Færsluflokkur: Skákþættir Morgunblaðsins

4.9.2011 | 20:00

Skákþáttur Morgunblaðsins: 100 árstíð Mikhails Botvinniks

Við vorum staddir þrír Íslendingar á útsláttarmótinu í Hollandi haustið 1994 þegar „skáksagan" gekk skyndilega fram á okkur. Mikhael Botvinnik var orðinn æði sjóndapur en þarna var hann leiddur áfram af vingjarnlegum risa, Vasilí Smyslov. Þeir voru heiðursgestir mótsins. Nú er þess víða minnst að hinn 17. ágúst sl. voru hundrað ár frá fæðingu Mikhails Botvinnik. Hann varð heimsmeistari árið 1948, tveim árum eftir fráfall Alexanders Aljékín. Eftir það tefldi hann átta heimsmeistaraeinvígi og hélt titlinum með stuttum hléum til ársins 1963. Botvinnik vakti fyrst athygli þegar hann lagði heimsmeistarann Capablanca í fjöltefli árið 1925. Frami hans varð skjótur eftir það og náði ákveðnum hátindi með sigri ásamt Capablanca á stórmótinu í Nottingham árið 1936. Árið 1939 hafði náðst samkomulag um einvígi Botvinniks við heimsmeistarann Aljékín en stríðið gerði út um þau áform. Árið 1946 skoraði Botvinnik Aljékín aftur á hólm en heimsmeistarinn, sem hafðist við í Portúgal heilsulaus, fjárvana og niðurlægður, fannst skömmu síðar látinn á hótelherbergi í smábænum Estoril.

Botvinnik þótti afar skipulagður maður. Meðfram skákinni starfaði hann sem rafmagnsverkfræðingur og þróaði m.a. hugbúnað fyrir skáktölvu. Hann lagði upp æfingaáætlun fyrir skákmenn sem hafði mikil áhrif. Þar var m.a. gert ráð fyrir allt að 8 klst. skákrannsóknum á dag, mikilli líkamsrækt og algerri afneitun lífsins lystisemda. Skákþjálfara sína, Model og Ragozin, lét hann stundum hringsóla í kringum vinnuborð sitt eða spúa frá sér tóbaksreyk svo hann gæti vanist óvæntum truflunum.

Með sanni hefur Botvinnik verið talinn fulltrúi fyrir þá tortryggni sem gegnsýrði sovéskt þjóðlíf og hann var oft grunaður um að beita áhrifum sínum til að ná fram hagfelldri niðurstöðu. En stundum kom hann á óvart. Hann neitaði að skrifa upp á plagg til fordæmingar á því er Viktor Kortsnoj „tók stökkið yfir" sumarið 1976 og virtist fylgja sannfæringu sinni í flestum málum.

Skákir Botvinniks á 1. borði ólympíumóta vöktu alltaf mikla athygli. Þegar Botvinnik tefldi við Fischer í Varna 1962 tókst Bobby að finna glufu i gömlum Botvinnik-rannsóknum og fékk unnið tafl.

„Karlinn var orðinn svo lúpulegur," skrifaði Bobby til vinar síns, „að engum hefði komið á óvart þó hann hefði verið fluttur á sjúkrabörum af skákstað. Þegar jafnteflisstöðunni var hinsvegar náð spígsporaði hann bísperrtur um sviðið með reistan makkann," bætti hann við.

Miguel Najdorf reið sjaldnast feitum hesti frá viðureignum sínum við „Bóta",sbr. eftirfarandi skák sem tefld var á ólympíumótinu í Amsterdam 1954:

Mikhail Botvinnik - Miguel Najdorf

Kóngsindversk vörn

1. d4 Rf6 2. c4 g6 3. g3 Bg7 4. Bg2 O-O 5. Rc3 c5 6. Rf3 Rc6 7. O-O d6 8. e3 Bf5 9. b3 Dc8 10. Bb2 Re4 11. Hc1 Rxc3 12. Bxc3 Be4 13. d5 Bxc3 14. Hxc3 Rd8 15. Rd2 Bxg2 16. Kxg2 f5 17. f4 e6 18. e4 exd5 19. cxd5 Rf7 20. He1 He8 21. Hce3 Dd7 22. Df3 Had8 23. a4 b6 24. exf5 Hxe3 25. Hxe3 Dxf5 26. g4 Dc2 27. He2 Hf8 28. Re4 Dd1

( STÖÐUMYND )

29. Rf6+ Kg7 30. g5 Hc8 31. He3 Dxf3 32. Kxf3 h6 33. h4 hxg5 34. hxg5 a6 35. He7 Hb8 36. Ha7 b5 37. Hxa6 bxa4 38. bxa4 Hc8 39. a5 Kf8 40. Hc6 Ha8 41. a6

- og Najdorf gafst upp

Helgi Ólafsson | helol@simnet.is

-------------------------------

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum 28. ágúst 2011.

Skákþættir Morgunblaðsins

Skákþættir Morgunblaðsins | Breytt 31.8.2011 kl. 09:36 | Slóð | Facebook | Athugasemdir (0)

28.8.2011 | 20:00

Skákþáttur Morgunblaðsins: Hnignandi veldi Rússa á skáksviðinu

Ýmsir þykjast hafa séð teikn á lofti um hnignandi veldi Rússa á skáksviðinu. Samkeppni við granna þeirra staðfesta þetta með ótvíræðum hætti; á síðasta Ólympíumóti voru Úkraínumenn óstöðvandi og á heimsmeistaramóti landsliða í Kína á dögunum voru Armenar aftur „mættir til leiks" og unnu sannfærandi sigur. Tími Kasparovs og Karpovs er liðinn og arftakar þeirra í rússneska liðinu brokkgengir að ýmsu leyti og enginn skákmaður í sjónmáli sem hafði jafn augljósa leiðtogahæfileika og Kasparov, sem stundum tók að sér liðsstjórn þeirra og hafði jafnvel móður sína til aðstoðar.

