Hilmir Freyr Heimisson sigraði á Meistaramóti Skákskóla Íslands

Hilmir Freyr Heimisson sigraði örugglega á meistaramóti Skákskóla Íslands sem lauk á sunnudagskvöldið. Hilmir hlaut 5 vinninga af sex mögulegum, hafði vinnings forskot fyrir lokaumferðina og gerði þá gerði jafntefli  Alexander Oliver Mai. Á mótinu var keppt í tveim styrkleikaflokkum en í efri flokkurinn var skipaður keppendur með 1600 elo stig og meira. Með sigrinum hreppti Hilmir Freyr sæmdarheitið meistari Skákskóla Íslands árið 2018. Hann vann mótið einnig í fyrra. Í flokknum voru tefldar sex umferðir með tímamörkunum 90 30.

Í 2. sæti varð sæti varð Aron Thor Mai með 4 ½ vinning og í 3. – 5. sæti urðu Stephan Briem, Alexander Oliver Mai og Björn Hólm Birkisson mer 3½ vinning.

Hilmir Freyr fékk farmiða að verðmæti 50 þúsund krónur og upphaldskostnað á skákmóti að verðmæti 35 þúsund.

 

Farmiðavinningur í stigaflokknum 1600-1800 komu í hlut Arnar Milutin Heiðarssonar og í flokki keppenda frá 1800-2000 elo stigum varð Stephan Briem hlutskarpastur. Bókaverðlaun hlutu Alexander Thor Mai, Björn Hólm Birkisson og Gauti Páll Jónsson.

Í flokki keppenda með 1600 elo sig og minna komu jafnir í mark Akureyringurinn Arnar Smári Signýjarson og Gunnar Erik Guðmundsson hlutu báðir 6 ½ vinning. Arnar Smári var hærri á stigum og hlaut því 1. verðlaun. Batel Goitom var ein efstir þegar tvær umferðir voru eftir, missti unnið tafl niður í tap gegn Þorsteini Magnússyni í 7. umferð í viðureign sem stóð í  u.þ.b. tvær og hálfa klukkustund. Hún tapaði svo óvænt fyrir Jósef Ómarssyni í lokaumferðinni.

Í 3. sæti í mótinu varð Þorsteinn Magnússon með 5 ½ vinning. Tefldar voru átta umferðir í neðri stigaflokknum og voru tímamörkin 30 30. 

Jósef Omarsson varð hlutskarpastur í flokki keppenda með 1200 elo stig og minna, hlaut 5 vinninga  en í 2. sæti var Anna Katarina Thoroddsen en hún hlaut 4 ½ vinning. Í 3. sæti varð  Jóhann Helgi Hreinsson.

Sérstök stúlknaverðlaun komu í hlut Batel Goitom og Iðunnar Helgadóttur.

Eins og nokkur undanfarin ár var GAMMA var að styrktaraðili mótsins og Agnar Tómas Möller forstjóri fyrirtækisins lék fyrsta leikinn í viðureign Björns Hólms Birkissonar og Hilmis Freys í 3. umferð. Þátttaka var góð en keppendur voru 39 talsins.

 

Skákstjórar  voru Helgi Ólafsson og Lenka Ptacnikova en þau nutu aðstoðar og ráðgjafar Páls Sigurðssonar, Kristófers Gautasonar, Þóris Benediktssonar og Omar Salama.   

Hraðkvöld hjá Hugin í kvöld

Hraðkvöld Hugins verður mánudaginn 28. maí nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur eða 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Minningarmót um Björn Sölva fer fram í dag

Vinaskákfélagið og Hrókurinn ætla að bjóða upp á þrjú minningar skákmót í sumar, en það eru minningarskákmót um Björn Sölva, Jorge Fonseca og Hauk Angantýsson. Glæsileg verðlaun verða, en fyrir utan venjulega verðlaunapeninga, þá ætlar Air Iceland Connect og Hrókurinn að verðlauna þann sem verður með besta skor úr öllum 3 minningar skákmótunum með miða til Grænlands að verðmæti 100.000 kr.

