MP Reykjavíkurskákmótið í fjölmiðlum

MP Reykjavíkurskákmótið hefur verið mikið í fjölmiðlum um helgina.  Má þar nefna ákeflega skemmtilegt viðtal við Cori-feðginin í Sunnudagsmogganum sem ritstjóri hvetur alla til að lesa.  Um mótið var svo fjallað í fréttatíma RÚV

• Fréttin á RÚV

Vin Open fer fram á morgun

Mánudaginn 1. mars heldur Skákfélag Vinjar, í samstarfi við Skáksamband Íslands og Skákakademíu Reykjavíkur, stórmótið Vin - Open. Hefst það kl. 12:30 og þarf að vera búið að skrá sig fyrir þann tíma.

Vin - Open er hliðarviðburður vegna Reykjavík  Open, eða MP Reykjavíkurskákmótsins, og er öllum opið. Stefnt er að því að nokkrir þátttakendur á mótinu, erlendir og innlendir,  muni taka þátt eins  og sl. ár þegar á þriðja tug þátttakenda var í stórskemmtilegu móti.

Tefldar verða fimm umferðir með sjö mínútna umhugsunartíma. Vinningar verða veittir fyrir efstu sæti, auk þess sem veitt verða verðlaun fyrir bestan árangur:  undir 2000 elo stigum, undir 1500 stigum og bestan árangur stigalausra. Já, og sigurvegarinn hlýtur glæstan bikar.

Vöfflukaffi verður borið fram eftir þriðju umferð og skákstjórnendur eru reynsluboltarnir og öðlingarnir Róbert Lagerman og  Hrannar Jónsson.

Gunnar Björnsson, forseti Skáksambands Íslands, setur Vin - Open.

Stefnt er að því að mótinu, kaffinu og verðlaunaafhendingu verði lokið vel fyrir kl. 15:00.

ATH að mótið hefst kl. 12:30 og allir þvílíkt velkomnir.

Vin er að Hverfisgötu 47 í Reykjavík og síminn er 561-2612. Það er athvarf fyrir fólk með geðraskanir og er rekið af Rauða krossi Íslands.

MP Reykjavík Open: Myndbönd frá fjórðu og fimmtu umferð

Og enn ef Indverjanum Vijay Kumar.  Nú eru komin myndbönd frá bæði fjórðu og fimmtu umferð.  Þau má bæði sjá hér að neðan.

 

Myndband fjórðu umferðar:

 

Myndband fimmtu umferðar:

Viðtöl við Nataf og Bromann

Indverjinn Vijay Kumar hefur skilað af sér meira efni. Hér má sjá viðtal við Nataf og Bromann.

Efnilegur stúlknahópur á Fjölnisæfingum

Skákæfingar Fjölnis á laugardögum hafa verið mjög vel sóttar. Að jafnaði eru um 20 - 30 krakkar á hverri æfingu. Mjög efnilegur og áhugasamur stúlknahópur er að koma upp að nýju innan skákdeildarinnar og hafa þær vakið athygli á mótum undanfarið, eins og Íslandsmóti grunnskólasveita stúlkna og Metrómóti Fjölnis.

Stelpurnar sem hafa verið undir handarjaðri Sigríðar Bjargar Helgadóttur mæta reglulega tvisvar í viku á æfingar í Rimaskóla á vegum skólans Skákakademíu Reykjavíkur og Skákdeildar Fjölnis og er stutt í að þær fari að hafa í fullu tré við eldri krakka á Fjölnisæfingum.Næsta verkefni þeirra er að taka þátt í skákmóti Árnamessu í Stykkishólmi þann 14. mars n.k.

MP: Hannes, Henrik og Guðmundur með góða sigra

Það gekk afar vel hjá íslensku skákmönnunum í fjórðu umferð MP Reykjavíkurskákmótsins sem fram fór snemma dags í dag en taflmennskan hófst kl. 9.    Morgunstund virtist gefa íslensku skákmönnunum gull í mund!  Hannes Hlífar Stefánsson sigraði undrabarnið frá Perú, yngsta stórmeistara heims, Jorge Cori, og Henrik Danielsen sigraði hinn sterka sænska stórmeistara Tiger Hillarp Persson.    Guðmundur Gíslason átti úrslit dagsins en hann sigraði hinn sterka bandaríska stórmeistara Aleksander Lendermann, sem er aðeins 18 ára og þykir einn efnilegasti skákmaður Bandaríkjanna.   Hannes og Henrik eru í 2.-6. sæti en efstur með fullt hús er danski alþjóðlegi meistarinn Thorbjörn Bromann sem hefur komið verulega á óvart og vann nú bosníska stórmeistarann Ivan Sokolov.    