Vladimir Kramnik kom fram á Ólympíumótinu í Manila árið 1992 þegar veldi Kasparovs stóð sem hæst . Hann náði frábærum árangri en skaphöfn hans var annarrar gerðar og engrar leiðsagnar þaðan að vænta. Þegar Rússar mættu á heimsmeistaramót landsliða í Luzern 1993 var Garrí að tefla við Nigel Short í London og Rússar náðu sér aldrei á strik. Spurning nú er hvort rofa muni til á næstu árum. Þeir hafa „endurheimt" tvo öfluga skákmenn, Peter Svidler og Alexander Morozevich sem er farinn að tefla aftur eftir nokkurt hlé. Á rússneska meistaramótinu sem lauk í vikunni fékk Svidler uppreisn æru eftir slaka frammistöðu á Ólympíumótinu í Khanty Manyisk.

Lokaúrslit urðu þessi:

1. Svidler 5 v. ( af 7 ) 2. Morozevich 4 ½ v. 3. - 5. Karjakin, Gruiscghuk og Kramnik 4 v. 6. Nepomniahtchi 3 v. 7. Galkin 2 v. 8. Timofeev 1 ½ v.

Svidler var búinn að tryggja sér sigur fyrir lokaumferðina en tapaði þá fyrir Moro í aðeins 31 leik. Hann fékk harða og óvægna gagnrýni frá þjálfara Rússa á síðasta Ólympíumóti, Evgení Bareev, sem lýsti yfir undrun sinni á því að þessi ágæti skákmaður virtist ekki kunna byrjanirnar sínar almennilega. Ósanngjarnt fannst sumum en eitthvert sannleikskorn til í þessu; Svidler er mikill aðdáandi sýrutónlistar sjöunda áratugarins en boðsskapurinn þar er stundum dálítið þokukenndur, brautirnar ekki alltaf beinar og hæpna leiðsögn þaðan að fá þegar skáklistin er annarsvegar. Á meistaramótinu dró Svidler úr pússi sínu eitt og annað gamalt og nýtilegt úr smiðju gömlu meistaranna, og var farsæll á stundum eins og eftirfarandi skák ber með sér:

Artyom Timofeev - Peter Svidler

Spænskur leikur

1. e4 e5 2. Rf3 Rc6 3. Bb5 a6 4. Ba4 Rge7

Þetta afbrigði spænska leiksins sást stundum í skákum Wilhelm Steinitz. Riddaranum er raunar oftar valinn staður á e7 strax í þriðja leik.

5. c3 g6 6. d4 exd4 7. Rxd4

Skarpara og sennilega betra er 7. cxd4.

7. ... Bg7 8. Be3 O-O 9. O-O b5 10. Bc2 Re5 11. a4 Hb8 12. axb5 axb5 13. Rd2 d6 14. h3 c5 15. R4f3 R5c6 16. Bf4 Hb7!

Snjall leikur. Hrókurinn stefnir á d7 þar sem hann er góður til varnar og gagnsóknar.

17. De2 c4 18. Hfd1 Hd7 19. Rf1 d5 20. Bg5 Dc7 21. De3 b4 22. Bf4

Varla nægilega markvisst, 22. Ba4 kom sterklega til greina.

22. ... Dd8 23. Bh6 d4! 24. cxd4 Rxd4 25. Bxg7 Rxf3 26. Dxf3 Kxg7 27. e5 f6? 28. Re3?

Missir þráðinn. Eftir 28. Ha7! er erfitt að verja svörtu stöðuna.

28. ... b3! 29. Be4 Dc7 30. Hdc1 Hd4 31. Dg3

Smá brella sem Svidler verst auðveldlega.

31. ...f5 32. Bf3 f4 33. Dh4

33. ... h6!

Þessi einfaldi peðsleikur gerir út um taflið.

34. Rg4 Rf5

- og hvítur gafst upp.

Helgi Ólafsson | helol@simnet.is

-------------------------------

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum 14. ágúst 2011.

Skákþættir Morgunblaðsins

Skákþættir Morgunblaðsins | Breytt 21.8.2011 kl. 12:18 | Slóð | Facebook | Athugasemdir (0)

21.8.2011 | 20:00

Skákþáttur Morgunblaðsins: 65-reiturinn

Bandaríski stórmeistarinn Robert Byrne notaði þennan titil fyrir greinar sem hann skrifaði í tímaritið Chess life. Það mátti skilja hann þannig að hér hefði verið átt við reit eða leik sem fellur utan sjónsviðs áhorfandans. Þegar leikurinn birtist á sýningarborðinu kom hann kannski öllum viðstöddum á óvart og sumir bölvuðu í hljóði yfir því að hafa ekki látið sér detta þetta í hug.

„Á hvað bát eru þið?" Við Hannes Hlífar vorum á fjöltefla- og fyrirlestraleiðangri um landið og gátum ekki svarað þessari eilífðarspurningu sjómannsins í Neskaupstað en kváðumst hafa valið landleiðina að þessu sinni þó það lægi kannski ekki í augum uppi.

