verða tvö páskaegg dregin út. Enginn fær þó fleiri en eitt páskaegg. Lítið páskaegg verður svo fyrir þá sem ekki vinna til verðlauna.

Páskaeggjamótið verður haldið í félagsheimili Hugins í  Álfabakka 14a í Mjóddinni. Inngangur er milli Subway og Fröken Júlíu en salur félagsins er á þriðju hæð hússins.

Upplýsingar um þegar skráða keppendur má finna hér.

Sveinbjörn Sigurðsson látinn

Sveinbjörn Sigurðsson er fallinn frá 69 ára að aldri. Hann lést 3. apríl sl. Skákmenn hafa minnst Sveinbjörns á Facebook-hópi skákmanna. Hér má sjá nokkur minningarorð skákmanna um þennan mikla meistara.

Halldór Brynjar Halldórsson

Sveinbjörn var einstakur maður, gæðablóð mikið. Það vita þeir sem hann þekkja, þrátt fyrir áratuga stjórnarandstöðu hans norðan heiða.

Björn Þorfinnsson

Sveinbjörn er einn sá allra eftirminnilegasti. Blessuð sé minning meistarans. Hans verður saknað.

Sigurður Eiríksson

Átti leið um Eyrarlandveginn haustið 1968 á leið minni í MA. Þar var þessi góði maður. Átti samskipti við hann alla tíð síðan. Refur í skákinni en mikill öðlingur.

Gunnar Björnsson

Deildakeppnin verður ekki söm. Sveinbjörns verður sárt saknað.

Áskell Örn Kárason

Sveinbjörn er allur - lést sl. mánudagskvöld. Við Skákfélagsmenn minnumst hans með virðingu og hlýju. Þess má geta að Sveinbjörn varð 69 ára gamall þann 9. mars sl. Ef Bobby gamli Fischer væri á lífi hefði hann einmitt orðið 74 ára þennan sama dag. Þannig að drengstaulinn frá Brooklyn fékk Eyrarlandsgoðann í fimm ára afmælisgjöf - ef svo má segja. 9. mars allavega merkur dagur í skáksögunni!

Rúnar Sigurpálsson

Sveinbjörn var eftirminnilegur öllum sem honum kynntust. Jafnvígur á skák og bridge, á sínum yngri árum var hann afar efnilegur knattspyrnumaður og þeir sem muna eftir gullaldarliði knattspyrnudeildar Skákfélags Akureyrar muna eftir Sveinbirni dreifa spilinu með sínum öfluga vinstri fót, yfirferðin kannski ekki mikil en yfirsýnin þeim mun meiri. Blessuð sé minning hans.

Sigurður Arnarson

Þetta gæti verið síðasta myndin sem tekin var af kappanum. Situr fyrir framan merki Skákfélags Akureyrar og bíður eftir að fá að tefla við ungan félaga í SA.

Tómas Veigar Sigurðarson

Ég var líklega síðasti andstæðingur Sveinbjörns í kappskák. Við mættumst í lokaumferð SÞA í lok febrúar.

Mætti honum líka í einni af síðustu skákunum sem hann tefldi, sem voru tefldar á 10 mínútna móti hjá SA þann 9. mars, afmælisdag Sveinbjörns. Það mót var óhefðbundið, því við ákváðum að tefla tvöfalda umferð, sem tók 240 mínútur. Var það gert að undirlagi Sveinbjörns, sem sagði eitthvað á þessa leið "við erum mættir hér til þess að tefla" ;)

Við fráfall hans er skarð fyrir skildi sem erfitt verður að fylla.

Hvíldu í friði kæri vinur - Þín verður sárt saknað.

Mikael Jóhann Karlsson

Frábær maður sem stóð fast við bakið á ungum skákmönnum að hefja sín fyrstu skref í skák á Akureyri, stoppaði við hjá honum og spjallaði um allt milli himins og jarðar (oftast til gagnrýna hin ýmsu málefni) eftir nánast hvern skóladag, reyndist mér gríðarlega vel þegar ég hóf mín fyrstu skref á fullorðins skákmótum á Akureyri. Megi þessi mikli öðlingur hvíla í friði, aldrei mun ég gleyma honum.

Gauti Páll Jónsson

Ég er þakklátur fyrir að hafa kynnst honum í þau mörgu skipti sem við tefldum fyrir norðan og hann var alltaf til í spjall þegar maður rakst á hann á göngu um bæinn. Eftirminnilegt þegar ég hreinsaði eitt fámennt en góðmennt mót á Akureyri fyrir utan eina skák - þegar Sveinbjörn ruslaði mér upp! Blessuð sé minning hans.