Ennfremur ætlar Vinaskákfélagið og Hrókurinn að bjóða 20.000 kr. verðlaun fyrir 2. sætið og 10.000 kr. fyrir 3. sætið. 

Skipuleggjandi mótanna verður Hrafn Jökulsson, en skákstjóri verður Hörður Jónasson. 

Fyrsta skákmótið verður minningarskákmót um Björn Sölva  og verður haldið mánudaginn 28 maí kl: 13, í Vin að Hverfisgötu 47.

Ekki hefur verið ákveðið hvenær hin 2 skákmótin verða, en það verður auglýst nánar síðar. 

Fide - meistarinn Björn Sölvi Sigurjónsson fæddist 26 janúar 1949 á skákdeginum sjálfum og lést á Landspítalanum þann 22. desember 2011 eftir veikindi. Hann varð því 61 árs.

Björn varð þrívegis skákmeistari Kópavogs auk þess að verða skákmeistari Reykjavíkur. 

Hann keppti einnig í bréfskák, m.a. á Ólympíumóti og á heimsmóti 1990 þar sem hann sigraði. Björn varð alþjóðlegur FIDE-meistari árið 1996 og skákmeistari Sjálfsbjargar 2000.

FIDE-meistarinn Björn Sölvi kom til liðs við Vinaskákfélagið 2007, en það ár tók félagið fyrst þátt í Íslandsmóti skákfélaga. Björn Sölvi var kallaður „jókerinn“ í liðinu.

Tefldar verða 6 umferðir með 7 mínútur á skák. Mótið verður reiknað til hraðskákstiga. 

Í hléi verður boðið upp á kaffi og vöfflur. Þið getið skráð ykkur á mótið á gula kassanum efst á síðunni á skak.is 

Einnig getið þið skráð ykkur á staðnum.

Upplýsingar um þegar skráða keppendur má finna hér.

Allir velkomnir!!

Gunnar endurkjörinn forseti SÍ - málþing haldið í haust

Gunnar Björnsson var sjálfkjörinn forseti Skáksambands Íslands í tíunda sinn á aðalfundi Skáksambandsins í gær. Gunnar jafnar því met Guðmundar G. Þórarinsson eftir þetta kjörtímabil en Guðmundur sat í 10 ár samtals í tveimur hlutum.

Með Gunnari í stjórn voru sjálfkjörin: Ingibjörg Edda Birgisdóttir, Omar Salama, Róbert Lagerman, Stefán Steingrímur Bergsson, Þorsteinn Stefánsson og Þórir Benediktsson. Þórir tekur sæti Björns Ívar Karlssonar í aðalstjórn. 

Í varastjórn voru kjörin: Óskar Long Einarsson, Kristófer Gautason, Gauti Páll Jónsson og Hörður Jónasson. Gauti tekur sæti Hjörvars Steins Grétarssonar. 

Fundurinn var í styttra lagi en hann tók um 1,5 klukkustundir. Pálmi R. Pétursson og Þorsteins Þorsteinsson drógu til baka í upphafi fundar tillögu sína um Íslandsmót skákfélaga um úrslitakeppni fjögurra efstu liða mótsins. Það var mat fundarstjóra um leið félli niður framkomin breytingatillaga um sex liða úrvalsdeild. Enn á ný gerist það á aðalfundi Skáksambands Íslands að ekki er tekin efnisleg afstaða til tillagna um Íslandsmót skákfélaga.

Í skýrslu forseta kom fram að starfsárið 2017-18. Hafi verið viðburðarríkt og árangur íslenskra skákmanna góður. 

Haldið hafi verið stórt og öflugt Reykjavíkurskákmótið, alþjóðlegt áfangamót (Norðurljósamótið) og alþjóðlegt unglingamót (minningarmót um Steinþór Baldursson). Á starfsárinu hafi einnig verið haldið vel heppnað Norðurlandamót stúlkna á Borgarnesi. SÍ stóð því fyrir fjórum alþjóðlegum mótum. 

GAMMA Reykjavíkurskákmótið hafi gengið vel og hliðarviðburðir hafi tekist einkar vel og þá sérstaklega Fischer-slembiskákarmótið og heimsókn Susan Polgar og stúlknaviðburðir henni tengdir. Færði forseti Sigurlaugu R. Friðþjófsdóttur, sérstakar þakkir fyrir hennar skipulagningu.