Skákirnar sem Byrne tók fyrir innhéldu yfirleitt a.m.k. einn vel falinn leik; þegar venjuleg leiðsögn dugar ekki, þekkt mynstur, kennileiti eða almenn speki talar ekki lengur til manns, þá er tími til kominn að gefa hugmyndafluginu lausan tauminn. Ég var að fylgjast með hinum 17 ára gamla Garrí Kasparov á heimsmeistaramóti unglinga í Dortmund í V-Þýskalandi sumarið 1980 og þessi staða var uppi:

Kasparov - Akesson

Leikurinn 27. e5 lá í augum uppi, áhrif biskupanna aukast þá til muna. Kasparov sat hinsvegar sem fastast og var dálítið órólegur í sætinu eins og hann væri að reyna að rekja slóðina til enda. Eftir hálftíma umhugsun skellti hann biskupnum á „65-reitinn":

27. Bxf6! Hxf6 28. e5

Síðar var upplýst að Kasparov hefði notast við „öryggisnet" við útreikninga sína. Hann komst að þeirri niðurstöðu að með bestu taflmennsku væri niðurstaðan jafntefli en fórnin væri samt áhættunnar virði. Akesson var sleginn út af laginu og fann ekki bestu vörnina.

28. ... Hh6?

Betra var 28. ... Hf7 29. f6 Hcf8! og svartur á að gera varist.

29. ...Dd8 30. e7 Hxe7 31. fxe7 dxe7 32. Hbc1Dd8 33. Df5! Db8

Kasparov hugðist svara 33. ... Kh8 með 34. Hc7! t.d. Dxc7 35. Df8+ og mátar.

34. Df7+ Kh8 35. Hc7

- og svartur gafst upp.

Einhver magnaðasta „afleppunarflétta" sem um getur kom fyrir í eftirfarandi skák.

Það má lengi velta fyrir sér hvað leiðsögn „Dzindzi" - betur þekktur á ICC undir nafninu Roman - hafði í þessum tafllokum; riddarinn á a7 er ekki með, staða manna hvíts verður ekki með góðu móti bætt, strategískt er svarta staðan mun betri.

Tiblisi 1973:

Dzindzihasvili - Tseshkovskí

31. Hxg7! Rxg7

Hér var best að stinga hausnum i gin ljónsins og leika 31. .. Kxg7 t.d. 32. Rd7+ Rd4 33. Bxd4 cxd4 34. De5+ með jafntefli.

32. Kg1! Hd4

Ekki 32. ... Rxe6 33. Rf7+ og 34. Rh6 mát.

33. Bxd4 cxd4 34. Dh6! Kg8

Eftir 34. ... Hc8 35. f5! er hvíta sóknin stórhættuleg.

35. Hh3 Rf5 36. De6+ Kg7 37. Rd7!

Magnaður leikur. Svartur er varnarlaus.

37. ... Dc8 38. Rxf8 Dc1+ 39. Kf2 Dd2+ 40. Kg1 Dd1 41. Kf2!

- Besti reiturinn. Skákin fór í bið og svartur gafst upp því eftir 41. ... Dd2+ 42. Kf3 Dxd3+ 43. Kg4! Re3+ 44. Kg5 er eftirleikurinn auðveldur.

Helgi Ólafsson | helol@simnet.is

-------------------------------

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum 14. ágúst 2011.

Skákþættir Morgunblaðsins

Skákþættir Morgunblaðsins | Breytt 13.8.2011 kl. 20:49 | Slóð | Facebook | Athugasemdir (0)

19.8.2011 | 20:00

„Okkar efnilegasta skákkona“

Nansý Davíðsdóttir, sem er aðeins níu ára og stundar nám við Rimaskóla í Reykjavík, þykir ein efnilegasta skákkona landsins. Reyndir menn segja að enginn geti gengið út frá því sem vísu að vinna Nansý, á hvaða aldri sem hann er.

„Ég byrjaði að tefla í skólanum þegar ég var sjö og hálfs árs. Mamma mín vildi að ég lærði skák því það væri gott fyrir heilann. Mér finnst gaman að tefla af því ég fæ alltaf verðlaun," segir Nansý. Stærðfræði er uppáhaldsfagið hennar í skólanum en hún stundar líka dans. Nansý er Íslandsmeistari með Rimaskóla, Íslandsmeistari stúlkna 2011 og hefur verið virk í þjálfun hjá Skákakademíu Reykjavíkur og Skákskóla Íslands.

Ætlar að kenna bróður sínum

„Ég ætla að kenna bróður mínum skák þegar hann verður átta ára," segir Nansý en bróðir hennar er fimm ára. „Ég ætla að vera skákkennari þegar ég er orðin stór... nei, skákmeistari!" segir Nansý stolt, en hún stendur sig afburðavel í skólanum og er mjög fljót að klára námsefnið að sögn skólastjóra Rimaskóla, Helga Árnasonar. Foreldrar Nansýar eru kínversk og hún talar líka kínversku en finnst svolítið erfitt að skrifa málið. Skemmtilegast finnst henni að tefla. „Ég er búin að tefla og fara á æfingar í allt sumar," segir Nansý.

Á heimsmælikvarða

„Hún er efnilegasta skákkonan í dag, það er ekki spurning, þetta er alveg stórmerkileg stelpa, rosalega öguð og einbeitt, alveg einstök," segir Gunnar Björnsson, formaður Skáksambands Íslands.

„Hún hefur gott auga fyrir taktík og getur náð mikilli einbeitingu við borðið," segir Stefán Bergsson, æskulýðsfulltrúi hjá Skáksambandi Íslands. Hún er komin í skáksveit Rimaskóla og mun taka þátt í Norðurlandamóti barnaskólasveita. Helgi segir að henni hafi einnig verið boðið að taka þátt í Evrópumeistaramóti unglinga í haust. „Hún virðist vera með miklu meiri færni en gengur og gerist og er greinilega svakalega gáfuð, hefur gott skap og metnað. Við getum mátað hana við bestu skákmenn heims á hennar aldri," segir Helgi.

Markmið Skáksambands Íslands er að fylgja henni vel eftir," segir Helgi. Norðurlandamót barnaskólasveita verður haldið í Danmörku 8. til 11. september næstkomandi.

