Tinna efst á Íslandsmóti kvenna

Tinna Kristín Finnbogadóttir vann Elsu Maríu Kristínardóttur í fimmtu umferð Íslandsmóts kvenna sem fram fór í dag.  Tinna er efst á mótinu með 4,5 vinning.  Lenka Ptácníková, sem vann Jóhönnu Björg Jóhannsdóttur, er önnur með 4 vinninga, og Hallgerður Helga Þorsteinsdóttir sem vann Nansý Davíðsdóttir, er í þriðja sæti með 3,5 vinning.

Sjötta og næstsíðasta umferð fer fram á morgun og hefst kl. 19.  Þá mætast m.a. Tinna-Hallgerður og Lenka-Elsa.

Skákir fimmtu umferðar

Úrslit 5. umferðar:

• Elsa María (3) - Tinna Kristín (3½) 0-1
• Lenka (3) - Jóhanna Björg (3) 1-0
• Nansý (2) - Hallgerður (2½) 0-1
• Veronika (2) - Svandís (1) 1-0
• Hrund (2) - Ásta Sóley (0) 1-0
• Hildur Berglind (1) - Donika (1) 0-1

 Staða efstu kvenna:

• 1. Tinna Kristín Finnbogadóttir 4½ v.
• 2. Lenka Ptácníková 4 v.
• 3. Hallgerður Helga Þorsteinsdóttir 3½
• 4.-7. Jóhanna Björg Jóhannsdóttir, Elsa María Kristínardóttir, Veronika Steinunn Magnúsdóttir og Hrund Hauksdóttir 3 v.

Röðun 6. umferðar (mánudagur kl. 19):

• Tinna (4½) - Hallgerður (3½)
• Lenka (4) - Elsa (3)
• Jóhanna (3) - Veronika (3)
• Nansý (2) - Hrund (3)
• Ásta (0) - Donika (2)
• Svandís (1) - Hildur (1)

• Heimasíða mótsins
• Beinar útsendingar
• Chess-Results

Henrik með 1,5 vinning í 2 skákum í dönsku deildakeppninni

Stórmeistarinn Henrik Danielsen tefldi tvær skákir í dönsku deildakeppninni um helgina.  Í þeirri fyrri vann hann stórmeistarann Allan Stig Rasmussen (2507) en í þeirri síðari gerði hann jafntefli við alþjóðlega meistarann Jan Sørensen (2426).

Henrik teflir á fyrsta borði fyrir klúbbinn BMS Skak.  Dönsku deildakeppninni verður framhaldið 2. desember nk.

Heimasíða dönsku deildakeppninnar

Æskan & ellin IX: Æskumaðurinn Oliver Aron vann sætan sigur

Hátíðlegur blær sveif yfir vötnunum á vetrardaginn fyrsta í Hásölum vinda að Strandbergi, Safnaðarheimili Hafnarfjarðarkirkju, í gær, er mótssetning 9. Skákmótsins Æskan og Ellin fór fram.

Það var RIDDARINN, skákklúbbur eldri borgara á höfuðborgarsvæðinu, sem stóð fyrir mótinu þar sem kynslóðirnar mætast.  Reyndar kom í ljós að það er ekki lengur neitt kynslóðabil að finna í skákinni, þrátt fyrir 70-80 ára aldursmun keppenda, það bil hefur þegur verið brúað fyrir löngu, þökk sé öflugu uppbyggingarstarfi skákhreyfingarinnar og skólaskák.   

Að loknum inngangsorðum Einars S. Einarsson, formanns mótsnefndar, sem bar hitann og þungan af mótshaldinu, setti Séra Þórhildur Ólafs, sóknarprestur mótið með fallegu ávarpi þar sem hún fór fögrum orðum um skáklistina og uppeldislegt gildi hennar. Hún bað þess "að blessun Guðs hvíldi yfir öllum þeim sem skáklistina stunda".   Síðan lék Sigurjón Pétursson, formaður sóknarnefndar fyrsta leikinn í skák þeirra Júlíusar Friðjónssonar og Andra Más Halldórssonar.  Verndari mótsins Sr. Gunnþór Ingason, fyrrv. sóknarprestur, vakti yfir mótinu með nærveru sinni og Gunnar Björnsson, forseti Skáksamband Íslands, var mættur á staðinn til að óska mótshöldurum til hamingju með framtakið og keppendum góðs gengis.  Páll Sigurðsson, alþjl. dómari, var skákstjóri og fórst það vel úr hendi að vanda.