Gunnar sagði alþjóðlega unglingamótið hafa gengið vel og vonandi yrði framhald á því en Breiðablik hefur lýst yfir áhuga sínum á slíku mótahaldi.

Forseti sagði þátttökuleysi íslenskra áfangaveiðara á Norðurljósamótinu hafi ollið vonbrigðum og framhald slíks mótahalda ólíklegt að hálfu SÍ miðað við óbreyttar aðstæður. Gunnar hvatti í lokaræðu sinni íslensk skákfélög til dáða varðandi alþjóðlegt móthald og benti á að hér fyrr á árum hafi félögin hafi margoft haldið slík mót. Gunnar lofaði veglegum stuðningi Skáksambandsins við slíkt mótahald félaganna. 

Fjórir áfangar skiluðu sér í hús á starfsárinu. Bragi Þorfinnsson náði sínum lokaáfanga og varð fjórtándi íslenski stórmeistarinn. Davíð Kjartansson, Dagur Ragnarsson og Sverrir Þorgeirsson náðu allir áföngum að alþjóðlegum meistaratitli.

Jóhann Hjartarson varð Norðurlandameistari í skák og Lenka Ptácníková varð Norðurlandameistari kvenna. Nansý Davíðsdóttir varð Norðurlandameistari stúlkna og Oliver Aron Jóhannesson og Hilmir Freyr Heimisson urðu Norðurlandameistarar í skólaskák. Fimm norðurlandameistaratitlar í hús á starsárinu. 

Gunnar fór yfir komandi starfsár. Icelandic Open er framundan nú í júní. Ólympíuskákmót í september og sagðist forseti gera ráð fyrir að val íslensku liðanna yrðu tilkynnt fljótlega eftir mótið. Reykjavíkurskákmótið verður haldið í apríl nk. og Ísland haldi Norðurlandamót í skólaskák í febrúar nk. og vonandi í Borgarnesi. Upplýst var að Icelandic Open yrði haldið á Akureyri 2019 í tilefni 100 ára Skákfélags Akureyrar og fór Áskell Örn Kárason yfir metnaðarfullar fyrirætlanir Akureyringa um veglega afmælishátíð. 

Tímaritið Skák kemur út aftur í haust eftir smá hlé. Jafnframt upplýsti forseti að unnið sé að uppfærslu á Skák.is, heimasíðu Skáksambandsins og á mótaáætlun SÍ en allt megi bæta verulega. Er sú vinna nýhafin en vefsíðuhönnuður er Tómas Veigar Sigurðarson. 

Gunnar kom þá hugmynd að í haust yrði haldið málþing sem þar sem helstu mál skákhreyfingar yrðu rædd eins og útbreiðslustarf, staða skákarinnar á landsbyggðinni, sem er mörgum áhyggjuefni, afreksstefna og þá einnig fyrirkomulag Íslandsmót skákfélaga sem mörgum hugleikin. Var vel tekið í þá hugmynd.

Árskýrsla SÍ fyrir starfsárið 2017-18 er væntanlega á Skák.is næstu daga. Fundargerð aðalfundar verður birt þegar hún liggur fyrir. 

Hilmir Freyr efstur á Meistaramóti Skákskólans

Hilmir Freyr Heimisson er efstur eftir fjórar umferðir  af sex í flokki skákmanna eru yfir 1600 elo stig á Meistaramóti Skákskóla  Íslands. Hilmir, sem vann mótið í  fyrra með fullu húsi, hefur gert eitt jafntefli og unnið þrjár skákir og er því með 3 ½  vinning af fjórum mögulegum. Í fimmtu umferð sem hófst í morgun áttust við m.a. Hilmir Freyr og  Arnar Milutin Heiðarsson.

Staðan á Chess-Results.

Í flokki keppenda sem eru undir 1600 elo stigum stendur Arnar Smári Signýjarson best að vígi að loknum fimm umferðum af átta. Hann var með 4 ½  vinning af fimm mögulegum þegar sjötta umferð hófst kl. 10 í morgun og mætti þá Batel Goitom sem var með 4 vinninga eins og Gunnar Erik Guðmundsson og Þorsteinn Magnússon.  