-------------------------------------

Grein þessi birtist á baksíðu Morgunblaðsins, föstudaginn, 12. ágúst. Maríu Elísabetu Pallé, sem skrifaði greinina, Árna Sæberg, og sjálfu Morgunblaðinu er þakkað kærlega fyrir að leyfa birtingu hér á Skák.is.

Skákþættir Morgunblaðsins | Breytt 13.8.2011 kl. 20:33 | Slóð | Facebook | Athugasemdir (0)

14.8.2011 | 20:00

Skákþáttur Morgunblaðsins: Armenar með besta liðið á HM í Kína

Magnús Carlsen styrkti stöðu sína á toppi alþjóðlega elo-listans þegar hann bar sigur úr býtum í efsta flokki skákhátíðarinnar sem lauk í Biel í Sviss á dögunum. Magnús hlaut 7 vinninga af 10 mögulegum eða 19 stig en á mótinu var farið eftir þriggja stiga reglunni. Alexander Morozevich kom næstur með 6½ vinning eða 17 stig. Samkvæmt hinum svonefnda „lifandi lista" FIDE er Magnús efstur með 2823 en Anand kemur næstur með 2817

Kramnik í Dortmund (mynd af heimasíðu mótsins)

.

Stórmótinu í Dortmund lauk um svipað leyti með sigri Vladimirs Kramnik sem hlaut 7 vinninga af 10 mögulegum. Þessi frábæri skákmaður hlýtur að teljast meðal fimm bestu skákmanna heims.

Á meðan á þessu stóð fylgdust menn hér heima grannt með góðri frammistöðu Hannesar Hlífars Stefánssonar á opna tékkneska meistaramótinu. Hann var einn efstur fyrir lokaumferðina en tapaði þá fyrir úkraínska stórmeistaranum Dmitry Kononenko og hafnaði í 2.-5. sæti með 7 vinninga af níu mögulegum.

Austur í Ningbo í Kína þar sem heimsmeistaramóti landsliða með þátttöku tíu liða var að ljúka sýndu Armenar úr hverju þeir eru gerðir og sigruðu örugglega. Lokaniðurstaðan varð þessi:

1. Armenía 14 stig (22½ v.). 2. Kína 13 stig (22½ v.). 3. Úkraína 12 stig (19½ v.). 4. Rússland 10 stig ( 21½ v.).

Úrslitin ollu miklum vonbrigðum í Rússlandi því strax eftir mótið var landsliðsþjálfarinn Evgeny Bareev látinn taka pokann sinn. Ýmsir, þ.á m. Anatolí Karpov, hafa látið í ljós áhyggjur vegna hnignandi veldis Rússa á skáksviðinu. Armenar mæta alltaf til leiks með mikinn metnað í flokkakeppnir. Lev Aronjan var á 1. borði en aðrir í sveitinni voru Movsesian, Akopjan, Sargissian og Hovhannisjan.

Gamall vinur Íslendinga, Yasser Seirwan, átti endurkomu mótsins, hlaut 4½ v. af sjö mögulegum fyrir bandaríska liðið. Hann hefur ekki teflt opinberlega í um 10 ár og hefur sennilega velt því fyrir sér hvort eitthvað hafi breyst á meðan hann var í burtu. Skákdrottningin Judit Polgar hafði a.m.k. ekkert nýtt fram að færa þegar Ungverjar mættu Bandaríkjamönnum í 6. umferð:

Heimsmeistaramót landsliða 2011:

Yasser Seirwan -Judit Polgar

Nimzoindversk vörn

1. d4 Rf6 2. c4 e6 3. Rc3 Bb4 4. Dc2 O-O 5. a3 Bxc3 6. Dxc3 d6 7. Bg5 Rbd7 8. e3 b6 9. Re2 Ba6 10. Dc2 c5 11. dxc5 bxc5 12. Rc3 Db6 13. O-O-O

Þessi byrjun hlýtur að hafa verkað þægilega á Yasser; en svona tefldu menn oft á árunum í kringum 1990.

13. ... Bb7 14. e4 Hab8 15. Hd2 Hfc8 16. Be2 Re8 17. f4 Rf8 18. Hhd1 f6 19. Bh4 Rg6 20. g3!

Snjall leikur. Eftir 20. ... Rxh4 21. gxh4 getur hvítur sótt eftir opinni g-línu.

20. ... Hd8 21. Bg4 e5 22. Be6+ Kf8 23. f5 Re7 24. g4!

Skyndilega er svarta staðan orðin afar óvirk.

24. ... h6 25. Bf2 Rc6 26. Rd5 Da5 27. h4 Rd4 28. Bxd4 cxd4 29. g5 Bxd5 30. exd5 hxg5 31. hxg5 fxg5

(SJÁ STÖÐUMYND)

32. f6!

Leikur peði beint ofan í þrælvaldaðan reit.

32. ... Hxb2

Þessi gagnatlaga er dæmd til að mistakast en hvað var til ráða? 32. .... gxf6 er svarað með 33. Dh7! og vinnur og þá er 32. ... Rxf6 svarað með 33. Dg6 Hb7 34. Hh1! vinnur strax.

33. Kxb2 Rxf6 34. Ka2 Dc7 35. Hg2 Hc8 36. Bxc8 Dxc8 37. Hxg5 Rxd5 38. Df5 Dxf5 39. Hxf5 Rf6 40. c5 Ke7 41. c6 Rd5 42. Hg1 d3 43. Kb3 Ke6 44. Hfg5

- Ekki besti dagur Juditar sem gafst loksins upp.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum, 7. ágúst 2011.