 

Síðari umferð dagsins hefst kl. 15:30 en þetta er í fyrsta sinn í 46 sögu Reykjavíkurskákmótanna að tvær umferðir eru tefldar sama daginn.   Margeir Pétursson, stórmeistari, verður þá með skákskýringar og hefjast þær um kl. 18.    

 

Í umferð dagsins mætast m.a.: Baklan - Bromann, Hannes - Henrik, Guðmundur Gíslason - Nils Grandelius og Tiger Hillarp Persson - Bragi Þorfinnsson.  

 

MP Reykjavíkurskákmótinu fylgja ýmsir hliðarviðburðir.   Síðar í kvöld verður boðið upp Reykjavík Open Pub Quis sem hefst kl. 21 á Laugvegi 3 þar sem skákáhugamenn geta spreytt sig á skákspurningum.   Enginn aðgangseyrir.     Börnin fá líka sín tækifæri til að tefla.   Á morgun verður svo Reykjavík Barna Blitz þar sem 16 af sterkustu skákbörnum borgarinnar tefla til úrslita.  Það er Skákakademía Reykjavíkur sem stendur fyrir mótinu og verður sigurvegarinn krýndur hraðskákmeistari Reykjavíkur í barnaflokki. 

• Heimasíða mótsins
• Skákirnar í beinni
• Chess-Results
• Myndaalbúm mótsins

Henrik sigraði Tiger!

Það streyma að góð úrslit í fjórðu umferð MP Reykjavíkurmótsins og svo virðist sem það henti íslenskum skákmönnum vel að vakna snemma!  Henrik Danielsen sigraði hinn sterka sænska stórmeistara Tiger Hilarp Persson og er hópi skákmanna sem hafa 3,5 vinning.    Nú fer að sjá fyrir endann á fjórðu umferð en skákmenn eru hvattir til að fjölmenna í fimmtu umferð sem hefst kl. 15:30.  Margeir Pétursson verður með skákskýringar um kl. 18.

 

• Heimasíða mótsins
• Skákirnar í beinni
• Chess-Results
• Myndaalbúm mótsins

Hannes sigraði undrabarnið frá Perú!

Hannes Hlífar Stefánsson sigraði undrabarnið frá Perú í fjórðu umferð í vel tefldri skák og er nú kominn í hóp allra efstu manna með 3,5 vinning.   

Svo má geta þess að Sigurlaug R. Friðþjófsdóttir sigraði eiginmanninn Jóhann H. Ragnarsson í uppgjöri þeirra hjóna!

Fjórða umferð er í fullum gangi og skák- og skákáhugamenn hvattir til að fjölmenna á skákstað í dag!  

• Heimasíða mótsins
• Skákirnar í beinni
• Chess-Results
• Myndaalbúm mótsins

Guðmundur Gíslason sigraði Lendermann!

Guðmundur Gíslason sigraði hinn unga og efnilega bandaríska stórmeistara Aleksander Lenderman í fjórðu umferð MP Reykjavíkurmótsins.  Frábær úrslit hjá Guðmundi sem hefur byrjað sérdeilis vel.  Skákina má skoða hér sem og aðrar skákir sem einnig eru sýndar beint en fjórða umferð er sem stendur í fullum gangi.

Fimmta umferð hefst svo kl. 15:30.   

• Heimasíða mótsins
• Skákirnar í beinni
• Chess-Results
• Myndaalbúm mótsins

Reykjavík Open Chess Pub Quis

Það er ekki bara teflt á MP Reykjavíkurskákmótinu heldur er alls konar skemmtilegir hliðarviðburðir.  Einn þeirra er í kvöld en þá fer fram Reykjavík Open Chess Pub Quis í annað skipti en skákspurningakeppni fór fram í fyrsta skipti í fyrra og sló í gegn.  Keppnin í fyrra varð m.a. til þess að  ítalskir keppendur sem tóku þátt kóperuðu hugmyndina og héldu slíka keppni einnig í kringum alþjóðlegt skákmót á Ítalíu!

Það er Sigurbjörn Björnsson, FIDE-meistari og skákbókasali sem semur spurningarnar.   Spurningakeppnin fer fram í bar Samtakanna 78 á Laugavegi 3, hefst kl. 9 og er öllum skák- og skákáhugamönnum velkomið að taka þátt.