Staðan á Chess-Results.

 

Skákþáttur Morgunblaðsins: Fjöltefli og Fiske-mót Vasjúkovs

Einn fyrsti skákviðburður sem greinarhöfundur sótti var fjöltefli rússneska stórmeistarans Evgení Vasjúkov, sem lést á dögunum 85 ára að aldri, sem átti sér stað í Samkomuhúsinu í Vestmanneyjum fyrir 50 árum – í júní árið 1968 en þá var þriðja Reykjavíkurskákmótinu ný lokið – Fiske-mótinu eins og það er stundum kallað. Samkomuhúsið var líka kvikmyndahús og þar voru einnig haldin hrikaleg böll eins og ég átti eftir að kynnast síðar. Fjölteflið dró til sín eitthvað rúmlega 20 manns sem þótti víst hálfgert „skrap,“ eins og það var orðað enda hásumar og Eyjamenn höfðu flestir öðrum hnöppum að hneppa. Sem 11 ára áhugamanni og áhorfanda á staðnum fannst mér athyglivert að nokkrir náðu góðum úrslitum þarna. Einn besti skákmaður Eyjamanna, Arnar Sigurmundsson, sagði mér síðar að eftirá hefði Vasjúkov verið boðið í heimahús og fjallað þar um nýafstaðið mót og vart komst önnur viðureign að en sú sem hann háði við Friðrik Ólafsson. Friðrik tefldi glæfralega og glæsilega, hlaut 10 vinninga af 14 mögulegum, og varð einn í þriðja sæti, ½ vinningi á eftir Vasjúkov og Mark Taimanov. Með sigri í skákinni sem tefld var í þriðju umferð hefði hann sennilega orðið einn efstur:

Friðrik Ólafsson – Evgení Vasjúkov

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O b5 6. Bb3 Bb7 7. He1 Bc5 8. c3 d6 9. d4 Bb6 10. a4 O-O 11. Bg5 h6 12. Bh4 He8 13. axb5 axb5 14. Hxa8 Bxa8 15. Dd3 exd4?

Arkhangelsk-afbrigðið var ekki mjög þróað á þessum árum og uppskipti á d4 oft hæpin í spænska leiknum. Vasjúkov sást yfir 17 leik Friðriks.

16. cxd4 g5 17. e5!

(STÖÐUMYND 1)

Hárbeittur leikur, hvítur hótar 18. Dg6+!

17. ... Kf8 18. Rxg5! hxg5 19. Bxg5 dxe5 20. Dh3! Dd6 21. Dh6+ Ke7 22. Dg7!

Nú fellur riddarinn á f6 því ekki dugar að valda f7-peðið, 22. ... Hf8 23. dxe5 Rxe5 24. Bxf6+ Dxf6 25. Hxe5+ og vinnur.

22. ... Kd7 23. Bxf6 Kc8

Og nú vinnur 24. Bxf7! létt t.d. 24. ... Dd4 25. Hf1! og hrókurinn á e8 á engan reit. Varla er hægt að skýra næsta leik Friðrik með öðru en tímahraki.

24. dxe5?? Db4!

Tvöfalt uppnám og taflið snýst algerlega við. Það sem eftir lifir skákar teflir Vasjúkov óaðfinnanlega.

25. Rd2 Dxd2 26. Hf1 Bxf2+! 27. Hxf2 De1+ 28. Hf1 De3+ 29. Kh1 Dxb3 30. h4 Rd4 31. Kh2 Dc2 32. Dg4 Kb8 33. Hf4 Re6 34. Hb4 Bc6 35. h5 Kb7 36. b3 Ha8 37. Dg3 Ha2 38. Hg4 Ha1 39. Hh4 Hf1 40. h6 Dc1 41. Dg4

– og gafst upp um leið, svartur mátar í tveim leikjum, 41. ... Hh1+ 42. Kg3 De1 mát.