Skákþættir Morgunblaðsins

Skákþættir Morgunblaðsins | Breytt 6.8.2011 kl. 21:19 | Slóð | Facebook | Athugasemdir (0)

13.8.2011 | 00:39

Ætlar að verða heimsmeistari - Ungur Akureyringur gerir það gott í skákinni

Þrátt fyrir að vera einungis ellefu ára gamall hefur Akureyringurinn Jón Kristinn Þorgeirsson þegar náð miklum árangri á vettvangi skáklistarinnar og meðal annars unnið flest þau skákmót sem hann hefur tekið þátt í. Þannig varð hann til að mynda efstur í flokki drengja 11 til 14 ára á Unglingalandsmóti Ungmennafélags Íslands sem fram fór á Egilsstöðum um verslunarmannahelgina. Ennfremur fékk hann flest stig allra sem kepptu og var eini keppandinn sem fékk fullt hús stiga.

Um næstu helgi mun Jón Kristinn keppa fyrir Íslands hönd í landskeppni við Færeyjar sem fram fer að þessu sinni á Húsavík og Akureyri. Hann verður þar með langyngsti keppandinn sem tekið hefur þátt í keppninni sem fram fer að þessu sinni í sautjánda sinn en fyrst var keppt í henni árið 1978.

Fischer í uppáhaldi

„Ég byrjaði að æfa í september 2008 eftir að pabbi minn kenndi mér mannganginn. Síðan fór ég bara að hafa áhuga á þessu," segir Jón Kristinn aðspurður hvernig það hafi komið til að hann hóf að æfa skák. Hann var síðan orðinn Íslandsmeistari í sínum flokki í janúar 2009 þannig að óhætt er að segja að árangurinn hafi ekki látið standa á sér.

Jón Kristinn hefur meðal annars þjálfað sig í skákinni með því að spila skákleiki á netinu og einnig hefur hann sótt æfingar á vegum Skákfélags Akureyrar þar sem hann er félagi. Vinir hans taka stundum í skák með honum líka að hans sögn. Hann segist yfirleitt vinna þá og sömuleiðis tölvuna nema ef leikirnir eru í hæstu styrkleikaflokkum.

Jón Kristinn ætlar að halda áfram að sinna skáklistinni og bæta sig í þeim efnum og markmiðið er ekki af verri endanum heldur er stefnan að fara alla leið. „Ég stefni á meira en það, ég stefni á að verða heimsmeistari, " segir hann aðspurður hvort markmiðið sé að verða íslenskur stórmeistari. Þar með myndi hann feta í fótspor þess skákmeistara sem hann segir að sé í mestu uppáhaldi, Bobbys Fischer, sem varð sem kunnugt er heimsmeistari árið 1972 á heimsmeistaramótinu sem fram fór í Reykjavík.

Foreldrar Jóns Kristins eru þau María Stefánsdóttir stuðningsfulltrúi og Þorgeir Smári Jónsson, fiskvinnslumaður frá Munkaþverá í Eyjafjarðarsveit.

----------------------

Grein þessi birtist á baksíðu Morgunblaðsins 5. ágúst 2011. Höfundur er Hjörtur J. Guðmundsson. Myndin er tekin af Skapta Hallgrímssyni. Skák.is kann Morgunblaðinu, Hirti og Skapta bestur þakkir fyrir að leyfa birtingu á Skák.is.

Skákþættir Morgunblaðsins | Slóð | Facebook | Athugasemdir (0)

31.7.2011 | 20:00

Skákþáttur Morgunblaðsins: Annar áfangi Hjörvars

Hjörvar Steinn Grétarsson náði sínum öðrum áfanga að alþjóðlegum meistaratitli þegar hann varð í 3.-7. sæti á opna mótinu í Suður-Wales á dögunum. Hjörvar hlaut 6½ vinning af níu mögulegum. Sigurvegarar urðu þeir Peter Wells og Keith Arkell sem hlutu 7 vinninga, en þeim fyrrnefnda var dæmdur sigur á stigum. Búast má við því að Hjörvar nái lokaáfanganum að alþjóðlega titlinum á þessu ári, en á verkefnalista framundan er Evrópukeppni taflfélaga og jafnvel Evrópukeppni landsliða.

Auk Hjörvars tefldu fjórir ungir íslenskir skákmenn á mótinu í Wales og stóðu sig allir með mikilli prýði. Þannig var árangur Arnar Leós Jóhannssonar eftirtektarverður, en hann hlaut 6 vinninga og hafnaði í 8.-9. sæti af 69 keppendum. Eyjamaðurinn Nökkvi Sverrisson hlaut 5 vinninga og varð í 21.-25. sæti, Guðmundur Kristinn Lee fékk 4 vinninga og varð í 37.-49. sæti. Óskar Long Einarsson og Birkir Karl Sigurðsson hlutu 3½ vinning og urðu í 50.-57. sæti.

Hjörvar tefldi margar skemmtilegar skákir á mótinu en stysta sigurskákin kom í fimmtu umferð:

Opna Suður-Wales-mótið 2011:

Hjörvar Steinn Grétarsson - Jack Rudd

Benony - byrjun

1. d4 Rf6 2. c4 e6 3. Rc3 c5 4. d5 exd5 5. cxd5 d6 6. Rf3 g6 7. Da4+!?

Athyglisverður leikur sem getur reynst erfður viðfangs ef menn eru ekki með á nótunum. Algengara er 7. Bf4, 7. Rd2, 7. e4 eða 7. g3.

7. ... Rbd7

7. ... Bd7 er vel svarað með 8. Db3.

8. Bf4 a6 9. e4 Rh5 10. Bg5 Dc7?

Betra var 10. ... Be7.

11. g4! h6

Riddarinn stendur hörmulega á g7 en ekki gengur 11. ... Rgf6 vegna 12. Bxf6 og riddarinn á d7 er leppur.

12. gxh5 hxg5 13. hxg6 f6

14. e5!

Að leika peði beint ofan í þrælvaldaðan reit kom margoft fyrir í skákum Kasparovs. Hugmyndin í þessu tilviki er að rýma e4-reitinn fyrir riddarann. Hér kemur til greina að leika 14. ... g4 sem Hjörvar hugðist svara með 15. exf6! gxf3 16. g7 o.s. frv.

