Antoniewski í TV

Pólski stórmeistarinn Rafal Antoniewski (2538) er genginn til liðs við Taflfélag Vestmannaeyja. Hann hefur hæst náð 2614 elóstigum á júlí stigalistanum 2010. Antoniewski  bætist við fríðan hóp stórmeistara í TV eins og Alexey Dreev (2677), Jon Ludvig Hammer (2638), Jan Gustafsson (2629), Kamil Miton (2623), Mikhali Gurevich (2596), Sebastien Maze (2573), Helga Ólafsson (2547) og Henrik Danielsen (2511).

Youtube-myndbönd frá kappanum

• http://www.youtube.com/watch?v=V6Z9aZ2L0lk

• http://www.youtube.com/watch?v=CW2pPLR3jQ4

   

Helgi Áss gerist Goði

Skammt er stórra högg milli hjá Goðanum því að í dag gekk Helgi Áss Grétarsson, stórmeistari og fyrrum heimsmeistari ungmenna, til liðs við Goðann. Helgi Áss er annar íslenski stórmeistarinn sem gengur Goðanum á hönd og hittir þar fyrir félaga sinn, Þröst Þórhallsson, sem nýgenginn er í félagið.

Ljóst er að Goðanum er gríðarlegur liðsauki að Helga og munar um minna þegar hin knáa A-sveit Goðans þreytir frumraun sína í 1. deild Íslandsmótsins í haust í baráttu við firnasterka keppinauta. Hermann Aðalsteinsson, formaður Goðans:  „Þetta eru mikil gleðitíðindi. Við Goðar erum sannarlega stoltir af því að þessi  öflugi og fjölhæfi skákmaður laðist að þeirri skákmenningu og umgjörð sem við höfum upp á að bjóða. Við hlökkum til að njóta atfylgis Helga og gerumst nú enn upplitsdjarfari þegar horft er til komandi leiktíðar. Með inngöngu Helga Áss og Þrastar í félagið er sterkum stoðum rennt undir framtíð Goðans meðal fremstu skákfélaga á landinu."  

Skákferill Helga Áss er glæsilegur. Árið 1994, þegar Helgi var sautján vetra, varð hann heimsmeistari ungmenna 20 ára og yngri í skák og hlaut um leið nafnbótina stórmeistari. Helgi hefur náð prýðis árangri á alþjóðlegum mótum, deildi t.d. efsta sætinu á Politiken Cup í Kaupmannahöfn árið 1997 og var á meðal efstu manna á Reykjavíkurskákmótunum 1994 og 2002. Hann hafnaði fjórum sinnum í öðru sæti í landsliðsflokki á Skákþingi Íslands, síðast árið 2004, og varð skákmeistari Taflfélags Reykjavíkur tvö ár í röð, 1991 og 1992. Helgi varð tvívegis Íslandsmeistari í atskák og hefur einnig tvívegis orðið hraðskákmeistari Íslands, síðast árið 2006. Þá náði hann tvisvar sinnum 2. sæti á heimsmeistaramótum barna- og unglinga, u-14 árið 1991 og u-16 árið 1993. Helgi varð þrefaldur Norðurlandameistari í einstaklingskeppni í skólaskák, síðast árið 1992, og er margfaldur Íslandsmeistari barna- og unglinga frá árunum 1988-1993. Loks má geta þess að Helgi hefur fjórum sinnum teflt fyrir hönd þjóðar sinnar Ólympíumótinu í skák.

Helgi Áss Grétarsson: "Sú blanda af samheldni,  glaðværð og fræðimennsku sem einkennir félagið veldur miklu um ákvörðun mína að ganga því á hönd. Ég hlakka til að leggja mitt af mörkum í þessum öfluga hópi."

Stjórn og liðsmenn Goðans bjóða Helga Áss Grétarsson velkominn í sínar raðir. 

Íslandsmeistarinn í Goðann

Þröstur Þórhallsson, stórmeistari og nýbakaður Íslandsmeistari í skák, hefur gengið til liðs við skákfélagið Goðann. Vart þarf að orðlengja að félaginu er mikill akkur í liðsinni svo öflugs skákmeistara, ekki síst í ljósi þess að hin eitilharða A-sveit Goðans þreytir frumraun sína meðal bestu skáksveita landsins í 1. deild Íslandsmótsins á næstu leiktíð. Hermann Aðalsteinsson, formaður Goðans: „Okkur er í senn heiður og styrkur að komu Íslandsmeistarans í okkar raðir og hlökkum til að njóta snilldar hans, reynslu og þekkingar. Með inngöngu Þrastar í Goðann færumst við nær því markmiði að festa Goðann í sessi meðal fremstu skákfélaga á landinu."  