Meðan á Fiske-mótinu '68 stóð tókst góður vinskapur með Vasjúkov og Taimanov og nokkrum árum síðar hélt Vasjúkov sem aðstoðarmaður með Taimanov til Vancouver í Kanada þar sem þessi fjölhæfi maður mætti örlögum sínum í hinu fræga einvígi við Fischer. Eftir einvígið var rifjuð upp ferð Fischers með með systur sinni til Moskvu vorið 1958 er hinn 15 ára gamli Bandaríkjameistarinn sat og malaði menn í hraðskák í stærsta skáklúbbi Moskvuborgar. Þá var kallað eftir „aðstoð“ og þeir mættu í klúbbinn Vasjúkov og Tigran Petrosjan. Vasjúkov gekk illa í byrjun þó það hafi lagast þegar á leið en Tigran Petrosjan reyndist baneitraður í hraðskákinni og hafði mun betur þegar upp var staðið.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 19. maí 2018

Skákþættir Morgunblaðsins

Minningarmót um Björn Sölva fer fram á mánudaginn

Vinaskákfélagið og Hrókurinn ætla að bjóða upp á þrjú minningar skákmót í sumar, en það eru minningarskákmót um Björn Sölva, Jorge Fonseca og Hauk Angantýsson. Glæsileg verðlaun verða, en fyrir utan venjulega verðlaunapeninga, þá ætlar Air Iceland Connect og Hrókurinn að verðlauna þann sem verður með besta skor úr öllum 3 minningar skákmótunum með miða til Grænlands að verðmæti 100.000 kr.

Ennfremur ætlar Vinaskákfélagið og Hrókurinn að bjóða 20.000 kr. verðlaun fyrir 2. sætið og 10.000 kr. fyrir 3. sætið. 

Skipuleggjandi mótanna verður Hrafn Jökulsson, en skákstjóri verður Hörður Jónasson. 

Fyrsta skákmótið verður minningarskákmót um Björn Sölva  og verður haldið mánudaginn 28 maí kl: 13, í Vin að Hverfisgötu 47.

Ekki hefur verið ákveðið hvenær hin 2 skákmótin verða, en það verður auglýst nánar síðar. 

Fide - meistarinn Björn Sölvi Sigurjónsson fæddist 26 janúar 1949 á skákdeginum sjálfum og lést á Landspítalanum þann 22. desember 2011 eftir veikindi. Hann varð því 61 árs.

Björn varð þrívegis skákmeistari Kópavogs auk þess að verða bæði Reykjavíkur- og Akureyrarmeistari.

Hann keppti einnig í bréfskák, m.a. á Ólympíumóti og á heimsmóti 1990 þar sem hann sigraði. Björn varð alþjóðlegur FIDE-meistari árið 1996 og skákmeistari Sjálfsbjargar 2000.

FIDE-meistarinn Björn Sölvi kom til liðs við Vinaskákfélagið 2007, en það ár tók félagið fyrst þátt í Íslandsmóti skákfélaga. Björn Sölvi var kallaður „jókerinn“ í liðinu.

Tefldar verða 6 umferðir með 7 mínútur á skák. Mótið verður reiknað til hraðskákstiga. 

Í hléi verður boðið upp á kaffi og vöfflur. Þið getið skráð ykkur á mótið á gula kassanum efst á síðunni á skak.is 

Einnig getið þið skráð ykkur á staðnum.

Upplýsingar um þegar skráða keppendur má finna hér.

Allir velkomnir!!

Skáksögufélagið: Helgi Ólafsson ritar skákævisögu Friðriks - Brjóstmynd af meistaranum steypt í eir

Skáksögufélag Íslands var stofnað 1. nóvember 2014 í tengslum við 150 ára afmælismót Einars Benediktssonar, skálds, að frumkvæði Hrafns Jökulssonar og fleiri. Stofnfélagar þess voru 64 en eru nú helmingi fleiri eða 128 talsins. Félagið er öllum opið.

Tilgangur félagsins er að vinna að því að sögu manntaflsins og skáklistarinnar á  Íslandi verði sem best til haga haldið. Þá skal félagið beita sér varðveislu hvers kyns skákminja og muna, að gögn sem varða íslenskt skáklíf verði varðveitt og saga þess og helstu skákmeistara okkar skráð, eins og segir í lögum þess.  