14. ... dxe5 15. Re4 b5 16. Bxb5 axb5 17. Dxa8 g4 18. Rfd2 Db7

Eða 18. ... Rb6 19. Da5.

19. Dxb7 Bxb7 20. g7!

- og svartur gafst upp.

Magnús efstur í Biel

Magnús Carlsen hefur forystu þegar tefldar hafa verið þrjár umferðir í stórmeistaraflokki skákhátíðarinnar í Biel í Sviss. Sex skákmenn tefla tvöfalda umferð og hefur Magnús hlotið 2½ v. eða 7 stig, en á þessu móti hefur þriggja stiga kerfið fyrir sigur verið tekið upp. Morozevich kemur næstur með 2 vinninga og 5 stig og síðan Alexei Shirov sem er með 1½ v. og 4 stig. Magnús hóf mótið með því að vinna heimamanninn Pelletier og síðan lagði hann Shirov að velli í aðeins 33 leikjum og var ekki langt frá því að leggja Morozevich í 3. umferð en skákinni lauk með jafntefli.

Í heimsmeistarakeppni landsliða sem fram fer þessa dagana í Ningbo í Kína hafa Armenar með Lev Aronjan á 1. borði náð öruggri forystu eftir fimm umferðir með 8 stig og 13½ vinning af 20 mögulegum. Rússar koma næstir með 7 stig og 12 vinninga og í 3. sæti eru Ungverjar með 7 stig og 11½ vinning.

Alls taka tíu lið þátt í þessari keppni, þátttökuréttur miðast við fimm efstu lið frá síðasta Ólympíumóti og fimm „heimsálfulið". Íslendingar komust í þessa keppni þegar hún var haldin í Luzern árið 1993.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum, 24. júlí 2011.

Skákþættir Morgunblaðsins

Skákþættir Morgunblaðsins | Breytt 27.7.2011 kl. 16:55 | Slóð | Facebook | Athugasemdir (0)

3.7.2011 | 20:00

Skákþáttur Morgunblaðsins: Magnús Carlsen endurheimti efsta sæti heimslistans

Magnús Carlsen tyllti sér aftur í efsta sæti heimslistans þegar hann sigraði á skákmótinu í Medias í Rúmeníu sem lauk í vikunni. Magnús deildi raunar efsta sætinu með Úkraínumanninum Sergei Karjakin en telst sigurvegari ef reiknuð eru Sonneborg-Berger stig.

Magnús er eftir mótið með 2821 elo-stig en heimsmeistarinn Anand er með 2817 elo-stig. Þetta er óverulegur munur en mikilvægur fyrir Norðmanninn í samhengi við stóran auglýsingasamning sem hann hefur gert við tískuhúsið G-Star RAW.

Þetta er annað stórmót Magnúsar í ár en síðast tefldi hann á Cours-mótinu í Wijk aan Zee í janúar sl. Sigurvegarinn þaðan, Nakamura, var mættur til leiks og einnig stjarna síðasta Ólympíumóts, Vasilí Ivantsjúk. En þeir náðu sér þó aldrei á strik en Karjakin tókst með góðum endaspretti að ná Magnúsi. Lokastaðan varð þessi:

1. - 2. Magnús Carlsen og Sergei Karjakin 6 ½ v. (af 10) 3. - 4. Teimur Radjabov og Hikaru Nakamura 4 ½ v. 5 - 6. Vasilí Ivantsjúk og Liviu Nisipeanu 4 v.

Magnús Carlsen tók ekki þátt í áskorendakeppninni sem lauk með sigri Boris Gelfands í maí sl. Keppnisfyrirkomulagið þar var ekki gott og þarfnast róttækra breytinga. Um taflmennsku sigurvegarans er það að segja, að heilmikið vantaði upp á tilþrifin. Magnúsi tókst að snúa Ivantsjúk og Nisipeanu niður í jafnteflislegum endatöflum en strax í fyrstu umferð lagði hann sigurvegarann frá Wijk aan Zee í snarpri sóknarskák.

Magnús Carlsen - Hikaru Nakamura

Drottningarbragð

1. d4 d5 2. c4 e6 3. Rc3 Be7 4. cxd5 exd5 5. Bf4 c6 6. Dc2

Algengara er 6. e3 Bf5 7. g4!? Hér kemur sterklega til greina að leika 6. ... Ra6.

6. ... Bg4 7. e3 Bh5 8. Bd3 Bg6 9. Bxg6 hxg6 10. O-O-O Rf6 11. f3 Rbd7 12. Rge2 b5 13. e4 b4 14. Ra4 dxe4 15. fxe4 Da5 16. Kb1 O-O 17. h4!

Kasparov hefði verið fullsæmdur af þessum leik sem minnir á að peð geta líka verið öflugir sóknarmenn.

17. ... Hfe8 18. e5 Rd5?

Liggur beinast við en betra var 18. ... Rg4 sem hótar 19. ... Rf2.

19. h5 g5 20. h6!

Óþægilegur hnykkur. Ekki gengur 20. ... gxf4 vegna 21. hxg7 og vinnur.

20. ... g6 21. Bc1 R7b6 22. Rc5 Bxc5 23. dxc5 b3!?

Nakamura er mikill snillingur í að hrista upp í erfiðum stöðum. Nú strandar 24. axb3 á 24. ... Rb4 og vinnur.

24. Dxb3 Dxc5 25. Rd4! Hxe5 26. Rf3 He2 27. Rxg5!

Þessi riddari er stórhættulegur með h-peðið sér við hlið. Varnarstaðan á drottningarvæng minnir á reglu Capablanca: sé liðsaflinn til varnar a.m.k. jafn - og kóngurinn er tekinn með - dugar það oftast.