Skákferill Þrastar er langur og afrekin mörg. Hann var útnefndur alþjóðlegur stórmeistari í skák árið 1996. Fyrsta áfanganum náði Þröstur í Gausdal í Noregi árið 1991 og annar áfanginn vannst í Oakham í Englandi árið 1994. Þriðji áfanginn kom strax í kjölfarið með sigri á Péturs Gauts mótinu í Gausdal árið 1995 en meðal þátttakenda þar voru kunnir kappar á borð við Margeir Pétursson og Emil Sutovsky sem Þröstur lagði eftirminnilega.
 
Þröstur hefur orðið Reykjavíkurmeisari í skák alls 6 sinnum og hefur einnig áunnið sér titilinn haustmeistari TR nokkrum sinnum. Hann er margfaldur Norðurlandameistari í skólaskák, bæði í keppni sveita og einstaklinga, en þann titil vann hann fyrstur Íslendinga er hann sigraði í flokki 11-12 ára árið 1982 í Asker í Noregi. Þröstur varð einnig þrásinnis Íslandsmeistari í skólaskák með sveitum Hvassaleitisskóla, Verslunarskóla Íslands og Menntaskólans í Hamrahlíð. Hann hefur teflt alls 9 sinnum fyrir Íslands hönd á Ólympíuleikunum í skák og stefnir að því að tefla í 10 skiptið fyrir hönd þjóðar sinnar á Ólympíuleikunum í Istanbul í haust, en Þröstur vann sér sæti í landsliðinu með sigrinum í Íslandsmótinu á dögunum.
 
Þröstur Þórhallsson: ´"Ég hef hrifist af uppgangi Goðans á undanförnum misserum, því skemmtilega félagsstarfi sem þar fer fram og góðum liðsanda. Einnig er mikil rækt lögð við skákfræðin undir forystu Einars Hjalta Jenssonar, sem aðstoðaði mig einmitt í einvíginu um Íslandsmeistaratitilinn. Ég hlakka til að leggja mitt af mörkum í hópi vaskra skákmanna Goðans sem ég þekki marga hverja mjög vel allt frá unglingsárum".    
 
Stjórn og liðsmenn Goðans bjóða Þröst Þórhallsson velkominn í sínar raðir.  

Hannes Hlífar gengur í Víkingaklúbbinn

Stórmeistarinn Hannes Hlífar Stefánsson (2531) einn sigursælasti íslenski skákmaður síðustu ára gekk i dag til liðs við Víkingaklúbbinn. Öþarfi er að telja upp öll afrek Hannesar á síðustu árum, en hann er margfaldur Íslandsmeistari og hefur jafnframt unnið Reykjavíkurskákmótið oftar en nokkur annar skákmaður. Hannes á eftir að styrkja Víkingaklúbbinn gríðarlega í baráttunni í efstu deild á Íslandsmóti skákfélaga.

Björn Þorfinnsson gengur í Víkingaklúbbinn

Alþjóðlegi meistarinn Björn Þorfinnsson (2416) gekk í kvöld í raðir Víkingaklúbbsins. Björn verður klúbbnum gífurlegur liðstyrkur fyrir átökin í efstu deild næsta keppnistímabil, en Björn var áður félagsmaður í Taflfélagi Helli og hefur auk þess unnið gott starf fyrir skákhreyfinguna.  Meðal annars var hann forseti Skáksambands Íslands en hann tók við embættinu í maí 2008 af Guðfríði Lilju Grétarsdóttur.

Fjör á félagaskiptamarkaði

Gífurlegt fjör var á félagaskiptamarkaði á síðustu dögum áður en hann rann út.  Á það bæði við innlenda og erlenda skákmenn.   Taflfélag Reykjavíkur fer mestan í nýskráningu nýrra félaga og má þar nefna fyrrverandi heimsmeistarann, Karpov, Judith Polgar og hina mjög svo stigaháu Gashimov og Kamsky.   Sokolov er genginn til liðs við Helli og Salgado Lopez í TV.  Stærstu innlendu félagaskiptin á lokadögunum voru án efa skipti Karl Þorsteins úr Helli í TR.

En hér er samantekt um helstu félagaskiptin.  Rétt er að hafa í huga að skrifstofa SÍ hefur ekki staðfest öll félagaskiptin enn.

Erlend félagaskipti/nýskráningar:

Skákfélag Akureyrar:

• IM John Rödgaad (2343)
• WIM Fiona Steil-Antoni (2096)

Taflfélag Garðabæjar

• IM Vladimir Poley (2325)

Skákfélagið Goðinn

• Stephan Jablon (1965)

Taflfélagið Hellir

• GM Ivan Sokolov (2673)
• GM Alexandr Fier (2583)
• GM Simon Williams (2512)

Skákdeild KR

• GM Joshua Friedel (2518)

Taflfélagið Mátar

• GM Gawain Jones (2624)
• GM Dragan Kosic (2495)
• GM Vladimir Kostic (2433)
• IM Nikoljai Mikkelsen (2384)
• WIM Sue Maroroa (1987)

Taflfélag Reykjavíkur

• GM Vugar Gashimov (2756)
• GM Gata Kamsky (2756)
• GM Judit Polgar (2701)
• GM Emil Sutovsky (2690)
• GM Yuriy Kryvoruchko (2666)
• GM Jan Smeets (2619)
• GM Anatoly Karpov (2617)
• GM Kravtsiv Martyn (2583)
• GM Vasily Papin (2583)
• GM Mykhaylo Oleksienko (2563)
• IM Jakob Van Glud (2496)
• IM Helgi Dam Ziska (2460)

Skákfélag Íslands

• GM Roman Slobodjan (2535)
• Bernd Salewski (2048)
• Dennis Calder (1953)

Taflfélag Vestmannaeyja

• GM Ivan Salgado Lopez (2614)

Víkingaklúbburinn

• GM Luis Galego (2477)
• IM Jan-Willem de Jong (2424)
• WGM Bianca Muhren (2307)

Sjá nánar um erlend félagaskipti hér.

Innlend félagaskipti/nýskráningar:

Mörg félagaskipti og nýskráningar í félög áttu sér stað í september.  Hér eru nokkur athyglisverð:

Taflfélagið Mátar

• Guðni Ágústsson
• Illugi Gunnarsson
• Guðjón Guðmundsson

Skákfélag Íslands

• Sigurður G. Daníelsson
• Jóhannes Björn Lúðvíksson
• Halldór Garðarsson

Taflfélag Reykjavíkur

• Karl Þorsteins
• Sigurjón Haraldsson

Taflfélag Vestamannaeyja

• Tómas Veigar Sigurðarson

Skákfélag Vinjar

• Hörður Garðarsson

Sjá nánar um innlend félagaskipti hér.

Nýir liðsmenn Taflfélags Reykjavíkur

Stórveldi Taflfélags Reykjavíkur er nú að rísa úr öskunni eins og slíkra er siður. Með það í huga hafa, nú á síðustu dögum, margir góðir skákmenn gengið til liðs við félagið, einkum þó af erlendum uppruna.

Meðal nýrra liðsmanna eru fyrrverandi heimsmeistari, Anatoly Karpov (eló 2617), fyrrum Evrópumeistari, Emil Sutovsky (2690), besta skákkona sögunnar og einn besti skákmaður heims, Júdít Polgar (2701), einn af bestu skákmönnum heims, Rússinn Vugar Gashimov (2756), hollenski stórmeistarinn Jan Smeets (2617), úkraínski stórmeistarinn Yuriy Kryvoruchko (2666), rússneski stórmeistarinn Vaselí Papin (2581), danski alþjóðameistarinn Jakob Vang Glud (2496), færeyski alþjóðameistarinn Helgi Dam Ziska  (2460), og nokkrir innlendir meistarar.

Með þessu mun Taflfélagið hrista af sér slenið og berjast til sigurs á komandi Íslandsmóti skákfélaga, þar sem margar öflugar sveitir munu etja kappi saman og keppni trúlega verða skemmtileg og spennandi eins og jafnan áður.

 

Tómas Veigar í TV

Tómas Veigar Sigurðarson (1938) er genginn í Taflfélag Vestmannaeyja (TV). Tómas Veigar hefur verið í SA um árabil, fyrir utan eitt ár í Goðanum. Hann hefur  verið  sigursæll á skákmótum norðan heiða undanfarin ár og varð m.a. í 2. sæti í haustmóti SA sl. vetur, er núverandi bikarmeistari SA og meðal efstu manna á SÞN. Tómas Veigar mun án efa styrkja b-lið TV sem hefur sett stefnuna á sigur í 3. deild.

Iván Salgado López í TV

Spænski stórmeistarinn Iván Salgado López (2614) er genginn til liðs við Taflfélag Vestmannaeyja (TV) en skammt er síðan íslenski stórmeistarinn Henrik Danielsen slóst í hóp TV manna. López er 20 ára og þykir efnilegasti skákmaður Spánar. Hann er jafnframt 3. stigahæsti skámaður Spánverja á eftir Shirov og Vallejo Pons.

Lopez var útnefndur stórmeistari aðeins 16 ára að aldri og varð þar með yngsti stórmeistari sögunnar á Spáni en þess má geta að Lópes er af ýmsum talinn einn af fremstu ruðningsmönnun Spánar. Í TV eru fyrir ungstirnin Jon Ludvig Hammer (2601) og Nils Grandelius (2536) sem er aðeins 18 ára.

Sævar í SFÍ

Alþjóðlegi meistarinn, Sævar Bjarnason (2142), hefur gengið frá félagaskiptum yfir í Skákfélag Íslands.  Sævar hefur um langt árabil verið í Taflfélagi Vestmannaeyja en skiptir nú yfir í Skákfélag Íslands og leiðir væntanlega þá sveit í 3. deild í haust.