Þó lítið hafi farið fyrir starfsemi Skáksögufélagsins hefur að ýmsu verið unnið á þess vegum bak við tjöldin.  Fyrsta stóra viðfangsefni félagsins var að safna efni, skanna og byggja upp yfirgripsmikinn gangagrunn svo hægt væri að setja upp veglega vefsíðu um skák- og afreksferil  Friðriks Ólafssonar, fyrsta og fremsta skákmeistara okkar.  Heimasíðan var formlega opnuð af Illuga Gunnarssyni, þáverandi menntamálaráðherra  fyrir tveimur árum.  Um er að ræða afar fjölbreytta upplýsingasíðu með ótal gömlum blaðafréttum, viðtölum og greinum um meistarann, auk yfirlits um öll þau mörgu mót  sem hann tefldi á, nær allar skákir hans og  helstu mótherja. Heimasíðan er ríkulega skreytt ljósmyndum frá ferli Friðriks og úr íslensku skáklífi frá miðbiki síðustu aldar fram til þessa dags.  Til verksins naut Skáksögufélagið verkefnisstyrks frá Alþingi og Menntamálaráðuneytinu, sem nú hefur verið aukið við til nýrra viðfangsefna.  

Ber þar fyrst að nefna að nú er unnað að ritun og útgáfu Skákævisögu Friðriks Ólafssonar. Fyrir nokkru síðan var gerður samningur við Helga Ólafsson, stórmeistara, um að taka þetta verðuga verkefni að sér sem aðalritstjóri og höfundur. Áður höfðu nokkrir aðrir hafið það verk en ekki lokið.  Honum til halds og trausts eru í ritnefnd auk Friðriks, þeir Jón Þ. Þór og Jón Torfason, báðir kunnir sagnfræðingar og skákmenn góðir. Áformað er að bókin komi út að rúmu ári liðnu eða haustið 2019 og verði myndarlegur prentgripur. 

Þá stendur einnig fyrir dyrum að setja brjóstmynd meistarans á stall innan tíðar, en nú  er verið að steypa gifsmynd hennar í eir út í Moskvu. Styttan var gerð fyrir aldarfjórðungi af hinum kunna rússnesk/bandaríska myndhöggvara Peter Saphiro en hefur verið í geymslu um árabil. Það var Ólafur Egilsson, fyrrv. sendiherra, sem hafði milligöngu um gerð gifsstyttunnar á sínum tíma og hefur nú aðstoðað við láta steypa hana í bronz þar ytra. Minnismerkið myndi sóma  sér vel við útitaflið í miðborg Reykjavíkur, en Friðrik er heiðursborgari hennar, samþykki borgarstjórn væntanlega beiðni þar um.

 

Þá hefur einnig verið óskað eftir því við umhverfis- og skipulagsnefnd borgarinnar að fá að merkja goðsögninni Bobby Fischer bekk þar í grennd en verið er að hanna koparskilti með lágmynd hans til uppfestingar.  Sagt er að Bobby heitinn muni hafi vermt fleiri útibekki í miðborginni, við Skólavörðustíginn og kringum tjörnina en nokkur annar síðustu ár sín hér,   

Að lokum má geta þess að sú hugmynd hefur verið viðruð við borgarstjóra fyrir nokkru að efnt verði til alþjóðlegrar hönnunarsamkeppni um gerð stórrar  höggmyndar um „Einvígi aldarinnar“ eða allra tíma eins og það er nú nefnt, heimsmeistaraeinvígi þeirra Fischers og Spasskys, í skugga kalda stríðsins, hér í Reykjavík 1972.  Vel færi að að vígja mikilfenglegt útilistaverk því tengdu eigi síðar en á 50 ára afmæli þessa heimssögulega viðburðar sumarið 2022. Það myndi sóma sér vel t.d. vestan við Laugardalshöllina á horni Laugavegs og Reykjavegar.   Nú er kominn tími á að hrinda þessari gömlu hugmynd í framkvæmd enda bara eitt kjörtímabil til stefnu.