27. ... De7 28. Dd3 Hf8 29. Hdf1 f5

Hvítur hótaði 30. Rxf7 o.s.frv.

30. g4!

Aftur leggur peð til sóknar.

30. ... Ra4 31. Dd4 De5 32. Dxe5 Hxe5 33. gxf5 gxf5 34. Rf3! He7 35. Hfg1+ Kh7

Eða 35. ... Kh8 36. Rh4 og vinnur.

- sjá stöðumynd -

36. Hg7+! Kh8 37. Hhg1 Hfe8 38. Rh4 Hxg7

- og gafst upp m leið. Framhaldið gæti orðið: 39. hxg7 He7 40. Rg6+ og vinnur.

Rúnar sigraði í Djúpavík

Rúnar Sigurpálsson sigraði á aðalmóti Skákhátíðarinnar á Ströndum sem Hrókurinn stóð fyrir. Þetta var í fjórða sinn sem þessi skákhátíð er haldin. Rúnar fékk 8 ½ vinning úr níu skákum og skaut aftur fyrir sig sigurvegara mótsins 2010, Jóhanni Hjartarsyni. Alls tóku 43 skákmenn þátt í mótinu sem að þessu sinni fór fram í Trékyllisvík.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum, 26. júní 2011.

Skákþættir Morgunblaðsins

Skákþættir Morgunblaðsins | Breytt s.d. kl. 16:16 | Slóð | Facebook | Athugasemdir (0)

26.6.2011 | 20:00

Skákþáttur Morgunblaðsins: Hjörvar Steinn tók áfanga í Búdapest

Undanfarin ár hefur sigursælasti skákmaður Íslendinga undir tvítugu verið Hjörvar Steinn Grétarsson. Furðu treglega hefur gengið hjá piltinum að krækja sér í áfanga að alþjóðlegum meistaratitli þar sem legið hefur í augum uppi að styrkleikinn hefur verið til staðar um alllangt skeið. Hjörvar réð bót á þessu á dögunum þegar hann tók þátt í stórmeistaraflokki innan mótasyrpu sem gengur undir nafninu „Fyrsti laugardagur" og er haldin í Búdapest allt árið um kring. Með honum í för voru þeir Daði Ómarsson, sem tefldi í flokki alþjóðlegra meistara, og Eyjamaðurinn Nökkvi Sverrisson sem tefldi í flokki FIDE-meistara.

Hjörvar var búinn að ná áfanganum eftir sjö umferðir og með því að vinna tvær síðustu skákirnar gegn sterkum stórmeisturum gat hann náð áfanga að stórmeistaratitli. Hann var nálægt því að leggja Levente Vajda að velli með svörtu í næstsíðustu umferð og gerði svo jafntefli í lokaumferðinni. Lokaniðurstaðan varð 2. sæti í keppni tíu skákmanna þar sem meðalstigin voru 2.412 stig en Hjörvar hækkaði um elo-20 stig fyrirframmistöðuna. Sigurvegari í þessum flokki var heimamaðurinn Oliver Mikhof með 6½ vinning. Hjörvar byrjaði illa, tapaði í fyrstu umferð en fékk 4½ vinning úr næstu fimm skákum. Hann var ekki alltaf að þræða troðnar slóðir eins og eftirfarandi skák ber með sér en greip tækifærið þegar það gafst. Í fjórðu umferð lagði hann þýskan skákmann að velli eftir að hafa sloppið úr smá klandri í byrjuninni.

Daniel Sidentorpf - Hjörvar Steinn Grétarsson

Sikileyjarvörn

1. e4 c5 2. Rf3 g6 3. c3 Bg7 4. d4 cxd4 5. cxd4 d5 6. exd5 Rf6 7. Bb5+ Bd7

Algengara er 7.... Rbd7 8. d6!? exd6 9. De2+ De7 10. Bf4 og hvítur fær aðeins betra endatafl.

8. Bc4 b5 9. Bb3 0-0 10. 0-0 Bf5 11. De2 a6 12. Re5

Gott er einnig 12. Rc3 því eftir 12.... b4 13. Ra4 gengur 13. .... Rxd5 ekki vegna 14. Bxd5 Dxd5 15. Rb6 og vinnur skiptamun.

12.... Rxd5 13. Rc3 Be6 14. Df3 Rc7 15. d5

Gott var einnig 15. Bxe6 fxe6 16. Dg4 og svarta staðan er erfið.

15.... Bxe5 16. dxe6 fxe6 17. De4?

Hér var sjálfsagt að eika 17. Bxe6+! Kh8 18. Hd1! o.s.frv.

17.... Dd4 18. De2?

Enn var best að leika 18. Bxe6+. Nú er svartur sloppinn.

18.... Rc6 19. Re4 Bg7 20. Hd1 De5 21. f4

Hvítur vill greinilega að „spila" kringum e6-peðið en fær á sig sendingu úr óvæntri átt.

21.... Rd4! 22. De3 Hxf4!

Hvítur á ekki yfir þessu, 23. Dxf4 strandar vitaskuld á 23.... Re2+.

23. Rc3 Hff8 24. Dxe5 Bxe5 25. Bg5 Rxb3 26. axb3 Bd6 27. Hd3 Had8 28. Re4? Bxh2+!

Gerir út um taflið.

29. Kxh2 Hxd3 30. Bxe7 Hf7 31. Bg5 Hd4 32. Rc3 Hf5 33. Be3 Hb4 34. Rd1 Rd5

- og hvítur gafst upp.

Daði Ómarsson lenti í 10. sæti af 12 keppendum í sínum fokki með 4 v. af 11 mögulegum en Nökkvi Sverrisson bætti sig verulega, hafnaði í 5. sæti með 6 vinninga og hækkaði um 30 elo-stig.