Mottó mótsins var:  "Skák er mitt líf og yndi"  sem útleggst  "Að tefla er geðveikt gaman"  á unglingamáli.  Keppendur voru liðlega 60 talsins og alls voru tefldar 9. umferðir í striklotu með 7 mínútna umhugsunartíma á skákina.  Loftið í keppnissalnum var spennuþrungið, gleði og góður baráttusandi geislaði af andlitum jafnt yngri sem eldri. Vart mátti sjá fyrirfram hvernig úrslit féllu, sem urðu mörg hver svo óvænt að við lá að "áfallastreytuhliðrunarhugröskunar" gætti hjá stöku keppanda. Að lokinni mikilli orrahríð á hvítum reitum og svörtum var boðið til veislu en síðan lauk mótinu með verðlaunaafhendingu og veglegu vinningahappdrætti.  

Ljóst var frá byrjun að ungdómurinn ætlaði sér mikið í mótinu. Dagur Ragnarsson (15) leiddi mótið lengst af og lagði meðal annars af velli tvo fyrrv. sigurvegara þess, þá Braga Halldórsson og Jóhann Örn Sigurjónsson, sem og þann þriðja Gunnar Gunnarsson í lokaumferðinni.  En eftir tap fyrir Júlíusi Friðjónsyni í 8. umferð seig Oliver Aron Jóhannesson (14), sem fylgt hafði honum eins og skugginn, fram úr honum og vann mótið glæsilega með 8 vinningum af 9 mögulegum.  Vann alla þrjá fyrrv. sigurvegara líka og leyfði aðeins 2 jafntefli og vann að lokum dísætan sigur. Oliver fetar þar í slóð Hjörvars Steins Grétarssonar, sem vann mótið tvisvar í röð 2007 og 2008.  Báðir hafa þessir æskumenn unnið flokkaverðlaun á fyrri mótum, en sýndu nú hvers þeir eru orðnir megnugir. "Þeim fer stöðugt fram meðan sumum öðrum fer þeim mun meira aftur eftir því sem aldurinn færist yfir", eins og Gunni Gunn lét umælt í mótslok.   Í heildina tekið má segja að mótið tekist vel, farið einkar vel fram og verið öllum til ánægju sem þátt í því tóku, fylgdarliði og góðum gestum.. 

Aðalúrslit:

 1. Oliver Aron Jóhannesson 8v;

 2. Dagur Ragnarsson   7½v,

 3. Bragi Halldórsson     7v;

Aldurflokkaverðlaun:

80 ára og eldri:  Björn Víkingur Þórðarson 6v

76-80 ára: Gunnar Kr. Gunnarsson 6v

71-75 ára: Hermann Ragnarsson  6½v

60-70 ára: Bragi Halldórsson 7v.

13-15 ára:  Oliver Aron Jóhannesson 8v; Dagur Ragnarsson 7½v.; Gauti Páll Jónsson 6v;

10-12 ára: Nansý Davíðsdóttir 6v; Dawid Kolka 5½v; Jóhann Arnar Finnsson 5v;

9 ára og yngri: Vignir Vatnar Stefánsson 6v; Óskar Víkingur Davíðsson 5v; Joshua Davíðsson 5v.

Aukaverðlaun:

Elsti keppandinn: Sverrir Gunnarsson (85) 4v.

Yngsti keppandinn: Stefán Orri Davíðsson (6) 4v: 

Aðalstuðningsaðilar: Hafnarfjarðarkirkja; POINT á Íslandi; ÍSLANDSBANKI; JÓI ÚTHERJI; URÐUR bókaútgáfa; Hrói Höttur; GÓA sælgæti

Nánari úrslit : sjá meðf. myndir og mótstöflu og á www.riddarinn.net

 

 

Einstaklingsúrslit og fleira má finna á: http://chess-results.com/tnr83812.aspx?art=4&lan=1

Myndaalbúm (ESE)