Stjórn Skáksögufélagsins skipa þeir: Einar S. Einarsson, forseti; Jón Þ. Þór, varaforseti;  Jón Torfason, Róbert Lagerman Harðarson og Guðmundur G. Þórarinsson;.

Fyrir þá sem vilja gerast félagar er bara að senda póst á netfang þess: [e-mail] Heimasíðan: www.skaksogufelagid.is eða www.fridrikolafsson.com.             

Aðalfundur SÍ fer fram á morgun

Aðalffundurinn Skáksambands Íslands verður haldinn laugardaginn 26. maí nk. kl. 10.00 fyrir hádegi í húsnæði TR, Faxafeni 12. 

Dagskrá:  Venjuleg aðalfundarstörf. 

Minnt er á 9. gr. laga S.Í., en sú grein hljóðar svo:

9. grein.

Við atkvæðagreiðslu á aðalfundi á hvert félag eitt atkvæði enda geti sýnt fram á a.m.k. 10 félagsmenn með lögheimili á Íslandi og geti sýnt fram á virka skákstarfsemi.  Eitt atkvæði bætist við hjá félagi fyrir hverja sveit sem það sendir í Íslandsmót skákfélaga það árið. Við atkvæðagreiðslu um kjörbréf í upphafi fundar skal gilda sú regla, að hvert félag fari ekki með fleiri atkvæði en það hafði á aðalfundi árið áður.  Enginn fulltrúi getur farið með meira en eitt atkvæði á fundinum.  Við atkvæðagreiðslur á aðalfundi ræður einfaldur meirihluti atkvæða, nema um þau mál sem sérstaklega eru tilgreind í þessum lögum.

Einnig skal bent á 6. grein: 

Standi aðildarfélag í gjaldfallinni skuld við sambandið hefur það ekki rétt til að eiga fulltrúa á aðalfundi.  Skákdeildir í félögum geta átt aðild að sambandinu, enda hafi þá minnst 10 menn bundist slíkum samtökum.  Heimilt er tveimur eða fleiri aðildarfélögum í sama landshluta að stofna með sér svæðissamband.

Hjálagt: Lagabreytingatillögur og ársreikningur SÍ

 

Icelandic Open - Íslandsmótið í skák - minningarmót um Hemma Gunn hefst 1. júní

Icelandic Open - Íslandsmótið í skák fer fram dagana 1.-9. júní nk. Teflt verður Valsheimilinu við Hlíðarenda við frábærar aðstæður í veislusal hússins. Mótið fer eftir sama fyrirkomulagi og mótið 2013 í Turninum árið sem var 100 ára afmælismót Skákþings Íslands. Þá sigraði Hannes Hlífar Stefánsson eftir að hafa lagt Björn Þorfinnsson að velli í úrslitaeinvígi. Björn krækti sér hins vegar í stórmeistaraáfanga á mótinu. Teflt verður til minningar um Hemma Gunn - en hann einmitt lést á mótið fór fram í Turninum 2013. 

Nú þegar stórmeistararnir Hannes Hlífar Stefánsson, Bragi Þorfinnsson og Þröstur Þórhallsson skráð til leiks sem og alþjóðlegu meistararnir Jón Viktor Gunnarsson, Björn Þorfinnsson og Einar Hjalti Jensson. Mótið núna er jafnframt Íslandsmót kvenna og hefur Lenka Ptácníková, stórmeistari kvenna, skráð til leiks. 

Mótið er opið öllum íslenskum sem og erlendum skákmönnum. Tefldar verða 10 umferðir og má finna umferðartöflu mótsins hér. Hægt er að taka tvær hálfs vinnings yfirsetur í umferðum 1-7. 

Þátttökugjöld eru 10.000 kr. Stórmeistarar og alþjóðlegir meistarar fá frítt. FIDE-meistarar og unglingar 16 ára og yngri fá 50% afslátt. Allar skákkonur frá frítt í mótið. 

Góð verðlaun eru á mótinu eða samtals €7.500 eða um 950.000 kr. 

Allar nánari upplýsingar má nálgast á heimasíðu mótsins sem eins og er aðeins á ensku. Hægt er að skrá sig Skák.is (guli kassinn). Skákmenn eru hvattir til að skrá sig til leiks sem fyrst.