Magnús Carlsen efstur í Rúmeníu

Norðmaðurinn Magnús Carlsen hefur ekki teflt síðan á Wijk aan Zee-mótinu í janúar en er nú sestur að tafli á sterku 6-manna móti í Medias Rúmeníu. Eftir fyrri helming þess er hann efstur með 3½ vinning á undan Karjakin sem er með 3 vinninga og Nakamura sem er í 3. sæti með 2½ vinning. Ivantsjúk er í 4.-6. sæti með 2 vinninga.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum, 19. júní 2011.

Skákþættir Morgunblaðsins

Skákþættir Morgunblaðsins | Breytt 3.7.2011 kl. 16:16 | Slóð | Facebook | Athugasemdir (0)

13.6.2011 | 00:58

Skákþáttur Morgunblaðsins: Gylfi Þórhallsson heiðursfélagi SÍ

Gylfi Þórhallsson, einn fremsti skákmaður Norðlendinga um áratuga skeið, var lýstur heiðursfélagi Skáksambands Íslands á þingi SÍ sem haldið var um síðustu helgi. Allir fundargestir fögnuðu því að Gylfi skyldi vera heiðraður með þessum hætti. Gylfi hefur á löngum ferli unnið Skákþing Norðlendinga átta sinnum og 14 sinnum hefur hann borið sæmdarheitið skákmeistari Akureyrar. Hann hefur setið í stjórn Skákfélags Akureyrar í 27 ár, þar af 15 ár sem formaður og verið kjölfestan í öflugu barna- og unglingastarfi félagsins.

Um Gylfa má viðhafa sömu orð og Helgi Sæmundsson hafði um Jóhann Þóri Jónsson; að í skákinni hafi hann fundið gullæð í gráu bergi. Bestu skákir Gylfa snúast um dirfsku og glæsileg sóknartilþrif. Gylfi tók þátt í fyrstu viðureign Íslandsmóts taflfélaga sem fram fór á Akureyri haustið 1974. Þá mættu TR-ingar til leiks með Friðrik Ólafsson og Guðmund Sigurjónsson og nokkrar vonarstjörnur aðrar en það var gamli skákkennari Gylfa, Júlíus Bogason, sem tók á móti TR-liðinu á Akureyrarflugvelli. Gylfi hefur síðan teflt sleitulaust í þessari skemmtilegu flokkakeppni og aðeins misst úr þrjár skákir.

Þegar kemur að því að velja eina af mörgum snjöllum sóknarskákum Gylfa beinist athygli að sigurskák hans yfir sænska stórmeistaranum Thomas Ernst. Skákin var tefldi á einu þeirra móta sem Arnold Eikrem hélt í Gausdal í Noregi en þangað gerðu margir íslenskir skákmenn góða ferð á níunda og tíunda áratug síðustu aldar. Ernst var á þessum árum þekktur fyrir gríðarlega byrjanaþekkingu og ekki auðvelt að slá hann út af laginu á því sviði. Það tókst Gylfa samt sem áður með frekar óhefðbundinni uppbyggingu stöðu sinnar.

Gausdal 1992:

Gylfi Þórhallsson – Thomas Ernst

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 Rc6 6. Be2 g6 7. O-O Bg7 8. Be3 O-O 9. h3 Bd7 10. Dd2 He8 11. Hfe1 Hc8 12. Had1 Re5 13. f4 Rc6 14. Rf3 Dc7 15. a3 Hed8 16. Rg5!?

„Gylfaginning“. Svartur lætur hjá líða að hrekja þennan riddara af höndum sér með 16. ... h6 sennilega vegna þess að það veikir peðastöðuna örlítið kóngsmegin.

16. ... Ra5 17. Bd3 e6 18. Df2 b6 19. e5!

Hvítur hefur komið mönnum sínum haganlega fyrir. Þessi peðaframrás á fullan rétt á sér. Ef 19. ... Re8 þá kemur 20. f5! t.d. 20. .. gxf5 21. Bxf5! með óstöðvandi sókn, t.d. 21. ... exf5 22. Rd5! Dxc2 23. Re7+! Kf8 24. Rxh7+! Kxe7 25. exd6+ Ke6 26. Bg5+ Be5 27. Rf8 mát!

19. ... dxe5 20. fxe5 Dxe5 21. Rxf7!

Glæsilega leikið.

21. ... Kxf7 22. Bd4 Dh5 23. He5!?

Einfaldara var 23. Bxf6 Bxf6 24. Re4 De5 25. Hf1 og vinnur.

23. ... g5 24. Hxa5! bxa5 25. Bxf6 Bxf6 26. Hf1 Dh6 27. Re4

Ef leiðin sem Gylfa valdi er borin saman við útreikninga öflugs forrits á borð við „Rybku“ þá er matið lengi þannig að allt sé í himnalagi hjá Ernst þar til 29. leikurinn birtist.

27. ... Ke7 28. Rxf6 Hf8

29. Rg8+!

Smiðshöggið.

29. ... Hxg8 30. Df7+ Kd6 31. Hd1 Hg7 32. Ba6+! Ke5 33. Df2!

Hótar 32. Dd4+ Kf5 33. Bd3 mát.

33. ... Dh4 34. g3 Hxc2 35. He1+ Kd5 36. Bb7+ Kd6 37. Df8+ Kc7 38. gxh4 Hg6 39. h5! Kxb7 40. hxg6

- og svartur gafst upp.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum, 5. júní 2011.

Skákþættir Morgunblaðsins

Skákþættir Morgunblaðsins | Slóð | Facebook | Athugasemdir (0)

Færsluflokkur: Skákþættir Morgunblaðsins

Ætlar að kenna bróður sínum

Á heimsmælikvarða

Fischer í uppáhaldi

Magnús efstur í Biel

Rúnar sigraði í Djúpavík

Magnús Carlsen efstur í Rúmeníu

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: