Rúnar gengur í Skákfélag Íslands

Þrenn félagaskipti hafa átt sér stað síðustu daga og öll tengjast þau Skákfélagi Íslands. Rúnar Berg (2126) hefur gengið til við félagið en hann var síðast í Taflfélaginu Helli.

Páll Andrason (1775) og Eiríkur Örn Brynjarsson (1629) hafa hins vegar sagt sig úr félaginu. Þeir hafa gengið til liðs við Kórdrengina.

 

Vignir Vatnar snýr aftur í TR

Eftir skamma fjarveru hefur Vignir Vatnar Stefánsson gengið aftur í raðir Taflfélags Reykjavíkur ásamt föður sínum, Stefáni Má Péturssyni.  Félagið fagnar endurkomu þeirra feðga og býður þá velkomna í elsta og stærsta skákfélag landsins en þess má til gamans geta að langa langa afi Vignis, Pétur Zophaníasson, var einn af stofnendum þess fyrir 112 árum.

Næst á döfinni hjá Vigni Vatnari er þátttaka í Heimsmeistaramóti ungmenna sem fer fram í Maribor, Slóveníu, dagana 7.-19. nóvember og verður spennandi að fylgjast með gengi hans þar.  Nánari upplýsingar um mótið má finna hér.

Vignir Vatnar gengur til liðs við Skákdeild Fjölnis

Skákdeild Fjölnis bættist  góður liðsauki í dag þegar þeir feðgar Stefán Már Pétursson og Vignir Vatnar Stefánsson gengu til liðs við félagið.

Vignir Vatnar er ekki ókunnur barna-og unglingastarfi Fjölnis því að hann hefur verið duglegur að sækja æfingar skákdeildarinnar á laugardögum og tekið þátt í öllum skákviðburðum deildarinnar. Það var einmitt á TORG-móti Fjölnis 2009 sem Vignir Vatnar, þá 6 ára gamall, sló í gegn og hefur strákurinn síðan verið einstaklega sigurglaður á öllum Fjölnismótum.

Það er Skákdeild Fjölnis mikill fengur að fá þá feðga til liðs við barna- og unglingastarfið sem hefur verið afar blómlegt og árangursríkt í þau 8 ár sem liðin eru frá stofnun deildarinnar en skákdeildin hefur margsinnis notið aðstoðar Stefáns við undibúning og framkvæmd barna- og unglingaskákmóta.

Fjör á félagaskiptamarkaði

Mikið fjör hefur verið á félagaskiptamarkaði síðustu vikur. Skák.is hefur tekið saman félagaskiptabreytingar sem átt hafa sér stað í ágúst og september.  

Stjórn SÍ ákvað að breyta 8. grein reglugerðar Íslandsmót skákfélaga á síðasta stjórnarfundi á þann hátt að taka allan vafa að við sameiningar félaga haldi hið sameinaða félag deildarsætum viðkomandi félaga eins og þau voru réttilega áunnin fyrir sameininguna.  Það þýðir að Goðinn-Mátar heldur deildarsætum bæði Goðans og Máta og þetta mun einnig gilda fyrir sameiningar framtíðarinnar.   

Ljóst er að íslensk taflfélög eru mörg hver ekki á flæðiskeri stödd. Íslenskir skákáhugamenn geta bæði hlakkað til öflugs Íslandsmóts skákfélaga og ekki síður spennandi skákvetrar.  Sleppt er að minnast á félagaskipti kornungra skákmanna (fyrra félag í sviga):

Skáksamband Austurlands:

• Bjarni Jens Kristinsson (Hellir)

Briddsfjelagið:

• Bergsteinn Einarsson (TR)
• Elvar Guðmundsson (TB)
• Kjartan Ingvarsson (Haukar)
• Grímur Grímsson (Hrókurinn)

Goðinn-Mátar

• Guðfríður Lilja Grétarsson (Hellir)
• Snorri Þór Sigurðsson (nýr)
• GM Victor Mikhalevski (Ísrael)
• IM Nikolaj Milkkelsen (Danmörku)

Ekki er taldir þeir upp sem voru fyrir í Mátum

Sauðárkrókur:

• Birgir Örn Steingrímsson (nýr)

Skákfélag Akureyrar:

• Rúnar Ísleifsson (Goðinn)
• Ágúst Bragi Björnsson (Mátar)
• Tómas Veigar Sigurðarson (TV)
• Rúnar Sigurpálsson (Mátar)
• Pétur Gíslason (Goðinn)
• GM Simon Williams (Hellir)

Taflfélag Bolungarvíkur

• Guðni Stefán Pétursson (Fjölnir)
• WGM Svetlana Cherednichenko (Úkraínu)
• GM Yaroslav Zherebukh (Úkraínu)

Taflfélag Reykjavíkur:

• Ólafur Helgi Árnason (nýr)
• GM Erwin L´Ami (Hollandi)
• WGM Alina L´Ami (Rúmeníu)
• WGM Vita Chulivska (Úkraínu)
• Arsenij Zacharov (nýr)
• Andrei Voloktin (Úkraínu)

Taflfélag Vestmannaeyja:

• FM Sigurbjörn Björnsson (Hellir)

Taflfélagið Hellir

• Steinþór Baldursson (nýr)
• Luca Barillaro (Ítalíu)
• GM Amin Bassem (Egyptalandi)

Vin

• FM Róbert Lagerman (Hellir)
• Jörgen Paulus Napatoq (Grænlandi)
• Marteinn Þór Harðarson (Haukar)
• Ingi Tandri Traustason (Haukar)

Víkingaklúbburinn

• GM Stefán Kristjánsson (TB)
• GM Bartosz Socko (Póllandi)
• GM Monika Socko (Póllandi)
• GM Marcin Dziuba (Póllandi)
• GM Grzegorz Gajewski (Póllandi)
• GM Pavel Eljanov (Úkraínu)
• GM Wesley So (Filippseyjum)

Skákfélag Íslands

• IM Jonathan Carlstedt (Þýskalandi)
• FM Thomas Michalczak (Þýskalandi)
• Hugh Titmas (Þýskalandi)
• Uwe Staroske (Þýskalandi)

Nýir félagsmenn SA

Nú á haustdögum hafa fjölmargir magnaðir skákmenn gengið í raðir Skákfélags Akureyrar. Þeim liðsstyrk fagna Norðanmenn. Þetta eru:

• Rúnar Ísleifsson (kemur úr Goðanum)
• Rúnar Sigurpálsson (kemur úr Mátum)
• Tómas Veigar Sigurðarson (kemur úr TV)
• Ágúst Bragi Björnsson (kemur úr Mátum)
• Pétur Gíslason (kemur úr Goðanum)
• Einar Garðar Hjaltason (Kemur úr SSAust)
• Einar Guðmundsson (var utan félaga)

Allir þessir góðu félagar eru boðnir velkomnir í félagið.

 

Sigurbjörn í TV

Fidemeistarinn Sigurbjörn Björnsson er genginn til liðs við Taflfélag Vestmannaeyja. Hann hefur undanfarin 10 ár teflt fyrir Helli og þar á undan fyrir SH.  Sigurbjörn státar af allmörgum sigrum á skákferli sínum og má þar m.a. nefna að hann varð Skákmeistari Reykjavíkur árið 2007 auk þess sem hefur þrívegis deilt efsta sætinu á sama móti. Sigurbjörn hefur tvívegis unnið Haustmót TR og þrívegis hefur hann hampað sigri á Meistararmóti Hellis.  Auk þess varð hann nokkrum sinnum Skákmeistari Hafnarfjarðar.  Sigurbjörn náði sínum fyrsta alþjóðlega áfanga fyrir ári síðan á EM Taflfélaga í Slóveníu og fór svo yfir 2400 elóstig í seinni hluta Íslandsmóts Skákfélaga í mars síðastliðnum. Sigurbjörn mun án efa styrkja þétt lið Vestmannaeyinga í komandi deildarkeppni.

Guðfríður Lilja í Goðann

Guðfríður Lilja Grétarsdóttir, alþingismaður og fyrrverandi forseti Skáksambands Íslands, er gengin til liðs við Goðann. Félaginu er mikill akkur í atfylgi þessarar fjölhæfu afrekskonu enda er hún ein fremsta skákkona Íslands og hefur unnið skákíþróttinni mikið gagn.  Guðfríður Lilja vakti þegar á unga aldri athygli fyrir skákhæfileika sína.  

Kornung varð hún alþjóðlegur meistari og ellefu sinnum hefur hún hlotið sæmdarheitið Íslandsmeistari kvenna í skák. Guðfríður Lilja braut blað í skáksögu Íslands þegar hún var kjörin forseti Skáksambands Íslands árið 2004, fyrst kvenna, og hún varð einnig fyrst kvenna til að gegna formennsku í Skáksambandi Norðurlanda. Guðfríður Lilja hefur unnið ötullega að því að efla skákiðkun á Íslandi og endurvakti m.a. kvennalandslið Íslands í skák árið 2000. Hún er með BA-gráðu í sagnfræði frá Harvard og meistaragráðu í heimspeki frá Cambridge í Englandi.  

Hermann Aðalsteinsson, formaður Goðans: „Okkur er ljúft að bjóða skákdrottinguna Guðfríði Lilju velkomna í okkar raðir. Hið ötula starf hennar við útbreiðslu og eflingu skákíþróttarinnar er einstakt og við vonumst til þess að geta sótt til hennar góð ráð og innblástur á því sviði. Fyrst og fremst vonum við þó að Guðfríður Lilja eigi sem flestar ánægustundir við taflborðið og að hún njóti þess sem Goðinn hefur upp á að bjóða." 

Guðfríður Lilja: „Ég kveð Taflfélagið Helli með söknuði og þakklæti. Það er frábært félag. Nú er hins vegar komið að nýjum kaflaskilum í mínum skákferli og ég lít á inngöngu mína í Goðann sem upphafið að einhverju nýju og fersku. Goðinn hefur vakið athygli mína fyrir skemmtilegan liðsanda og kraftmikið félagsstarf.  Hér fæ ég tækifæri til  að rifja upp mannganginn í góðra vina hópi og hver veit nema þetta verði vel heppnuð innkoma í seinni helming míns skákferils. Skákin er falleg, skemmtileg og skapandi og ég á ekki von á öðru en að hún verði mér dyggur félagi út lífið.  Svo er það auðvitað borðleggjandi að hin klassíska skák er margfalt meira gefandi en refskák stjórnmálanna!"

Stefán Kristjánsson gengur í Víkingaklúbbinn

Stórmeistarinn Stefán Kristjánsson (2473) einn sigursælasti íslenski skákmaður síðustu ára gekk i vikunni til liðs við Víkingaklúbbinn, en Stefán var áður félagi í Taflfélagi Bolungarvíkur. Óþarfi er að telja upp öll afrek Stefáns á síðustu árum, en Stefán var útnefndur Stórmeistari á síðasta ári, þegar hann náði 2500 stiga markinu eftir kröftuga taflmennsku.  Stefán á eftir að auka skáklíf Víkingaklúbbsins í vetur, en Stefán er annar íslenski stórmeistarinn sem gengur í klúbbinn á árinu

Fjölgar hjá Víkingum

Hinn öflugi skákmaður Þorvarður Fannar Ólafsson (2202) gekk á þriðjudagskvöld í raðir Víkingaklúbbsins. Þorvarður Fannar er góður liðstyrkur fyrir Víkingaklúbbinn í baráttunni í deildarkeppninni í vetur, en Þorvarður var áður félagi í Skákdeild Hauka. Þorvarður er einnig frábær liðsmaður sem teflir allar skákir i liðakeppnum og er manna iðnastur við skákborðið, en hann varð nýlega öðlingur í skákinni (fertugur) og hélt upp á það með því að vinna Öðlingamótið 2012.  Það var vel við hæfi að Hafnfirðingurinn knái, vigðist í Víkingaklúbbinn á heimasvæði Golfklúbbsins Keilis í Hafnafirði. 

Skammt er stórra högga á milli, því fyrr í sumar gekk hinn þétti skákmaður og norski víkingur Hrannar Baldursson (2137) í Víkingaklúbbinn en Hrannar  var áður í Skákdeild KR og úr sjálfu Svíalandi eða Svíaríki kemur sænskur landi sjálfs Gláms, enginn annar en GM Emanuel Berg (2573), en hann gekk einnig í Víkingaklúbbinn í vikunni. 

sjá nánar á
http://vikingaklubburinn.blogspot.com/

Gawain Jones stafnbúi Goðans!

Í fornum ritum íslenskum er stafnbúa víða getið og þótti sæmdarheiti. Stafnbúar voru vígamenn er stóðu í stafni herskipa og var þeim falinn sá virðingarstarfi að aflífa sem flesta úr framvarðarsveit andstæðinganna. Hið rammíslenska skákfélag Goðinn hefur nú valið sér stafnbúa fyrir orrustur vetrarins. Sá er enskur og heitir Gawain Jones. Stafnbúanum er að fornum sið treyst til að þjarma að andstæðingum sínum á 1. borði Goðans á Íslandsmóti skákfélaga.

Gawain (2655) er einn af öflugustu skákmönnum Englendinga um þessar mundir þó að hann sé aðeins 24 ára að aldri. Ferill hans hefur verið afar farsæll. Hann ávann sér fyrst lýðhylli þegar hann lagði alþjóðlegan skákmeistara að velli, aðeins níu vetra. Nafnbótina stórmeistari hlaut hann svo áratug síðar. Gawain hefur vegnað vel á alþjóðlegum mótum, deildi m.a. fyrsta sæti á London Classic Open 2010 og sigraði á Breska samveldismótinu 2011. Leiktíðina 2011-2012 tefldi hann fyrir hið ágæta skákfélag Máta í fyrstu deild Íslandsmótsins og hlaut 5 vinninga af sex mögulegum. Í kjölfarið tók hann þátt í Alþjóðlega  Reykjavíkurskákmótinu í Hörpu þar sem hann hafnaði í 2.- 8. sæti. 

Gawain er maður víðförull og langförull eins og stafnbúa sæmir. Hann fæddist í Jórvíkurskíri en hefur búið á Ítalíu, Írlandi, Ástralíu og á Nýja-Sjálandi. Hann er fjölhæfur íþróttamaður, leikur tennis, hleypur vasklega og er vel liðtækur glímumaður. Það verður Goðanum því  ánægjuefni að efna til móts í íslenskri glímu, Gawain til heiðurs, þegar hann sækir Þingeyjarsýslurnar heim í haust og fróðlegt að sjá hvernig honum vegnar á þeim vettvangi. Einnig kemur til greina að Gawain tefli fjöltefli á vegum Goðans á Húsavík.

Í för með Gawain verður eiginkona hans, Sue Maroroa Jones. Sú mæta kona er nýsjálensk að uppruna og er ágæt skákona með 2035 elóstig. Sue mun án efa styrkja B-sveit Goðans með kunnáttu sinni og reynslu. 

Goðinn býður Sue og Gawain hjartanlega velkomin í raðir félagsins og væntir mikils af atfylgi þessara góðu gesta.